ပြည်တွင်းကုန်သွယ်မှုသတင်း

မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်တွင် “ဝါ”သီးနှံကို ကံတော်၊ ကံလှ၊ ကံတိန်၊ ကံရက်၊ ကံမြင့်ကုန်း၊ မြိုင်နှင့် ရေစကြိုမြို့ နယ်အတွင်းရှိရွာများမှ “ဝါ”ကို အဓိကစိုက်ပျိုး ကြပါသည်။ ထွက်ရှိသော“ဝါ”များမှာ ပခုက္ကူမြို့ပေါ်သို့ ဝင်ရောက်အရောင်းအဝယ်ဖြစ်လျက်ရှိပါ သည်။ ပခုက္ကူမြို့ “ဝါ”စိုက်ဧကမှာ ယခင်က(၅၀၀၀ မှ ၆၀၀၀)ရှိခဲ့ပြီး ယခုအခါတွင် စိုက်ဧကမှာ အလွန်နည်းပါးလျက်ရှိပါသည်။ အဓိကစိုက်ပျိုးသော “ဝါ”များမှာ ချည်မျှင်ရှည်ဝါနှင့်ချည်မျှင်တိုဝါ များကို စိုက်ပျိုးကြပါသည်။ “ဝါ” စတင်ပေါ်စတွင် အစေ့ပါ တစ်ပိဿာလျှင် ကျပ်(၃၈၀၀)ဖြစ်ခဲ့ပြီး တစ်နေ့လျှင် ကုန်ချိန်(၃၀ မှ ၅၀ ထိ)ဝင်ရောက်လျက်ရှိကြောင်း “ဝါ”ကုန်သည်များထံမှ သိရှိရသည်။ ဈေးနှုန်းဈေးကွက်အနေဖြင့် ပခုက္ကူမြို့နယ်မှ ထွက်ရှိသော“ဝါ”များကို မန္တလေးတိုင်းဒေသ ကြီးနှင့် သရက်၊ အောင်လံခရိုင်များသို့လည်း တင်ပို့ရောင်းချလျက်ရှိပါသည်။ ၂၀၂၅ခုနှစ်၊ ဇူလိုင်လ (ပထမပတ်)တွင် “ဝါ”ဝင်ရောက်မှုမှာ တစ်နေ့လျှင် ပိဿာချိန် (၂၀၀ မှ ၃၀၀ ထိ)ဝင်ရောက်ပြီး ဈေးနှုန်းအနေဖြင့် ချည်မျှင်ရှည်ဝါ တစ်ပိဿာလျှင် ကျပ်(၃၂၀၀)၊ ချည်မျှင်တိုဝါ တစ်ပိဿာလျှင် ကျပ်(၂၈၅၀)ရှိပြီး ဝါကြိတ်ဖတ်တစ်ပိဿာလျှင် ကျပ်(၁၀၀၀)၊ ဝါစေ့တစ်ပိဿာလျှင် ကျပ်(၂၃၀၀)၊ ဝါစေ့ဆီတစ်ပိဿာလျှင် ကျပ်(၁၁၀၀၀)ဈေးဖြင့် အရောင်းအဝယ်ဖြစ်ပြီး ယခင်ဇွန်လ(ပထမပတ်) နှင့်ဈေးနှုန်းနှိုင်းယှဉ်ပါက ဝါဂွမ်းတစ်ပိဿာလျှင် ကျပ်(၃၀၀)၊ ဝါစေ့ဆီတစ်ပိဿာလျှင် ကျပ်(၂၀၀) ဈေးကျဆင်းပြီး အရောင်းအဝယ်ဖြစ်ကြောင်း၊ “ဝါ”ဝင်ရောက်မှုမှာ တစ်နေ့လျှင် ပိဿာချိန်(၂၅၀ မှ ၃၀၀)ခန့် ဝင်ရောက်ကြောင်း “ဝါ”ကုန်သည်များထံမှ သိရှိရပါသည်။ DOCA(မကွေး)

