ပြည်တွင်းကုန်သွယ်မှုသတင်း

   ရန်ကုန်တိုင်းဒေသကြီးသို့ ပြည်နယ်နှင့် တိုင်းဒေသကြီးအသီးသီးမှဝင်ရောက်လာသည့် ကြက်သွန်နီများသည် အနောက်ပိုင်းခရိုင်၊ စားသုံးသူရေးရာဦးစီးဌာန၏ ကွပ်ကဲမှုအောက်ရှိ ဘုရင့်နောင်ကုန်စည်ဒိုင်သို့ နေ့စဉ် မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ၏  ကြက်သွန်နီလက်ကျန်အခြေအနေတို့ကို  အမှန်ကန်ဆုံးသိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀) ရုံအား မေးမြန်းချက်များအရလည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီ နေ့စဉ် ဝင်ရောက်မှုစာရင်းများအရလည်းကောင်း၊ ကြက်သွန်နီလက်ကျန်အခြေအနေတို့ကို နေ့စဉ် စုံစမ်းလျက်ရှိပါသည်။ ၂၀၂၃ခုနှစ်၊ အောက်တိုဘာလ (၇) ရက်နေ့မှ အောက်တိုဘာလ (၁၃) ရက်နေ့အထိ ဘုရင့်နောင်ကုန်စည်ဒိုင်သို့ ကြက်သွန်နီဝင်ရောက်ရာဒေသများဖြစ်သည့် ဆိတ်ဖြူ၊ မြင်းခြံ၊ ပျော်ဘွယ်ဒေသတို့မှ ကြက်သွန်နီ (၆၄၈၀၀၀) ပိဿာဝင်ရောက်ခဲ့ပြီး (၆၀) ရာခိုင် နှုန်းခန့်ပြန်လည်စီးထွက်မှုရှိကြောင်း ကုန်စည်ဒိုင်သတင်းအရသိရှိရသည်။ ကြက်သွန်နီဈေးနှုန်းအနေဖြင့် ဆိတ်ဖြူကြက်သွန်နီ (အသစ်) အချောတစ်ပိဿာလျှင် ကျပ်၁၈၀၀၊ အသန့်တစ်ပိဿာလျှင် ကျပ် ၂၇၀၀၊ အကြီးတစ်ပိဿာလျှင် ကျပ်၂၈၀၀၊ ရှယ်တစ်ပိဿာလျှင် ကျပ်၃၂၀၀၊ မြင်းခြံကြက်သွန်နီ (အသစ်) ‌အချောတစ်ပိဿာလျှင် ၁၅၀၀၊ အသန့်တစ်ပိဿာလျှင် ကျပ်၂၀၀၀၊ အကြီးတစ်ပိဿာလျှင် ကျပ်၂၂၀၀ရှိကြောင်းနှင့် ပျော်ဘွယ်ကြက်သွန်နီ (အသစ်) အချောတစ်ပိဿာလျှင် ကျပ်၁၅၀၀၊ အသန့်တစ်ပိဿာလျှင် ကျပ်၂၅၀၀၊ အကြီးတစ်ပိဿာလျှင် ကျပ်၂၆၀၀နှင့် ရှယ်တစ်ပိဿာလျှင် ကျပ်၂၉၀၀ဈေးတို့ရှိကြောင်း စုံစမ်းသိရှိရပါသည်။

DOCA(ရန်ကုန်)

