ပြည်တွင်းကုန်သွယ်မှုသတင်း

    ပြည်ဈေးကွက်တွင် ယခုအောက်တိုဘာလတတိယပတ်တွင် မြေပဲဆန်ဈေးနှုန်းများ ထပ်မံကျဆင်းလာခဲ့ပါသည်။ ယခင်အောက်တိုဘာ ပထမပတ်တွင် မြေပဲဆီဆန်(အဖြူ)တစ်ပိဿာ လျှင် (၅၆၀၀)ကျပ်၊ (အနီ)တစ်ပိဿာလျှင် (၆၀၀၀)ကျပ်နှင့် လုံးဆန်(အဖြူ)တစ်ပိဿာလျှင် (၆၂၀၀) ကျပ်၊ လုံးဆန် (အနီ)တစ်ပိဿာလျှင်(၆၆၀၀)ကျပ်ဖြင့် ပြည်ဈေးကွက်တွင်ရောင်းချခဲ့ပါသည်။ ယခုအောက်တိုဘာလ တတိယပတ်တွင်မြေပဲဆီဆန်(အဖြူ)တစ်ပိဿာလျှင် (၅၂၀၀)ကျပ် ၊ ဆီဆန်(အနီ) တစ်ပိဿာလျှင်(၅၂၀၀)ကျပ်ဖြင့် ဈေးတူနေသော်လည်း ယခင်အောက်တိုဘာလ ဒုတိယပတ်ထက်စာလျှင် ဆီဆန်(အဖြူ)တစ်ပိဿာ‌(၄၀၀)ကျပ်၊ (အနီ) တစ်ပိဿာလျှင် (၈၀၀)ကျပ် ဈေးကျဆင်းလာခဲ့ပါသည်။ ထို့အတူ မြေပဲဆန် ၊ လုံးဆန်ဈေးမှာလည်း ယခုအောက်တိုဘာလ တတိယပတ်တွင် (အဖြူ) တစ်ပိဿာလျှင် (၅၈၀၀)ကျပ်၊ (အနီ) တစ်ပိဿာလျှင် (၅၈၀၀)ကျပ်ဖြင့် ဈေးတူပြီး ယခင်အောက်တိုဘာလ ဒုတိယပတ်နှင့် နှိုင်းယှဉ်ကြည့်လျှင် လုံးဆန်(အဖြူ) တစ်ပိဿာ (၄၀၀)ကျပ်၊ လုံးဆန်(အနီ) တစ်ပိဿာလျှင် (၈၀၀)ကျပ်ဖြင့် ဈေးကျဆင်းလာခဲ့ပါသည်။

   ထိုသို့ မြေပဲဆန်ဈေးများကျဆင်းလာရခြင်းမှာ ယခုနှစ်တွင် မြေပဲဆန် အထွက်နှုန်းကောင်းလာပြီး ဈေးကွက်တွင် ပစ္စည်းရှားပါးမှုမရှိသောကြောင့် ဝယ်လိုအားကောင်းလာသော်လည်း ဈေးနှုန်းများ အနည်းငယ်ကျဆင်းလာရခြင်းဖြစ်ကြောင်း သိရပါသည်။

