ပြည်တွင်းကုန်သွယ်မှုသတင်း

     မန္တလေးတိုင်းဒေသကြီးအတွင်းရှိ ကြံထွက်ပစ္စည်းများမှာ ရာသီချိန်ကျော်လွန်၍ ကြံအသစ်ပေါ်ချိန် ၂လကျော်၊ ၃လအလိုတွင် လက်ကျန်ပစ္စည်းနည်းပါးချိန်ကာလအတွင်း အခြားစားသောက်ကုန်ပစ္စည်းဈေးတက်လာခြင်းသာမက ကြံထွက်ပစ္စည်းများဖြစ်ကြသော ပွက်သားမှအစ ပေါင်းသကြား၊ ခါသကြားတို့လည်း ဈေးတက်လျက်ရှိပါသည်။ ကြံပေါ်သည့်ရာသီချိန်တွင် ပွက်သားများမှာ ကြံစိုက်တောင်သူများလက်ဝယ်တွင်ရှိသော်လည်း ရာသီချိန်ကျော်လွန်သည့်အခါ ကုန်သည်၊ ပွဲစားများ၊ လှောင်ထားသူများ၏ လက်ထဲတွင်သာရှိပါသည်။ ကြံကို တိုက်ရိုက်ဝယ်ယူသည့်သကြားစက်တို့တွင် သကြားများကြိတ်ခွဲထားရှိပြီး ပြည်တွင်း/ ပြည်ပသို့ တိုက်ရိုက်တင်ပို့ရောင်းချကြပါသည်။ ပွက်သားနှင့် သကြားတို့မှာ အခြားလယ်ယာထွက်ကုန်ပစ္စည်းများကဲ့သို့ ပုပ်ခြင်း၊ မှိုတက်ခြင်း၊ ခြောက်သွေ့ခြင်း၊ အလေးချိန်လျော့နည်းခြင်းများမရှိသောကြောင့်  လှောင်ကန်များ၊ ပေပါပိုင်းများထပ်ဆင့်ပြီး သိုလှောင်ထားရှိပါသည်။ ပွက်သားကို ယိုစုံလုပ်ငန်း၊ မြန်မာမရွေးလုပ်ငန်းနှင့် ရေခဲခြစ်လုပ်ငန်းတို့တွင်အသုံးပြုကြပြီး သကြားကို စားသောက်ကုန်လုပ်ငန်း၊ အချိုရည်မျိုးစုံလုပ်ငန်းနှင့် အဖျော်ယမကာလုပ်ငန်းတို့တွင် အများဆုံးအသုံးပြုကြပါသည်။ ပြည်ပနိုင်ငံဖြစ်သည့် တရုတ်နိုင်ငံတွင်သာမက ယခု၂၀၂၃ခုနှစ်တွင် အင်ဒိုနီးရှား၊ ဗီယက်နမ်၊ ဘင်္ဂလားဒေ့ရှ်တို့မှလည်း ဝယ်ယူရန်ကမ်းလှမ်းလာကြခြင်း၊ ပြည်ပတင်ပို့မှုများလာခြင်းတို့ကြောင့် ပြည်တွင်းစက်များသကြားနည်းပါးခြင်း၊ ယခု၂၀၂၃ခုနှစ်နှင့် ၂၀၂၂ခုနှစ်တို့တွင် ပွက်သားတစ်ပိဿာလျှင် (၁၀၀၀)ကျပ်ကျော်၊ ပေါင်းသကြားတစ်ပိဿာလျှင် (၁၂၀၀) ကျပ်နှင့် ခါသကြား တစ်ပိဿာလျှင် (၁၁၀၀)ကျပ်ထိကွာခြားလျက်ရှိပါသည်။

