ပြည်တွင်းကုန်သွယ်မှုသတင်း

              မြန်မာလူမျိုးတို့သည် မိမိတို့အိမ်များတွင်လည်းကောင်း၊ ဘုရား ကျောင်းကန်များတွင် လည်းကောင်း ဘုရားပန်းများကို ဝေဝေဆာဆာ ကပ်လှူကြသဖြင့် သပြေစိုက်သူများ ရောင်းအား ကောင်းလျက်ရှိကြောင်း သိရပါသည်။ အိမ်ခြံဝင်းများတွင် တပိုင်တနိုင်စိုက်ပျိုးကြသူများပြီး စီးပွား ဖြစ် စိုက်ပျိုးသူများလည်းရှိပါသည်။

              သပြေပင်သည် စိုက်ပျိုးရလွယ်ကူပြီး ထိန်းသိမ်းရသည့်စရိတ်စကသည်လည်း အနည်းဆုံး ဖြစ်ပါသည်။ ဘုရားပန်းအိုး၊ နတ်ပန်းအိုးများတွင် အောင်သပြေညွန့်အဖြစ် အသုံးပြုကြသည့်အတွက် ရောင်းအားကောင်းကြောင်း သိရပါသည်။

              သပြေပန်း ၁၀ ညွန့်ပါ တစ်စည်းလျှင် ယခင်က ၄၀၀ ကျပ်ရောင်းချရမှ ယခုအခါတွင် တစ်စည်းလျှင် ၅၀၀ ကျပ်ဖြင့်ရောင်းချသဖြင့် ဈေးနှုန်း ၁၀၀ ကျပ် တက်သွားပါသည်။ ဘုရားကပ်လှူ ရာတွင် အခြားပန်းများနှင့်မတူ တမူထူးခြား သပ္ပာယ်သည့်အတွက် လူကြိုက်များ၍ ရောင်းအား ကောင်းကြောင်း ညောင်ပင်ဈေးရှိ ဘုရားပန်းအရောင်းဆိုင်များမှ သိရပါသည်။

DOCA(ပဲခူး)

          ပဲခူးတိုင်းဒေသကြီး၊ နတ်တလင်းမြို့နယ်အတွင်းရှိ ကျေးရွာအချို့တွင် ကွမ်းကိုစီးပွားဖြစ် တစ်ပိုင်တစ်နိုင်စိုက်ပျိုးလျက်ရှိရာ ကွမ်းစိုက်သူများအနေဖြင့် ကွမ်းခြံစိုက်မည့်နေရာကို နွားချေး၊ မြေဆွေးများထည့်ကာ မြေပြုပြင်ပေးရသည်။ အမြင့်(၄)လက်မနှင့် အကျယ်(၂)ပေရှိဘောင်များ ပြုလုပ်ပေးရသည်။ ကွမ်းခြံတစ်ပိုင်တစ်နိုင်စိုက်သူများအနေဖြင့် ပေါက်ပြားဖြင့်ကွမ်းဘောင်များ ပြု လုပ်ပေးရသည်။ ကွမ်းခြံဆောက်လုပ်ရာတွင် ဝါးလုံးအကြီးများကိုတိုင်အဖြစ်အသုံးပြုပြီး ကွမ်းစိုက် တိုင်များကိုလည်း ဝါးလုံးအသေးများဖြင့်လည်းကောင်း ၊ ဝါးလုံးအကြီးများကို ခြမ်း၍လည်းကောင်း စိုက်ပျိုးကြသည်။ ကွမ်းခြံစင်ကိုလည်း အမြင့်(၇)ပေ (၈)ပေအထိဆောက်လုပ်ကြကြောင်း၊ နေပူဒဏ် မှကာကွယ်ပေးရန် အမိုးအကာများကို အုန်းလက်၊အမိုးအစိမ်း၊ အမိုးအမည်းများ အသုံးပြုရကြောင်း နှင့် ကွမ်းအမျိုးအစားများမှာ ကွမ်းနုဝါနှင့် ကွမ်းစိမ်းဟူ၍ (၂)မျိုးရှိသော်လည်း ကွမ်းနုဝါကိုအများဆုံး အသုံးပြုကြောင်း သိရပါသည်။

