ပြည်တွင်းကုန်သွယ်မှုသတင်း

            ပဲခူးတိုင်းဒေသကြီး၊ တောင်ငူမြို့ဆင်ခြေဖုံးရပ်ကွက်များနှင် ကျေးရွာအချို့တွင် မြေကွက်လပ်နေရာများနှင့် ခြံ၀င်းအတွင်း သပြေပင်များစိုက်ပျိုးထားရှိရာ တစ်နိုင်တစ်ပိုင်စိုက်ပျိုးခြင်းဖြင့် မိသားစုအပို၀င်ငွေရရှိကြောင်း သိရပါသည်။

         မြန်မာလူမျိုးအများစုသည် နေအိမ်ရှိဘုရားကျောင်းဆောင်တော်၌ အောင်သပြေပန်းများကို ကပ်လှူပူဇော်ထားရာ သပြေပန်း(သပြေညွန့်)များသည် ဈေးကွက်အတွင်း၌ ရောင်းအား ကောင်းလျက်ရှိပါသည်။ ဘုရားပန်းဈေးကွက်တွင် မြန်မာသပြေဟုခေါ်သော အောင်သပြေငုတ်များနှင့် အညွန့်ကလေးများ ရဲရဲတောက်နေအောင်လှသော အောင်သပြေညွန့်များမှာ နေရာယူလျက်ရှိပါသည်။

           သပြေငုတ်မှာ တာရှည်ခံသဖြင့် အောင်သပြေပန်းကပ်လှူသူအများစုက နှစ်သက်ကြပါသည်။ အာဆီယံသပြေမှာ လှပသော်လည်း သုံးရက်ခန့်သာအထားခံသဖြင့် အလှပန်းထိုးသူများ ပို၍ ဝယ်ယူကြပါသည်။

          သပြေလုံးများသည် ယခင်ကတစ်ပင်လျှင်  ၅၀၀ ကျပ်မှ ၁၀၀၀ ကျပ်အထိသာရှိသော်လည်း ယခုအခါ တစ်ပင်လျှင် ၁၅၀၀ ကျပ်မှ ၂၀၀၀ ကျပ်အထိ ရောင်းချရကြောင်း၊ အာဆီယံ သပြေညွန့်မှာ တစ်စည်းလျှင် ၈၀၀ ကျပ်ဖြင့် ရောင်းချလျက်ရှိကြောင်း တောင်ငူမြို့ညောင်ပင်ဈေးရှိ ဘုရားပန်းအရောင်းဆိုင်များမှ သိရှိရပါသည်။

DOCA(ပဲခူး)

ပဲခူးတိုင်းဒေသကြီးသည် စိုက်ပျိုးရေးကို အဓိကထားသော တိုင်းတစ်တိုင်းဖြစ်သည်နှင့်အညီ မြစ်ချောင်း၊ အင်းအိုင်ပေါများသောကြောင့် ရေထွက်ပစ္စည်းများဖြစ်သော ငါးပိ၊ ငါးချဉ်၊ ငါးခြောက်များလည်းထွက်သည့်အပြင် ပဲခူးဒေသထွက် ငါးရံ့ခြောက်သည်လည်း ဆားပေါ့၍ အပေါ့ခြောက်ဖြစ်သည့်အတွက် လူကြီး၊ လူငယ်၊ ကလေး၊ သွေးတိုး၊ ဆီးချိုသမားပါမကျန် စားသုံးနိုင်သောကြောင့် လက်ဆောင်ပေးခြင်းအတွက်ကြောင့်သော်လည်းကောင်း၊ ကိုယ်တိုင်စားသုံးရန်အတွက်သော်လည်းကောင်း ဝယ်ယူလျက်ရှိကြသည်။
ငါးရံ့ခြောက်ပြုလုပ်ရာတွင် ငါးရံ့များကို ပဲခူးမြို့နယ်၊ ဒိုက်ဦးမြို့နယ်၊ ဝေါမြို့နယ်၊ သနပ်ပင်မြို့နယ်များရှိ ရေချိုအင်း၊ အိုင်များမှ အများဆုံးရရှိလျက်ရှိပြီး ရရှိလာသောငါးရံ့များကို အကြေးထိုး၊ ခေါင်းဖြတ်၊ ဗိုက်ခွဲအူထုတ်ပြီး ခွဲသည့်အခါ ပုံကျအောင် စနစ်တကျခွဲရသည်။ ခွဲပြီးသောငါးရံ့များကို ငါးရံ့အစိမ်း ပိဿာ၁၀၀လျှင် ဆား ၃ပိဿာ ၅၀ကျပ်သားနှုန်းဖြင့်နှပ်ပြီး တစ်ညစိမ်ရကာ နံနက်ရောက်လျှင် ရေစင်အောင်လေးထပ်ခန့်ဆေးပြီး နေလှန်းရသည်။ နေလှန်းသည့်အခါ နွေဆိုလျှင် နှစ်ရက်ခန့်ခြောက်ပြီး ဆောင်းနှင့်မိုးရာသီရောက်လျှင် မီးအပူဖြင့် ကြပ်တင်၍ ခြောက်အောင်လှန်းရသည်။
ငါးရံ့ခြောက်ပြုလုပ်ရာတွင် ငါးရံ့အစိုတစ်ပိဿာလျှင် ၁၈၀၀၀ကျပ်မှ ၂၀၀၀၀ကျပ်အထိ အကောင်အကြီး၊ အသေးပေါ်မူတည်၍ ဝယ်ယူရပြီး အဆိုပါ ငါးအစိုတစ်ပိဿာအား ခွဲခြမ်းပြီး နေလှန်းရာတွင် ငါးခြောက်အဖြစ် ၂၅ကျပ်သား၊ ၃၀ ကျပ်သားခန့်ထွက်ရှိသည်။
ငါးရံ့ခြောက်ထုတ်လုပ်သူများအနေဖြင့် ငါးအစိုတစ်ပိဿာကို အခြောက်ပြုလုပ်ရာတွင် ခန့်မှန်းကုန်ကျငွေ ၄၀၀၀၀ကျပ်ဖြစ်ပြီး ငါးရံ့ခြောက်တစ်ပိဿာကို ကျပ် ၇၅၀၀၀မှ ၈၀၀၀၀ကျပ်ဈေးအထိရောင်းချလျက်ရှိသည်။ ဒေသထွက်ငါးရံ့ခြောက်များကို နယ်ဘက်များအပြင် မန္တလေး၊ နေပြည်တော် စသည့်ဒေသများအပြင် အခြားဒေသများသို့လည်း ဖြန့်ဖြူးရောင်းချလျက်ရှိကြောင်းသိရှိရပါသည်။
DOCA(ပဲခူး)

ဈေးကွက်အတွင်း ကြက်သားနှင့် ကြက်ဥဈေးနှုန်းများကောင်းနေသောကြောင့် ပဲခူးတိုင်းဒေသကြီး၊ သနပွင်မြို့နယ်အတွင်း အသားတိုးကြက်နှင့် ဥစားကြက်မွေးမြူရေးလုပ်ငန်းများကို ပိုမိုတိုးချဲ့လုပ်ကိုင်လာကြကြောင်းသိရှိရသည်။ ထိုသို့ ကြက်မွေးမြူရေးခြံများ ပိုမိုများပြားလာသည့်အနက် အသားတိုးကြက်မွေးမြူရေးလုပ်ငန်းသည် အချိန်တိုအတွင်း အကျိုးအမြတ်ရရှိနိုင်သောကြောင့် ဥစားကြက်မွေးမြူရေးလုပ်ငန်းထက် ပိုမိုတွင်ကျယ်စွာလုပ်ကိုင်လာကြကြောင်း သိရှိရသည်။ မွေးမြူသူများအနေဖြင့်လည်း အသားတိုးကြက်မွေးမြူရာတွင် တစ်နိုင်တစ်ပိုင် အကောင်ရေ (၅၀၀/၁၀၀၀) မွေးမြူသူများရှိပြီး အကောင်ရေ (၃၀၀၀/၅၀၀၀/၁၀၀၀၀) ထိ စီးပွားဖြစ်မွေးမြူသူများလည်းရှိကြောင်းသိရှိရပါသည်။ အသားတိုးကြက်အနေဖြင့် သားပေါက်မှ ရောင်းချရသည့်အထိ ၄၅ရက်သာ ကြာမြင့်သောကြောင့် အချိန်တိုတိုနှင့် အမြတ်အစွန်းများများရရှိကြောင်း၊ ၄၅ရက်သား ကြက်တစ်ကောင်လျှင် ပိဿာချိန် ၁ပိဿာ ၅၀ကျပ်သားခန့်ရရှိပြီး ထုတ်လုပ်မှုကုန်ကျစရိတ်အနေဖြင့် အစားအစာ၊ ဆေးဝါး၊ လုပ်သားခအပါအဝင် ၉၀၀၀ကျပ်ခန့်ကုန်ကျကြောင်းသိရှိရသည်။ လက်ရှိပေါက်ဈေးအနေဖြင့် ကြက်သားဈေးကောင်းရရှိနေ၍ ၁ပိဿာလျှင် ၁၂၀၀၀ကျပ်ခန့်ရရှိနေပြီး အချိန်တိုအတွင်း အကျိုးအမြတ်ရရှိသော လုပ်ငန်းဖြစ်ကြောင်းသိရှိရပါသည်။
DOCA(ပဲခူး)

