ပြည်တွင်းကုန်သွယ်မှုသတင်း

          ပြည်ဈေးကွက်သို့ ယခုဇန်နဝါရီလဆန်းမှစ၍ နွေပဲသီးများ စတင်ဝင်ရောက်လာပြီး ပေါ်ဦးပေါ်ဖျားမို့ ဈေးကောင်းရလျက်ရှိနေသည်။ ပြည်အနီးတစ်ဝိုက်ရှိ မှော်ဇာ၊ မထော၊ မြောင်းငယ်လှ၊ ပေါင်းတလည်၊ ဖိုးခေါင်၊ ချောင်းနားတန်း၊ မကျီးစု၊ ညောင်ပင်သာရွာများနှင့် အင်းမ၊ ပုတီးကုန်း၊ သဲကုန်းဘက်တို့မှ ဈေးကောင်းရချိန်မို့ ခူးဆွတ်ရောင်းချမှုများရှိနေပြီး ပြည်ဈေးကွက်သို့ ရက်ခြားအဝင်ရှိကာ တစ်ပတ်လျှင် ပိဿာချိန် (၂၅၀၀-၃၀၀၀)ခန့် အဝင်ရှိနေသည်။ အရောင်းအဝယ်မှာလည်း ဈေးမြင့်သော်လည်း ပေါ်ဦးပေါ်ဖျားဖြစ်သောကြောင့်  အဝယ်လိုက်လျက် ရှိပြီး ဝင်ရောက်မှု၏ အားလုံးနီးပါးခန့် အရောင်းအဝယ်ဖြစ်နေသည်။ ဈေးနှုန်းအားဖြင့် ပြည်မြို့ပေါ်ဈေးများတွင် နွေပဲသီး ၁၀ကျပ်သားလျှင် ကျပ် (၇၀၀-၈၀၀)နှုန်းခန့်ဈေးရှိပြီး လှိုင်လှိုင်ထွက်ပေါ်ချိန်တွင် ကျပ် (၃၀၀-၄၀၀)နှုန်းခန့်သာ ရှိတော့မည်ဖြစ်ကြောင်း သိရသည်။

DOCA(ပဲခူး)

          ဆလပ်ရွက်ထုတ်ကို ဒေသမရွေးစိုက်ပျိုး၍ရနိုင်ပါသည်။ အထုတ်မျိုးနှင့် အရွက်ပြန့်မျိုးဟူ၍ (၂)မျိုးရှိပါသည်။ ဆလပ်ရွက်အရောင်မှာ အစိမ်းရောင်နှင့် အနီရောင်ဟူ၍ ရှိပါသည်။ ဆလပ်ရွက်၏ အရသာမှာ ခါးသက်သက်အရသာရှိပါသည်။ ဆလပ်ရွက်ကို စိုက်ပျိုးရာတွင် မျိုးစေ့အား အပင်ပေါက်ဖြစ်အောင် ပျိုးထောင်ပြီးမှ စိုက်ပျိုးခြင်း၊ မျိုးစေ့များအား တိုက်ရိုက်စိုက်ပျိုးစနစ်ဖြင့် စိုက်ပျိုးနည်းဖြင့်လည်း စိုက်ပျိုး၍ရနိုင်ပါသည်။

          ဆလပ်ရွက်ပုံသဏ္ဍာန်မှာ အရွက်တွန့်တွန့်လေးနဲ့ ခပ်ဖားဖားအရွက်လေးများရှိပြီး အစိမ်းနု ရောင်ရှိပါသည်။ ဆလပ်ရွက်ပင်သည် ယခုအချိန်တွင် ရာသီပေါ်စာဖြစ်ပါသည်။ ဆလပ်ရွက်များကို စိုက်ပျိုးထွက်ရှိသည့် ဒေသများမှာ ပြည်ဒေသအနီးရှိ မှော်ဇာကျေးရွာတွင် အများအပြားစိုက်ပျိုး ကြပြီးထွက်ရှိလာသည့် ဆလပ်ရွက်ပင်များကို ကုန်စိမ်းဒိုင်များမှ အခင်းပြတ်ဝယ်ယူပြီး ၎င်းကုန်စိမ်း ဒိုင်များမှတဆင့် မြို့မစည်ပင်သာယာဈေးအတွင်း ရောင်းချသည့် ကုန်စိမ်းဆိုင်များမှ လာရောက်ဝယ် ယူခြင်း၊ ရန်ကုန်မြို့ရှိ သီရိမင်္ဂလာဈေးများသို့ ကုန်တင်ကားများဖြင့် တင်ပို့ရောင်းချခြင်းများ လည်းရှိပါသည်။ ဈေးကွက်အတွင်း ရောင်းချရာတွင် ဆလပ်ထုတ်အပင် ၁ပင်လျှင် (၅၀၀)ကျပ် နှုန်းဖြင့် ရောင်းချနေကြောင်းသိရှိရပါသည်။