သကြားနှင့်သကာရည်ကုန်စည်ဒိုင်အသင်း၏ နေ့စဉ်ပေါက်ဈေး

      မြန်မာ့သကြားဈေးနှုန်းမှာ ပြည်တွင်း၌ဈေးတက်ခြင်းသာမက ပြည်ပသကြားများလည်းဈေးတက်ကြောင်း စုံစမ်းသိရှိရပြီးလာမည့် ကြံစိုက်ရာသီတွင် ကြံစိုက်တောင်သူများအနေဖြင့် ကြံကိုပိုမိုစိုက်ပျိုးသင့်ပါကြောင်း အကြံပြုလေ့လာရေးသားလိုက်ရပါသည်။

DOCA(မန္တလေး)

   မြန်မာလူမျိုးများနေ့စဉ်စားသုံးရာတွင် ဆန်သည် အဓိကအရေးပါသောအရာဖြစ်ပါသည်။ ဆန်ကိုလူအများ ထမင်းအဖြစ်စားသုံးကြသလို မုန့်မျိုးစုံလည်းပြုလုပ်၍ စားသုံးကြပါသည်။ ဆန်အပြင် ဆန်ကွဲကိုလည်း တန်ဖိုးမြှင့်ထုတ်ကုန်အဖြစ် ဆန်မရွေးလုပ်ငန်း လုပ်ကိုင်သူ ပြည်ခရိုင်၊ ပြည်မြို့တွင် (၅)ဦးထက်မနည်းရှိပါသည်။ ထိုအထဲတွင် ဆန်မရွေးလုပ်ကိုင်သူ လုပ်ငန်းရှင် (၁)ဦး ဖြစ်သော ဦးချစ်ကိုကိုနှင့်တွေ့ဆုံ၍မေးမြန်းရာ ၎င်းမှထိုလုပ်ငန်းကို လုပ်ကိုင်သည်မှာ ကြာမြင့်ပြီဖြစ်ပါသည်။ အလုပ်လုပ်ကိုင်ရာတွင် အလုပ် (၂)ဆိုင်းရှိပြီး (၁)ဆိုင်းလျှင် လူဦးရေ (၄)ဦးဖြင့် လုပ်ကိုင်ရကြောင်း ၊ တစ်နေ့လျှင် ဆန်မရွေးပိဿာချိန် (၅၀၀)ခန့်ထွက်ရှိကြောင်း သိရပါသည်။ ဆန်မရွေးကို ပြုလုပ်ရာတွင် ဆလပ်ကျိုးဆန်ကွဲ၊ ကြံသကာနှင့် ကပ်စေးနှဲတို့လိုအပ်ပါသည်။ တစ်နေ့လျှင် ဆန်မရွေးပိဿာချိန် (၅၀၀)ထွက်ရှိရန်အတွက် ဆလပ်ကျိုးဆန်ကွဲအိတ် (၅)အိတ်၊ ကြံသကာ (၁၂) အိတ်နှင့် ကပ်စေးနှဲ (၁၅)ပိဿာဝင် (၈)ပုံး လိုအပ်ပါသည်။ နေ့စဉ် ဆန်မရွေး ပိဿာချိန် (၅၀၀) ခန့်ထွက်ရှိပြီး မိုးရွာသောနေ့၊ ဈေးပိတ်သောနေ့များတွင် ပိဿာချိန် (၄၀၀)ခန့်သာလုပ်ရကြောင်း သိရပါသည်။ ထွက်ရှိလာသော ဆန်မရွေးများကို ပြည်ဈေးကွက်အပြင် ရန်ကုန်၊ မန္တလေး၊ ပြင်ဦးလွင်၊ သထုံ၊ ကမာဝက်၊ ပဲခူး၊ တောင်တွင်းကြီး၊ အောင်လံနှင့် မကွေးဘက်သို့ အဝေးပြေးကားဂိတ်မှတစ်ဆင့် တင်ပို့ရောင်းချကြောင်းသိရပါသည်။ ဆန်မရွေးရောင်းဈေးအနေဖြင့် တစ်ပိဿာလျှင် (၃၇၀၀) ကျပ်ဖြင့် ရောင်းချကြောင်းသိရပါသည်။ လုပ်ငန်းရှင် အကျိုးအမြတ်အနေဖြင့် တစ်ပိဿာလျှင် (၅၀၀) ကျပ်ခန့်အမြတ်ရှိပြီး ပိဿာ (၅၀၀)လျှင် (၂၅၀၀၀၀)ကျပ်ခန့် အမြတ်ရှိကြောင်း သိရပါသည်။

