ပြည်တွင်းကုန်သွယ်မှုသတင်း

             မကွေးတိုင်းဒေသကြီး၊ မကွေးမြို့နယ်၊ ဝါးတောချောင်ကျေးရွာတွင် နှမ်းနှင့်ပဲမျိုးစုံသီးနှံများကို အဓိက စိုက်ပျိုးကြပြီး ဟင်းသီးဟင်းရွက်သီးနှံများလည်း တစ်နိုင်တစ်ပိုင်စိုက်ပျိုးကြကြောင်း သိရသည်။ ရွှေဖရုံသီးကို ဇူလိုင်လတွင် စတင်စိုက်ပျိုးပြီး အောက်တိုဘာလတွင် အသီးရင့်မှည့်ကာ ခူးဆွတ် နိုင်ပြီဖြစ်ကြောင်း၊ ဈေးနှုန်းအနေဖြင့် အောက်တိုဘာလ(စတုတ္ထပတ်)တွင် ရွှေဖရုံသီးမှည့်တစ်လုံးလျှင် လက်ကားဈေး ငွေကျပ် ၃၀၀၀-၄၀၀၀ ရောင်းချရကြောင်း၊ ဈေးကွက်အနေဖြင့် ကုန်စိမ်းသည်များမှ စိုက်ခင်းအထိ လာရောက် ဝယ်ယူကြပြီး မကွေးမြို့ပေါ်သို့ ပြန်လည်ရောင်းချကြကြောင်း၊ ရွှေဖရုံသီးပင် စိုက်ပျိုးခြင်းဖြင့် အသီးများသာမက အညွန့်(အရွက်)များပါ ရောင်းချရသောကြောင့် အပိုဝင်ငွေများရရှိပြီး ယခုနှစ်တွင် စျေးနှုန်းကောင်းမွန်သောကြောင့် တောင်သူများအနေဖြင့် အကျိုးအမြတ်များ ပိုမိုရရှိကာ အဆင်ပြေလျက်ရှိကြောင်း သိရသည်။

ခရမ်းချဉ်သီး

            မကွေးတိုင်းဒေသကြီး၊ မြို့သစ်မြို့နယ်၊ ကွင်းကျေးရွာတွင် စားဖိုဆောင်သီးနှံဖြစ်သည့် ခရမ်းချဉ် သီးနှံကို ဩဂုတ်လတွင် စိုက်ပျိုးပြီး အောက်တိုဘာလတွင် စတင်ထွက်ပေါ်ပြီဖြစ်ကြောင်း သိရသည်။ အောက်တိုဘာလ(စတုတ္ထပတ်)တွင် လက်ကားဈေးနှုန်းအနေဖြင့် ခရမ်းချဉ်သီး တစ်ပိဿာလျှင် ငွေကျပ် (၄၅၀၀-၅၅၀၀)ရောင်းချကြောင်း၊ ဈေးကွက်အနေဖြင့် မကွေးမြို့သို့တင်ပို့ရောင်းချကြောင်းနှင့် အနီးရှိကျေးရွာများသို့လည်း သွားရောက်ရောင်းချကြောင်း၊ မိုးရွာသွန်းမှုများပြားခြင်းကြောင့် အထွက်နှုန်း လျော့နည်းသော်လည်း ခရမ်းချဉ်သီးထွက်ပေါ်ချိန်တွင် ဈေးကောင်းရသောကြောင့် အကျိုးအမြတ်များ ရရှိကြောင်း သိရှိရသည်။

အာလူး

              စားဖိုဆောင်သီးနှံဖြစ်သည့် အာလူးကို ဆင်ဖြူကျွန်းမြို့တွင် စိုက်ပျိုးလေ့ရှိသော်လည်း အာလူး ထွက်ပေါ်ချိန်မဟုတ်သည့်အတွက် ဈေးကွက်အတွင်း ရှမ်းပြည်နယ်၊ အောင်ပန်း မြို့မှ အာလူးများ ဝင်ရောက်အရောင်းအဝယ်ဖြစ်ကြောင်း သိရသည်။ အောက်တိုဘာလ (စတုတ္ထပတ်)တွင် အာလူး(ကြီး) တစ်ပိဿာလျှင် ကျပ်(၇၀၀၀)၊ အာလူး(လတ်) ကျပ် (၅၀၀၀)၊ အာလူး(သေး) ကျပ်(၄၀၀၀)ဈေးဖြင့် အရောင်းအဝယ်ဖြစ်လျက်ရှိပြီး လမ်းပန်းဆက်သွယ်ရေးခက်ခဲသောကြောင့် သယ်ယူစရိတ်မြင့်မားခြင်း ကြောင့်လည်းကောင်း၊ ဈေးကွက်တွင် ဝင်ရောက်မှုနည်းသောကြောင့်လည်းကောင်း ဈေးနှုန်းမြင့်တက် လျက်ရှိကြောင်း သိရသည်။