          ကွမ်းညွှန့်များကိုမိမိတို့နှစ်သက်ရာခြံမှ မျိူးဝယ်ယူကာ စိုက်ပျိုး‌လေ့ရှိကြသည်။ ကွမ်းနုဝါတစ် ညွှန့်လျှင် လက်ကားစျေး (၅၀၀)ကျပ်ခန့်ဖြင့် ဝယ်ယူကာ စိုက်ပျိုးကြရသည်။ ကွမ်းဘောင်အပေါ်ရှိ မြောင်းအရှည်အတွင်း၌ နှစ်ဆစ်မြုပ်ထည့်ကာ မြေဖုံး၍စိုက်ပျိုးပေးရကြောင်း၊ ကွမ်းညွှန့်အဖျား ပိုင်းကို ခပ်ကွေးကွေးအနေအထားဖြင့် ကွမ်းတိုင်တွင်ကွမ်းညွှန့်များ ထောင်မတ်နေသည့်ပုံစံဖြင့် ချည်ပေးရသည်။ ကွမ်းညွှန့်များကို စိုက်နည်းကွာခြားသော်လည်း တစ်ပင်နှင့်တစ်ပင်ကွာခြားချက်မှာ တစ်ပေခန့်သာရှိကြောင်း၊ ကွမ်းပင်များရေလောင်းရာတွင် ရေဖျန်းပုံးဖြင့်ဖျန်းလေ့ရှိသည်။ ကွမ်း စိုက်ပျိုးပြီး(၄)အကြာတွင် စတင်ခူးဆွတ်နိုင်ပါသည်။ မိုးရာသီနှင့်ဆောင်းရာသီတွင် (၁၀)ရက် တစ်ကြိမ်ခူးရသော်လည်း နွေရာသီတွင် ရာသီဥတုအပူဒဏ်ကြောင့် (၁၅)ရက်ကို တစ်ကြိမ်သာ ခူးရပါသည်။ ကွမ်းခူးပြီးလျှင် (၁၅)ပတ်လည်ကွန်ပေါင်းဓာတ်မြေဩဇာနှင့် မှိုဆေးများကို ဖျန်းပေး ရသည်။ မြေအနေအထားပေါ်မူတည်၍ ၃နှစ်မှ၅နှစ်အထိထားလေ့ရှိကြောင်း သိရပါသည်။ စိုက်ပျိုး ကုန်ကျစရိတ်အနေဖြင့် ကွမ်းခြံတစ်ပိုင်တစ်နိုင်စိုက်သူများအနေဖြင့် ကွမ်းတိုင်(၅၀၀)စိုက်လျှင် စုစုပေါင်းကုန်ကျစရိတ်မှာ ငွေကျပ်(၈)သိန်းခန့်ကုန်ကျကြောင်း ကွမ်းစိုက်တောင်သူများထံမှ သိရှိရပါသည်။ ကွမ်းနုဝါစျေးနှုန်းများမှာနိုဝင်ဘာလပထမအပတ်တွင်(၁၀၀၀၀)ကျပ်အထိရှိပြီး နိုဝင် ဘာလဒုတိယအပတ်တွင် (၁၂၀၀၀)ကျပ်အထိ စျေးနှုန်းမြင့်တက်လာကြောင်းသိရပါသည်။ မိုးရာသီ တွင်ကွမ်းအထွက်နှုန်း တိုးသော်လည်း မိုးများလျှင် ရောဂါပိုးကျရောက်လာသည့်အတွက် အထူး ဂရုစိုက်ရပါ‌ကြောင်း ဆောင်းရာသီနှင့်နွေရာသီတွင် အထွက်နှုန်းနည်းသွားသည့်အတွက် စျေးနှုန်းမြင့် တက်လာကြောင်း ကွမ်းစိုက်တောင်သူများထံမှ သိရှိရပါသည်။

DOCA(ပဲခူး)

        ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်၏ ထုတ်ကုန်များထဲမှ တစ်ခုအပါအဝင်ဖြစ်သော ဒေါ်လာမြေပဲဆီသည် အနံ့အရသာနှင့်ပြည့်စုံပြီး လူကြိုက်များလှသည့် ဆီအမျိုးအစားတစ်ခုဖြစ် သည်။ ဒေါ်လာမြေပဲဆီကို ပြည်မြို့၊ ဗိုလ်ချုပ်လမ်း၊ မြို့တော်ခန်းမရှေ့တွင် ထုတ်လုပ် ရောင်းချလျက်ရှိပါသည်။ ပြည်မြို့တွင် လူကြိုက်များပြီး ဈေးနှုန်းလည်းအသင့်အတင့်ဖြစ်ကာ ရောင်းအားကောင်းသော Brand တစ်ခုလည်းဖြစ်ပါသည်။ ဒေါ်လာဆီသည် ၁၀၀% ဆီသန့်ဖြစ်ပြီး မည်သည့်အရောအနှောမှ မပါဝင်ကြောင်းသိရသည်။ ဈေးနှုန်းများအနေဖြင့် တစ်ပိဿာလျှင် (၁၆၀၀၀)ကျပ်၊ (၅)ပိဿာဘူး၊ အချိန်(၁၀)ဘူးများဖြင့် ရောင်းချပေးလျက်ရှိကြောင်းသိရသည်။