    ပဲခူးတိုင်းဒေသကြီး (အနောက်) ပြည်ခရိုင်၊ ပြည်မြို့တွင် ယခုမိုးနှောင်းကာလ၊ တော်သလင်းလနှင့် သီတင်းကျွတ်လတွင် အရောင်းအဝယ်ဖြစ်နေသည့် ရာသီစာဆိတ်ဖူးများ ရောင်းချလျက်ရှိပါသည်။ ဆိတ်ဖူးပင်သည် ဂျင်းမျိုးရင်းအနွယ်ဖြစ်သည်။ ရွှေပန်း၊ ငွေပန်းပင်နှင့် အလွန်ဆင်သည်။ တရုတ်နိုင်ငံနှင့် အရှေ့တောင်အာရှနိုင်ငံများတွင် တိုင်းရင်းဆေးဖက်ဆိုင်ရာနှင့် အချက်အပြုတ်ဆိုင်ရာ ကိစ္စရပ်များတွင် အဓိကထားအသုံးပြုကြသည်။ ပြည်မြို့၏ အနီးတဝိုက် အနောက်ဖက်ကမ်း၊ ရွှေဘုံသာရွာ၊ ညောင်ပင်သာရွာ၊ ဆင်တဲရွာနှင့် မှော်ဇာကျေးရွာအနီးတဝိုက်တွင် ဆိတ်ဖူးများ တနိုင်တပိုင် စိုက်ပျိုးသူများမှ ပြည်ဈေးကွက်သို့လာရောက်ရောင်းချလျက်ရှိပါသည်။ ဆိတ်ဖူးကို အတို့အမြှုပ်အဖြစ် စားကြသလို ဟင်းချိုဟင်းအဖြစ်ချက်ပြုတ်စားသောက်ကြပြီး ဆိတ်ဖူးကို ထောင်းကာ ငါးပိ၊ ငါးခြောက်၊ ပုစွန်ခြောက်၊ ငရုတ်သီးစိမ်းတို့နှင့်တွဲဖက်၍ ကြော်စားကြကြောင်း သိရပါသည်။ ဆိတ်ဖူး၏ အရသာမှာ ပူရှိန်းရှိန်းအရသာရှိပြီး ဆိတ်ဖူးသည် အခိုးပွင့်စေခြင်း၊ ခံတွင်းလိုက်ခြင်းနှင့် ရာသီအကူးအပြောင်း ဖျားနာမှုများကို ခံနိုင်ရည်ရှိခြင်းကြောင့် ပေါ်ဦးပေါ်ဖျား ဖြစ်သော်လည်း အဝင်ရှိသလောက် ဝယ်ယူစားသုံးကြကြောင်း သိရပါသည်။ ပြည်မြို့ပေါ်ဈေးများတွင် ဆိတ်ဖူး (၅)ချောင်းပါ တစ်စည်းလျှင် (၂၀၀)ကျပ်ခန့်ရှိပြီး (၁၀)ကျပ်သားလျှင် ကျပ် (၄၀၀)ခန့်ဖြင့် ရောင်းချမှုရှိ၍ ရှားပါးချိန်တွင် တစ်စည်းလျှင် (၅၀၀)ခန့်ထိ ရောင်းချမှုရှိကြောင်းသိရပါသည်။ အဝင်အားဖြင့် ပိဿာချိန် (၅၀)ကျပ်သားခန့်ဝင်ရောက်မှုရှိပြီး အစည်းအားဖြင့် (၂၅)စည်းခန့် ဝင်ရောက်မှုရှိကြောင်း သိရပါသည်။

DOCA(ပဲခူး)

    ကန်စွန်းဥကို မြန်မာပြည်ဒေသအနှံ့အပြားတွင် စိုက်ပျိုးကြပါသည်။ ကန်စွန်းဥမှာ ကန်စွန်းပင်၏ အမြစ်ဥမှရရှိပြီး အရောင်မှာပန်းရောင်ဖြစ်ကာ အတွင်းသားအရောင်မှာ လိမ္မော်ရောင်၊ အဖြူရောင်၊ ခရမ်းရောင် စသည်ဖြင့် အရောင်အမျိုးမျိုးရှိပါသည်။ ကန်စွန်းဥကို စိုက်ပျိုးရာတွင် သဲမြေ၊ နုန်းမြေများတွင်စိုက်ပျိုးကြပြီး ကန်စွန်းညွန့်ကိုယူ၍ စိုက်ပျိုးကြပါသည်။ အပင်များအား စိုက်ပျိုးရာတွင် ဘောင်များပြုလုပ်ပြီး မြေများအားပြုပြင်၍ ၅ပေအကျယ်တွင် စိုက်ပျိုးရပါသည်။ အပင်များအား စိုက်ပျိုးပြီး မြေပြင်မှအပင်များထွက်ပေါ်လာသည့်အခါ အပင်ခြေတွင် မြေများဖို့ပေးရပါသည်။ အပင်စိုက်ပြီးအစောပိုင်းတွင် ပေါင်းမြက်များ မကြာခဏ ရှင်းပေးရပါသည်။ အပင်စိုက်ပြီး နှစ်လခွဲအကြာတွင် အပင်ခြေရင်းတွင် မြေများဖို့ပေးရပါသည်။ ကန်စွန်းဥများအား ဈေးကောင်း ရရန်အတွက် မရင့်မီအရွယ်ရောက်သောဥများကို စောစွာတူးဖော်၍ ရောင်းချရပါသည်။

