ပြည်တွင်းကုန်သွယ်မှုသတင်း

Powered by Drupal

Top Dairy Farm နို့စားနွား မွေးမြူရေးခြံမှ နို့နှင့် နို့ထွက် ပစ္စည်းများကို Dairy Products အမည်ဖြင့် ဈေးကွက်ရရှိ

          Top Dairy Farm ထိပ်တန်းနို့စားနွား မွေးမြူရေးခြံသည် ညောင်တုန်းမြို့နယ်၊ ကျုံတမာကျေးရွာအုပ်စု၊ ပဲရုံဆိပ်ကျေးရွာ ရန်ကုန်၊ ပုသိမ်ကားလမ်းမကြီးဘေး မိုင်တိုင်အမှတ် (၃၇/၄)တွင် တည်ရှိပြီး ခြံအကျယ်တစ်ဧကနှင့် စားကျက် ၅.၅ဧကရှိသည့် မွေးမြူရေးခြံတစ်ခြံဖြစ်ပါသည်။

ယင်းခြံအား ဦးမြတ်သိန်းထွန်းက ၂၀၁၇ခုနှစ် ဇန်နဝါရီလမှစ၍ ရင်းနှီးမြုပ်နှံမှုတန်ဖိုး ကျပ်သန်း (၂၅၀)ခန့်ဖြင့် စတင်ဆောင်ရွက်ခဲ့ပြီး လုပ်ငန်းစတင်ချိန်တွင် လုပ်သားအင်အား (၂၃)ဦးခန့်ရှိခဲ့ပြီး ၂၀၁၆၊ ၂၀၁၇ခုနှစ်တွင် ဖရီရှန်(Holstein Friesian)အမျိုးအစား နို့စားနွားမ အကောင်ရေ(၃၀)ဖြင့် စတင်မွေးမြူခဲ့ရာ နှစ်စဉ်တိုးပွားမွေးမြူ၍ လက်ရှိအချိန်တွင် နို့စားနွား (၉၃)ကောင်အထိ တိုးပွားမွေးမြူနိုင်ခဲ့ကြောင်းသိရသည်။

          နို့ထုတ်ယူပုံမှာ နို့ပေးနွားမ (၃၀)ကောင်မှ ထုတ်လုပ်ပေးလျက်ရှိကြောင်း၊ ၎င်းနို့များအား၊ မွေးမြူရေး နှင့် ကုသရေးဦးစီးဌာနနှင့် ပူးပေါင်း၍ School Milk Program ဖြင့် ငှားယူထားသော ပေါင်းခံစက်နှင့် ပေါင်းခံထုတ်လုပ်လျက်ရှိကြောင်း၊ Top Dairy Products အမည်ဖြင့် ဧရာဝတီတိုင်းဒေသကြီးနှင့် ရန်ကုန်တိုင်းဒေသကြီး အတွင်းရှိ မြို့နယ်များသို့ ထုတ်လုပ်ဖြန့်ဖြူး ရောင်းချလျက်ရှိကြောင်းသိရသည်။

          ထုတ်လုပ်သော နို့ထွက်ပစ္စည်းအမျိုးအစားများမှာ (က) နို့စိမ်း(Fresh Milk)၊ (ခ) နို့ပေါင်း (Pasteurized Milk)၊ (ဂ) အဆီထုတ်နို့ပေါင်း (Low Fat Pasteurized Milk)၊ (ဃ) ဒိန်ချဉ် (Yogurt)၊ (င)အဆီထုတ်ဒိန်ချဉ် (Law Fat Yogurt)တို့ ဖြစ်ကြောင်း Top Dairy Farm နို့စားနွားမွေးမြူရေးခြံသို့ ၂၀၂၃ခုနှစ် အောက်တိုဘာလ ဒုတိယပတ်တွင် စားသုံးသူရေးရာဦးစီးဌာန၊ ညောင်တုန်းမြို့နယ်ဦးစီးမှူး ဦးအောင်လွင်နှင့် ဝန်ထမ်းများ ကွင်းဆင်းလေ့လာခဲ့မှုအရ သိရပါသည်။