ပဲတောင့်ရှည်

            မင်းဘူးခရိုင်၊ စလင်းမြို့နယ်၊  ငလင်ပန်းကျေးရွာတွင် ပဲတောင့်ရှည်သီးနှံကို ဇူလိုင်လတွင် စိုက်ပျိုးပြီး အောက်တိုဘာလတွင် ခူးဆွတ်ကြကြောင်း၊ အောက်တိုဘာလ(စတုတ္ထပတ်)တွင် ပဲတောင့် ရှည် တစ်ပိဿာလျှင် လက်ကားဈေး ငွေကျပ် ၁၅၀၀-၂၀၀၀ဖြင့် ရောင်းချကြောင်း၊ ဈေးကွက်အနေဖြင့် စလင်းမြို့ပေါ်ရှိ ကုန်စိမ်းပွဲစားများမှ စိုက်ခင်းအထိ လာရောက် ဝယ်ယူကြကြောင်း၊ မိုးရွာသွန်းမှု များပြားပြီး အထွက်နှုန်းအနည်းငယ် လျော့နည်းသော်လည်း ပဲတောင့်ရှည်သီးနှံပေါ်စအချိန်တွင် ဈေး ကောင်းရကြောင့် တောင်သူများအနေဖြင့် အကျိုးအမြတ်များရရှိကြောင်း သိရှိရပါသည်။

 DOCA(မကွေး)

            မကွေးတိုင်းဒေသကြီး၊ အောင်လံခရိုင်၊ အောင်လံမြို့နယ်အတွင်းရှိ ကျေးရွာများသည် မြေပဲ၊ နှမ်း၊ ပဲတီစိမ်း၊ ပဲစဉ်းငုံ၊ နေကြာနှင့် ဝါသီးနှံများကို စိုက်ပျိုးလျက်ရှိပြီး ယခုနှစ်တွင် ဝါသီးနှံကို (၂၃၂၇၀)ဧကခန့် စိုက်ပျိုးထားကြောင်း သိရသည်။

        မျိုးများအနေဖြင့် ရွှေတောင်(၁၀)၊ RAKA၊ TBL195၊ B31 မျိုးများကို ဇူလိုင်လကုန်တွင် စတင်စိုက်ပျိုးပြီး ဒီဇင်ဘာလတွင် ထွက်ပေါ်မည်ဖြစ်ကြောင်း၊ (၁)ဧက အနေဖြင့် မျိုးစေ့ (၇)ပိဿာခန့် ကုန်ကျပြီး ထွန်ယက်ခ၊ မျိုးစေ့၊ စိုက်စရိတ်၊ သွင်းအားစုအပါအဝင် စုစုပေါင်း ကုန်ကျစရိတ်မှာ (၆) သိန်းခန့် ကုန်ကျကြောင်း၊ ယခင်နှစ်က အထွက်နှုန်းအနေဖြင့် (၁) ဧကတွင် (၂၅၀ မှ ၃၅၀) ပိဿာ ထွက်ရှိကြောင်း၊ (၁)ပိဿာလျှင် ကျပ်(၃၅၀၀)ခန့်ရောင်းရပြီး အကျိုးအမြတ်အနေဖြင့် ကျပ်(၆)သိန်းကျော်ရရှိကြောင်း သိရသည်။ 

