ပြည်တွင်းကုန်သွယ်မှုသတင်း

          တနင်္သာရီတိုင်းဒေသကြီး၊ ထားဝယ်မြို့၊ စည်ပင်သာယာစျေးကြီးများရှိ သစ်သီးအ‌ရောင်းဆိုင်များ တွင် ပန်းသီး၊ လိမ္မော်သီး၊ ပျားလိမ္မော်သီး၊ စပျစ်သီး စသဖြင့်  နေ့စဉ်လူအများအပြားစည်ကားသိုက်မြိုက် စွာ ဝယ်ယူ‌လျက်ရှိပါသည်။ ထိုသီးနှံများအနက် လိမ္မော်သီးသည်လည်း နေ့စဉ်အရောင်းအဝယ်ဖြစ်ထွန်း လျက်ရှိကြောင်းသိရှိရပါသည်။

          လိမ္မော်သီးသည် ရှောက်မျိုးနွယ်ပင်ဖြစ်ပြီး အရည်ရွမ်းသောအသီးတစ်မျိူးဖြစ်သည်။ အလုံးသေး ပြီး အခွံပါးသောအသီးဖြစ်သည့်အတွက် အရည်ညှစ်ထုတ်၍ သောက်သုံးနိုင်ပြီး ရေခဲသေတ္တာထဲတွင် ထည့်၍စားသုံးမည်ဆိုပါက အရသာပိုမိုကောင်းမွန်ပါသည်။ ထားဝယ်မြို့‌စျေးကြီးများရှိ သစ်သီးအရောင်း ဆိုင်များရှိ စျေးနှုန်းများအရ အလုံးကြီးတစ်လုံးလျှင် ကျပ် (၈၀၀) မှ (၁၀၀၀) ကျပ်အထိ စျေးရရှိနေ ကြောင်း သိရှိရပါသည်။

DOCA(တနင်္သာရီ)

          တနင်္သာရီတိုင်း‌ဒေသကြီး၊ ထားဝယ်ခရိုင်တွင် သီးနှံမျိုးစုံ စိုက်ပျိုးလျက်ရှိရာ သပြေချောင်းရွာ တွင် ခရမ်းကြွပ်သီးများကို ရာသီမရွေး တစ်နှစ်ပတ်လုံး တစ်နိုင်တစ်ပိုင်စိုက်ပျိုးလျက်ရှိပါသည်။ အစိမ်း ရောင်၊ အဖြူရောင်နှင့် ခရမ်းရောင်ဟူ၍ (၃)မျိုးရှိပြီး ထားဝယ်ဒေသတွင်အဖြူရောင်ကိုအများအပြား စားသုံးလျက် ရှိကြောင်းသိရှိရပါသည်။ ထိုင်းအစားအစာများတွင် တွင်တွင်ကျယ်ကျယ် အသုံးပြုကြပြီး အတို့အမြှုပ် အနေဖြင့်လည်း စားသောက်လျက်ရှိကြပြီး လူကြိုက်များသောသီးနှံတစ်မျိုးလည်း ဖြစ်ပါ သည်။

          ခရမ်းကြွပ်သီးကိုစိုက်ခင်းများမှတဆင့် ရွာဈေးများ၊ မြို့ပေါ်ဈေးများသို့ဆိုင်ကယ်များ၊ ကားများ ဖြင့် သွားရောက်ရောင်းချကြပြီး ယခုပတ်အတွင်းလေ့လာချက်များအရစည်ပင်သာယာဈေးကြီးအတွင်း၌ ခရမ်း ကြွပ်သီးနို့ဆီဗူးတစ်ဗူးလျှင်(၁၀၀၀)ကျပ်ရှိကြောင်းသိရှိရပါသည်။

DOCA(တနင်္သာရီ)

မွန်ပြည်နယ် ကျိုက်မရောမြို့နယ် ကလိုင်းကနိုင်ကျေးရွာအတွင်းရှိ မြေအောက်ရေကို အသုံးပြု၍ စားဖိုဆောင် ဟင်းသီးဟင်းရွက်ပင်များဖြစ်သည့် မုန်လာဥ၊ ဘိုစားပဲ၊ ပဲတောင့်ရှည်ပင်နှင့် ငရုတ်ပင်များကို မိသားစု တစ်နိုင်တစ်ပိုင် စိုက်ပျိုးကြသဖြင့် နေ့စဉ် ပုံမှန်ဝင်ငွေရရှိနေကြောင်း ဟင်းသီးဟင်းရွက်မျိုးစုံ စိုက်ပျိုးရောင်းချသူ တောင်သူ ဒေါ်မြင့်မိုး ထံမှ သိရသည်။

စားဖိုဆောင် ဟင်းသီးဟင်းရွက်ပင်များ၊ ငရုတ်သီးပင်များကို ရာသီအလိုက် အချိန်မီ စိုက်ပျိုးကြပြီး မြေအောက်ရေကို အသုံးပြုကာ စားဖိုဆောင်သီးနှံများကို စနစ်တကျ စိုက်ပျိုးပြီး သီးနှံပေါ်ချိန်၌ စျေးကောင်းလည်းရရှိပြီး အထွက်နှုန်းလည်း ကောင်းသဖြင့် နေ့စဥ် တစ်ရက် ဝင်ငွေ ကျပ် ၅၀၀၀၀ မှ ၁၀၀၀၀၀ ထိ ရရှိကြောင်းသိရသည်။