DOCA(ပဲခူး)

        ရှမ်းပြည်အောင်ပန်းမှ ပြည်ပွဲရုံများသို့ အရည်အသွေးကောင်းသောအာလူးများ ဆက်တိုက် ဝင်ရောက်လျက်ရှိပါသည်။ အာလူးအိတ်များမှာ ကြီး၊ လတ်၊ သေး အလိုက်ဝင်ရောက်ပြီး အလုံးလှ ကာ အရည်အသွေးကောင်းသောကြောင့် အာလူးအရောင်းအဝယ်သွက်နေ ကြောင်းသိရပါသည်။ အာလူးနှင့်ပတ်သက်သော အကြော်နှင့်မုန့်လုပ်ငန်းအရောင်းအဝယ်သမားတို့ အများဆုံးဝယ်ယူနေပြီး လက်လီဈေးများတွင်လည်း အရောင်းအဝယ်ကောင်းနေတာတွေ့ရပါသည်။ ပြည်ဈေးကွက် တွင်ရောင်းချသော အာလူးဈေးနှုန်းများမှာ (ပွဲရုံဈေး) တစ်ပိဿာလျှင် (၅၅၀၀-၆၅၀၀)ကျပ် ဈေးဖြစ်ပြီး၊ လက်လီဈေးမှာ (၈၀၀၀-၁၀၀၀၀)ကျပ်ဈေးတို့ဖြင့် ရောင်းဝယ်လျက်ရှိနေပါသည်။ ဈေးနှုန်းလည်းသင့်ပြီး၊ အမျိုးအစားကောင်းအာလူးများဖြစ်သောကြောင့် ပွဲရုံများတွင်အာလူး အရောင်းအဝယ်များကောင်းကြောင်း သိရှိရပါသည်။

DOCA(ပဲခူး)

ပဲခူးတိုင်းဒေသကြီး၊ပြည်ခရိုင်၊ မှော်ဇာကျေးရွာတွင်အုပ်စုတွင် ကျေးရွာခွဲ (၁၅)ရွာရှိပြီး ဟင်းသီးဟင်းရွက်စိုက်ပျိုးထုတ်လုပ်သည့်ကျေးရွာ (၅)ရွာရှိရာ ရာသီအလိုက်ဟင်းသီးဟင်းရွက်များ အပြင် မုန်လာဥ၊ ကြက်သွန်နီ၊ သခွားသီး၊ ပြောင်းဖူးနှင့်ဒေါနပန်း များကိုလည်း စိုက်ပျိုးထား ကြောင်းသိရှိ ရပါသည်။ စိုက်ပျိုးထွက်ရှိသည့် ရာသီအလိုက်ဟင်းသီးဟင်းရွက်များကို မှော်ဇာအုပ်စုရှိ ဟင်းသီးဟင်းရွက်အဝယ်ဒိုင် (၆)ခုသို့ သွားရောက်ရောင်းချကြပါသည်။ ဟင်းသီးဟင်းရွက် အဝယ်ဒိုင်များ မှာဟင်းသီးဟင်းရွက်စိုက်ပျိုးသောတောင်သူများထံမှ အခင်းပြတ် ဝယ်ယူခြင်း ဖြင့်လည်းကောင်း၊ မျိုး၊ စိုက်စရိတ်ကြိုတင်ငွေပေးခြင်းဖြင့်လည်းကောင်း၊ ပွဲစားများထံမှ လည်းကောင်း ဒိုင်အရောက် လာ‌ရောင်းချကြသည့် တောင်သူများထံမှလည်းကောင်း သီးနှံ ပေါက်ဈေး အလိုက်ဝယ်ယူ၍ သီရိမင်္ဂလာဈေးနှင့် ဒညင်းကုန်းဈေးများသို့ တင်ပို့ရောင်းချ ကြောင်းသိရှိရပါသည်။

ဈေးနှုန်းဈေးကွက်အနေဖြင့် ဟင်းသီးဟင်းရွက်ဈေးနှုန်းများမှာ မုန်လာဥ(၅)လုံးပါ တစ်တွဲလျှင် (၅၀၀)ကျပ်၊ ပြောင်းဖူးတစ်ဖူးလျှင် (၄၀၀-၅၀၀)ကျပ်၊ သခွားသီးတစ်လုံးလျှင် (၂၀၀)ကျပ်ဖြင့် ရောင်းချလျှက်ရှိပါသည်။

DOCA(ပဲခူး)