   ဆန်မရွေးသည် မြန်မာ့ရိုးရာအစားအစာဖြစ်သည့်အတွက် တောနေ၊ မြို့နေ၊ လူတန်းစား မရွေးကြိုက်နှစ်သက်သည့် အစားအစာဖြစ်ပါသည်။ ဆန်မရွေးလုပ်ငန်းကို ယခုထက်မက အဆင့်မြှင့်တင်ပြီး ဆန်ကွဲမှတစ်ဆင့် တန်ဖိုးမြှင့်ထုတ်ကုန်အဖြစ် ထုတ်လုပ်လာနိုင်မည်ဆိုလျှင် လုပ်ငန်းများ ပိုမို တိုးတက်လာမည်ဖြစ်ပြီး အကျိုးအမြတ်လည်း ပိုမိုရရှိလာမည် ဖြစ်ပါသည်။ ထို့ကြောင့် အသေးစား၊ အငယ်စား၊ အလတ်စား၊ MSMEs လုပ်ငန်းများ ဖွံ့ဖြိုးတိုးတက်ရန်အတွက် နိုင်ငံတော်မှလည်း အကူအညီအထောက်အပံ့များ ပေးလျက်ရှိပါသည်။ ဆန်မရွေးလုပ်ငန်းကို ငွေကြေးအရင်းအနှီးများ နည်းပညာများပံ့ပိုးပေးနိုင်ပါက ဆန်ကွဲမှတစ်ဆင့် တန်ဖိုးမြှင့်ထုတ်ကုန် ထုတ်လုပ်သည့်လုပ်ငန်း ပိုမိုတိုးတက်လာသည်နှင့်အညီ အလုပ်အကိုင် အခွင့်အလမ်းသစ်များ ပိုမိုရရှိနိုင်ပြီး နိုင်ငံခြားဝင်ငွေ လည်းရရှိလာနိုင်မှာဖြစ်ကြောင်း လေ့လာသုံးသပ်တင်ပြအပ်ပါသည်။

DOCA(ပဲခူး)

   ပဲခူးတိုင်းဒေသကြီး၊ ပြည်ခရိုင်တွင် တစ်နှစ်ပတ်လုံးနှမ်းများ စိုက်ပျိုးလျက်ရှိရာ မိုးရာသီတွင် မိုးနှမ်း၊ ဆောင်းရာသီတွင် ဆောင်းနှမ်းနှင့်နွေရာသီတွင် နွေနှမ်းဟူ၍ စိုက်ပျိုးကြပါသည်။ ပြည်ခရိုင်တွင် မြို့နယ်(၄)မြို့နယ်ရှိရာ နှမ်းအများဆုံးစိုက်ပျိုးသောမြို့မှာ ပေါက်ခေါင်းမြို့ဖြစ်ပြီး ဒုတိယအများဆုံးစိုက်ပျိုးသောမြို့မှာ ပန်းတောင်းမြို့ဖြစ်ပါသည်။ ၂၀၂၃ခုနှစ်၊ အောက်တိုဘာလတတိယပတ်တွင် မိုးနှမ်းများရိတ်သိမ်းပြီး ဆောင်းနှမ်းများစိုက်ပျိုးရန် စီစဉ်နေချိန်ဖြစ်ပါသည်။ ယခုနှစ် မိုးနှမ်းရာသီတွင် ပြည်ခရိုင်အနေဖြင့် ၆၆၃၇၁ဧက စိုက်ပျိုးနိုင်ခဲ့ပြီး ၅၄၆၅၈ ဧက ရိတ်သိမ်းနိုင်ခဲ့ပါသည်။ အထွက်နှုန်းအနေဖြင့် တစ်ဧကလျှင် ၁၄/၁၅ တင်းခန့်ထွက်ရှိသည်ဟု သိရပါသည်။ ပြည်ခရိုင်တွင် နှစ်အလိုက်စိုက်ပျိုးထွက်ရှိမှုအား လေ့လာတင်ပြအပ်ပါသည်။

