ပြည်တွင်းကုန်သွယ်မှုသတင်း

     ပြည်ဈေးကွက်သို့ မိုးမြေပဲများကို ယခု စက်တင်ဘာလ တတိယပတ်တွင် ခရိုင်အတွင်း မြို့နယ်များဖြစ်သော ရွှေတောင်၊ ပေါက်ခေါင်းနှင့် အခြားတိုင်းများဖြစ်သော မြန်အောင်၊ ကြံခင်းဘက်မှ တစ်နေ့လျှင် မြေပဲဆန်အိတ် (၃၀၀/၄၀၀)ခန့် အဝင်ရှိပြီး ဝင်သလောက် အရောင်းအဝယ်ဖြစ်တာတွေ့ရပါသည်။ ရန်ကုန်နှင့် မန္တလေးဘက်မှ ဝယ်လက်များကလည်း ဝယ်ယူမှုရှိခြင်း၊ ဒေသတွင်းဆီစက်လုပ်ငန်းရှင်များကလည်း ဝယ်ယူမှုရှိခြင်းတို့ကြောင့် ပြည်ဒေသရှိ ပွဲရုံနှင့် ဈေးကွက်များတွင် ပုံမှန်ရောင်းဝယ်လျက်ရှိပါသည်။ မြေပဲဆန်ဈေးနှုန်းများအနေဖြင့် စက်တင်ဘာလ တတိယပတ်တွင် ဆီဆန်(အဖြူ) တစ်ပိဿာလျှင် (၆၀၀၀)ကျပ်၊ ဆီဆန် (အနီ)တစ်ပိဿာလျှင် (၆၇၀၀)ကျပ် နှင့် လုံးဆန် (အဖြူ)တစ်ပိဿာလျှင် (၆၇၀၀)ကျပ်၊ လုံးဆန်(အနီ)တစ်ပိဿာလျှင် (၇၇၀၀)ကျပ်ဖြင့် အရောင်းအဝယ်ဖြစ်လျက်ရှိပါသည်။ ယခင် စက်တင်ဘာလ ပထမပတ်နှင့် ယှဉ်လျှင် မြေပဲဆန်ဈေးအနည်းငယ်ပြန်ကျသွားတာ တွေ့ရပါသည်။  မြေပဲဆန်များဈေးကွက်တွင် အဝင်လှိုင်လာခြင်းတို့ကြောင့် တစ်ပိဿာလျှင် ၄၀၀-၈၀၀ ကျပ်ခန့်ဈေးအနည်းငယ်ကျလာသည်ဟု သိရပါသည်။  မြေပဲဆီဈေးမှာ ယခုစက်တင်ဘာလ တတိယပတ်တွင် မြေပဲဆီတစ်ပိဿာလျှင် (၁၃၅၀၀) ကျပ်ဖြင့် ရောင်းချ၍ ယခင် စက်တင်ဘာ လ ပထမပတ်တွင်   တစ်ပိဿာလျှင် (၁၄၀၀၀) ကျပ်ဖြင့် ရောင်းချခဲ့၍ တစ်ပိဿာလျှင် (၅၀၀)ကျပ်ခန့် ဈေးများပြန်လည်ကျဆင်းလာခဲ့ကြောင်း သိရပါသည်။ ယခုလိုမြေပဲဆီ ဈေးနှုန်းများ ကျဆင်းလာရခြင်းမှာ နိုင်ငံတော်မှ သက်သာသော ဈေးနှုန်းများဖြင့် စားအုန်းဆီများကို ရောင်းချပေးခြင်း၊ မြေပဲများအထွက်လှိုင်ချိန်ဖြစ်သဖြင့် ဈေးကွက်တွင် မြေပဲဆန် လက်ကျန်များနေခြင်းကြောင့် ဖြစ်သည်ဟု သိရပါသည်။

DOCA(ပဲခူး)