          ကွင်းဆင်းစစ်ဆေးရာတွင် ဦးအောင်လွင်က MSMEsလုပ်ငန်းများ ဖွံ့ဖြိုးတိုးတက်ရေးအတွက် နိုင်ငံတော်မှ တွန်းအားပေးဆောင်ရွက်လျက်ရှိရာ စားသုံးသူရေးရာဦးစီးဌာနအနေဖြင့် MSMEs လုပ်ငန်းဖွံ့ဖြိုးတိုးတက်ရေးအတွက် အလားအလာရှိသော လုပ်ငန်းများ၏ မတည်ရင်းနှီးငွေလိုအပ်ချက်များနှင့် နည်းပညာများ ဖွံ့ဖြိုးတိုးတက်စေရေးအတွက် သက်ဆိုင်ရာဌာနများအဖွဲ့အစည်းများနှင့်ချိတ်ဆက်၍ ပူးပေါင်းဆောင်ရွက်ပေးခြင်း၊ ဈေးကွက်အတွင်းအမည်ရရှိထားသော နို့စိမ်း၊ နို့ပေါင်း၊ အဆီထုတ်နို့ပေါင်း၊ ဒိန်ချဉ်နှင့် အဆီထုတ်ဒိန်ချဉ်များ ထုတ်လုပ်သည့်လုပ်ငန်းများ၏ အရည်အသွေးမြင့်ထုတ်ပိုးမှုစနစ်နှင့် ဈေးကွက်ရရှိနိုင်ရေး၊ လုပ်ငန်းများတို့ချဲ့နိုင်ရေးတို့ကို အပြန်အလှန်ဆွေးနွေးခဲ့ပါသည်။

          Top Dairy Farm နို့စားနွားခြံမှ ထွက်သော နို့နှင့် နို့ထွက်ပစ္စည်းများသည် ကျောင်းသူ၊ ကျောင်းသား၊ လူငယ်များ သက်ကြီးရွယ်အိုများနှင့် လူလတ်ပိုင်းများပါ ကြိုက်နှစ်သက်ကြပြီး အသင့်စားနို့ဗူးများကို စားသောက်ဆိုင်များ စတိုးများ၊ City Markများတွင် အလွယ်တကူဝယ်ယူသောင်းသုံးနိုင်ပြီး စားသုံးသူများအတွက် ဘေးအန္တရာယ်ကင်းရှင်းအောင် ဦးစားပေးထုတ်လုပ်ထားသော ကုန်စည်ဖြစ်ပြီး သောက်သုံရန်သင့်သော အစားအစာဖြစ်၍ ဈေးကွက်ရရှိလာမည်ဖြစ်ကြောင်း ရေးသားဖော်ပြလိုက်ရပါသည်။

DOCA(ဧရာဝတီ)

ရွှေတောင်ဒေသထွက် မာလကာသီးအရောင်းအဝယ်ဖြစ်

      ပြည်ခရိုင်၊ ရွှေတောင်မြို့နယ်၊ ကြို့ကုန်းအုပ်စု၊ ကြို့ကုန်းကျေးရွာတွင် မာလကာသီးကို စီးပွားဖြစ် စိုက်ပျိုးထားရှိကြောင်း သိရှိရပါသည်။ မာလကာသီးစိုက်ပျိုးသူတောင်သူမှ မာလကာပင်ကို ၅၀၀ကျပ်ဖြင့် အပင် ၁၀၀ ဝယ်ယူ၍စိုက်ပျိုးကြောင်း သိရပါသည်။ မာလကာပင်စိုက်ပျိုးရာတွင် တစ်ပင်နှင့်တစ်ပင် ၈ပေခြား၍ စိုက်ပျိုးရပြီး စိုက်ပျိုးသည့်အခါ မြေကျင်းကို တစ်ပေခွဲပတ်လည် အနက် ၂ပေတူးပြီး မြေကျင်းနက်ပါက ပိုကောင်းကြောင်း သိရှိရပါသည်။ မြေကျင်းကိုပိုးသတ်ပြီး စိုက်ပျိုးပင်ကိုစိုက်သည့်အခါ မြေလုံးကိုမကွာစေရန် အောက်ခြေကို ဓါးနှင့်ဝိုက်ဖြတ်ပြီး အထုပ်အတိုင်း ထည့်ပြီးမှ ပလတ်စတစ်ကိုအသာအယာဆွဲထုတ်ရပါသည်။ အမြစ်စွဲစေရန် အပင်အားဈေး နို့ဆီဘူး၂ခွက်အား လောင်းထည့်ပေးရပါသည်။ မာလကာပင်မှ လောက်စာလုံးလောက် အသီးများ ထွက်လာပါက ပလတ်စတစ်နှင့်အထုပ်ထုပ်ရပါသည်။ (၃)လခန့်ကြာမြင့်လာပါက မာလကာသီးများကိုစတင်ခူးဆွတ်ရပြီး တစ်ခါခူးလျှင် အလုံး(၃၀၀)ခန့်ခူးဆွတ်ရရှိပြီး ထွက်ရှိလာသော အသီးများကို ဒိုင်များမှ ခြံထဲသို့ လာရောက်ဝယ်ယူကြပြီး တစ်လုံးလျှင် ဖောက်သည်ဈေး ၂၅၀ကျပ်ဖြင့် ရောင်းချကြောင်း သိရပါသည်။ မာလကာခြံပိုင်ရှင်များမှ ဈေးများသို့ ကိုယ်တိုင်သွားရောက်ပြီး ရောင်းချကြ၍ တစ်လုံးလျှင် ၃၅၀ကျပ်ဖြင့် ရောင်းချကြောင်း သိရပါသည်။ မာလကာပင် စိုက်ပျိုးရာတွင် အရင်းအနှီးအနေဖြင့် ၂သိန်းကျပ်ခန့် ကုန်ကျပြီး နှစ်ရှည်သီးနှံဖြစ်၍ နှစ်စဉ် ဝင်ငွေများရရှိသော သီးနှံဖြစ်၍ စိုက်ပျိုးသင့်ကြောင်း လေ့လာသိရှိရပါသည်။