စဥ်            ခုနှစ်             စိုက်ဧက              ရိတ်ဧက             နှုန်း               အထွက်တင်း

၁။            ၂၀၂၁             ၉၇၆၆၄               ၈၄၉၅၄             ၁၀.၇၇            ၈၄၂၅၁

၂။            ၂၀၂၂               ၇၂၆၇၉               ၆၂၆၉၄              ၁၀.၂၂              ၆၄၀၆၄၈

၁။           ၂၀၂၃              ၆၆၃၇၁               ၅၄၆၅၈             ၁၄.၆၇            ၈၀၂၀၉၀

    ၂၀၂၁ ခုနှစ်တွင် စိုက်ပျိုးဧကများပေမယ့် အထွက်နည်းပြီး ၂၀၂၃ ခုနှစ်တွင် စိုက်ပျိုးဧက နည်းသော်လည်း အထွက်နှုန်းကောင်းလာတာတွေ့ရပါသည်။ ယခုနှစ်တွင် အထွက်နှုန်းများကောင်းမွန်လာရခြင်းမှာ ရာသီဥတုညီညွတ်မျှတမှုရှိခြင်း၊ သဘာဝဘေးအန္တရာယ်များနှင့် မတွေ့ကြုံ ရခြင်းဖြစ်သည်ဟု သိရပါသည်။

    နှမ်းသီးနှံဈေးနှုန်းများအနေဖြင့်လည်း ဘဏ္ဍာနှစ်အလိုက် နှိုင်းယှဉ်ကြည်မည်ဆိုလျှင်-

စဥ်            ခုနှစ်             အမျိုးအမည်              ဈေးနှုန်း(တစ်တင်းဈေး)

