ပြည်တွင်းကုန်သွယ်မှုသတင်း

             မကွေးတိုင်းဒေသကြီး၊ မြို့သစ်မြို့နယ်ရှိ ကျေးရွာများတွင် နှမ်း၊ မြေပဲ၊ ဆန်စပါး၊ ကြက်သွန်နီနှင့် ပဲမျိုးစုံသီးနှံတို့ကို နှစ်စဉ်စိုက်ပျိုးလျက်ရှိရာ ငွေလေး၊ ကွင်း၊ ဖန်ခါးပင်၊ စစ်တလင်း စသည့်ကျေးရွာများတွင် ပဲတီစိမ်းသီးနှံ စိုက်ဧက ၂၅၀ ဧကခန့် စိုက်ပျိုးထားရှိကြောင်း သိရသည်။

      ဩဂုတ်လကုန်-စက်တင်ဘာဆန်းလတွင် စတင်စိုက်ပျိုးပြီး ဖေဖော်ဝါရီလတွင် ရိတ်သိမ်းကြကြောင်း၊ မျိုးစေ့အနေဖြင့် ပဲတီစိမ်း(ကျောက်စိမ်း)ကို အများဆုံးစိုက်ပျိုးကြကြောင်း၊ တစ်ဧကလျှင် မျိုးစေ့  (၉) ပြည်ခန့်ကုန်ကျပြီး ထွန်ကြောင်းဆွဲ၍ ကြဲပက်စနစ်ဖြင့် စိုက်ပျိုးကြောင်း၊ မျိုး၊ သွင်းအားစု၊ လုပ်သားခအပါအဝင် စိုက်ပျိုးကုန်ကျစရိတ် ငွေကျပ် ၅၀၀၀၀၀ ခန့် ကုန်ကျကြောင်း၊ ယခင်နှစ်က အထွက်နှုန်းအနေဖြင့် တစ်ဧကလျှင် ၁၈-၂၀ တင်းခန့် ထွက်ရှိပြီး ဈေးနှုန်းအနေဖြင့် ၂၀၂၄ ခုနှစ်၊ ဖေဖော်ဝါရီလ ပဲတီစိမ်းသီးနှံပေါ်စအချိန်တွင် တစ်တင်းလျှင် ငွေကျပ် ၅၅၀၀၀-၆၀၀၀၀ ဖြင့် အရောင်းအဝယ်ဖြစ်ခဲ့ပြီး အကျိုးအမြတ်အနေဖြင့် ငွေကျပ် ၇၀၀၀၀၀ ခန့် ရရှိကြောင်း သိရသည်။

             ၂၀၂၄ ခုနှစ်၊ အောက်တိုဘာလ (ပထမပတ်)တွင် ပဲတီစိမ်းတစ်တင်းလျှင် ငွေကျပ် ၆၀၀၀၀-၆၅၀၀၀ ဖြင့် အရောင်းအဝယ်ဖြစ်ကြောင်း၊ ဈေးကွက်အနေဖြင့် တောင်တွင်းကြီးမြို့နှင့် မကွေးမြို့သို့ သွားရောက်ရောင်းချပြီး ထိုမှတစ်ဆင့်  ရန်ကုန်မြို့သို့ တင်ပို့ရောင်းချကြောင်း၊ ယခုအချိန်တွင် ပဲတီစိမ်းသီးနှံများ လှိုင်လှိုင်ဖူးပွင့်ဝေဆာ၍ အောင်မြင်ဖြစ်ထွန်းလျက်ရှိပြီး အထွက်နှုန်းကောင်းမွန်၍ ဈေးကောင်းရရှိပါက အကျိုးအမြတ်များ ပိုမိုရရှိနိုင်မည်ဖြစ်ပါကြောင်း တောင်သူတစ်ဦးထံမှ သိရှိရပါသည်။

DOCA(မကွေး)

        ချောင်းဆုံမြို့နယ်၊ ခလော့ခနိုင်းကျေးရွာရှိ‌ တောင်သူများသည် စိုက်ပျိုးရေးလုပ်ငန်းကို အဓိကစီးပွားရေးလုပ်ငန်းအဖြစ် လုပ်ကိုင်ကြရာ ဥယျာဉ်ခြံများနှင့် နေအိမ်ခြံဝန်းများတွင် ဟင်းသီးဟင်းရွက်ပင်များ စိုက်ပျိုးရောင်းချခြင်းဖြင့် မိသားစုအပိုဝင်ငွေရရှိကြောင်း သိရသည်။