   ဈေးကွက်အတွင်းတွင် အိမ်ရှင်မများချက်ပြုတ်စားစရာ အရန်ဟင်းတစ်မျိုးဖြစ်သော ငွေနှင်းမှိုကို ရောင်းချလျက်ရှိရာ ငွေနှင်းမှိုအား စိုက်ပျိုး၍ရောင်းချသူများအနေဖြင့်  မှိုမျိုးစေ့ထုတ် တစ်ထုပ်လျှင် (၇၅၀)ကျပ်ဖြင့်ဝယ်ယူ၍ မိမိအိမ်တွင် တနိုင်တပိုင်စိုက်ပျိုးရောင်းချကြသဖြင့် တစ်ဖက်တစ်လမ်းမှ ဝင်ငွေရရှိနေသော စီးပွားရေးလုပ်ငန်းတစ်ခုဖြစ်ပါသည်။ မှိုမျိုးစေ့ထုပ်များအား အမိုးရှိ၍ အေးသောနေရာတွင်ထားပြီး အထုပ်စိုရုံ ရေကို တစ်နေ့နှစ်ကြိမ်ဖျန်းပေးခြင်းအားဖြင့် ထူးထူးခြားခြား ဆေးကျွေးစရာမလိုဘဲ အဖူးများထွက်ရှိလာကာ (၂)ရက်အကြာတွင် စတင်ခူးဆွတ်နိုင်ပါသည်။ မှိုမျိုးစေ့တစ်ထုပ်လျှင် အနည်းဆုံး (၃၀)ကျပ်သားအထိ ထွက်ရှိပါသည်။ မှိုစေ့အထုပ် သက်တမ်းမှာ (၄)လခန့်ကြာပြီး တစ်လလျှင် (၄)ကြိမ် ပုံမှန်ခူးဆွတ်နိုင်သည်ဟုသိရပါသည်။ ထိုသို့ မှိုကိုစိုက်ပျိုးရာတွင် နေရာအကျယ်အဝန်းများများစားစားမလို အရင်းအနှီးနည်းနည်းဖြင့် မိသားစုတနိုင်တပိုင်ဝင်ငွေရရှိနိုင်သောကြောင့် ငွေနှင်းမှိုအား စိုက်ပျိုးသင့်ပါသည်။

    ယခုအခါ ဈေးကွက်အတွင်းတွင် ငွေနှင်းမှို တစ်ပိသာလျှင် (၅၀၀၀)ကျပ်ဈေးဖြင့် အရောင်းအဝယ် ဖြစ်လျက်ရှိကြောင်း သိရှိရပါသည်။

DOCA(ပဲခူး)