၁။            ၂၀၂၁                နှမ်းနီ                      ၃၆၀၀၀

               ၂၀၂၁                နှမ်းနက်                   ၅၆၀၀၀

               ၂၀၂၁                စမုံနက်                    ၆၀၀၀၀

၂။            ၂၀၂၂                 နှမ်းနီ                      ၈၆၀၀၀

               ၂၀၂၂                နှမ်းနက်                   ၉၃၀၀၀

               ၂၀၂၂                စမုံနက်                    ၁၀၆၀၀၀

၃။            ၂၀၂၃                နှမ်းနီ                      ၁၀၁၀၀၀

                ၂၀၂၃             နှမ်းနက်                     ၉၅၀၀၀

                ၂၀၂၃              စမုံနက်                    ၁၀၆၀၀၀

   ပြည်ခရိုင်အနေဖြင့် နှမ်းသီးနှံဈေးနှုန်းများအားလေ့လာရာတွင် ၂၀၂၁ ခုနှစ်တွင် နှမ်းဈေးမှာ တစ်တင်းလျှင် ၃၀၀၀၀ကျပ်မှ ၆၀၀၀၀ကျပ်အတွင်း အရောင်းအဝယ်ဖြစ်ခဲ့ပြီး ၂၀၂၂ခုနှစ်တွင် နှမ်းဈေးများမြင့်တက်လာခဲ့ပြီး တစ်တင်းလျှင် ၈၀၀၀၀ကျပ်ကျော်မှ ၁၀၀၀၀၀ကျပ်ကျော်အထိ ရောင်းဝယ်မှုဖြစ်ခဲ့ပါသည်။ ထိုသို့ဈေးနှုန်းမြင့်တက်လာရခြင်းမှာ စိုက်ဧကလည်း လျော့နည်းသွားသလို အထွက်နှုန်းများလည်း လျော့နည်းသွားပြီး ဝယ်လိုအားကောင်းလာ၍ နှမ်းဈေးများ မြင့်တက်လာရခြင်းဖြစ်သည်ဟု ခန့်မှန်းရပါသည်။ ယခုနှစ်တွင်လည်း ၂၀၂၃ ခုနှစ် နှစ်ဆန်းပိုင်းတွင် နှမ်းဈေးများအနေဖြင့် နှမ်းနီတစ်တင်းလျှင် ၇၃၀၀၀ကျပ်၊ နှမ်းနက်တစ်တင်းလျှင် ၈၆၀၀၀ကျပ်နှင့် စမုံနက်နှမ်း တစ်တင်းလျှင် ၈၈၀၀၀ကျပ်ဖြင့် ဈေးစတင်ဖွင့်ခဲ့ပါသည်။ ဖေဖော်ဝါရီလတွင် နှမ်းနီ တစ်တင်းလျှင် ၈၃၀၀၀ကျပ်၊ နှမ်းနက်တစ်တင်းလျှင် ၉၃၀၀၀ကျပ်နှင့် စမုံနက်နှမ်း တစ်တင်းလျှင် ၁၀၀၀၀၀ကျပ်အထိ ဈေးများမြင့်တက်လာခဲ့ပါသည်။ နွေနှမ်းများ စိုက်ပျိုးချိန်ဖြစ်သဖြင့် ဈေးကွက်အတွင်း နှမ်းလက်ကျန်ရှားလာသောကြောင့် ဈေးမြင့်တက်လာခဲ့ပါသည်။ မတ်လနှင့် ဧပြီလတွင် နွေနှမ်းများ ဈေးကွက်ရောက်ချိန်ဖြစ်သော်လည်း ဈေးငြိမ်နေခဲ့ပါသည်။ မေလ၊ ဇွန်လနှင့် ဇူလိုင်လတွင် မိုးနှမ်းများစိုက်ပျိုးနေချိန်ဖြစ်၍ နှမ်းနီတစ်တင်းလျှင် ၈၈၀၀၀ကျပ်၊ နှမ်းနက် တစ်တင်းလျှင် ၉၆၀၀၀ကျပ်နှင့် စမုံနက်နှမ်းတစ်တင်းလျှင် ၁၀၃၀၀၀ကျပ်ဖြင့် အရောင်းအဝယ် ဖြစ်ခဲ့ပါသည်။ ဩဂုတ်လနှင့် စက်တင်ဘာတွင် နှမ်းနီတစ်တင်းလျှင် ၁၀၆၀၀၀ကျပ်နှင့် စမုံနက်နှမ်းတစ်တင်းလျှင် ၁၁၆၀၀၀ ကျပ်ဖြင့် မိုးနှမ်းပေါ်စအချိန်တွင် ဝယ်လက်များ အဝယ်လိုက်၍ ဈေးနှုန်းမြင့်တက်လာခဲ့ပါသည်။ ယခု အောက်တိုဘာလတတိယပတ်တွင် နှမ်းနီတစ်တင်းလျှင် ၁၀၁၀၀၀ကျပ်၊ နှမ်းနက် တစ်တင်းလျှင် ၉၅၀၀၀ကျပ်နှင့် စမုံနက်နှမ်း တစ်တင်းလျှင် ၁၀၆၀၀၀ကျပ် ဖြင့် ရောင်းချကြောင်း သိရပါသည်။