           ချောင်းဆုံမြို့နယ်၊ ခလော့ခနိုင်းကျေးရွာရှိ တောင်သူများသည် နှစ်ရှည်သီးနှံပင်များနှင့် ရာသီပေါ်သီးနှံများကို အဓိကထားစိုက်ပျိုးကြပြီး မိသားစုစားသုံးမှုဖူလုံရေးနှင့် အပိုဝင်ငွေရရှိရေးအတွက် တစ်ပိုင်တစ်နိုင်စိုက်ခင်းများတွင် ချဉ်ပေါင်ပင်၊ ရုံးပတီသီးပင်၊ ဇီယာ (ပူစီနံ)၊ မြင်းခွာရွက်နှင့် သခွားသီးပင်များကိုစိုက်ပျိုး၍ ချောင်းဆုံမြို့နယ် မြို့မဈေးနှင့် ကျေးရွာများရှိ ဈေးများတွင် ရောင်းချကြောင်း၊ ချဉ်ပေါင် တစ်စည်းလျှင် (၃၀၀) ကျပ်၊ ရုံးပတီသီး တစ်တောင့်လျှင် (၂၀၀) ကျပ်၊ ဇီယာ(ပူစီနံ) တစ်စည်းလျှင် (၃၀၀) ကျပ်၊ မြင်းခွာရွက် တစ်စည်းလျှင် (၃၀၀) ကျပ်၊ သခွားသီး တစ်ပိဿာလျှင် (၄၀၀၀) ကျပ်ဖြင့်ရောင်းချခြင်းဖြင့် မိသားစုအပိုဝင်ငွေများရရှိကြောင်း ခလော့ခနိုင်းကျေးရွာမှ တစ်ပိုင်တစ်နိုင်စိုက်ခင်း စိုက်ပျိုးရောင်းချသူထံမှ သိရှိရပါသည်။

DOCA(မွန်)

         ချောင်းဆုံမြို့နယ်သည် တောင်ကုန်းတောင်တန်းများသည့် ကျွန်းမြို့နယ်ဖြစ်သည်။ မြို့နယ်အတွင်းရှိ ဒေသခံပြည်သူများသည် စိုက်ပျိုးရေးလုပ်ငန်းကို အဓိကလုပ်ကိုင်ကြသည်။ ချောင်းဆုံမြို့နယ်ရှိ ချောင်းဆုံခြံတန်းကျေးရွာတွင် ပိန်းဥစိုက်ပျိုးခြင်းဖြင့် တောင်သူများဝင်ငွေရရှိလျက်ရှိကြောင်း သိရသည်။

            ပိန်းဥပင်မျိုးမှာ ဗမာမျိုးဖြစ်ပြီး ပိန်းဥပင်ကို တန်ခူးလတွင် စတင်စိုက်ပျိုးကြပြီး တော်သလင်းလတွင် ပိန်းဥများကိုတူးဖော်ရောင်းချကြသည်။ စတင်စိုက်ပျိုးစဉ်မှ ပိန်းဥ ဥပြီး ရောင်းချချိန်အထိ အပင်သက်တမ်း (၅) လအချိန်ကြာမြင့်ကြောင်း သိရသည်။ ပိန်းဥဈေးနှုန်းမှာ တစ်ပိဿာလျှင် (၇၀၀၀) ကျပ်ဖြင့်ရောင်းချကြပြီး ချောင်းဆုံမြို့နယ် မြို့မဈေးနှင့် ကျေးရွာများရှိဈေးများတွင် ရောင်းချလျက်ရှိကြောင်း သိရသည်။ ပိန်းဥပင်တစ်ဧကစိုက်ပျိုးလျှင် ပိဿာချိန် (၂၅) ပိဿာထွက်ရှိကြောင်း သိရသည်။ ပိန်းဥပင် တစ်ဧကစိုက်လျှင် ကုန်ကျစရိတ်အနေဖြင့် သိန်း (၂၀) ကုန်ကျပြီး အကျိုးအမြတ်အနေဖြင့် (၁၀) သိန်းကျပ်ရရှိကြောင်း သိရသည်။ ပိန်းဥဈေးကွက်သည် နှစ်စဉ်ကောင်းမွန်နေသည့်အတွက် ပိန်းဥပင်သည် တောင်သူများအတွက် ရွေးချယ်စိုက်ပျိုးသင့်သည့် သီးနှံတစ်မျိုးဖြစ်ကြောင်း ကိုယ်တိုင်စိုက်ပျိုးသူများထံမှ သိရှိရပါသည်။

DOCA(မွန်)