           ၂၀၂၄ ခုနှစ်၊ အောက်တိုဘာလ(စတုတ္ထပတ်)တွင် ဝါသီးနှံဈေးနှုန်းအခြေအနေမှာ ဝါ(၁)ပိဿာ လျှင် ကျပ်(၃၂၀၀-၃၄၀၀)၊ ဝါဂွမ်း(၁) ပိဿာလျှင် ကျပ်(၈၀၀၀-၈၅၀၀-၉၀၀၀)၊ (ဝါစေ့) (၁) ပိဿာလျှင် ကျပ်(၁၄၀၀-၁၅၀၀)ဈေးနှုန်းဖြင့် အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့် မြို့ပေါ်ပွဲရုံများမှတဆင့် မန္တလေးတိုင်းဒေသကြီး၊ တပ်မတော်ချည်မျှင်နှင့် အထည်စက်ရုံနှင့် ပုဂ္ဂလိကအထည်စက်ရုံများသို့ တင်ပို့ရောင်းချကြောင်း သိရသည်။ ယခုအချိန်တွင် ဝါသီးနှံများမှာ အပင်ဖြစ်ထွန်းအားကောင်းမွန်ပြီး အကိုင်းအခက်များဝေဆာကာ အသီးအပွင့်များပွင့်ဖူးလျက်ရှိပါကြောင်း၊ ရာသီဥတုအခြေအနေကောင်းမွန်သောကြောင့်  အထွက်နှုန်းကောင်းမွန်ပါက တောင်သူများအကျိုးအမြတ် ပိုမိုရရှိမည်ဖြစ်ကြောင်း  သိရှိရပါသည်။

DOCA(မကွေး)

     မကွေးတိုင်းဒေသကြီး၊ မကွေးမြို့နယ်၊ ကရင်ကျေးရွာတွင် နှမ်း၊ မြေပဲနှင့် ပဲမျိုးစုံသီးနှံတို့ကို စိုက်ပျိုးလျက်ရှိရာ ထောပတ်ပဲသီးနှံစိုက်ဧက ၈၀ ခန့် စိုက်ပျိုးထားရှိကြောင်း သိရသည်။

   ထောပတ်ပဲ(ဆောင်း)သီးနှံကို စက်တင်ဘာလတွင် စတင်စိုက်ပျိုးကြပြီး ဇန်နဝါရီလတွင် ရိတ်သိမ်းရကြောင်း၊ မျိုးအနေဖြင့် ထောပတ်ပဲ(ဖြူ)၊ (ညို)နှင့် (ဖြူကြား)တို့ဖြစ်ပြီး ထောပတ်ပဲ (အဖြူ)ကို အများဆုံး စိုက်ပျိုးကြကြောင်း၊ စိုက်ပျိုးရာတွင် ထွန်ကြောင်းဆွဲ၍ အတန်းလိုက်အစေ့ချ စနစ်ဖြင့်  တစ်ဧကလျှင် မျိုးစေ့  ၁၀ ပြည်ခန့် ကုန်ကျ၍ စုစုပေါင်းကုန်ကျစရိတ်အနေဖြင့် ငွေကျပ် ၅၀၀၀၀၀ ခန့် ကုန်ကျကြောင်း၊ ယခင်နှစ်အထွက်နှုန်းအနေဖြင့် တစ်ဧကလျှင် ၁၅-၂၀ တင်းခန့် ထွက်ရှိပြီး ဈေးနှုန်းအနေဖြင့် ၂၀၂၄ ခုနှစ်၊ ဇန်နဝါရီလ ထောပတ်ပဲ(ဆောင်း)သီးနှံပေါ်စအချိန်တွင် တစ်တင်းလျှင် ငွေကျပ် ၉၈၀၀၀-၁၀၀၀၀၀ ဖြင့် အရောင်းအဝယ်ဖြစ်ခဲ့ပြီး အကျိုးအမြတ်အနေဖြင့် ငွေကျပ် ၉၅၀၀၀၀ ကျော် ရရှိကြောင်း သိရသည်။

   ၂၀၂၄ခုနှစ်၊ အောက်တိုဘာလ(စတုတ္ထပတ်)တွင် ထောပတ်ပဲ(ဖြူ) တစ်တင်းလျှင် ငွေကျပ် ၁၁၂၀၀၀-၁၃၅၀၀၀ ဈေးနှုန်းဖြစ်ပြီး အရောင်းအဝယ်ဖြစ်လျက်ရှိပြီး ဈေးကွက်အနေဖြင့် ဒေသတွင်း ပွဲရုံများနှင့် ပဲကြော်၊ ပဲလှော်လုပ်ငန်းရှင်များမှ ဝယ်ယူကြကြောင်း၊ ထို့အပြင် ပွဲရုံများမှတဆင့်  ရန်ကုန်၊ မန္တလေးမြို့များသို့ တင်ပို့ရောင်းချကြောင်း၊  ယခုအချိန်တွင် ထောပတ်ပဲသီးနှံများ ဖူးပွင့်ဝေဆာ၍ အောင်မြင်ဖြစ်ထွန်းလျက်ရှိသောကြောင့် အထွက်နှုန်းကောင်းမွန်ပြီး ဈေးကောင်းရရှိပါက အကျိုးအမြတ်များ ပိုမိုရရှိနိုင်ပါကြောင်း တောင်သူတစ်ဦးထံမှ သိရသည်။