မကွေးတိုင်းဒေသကြီး၊ ပခုက္ကူခရိုင်အတွင်းရှိ ပခုက္ကူ၊ မြိုင်၊ ပေါက်၊ ရေစကြို၊ ဆိပ်ဖြူ မြို့နယ် များတွင် စပါး၊ ဆီထွက်သီးနှံမျိုးစုံ၊ ကုန်စိမ်းသီးနှံမျိုးစုံနှင့် သစ်သီးဝလံများကို နှစ်စဉ်စိုက်ပျိုးလျက် ရှိသည်။ သီးနှံမျိုးစုံအနက် မတ်ပဲသီးနှံကို စိုက်ပျိုးရာတွင် စိုက်ဧက(၃၀၀၀)ခန့် စိုက်ပျိုးပြီး ရေစကြို မြို့နယ်တွင် အဓိကစိုက်ပျိုးပြီး ပခုက္ကူ ဈေးကွက်သို့ ဝင်ရောက်အရောင်းအဝယ်ဖြစ်သည့်အပြင် အခြားမြို့နယ်များမှလည်း ဝင်ရောက်ကြောင်း သိရှိရသည်။ မတ်ပဲဈေးနှုန်းမှာ ၂၀၂၅ခုနှစ်၊ ဇူလိုင်လ(ပထမပတ်)တွင် ဈေးတက်ပြီး အရောင်းအဝယ် ဖြစ်ကြောင်း၊ မတ်ပဲတစ်တင်းလျှင် သီးနှံအရည်အသွေးလိုက်၍ ကျပ်(၁၀၀၀၀၀ မှ ၉၀၀၀၀)ဈေးရှိပြီး ယခင်ဇွန်လ(ပထမပတ်)တွင် ကျပ်(၈၅၀၀၀-၈၃၀၀၀)ဖြင့် အရောင်းအဝယ်ဖြစ်ခဲ့၍ ဈေးနှုန်းနှိုင်းယှဉ် ပါက တစ်လအတွင်း မတ်ပဲတစ်တင်းလျှင် ကျပ်(၁၅၀၀၀)ခန့် ဈေးနှုန်းမြင့်တက်လာကြောင်း သိရှိ ရသည်။ မတ်ပဲသီးနှံသည် ပြည်တွင်းစားသုံးမှုနည်းသော်လည်း ပြည်ပနိုင်ငံများမှ ဝယ်လိုအား ကောင်းသော သီးနှံတစ်မျိုးဖြစ်၍ ဈေးကွက်ခိုင်မာမှုရှိကြောင်း သီးနှံဈေးကွက်နှင့် လက်ကျန်အနည်း အများပေါ်မူတည်၍ ဈေးအတက်အကျရှိကြောင်း ပဲဈေးကွက်မှ သိရှိရသည်။ DOCA(မကွေး)

မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ ဒေသခံပြည်သူများသည် ကြက်သွန်နီသီးနှံကို ဒေသစီးပွားဖြစ် နှစ်စဉ်မပြတ်စိုက်ဧက အများဆုံးစိုက်ပျိုးလျက်ရှိသည်။ ဆိပ်ဖြူ မြို့ကြက်သွန်နီဈေးကွက်သို့ ဒေသတွင်းကြက်သွန်နီစိုက်ပျိုးထွက်ရှိသော ကျေးရွာများအပြင် အခြား မြို့နယ်များဖြစ်‌သော ပွင့်ဖြူ၊ စလင်း၊ ချောက်၊ ပခုက္ကူဒေသထွက် ကြက်သွန်နီများလည်း ဝင်ရောက် အရောင်းအဝယ်ဖြစ်လျက်ရှိသည်။ မေလအတွင်း တစ်ရက်လျှင် ကုန်ချိန်ပိဿာ(၄)သောင်းခန့်၊ တစ်လအတွင်း ကုန်ချိန်ပိဿာ(၈)သိန်းခန့်ဝင်ရောက်ခဲ့ကြောင်း ဈေးကွက်မှသိရှိရသည်။ ၂၀၂၅ ခုနှစ်၊ ဇွန်လအတွင်း ကြက်သွန်နီဈေးကျဆင်း၍ အရောင်းအဝယ်ဖြစ်ပြီး