   ကန်စွန်းဥကို ပြုတ်စားခြင်း၊ ကြော်စားခြင်းဖြင့် အမျိုးမျိုးပြုလုပ်စားသောက်၍ရပါသည်။ ကန်စွန်းဥများအား သဲမြေ၊ နုန်းမြေများရရှိသော ရွှေတောင်မြို့နယ်ဒေသအတွင်းရှိသော မင်းတဲကျွန်း၊ စစ်ကိုင်းကျွန်း စသည့်ဒေသများတွင် အများအပြား စိုက်ပျိုးကြပါသည်။ ထွက်ရှိလာသော ကန်စွန်းဥများအား ဒေသဈေးကွက်အတွင်းရောင်းချရာတွင် ကန်စွန်းဥတစ်ပိဿာလျှင် ၁၅၀၀ကျပ်ဖြင့် အရောင်းအဝယ်ဖြစ်နေကြောင်း သိရှိရပါသည်။

DOCA(ပဲခူး)

    ဝါလကင်းလွတ် သီတင်းကျွတ်တော့မည်ဖြစ်ပါသဖြင့် ပြည်ဈေးကွက်အတွင်းသို့ ဇီးကုန်း၊နတ္တလင်း၊ ပေါင်းတည်၊ ဆင်မြီးဆွဲမြို့များမှ ကောက်ညှင်းကျည်ထောက်သည်များ စတင်ဝင်ရောက် ရောင်းချလျက်ရှိပါသည်။ ကောက်ညှင်းကျည်ထောက်ပြုလုပ်မည်ဆိုလျှင် ကောက်ညှင်းကျည်ထောက်ကို တင်းဝါးဖြင့်ပြုလုပ်ပြီး ကောက်ညှင်းကို မိုးရာသီမှာစိုက်ထားရပါသည်။ ဝါးကို တစ်ပိုင်း၊ တစ်ပိုင်းခုတ်ထားရပြီး ကောက်ညှင်းကိုတော့ ငါးနာရီ၊ ခြောက်နာရီ ရေစိမ်ထား၍ နောက်ဆုံးခုတ်ထားသောဝါးများအတွင်းသို့ စိမ်ထားသော ကောက်ညှင်းများကို ထည့်ရပါသည်။ ကောက်ညှင်း များထည့်ပြီးပါက ဝါးကျည်ထောက်၏ခေါင်းကို ကောက်ရိုးဖြင့် စို့ထားပြီး ကောက်ညှင်းစိမ်ထားသော ရေကို ဝါးကျည်ထောက်အပြည့်ဖြည့်၍ ဝါးကျည်ထောက်ခေါင်းကို ကောက်ရိုးဖြင့်ကျစ်ကျစ်ကလေး စို့ကာ မီးဖုတ်ရန် တိုင်နှစ်တိုင်ထောင်၍ မြေကိုနက်နက်တူးပြီး အပေါ်မှ ဝါးတင်ပြီး ဝါးကျည်ထောက်မလဲကျရအောင် ကြက်ခြေခတ်ထောင်ထားရပါမည်။ ဝါးကျည်ထောက်များကို မီးဖုတ်ရာတွင် ကောက်ရိုးမီးကို အသုံးပြုကြပါသည်။  ဝါးနှစ်ခုကြားတွင် ကောက်ရိုးကို အပြည့်ထည့်ပြီး အပေါ်ထိရောက်အောင် ဖုန်းကာ မီးဖုတ်ရပါသည်။ မီးဖုတ်ရာတွင် အချိန်တစ်နာရီကျော်ကျော် မီးဖုတ်ပြီး အအေးခံကာ စားသုံးနိုင်ပါသည်။ ပြည်မြို့ ရွေဆံတော်စေတီတော်မြတ်ကြီး၏ ခြေတော်ရင်း၌ ရောင်းချလျက်ရှိသော ကောက်ညှင်းကျည်ထောက် ဈေးနှုန်းများမှာ အကြီးတစ်ချောင်းလျှင် (၄၀၀၀) ကျပ်၊ အလတ်တစ်ချောင်းလျှင် (၃၀၀၀)ကျပ်၊ အသေးတစ်ချောင်းလျှင် (၂၀၀၀)ကျပ်တို့ဖြင့် ရောင်းချလျက်ရှိကြောင်း သိရှိရပါသည်။