     ဂရိတ်ဖရုသီးများကို ကချင်ပြည်နယ်၊ ပူတာအိုဒေသတွင် စိုက်ပျိုးကြောင်းသိရပြီး ထိုအသီးကို ဝိုင်၊ ယို၊ ဂျယ်လီ၊ ဖျော်ရည် စသည်ဖြင့် ပြုလုပ်၍စားသုံးကြပါသည်။ ဂရိတ်ဖရုအသီး၏ ထူးခြားချက်မှာ အသီးတွင်အနာအဆာမရှိဘဲ သက်တမ်းပြည့်ချိန်မှ ခူးဆွတ်သော အသီးဆိုလျှင် ၃လမှ ၆လအထိ ထားနိုင်ပါသည်။ ပူတာအိုဒေသမှထွက်ရှိသည့် ဂရိတ်ဖရုသီးများကို မြစ်ကြီးနား၊ ရန်ကုန်၊ မန္တလေးဈေးကွက်တို့မှတစ်ဆင့် အမြို့မြို့အနယ်နယ်ရှိ ဈေးကွက်တို့အပြင် ပြည်ဈေးကွက်တွင်လည်း ရောင်းဝယ်ဖောက်ကားလျက်ရှိပါသည်။ ပြည်ဈေးကွက်တွင် ရံဖန်ရံခါရောင်းချသော ဂရိတ်ဖရုဈေးနှုန်းများမှာ ကာလပေါက်ဈေးအရ အလုံးကြီး တစ်လုံးလျှင် ၁၅၀၀ကျပ်၊ အသေး တစ်လုံးလျှင် ၆၀၀-၈၀၀ကျပ်ထိ ရောင်းချကြောင်း သိရပါသည်။

DOCA(ပဲခူး)

     နွေစပါးမှာ ၂၀၂၃ခုနှစ် ၊ ဧပြီလတွင် စတင်ထွက်ပေါ်ပြီး စပါးပေါ်စအချိန်တွင် (၄၆)ပေါင် တင်း(၁၀၀)လျှင် (၁၄)သိန်းကျပ်ဖြင့် အရောင်းအဝယ်ရှိခဲ့ပြီး မေလတွင် စပါးတင်း (၁၀၀)လျှင် (၁၅)သိန်းကျပ်အထိ ဈေးမြင့်ခဲ့ပါသည်။ ဇွန်လတွင် တင်း(၁၀၀)လျှင် (၁၄)သိန်းဖြင့်  ဈေးပြန်လည်ကျဆင်းခဲ့ပါသည်။ ဇွန်လတွင် ယခင်မေလထက် ဈေးများကျဆင်းလာရခြင်းမှာ ပြည်ပ ဝယ်လိုအားမရှိခြင်း၊ ရန်ကုန် Expoter ဝယ်လက်အဝယ်မရှိခြင်းတို့ကြောင့် ဈေးကျခဲ့ပြီး ဇူလိုင်လ မှာလည်း နွေစပါးဈေး (၁၃၂၀၀၀၀)ကျပ်အထိဈေးကျခဲ့ပါသည်။ ဆန်အဟောင်းများ လက်ကျန်ရှိနေခြင်း၊ ဝယ်လက်များမှာ ဆန်အဟောင်းများကိုသာ ဝယ်ယူစားသုံးမှုများခြင်း၊ နွေဆန်မှာ အရောင်းအဝယ်နည်းခဲ့သည့်အတွက် ဈေးဆက်လက်ကျခြင်းခဲ့ခြင်းဖြစ်ပါသည်။ ဩဂုတ်လနှင့် စက်တင်ဘာလတွင် စပါးတင်း(၁၀၀)လျှင် (၁၅)သိန်းကျပ်အထိ ဈေးပြန်လည် မြင့်ခဲ့ပါသည်။ စပါးဟောင်း လက်ကျန်နည်းခြင်း၊ နွေစပါးနှင့်နွေဆန်များမှာ စားသုံးသူများသည့်အတွက် အရောင်းအဝယ်ကောင်းလာခြင်း ဒေသတွင်းရောင်းလိုအား များသဖြင့် နွေစပါးနှင့် နွေဆန်ဈေးများ မြင့်တက်လာခဲ့ပါသည်။

DOCA(ပဲခူး)

     တောင်ငူမြို့တွင်  ရွှေဘိုပေါ်ဆန်းမှာ တစ်အိတ်လျှင် ၁၄၀၀၀၀ ကျပ်၊ ဖျာပုံပေါ်ဆန်းမှာ ယခင်အပတ်က တစ်အိတ်လျှင် ၁၃၀၀၀၀ ကျပ်၊ ဒေသပေါ်ဆန်းမှာ တစ်အိတ်လျှင် ၁၂၀၀၀၀ ကျပ်ဖြင့် ဈေးနှုန်းတည်ငြိမ်နေပါသည်။ ဧည့်မထ (မိုးဆန်)မှာ တစ်အိတ်လျှင် ၈၂၀၀၀ ကျပ်မှ ၈၆၀၀၀ ကျပ်၊ ဧည့်မထ(နွေဆန်)မှာ တစ်အိတ်လျှင် ၆၇၀၀၀ ကျပ်ရှိရာမှ ယခုစက်တင်ဘာလ စတုတ္ထပတ်တွင် ဧည့်မထ (မိုးဆန်)မှာ တစ်အိတ်လျှင် ၈၀၀၀၀ ကျပ်မှ ၈၅၀၀၀ ကျပ်၊ ဧည့်မထ(နွေဆန်)မှာ တစ်အိတ်လျှင် ၆၃၀၀၀ ကျပ်ဖြင့် ဈေးနှုန်းအနည်းငယ်ကျဆင်းပါသည်။