ဈေးနှုန်း အနေဖြင့် တောင်သူပေါက်ဈေး ကြက်သွန်နီ အရည်အသွေးလိုက်၍ တစ်ပိဿာလျှင် ကျပ်(၁၂၀၀)မှ ကျပ်(၈၀၀)ဈေးဖြင့် အရောင်းအဝယ်ဖြစ်ပြီး ပွဲရုံများမှ ကြက်သွန်နီများကို ပြန်လည်သန့်စင်ပြီး ရောင်းချသော ဈေးနှုန်းမှာ ကြက်သွန်နီတစ်ပိဿာလျှင် အမြင့်ဈေး(ရှယ်)ကျပ်(၁၆၀၀)၊ လတ်ကြီး တစ်ပိဿာလျှင် ကျပ်(၁၅၀၀)၊ လတ်ချောတစ်ပိဿာလျှင် ကျပ်(၁၄၀၀)၊ လတ်သန့် တစ်ပိဿာလျှင် ကျပ်(၁၃၀၀)၊ အသေးစတစ်ပိဿာလျှင် ကျပ်(၁၂၀၀)ဈေးအသီးသီးဖြင့် ဒေသအနှံ့အပြားသို့ ဖြန့်ဖြူး ရောင်းချလျက်ရှိကြောင်းကြောင်း၊ ဆိပ်ဖြူမြို့ ပတ္တမြားဈေးအတွင်း အရောင်းအဝယ်ဖြစ်သော လက်လီ ဈေးနှုန်းမှာ အရည်အသွေး၊ အရွယ်အစားလိုက်၍ တစ်ပိဿာလျှင် ကျပ်(၂၀၀၀- ၁၈၀၀- ၁၅၀၀) ဈေးဖြင့် အရောင်းအဝယ်ဖြစ်ကြောင်း သိရှိရသည်။ ကုန်စည်စီးဆင်းမှုအနေဖြင့် ဇွန်လအတွင်း ကုန်ချိန်ပိဿာ(၈)သိန်းခန့် တန်ချိန်အားဖြင့် (၁၃၀၆)တန်ခန့် စီးဆင်းခဲ့ကြောင်း၊ ရန်ကုန်ဘုရင့်နောင်ပွဲရုံသို့ ကုန်ချိန်အများဆုံး တင်ပို့ပြီး မြဝတီ၊ မော်လမြိုင်မြို့မှတစ်ဆင့် ထိုင်းနိုင်ငံသို့ တင်ပို့လျက်ရှိကြောင်း၊ ပြည်ပတင်ပို့မှုနည်း၍ ဆိပ်ဖြူ ကြက်သွန်နီဈေးကွက် ဈေးအေး၍ အရောင်းအဝယ်ဖြစ်လျက်ရှိကြောင်း သိရှိရသည်။ DOCA(မကွေး)

အညာဒေသ ထုံးဘိုထွက် မျှစ်ချိုများကို ရန်ကုန်သိရီမင်္ဂလာဈေးမှာ မှာယူ၍ မအူပင် ဈေးကွက်အတွင်း ရောင်းချလျက်ရှိကြောင်း သိရသည်။ မျှစ်ချိုကို ကြော်စား၍သော်လည်းကောင်း၊ ချဉ်ရည်ဟင်းအဖြစ်လည်ကောင်း၊ အတို့မြှပ်အဖြစ်လည်းကောင်း စားသုံးကြသည်။ ရန်ကုန်မှ မျှစ်များကို ပိဿာ ၁၀၀ မှာယူပါက ငွေကျပ် ၅၀၀၀၀ကျပ်ဖြင့် မှာယူရောင်းချရသည်။ မအူပင် ဈေးကွက်အတွင်းတွင် မျှစ် ၁ပိဿာလျှင် ၈၀၀ကျပ်ဖြင့် ပြန်လည်ရောင်းချရသည်။ အကျိုးအမြတ်အနေဖြင့် ၂၀၀၀၀ ကျပ် အကျိုးအမြတ် ရရှိသည်။ ၁လ လျှင် မျှစ် ပိဿာ ၅၀၀ နီးပါးရောင်းချရကြောင်း ကုန်စိမ်းရောင်းချသူထံမှ သိရသည်။ မျှစ်တွင် အမျှင်ဓါတ်ခေါ် ဆယ်လူးလို့စ်ဓါတ်လည်း များပြားစွာပါသည့်အတွက် အူမကြီးအား လှုပ်ရှားစေရန် နှိုးဆွပေးသောကြောင့် ဝမ်းချုပ်ခြင်းအား မဖြစ်စေဘဲ ဝမ်းကိုမှန်စေကာ အူမကြီးကင်ဆာဖြစ်ပွားနိုင်ခြေကို လျှော့ချ ပေးပါသည်။ မျှစ်ကိုအမျိုးမျိုးလုပ်စားနိုင်ပါတယ်။ မျှစ်ချည်းပဲပေါင်းစားတာ၊ ပြုတ်ပြီး ငပိရည်နဲ့တို့စားတာ၊ ကြော်စားတာ၊ သုပ်စားတာအပြင် အသားတစ်မျိုးမျိုးနဲ့ကြော်စားတာ၊ မျှစ်ချဉ်နဲ့ဝက်သား သို့မဟုတ် ငါးခေါင်းနဲ့ ဟင်းချိုချက်သောက်တာ၊ မျှစ်ကိုအခြောက်လှမ်းပြီး သုပ်စားတာစသဖြင့် စုံလင်စွာ လုပ်စားနိုင်ပါသည်။ DOCA(ဧရာဝတီ)

မအူပင်မြို့နယ်တွင် ၂၀၂၅ခုနှစ် မေလမှ စ၍ အုန်းသီးဈေး ကောင်းမွန်လျက်ရှိကြောင်း သိရသည်။ အုန်းသီးများကို ရွှေတော်ပေါ်ကျေးရွာတွင် အများဆုံး စိုက်ပျိုးကြောင်း သိရပြီး အုန်းသီးပင် အပင်ပြတ်ဝယ်ကာ ခူးယူရောင်းချကြောင်း အုန်းသီးရောင်းသူထံမှ သိရသည်။ အုန်းသီးမှာ ရိုးရိုးအုန်းသီးဖြစ်ပြီး ရွှေတောင်ပေါ်ကျေးရွာရှိ ခြံများတွင် တစ်ခြံလျှင် အပင် ၂၀ခန့် စိုက်ပျိုးထားကြပြီး ရွှေတော်ပေါ်ကျေးရွာတွင်အပင်ပေါင်း ၈၀၀ နီးပါးခန့်ရှိသည်။ ကျေးရွာအတွင်း အပင်များကို လိုက်လံဝယ်ယူသူ ကုန်သည်ရှိပြီး အုန်းသီးများကို မအူပင်မြို့သို့ ဂွန်ဒေါင်းဖြင့် တင်ပို့ ရောင်းချသည်။ အုန်းသီး ၁လုံးလျှင် လက်ကားဈေး ၃၀၀၀ကျပ်ဖြင့် ဝယ်ယူရပြီး ပြန်လည် ရောင်းချပါက ၁လုံးလျှင် ၄၀၀၀ကျပ်ထိ ဈေးရောင်းချရကြောင်း အုန်းသီးလှ ၍ ဘုရားပွဲ၊ နတ်ပွဲသုံး အုန်းသီး ရောင်းချဈေးမှာ ၁လုံးလျှင် ၆၀၀၀ကျပ်ထိ ဈေးကောင်းကြောင်း သိရသည်။ အုန်းပင် ၁ပင်တွင် အုန်းခိုင် ၅ခိုင်မှ ၇ခိုင် ခန့် ထွက်ရှိပြီး အုန်း တစ်ခိုင်တွင် အုန်းသီး ၇လုံး၊ ၁၀လုံးခန့်ထွက်ရှိကြောင်း သိရသည်။ အုန်းသီးများကို ရန်ကုန်သို့လည်း တင်ပို့ကြောင်း သိရှိရပါသည်။ DOCA(ဧရာဝတီ)