    မော်လမြိုင်မြို့ ဈေးကွက်အတွင်း၌ အောက်တိုဘာလ (တတိယပတ်)တွင် ကြက်ဥဘဲဥ ဈေးနှုန်းမြင့်တက်လာသည်။  ယခင် (စက်တင်ဘာလ)တွင် ကြက်ဥတစ်လုံး ၃၂၀ ကျပ်၊ ဘဲဥတစ်လုံး ၄၅၀ ကျပ်ဖြစ်ခဲ့ရာမှ  ယခုလ အောက်တိုဘာလ(တတိယပတ်) တွင် ကြက်ဥတစ်လုံး ၃၅၀မှ ၄၀၀ကျပ် ၊ ဘဲဥတစ်လုံး ၅၂၀မှ ၅၅၀ကျပ် ဖြစ်ပေါ်နေသည်။ ထို့ကြောင့် မော်လမြိုင်ဒေသ၏ ကြက်ဥဘဲဥဈေးနှုန်းမှာ  တစ်လုံးဈေးနှုန်းအရ ကြက်ဥဈေး ၃၀ ကျပ်နှင့် ဘဲဥဈေး  ၁၀၀ ကျပ်  ဈေးနှုန်းမြင့်တက်မှုရှိကြောင်း  ကြက်ဥဘဲဥ အရောင်းဆိုင်များမှ သိရှိရပါသည်။

     အောက်တိုဘာလအတွင်း အရောင်းအဝယ်အနေဖြင့် ကြက်ဥဘဲဥကို နေ့စဉ် စားသုံးမှု လျော့နည်းမှုမရှိဘဲ ပုံမှန်အရောင်းအဝယ် ဖြစ်လျက်ရှိကြောင်း သိရှိရပါသည်။ ကြက်ဥဘဲဥစားသုံးခြင်းဖြင့်  ပရိုတိန်းဓာတ်၊ အမိုင်နိုအက်ဆစ်ဓာတ်နှင့် အာဟာရဓာတ်များစွာ ရရှိနိုင်ပါသည်။

DOCA(မွန်)

     မွန်ပြည်နယ် မော်လမြိုင်မြို့သို့ အောက်တိုဘာလ (တတိယပတ်)ထိ ကြက်သွန်နီ စီးဝင်မှုမှာ(မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ ရန်ကုန်တိုင်းဒေသကြီး) တို့မှ စီးဝင်မှု  စုစုပေါင်း ( ၈၂၆၃၂) အိတ် ပိဿာအားဖြင့် ( ၈၂၆၃၂၀ ပိဿာ)စီးဝင်ခဲ့ပြီး ယင်းမှ မော်လမြိုင်မြို့မှ စီးထွက်မှုမှာ စုစုပေါင်း ( ၅၂၆၃၂) အိတ် ပိဿာအားဖြင့်  ( ၅၂၆၃၂၀ ပိဿာ)စီးထွက်ခဲ့ပြီး ကရင်ပြည်နယ်၊ ဘားအံမြို့၊ ကြာအင်းဆိပ်ကြီးမြို့နှင့်  မုဒုံမြို့၊ ကျိုက်ခမီ၊ ရေး၊ သံဖြူဇရပ်မြို့များသို့ စီးထွက်ခဲ့ကြောင်း မော်လမြိုင် ကြက်သွန်နီပွဲရုံနှင့် ကုန်စည်ဒိုင်မှ သိရသည်။

      ၂၀၂၄ ခုနှစ်၊ အောက်တိုဘာလ (တတိယပတ်)တွင် ကြက်သွန်နီ ဈေးနှုန်း အခြေအနေမှာ မလှိုင်ကြက်သွန်နီ(အကြီး) တစ်ပိဿာလျှင် ကျပ် ၃၀၀၀၊ မလှိုင်ကြက် သွန်နီ(အလတ်)တစ်ပိဿာလျှင် ကျပ်၂၉၀၀၊ မလှိုင်ကြက်သွန်နီ(အငယ်)တစ်ပိဿာလျှင် ကျပ်၂၄၀၀၊ မုံရွာသွန်နီ(အကြီး)တစ်ပိဿာလျှင် ကျပ်၃၁၀၀၊ မုံရွာကြက်သွန်နီ(အလတ်) တစ်ပိဿာလျှင် ကျပ် ၃၀၀၀၊ မုံရွာကြက်သွန်နီ (အငယ်) တစ်ပိဿာလျှင် ကျပ်၂၅၀၀ ဖြစ်သည်။ အဆိုပါ ကြက်သွန်နီဈေးနှုန်းမှာ ယခင်စက်တင်ဘာလ(တတိယပတ်)နှင့် နှိုင်းယှဉ်ပါက ယခုလ(တတိယပတ်)ထိ တစ်ပိဿာလျှင် ကျပ် ၄၀၀မှ ၇၀၀ကျပ်ခန့် ဈေးနှုန်းမြင့်တတ်လာကြောင်း သိရှိရပါသည်။

DOCA(မွန်)