DOCA(ပဲခူး)

          ပြည်ဈေးကွက်၌ ဗမာခရမ်းချဉ်သီးများ ယခုဇန်နဝါရီလဆန်းပိုင်းမှစ၍ ဈေးနှုန်းများ ကျဆင်းလျက်ရှိပြီး ယခင်နိုဝင်ဘာလဆန်းတွင် ဗမာခရမ်းချဉ်သီး တစ်ပိဿာလျှင် ကျပ်(၉၀၀၀)နှုန်း ရှိခဲ့ရာမှ တဖြည်းဖြည်းကျဆင်းလာကြောင်းသိရသည်။ ဝင်ရောက်မှုအားဖြင့် ပြည်မြို့ဒေသအနီး တစ်ဝိုက်နှင့် ပြည်မြို့အနောက်ဘက်ကမ်းရှိရွာများ၊ ရွှေတောင်မြို့၊ အင်းမ၊ သဲကုန်းမြို့တို့မှ နေ့စဉ်အဝင်ရှိနေပြီး တစ်ပတ်လျှင် ပိဿာချိန် (၅၀၀၀)နှုန်းခန့် အဝင်ရှိနေသည်။ အရောင်း အဝယ်အနေဖြင့် ဝင်ရောက်မှုရဲ့အားလုံးနီးပါးခန့် အရောင်းအဝယ်ဖြစ်လျက်ရှိပြီး ဈေးနှုန်းအနေဖြင့် ဗမာခရမ်းချဉ်သီးတစ်ပိဿာကို ကျပ် (၁၈၀၀-၂၀၀၀)နှုန်းနှင့် ဗမာကိုင်းခရမ်းချဉ် (ဘီးဆံပတ်သီး) တစ်ပိဿာလျှင် ကျပ်(၃၅၀၀-၄၀၀၀)နှုန်းများဖြင့် အသီးသီးရောင်းဝယ်မှုရှိနေသည်။

DOCA(ပဲခူး)

          မျှစ်ကိုဟင်းလျာအဖြစ် အမျိုးမျိုးအဖုံဖုံ ချက်ပြုတ်ကြော်လှော် စားသုံးကြပါသည်။ ကျေးလက် ဒေသများတွင် မိုးဦးကျ မျှစ်စို့များ ထွက်ချိန်၌ မျှစ်ချိုးထွက်လေ့ရှိကြပါသည်။ မျှစ်ကို အစိမ်းအတိုင်း မျှစ်ဆပ်အဖြစ် စားကြသလို အချဉ်တည်၍ မျှစ်ချဉ်အဖြစ်လည်း စားသုံးကြပါသည်။ မြန်မာနိုင်ငံ၌ ဝါးအမျိုးအပေါင်းရာကျော်ရှိသည်ဖြစ်ရာ မျှစ်ကိုစားကုန်အဖြစ်သာမက ရောင်းကုန် အဖြစ်ပါ စီးပွားဖြစ် လုပ်ကိုင်ကြကြောင်း သိရှိရပါသည်။

          ပြည်မြို့တွင် မျှစ်လုပ်ငန်းလုပ်ကိုင်သူ (၄-၅)ဦး ရှိပါသည်။ ပြည်မြို့နယ်၊ ပန်းတောင်းမြို့ နယ်များမှ မျှစ်စိမ်းများဝယ်ယူ၍ စဉ့်အိုးများဖြင့် တစ်နှစ်ပတ်လုံးလှောင်ကာ ဒေသတွင်းနှင့် ရန်ကုန်ဈေးကွက်သို့ တင်ပို့ရောင်းချကြကြောင်း သိရှိရပါသည်။

          မျှစ်စိမ်းကို ရေစင်အောင် ဆေးကြောပြီး စဉ့်အိုးထဲသို့ အနည်းငယ်ထည့် ဆားထည့်ပြီး သိပ်နေအောင်ထည့်ရပါသည်။ မျှစ်တစ်အိုးလျှင် ပိဿာချိန် (၄၀၀)ခန့် ထည့်နိုင်ပါသည်။ မျှစ်ဆားရေစိမ်(၁)ပိဿာလျှင် (၈၀၀)ကျပ်ရရှိပြီး ကုန်ကျစရိတ်နှုတ်ပြီး အသားတင်အမြတ်နေဖြင့် မျှစ်ဆားရေစိမ် (၁)ပိဿာကို (၃၀၀)ကျပ်ခန့် ရရှိကြောင်း သိရှိရပါသည်။

DOCA(ပဲခူး)

