ပြည်တွင်းကုန်သွယ်မှုသတင်း

               တောင်ငူမြို့နယ် ကျွန်းကုန်းကျေးရွာရှိ ကောင်းအကြော်စုံလုပ်ငန်းသည် ပဲဖူးကြော်၊ စားတော်ပဲကြော်၊ ကြက်သွန်ကြော်၊ ငရုတ်သီးကြော်များကိုထုတ်လုပ်သည့် တပိုင်တနိုင်ကုန်ထုတ်လုပ်ငန်းဖြစ်ကြောင်းသိရသည်။

               ပဲများကို မန္တလေးမြို့မှ တစ်ပိဿာလျှင် ၁၀၀၀၀ ကျပ်ဖြင့် မှာယူရပါသည်။ ရရှိလာသောပဲကြော်များကို ၅ ကျပ်သားအထုပ်များထုပ်၍ တစ်ထုပ်လျှင် ၇၀၀ ကျပ်ဖြင့် ဈေးကွက်အတွင်း ဖြန့် ဖြူးရောင်းချပါသည်။ ပဲကြော်ရာတွင် ဆီ၊ ဆားအပြင် ဂျုံမှုန့်အနည်းငယ်ကိုလည်း ထည့်သုံးရကြောင်းသိရသည်။

              ငရုတ်သီးကြော်နှင့် ကြက်သွန်ကြော်တို့အတွက် လိုအပ်သည့်ငရုတ်သီးခြောက်နှင့် ကြက်သွန်နီများကို တောင်ငူမြို့ရှိ ပွဲရုံများတွင် ဝယ်ရသည်။ ကြက်သွန်ကြော်ကို ၂၅ ကျပ်သား အထုပ်များထုပ်၍ တစ်ထုပ်လျှင် ၁၈၀၀၀ ကျပ်ဖြင့် ဈေးကွက်အတွင်းရောင်းချပါသည်။ ငရုတ်သီးကြော်ကိုမူ လိုသလောက်ချိန်တွယ်၍ ရောင်းချပေးကြောင်းသိရသည်။

              ကောင်းအကြော်စုံလုပ်ငန်းသည် မိသားစုအပြင် နေ့စား(၃)ဦးငှားရမ်းပြီး ထုတ်လုပ်လျက်ရှိကြောင်း၊ ထုတ်လုပ်သည့်အကြော်စုံများကို တောင်ငူ၊ ရေတာရှည်နှင့် အုတ်တွင်းမြို့နယ်ရှိ ကုန်စုံဆိုင်ကြီးများသို့ ပို့ဆောင်ပေးကြောင်း လုပ်ငန်းရှင် ဦးနေအောင်စိုး၏ ပြောပြချက်အရ သိရှိရပါသည်။

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများ ဖြစ်သည့် စပါး၊ပဲမျိုးစုံနှင့် ဆီထွက်သီးနှံတို့ကို အဓိကစိုက်ပျိုးလျက်ရှိပြီး ရာသီပေါ်သီးနှံများနှင့် စားဖိုဆောင်သီးနှံများကိုလည်း စိုက်ပျိုးကြသည်။

