ပြည်တွင်းကုန်သွယ်မှုသတင်း

        ပြည်ခရိုင်၊ ပေါက်ခေါင်းမြို့နယ်တွင် အုန်းသီးများအရာင်းသွက်လျက်ရှိပါသည်။ ပေါက်ခေါင်းမြို့နယ်တွင် လာရောက်ရောင်းချသော အုန်းသီးများမှာ ပေါက်ခေါင်းမြို့နယ်ရှိ ရေဦးရွာမှ ထွက်ရှိသော အုန်းသီးများဖြစ်ပြီး အခြားခရိုင်ဖြစ်သော နတ်တလင်းခရိုင်၊ ဆင်မြီးဆွဲ၊ သဲကုန်းမြို့နယ်များမှဝယ်ယူ၍လည်း တစ်ဆင့်ပြန်လည်ရောင်းချကြောင်းသိရှိရပါသည်။ ယခုအချိန် ကာလသည် ဝါလကင်းလွတ်၍ ဘာသာရေးပွဲ၊ နတ်ပွဲနှင့် သာသနာရေးပွဲများပြုလုပ်ချိန်ဖြစ်၍ အုန်းသီးများ အရောင်းသွက်နေပြီး ဈေးကောင်းလည်းရရှိလျက်ရှိပါသည်။ ပေါက်ခေါင်းမြို့ရှိ ဈေးကွက်များတွင်ရောင်းချသော အုန်းသီးဈေးနှုန်းများအနေဖြင့် လက်ကားဈေးနှုန်းမှာ အုန်းသီးအကြီး (အချော) တစ်လုံးလျှင် ၄၅၀၀ကျပ်နှင့် အသေးတစ်လုံးလျှင် ၃၅၀၀ကျပဖြစ်ပြီး လက်လီဈေးနှုန်း များမှာ အကြီး (အချော) တစ်လုံးလျှင် ၅၀၀၀ကျပ်နှင့် အသေးတစ်လုံးလျှင် ၄၀၀၀ကျပ်ဖြင့်ရောင်းချလျက်ရှိပါသည်။ သို့ဖြစ်ပါ၍ ယခုအချိန်သည် အုန်းသီးအပင်ပိုင်ရှင်များနှင့် တစ်ဆင့်ပြန်လည်ရောင်းချသူများပါ တွက်ချေကိုက်လျက်ရှိကြောင်း ဈေးသည်တစ်ဦးထံမှသိရှိရပါသည်။

DOCA(ပဲခူး)

         တောင်ငူခရိုင် အုတ်တွင်းမြို့နယ်တွင် ယခုနှစ် မိုးစပါး ၈၉၁၀၀ဧကစိုက်ပျိုးထားရာ ယခုအခါ ရိတ်သိမ်းနေပြီဖြစ်ပါသည်။ အများဆုံးစိုက်ပျိုးသော စပါးအမျိုးအစားများမှာ ထိုင်းနှံ ကောက်၊ ဆင်းသုခ၊ မနောသုခ၊ GW 11 နှင့် ဗျော့ထွန်းစပါးများဖြစ်ပါသည်။ ၁၆၅၄၀ဧကရိတ်သိမ်းပြီးစီးချိန် တွက်ချက်မှုအရ အထွက်နှုန်း ၉၈.၃၂ ရှိကြောင်း သက်ဆိုင်ရာဌာနမှ သိရပါသည်။

            ဒေသဓလေ့အရ စပါးတစ်တင်းကို ၁၅ပိဿာဖြင့်ဝယ်ယူလျက်ရှိရာ စပါးအမျိုးအစားပေါ် မူတည်၍ ကွင်းဈေး တင်း၁၀၀လျှင် ၁၈၀၀၀၀၀ကျပ်မှ ၁၉၂၀၀၀၀ကျပ်အထိရှိပြီး မြို့ပေါ်ရှိ  ဆန်စက်အရောက်ဈေးမှာ ၁၉၀၀၀၀၀ကျပ်မှ ၂၀၀၀၀၀၀ကျပ်အထိရှိပါသည်။ ၁၅ပိဿာသည် ၅၄ပေါင်ရှိရာ ၄၆ပေါင်ဖြင့်တွက်ချက်ပါက စပါးတင်း၁၀၀လျှင် ကွင်းဈေး ၁၅၃၀၀၀၀ကျပ်မှ ၁၆၃၅၀၀၀ကျပ်အထိ၊ စက်ရုံအရောက်ဈေး  တင်း၁၀၀လျှင် ၁၆၂၀၀၀၀ကျပ်မှ ၁၇၀၀၀၀၀ကျပ်အထိရှိပါသည်။