          ပဲတောင့်ရှည်သီးကို တိုင်ထောင်ဟူ၍လည်းခေါ်ကြသည်။ မြန်မာနိုင်ငံအနှံ့အပြားတွင် စိုက်ပျိုး ကြသော အမျိုးအနွယ်လည်းဖြစ်ပါသည်။ ပဲတောင့်ရှည်တွင် အပင်ပုမျိုး(နွယ်မဲ့မျိုး)နှင့် အပင်ရှည်မျိုး (နွယ်တက်မျိုး)ဟူ၍ ခွဲခြားထားပါသည်။ အပင်ရှည်မျိုးကို တိုင်ထောင်၍စိုက်ပျိုးကြသည်။ အတောင့် အရောင်အားဖြင့် အစိမ်းနု၊ အစိမ်းရင့်၊ အနီရောင်ဟူ၍အမျိုးကွဲပြားစွာရှိပါသည်။ အစေ့အရောင်မှာ မျိုးအလိုက် အနီရောင်ပြောင်၊ အနီရောင်နှင့် အပြာရောင်ရောနှောနေသော အ‌ရောင်ဟူ၍အမျိုးမျိုး ကွဲပြားစွာရှိပါသည်။ ပဲတောင့်ရှည်ကို မြေအမျိုးမျိုးတွင်စိုက်ပျိုး၍ရသည်။ တိုတောင်းသောရာသီ၌ အချိန်တိုအတွင်းစိုက်ပျိုးလိုပါက သဲဆန်သောမြေတွင် စိုက်ပျိုးကြသည်။ မြေကောင်းလျှင် အထွက်ပို ကောင်းသည်။ အပူချိန်(၁၀)ဒီဂရီအောက်အေးပါက သီးပွင့်မှုကိုနှောင့်နှေးစေပါသည်။ အလွန်ပူသော ရာသီ(သို့မဟုတ်) မိုးအလွန်များပါက အပွင့်အသီးကိုကြွေစေသည်။ အသင့်တော်ဆုံးအပူချိန်မှာ (၂၂-၂၅)ဒီဂရီစင်တီဂရိတ်အတွင်းဖြစ်သည်။ ထွန်ရေးအလွန်ကောင်းအောင်မြေကို ပြုပြင်ရန်မလိုပါ။ ထွန်ရေးအသင့်အတင့်ရလျှင်စိုက်ပျိုးနိုင်သည်။ စိုက်ပျိုးရာတွင် ရေမဝပ်သောမြေကိုရွေးချယ်ရမည်။ တိုင်‌ထောင်ပဲကို တစ်တန်းနှင့်တစ်တန်းသုံးပေခြား၍ တစ်ပင်နှင့်တစ်ပင် (၉-၁၂)လက်မခွာ၍ စိုက်ရမည်။ စိုက်ပျိုးပြီးအပင်များ ရှည်လာသောအခါ အနည်းဆုံး(၇)ပေခန့်ရှည်သော ဝါးတိုင်(သို့) သစ်သားတိုင်များကို အပင်တိုင်း၏ အခြေတွင်ထောင်ပေးရမည်။ အချို့ကတိုင်များမြဲစေရန် တစ်တန်းထဲရှိ နီးကပ်သောအပင်များ၏တိုင်ကို ကြက်ခြေခတ်ပေးပြီး တိုင်များဆုံရာ၌စုချည်ပေးကြ သည်။ အပင်ပုမျိုးကို တစ်တန်းနှင့်တစ်တန်း (၁.၅-၂)ပေခြား၍ တစ်ပင်နှင့်တစ်ပင်နှစ်ပေခွာ၍ စိုက်ပျိုးကြသည်။ ရာသီဥတုသင့်တော်သောဒေသတွင် တစ်နှစ်ပတ်လုံးစိုက်ပျိုးနိုင်သည်။ ရေရရှိက အချိန်မရွေးစိုက်ပျိုးနိုင်သည်။

          ပဲသီးများကို အရွယ်မရောက်မီအစေ့နုသေးသောအချိန်တွင် ဆွတ်ခူးနိုင်သည်။ ပဲသီးတောင့် များကို ပန်းပွင့်ပြီး(၇-၁၀)ရက်အကြာတွင် စတင်ဆွတ်ခူးနိုင်သည်။ ပဲသီးတောင့်များရင့်လာပါက အစေ့‌နေရာတွင်ဖောင်းကြွကာ အခွံသည်ပျော့သောကြောင့် စားသုံးသူများမနှစ်သက်ကြပါ။ အပင်ပု မျိုးတစ်ဧကလျှင် (၈၀၀-၉၀၀)ပိဿာ၊ အပင်ရှည်မျိုးတစ်ဧကလျှင်(၂၀၀၀)ပိဿာကျော်ထိ ထွက်ရှိနိုင် ပါသည်။

DOCA(ပဲခူး)