ပြည်တွင်းကုန်သွယ်မှုသတင်း

     ပဲခူးတိုင်းဒေသကြီး(အနောက်)၊ ပြည်ခရိုင်၊ ပြည်မြို့နယ်အတွင်း (၂၀၂၃-၂၀၂၄) ဘဏ္ဍာနှစ်တွင် မိုးစပါးစိုက်ဧက (၇၄၆၄၂)ဧကစိုက်ပျိုးထားကြောင်းသိရပြီး အများဆုံးစိုက်ပျိုးသည့် စပါးမျိုးများမှာ ရတနာတိုး၊ မှော်ဘီ-၂၊ ထိုင်းနှံကောက်၊ GW-11၊ အင်းမရဲဘော်၊ ဆင်းသွယ်လတ်၊ ဧည့်မထ၊ ဗီယက်နမ်၊ ကျော်ဇေယျ၊ ဆင်းသုခ၊ ရက်-၉၀၊ ရေနဲလို၊ ဧရာမင်းနှင့် ရွှေနံသာပေါ်ဆန်းစပါးမျိုးများဖြစ်ပါသည်။

      ၂၀၂၃ခုနှစ်၊ နိုဝင်ဘာလ ပထမပတ်ထိ ရတနာတိုး (၁၉၇၈၇)ဧကစိုက်ပျိုးထားရှိပြီး (၅၆၇)ဧကရိတ်ကာ တစ်ဧကလျှင် (၉၃.၂၀)တင်းထွက်ရှိပါသည်။ ထိုင်းနှံကောက်စပါးကို (၆၇၂၇) ဧကစိုက်ပျိုးထားပြီး (၁၆၆၁)ဧကရိတ်သိမ်းကာ တစ်ဧကအထွက်နှုန်းမှာ (၉၄.၇၀)တင်း၊ GW-11မျိုးကို (၂၇၀၉)ဧကစိုက်ပျိုးပြီး (၁၆၁)ဧကသာရိတ်သိမ်းထားသော်လည်း တစ်ဧကအထွက်နှုန်းကောင်းမွန်ပြီး တစ်ဧကလျှင် (၉၇.၁၀)တင်းထွက်ရှိကြောင်းသိရပါသည်။ ပြည်မြို့နယ်အတွင်း မှော်ဘီ-၂ စပါးမျိုးအစိုက်များပြီး (၂၃၆၆၁)ဧကရှိကြောင်း၊ လက်ရှိ (၄၆၁၈)ဧကရိတ်သိမ်းထားပြီးဖြစ်ရာ အထွက်နှုန်းအနည်းငယ်ကျဆင်းကာ တစ်ဧကလျှင် ပျမ်းမျှ (၈၄.၀၆)တင်းသာထွက်ရှိကြောင်းသိရှိရပါသည်။ ဗီယက်နန်စပါးမျိုးကို (၂၇၂၄)ဧကစိုက်ပျိုးထားပြီး (၂၂၅)ဧကရိတ်သိမ်းထားရာ တစ်ဧက (၉၅.၈၀)တင်းထွက်ရှိပြီး ပြည်မြို့နယ်အတွင်း မိုးစပါးစိုက်ဧက (၇၄၆၄၂) ဧကအနက် (၁၂၃၃၆)ဧကရိတ်သိမ်းထားရှိပြီး တစ်ဧကပျမ်းမျှအထွက်နှုန်းမှာ (၉၀.၀၈)တင်း၊ စုစုပေါင်းအထွက်တင်းမှာ (၁၁၁၁၂၃၈)တင်းထွက်ရှိကြောင်းသိရပါသည်။

     ၂၀၂၃ခုနှစ်၊ နိုဝင်ဘာလ ပထမပတ်ထိ စပါးပေါက်ဈေးနှုန်းမှာ ပေါင်(၅၀)တစ်တင်းလျှင် ၁၅၅၀၀ကျပ်၊ တင်း(၁၀၀)လျှင် (၁၅၀၀၀၀၀-၁၅၅၀၀၀၀)ကျပ်တို့ဖြင့် အရောင်းအဝယ်ဖြစ်လျက်ရှိကြောင်းသိရှိရပါသည်။

DOCA(ပဲခူး)

