ပြည်တွင်းကုန်သွယ်မှုသတင်း

              မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည်နှင့်အညီ စစ်ကိုင်းတိုင်းဒေသကြီး၊ ကန့်ဘလူခရိုင်သည်လဲ လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ယခုအခါ ဆီထွက်သီးနှံမျိုးစုံ စိုက်ပျိုးလျက်ရှိရာ နေကြာသီးနှံကိုလည်း စိုက်ပျိုးကြကြောင်း သိရသည်။

           မိုးနေကြာသီးနှံကို ဇွန်လတွင်စတင်စိုက်ပျိုးပြီး စက်တင်ဘာလတွင် ရိတ်သိမ်းရကြောင်း၊ စိုက်ပျိုးရာတွင် မျိုးအနေဖြင့် ဆင်းရွှေကြာ-၂ မျိုးများကို အများဆုံးစိုက်ပျိုးကြပြီး၊ မြေအနေအထားနှင့် အပင်ပြုစုခြင်းအပေါ်မူတည်၍ အထွက်နှုန်းများကွာခြားမှုရှိကြောင်း၊ ဈေးနှုန်းအနေဖြင့် အောက်တိုဘာလစတုတ္ထပတ်တွင် နေကြာတစ်တင်းလျှင် ငွေကျပ် ၇၀၀၀၀ ဖြင့် ရောင်းဝယ်လျက်ရှိ ကြောင်းသိရသည်။

           ဈေးကွက်အနေဖြင့် နေကြာသီးနှံများကို ကန့်ဘလူမြို့၊ ဇီးကုန်းမြို့ပေါ်ရှိပွဲရုံများသို့ ရောင်းချကြပြီး ပွဲရုံများမှ ရွှေဘိုမြို့၊ မန္တလေးမြို့များရှိပွဲရုံများနှင့် ကုန်စည်ဒိုင်များသို့ တင်ပို့ရောင်းချကြောင်း၊ ယခုပတ်တွင် အရောင်းအဝယ်ဖြစ်လျက်ရှိသော နေကြာသီးနှံဈေးနှုန်းများသည် ယခုလတတိယပတ်ထက် တစ်တင်းလျှင် ၂၀၀၀၀ ခန့်မြင့်တက်လာသောကြောင့် စိုက်ပျိုးသူများအနေဖြင့် ထိုက်သင့်သည့်အကျိုးအမြတ်များရရှိကာ အဆင်ပြေလျက်ရှိကြောင်း တောင်သူတစ်ဦးထံမှ သိရှိရပါသည်။

DOCA(စစ်ကိုင်း)

            စစ်ကိုင်းမြို့နယ်အတွင်း နေအိမ်ခြံဝင်းများအတွင်းတွင် တစ်ပိုင်တစ်နိုင် စားပင်၊ သီးပင်များစိုက်ပျိုးလျက်ရှိရာ ပဲတောင့်ရှည်တိုင်ထောင်ပဲများကိုလည်း စိုက်ပျိုးကြပါသည်။ မျိုးစေ့ထုပ် (၅၀) ဂရမ် (၁)ထုပ်ဈေး ၄၀၀ကျပ်ဖြင့် စိုက်ပျိုးရေးဆေးဆိုင်များတွင်ဝယ်ယူကာ ရာသီမရွေး၊ အချိန်မရွေး စိုက်ပျိုးနိုင်ပါသည်။ ပဲတောင့်ရှည်တိုင်ထောင်ပဲများကို စိုက်ပျိုးရန်အတွက် မြေဆီလွှာအမျိုးမျိုးတွင် နုန်း၊ နွားချေး၊ ကြက်ဥခွံ၊ မြေဆွေးစသည်တို့ကိုရောနှောပြီး မျိုးစေ့ကိုမြေချစိုက်ပျိုးနိုင်ပြီး စိုက်ပျိုးချိန်မှစ၍ ရက်ပေါင်း ၄၀ခန့်ကြာချိန်တွင် အသီးများစတင်ထွက်ရှိကာ (၄၅)ရက်အတွင်း စတင်ဆွတ်ခူးနိုင်ပါသည်။ စစ်ကိုင်းမြို့နယ်တွင်း စိုက်ပျိုးသည့်ပဲတောင့်ရှည်များထွက်ရှိမှုသည် စစ်ကိုင်းမြို့နယ်အတွင်းရှိ ပြည်သူများစားသုံးရန် ဖူလုံလျက်ရှိပါသည်။

         ပဲတောင့်ရည် (၁)ပိဿာရောင်းဈေးမှာ ၇၀၀၀ိ/-မှ ၈၀၀၀ိ/-ထိရရှိပြီး ပဲတောင့်ရှည်ဈေးကွက်မှာ ကျယ်ပြန့်များပြားလျှက်ရှိပါသဖြင့် စိုက်ပျိုးသူများ၏စားဝတ်နေရေးကို များစွာအထောက်အကူပြုလျက်ရှိပါကြောင်း သတင်းရရှိပါသည်။

