၂၀၂၃ ခုနှစ်၊ စက်တင်ဘာလအတွင်း ဆိပ်ဖြူကြက်သွန်နီ ဈေးနှုန်းဈေးကွက်နှင့် စီးဆင်းမှုအခြေအနေ
မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်၊ ကြက်သွန်နီကုန်စည်ဒိုင်၌ စက်တင်ဘာလ (ပထမပတ်)မှစ၍ ကြက်သွန်နီဈေးနှုန်းကျဆင်းလာကြောင်း သိရှိရသည်။ ဈေးကွက်အနေဖြင့် စက်တင်ဘာလ(ပထမပတ်)တွင် ကြက်သွန်နီတစ်ပိဿာလျှင် အမြင့်ဈေး ကျပ်(၃၁၀၀)မှ အနိမ့်ဈေး ကျပ်(၂၇၀၀)၊ (ဒုတိယပတ်)တွင် အမြင့်ဈေး ကျပ်(၃၀၀၀)မှ အနိမ့်ဈေးကျပ်(၂၇၀၀)ဖြင့် ဈေးနှုန်းကျ ဆင်း၍အရောင်းအဝယ်ဖြစ်ပြီး စက်တင်ဘာလ(တတိယပတ်)တွင် အမြင့်ဈေး ကျပ်(၂၉၅၀)မှ အနိမ့် ဈေး ကျပ်(၂၆၀၀)ဖြင့် အရောင်းအဝယ်ဖြစ်ပြီး စက်တင်ဘာလ(စတုတ္ထပတ်)တွင် ကြက်သွန်နီတစ် ပိဿာလျှင် အမြင့်ဈေး ကျပ်(၂၆၅၀)၊ အနိမ့်ဈေးကျပ်(၂၄၀၀)ဈေးနှုန်းများဖြင့် တရိပ်ရိပ်ကျဆင်းပြီး အရောင်းအဝယ်ဖြစ်လျက်ရှိကြောင်း ကြက်သွန်နီဈေးကွက်မှ သိရှိရပါသည်။ စက်တင်ဘာလအတွင်း ကြက်သွန်နီတစ်ပိဿာလျှင် ကျပ်(၄၅၀)ခန့်ကျဆင်းပြီး အရောင်းအဝယ်ဖြစ်လျက်ရှိကြောင်း သိရှိရသည်။
စက်တင်ဘာလတွင် ကြက်သွန်နီဈေးနှုန်းများ တရိပ်ရိပ်ကျဆင်းရခြင်းမှာ ပြည်ပဝယ်လက်အားနည်းပြီး ပြည်တွင်းသုံးစွဲမှုနည်းခြင်းအပြင် မိုးရွာသွန်းမှုများပြီးအစိုဓာတ်ဖြင့် ကြက်သွန်နီအခွံ အရောင်ပျက်ခြင်းကြောင့် ဈေးနှုန်းကျဆင်းကြောင်း ဈေးကွက်မှသိရှိရသည်။
ဆိပ်ဖြူမြို့နယ်မှ ထွက်ရှိသည့်ကြက်သွန်နီများကို နေ့စဉ် ရန်ကုန်ဘုရင့်နောင်(ကုန်စည်ဒိုင်)၊ ပြည်၊ ပုသိမ်မြို့များနှင့် ပြည်ပနိုင်ငံများဖြစ်သည့် တရုတ်၊ ထိုင်း၊ ဗီယက်နမ်နိုင်ငံများသို့ တင်ပို့လျက် ရှိကြောင်း သိရှိရသည်။
စက်တင်ဘာလအတွင်း ကုန်စည်စီးဆင်းမှုအနေဖြင့် ရန်ကုန်ဘုရင့်နောင် ကုန်စည်ဒိုင်သို့ ကြက်သွန်နီ ပျမ်းမျှပိဿာ(၆)သိန်း၊ မူဆယ်မြို့သို့ ပိဿာ(၅)သောင်းခန့်၊ မြဝတီမြို့သို့ ပိဿာ(၅) သိန်းခန့်၊ မော်လမြိုင်မြို့သို့ ပိဿာ(၁)သိန်းခန့်၊ ပြည်မြို့ ပိဿာ(၅)သောင်းခန့်၊ ပုသိမ်မြို့သို့ ပိဿာ (၁)သိန်းခန့်၊ စုစုပေါင်းကြက်သွန်နီပိဿာ(၁၄)သိန်းခန့် တန်ချိန် (၂၂၈၆)ခန့် ဆိပ်ဖြူမြို့မှကုန်စည် စီးဆင်းခဲ့ကြောင်း ကြက်သွန်နီဈေးကွက်မှ သိရှိရသည်။
DOCA(မကွေး)