    ဧရာဝတီတိုင်းဒေသကြီး၊ မအူပင်ခရိုင်သည် ကျေးလက်နေလူတန်းစားများပြားပြီး စပါး၊ ပဲ၊ နေကြာ၊ ဟင်းသီးဟင်းရွက်များကို တစ်နိုင်တစ်ပိုင်စိုက်ပျိုးထုတ်လုပ်သည့် လုပ်ငန်းလုပ်ကိုင်သူများစွာရှိသော ခရိုင်တစ်ခုဖြစ်ပါသည်။

 စိုက်ပျိုးရေးလုပ်ငန်းလုပ်ကိုင်နေသော တောင်သူများသည် စိုက်ပျိုးရေးအသိပညာ၊ နည်းပညာများစုံလင်စွာသိရှိပြီး စိုက်ပျိုးထုတ်လုပ်နိုင်ပါက အရည်အသွေးမြင့်စိုက်ပျိုးသီးနှံများကိုရရှိနိုင်မည်ဖြစ်ပါသည်။

  ပိုပိုစွမ်း သဘာဝမြေဩဇာကုမ္ပဏီသည် မအူပင်မြို့နယ်၊ မလက်တိုကျေးရွာအုပ်စု၊ လှိုင်းတာလမ်းခွဲ (၆မိုင်၊ ၃ဖာလုံ) တွင်တည်ရှိပြီး မြေ(၁)ဧကအကျယ်အဝန်းရှိ ဧရိယာအတွင်း လုပ်သားအင်အား (၁၅) ဦးဖြင့် ၂၀၂၀ခုနှစ်တွင် စမ်းသပ်ဆောင်ရွက်ခဲ့ပြီး ၂၀၂၂ခုနှစ်တွင် ဈေးကွက်အတွင်း ဖြန့်ချိနိုင်ရန် စတင်ဆောင်ရွက်ခဲ့ပါသည်။

     ပိုပိုစွမ်းကုမ္ပဏီအနေဖြင့် ထပ်မံကြိုးစားထုတ်လုပ်မည့် ထုတ်ကုန်များမှာ (၁) မြေဆီလွှာအားတိုးဆေး၊ (၂) အကျိုးပြုပိုးရည်ပြင်း၊ (၃) ပင်မအကျိုးပြုပိုးရည်၊ (၄) ငါးအမိုင်နိုအက်ဆစ်၊ (၅) ရှယ်ပွင့်ဆေးရည်၊ (၆) သီးပွားဆေးရည်၊ (၇) EM-5 (၈) ပွင့်သီးဆေးရည်တို့ဖြစ်ကြောင်း ပိုပိုစွမ်းကုမ္ပဏီလီမိတက်ပိုင်ရှင် ဦးစိုးသူက ရှင်းလင်းပြောပြခဲ့ပါသည်။

    ပိုပိုစွမ်းကုမ္ပဏီသည် စိုက်ပျိုးရေးဦးစီးဌာနနှင့်ပူးပေါင်း၍ စိုက်ပျိုးရေးဦးစီးဌာန၏ ခွင့်ပြုချက်ဖြင့် အော်ဂဲနစ်စိုက်ပျိုးရေးနည်းပညာများကို စိုက်ပျိုးရေးတောင်သူဦးကြီးများနှင့်နှီးနှောဖလှယ်သည့် တွေ့ဆုံဆွေးနွေးပွဲများကျင်းပဆောင်ရွက်ပြီး ပိုပိုစွမ်းကုန်အမှတ်တံဆိပ်ကို ကြော်ငြာလျက်ရှိပါသည်။

    ပိုပိုစွမ်းကုမ္ပဏီလုပ်ငန်းလိုအပ်ချက်အနေဖြင့် ကိုယ်ပိုင်ဓာတ်ခွဲခန်းဖြင့် အဖြေထုတ်နိုင်ရန်နှင့် လိုအပ်မှုအပေါ် တိုးချဲ့ဆောင်ရွက်နိုင်ရန် ရင်းနှီးမြှုပ်နှံမှုများဖြင့်ကူညီထောက်ပံ့ပေးခြင်းဖြင့်လည်းကောင်း၊ စိုက်ပျိုးရေးပညာရှင်များနှင့် သက်ဆိုင်ရာကဏ္ဍအလိုက် ပူးပေါင်း၍လည်းကောင်း အောင်မြင်ရန် မျှော်မှန်းဆောင်ရွက်လျက်ရှိပါသည်။

