ပြည်တွင်းကုန်သွယ်မှုသတင်း

Powered by Drupal

ကျွန်းလှမြို့တွင် ရောင်းချလျက်ရှိသော လဖက်အစားထိုး ကြက်တက်ရွက်ပြုတ်နှင့် ကြက်မောက်ဖြူရွက်ပြုတ်ဈေးနှုန်း

ပြည်တွင်းကုန်သွယ်မှုသတင်း

        ကျွန်းလှမြို့၊ ပိတောက်မြိုင်ဈေးတွင် ကြက်တက်ရွက်ပြုတ် ရောင်းချလျက်ရှိပါသည်။ ကြက်တက်ရွက်နှင့် ကြက်မောက်ဖြူရွက်တို့မှာ မိုးဦးကျစတွင် စတင် ပေါက်ရောက်လေ့ရှိသော အရွက်မျိုးလည်းဖြစ်ပါသည်။

              ရာသီစာ ကြက်တက်ရွက်ပြုတ်သည် လူကြိုက်များသော လဖက်အစားထိုး သရေစာတစ်မျိုး ဖြစ်ပါ သည်။  ၂၀၂၅ ခုနှစ်၊ ဇူလိုင်လ ပထမပတ်အတွင်း ပိတောက်မြိုင်ဈေးတွင် ရောင်းချနေသော ကြက်တက်ရွက်ပြုတ်  ဈေးနှုန်းအနေဖြင့်  တစ်ပိသာလျှင် (၅၀၀၀)ကျပ်၊ (၅၀)ကျပ်သားလျှင်(၂၅၀၀)ကျပ် နှင့် (၁၀)ကျပ် သားလျှင်(၅၀၀)ကျပ် ဈေးနှုန်းဖြင့်လည်းကောင်း၊ ကြက်မောက်ဖြူရွက်ပြုတ် တစ်ပိဿာလျှင်(၄၅၀၀)ကျပ်၊ (၅၀)ကျပ်သားလျှင်(၂၅၀၀)ကျပ်နှင့် ကြက်မောက်ဖြူ ရွက်ပြုတ် (၁၀)ကျပ်သားခန့် တစ်လုံးလျှင် (၅၀၀) ကျပ် ဈေးနှုန်းတို့ဖြင့် ရောင်းချလျက်ရှိကြောင်း မိုးရွာသွန်းသည့်အတွက် ကြက်တက်ရွက်နှင့် ကြက်မောက် ဖြူရွက်များ လှိုင်လှိုင်ထွက်ရှိပြီး အ‌ရောင်းအဝယ် ဖြစ်လျက်ရှိကြောင်း သိရှိရပါသည်။

DOCA(စစ်ကိုင်း)

ကျွန်းလှမြို့၌ ရောင်းချနေသော ကျောက်သခွားမွှေးသီး နှင့် စပျစ်သီးဈေးနှုန်း

ပြည်တွင်းကုန်သွယ်မှုသတင်း

          ကျွန်းလှမြို့တွင် သစ်သီးမျိုးစုံဖြစ်သည့် နာနတ်သီး၊ နဂါးမောက်သီး၊ သရက်သီး၊ ငှက်ပျောသီး၊ စပျစ်သီး၊ သခွားမွှေးသီး၊ ကျောက်သခွားမွှေးသီး၊ ပန်းသီး၊ ပန်းသစ်တော်သီး၊ မင်းဂွတ်သီး၊  ဒညှင်းသီး  နှင့် ဖရဲသီးများကို  မန္တလေးမြို့နှင့် လားရှိုးမြို့တို့မှ မှာယူရောင်းချလျက်ရှိ ကြောင်းသိရသည်။