DOCA(ပဲခူး)

မန္တလေးမြို့၏ အင်းလေးဒေသထွက် ချည်ထည်ဈေးကွက်

     မန္တလေးမြို့တွင် ရှမ်းပြည်နယ်တောင်ပိုင်း အင်းလေးမှထွက်ရှိသည့် ရိုးရာချည်ထည်အထူအပါးများဖြစ်သည့် ကျားဝတ်မျိုးစုံ၊ မဝတ်မျိုးစုံနှင့် ကလေးဝတ်မျိုးစုံတို့ကို အသင့်ချုပ်၍ရောင်းချရာ ၎င်းတို့မှာ လူကြိုက်များသည့် ရိုးရာချည်ထည်များဖြစ်ပါသည်။ အမျိုးသားများအတွက် ဘောင်းဘီရှည်နှင့် ဘောင်းဘီတိုမျိုးစုံ၊ ရှပ်အင်္ကျီလက်တို၊ လက်ရှည်အကွက်၊ အစင်း၊ ပြောင်များမှာ ချုပ်ရိုးချုပ်သားသပ်ရပ်ပြီး ခိုင်ခန့်သည့်အတွက် အကြိုက်များကြပါသည်။ အမျိုးသမီးများအနေဖြင့် လူကြီး၊ လူလတ်ဝတ် ဘောင်းဘီ၊ ဘလောက်အင်္ကျီမျိုးစုံနှင့် နွေရာသီနှင့်ဆောင်းရာသီတို့အတွက် ချည်သားအထူဖြင့်ချုပ်ထားသည့် အပေါ်ဝတ်ချည်ထည်များကို အမျိုးသမီးများကြိုက်နှစ်သက်ကြပါသည်။ ကလေးဝတ်များမှာလည်း ရောင်းအားကောင်းသည့် ကုန်ပစ္စည်းဖြစ်ပါသည်။ ဈေးနှုန်းအနေဖြင့် သင့်တင့်သည့်အတွက် ရောင်းအားကောင်းသည့်အပြင် မန္တလေးတောင်အနီး ကျောက်တော်ကြီးဘုရားကြီးနှင့် မန္တလေးအရှေ့ပြင်ရပ်၊ (၁၆)လမ်း (၁၇) လမ်းကြားတွင် ဆိုင်ခန်းဖွင့်လှစ်၍ ရောင်းချခြင်းဖြစ်သည့်အတွက် ဘုရားဖူးပြည်သူများလည်းဝယ်ယူအားပေးမှုရှိကြောင်း၊ ပြည်ပခရီးသွားများမှာလည်း စိတ်ဝင်စားမှုရှိသည့် ရိုးရာချည်ထည်များကို ဝယ်ယူအားပေးလျက်ရှိကြောင်း၊ မန္တလေးမြို့၏ ရာသီဥတုနှင့်ကိုက်ညီသည့် အင်းလေးရိုးရာချည်ထည်ဈေးနှုန်းများမှာလည်း သင့်တင့်မျှတသည့်အတွက် လူကြိုက်များသည့် ရိုးရာချည်ထည်များဖြစ်ကြောင်း လေ့လာသိရှိရပါသည်။

DOCA(မန္တလေး)

ရွှေတောင်မြို့၏ မုန်လာဥ

    ပဲခူးတိုင်းဒေသကြီး၊ ရွှေတောင်မြို့နယ်၊ ကသစ်ကိုင်းအုပ်စု၊ ကသစ်ကိုင်းကျေးရွာရှိတောင်သူ ဦးခင်ဦး၏ မုန်လာဥစိုက်ခင်းသို့ (၁၃.၁၀.၂၀၂၃)ရက်နေ့ နံနက် (၁၀:၀၀)နာရီတွင် စားသုံးသူရေးရာဦးစီးဌာန၊ မြို့နယ်တာဝန်ခံနှင့်ဝန်ထမ်းများသည် ကွင်းဆင်းလေ့လာခဲ့ပါသည်။