ဒေသခံ တောင်သူများအနေဖြင့် ကလိုင်းကနိုင်ကျေးရွာ လယ်မြေနှင့် ခြံဝင်းများတွင် သခွားသီး၊ ဗူးသီး၊ မုန်လာဥ၊ ငရုတ်ပင်၊ ကန်စွန်းပင် စသည်တို့ကို အများအပြားစိုက်ပျိုးသူ လည်းရှိသဖြင့် မိသားစု ဝင်ငွေတိုးရေးအထောက်အကူဖြစ်စေကြောင်း စိုက်ပျိုးရောင်းချသူ ဒေါ်မြင့်မိုးက ပြောသည်။

DOCA(မွန်)

          မွန်ပြည်နယ်၊ ပေါင်မြို့နယ်၌ ကုန်ဈေးနှုန်းများတည်ငြိမ်ရေးအတွက် အခြေခံ စားသောက်ကုန်များရောင်းချပေးခြင်းကို (၁၇.၁.၂၀၂၅) ရက်နေ့ နံနက် (၈:၃၀) နာရီက ကဒါ ရပ်ကွက်၊ မင်္ဂလာဈေးတွင် ရောင်းချလျက်ရှိကြောင်း သိရသည်။ ထိုသို့ရောင်းချရာတွင် မြို့နယ် စီမံအုပ်ချုပ်ရေးအဖွဲ့မှ ဦးဆောင်မှုဖြင့် အခြေခံစားသောက်ကုန်များဖြစ်သော အမဲသား တစ်ပိဿာ (၁၅၀၀၀) ကျပ်၊ ဝက်သားတစ်ပိဿာ (၁၅၀၀၀) ကျပ်၊ ဆန်တစ်ပြည် (၃၂၀၀) ကျပ်၊ ဆီတစ်ပိဿာ (၈၁၀၀) ကျပ်၊ ကြက်သား တစ်ပိဿာ (၁၃၀၀၀) ကျပ်တို့ဖြင့် ဈေးနှုန်းချိုသာစွာ ရောင်းချပေးခဲ့ရာ အများပြည်သူများ ဝယ်ယူအားပေးခဲ့ကြောင်း သိရသည်။

          အဆိုပါ ဈေးရောင်းချခြင်းအား မြို့နယ်စီမံအုပ်ချုပ်ရေးအဖွဲ့ဥက္ကဌ ဦးထင်လင်းအောင် ဦးဆောင်သော ဌာနဆိုင်ရာအကြီးအကဲများနှင့် ရပ်ကွက်၊ ကျေးရွာအုပ်ချုပ်ရေးမှူးများက စားသုံးသူပြည်သူများ သက်သာချောင်ချိရေးအတွက် ဆိုင်များတွင် ရောင်းချလျက်ရှိကြောင်း သိရသည်။

DOCA(မွန်)

၁၈.၁.၂၀၂၅ ရက်နေ့တွင် မွန်ပြည်နယ်၊ သထုံခရိုင်၊ ဘီးလင်းမြို့နယ်၊ ရွှေလှေကျေးရွာ နှင့် ညောင်ပုလ္လင်ကျေးရွာရှိ ပဲစိုက်ကွင်းများသို့ ဘီးလင်းမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ ဝန်ထမ်းများသည် ပဲစိုက်ပျိုးနေမှုအခြေအနေအား ကွင်းဆင်းလေ့လာခဲ့ ပါသည်။

ထိုသို့ ကွင်းဆင်းလေ့လာခဲ့ရာတွင် ရွှေလှေကွင်းရှိ ပဲစိုက်ပျိုးသူတောင်သူ ဦးသက်လွင် နှင့် ညောင်ပုလ္လင်ကွင်းရှိ ပဲစိုက်ပျိုးသူတောင်သူ ဦးဝင်းထွန်းတို့၏ ပြောကြားချက်အရ ၎င်းတို့ ၏စိုက်ကွင်းများတွင် ပဲတီစိမ်းကိုသာ အဓိကစိုက်ပျိုးကြပြီး စိုက်ခင်း ဧက (၁၅) ဧကစီ စိုက်ပျိုးထားကြောင်း၊ ၂၀၂၄ ခုနှစ် နိုဝင်ဘာလတွင် စတင်စိုက်ပျိုးခဲ့ပြီး စိုက်ပျိုးပြီး (၃) လခန့်တွင် ရိတ်သိမ်းနိုင်ပြီဖြစ်၍ ၂၀၂၅ ခုနှစ် ဇန်နဝါရီလနောက်ဆုံးပတ် (သို့) ဖေဖော်ဝါရီလ ပထမပတ်ခန့်တွင် ပဲများကို ရိတ်သိမ်းရတော့မည်ဖြစ်ကြောင်း သိရပြီး ယခုရက်သတ္တပါတ် အတွင်း ပဲတီစိမ်းတစ်တင်းလျှင် (၁၀၅၀၀၀) ကျပ်ဖြင့် ဘီးလင်းမြို့တွင် ဝယ်ယူနေကြောင်း သိရ၍ ပဲစိုက်ခင်း (၁) ဧကလျှင် ပဲ (၁၅) တင်းခန့်ထွက်သဖြင့် အကျိုးအမြတ်ရရှိမည်ဟု ယူဆရကြောင်း သိရပါသည်။

တောင်သူများ၏ ပြောကြားချက်အရထွက်ရှိလာသော ပဲများကို တောင်သူများ ကိုယ်တိုင် ပဲခူးမြို့၊ ရန်ကုန်မြို့တို့ရှိ ပဲမျိုးစုံအဝယ်ဒိုင်များသို့ တင်ပို့ရောင်းချသောကြောင့် ဈေးနှုန်း မှန်ကန်စွာရရှိ၍ အကျိုးအမြတ်ပိုမိုရရှိကြောင်းအား သိရှိရပါသည်။

DOCA(မွန်)