       မိုးစပါးမှာ တင်း ၁၀၀ လျှင် ၂၂၀၀၀၀၀ ကျပ်၊ နွေစပါးမှာ တင်း ၁၀၀ လျှင်  ၁၈၀၀၀၀၀ ကျပ်၊ ဆန်ကွဲကြီး တစ်အိတ်လျှင် ၄၈၀၀၀ ကျပ်၊ ဆန်ကွဲသေး တစ်အိတ်လျှင် ၄၅၀၀၀ ကျပ်၊ ဖွဲနုမှာ ၃၀၀၀၀ ကျပ်ဖြင့် ဈေးနှုန်းတည်ငြိမ်နေပါသည်။

      မတ်ပဲ(၃၀ ပိဿာအိတ်) ယခင်အပတ်က တစ်အိတ်လျှင် ၁၂၁၀၀၀ ကျပ်ရှိရာမှ ယခုစက်တင်ဘာလ စတုတ္ထပတ်တွင် ၁၂၆၅၀၀ ကျပ်ဖြင့် ဈေးအနည်းငယ်တက်ပါသည်။ ပဲလွန်းဖြူနှင့် ပဲတီစိမ်းမှာ အရောင်းအဝယ်မရှိကြောင်း တောင်ငူမြို့ရှိ ဆန်၊ စပါး၊ ပဲပွဲရုံများမှ သိရပါသည်။

DOCA(ပဲခူး)

    အုတ်တွင်းမြို့နယ်၊ ဥယျာဉ်တော်ကျေးရွာသည် တံမြက်စည်း အကြမ်းနှင့် အချောများ ကို မိသားစုတပိုင်တနိုင်လုပ်ငန်းအဖြစ် အသက်မွေးဝမ်းကြောင်းပြုလုပ်ကြသူများ များပြားလှပါသည်။ ဥယျာဥ်တော်ကျေးရွာမှ ထွက်သော တံမြက်စည်းများမှ လက်ရာသေသပ် ကောင်းမွန်ပြီး ခိုင်ခံ့သောကြောင့် ဒေသအတွင်းတွင် ရောင်းအားကောင်းလျက်ရှိပါသည်။

        တံမြက်စည်းအချောအတွက် ကုန်ကြမ်းအနေဖြင့် ကြိမ်နှင့် တံမြက်စည်းတံအား အသုံးပြုရပြီး တံမြက်စည်းအကြမ်းအနေဖြင့် အုန်းလက်၊ ဝါး နှင့် အနားကွပ်ရန်အတွက် ကြိမ်ကို အသုံးပြုရပါသည်။ တံမြက်စည်းအချောအတွက် တံမြက်စည်းတံအား ၁ ပိဿာလျှင် ၄၅၀၀ ကျပ်၊ ကြိမ်တစ်ထုပ်လျှင် ၈၀၀၀ ကျပ်ဖြင့် ဝယ်ယူရကြောင်း သိရှိရပါသည်။

      ဥယျာဉ်တော်ကျေးရွာမှထွက်သော တံမြက်စည်းများအား ဒေသတွင်း အုတ်တွင်း မြို့နယ်နှင့် အနီးပတ်ဝန်းကျင်ရှိ တောင်ငူ၊ ဖြူး နှင့် ကျောက်တံခါးမြို့နယ်များသို့ ဖြန့်ဖြူးရောင်းချပါသည်။ တံမြက်စည်းဈေးနှုန်းအနေဖြင့် ယခင်က တံမြက်စည်း အချောနှင့် အကြမ်း တစ်ချောင်း ၃၀၀၀ ကျပ်မှ ယခုအခါတွင် တစ်ချောင်းလျှင် ၃၅၀၀ ကျပ်ဖြင့် ဈေးနှုန်းအနည်းငယ် မြင့်တက်သွားကြောင်း သိရှိရပါသည်။

DOCA(ပဲခူး)