     မြေဆီလွှာ၊ အမြစ်၊ အပင်၊ အရွက်၊ အပွင့်၊ အသီး စသည့်အပင်အစိတ်အပိုင်းတစ်ခုချင်းစီအတွက် အကျိုးဖြစ်ထွန်းမည့် သဘာဝမြေဩဇာထုတ်လုပ်နိုင်ရန် သီးနှံတစ်မျိုးချင်းစီကို မည်သို့စိုက်ပျိုးအသုံးပြုလျှင် အထွက်နှုန်းမည်မျှတိုးကြောင်း နည်းပညာများလိုက်လံစုဆောင်းရန်၊ မြေဆီလွှာထဲတွင် ရေရှည်ထိန်းသိမ်းနိုင်မှုမြင့်မားသော စိုက်ပျိုးရေးနည်းစနစ်များကိုရှာဖွေပြီး မြေဩဇာကဏ္ဍမှကူညီနိုင်ရေး အားထည့်ဆောင်ရွက်ရန်နှင့်    စိုက်ပျိုးမှု ကုန်ကျစရိတ်လျှော့ချပြီး ပိုမိုကောင်းမွန်သော သီးနှံအထွက်နှုန်းများရရှိစေရန်နှင့် အရည်အသွေးပြည့်ဝသော မြေဩဇာများထုတ်လုပ်နိုင်ရေးတို့ကိုဆောင်ရွက်မည့် ကုမ္ပဏီတစ်ခုဖြစ်သောကြောင့် မအူပင်ခရိုင်အတွင်းရှိ စိုက်ပျိုးရေးလုပ်ကိုင်သောတောင်သူများ၊ စိုက်ပျိုးရေးကို အခြေခံသောကုမ္ပဏီများနှင့် တစ်နိုင်တစ်ပိုင်စိုက်ပျိုးထုတ်လုပ်သူများအသုံးပြုနိုင်မည့် ပိုပိုစွမ်းစိုက်ပျိုးရေးဆေးနှင့် သဘာဝမြေဩဇာများကို ဈေးကွက်အတွင်း စတင်ဖြန့်ချိပြီး အသုံးပြုလာတော့မည်ကို ကျေနပ်အားရဖွယ် တွေ့မြင်ရတော့မည်ဖြစ်ကြောင်း ရေးသားတင်ပြလိုက်ရပါသည်။

DOCA(ဧရာဝတီ)

   ၁၆.၁၁.၂၀၂၃ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

   ၁၆.၁၁.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

     ပဲခူးတိုင်းဒေသကြီး(အနောက်)၊ ပြည်မြို့နယ်တွင် ပန်းဂေါ်ဖီအဖြူများကို ၂၀၂၃ခုနှစ်၊ အောက်တိုဘာလ တတိယပတ်မှစတင်၍ ရောင်းချနေပြီး ပြည်မြို့အနီးတဝိုက်ရှိ ကျေးရွာများ၊ မှော်ဇာ၊ ပုတီးကုန်းမြို့နယ်များတွင် ရေလောင်းစိုက်ပျိုးကြပြီး ပြည်စည်ပင်သာယာဈေးကြီးနှင့် အခြားမြို့နယ်များသို့လည်း တင်ပို့ရောင်းချကြောင်းသိရပါသည်။ နိုဝင်ဘာလ ပထမပတ်မှစတင်၍ ပန်းဂေါ်ဖီများလှိုင်လှိုင်ပေါ်လာပြီဖြစ်သောကြောင့် စားသုံးသူများအနေဖြင့် ဈေးနှုန်းချိုသာစွာ ဝယ်ယူစားသုံးနိုင်ကြပြီး အရောင်းအဝယ်သွက်နေကြောင်းသိရပါသည်။ ပန်းဂေါ်ဖီအပွင့်ကြီးတစ်ပွင့်လျှင် ကျပ်၁၁၀၀၊ အပွင့်သေးတစ်ပွင့်လျှင် (၄၀၀/၅၀၀)ကျပ်တို့ဖြင့် ရောင်းချကြောင်းသိရှိရပါသည်။ ထို့ကြောင့် စိုက်ပျိုးသူများအနေဖြင့်လည်း တွက်ခြေကိုက်ကြောင်းသိရှိရပါသည်။

DOCA(ပဲခူး)