    မုန်လာဥမျိုးများမှ နှင်းဆီမျိုး၊ ဆင်းမုန်လာမျိုးနှင့် ဂျူမုံမျိုးတို့ရှိပြီး ရွှေတောင်မြို့နယ်တွင် စိုက်ပျိုးသည့်မုန်လာမျိုးမှာ နှင်းဆီမျိုးဖြစ်ပြီး စိုက်ပျိုးဧကမှာ တစ်ယောက်စိုက်ကျော်ခန့်ရှိကြောင်း သိရပါသည်။ မုန်လာမျိုးစေ့တစ်ထုပ်ကို စိုက်ပျိုးလျှင် စိုက်ပျိုးမြောင်းအရှည် (၁၉)မြောင်းရှိပါသည်။ ကျင်းတစ်ကျင်းတွင် မျိုးစေ့၆စေ့မှ ၇စေ့ထည့်ပြီး ၆လက်မခန့်ကွာ၍ စိုက်ပျိုးရပါသည်။ ဝါခေါင်လ အတွင်း စတင်စိုက်ပျိုးပြီး တစ်လခွဲအကြာတွင် မုန်လာဥများကို နှုတ်ယူရပါသည်။ မုန်လာဥမှာ ဈေးကောင်းရသောကြောင့် ရေလောင်း၍ အမြဲတမ်းစိုက်ပျိုးကြပါသည်။ ဆောင်းရာသီတွင် ထွက်ရှိ သောမုန်လာဥမှာ အလုံးပိုချောကြောင်း သိရပါသည်။ နှုတ်ယူသည့်အခါ ဖောက်သည် အနည်းအများ ပေါ်မူတည်၍ တစ်ရက်ခြား(သို့) နှစ်ရက်ခြား၍နုတ်ယူကြပါသည်။ တစ်ခါနုတ်လျှင် မုန်လာဥအလုံး ၁၀၀၀ မှ ၁၅၀၀ ထိနှုတ်ယူရရှိပါသည်။ ထွက်ရှိလာသောမုန်လာဥများကို ရွှေတောင်မြို့တွင်းသာမက ပြည်မြို့နှင့် ရန်ကုန်မြို့မှ ပွဲစားများက လာရောက်ဝယ်ယူကြကြောင်း သိရပါသည်။ ဖောက်သည်ဈေးမှာ မုန်လာဥတစ်ဥလျှင် ၈၀ကျပ်နှုန်းဖြင့် ရောင်းချပါသည်။ မုန်လာဥစိုက်ခင်းမှ မုန်လာဥများကို ၁၅ရက်ကြာလျှင် ခူးဆွတ်ရပါသည်။ ပင်ညှပ်မုန်လာပင်များကိုလည်း ချဉ်ဖတ်ထည့်ရန် နုတ်ယူကြကြောင်း သိရှိရပါသည်။

DOCA(ပဲခူး)

စဉ့်ကိုင်မြို့နယ်၌ သက်သာသောစျေးနှုန်းတို့ဖြင့် အခြေခံစားသောက်ကုန်များ ရောင်းချလျက်ရှိ

    မန္တလေးတိုင်းဒေသကြီး၊ ကျောက်ဆည်ခရိုင်၊ စဉ့်ကိုင်မြို့နယ်၊ မြို့မစျေးအနီး၌ (၂၀-၁၀-၂၀၂၃) ရက်နေ့တွင် စဉ့်ကိုင်မြို့နယ်၊ စည်ပင်သာယာရေးအဖွဲ့ကဦးဆောင်ပြီး မြို့နယ်အထွေထွေအုပ်ချုပ်ရေးဦးစီးဌာန၊ ခရိုင်စားသုံးသူရေးရာဦးစီးဌာန၊ ခရိုင်ဆီကုန်သည်နှင့်ဆီလုပ်ငန်းရှင်များအသင်း၊ မြို့နယ်ဆန်စက်လုပ်ငန်းရှင်များအသင်းနှင့်ပူးပေါင်း၍ သက်သာသောစျေးနှုန်းများဖြင့် အခြေခံစားသောက်ကုန်များရောင်းချပေးလျက်ရှိပါသည်။ ထိုသို့ရောင်းချရာတွင် ဆန်(၁)ပြည်လျှင် (၃၀၀၀/-)ကျပ်၊ ဆီ(၁)ပိဿာလျှင် (၄၆၉၇/-)ကျပ်၊ ဝက်သား(၁)ပိဿာလျှင် (၁၅၀၀၀/-)ကျပ်၊ အမဲသား (၁)ပိဿာလျှင် (၁၂၀၀၀/-)ကျပ်၊ ဆိတ်သား(၁)ပိဿာလျှင် (၂၀၀၀၀/-)ကျပ်၊ ငါး(၁)ပိဿာလျှင်(၆၀၀၀/-)ကျပ်နှင့် ကြက်ဥ(၁)လုံးလျှင် (၂၅၀/-)ကျပ်စျေးနှုန်းတို့ဖြင့် စားသုံးသူပြည်သူများအား ရောင်းချပေးလျက်ရှိကြောင်း သတင်းရရှိပါသည်။