          ၂၀၂၅ ခုနှစ်၊ ယခု ဇူလိုင်လ ပထမပတ်အတွင်း ဖြစ်ပေါ်နေသော ကျွန်းလှမြို့၏ ကျောက်သခွားမွှေးသီး၏ ဈေးနှုန်းများမှာ အကြီး(၁)လုံးလျှင်(၆၀၀၀)ကျပ်၊ အလတ်(၁)လုံး လျှင်(၅၀၀၀)ကျပ် နှင့် အသေး(၁)လုံးလျှင်(၄၀၀၀)ကျပ် ဈေးနှုန်း တို့ဖြင့်လည်းကောင်း၊ စပျစ်သီး ဈေးနှုန်းများမှာ အလုံးကြီး လက္ကား တစ်ပိဿာ လျှင်(၂၂၀၀၀)ကျပ်၊ လက်လီ တစ်ပိဿာ လျှင်(၂၄၀၀၀) ကျပ်၊ စပျစ်သီး(၅၀)ကျပ်သားလျှင် (၁၂၀၀၀)ကျပ် နှင့် စပျစ်သီး(၂၅)ကျပ်သားလျှင်(၆၀၀၀)ကျပ် ဈေးနှုန်းတို့ဖြင့်‌ လည်းကောင်း၊ စပျစ်သီး အလုံးသေး လက္ကား တစ်ပိဿာလျှင်(၁၈၀၀၀)ကျပ်၊ စပျစ်သီး အလုံးသေး လက်လီ တစ်ပိဿာလျှင် (၂၀၀၀၀)ကျပ်နှင့် (၅၀)ကျပ်သားလျှင်(၁၀၀၀၀)ကျပ် (၂၅)ကျပ်သားလျှင် (၅၀၀၀)ကျပ် အရောင်းအဝယ် ဖြစ်လျက်ရှိကြောင်း သစ်ရာမြိုင် ဈေးတိုက်တန်းတွင် သစ်သီးမျိုးစုံ ရောင်းချနေသော ဈေးသည် တစ်ဦးထံမှ သိရှိရပါသည်။

DOCA(စစ်ကိုင်း)

သစ်ရာမြိုင်ဈေးအတွင်း ရောင်းချနေသော ကန်ဇွန်းဥ ဈေးနှုန်း

ပြည်တွင်းကုန်သွယ်မှုသတင်း

       ကျွန်းလှမြို့နယ်အတွင်းရှိ ကျေးရွာများတွင် စိုက်ပျိုးရေးကို အဓိကထားလုပ်ကိုင်ကြရာမှ စားဖို ဆောင်သီးနှံဖြစ်သည့် ကန်ဇွန်းဥကို တစ်ပိုင်တစ်နိုင် မိသားစု အိမ်ခြံမြေများနှင့် မိမိပိုင်ယာမြေများတွင် သာ စိုက်ပျိုးကြပြီး သစ်ရာမြိုင်ဈေးသို့  ရောင်းချလျက်ရှိကြောင်း သိရသည်။

          ၂၀၂၅ ခုနှစ်၊ ဇူလိုင်လ ပထမပတ်တွင် ကျွန်းလှမြို့၊ သစ်ရာမြိုင်ဈေးအတွင်း ဖြစ်ပေါ်နေသော  ကန်ဇွန်းဥဈေးနှုန်းမှာ ကန်ဇွန်းဥ လက္ကားဈေး တစ်ပိဿာလျှင်(၃၀၀၀)ကျပ်၊ လက်လီ တစ်ပိဿာ လျှင်(၃၂၀၀)ကျပ်၊ ၅၀ကျပ်သားလျှင်(၁၅၀၀)ကျပ် နှင့် ၂၅ကျပ်သားလျှင်(၈၀၀)ကျပ် ဈေးနှုန်း များဖြင့် ရောင်းချလျက်ရှိပြီး ယခင်အပတ်ထက် လက္ကားဈေးအနည်းငယ်မြင့်တက်ပြီး အရောင်းအဝယ် ဖြစ်နေကြောင်း သိရှိှိရသည်။

DOCA(စစ်ကိုင်း)

တောင်ဒဂုံမြို့အတွင်းရှိ စားအုန်းဆီ လက်လီ/လက်ကားရောင်းချနေသော ကုန်စုံဆိုင်များသို့ ကွင်းဆင်းစစ်ဆေးခြင်း