    ယခုအခါ ကန့်ဘလူမြို့နယ်အတွင်းရှိ နတ်ပေးကျေးရွာ၊ တောက္ကရှပ်ကျေးရွာနှင့် မြို့ပေါ်ရပ်ကွက်များတွင် မုန်လာဥဖြူများစိုက်ပျိုးကြကြောင်း၊ ထွက်ရှိသည့်မုန်လာဥဖြူများကို ကန့်ဘလူမြို့မဈေးတွင်ရောင်းချကြောင်း ၊ ဒီဇင်ဘာလပထမပတ်အတွင်း မုန်လာဥဖြူ(အကြီး) (၄)ဥပါတစ်တွဲလျှင် ၇၀၀ ကျပ်၊ မုန်လာဥဖြူ(အသေး) (၄)ဥပါတစ်တွဲလျှင် ၄၀၀ ကျပ်ဖြင့်ရောင်းချကြောင်း၊ ရာသီစာ ဖြစ်သည့်အတွက် မုန်လာဥဖြူများရောင်းအားကောင်းလျက်ရှိကြောင်း မြို့မဈေးရှိကုန်စိမ်းရောင်းချသူတစ်ဦးထံမှ သိရှိရပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့မဈေးတွင် ရောင်းချလျက်ရှိသည့် ကြက်ဥ၊ ဘဲဥများမှာ ဒေသတွင်းကြက်ခြံ၊ ဘဲခြံများမှ ဝယ်ယူရောင်းချလျက်ရှိပြီး၊ လိုအပ်ချက်အရ မန္တလေးမှလည်း ဝယ်ယူရောင်းချကြောင်း သိရသည်။ ၂၀၂၄ ခုနှစ်၊ ဒီဇင်ဘာလ ပထမပတ်အတွင်း ဖြစ်ပေါ်နေသော ကြက်ဥ၊ ဘဲဥ၊ ငုံးဥဈေးနှုန်းများမှာ ကြက်ဥကြီးတစ်လုံးလျှင် (၅၀၀)ကျပ်၊ ဥလတ် တစ်လုံးလျှင်(၄၇၀)ကျပ် ၊ ဥသေးတစ်လုံးလျှင်(၄၅၀)ကျပ်နှင့် ဘဲဥကြီးတစ်လုံးလျှင်(၇၀၀)ကျပ်၊ ဥသေးတစ်လုံးလျှင် (၆၅၀)ကျပ်၊ ငုံးဥ(၈)လုံးလျှင် (၁၀၀၀)ကျပ်ဖြင့် အရောင်းအဝယ်ဖြစ်လျက်ရှိပြီး ယခင်လကာလတူဖြစ်ပေါ်ခဲ့သော ဈေးနှုန်းများထက် အနည်းငယ်မြင့်တက်လာကြောင်း ကြက်ဥ၊ ဘဲဥ၊ ငုံးဥများကို စားသောက်ဆိုင်များ၊ မုန့်လုပ်ငန်းများတွင် အများဆုံးအသုံးပြုကြပြီး အိမ်ရှင်မများမှမိသားစုထမင်းဝိုင်းအတွက် ဟင်းလျာအဖြစ် ချက်ပြုတ်ရာတွင်လည်း အသုံးပြုကြကြောင်း ကန့်ဘလူမြို့မဈေးအတွင်းရှိ ဈေးသည်များထံမှ သိရှိရသည်။

DOCA(စစ်ကိုင်း)

          ဧရာဝတီတိုင်းဒေသကြီး၊ မြောင်းမြခရိုင်၊ လပွတ္တာမြို့နယ်တွင် ခရိုင်အုပ်ချုပ်ရေးအဖွဲ့၊ မြို့နယ်စည်ပင်သာယာအုပ်ချုပ်ရေးအဖွဲ့၊ မွေးမြူရေးနှင့်ကုသရေးဦးစီးဌာန၊ စားသုံးသူရေးရာဦးစီးဌာနရှိဝန်ထမ်းများသည်     (၃.၁၂.၂၀၂၄)ရက်နေ့ နံနက်(၀၈း၀၀)နာရီအချိန်တွင် လပွတ္တာမြိုု့နယ်ရှိ အမှတ်(၁)ရပ်ကွက်ဈေးတွင် ကြက်ဥအလုံး(၃၀၀၀)နှင့် ရွေးနဒီရေပေါ် ဈေးတွင် ကြက်ဥအလုံး(၃၀၀၀) သွားရောက်၍ ရောင်းချခဲ့ကြောင်းသိရှိရပါသည်။

             ထိုသို့ရောင်းချပေးရာတွင် အများပြည်သူများ သက်သာစွာဝယ်ယူနိုင်ရန် တစ်လုံးလျင် (၃၈၀)ကျပ်နှင့် လူ(၁)ဦး လျှင် (၅)လုံးနှုန်းဖြင့် လပွတ္တာမြိုု့နယ်ရှိ အမှတ်(၁)ရပ်ကွက်ဈေး နှင့် ရွေးနဒီရေပေါ်ဈေးတို့တွင် စုစုပေါင်းကြက်ဥအလုံးရေ (၆၀၀၀) အားရောင်းချပြီး လိုအပ်သည်များကို သက်ဆိုင်ရာတာဝန်ရှိသူများနှင့်ပေါင်းစပ်ညှိနှိုင်း၍ နောက်ရက်များတွင်လည်း ဆက်လက်ရောင်းချပေးသွားရန် စီစဉ်ထားကြောင်း သိရှိရပါသည်။

DOCA(ဧရာဝတီ)

            ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်တွင် ဗူးပင်စိုက်ပျိုး၍ ဗူးသီးထွက်ရှိနေပြီး ရန်ကုန်သို့တင်ပိုလျက်ရှိကြောင်း သိရသည်။ ၂၀၂၄-၂၀၂၅ နှစ်တွင် ဟင်းသီးဟင်းရွက်စိုက်ဧက ၁၂၇၉၀ စိုက်ပျိုးထားရှိကြောင်း သိရသည်။ ညောင်တုန်းတွင် ဗူးပင်စိုက်ဧက ၄၅၀ ခန့်ရှိကြောင်း သိရသည်။

             စိုက်ပျိုးမှုအနေဖြင့် ဩဂုတ်လတွင် စတင်စိုက်ပျိုးကြပြီး ၂လခွဲအကြာ တွင်အသီးတင်ထွက်ရှိသည်။ စိုက်ပျိုးရာတွင် စင်တင်စိုက်ပျိုးခြင်းနည်းဖြင့်သာ စိုက်ပျိုးကြသည်။ စင်တင်စိုက်ပျိုးပါက စိုက်ဘောင်ပြုလုပ်ရာတွင် အလျား(၅)ပေ၊ အနံ(၃)ပေ အမြင့်(၁)ပေခန့် ဘောင်ပြုလုပ်ပြီး ဘူးစေ့များကိုတစ်ကျင်းနှင့် တစ်ကျင်း (၁)ပေခွဲခြား၍ တစ်ကျင်းလျှင် ဘူးစေ့(၅)စေ့ခန့် ထည့်၍စိုက်ရပါသည်။ အပင်ပေါက်လာလျှင် နှစ်ပင်ခန့်သာ ထားရှိသည်။ ဘူးပင်စိုက်ပြီးတစ်လခန့်အကြာတွင် ဘူးညွန့်များခူးရပါသည်။ ဘူးညွန့်ခေါင်ညွန့်ကို ခူးဖြတ်ပေးမှသာလျှင် ဘူးညွန့်များများထွက်လာပြီး အသီးများတင်နိုင်မည်ဖြစ်ပါသည်။ ဗူးညွှန်ကိုခူးဖြတ်၍လည်း ဗူးညွှန့် ၅ညွှန့်ပါတစ်စီးကို ၆၀၀ကျပ်ဖြင့် ဖောက်သည်ပေးပြီး ရောင်းချ၍လည်း ရကြောင်း၊ ဘူးပင်တစ်ပင်လျှင် ဘူးသီးအလုံး(၄၀)ခန့်သီးကြောင်း သိရှိရသည်။ ယခု ဘူးသီးဈေးနှုန်းအနေဖြင့် အလုံးကြီး(၁)လုံးလျှင် (၅၀၀၀)ကျပ်ဖြင့် ရောင်းချရပြီး  အသေး(၁)လုံးလျှင် (၃၀၀၀)ကျပ်ရှိပါသည်။ စိုက်ပျိုးထုတ်လုပ်မှု ကုန်ကျစရိတ်အနေဖြင့်မျိုး၊ သွင်းအားစု၊ လုပ်သားခ၊ ဝါးဖိုး အပါအဝင်  တစ်ဧကလျှင် ငွေကျပ် ၁၅၀၀၀၀၀ ခန့် ကုန်ကျပြီး အထွက်နှုန်းအနေဖြင့် တစ်ဧကလျှင် ဗူးသီး အလုံးရေ ၁၀၀၀၀ ခန့်ထွက်ရှိခြင်းကြောင့်၊   တစ်ဧကအကျိုးအမြတ်အနေဖြင့် ယခုနှစ်တွင် ငွေကျပ် ၂၅၀၀၀၀၀ ထိ အကျိုးအမြတ်ရရှိ၍ တောင်သူများ အကျိုးအမြတ်ရရှိသဖြင့် ဗူးပင်စိုက်သူများ စီးပွာဖြစ်အဆင်ပြေလျက်ရှိကြောင်း၊   ဈေးကွက်တင်ပို့မှုအနေဖြင့် ရန်ကုန်သို့ အဓိကထားတင်ပို့ပြီး အောက်တိုဘာလတွင် ဗူးသီးအလုံးရေ ၅၀၀၀၀ထိ တင်ပို့ခဲ့ပြီး နိုဝင်ဘာလတွင် ဗူးသီးအလုံးရေ ၂၀၀၀၀တင်ပို့ခဲ့ကြောင်း ဗူးစိုက်ပျိုးသူ တောင်သူ ဦးထွန်းရင်ပြောပြချက်အရ သိရှိရပါသည်။

DOCA(ဧရာဝတီ)