DOCA(မန္တလေး)

 

တံတားဦးမြို့နယ်၏ ခေါင်းကွဲသံသေတ္တာစျေးနှုန်းစျေးကွက်အခြေအနေ

        မန္တလေးတိုင်းဒေသကြီး၊ တံတားဦးမြို့နယ်၊ ခေါင်းကွဲကျေးရွာမှ သံသေတ္တာပြုလုပ်လျက်ရှိ သောလုပ်ငန်းရှင် ဦးတင့်ဝေနှင့်တွေ့ဆုံ၍ သံသေတ္တာပြုလုပ်သည့်အကြောင်းအရာများကို တွေ့ဆုံမေးမြန်းခဲ့ပါသည်။ သံသေတ္တာကို ၂၀၁၀ခုနှစ်မှစတင်ပြုလုပ်ခဲ့ပြီး ယနေ့အချိန်ထိ ပြလုပ်နေဆဲဖြစ် ကြောင်း၊ သံသေတ္တာပြုလုပ်သည့် သက်တမ်းကာလမှာ (၁၅-၁၆) နှစ်ရှိပြီဖြစ်ကြောင်း၊ သံသေတ္တာပြုလုပ်ရန်အတွက် အဓိကကုန်ကြမ်းကို လွန်ခဲ့သော(၂၀၁၅-၂၀၁၆) ခုနှစ်တွင် မြဝတီဘက်မှ တွဲကားများဖြင့် သံပြားတစ်ထုပ် ( ၁.၅-၂ )တန်သံပြားများ မှာယူအသုံးပြုခဲ့ရပါသည်။ ယခုအခါ လမ်းပန်းဆက်သွယ်ရေးမကောင်း၍ အချိန်ကြန့်ကြာသောကြောင့် ယခုလက်ရှိ မန္တလေးမြို့၊ နယူးလိုက်သွပ်ပြားဆိုင်မှ ဝယ်ယူအသုံးပြုရပါသည်။ သံသေတ္တာပြုလုပ်ရန် လုပ်သားအနေဖြင့် ယခင်တွင် (၄-၅)ဦးငှားရမ်းအသုံးပြုခဲ့ရသော်လည်း ယခုအခါ လုပ်သား(၂)ဦးဖြင့် တစ်နိုင်တစ်ပိုင်ပြုလုပ်ဆောင်ရွက်နေဆဲဖြစ်ပါသည်။ လုပ်သား(၁)ဦးမှာ တစ်နေ့လျှင် သံသေတ္တာ(၅)လုံးပြီးစီးအောင်ပြုလုပ်နိုင်ပြီး လုပ်သားခအနေဖြင့် သံသေတ္တာ(၁)လုံးလျှင် (၄၀၀၀/-)ကျပ်နှုန်းဖြင့် ပုတ်ပြတ်ပေးလျက်ရှိပါသည်။ သံသေတ္တာအမျိုးအစား(၂)မျိုးရှိပါသည်။ ပထမတန်းဝင် အမျိုးအစားမှာ အထူစားဖြစ်ပြီး အထူစား(၃)မျိုးထပ်မံခွဲခြားထားပါသည်။ သံသေတ္တာအထူ ပထမတန်းစားမှာ ဆိုဒ်အနေဖြင့် အလျား ၃၃လက်မ၊ အနံ ၁၈လက်မ၊ ဒေါက်အဖုံးပါ ၁၃လက်မရှိပြီး ဒုတိယတန်းစားမှာ ဆိုဒ်အနေဖြင့် အလျား ၃၀လက်မ၊ အနံ ၁၆လက်မ၊ ဒေါက်အဖုံးပါ ၁၁လက်မနှင့် တတိယတန်းစားမှာ ဆိုဒ်အနေဖြင့် အလျား ၂၇လက်မ၊ အနံ ၁၄လက်မ၊ ဒေါက်အဖုံးပါ ၁၀လက်မရှိပါသည်။ ပထမတန်းစား သံသေတ္တာတစ်လုံးလျှင် (၃၈၀၀၀/-)ကျပ်၊ ဒုတိယတန်းစား သံသေတ္တာတစ်လုံးလျှင် (၃၅၀၀၀/-)ကျပ်၊ တတိယတန်းစား သံသေတ္တာတစ်လုံးလျှင် (၂၅၀၀၀/-)ကျပ်စျေးနှုန်းတို့ဖြင့် ဖောက်သည်ပေးရောင်းရကြောင်း၊ ဒုတိယအမျိုးအစားမှာ အပါးဖြစ်ပြီး အပါး(၃)မျိုးထပ်မံခွဲ၍ရောင်းချရပါသည်။ သံသေတ္တာအပါး ပထမတန်းစားမှာ ဆိုဒ်အနေဖြင့် အလျား ၃၃လက်မ၊ အနံ ၁၈လက်မ၊ ဒေါက်အဖုံးပါ ၁၃လက်မရှိပြီး ဒုတိယတန်းစားမှာ ဆိုဒ်အနေဖြင့် အလျား ၃၀လက်မ၊ အနံ ၁၆လက်မ၊ ဒေါက်အဖုံးပါ ၁၁လက်မနှင့် တတိယတန်းစားမှာ ဆိုဒ်အနေဖြင့် အလျား ၂၇လက်မ၊ အနံ ၁၄လက်မ ၊ ဒေါက်အဖုံးပါ ၁၀လက်မရှိပါသည်။ ပထမတန်းစား သံသေတ္တာတစ်လုံး လျှင် (၂၇၅၀၀/-) ကျပ်၊ ဒုတိယတန်းစား သံသေတ္တာတစ်လုံးလျှင် (၁၆၀၀၀/-)ကျပ်၊ တတိယတန်းစား သံသေတ္တာတစ်လုံးလျှင် (၁၃၅၀၀/-)ကျပ်စျေးနှုန်းတို့ဖြင့် ဖောက်သည်များအား ရောင်းချပေးလျက်ရှိကြောင်း၊ စျေးကွက်အနေဖြင့် ယခု၂၀၂၃ခုနှစ်၊ အောက်တိုဘာလတွင် ရွှေဘိုမြို့နယ်၊ မတ္တရာမြို့နယ်များသို့ ရောင်းချပေးနေရကြောင်း၊  အကျိုးအမြတ်အနေဖြင့် သံသေတ္တာတစ်လုံးလျှင် (၂၅၀၀-၃၀၀၀) ကျပ်အမြတ်ရရှိပါကြောင်း သံသေတ္တာပြုလုပ်သည့် လုပ်ငန်းရှင်၏ ပြောကြားချက်အရသိရှိရပါသည်။