DOCA(စစ်ကိုင်း)

ပြည်ခရိုင်၊ ရွှေတောင်မြို့နယ်၊ သရက်တောရပ်ကွက်၊ သံကြိုးတန်းလမ်းတွင် သီတင်းကျွတ်အခါကာလ ရောင်စုံမီးပုံများထုတ်လုပ်ရောင်းချနေသော လုပ်ငန်းသို့ သွားရောက်လေ့လာခဲ့ပါသည်။ ထိုသို့သွားရောက်လေ့လာရာတွင် မီးပုံးလုပ်ငန်းကို ဝါခေါင်လတွင်စတင်လုပ်ကိုင်ပြီး သီတင်းကျွတ်လတွင် ရောင်းချကြပါသည်။ မီးပုံးလုပ်ငန်းလုပ်ကိုင်ရန်အတွက် နှီးပိဿာချိန် ၁၀၀ ကုန်ကျပါသည်။ နှီးအပြင် သွပ်နန်းကြိုး၊ နို့ဆီဘူးခွံ၊ သတင်းစာစက္ကူများ၊ ရောင်စုံစက္ကူများလိုအပ်ပါသည်။ မီးပုံရာသီချိန်တွင် မီးပုံအလုံးရေ ၉၀၀၀လုံးပြုလုပ်နိုင်ပြီး ရောင်းချသောဈေးမှာ တစ်လုံးလျှင် လက်ကားဈေး ၁၁၀ကျပ်နှင့် လက်လီဈေး ၁၅၀ကျပ်ဖြင့်ရောင်းချကြောင်းသိရပါသည်။ မီးပုံးလုပ်ငန်းအတွက် ကုန်ကျစရိတ်မှာ ၂၅၀၀၀၀ကျပ်ခန့်ကုန်ကျပြီး မီးပုံးရောင်းရငွေမှာ ၁၀သိန်းကျပ်ခန့်ရရှိ၍ အမြတ်အစွန်းအနေဖြင့် ရာသီချိန်တွင် ၇၅၀၀၀၀ကျပ်ရရှိကြောင်းသိရပါသည်။ မီးပုံးမှာ သီတင်းကျွတ်ရာသီနှင့် တန်ဆောင်မုန်းရာသီများတွင် အိမ်၌ မီးအလှဆင်ရင်ရာတွင် အသုံးပြုကြသဖြင့် လူများကဝယ်ယူအသုံးပြုကြရာ အရောင်းသွက်သဖြင့် ရာသီချိန်တွင် အမြတ်အစွန်းများလည်းရရှိသဖြင့် နှစ်စဉ်ဝင်ငွေရရှိသောလုပ်ငန်းဖြစ်ပါသည်။
DOCA(ပဲခူး)

ပြည်ခရိုင်၊ ရွှေတောင်မြို့နယ်၊ တောင်လုံးညိုကျေးရွာရှိ တောင်သူ ဦးအောင်ကိုမင်း၏ ဂန္ဓမာအဝါကြီးပန်းမျိုးစိုက်ပျိုးသော စိုက်ခင်းသို့ သွားရောက်လေ့လာခဲ့ရာ ဂန္ဓမာပန်းစိုက်ပျိုးရာတွင် ယခင်နှစ်က အညွန့်ဖြတ်၍စိုက်ပျိုးခြင်း၊ ကိုင်းကိုဖြတ်၍ ကျန်သည့်အမြစ်ပါကိုင်းအားပျိုးခြင်း စသည်ဖြင့် စိုက်ပျိုးကြပါသည်။ စိုက်ပျိုးသည့်အပင်ရေမှာ ၅၀၀၀ခန့်စိုက်ပျိုးထားပြီး စိုက်ပျိုးချိန်မှာ မေလတွင်စိုက်ပျိုးပြီး (၄)လအကြာဖြစ်သော သီတင်းကျွတ်လဆန်းပိုင်းတွင် ခူးယူရောင်းချကြောင်းသိရပါသည်။ စိုက်ပျိုးပြီးပန်းပင်များကို (၅)ရက်တခါ (သို့) (၇)ရက်ခြားတစ်ခါ ပိုးသတ်ဆေးများ ဖြန်းပေးရပါသည်။ ဂန္ဓမာပန်းစိုက်ပျိုးကုန်ကျစရိတ်အနေဖြင့် (၁၀)သိန်းကျပ်ခန့်ကုန်ကျပြီး ပန်းရောင်းရဝင်ငွေအနေဖြင့် ကျပ်သိန်း(၃၀)ခန့်ရရှိပြီး အကျိုးအမြတ်အနေဖြင့် ကျပ်သိန်း(၂၀)ခန့်ရရှိကြောင်းသိရပါသည်။ ဂန္ဓမာပန်း(အဝါကြီး)ရောင်းဈေးအနေဖြင့် ယခင်နှစ်က တစ်စည်းလျှင် ၅၀၀ကျပ်ရရှိခဲ့ပြီး ယခုနှစ်တွင် ပန်း ၆ပွင့်/ ၇ပွင့်ပါ တစ်စည်းလျှင် ၉၀၀ကျပ်ဖြင့်ရောင်းချကြောင်း၊ ကိုင်းအသေးတစ်စည်းကို ၂၅၀ကျပ်ဖြင့်ရောင်းချကြောင်းသိရပါသည်။ ယခုနှစ်တွင် ပန်းများဈေးကောင်းရရှိသော်လည်း မိုးများပြီး အရွက်အဖျားအနာကျသဖြင့် ပန်းအထွက်နည်းသွားခြင်းဖြစ်၍ ဈေးကောင်းရရှိကြောင်းသိရပါသည်။ ရွှေတောင်ဒေသထွက် ဂန္ဓမာပန်းအဝါများကို ကြို့ပင်ကောက်၊ ပေါင်းတည်၊ ဇီးကုန်း၊ ပြည်နှင့် ဥသျှစ်ပင်မှ ပန်းဖောက်သည်များက အခင်းသို့လာရောက် ဝယ်ယူကြပြီး တစ်ဆင့်ပြန်လည်၍ ပန်းဈေးကွက်များသို့တင်ပို့ရောင်းချကြကြောင်းပါသည်။
DOCA(ပဲခူး)