ပြည်တွင်းကုန်သွယ်မှုသတင်း
စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဦးသိန်းထွန်း (ဌာနခွဲစာရေး)နှင့် ဝန်ထမ်းများ၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ ၂၀၂၅ ခုနှစ်၊ ဇူလိုင်လ ၈ ရက်နေ့၊ နေ့လယ်(၁၃:၀၀) နာရီအချိန်တွင် တောင်ဒဂုံမြို့အတွင်းရှိ စားအုန်းဆီ လက်လီ/ လက်ကား ရောင်းချနေသော ကုန်စုံဆိုင်များသို့ သွားရောက်ကွင်းဆင်းစစ်ဆေးခြင်းများ ပြုလုပ်ခဲ့ကြောင်း သိရှိရပါသည်။ ထိုသို့ ကွင်းဆင်းဆောင်ရွက်ရာတွင် စားအုန်းဆီခွဲတမ်းများကို သတ်မှတ်စည်းမျဉ်း စည်းကမ်းများနှင့် အညီ စနစ်တကျဖြန့်ဖြူးရောင်းချရန်၊ ခွဲတမ်းရရှိသည့်ဆိုင်များအနေဖြင့် ဈေးနှုန်းကို အများမြင်သာသောနေရာများတွင် ထင်ရှားသော စာလုံးအရွယ်အစားများဖြင့် Vinyl ချိတ်ဆွဲထားရှိရန်၊ စားအုန်းဆီလက်လီ/လက်ကား ရောင်းချလျက်ရှိသော လုပ်ငန်းရှင်များအနေဖြင့် သက်ဆိုင်ရာဌာနများ၏ ထုတ်ပြန်ထားသည့် အမိန့်၊ ညွှန်ကြားချက်များနှင့်အညီ ရောင်းချဖြန့်ဖြူးကြရန် တို့ကို ရှင်းလင်းပြောကြားခဲ့ကြောင်း သိရှိရပါသည်။ DOCA(ရန်ကုန်)

“ ကော့မှူးမြို့နယ်၌ယခုနှစ်တွင်မိုးစပါး(၈၈၀၈၇)ဧကလျာထားစိုက်ပျိုးမည်”

ပြည်တွင်းကုန်သွယ်မှုသတင်း
ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၌ ယခုနှစ်တွင် စပါးမျိုးကောင်း မျိုးသန့်တိုးပွားစေရန်နှင့် ဆန်စပါးဖူလုံစေရန် ရည်ရွယ်၍ မိုးစပါး (၈၈၀၈၇)ဧက လျာထားစိုက်ပျိုးမည် ဖြစ်ကြောင်း မြို့နယ်စိုက်ပျိုးရေးဦးစီးဌာနမှ သိရသည်။ ကော့မှူးမြို့နယ်အနေဖြင့် ၂၀၂၅-၂၀၂၆ ခုနှစ် မိုးစပါး မျိုးကွဲအလိုက် စိုက်ပျိုးပြီးစီးမှု အခြေအနေမှာ ငစိန်(၁၅၉၀၄)ဧက၊ မီးဒုံး(၁၆၅၉၁)ဧက၊ ငကျွဲ(၇၆၆၇)ဧကနှင့် ဇီယာ (၈၄၄)ဧက စုစုပေါင်း (၄၁၀၀၆)ဧကအား ဇွန်လ (၂၃)ရက်နေ့ စာရင်းအရ သိရှိရပြီး မြို့နယ်စိုက်ပျိုးရေးဦးစီး ဌာန အနေဖြင့် မိုးစပါး ပန်းတိုင် အထွက်နှုန်းရရှိရေးအတွက် မျိုးကောင်းမျိုးသန့် စပါးမျိုးများနှင့် စိုက်ပျိုးရေးနည်းစနစ်ကောင်းများကို အသုံးပြု၍ စပါးအထွက်နှုန်း တိုးတက်ရေးအတွက် ဓာတ်မြေ ဩဇာနှင့် သဘာဝမြေဩဇာ အချိုးကျထည့်သွင်းနိုင်ရေး စပါးဖျက်ပိုးမွှားများကို စနစ်တကျ ကာကွယ်နှိမ်နှင်းရေးအတွက် တောင်သူများအား အသိပညာပေး သင်တန်းများနှင့် ဆွေးနွေးပွဲများ ကျင်းပ ကွင်းဆင်းဆောင်ရွက်ပေးလျက်ရှိရှိကြောင်း သိရသည်။ ကော့မှူးမြို့နယ်အတွင်း မိုးစပါး ကို လျာထားချက်ပြည့်မီအောင် စိုက်ပျိုးခြင်းဖြင့် ဒေသအတွင်းသာမက နိုင်ငံအတွင်း ဆန်စားသုံးမှု ဖူလုံစေပြီး ပြည်ပသို့ပါ ပိုမိုတင်ပို့နိုင်မည်ဖြစ်ပြီး ဆန်ဈေးနှုန်း တည်ငြိမ်ရေးကိုလည်း အထောက် အကူဖြစ်စေမည်ဖြစ်ကြောင်း သိရှိရပါသည်။ DOCA(ရန်ကုန်)