DOCA(မန္တလေး)

                            

ပေါက်ခေါင်းမြို့နယ်၏ ငရုတ်စိုစိုက်ပျိုးထွက်ရှိမှု အခြေအနေ

   ပြည်ခရိုင်၊ ပေါက်ခေါင်းမြို့နယ်တွင် ယခုနှစ် ၂၀၂၃ ခုနှစ်တွင် မိုးငရုတ်စို စိုက်ဧကမှာ ၁၈၀ ကျော်ရှိပြီး စိုက်ပျိုးသည့်မျိုးများမှာ ကျောက်စိမ်းငရုတ်သီး၊ အာမိုငရုတ်သီးနှင့် ကရင်မ(ခေါ်) တောင်ပေါ်ငရုတ်သီးမျိုးတို့ကို စိုက်ပျိုးကြောင်း သိရပါသည်။ ငရုတ်သီးစိမ်းကို မိုးရာသီတွင် စိုက်ပျိုးကြသလို ဆောင်းရာသီတွင်လည်း စိုက်ပျိုးကြပါသည်။ ပေါက်ခေါင်းမြို့နယ်အနေဖြင့် ငရုတ်စိုကို အများဆုံးစိုက်ပျိုးကြပြီး ထွက်ရှိလာသောငရုတ်သီးစိမ်းများကို နယ်စုံသို့ တင်ပို့ရောင်းချကြသလို ပြည်မြို့သို့လည်းတင်ပို့ရောင်းချပြီး ထိုမှတစ်ဆင့်ရန်ကုန်မြို့သို့လည်း တင်ပို့ရောင်းချကြောင်း သိရပါသည်။ ငရုတ်သီးစိမ်းပေါ်ခါစတွင် ရောင်းချသောဈေးနှုန်းများမှာ အာမိုတစ်ပိဿာလျှင် ၁၂၀၀ ကျပ်၊ ကျောက်စိမ်းသီးတစ်ပိဿာလျှင် ၁၅၀၀ကျပ်၊ တောင်ပေါ်ကရင်မ ငရုတ်သီး တစ်ပိဿာလျှင် ၄၅၀၀ကျပ်ဖြင့် ရောင်းချကြပါသည်။ ယခုအောက်တိုဘာလကုန်ပတ်တွင် အာမို တစ်ပိဿာလျှင် ၂၀၀၀ကျပ်၊ ကျောက်စိမ်းတစ်ပိဿာလျှင် ၂၃၀၀ကျပ်နှင့် တောင်ပေါ်ငရုတ် တစ်ပိဿာလျှင် ၅၀၀၀ကျပ်အထိ ဈေးမြင့်တက်သွားကြောင်း သိရပါသည်။