DOCA(မကွေး)

      ၂၀၂၄ ခုနှစ်၊ ကရင်ပြည်နယ်၊ ဘားအံမြို့သို့ မိတ္ထီလာဒေသထွက်ဖရဲသီးများ ဈေးကွက်ဝင်ရောက်လျက်ရှိကြောင်းနှင့် ကုန်သည်လောကအခေါ် ဒုံးပျံဖရဲသီးအမျိုးအစားဖြစ်ကြောင်း သိရ သည်။ ဖရဲသီးအလုံးရေ (၅၀၀၀/၆၀၀၀) ပါ (၁၂) ဘီးကားတစ်စီးလျှင်  (၉)သိန်းကျပ် ကုန်ကျစရိတ် ရှိကြောင်းနှင့် ဖရဲသီးကို ထွက်ရှိရာဒေသများ၌ အခင်းဖြတ်စနစ်ဖြင့် ဝယ်ယူ၍ သယ်ယူပို့ဆောင်ခ လုပ်သားခ အခြားကုန်ကျစရိတ်များ ထပ်ပေါင်းကာ အကြီးအသေး သောင်းပြောင်း ၁၈၀၀ ခန့်ကျသင့်ကြောင်း ဖောက်သည်ဈေးအနေဖြင့် အကြီးအသေး ၄၅၀၀ကျပ်ဖြင့် ဖြန့်ဖြူးကြောင်း၊ ပယ်သီးနှင့် အလေအလွင့် ၅ရာခိုင်နှုန်းခန့်ထွက်ရှိကြောင်း သိရသည်။

        ကရင်ပြည်နယ် ဘားအံမြို့ရေပေါ်ဈေးတွင်၌ ဖရဲသီးဈေးနှုန်းမှာ အကြီး ၁လုံးလျှင် ၇၀၀၀ ကျပ်၊ အလတ် ၁လုံးလျှင် ၅၀၀၀ကျပ်နှင့်  အသေး ၁လုံးလျှင် ၃၀၀၀ ကျပ်နှုန်းတို့ဖြင့် အရောင်းဝယ်လျက်ရှိ ကြောင်း သိရသည်။

DOCA(ကရင်)

              အောက်တိုဘာလ လဆန်းပိုင်းမှစ၍  ရွှေဘိုမြို့တွင် ဆောင်းပုရစ်(ခေါ်)ဥပုရစ် ဈေးကွက်အတွင်း စတင်ဝင်ရောက်လာကာ ယခုအောက်တိုဘာလ စတုတ္ထပတ်တွင် ဆောင်းပုရစ် ဥပါ အထီးအမအရော အစိမ်းအကောင် (၁၀၀)လျှင်  (၂၂၀၀၀)ကျပ် ပေါက်ဈေးရှိပြီး၊ ဆောင်းပုရစ်အစိမ်း အတောင်ဖြုတ်သန့်စင်ပြီး အကောင်(၁၀၀)လျှင် (၂၃၀၀၀)ကျပ်ဖြင့် အရောင်းအဝယ် ဖြစ်နေကြောင်း ရွှေဘိုမြို့ စည်ပင်သာယာဈေးရှိ ဒေသထွက် စားသောက်ကုန် ရောင်းချသူတစ်ဦးထံမှ သိရသည်။

             ဝင်ရောက်လာသော ဆောင်းပုရစ်များကို   အခြားမြို့နယ်များဖြစ်သော မုံရွာ၊ မန္တလေး၊နေပြည်တော်၊ ရန်ကုန်မြို့များမှ  အသင့်စား စားသောက်ကုန် ပြုလုပ်ရောင်းချသည့် လုပ်ငန်းရှင်များမှ ဝယ်ယူကြသည့်အပြင်၊ ရွှေဘိုမြို့ပေါ်ရှိ ဈေးကြီးများမှတစ်ဆင့် ပြန်လည်၍ ဖောက်သည်ဝယ်ယူရောင်းချကြသူများဖြင့် အရောင်းအဝယ်ဖြစ်လျက်ရှိကြောင်း သတင်းရရှိသည်။

DOCA(စစ်ကိုင်း)