မအူပင်ဒေသတွင် စိုက်ပျိုးထွက်ရှိသော သင်္ဘောသီး ဈေးနှုန်းများ

ပြည်တွင်းကုန်သွယ်မှုသတင်း
ဧရာဝတီတိုင်းဒေသကြီး၊ မအူပင်ခရိုင် ဝါတော ကျေးရွာများတွင် သင်္ဘောပင်ကို စိုက်ပျိုးကြပြီး သင်္ဘောပင်ကို မွေးမြူရေး ငါးကန် ပတ်ချာ လည်များတွင် ငါးကန်အကာ အနေဖြင့် လည်းကောင်း၊ အုန်းခြံများတွင် ကြားညှပ် သီးနှံအဖြစ် စိုက်ပျိုးနေကြောင်း တွေ့ရှိရသည်။ ယခု သင်္ဘောပင် ၁ဧကသာ စိုက်ပျိုးထားပြီး မအူပင်ခရိုင်အနေဖြင့် သင်္ဘောစိုက်ဧက ၁၇ ခန့် ရှိကြောင်း သိရသည်။ ထွက်ရှိသော သင်္ဘောသီးများ မအူပင်ဈေးကွက်တွင် အလုံးသော ၁လုံးလျှင် ၃၅၀၀ကျပ်၊ အလုံးလတ် ၁လုံးလျှင် ၄၀၀၀ကျပ်၊ အလုံးကြီး ၁လုံးလျှင် ၅၀၀၀-၆၀၀၀ကျပ်ထိ ဈေးကောင်း ရရှိနေကြောင်း မအူပင် ဈေးကွက်အတွင်းမှ သိရသည်။ မအူပင်မှ ထွက်ရှိသော သင်္ဘောသီး များကို ရန်ကုန်သို့ အဓိကတင်ပို့ပြီး ကုန်ကားများဖြင့် တင်ပို့ရကြောင်း၊ ယခင်နှစ် သင်္ဘောသီးဈေးနှုန်း နှိုင်းယှဉ်ကြည့်ပါက အမြင့်ဆုံးဈေး ၄၀၀၀ကျပ် သာ ရှိ၍ ယခုနှင့် ထွက်ရှိသော သင်္ဘောသီးဈေးကောင်းမွန်နေကြောင်း ရောင်းချသူထံမှ သိရသည်။ DOCA(ဧရာဝတီ)