             စစ်ကိုင်းတိုင်းဒေသကြီး၊ ကန့်ဘလူခရိုင်သည် လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်ရာ ကန့်ဘလူမြို့နယ်အတွင်းရှိ ထန်းကုန်းကျေးရွာ၊ မိုးကောင်းကျေးရွာနှင့် အခြားသောကျေးရွာများတွင် ပဲတီစိမ်းသီးနှံကို စိုက်ပျိုးကြကြောင်း၊ ယခုအခါ ပဲတီစိမ်းသီးနှံများ ဈေးကွက်အတွင်းဝင်ရောက်လျက်ရှိပြီး အောက်တိုဘာလ စတုတ္ထပတ်အတွင်း ပဲတီစိမ်းရိုးရိုးတစ်တင်းလျှင် (၈၀၀၀၀)ကျပ်၊ ပဲတီစိမ်းထွက်တိုး အလုံးလှတစ်တင်းလျှင် (၈၄၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ပဲတီစိမ်းမှာ အလုံးလှပြီးအကွဲအနာကင်းလျှင် ဈေးနှုန်းပိုမိုရရှိကြောင်းနှင့် ဈေးကွက်အနေဖြင့် ကန့်ဘလူခရိုင်မှထွက်ရှိသောပဲတီစိမ်းများကို မန္တလေးမြို့ရှိပွဲရုံများ၊ ကုန်စည်ဒိုင်များသို့ တင်ပို့ရောင်းချလျက်ရှိသည်။

           အောက်တိုဘာလ ဒုတိယပတ်ဈေးနှုန်းများနှင့်နှိုင်းယှဉ်ပါက ယခုလစတုတ္ထပတ်အတွင်း ပဲတီစိမ်းရိုးရိုးတစ်တင်းလျှင် (၅၀၀၀)ကျပ်၊ ပဲတီစိမ်းထွက်တိုး တစ်တင်းလျှင် (၄၀၀၀)ကျပ် မြင့်တက်လာကြောင်း သီးနှံရောင်းဝယ်ရေးလုပ်ငန်းရှင်များထံမှသိရှိရပါသည်။

DOCA(စစ်ကိုင်း)

              မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည်နှင့်အညီ စစ်ကိုင်းတိုင်းဒေသကြီး၊ ကန့်ဘလူခရိုင်သည်လဲ လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ယခုအခါ ဆီထွက်သီးနှံမျိုးစုံ စိုက်ပျိုးလျက်ရှိရာ နေကြာသီးနှံကိုလည်း စိုက်ပျိုးကြကြောင်း သိရသည်။

           မိုးနေကြာသီးနှံကို ဇွန်လတွင်စတင်စိုက်ပျိုးပြီး စက်တင်ဘာလတွင် ရိတ်သိမ်းရကြောင်း၊ စိုက်ပျိုးရာတွင် မျိုးအနေဖြင့် ဆင်းရွှေကြာ-၂ မျိုးများကို အများဆုံးစိုက်ပျိုးကြပြီး၊ မြေအနေအထားနှင့် အပင်ပြုစုခြင်းအပေါ်မူတည်၍ အထွက်နှုန်းများကွာခြားမှုရှိကြောင်း၊ ဈေးနှုန်းအနေဖြင့် အောက်တိုဘာလစတုတ္ထပတ်တွင် နေကြာတစ်တင်းလျှင် ငွေကျပ် ၇၀၀၀၀ ဖြင့် ရောင်းဝယ်လျက်ရှိ ကြောင်းသိရသည်။

           ဈေးကွက်အနေဖြင့် နေကြာသီးနှံများကို ကန့်ဘလူမြို့၊ ဇီးကုန်းမြို့ပေါ်ရှိပွဲရုံများသို့ ရောင်းချကြပြီး ပွဲရုံများမှ ရွှေဘိုမြို့၊ မန္တလေးမြို့များရှိပွဲရုံများနှင့် ကုန်စည်ဒိုင်များသို့ တင်ပို့ရောင်းချကြောင်း၊ ယခုပတ်တွင် အရောင်းအဝယ်ဖြစ်လျက်ရှိသော နေကြာသီးနှံဈေးနှုန်းများသည် ယခုလတတိယပတ်ထက် တစ်တင်းလျှင် ၂၀၀၀၀ ခန့်မြင့်တက်လာသောကြောင့် စိုက်ပျိုးသူများအနေဖြင့် ထိုက်သင့်သည့်အကျိုးအမြတ်များရရှိကာ အဆင်ပြေလျက်ရှိကြောင်း တောင်သူတစ်ဦးထံမှ သိရှိရပါသည်။

DOCA(စစ်ကိုင်း)