  ရန်ကုန်တိုင်းဒေသကြီး၊ ဘုရင့်နောင်ကုန်စည်ဒိုင်၌ (၁၂-၁၀-၂၀၂၃) ရက်နေ့မှ (၁၈-၁၀-၂၀၂၃) ရက်နေ့အတွင်း ဖြစ်ပေါ်ခဲ့သောရေထွက်စားသောက်ပစ္စည်းများအနက် ပုစွန်ခြောက်ဈေးနှုန်းများမှာ ဖျာပုံရွှေပုစွန် (ရှယ်) ၁ပိဿာလျှင် ၇၅၀၀၀/-ကျပ်မှ ၈၅၀၀၀/-ကျပ်အထိလည်းကောင်း၊ ဖျာပုံရွှေပုစွန် (ရိုးရိုး) ၁ပိဿာလျှင် ၆၀၀၀၀/-ကျပ်မှ ၇၀၀၀၀/- ကျပ်အထိလည်းကောင်း၊ ဖျာပုံချိုကြီး (ရှယ်) ၁ပိဿာလျှင် ၅၀၀၀၀/-ကျပ်မှ ၅၅၀၀၀/-ကျပ်အထိလည်းကောင်း၊ ဖျာပုံချိုသေး (ရှယ်) ၁ ပိဿာလျှင် ၄၃၀၀၀/-ကျပ်မှ ၄၅၀၀၀/- ကျပ်အထိလည်းကောင်း၊ ဖျာပုံချိုသေး (ရိုးရိုး) ၁ပိဿာလျှင် ၂၅၀၀၀/-ကျပ်မှ ၃၀၀၀၀/-ကျပ်အထိလည်းကောင်း၊ ရခိုင်ရွှေပုစွန် (ရှယ်) ၁ပိဿာလျှင် ၅၅၀၀၀/-ကျပ်မှ ၆၅၀၀၀/- ကျပ်အထိလည်းကောင်း၊ ရခိုင်ရွှေပုစွန် (ရိုးရိုး) ၁ပိဿာလျှင် ၄၀၀၀၀/-ကျပ်မှ ၄၅၀၀၀/-ကျပ်အထိလည်းကောင်း အသီးသီးဖြစ်ပေါ်ခဲ့ပြီး ရေချိုငါးခြောက်ဈေးနှုန်းများမှာ ငါးကျည်းကြပ်တိုက် (ကြီး) ၁ပိဿာလျှင် ၆၀၀၀၀/-ကျပ်မှ ၇၀၀၀၀/-ကျပ်အထိလည်းကောင်း၊ ငါးကျဉ်းကြပ်တိုက် (သေး) ၁ပိဿာလျှင် ၄၀၀၀၀/-ကျပ်မှ ၄၅၀၀၀/-ကျပ်အထိလည်းကောင်း၊ ငါးမွေထိုးခြောက် ၁ပိဿာလျှင် ၂၅၀၀၀/-ကျပ်မှ ၃၀၀၀၀/-ကျပ်အထိလည်းကောင်း၊ ငါးရံ့ခြောက် (ကြီး) ၁ပိဿာလျှင် ၆၀၀၀၀/-ကျပ်မှ ၆၅၀၀၀/-ကျပ်အထိလည်းကောင်း၊ ငါးရံ့ခြောက် (လတ်) ၁ပိဿာလျှင် ၄၀၀၀၀/-ကျပ်မှ ၄၅၀၀၀/-ကျပ်အထိလည်းကောင်း၊ ငါးရံ့လုံးခြောက် ၁ပိဿာလျှင် ၂၅၀၀၀/-ကျပ်မှ ၃၀၀၀၀/-ကျပ်အထိရှိခဲ့ပြီး ရေငံငါးခြောက်ဈေးနှုန်းများမှာ ငါးကွမ်းရှပ် ၁ပိဿာလျှင် ၂၀၀၀၀/-ကျပ်မှ ၂၅၀၀၀/-ကျပ်အထိလည်းကောင်း၊ ငါးတံခွန် (မျင်းကြီး) ၁ပိဿာလျှင် ၄၀၀၀၀/-ကျပ်မှ ၄၃၀၀၀/-ကျပ်အထိလည်းကောင်း၊ ငါးတံခွန် (လုံး) ၁ပိဿာလျှင် ၂၀၀၀၀/-ကျပ်မှ ၂၃၀၀၀/-ကျပ်အထိလည်းကောင်း၊ ငါးပုတ်သင်ခြောက် ၁ပိဿာလျှင် ၈၀၀၀/-ကျပ်မှ ၁၀၀၀၀/-ကျပ်အထိလည်းကောင်း၊ ငါးရောင် (ကြီး) ၁ပိဿာလျှင်မှ ၃၀၀၀၀/-ကျပ်မှ ၃၃၀၀၀/-ကျပ်အထိလည်းကောင်း၊ ငါးရောင် (လတ်) ၁ပိဿာလျှင် ၂၅၀၀၀/-ကျပ်မှ ၂၇၀၀၀/-ကျပ်အထိလည်းကောင်း၊ ငါးမြီးတံသွယ် ၁ပိဿာလျှင် ၄၀၀၀/-ကျပ်မှ ၄၅၀၀/-ကျပ်အထိလည်းကောင်း အသီးသီးဖြစ်ပေါ်ခဲ့ပြီး ဈေးနှုန်းများမှာ ယခင်အပတ်နှင့်နှိုင်းယှဉ်လျှင် အနည်းငယ်ကျဆင်းလျက်ရှိကြောင်းသိရှိရပါသည်။

DOCA(ရန်ကုန်)