ပန်းတနော်မြို့နယ်မှ ထွက်ရှိရောင်းချနေသော ဗူးသီး ဈေးကွက် ကောင်းမွန်လျက်ရှိ

ပြည်တွင်းကုန်သွယ်မှုသတင်း
မအူပင်ခရို်င ပန်းတနော် မြို့နယ်တွင် ဗူးစိုက်ပျိုးသူများရှိပြီး မိုးတွင်ကာလတွင် ဗူးသီးများထွက်ရှိ၍ ဈေးကောင်းလျက်ရှိသည်။ ပန်းတနော်မြို့နယ်တွင် ဗူး စိုက်ဧက ၁၅၂ ဧက စိုက်ပျိုးကြောင်း သိရသည်။ ဗူးသည် စိုက်ပျိုးမှု ကုန်ကျစရိတ်သက်သာပြီး ဝင်ငွေကောင်းမွန်သော သီးနှံဖြစ်၍ စိုက်ပျိုးသူများပြားသည်။ ဗူးများကို နှစ် တစ်ပတ်လည် စိုက်ပျိုးလျှက်ရှိပြီး ဗူးပင်သက်တမ်းထွက်ရှိမှု မှာ ၅လမှ ၇ လအထိ ထွက်ရှိသည်။ ဗူးစိုက်ပျိုးပါက ၂လခွဲအကြာတွင် အသီးထွက်ရှိသည်။ ၂၀၂၅ခုနှစ် ဇူလိုင်လ ထွက်ရှိသော ဗူးသီးများ ပန်းတနော် ဈေးကွက်တွင် ဈေးကောင်းရရှိကြောင်း ဈေးကွက်အတွင်းမှ သိရှိရပြီး ဗူးသီး ၁လုံးလျင် ၅၀၀၀ကျပ်ဖြင့် ရောင်း ချလျက်ရှိသည်။ ၂၀၂၅ခုနှစ် ဖေဖော်ဝ့ရီလများက ဗူးသီး ဈေးနှုန်းမှာ ၃၅၀၀-၄၀၀၀ကျပ်သာ ရှိပြီး ဇူလိုင်လတွင် ၁၀၀၀ကျပ် မြင့်တက်လာကြောင်း သိရသည်။ ဗူးသီးကို ဟင်းချက်ရန် ဝယ်ယူကြပြီး ၊ ဗူးသီးကျော်ရန် အကျော်သည်များကလည်း အဝယ်လိုက်လျက်ရှိကြောင်း သိရသည်။ ဗူးပင်စိုက်သူများ စီးပွာဖြစ်အဆင်ပြေလျက် ရှိကြောင်း၊ ဈေးကွက်တင်ပို့မှုအနေဖြင့် ရန်ကုန်သို့ အဓိကထားတင်ပို့ပြီး မြို့နယ်တွင်းနှင့် ပန်းတနော် မြို့များရှိ ဗူးသီးကျော်သူများထံသို့လဲ တင်ပို့ရောင်းချရပြီး ဗူးပင်စိုက်ပျိုးမှု ကုန်ကျစရိတ်သက်သာ၍ အကျိုးအမြတ်ရရှိ၍ နှစ်စဉ်စိုက်ပျိုးလျက်ရှိကြောင်း သိရှိရပါသည်။ DOCA(ဧရာဝတီ)