ပဲခူးတိုင်းဒေသကြီး၊ ပြည်ခရိုင်၊ ပေါက်ခေါင်းမြို့နယ်၊ သဖန်းချိုအုပ်စု၊ လေးကြီးကျေးရွာတွင် ခရမ်းကြွပ်သီးများစိုက်ပျိုးထားရှိသဖြင့် စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံးရှိ တာဝန်ရှိသူများနှင့် မြို့နယ်တာဝန်ခံတို့သည် (၂၁-၁၀-၂၀၂၄)ရက်နေ့၊ နံနက် (၁၀:၀၀)နာရီအချိန်တွင် သွားရောက်၍ ကွင်းဆင်းလေ့လာခဲ့ပါသည်။ အဆိုပါ ခရမ်းကြွပ်သီးကို ဧက(.၂၅) စိုက်ပျိုးထားရှိ သော တောင်သူ ဦးဇော်မင်းနှင့်တွေ့ဆုံ၍ မေးမြန်းရာ အပင်ပေါင်း (၂၀၀၀)ခန့်ရှိပြီး စိုက်ပျိုးထုတ်လုပ်ကုန်ကျစရိတ်အနေဖြင့် (၅)သိန်းကျပ်ခန့်ကုန်ကျကြောင်းသိရှိရပြီး ထွက်ပေါ်ချိန်တွင် အသီးခူး ဆွတ်ရာ (၃)ရက်ခြားတစ်ခါခူးဆွတ်ရပြီး တစ်ကြိမ်ခူးဆွတ်လျှင် အလုံးရေ (၁)သောင်းခန့်ခူးဆွတ်ရရှိကြောင်းသိရပါသည်။ ခရမ်းကြွပ်သီးများကိုခူးဆွတ်ရာတွင် ခူးဆွတ်ချိန် (၁)လခွဲခန့်ကြာမြင့်ပြီး အကြိမ်ရေမှာ ပျမ်းမျှ (၁၅)ကြိမ်ခန့်ခူးဆွတ်ရောင်းချနိုင်ကြကြောင်းသိရှိရပါသည်။ ခရမ်းကြွပ်သီးများထွက်ပေါ်ချိန်တွင် ကုန်စိမ်းပွဲစားများက စိုက်ခင်းထဲအထိလာရောက်၍ ဝယ်ယူကြသဖြင့် လက်ကားစျေးအနေဖြင့် တစ်လုံးလျှင် ပျမ်းမျှရောင်းဈေးမှာ (၉)ကျပ်ဖြင့်ရောင်းချကြ၍ စျေးကွက်အတွင်း၌ လက်လီစျေးအနေဖြင့် (၁)လုံးလျှင် (၄၀)ကျပ်၊ (၁၀)လုံးလျှင် (၄၀၀)ကျပ်နှုန်းဖြင့် ရောင်းချကြောင်းသိရပါသည်။ ရောင်းချသောဈေးကွက်များမှာ ပေါက်ခေါင်းမြို့ ပေါ်ရှိဈေးများအပြင် နယ်မြို့များရှိဈေးများနှင့် ပြည်ဈေးကွက်များသို့ တင်ပို့ရောင်းချကြောင်းသိရှိရပါသည်။ ခရမ်းကြွပ်သီးများထွက်ပေါ်ချိန်တွင် တောင်သူများဝင်ငွေအနေဖြင့် (.၂၅)ဧကတွင် (၁၃၅၀၀၀၀) ကျပ်ရရှိပြီး အသားတင်အမြတ်မှာ (၈၅၀၀၀၀)ကျပ်ခန့်ရရှိကြောင်းသိရပါသည်။
DOCA(ပဲခူး)