DOCA(ပဲခူး)

ပေါ်ဦးပေါ်ဖျား ပြည်ခရမ်းမီးအုန်းသီး

    ပြည်မြို့ပေါ်ဈေးများသို့ ၂၀၂၃ခုနှစ်၊အောက်တိုဘာ ဒုတိယပတ်မှ စတင်ပြီး ခရမ်းမီးအုန်းသီးများ စတင်ဝင်ရောက်မှုရှိလာပြီး ခရမ်းမီးအုန်းအဖြူသီးများသာ ဈေးကွက်အတွင်း ရောင်းချမှုရှိနေကြကြောင်း သိရပါသည်။ မြန်မာနိုင်ငံရာသီဥတုအနေဖြင့် ခရမ်းသီးပင်များအတွက် သင့်တော်သောရာသီဥတုရှိပြီး နေရာဒေသအနှံ့အပြား စိုက်ပျိုးလျက်ရှိရာ ယခုထွက်ရှိသော ခရမ်းသီးမီးအုန်းသီးမှာ ပြည်မြို့နယ်၊ တောင်ခွေးရဲအုပ်စုနှင့် ပေါင်းတလည်၊ ပုတီးကုန်း၊ သဲကုန်းဘက်တို့မှ ဝင်ရောက်မှုရှိကြောင်း သိရပါသည်။ ပေါ်ဦးပေါ်ဖျားဖြစ်သည့်အတွက် တစ်ပတ်လျှင် အလုံး (၃၀)ခန့်သာ ဝင်ရောက်မှုရှိပြီး ပေါ်ခါစဖြစ်သောကြောင့် အဝယ်လိုက်နေကြောင်း သိရပါသည်။

  ခရမ်းသီးမီးအုန်းအဖြူသီးများတွင် ဗီတာမင် အမျှင်ဓါတ်များပါဝင်သည်။ အဆီဓါတ်မပါဝင်သည့်အတွက် ကိုယ်အလေးချိန်ကျချင်သူများအတွက် အသုံးဝင်၍ အချို့လေရောဂါအခံရှိသူများ အများအပြားစားသုံးပါက အစာမကြေ လေထိုးလေအောင့်ဖြစ်တတ်ကြောင်း သိရပါသည်။ ခရမ်းသီး မီးအုန်းအဖြူသီးကို အတွင်းသားများအထဲပါနှပ်အောင် မီးအေးအေးဖြင့် မီးအုန်းကာ ကြက်သွန်နီ၊ နံနံပင်၊ နှမ်း၊ ဆီ၊ ဆား၊ အချိုမှုန့်တို့ဖြင့် ရောနှယ်ပြီးသုပ်၍ စားကြပါသည်။ ခရမ်းသီးမီးအုန်းကို ကြက်ဥ၊ ဘဲဥတို့ဖြင့်လည်း ကြော်စားကြပါသည်။

  ပြည်မြို့ပေါ်ဈေးများတွင် ခရမ်းဖြူသီးတစ်လုံးလျှင် ပေါ်ဦးပေါ်ဖျားဖြစ်၍ တစ်လုံးလျှင် (၈၀၀)မှ (၁၀၀၀)ကျပ်အထိ ရောင်းချကြပြီး လှိုင်လှိုင်ပေါ်ချိန်တွင် တစ်လုံးလျှင် (၄၀၀)ကျပ်မှ (၅၀၀)ကျပ်သာ ရှိကြောင်း သိရပါသည်။

DOCA(ပဲခူး)