မအူပင် ဒေသထွက် သဘာဝ သီးနှံ ကြောင်လျှာသီး ဈေးနှုန်း ကောင်းလျက်ရှိ

ပြည်တွင်းကုန်သွယ်မှုသတင်း
ရာသီစာသီးနှံ ဖြစ်သည့် မအူပင်ဒေသထွက် ကြောင်လျှာသီးကို မအူပင်မြို့ အနီးတဝိုက် ကျေးရွာများမှ မအူပင်မြို့ပေါ်ဈေးများသို့လာရောက် ရောင်းချကြပါသည်။ ကျေးရွာနေပြည်သူများ၏ ခြံများတွင် သဘာဝအလျောက်ပေါက် ရောက်နေသော ကြောင်လျှာသီးကို အပိုဝင်ငွေရရှိရန်အတွက် ၏ အိမ်ခြံဝန်းအတွင်း တစ်နိုင်တစ်ပိုင် စိုက်ပျိုးကြသည်။ ကြောင်လျှာပင်ဟာ အပင်လတ်အမျိုးအစားဖြစ်ပြီး ကြီးထွားနှုန်းမြန်ပါတယ်။ အပင်အမြင့်အနေနဲ့ကတော့ ၈ မီတာကနေ ၁၅ မီတာအထိမြင့်တတ်သည်။ ။ အခေါက်ထူကာ မီးခိုးစိမ်းရောင်ရှိပြီး အတွင်းသားအနေနဲ့တော့ အဝါရောင်ရှိသည်။ အသီးအနေနဲ့တော့ တွဲလျားကျပြီးသီးသော သီးတောင့်ရှည်အမျိုးအသားဖြစ်သည်။ အသီးပုံစံကပြားပြီး လက်တတောင်ကျော် လောက်ရှည်ကာ အမွှေးနုကလေးတွေရှိပါသည်။ ကြောင်လျှာပွင့်နဲ့ ကြောင်လျှာရွက်နုကို ရေနွေးနဲ့ ဖျောပြီးသုတ်စားလေ့ရှိသလို ငါးပိရည်နဲ့လည်း တို့စားလို့ရသည်။ ကြောင်လျှာသီးကိုတော့ မီးဖုတ်ပြီးဖြစ်စေ၊ ပြုတ်ပြီးဖြစ်စေ ငါးပိရည်နဲ့တို့စား၊ သုပ်စားကြသလို ကြော်စားတာ၊ အသားတစ်မျိုးမျိုးနဲ့ ရောချက်စားတာ လည်းရှိကြသည်။ မအူပင်ဈေးကွက်အတွင်းတွင် ကြောင်လျာသီး ၁တောင့်လျှင် ၁၀၀၀ကျပ်ဖြင့် ရောင်းချလျက် ရှိသည်။ ကြောင်လျာသီး လက်ကားဈေးအနေဖြင့် ၁တောင့်လျင် ၇၀၀ကျပ်ဖြင့် ဝယ်ယူရပြီး အတောင့် ၃၀ မှာယူပြီးရောင်းချ၍ အတောင့် ၃၀ လျှင့် လက်ကားဈေး ၂၁၀၀၀ ကျပ်ဖြင့် ဝယ်ယူပြီး ရောင်းချရကြောင်း၊ အကျိုးအမြတ်ကျန်ရှိကြောင်း ဒေသတွင်းရောင်းချခြင်းမျိုးသာ ရှိပြီး ရန်ကုန် တင်ပို့ရောင်းချခြင်း မရှိကြောင်း ဒေသထွက် ကြောင်လျာသီး ၃၀၀-၅၀၀ လောက်ကို စုပေါင်းကောက်ယူ၍ အနည်းငယ်သာ တင်ပို့ပြီး စီးပွားဖြစ် တင်ပို့ခြင်းမရှိကြောင်း ကုန်စိမ်းရောင်းချသူထံမှ သိရသည်။ DOCA(ဧရာဝတီ)