  ၂၀၂၃ ခုနှစ်တွင် နှမ်းစိုက်ဧကနည်းသွားသော်လည်း အထွက်နှုန်းကောင်း၍ ဈေးကောင်းရသောကြောင့် နှမ်းစိုက်တောင်သူများ အကျိုးအမြတ်ရရှိသော အချိန်ဖြစ်ပါသည်။ နှမ်းကို အထွက်နှုန်းကောင်းသော မျိုးကောင်းများကို ရွေးချယ်၍စိုက်ပျိုးမည်ဆိုပါက ပြည်တွင်းတွင် စားသုံးဆီ ဖူလုံမည့်အပြင် နှမ်းဆီကို အဆင့်မြှင့်တင်ပြီး နိုင်ငံခြားသို့တင်ပို့မည်ဆိုပါက နိုင်ငံခြားဝင်ငွေလည်း ရရှိလာနိုင်မည်ဖြစ်ပါသည်။ ဆီစက်များအနေဖြင့်လည်း စားသုံးဆီကို အဆင့်မြှင့်တင်၍ ထုတ်လုပ်လာနိုင်ပါက အသေးစား၊ အငယ်စား၊ အလတ်စား MSMEs လုပ်ငန်းများ ဖွံ့ဖြိုးတိုးတက်လာနိုင်မှာလည်း ဖြစ်ကြောင်း ရေးသားတင်ပြလိုက်ရပါသည်။

DOCA(ပဲခူး)

   ပြည်မြို့နယ်တွင် ငါးခြောက်အမျိုးမျိုးတို့အားရောင်းချလျက်ရှိကြရာ လိုအပ်သော ငါးခြောက်များကို ရခိုင်ပြည်နယ်၊ တနင်္သာရီတိုင်းနှင့် ဧရာဝတီတိုင်းတို့မှ လက်လီ/ လက်ကား ဝယ်ယူ၍ ရောင်းချကြပါသည်။ ပြည်ဈေးကွက်တွင် ရောင်းချသော ငါးခြောက် အမျိုးမျိုး တို့၏ ဈေးနှုန်းများမှာ ငါးညှိခြောက်အသား တစ်ပိဿာလျှင် ၅၅၀၀၀ကျပ်၊ အရိုးပါအကောင်လိုက် တစ် ပိဿာလျှင် ၅၀၀၀၀ကျပ်၊ ငါးအုံးရွှေဝါခြောက် တစ်ပိဿာလျှင် ၂၂၀၀၀ကျပ်၊ အာပြဲခြောက် တစ်ပိဿာလျှင် ၃၀၀၀၀ကျပ်၊ ငါးပုတ်သင်ခြောက် တစ်ပိဿာလျှင် ၂၀၀၀၀ကျပ်၊ ငါးထရွက်ခြောက် တစ်ပိဿာလျှင် ၁၃၀၀၀ကျပ်၊ ငါးရွှေပြား (အချို)တစ်ပိဿာလျှင် ၁၅၀၀၀ကျပ်၊ ငါးမုတ်ဆိတ် ခြောက်(အချို) တစ်ပိဿာလျှင် ၁၂၀၀၀ကျပ်၊ ငါးမွေထိုးအချိုခြောက်(ရှယ်) တစ်ပိဿာလျှင် ၄၅၀၀၀ ကျပ်၊ ငါးဖမ်းမငါးဆားနယ်(အလတ်စ) တစ်ပိဿာ ၈၀၀၀ကျပ်၊ ငါးမျက်ကျယ် (အချို) ၁၇၀၀၀ကျပ်၊ ငါးရံ့လုံးခြောက် တစ်ပိဿာ ၄၉၀၀၀ကျပ်၊ ငါးရံ့ခြောက်ကြီး/ရှယ် (အချို) တစ်ပိဿာ ၈၅၀၀၀ကျပ်၊ ငါးရံ့ခြောက်(အသေး) တစ်ပိဿာ ၆၅၀၀၀ကျပ်၊ ကန့်သဘောင်း အသားမျှင်းခြောက် တစ်ပိဿာ ၃၈၀၀၀ကျပ်၊ ကက္ကူရံခြောက် တစ်ပိဿာလျှင် ၈၀၀၀၀ကျပ် ၊ ငါးကျည်းခြောက် တစ်ပိဿာလျှင် ၉၅၀၀၀ကျပ်တို့ဖြင့် ရောင်းဝယ်လျက်ရှိကြောင်း သိရပါသည်။

DOCA(ပဲခူး)

၂၆.၁၀.၂၀၂၃ ရက်နေ့တွင်  တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။