ကျောက်ဆည်ခရိုင်၌ ပဲစင်းငုံ(မိုးဦး)များ အောင်မြင်ဖြစ်ထွန်းလျက်ရှိ

     မန္တလေးတိုင်းဒေသကြီး၊ ကျောက်ဆည်ခရိုင်၌ (၂၀၂၂-၂၀၂၃)ဘဏ္ဍာနှစ်တွင် ပဲစင်းငုံ(မိုးဦး)စိုက်ဧက (၁၅၅၂)ဧကစိုက်ပျိုးထားရှိပြီး ကျောက်ဆည်မြို့နယ်တွင် (၈၆၇)ဧက၊ မြစ်သားမြို့နယ်တွင် (၆၈၅)ဧကစိုက်ပျိုးထားကြောင်း ခရိုင်လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာ၏ စာရင်းများအရသိရှိရပါသည်။ ပဲစင်းငုံကို သီးသန့်စိုက်ပျိုးမှုများရှိသည့်အပြင် သီးထပ်သီးညှပ်အဖြစ်စိုက်ပျိုးမှုများလည်းရှိသည်။ တစ်ဧကလျှင် ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၂၀၀၀၀၀)ကျပ်ခန့်ကုန်ကျပြီး အထွက်နှုန်းအနေဖြင့် (၁၀-၁၁) တင်းခန့်ထွက်ရှိကြောင်း၊ ယခင်နှစ်တွင် ပဲစင်းငုံတစ်တင်းလျှင် (၄၁၅၀၀)ကျပ်ဈေးနှုန်းတို့းရှိခဲ့ပြီး ယခုလက်ရှိပေါက်ဈေးအနေဖြင့် (၁၀၀၀၀၀)ကျပ်ဈေးနှုန်းတို့ဖြင့် ရောင်းဝယ်လျက်ရှိပါသည်။ ပဲစင်းငုံကို ပဲဟင်း၊ ပဲကြော်၊ ပဲစင်းငုံအသီးကို အစိမ်းပြုတ်၍စားသုံးကြပါသည်။ ပဲစင်းငုံကိုစားသုံးခြင်းဖြင့် ပန်းနာရင်ကြပ်ရောဂါများကို လည်းပျောက်ကင်းစေသည့်အပြင် သွေးအားနည်းရောဂါကိုကာကွယ်ပေးပြီး သွေးတိုးကိုကျစေကာ ကိုယ်ခံအားစနစ်ကိုပါကောင်းမွန်စေသည်။ ပဲစင်းငုံကိုစားသုံးခြင်းဖြင့် ကျန်းမာရေးအကျိုးကျေးဇူးများရရှိသဖြင့် စားသုံးသင့်ပါကြောင်း ရေးသားတင်ပြလိုက်ရပါသည်။

DOCA(မန္တလေး)

                            

ပြည်သရက်ကင်းဈေးကွက်

    ပြည်ဈေးကွက်အတွင်း သရက်ကင်းများ စက်တင်ဘာလက စတင်ဝင်ရောက်ခဲ့ပြီး ယခုအောက်တိုဘာလတွင် ပြည်မြို့ပေါ်ဈေးများတွင် လှိုင်လှိုင်ဝင်ရောက်မှုရှိပါကြောင်း သိရပါသည်။ သရက်ကင်းကို ပြည်မြို့ပေါ် အနီးတစ်ဝိုက်ရှိ မှော်ဇာ၊ မြို့သစ်၊ ကင်းပွန်းခြုံ၊ ဇီးအုပ်၊ နတ်တလင်းစသည့် ကျေးရွာရပ်ကွက်များနှင့် ပြည်မြို့၊ အနောက်ဘက်ကမ်းရှိ ရွှေဘုံသာ၊ စစ်တဝင်း၊ ညောင်ပင်သာ၊ သစ်စိမ့်ပင်စသည့်ကျေးရွာများတွင် တပိုင်တနိုင် စိုက်ပျိုးလျက် ပြည်မြို့ပေါ် ဈေးကွက်သို့ တင်ပို့ရောင်းချလျက်ရှိကြောင်း သိရပါသည်။ သရက်ကင်းကို သရက်ကင်း အချဉ်အဖြစ် အများဆုံးစားသုံးကြပြီး ချဉ်ဖတ်ရောင်းသော ဆိုင်များမှ အများဆုံးဝယ်လိုအားရှိကြောင်း သိရပါသည်။ သရက်ကင်းကို ချဉ်ဖတ်အပြင်း သံပုရာရည် ညှစ်ဆမ်းကာ စားသုံးကြသလို ရိုးရိုးတို့စရာအဖြစ်လည်း စားသုံးကြပြီး အချို့ဒေသများတွင် ပါးပါးလှီးကာ ငါးကင်၊ ပုစွန်ဆိတ်တို့ဖြင့် သုပ်စားလေ့ရှိကြောင်းလည်း သိရပါသည်။ သရက်ကင်းသည် အေးခါးဖန်အရသာရှိပြီး စားသုံးလိုက်လျှင် အနည်းငယ်စပ်ရှားရှားရှိပါသည်။ သရက်ကင်းကို စားသုံးခြင်းဖြင့် ဝမ်းမီးတောက်ကာ အစာကြေစေပြီး ချောင်းဆိုး၊ ရင်ကြပ်၊ ပန်းနာ၊ သလိပ်ကပ်ရောဂါများကို ပျောက်ကင်းစေကြောင်း သိရပါသည်။ ဈေးနှုန်းမှာ ပေါ်ကာစတွင် (၁၀)ကျပ်သားကို ကျပ် (၈၀၀)မှ (၇၀၀)ခန့်အထိရှိခဲ့ပြီး ယခုလှိုင်လှိုင်ပေါ်ချိန်တွင် (၁၀)သားကို ကျပ် (၅၀၀) မှ(၄၀၀)ခန့်သာရှိတော့ကြောင်း သိရပါသည်။

DOCA(ပဲခူး)

Pages

Subscribe to RSS - ပြည်တွင်းကုန်သွယ်မှုသတင်း