ပန်းတနော်မြို့နယ်တွင် ရောင်းချနေသော ဂျင်း ဈေးနှုန်း အနည်းငယ်မြင့်တက်

ပြည်တွင်းကုန်သွယ်မှုသတင်း
ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ်တွင် အခြေခံစားသောက်ကုန်များကို ရန်ကုန်တိုင်းဒေသကြီးမှ မှာယူ၍ ရောင်းချဖြန့်ဖြူးကြောင်း သိရသည်။ ပန်းတနော်မြို့နယ်တွင် ဂျင်းစိုက်ပျိုးမှု မရှိပဲ။ ရန်ကုန်ကုန်စည်ဒိုင်များမှ မှာယူ ရောင်းချကြသည်။ ဒေသတွင်းစားသုံးမှုလိုအပ်ချက်အရ ရှမ်းပြည်နယ်ထွက်၊ ချင်းပြည်နယ် စိုက်ပျိုးမှုများသော ဂျင်းများ အများဆုံး အရောင်းအဝယ်ဖြစ်လျက်ရှိသည်။ ဂျင်းသည် ဆေးဖက်ဝင်သီးနှံတစ်မျိုးဖြစ်၍ အိမ်တိုင်း မရှိမဖြစ် အသုံးပြုကြပါသည်။ ဟင်းချက်ရာတွင် အသုံးပြုခြင်း၊ ကျန်းမာရေးအရ အသုံးပြုခြင်း၊ ဆေးဖော်စပ်ရာတွင် အသုံးပြုခြင်းများလည်းရှိသည်။ ဂျင်းဈေးကွက်အနေဖြင့် ယခင်၂၀၂၄ခုနှစ်၊ ဇူလိုင်လတွင် ဂျင်း တစ်ပိဿာလျှင် ကျပ်(၃၅၀၀-၄၅၀၀)ဖြင့် အရောင်းအဝယ်ဖြစ်လျက်ရှိသည်။ ယခု ဇူလိုင် ၂၀၂၅ခုနှစ် တွင် ဂျင်း တစ်ပိဿာလျှင် ကျပ်(၇၀၀၀)ဈေးရှိကြောင်း၊ ယခင်နှစ်ဈေးထက် ပိုမို ဈေးမြင့်တက်လာကြောင်း ရန်ကုန်အထိုင်ဈေးက မြင့်တက်၍ ဈေးနှုန်းမြင့်တက်လာခြင်းဖြစ်ကြောင်း ပွင့်လင်းရာသီတွင် ဈေးနှုန်း ကျဆင်းနိုင်ပါကြောင်း ပန်းတနော် ဈေးကွက်မှ သိရသည်။ ဂျင်းများကို ရန်ကုန်မှ ပိဿာချိန် ၃၀ပါ တစ်အိတ်လျှင် ၁၈၀၀၀၀ကျပ်ဖြင့် မှာယူရောင်းချကြောင်းနှင့် တစ်ခါ မှာယူပါက ၁၀အိတ်မှာယူရောင်းချကြောင်း မှာယူသော အိတ်များကို ၁လအတွင်းရောင်းချရကြောင်း ပန်းတနော် အခြေခံစားသောက်ကုန် ဂျင်းရောင်းချသူထံမှ သိရသည်။ DOCA(ဧရာဝတီ)

မအူပင် ဈေးကွက်အတွင်း ရောင်းချနေသော အားလူးဈေးနှုန်း၊ ဈေးကွက်

ပြည်တွင်းကုန်သွယ်မှုသတင်း
မအူပင်မြို့ သို့ ရန်ကုန်ဈေးကွက်မှ အခြေခံစားသောက်ကုန်ဖြစ်သည့် အာလူးများ မှာယူရောင်းချလျက်ရှိပြီး မအူပင်ဈေးကွက်တွင် ရောင်းချပေးလျက်ရှိသည်။ ရန်ကုန် ဘုရင့်နောင်မှ ဝင်ရောက်လာသည့် အာလူးများကို စားသုံးသူများက စားသုံးရန် ဝယ်ယူကြသလို၊ မုန့်လုပ်ငန်းထုတ်လုပ်ရန်အတွက်လည်း ဝယ်ယူအသုံးပြုလျက်ရှိကြောင်း သိရသည်။ မအူပင်မြို့နယ်တွင် အားလူး ဈေးနှုန်းဈေးကွက် လက်လီဈေးနှုန်းအနေဖြင့် အလုံးလတ် ၁-ပိဿာ ၃၅၀၀ ကျပ်၊ အလုံးကြီး ၁ ပိဿာ ၄၀၀၀ ကျပ်ဈေးဖြင့်ရောင်းချလျက်ရှိသည်။ အားလူး ၁အိတ်လျှင် အချိန် ၅၀ ပါဝင်ပြီး ရန်ကုန်ဘုရင့်နောင်မှ အလုံးကြီး ၁အိတ်လျှင် ၁၇၀၀၀၀ ကျပ်၊ အလုံးလတ် ၁အိတ်လျှင် ၁၅၀၀၀၀ ကျပ်ဖြင့် ဝယ်ယူရောင်းချရပြီး ၁လ လျှင် အားလူး အကြီး ၇အိတ်၊ အလတ် ၅အိတ် ရောင်းချရကြောင်း အားလူးရောင်းချသည့် ကုန်သည်ထံမှ သိရသည်။ DOCA(ဧရာဝတီ)

Pages

Subscribe to RSS - ပြည်တွင်းကုန်သွယ်မှုသတင်း