      ပြည်မြို့ရှိဈေးများတွင် မိုးရာသီကာလဖြစ်သဖြင့် သီးနှံများ အရောင်းအဝယ် ဖြစ်လျက်ရှိပါသည်။ မိုးရာသီတွင် ပေါ်သောသီးနှံများဖြစ်သည့် ငရုတ်သီး၊ သခွားသီး၊ ချဉ်ပေါင်ရွက်၊ ကန်စွန်းရွက်၊ ခရမ်းသီး၊ ရွှေဖရုံသီး၊ ကျောက်ဖရုံသီး၊ ရုံးပတီသီး အစရှိသော သီးနှံမျိုးစုံ ရောင်းဝယ်ဖောက်ကားလျက်ရှိပါသည်။ ထိုသီးနှံမျိုးစုံထဲတွင် လူအများဟင်းချက်ရာတွင်အသုံးပြုသော ငရုတ်သီးလည်း အပါအဝင်ဖြစ်ပါသည်။ ငရုတ်သီးစိမ်းကို ပြည်ဒေသအနီးတဝိုက်ဖြစ်သော မှော်ဇာဒေသမှ အများဆုံးလာရောက် ရောင်းချကြသလို ပြည်မြို့အတွင်းရှိ ဥယျာဉ်ခြံမြေများထဲမှလည်း စိုက်ပျိုးထားသော ငရုတ်သီးများကို လာရောက်ရောင်းချကြောင်း သိရပါသည်။ ထိုငရုတ်သီးစိမ်းများထဲတွင် ညောင်ရမ်းငရုတ်သီး၊ ကျောက်စိမ်းငရုတ်သီး၊ ရခိုင်ငရုတ်သီးနှင့် ပီနန်သီးဟူ၍ အမျိုးမျိုးရှိပါသည်။ ညောင်ရမ်းငရုတ်သီးစိမ်းကို မျိုးယူ၍စိုက်ပျိုးကြသလို ရခိုင်ငရုတ်သီးစိမ်းကိုလည်း စိုက်ပျိုး ကြပါသည်။ လူအများစုမှာ ငရုတ်သီးဆိုလျှင်စပ်မှဆိုသလို အစပ်သီးကို လူအသုံးများကြပါသည်။ ညောင်ရမ်းငရုတ်သီးမှာ အစပ်မျိုးဖြစ်သလို ပီနန်ငရုတ်သီးမှာလည်း အစပ်မျိုးဖြစ်ပါသည်။ ငရုတ်သီးဈေးနှုန်းအနေဖြင့် ညောင်ရမ်းငရုတ်သီးစိမ်း တစ်ပိဿာလျှင် (၃၀၀၀)ကျပ်၊  ပီနန်ငရုတ်သီးစိမ်း တစ်ပိဿာလျှင်(၇၀၀၀)ကျပ်ဈေးဖြစ်၍ ဈေးကွာသဖြင့် အစပ်တူ၍ဈေးနည်းသော ညောင်ရမ်းငရုတ်သီးကို လူအများကဝယ်ယူသုံးစွဲကြပါသည်။ ကျောက်စိမ်းငရုတ်သီးစိမ်းမှာ တစ်ပိဿာ (၂၀၀၀)ကျပ် ဖြင့်ရောင်းချသလို ရခိုင်ငရုတ်သီးစိမ်းမှာ တစ်ပိဿာလျှင် (၃၀၀၀)ကျပ်ဖြင့်ရောင်းချကြောင်း သိရပါသည်။

DOCA(ပဲခူး)

    ၂၀၂၃ခုနှစ်၊ အောက်တိုဘာလ ပြည်ဈေးကွက်အတွင်း ဘိုကိတ်ပဲသီးနှံမှာ လက်လီ၊ လက်ကားဖြင့် ပဲလက်ကျန်များနေ့စဉ်ရောင်းဝယ်မှု ဖြစ်ခဲ့ကြပါသည်။ ပဲဝင်ရောက်ခြင်းမရှိသော်လည်း လက်ကျန်ပဲအချို့ရှိသောကြောင့် လက်လီအဝယ်သမားများဖြင့် နေ့စဉ်တစ်ရက် အိတ်(၂၀)ကျော် ရောင်းဝယ်မှုဖြစ်သလို လက်ကားသမားများလည်း အဝယ်ရှိခဲ့ပါသည်။ လက်ကားသမားအဝယ် ရှိသည့်ရက်၌ အိတ်(၅၀/၁၀၀)ကျော် အရောင်းအဝယ်ဖြစ်ခဲ့သည်ဟု သိရပါသည်။ ပြည်ဈေးကွက်၏ ဒေသတွင်းဝယ်လက်များဖြင့် အရောင်းအဝယ်ဖြစ်သည့်ပဲသီးနှံများထဲတွင် ဘိုကိတ်ပဲသီးနှံဈေးအနေဖြင့် အခြားပဲဈေးများထက် လျော့နည်းအရောင်းအဝယ်ဖြစ်ခဲ့ပါသည်။ ပဲ တစ်တင်းလျှင် (၇၀၀၀၀)ကျပ်ဖြင့် ရောင်းဝယ်နေရသည့်အတွက် ယခင်နှစ်ဈေးထက်တော့ ဈေးပိုရရှိခဲ့ပါသည်။ ယခင်နှစ်က အောက်တိုဘာလအတွင်း ဘိုကိတ်ပဲသီးနှံဈေးသည် တစ်တင်းလျှင် (၄၂၀၀၀)ကျပ်ခန့်သာရရှိခဲ့သည်ဟု သိရပါသည်။

DOCA(ပဲခူး)