DOCA(ပဲခူး)

   မှိုသည် အများအားဖြင့် ပူနွေးသောရာသီဥတုမှ စိုစွတ်ထိုင်းမှိုင်းသောမိုးဥတုသို့အကူးတွင် သစ်ပင်၊ ဝါးပင်၊ တောင်ပို့နှင့် အခြားစိုစွတ်သောမြေအချို့တွင် ပေါက်တတ်ကြပါသည်။ ရာသီစာ မှိုအုန်းနက်များကို မကွေးတိုင်းဒေသကြီး၊ ပခုက္ကူမြို့အနီးရှိ ကမ္မမြို့၊ မြစ်ခြေမြို့၊ မြိုင်မြို့နယ်နှင့် ကမ္မနှင့်မြိုင်မြို့နယ်ကြားရှိ အိုရင်းကျေးရွာများမှအများဆုံးထွက်ရှိပြီး ပခုက္ကူမြို့မဈေးကြီးအနောက်ဘက်နှင့်ပန်းခြံရှေ့တွင် လာရောက်ရောင်းချလျက်ရှိပါသည်။

     မှိုအများအပြားရှိသည့်အနက် စားသင့်သော“မှို”နှင့် မစားသင့်သော“မှို”များလည်းရှိပြီး စားသင့်သော “မှို”များမှာ ကောက်ရိုးမှို၊ မှိုကြက်တောင်၊ ငှက်ပျောမှို၊ တောင်ပို့မှို၊ ဖက်ဆွတ်မှို (မှိုဖြူလေး)၊ မှိုဖြူ၊ မှိုအုန်းနက်၊ သရက်မှိုများဖြစ်ပြီး မစားသင့်သော“မှို”များမှာ ကြက်ခူမှို၊ မှိုကွန်ချာ၊ ခွေးလေးမှိုနှင့် နွားခြေးမှိုတို့ဖြစ်ကြသည်။ ထို့ပြင် တချို့မှိုများမှာ စားသင့်သောမှိုများဖြစ်သော်လည်း အဆိပ်သင့်စေသောကြောင့် အဆိပ်ပြေစေရန်အတွက် ကန်စွန်းရွက်များ၊ ဆီးဖြူသီးများထည့်၍ ချက်စားသင့်ပါသည်။

     ပခုက္ကူမြို့တွင် မှိုအုန်းနက်နှင့် ကောက်ရိုးမှိုများကိုသာအများဆုံးစားသုံးကြပြီး ကောက်ရိုးမှိုကို ရာသီမရွေးစားသုံး၍ မှိုအုန်းနက်များကိုမူ ရာသီစာအဖြစ် တစ်နှစ်တစ်ခါကြိုက်နှစ်သက်စွာစားသုံးကြသည်။ ရာသီစာဖြစ်သော မှိုအုန်းနက်များ၏ဈေးနှုန်းများမှာ အပွင့်ဈေးတစ်ပိဿာလျှင် ကျပ်(၁၈၀၀၀) ရှိပြီး အဖူးဈေးမှာ ကျပ်(၂၀၀၀၀)ရှိကြောင်း၊ အပွင့်အကျိုးအကြေများကိုလိုက်၍လည်း ဈေးအနည်းအများရှိကြောင်း၊ အချိန်မရွေး ဈေးနှုန်းပြောင်းလဲမှုများလည်းရှိလျက် အရောင်းအဝယ်ဖြစ်၍ ရောင်းအားကောင်းလျက်ရှိကြောင်းသိရှိရပါသည်။

DOCA(မကွေး)