          တောင်သူလယ်သမားအများစုမှာ ကွင်းထဲအရောက် လာရောက်ဝယ်ယူသည့် စပါးပွဲစားများသို့ရောင်းချပေးကြပြီး တောင်သူလယ်သမားတချို့မှာ စက်ရုံအရောက်သယ်ယူ၍ ကြိတ်ခွဲပြီး ထွက်ရှိသည့်ဆန်နှင့်ဆန်ထွက်ပစ္စည်းကို ပြန်လည်ရောင်းချကြပါသည်။ စက်ရုံအရောက်သယ်ယူ၍ ကြိတ်ခွဲထွက်ရှိသော ဆန်နှင့်ဆန်ထွက်ပစ္စည်းများကို ပြန်လည်ရောင်းချခြင်းသည် ကွင်းထဲတွင်ရောင်းချခြင်းထက် အကျိုးအမြတ်အနည်းငယ်ပိုကြောင်း တောင်သူလယ်သမားတစ်ဦးထံမှသိရပါသည်။

DOCA(ပဲခူး)

        ဖြူးမြို့တွင် ရှမ်းပြည်နယ်(တောင်ပိုင်း)၊ အင်းလေးဒေသမှဝင်ရောက်လာသော ခရမ်းချဉ်သီးများမှာ အဆမတန် ဈေးမြင့်တက်လျက်ရှိပါသည်။ ယခင်နှစ်က ခရမ်းချဉ်သီးများမှာ ဈေးနှုန်းအသင့်အတင့်သာရှိခဲ့ပါသည်။

           ယခုနှစ် ခရမ်းချဉ်သီးဈေးနှုန်းမှာ နိုဝင်ဘာလ ပထမပတ်တွင် ၄၀၀၀ကျပ်မှ ၅၀၀၀ကျပ်အထိရှိခဲ့ရာမှ ယခုအပတ်တွင် တစ်ပိဿာလျှင် ၉၀၀၀ကျပ်မှ ၁၀၀၀၀ကျပ်အထိမြင့်တက်ခဲ့ပါသည်။

         ယခုနှစ်တွင် ရေကြီးရေလျှံမှုဖြစ်ပြီး လမ်းပန်းဆက်သွယ်ရေးအခက်အခဲများကြောင့် ဈေးနှုန်းမြင့်တက်ရကြောင်း၊ အညာဒေသမှ တိုင်ထောင်ခရမ်းချဉ်သီးများနှင့် ဒေသခရမ်းချဉ်သီးများပေါ်လာပါက ဈေးနှုန်းကျဆင်းနိုင်ကြောင်း ခရမ်းချဉ်သီးရောင်းချသူများထံမှသိရပါသည်။

DOCA(ပဲခူး)

              ပြည်ခရိုင်၊ ရွှေတောင်မြို့နယ်၊ ဝါးတောအုပ်စု၊ ဖားအိုင့်ရွာရှိ တောင်သူဒေါ်နွယ်နွယ်ဝင်း၏ ပင်ဆိုင်စိုက်ခင်းသို့ (၁၃.၁၁.၂၀၂၄)ရက်နေ့ နံနက်(၁၀:၃၀)နာရီအချိန်တွင် သွားရောက်လေ့လာခဲ့ရာ ပင်ဆိုင်ပင်များကို သီတင်းကျွတ်လတွင် စိုက်ပျိုးပြီး တစ်လကြာလျှင် ပင်ဆိုင်ပင်များကိုနုတ်ယူ ရောင်းချ၍ရပါသည်။ ပင်ဆိုင်ပင်ကို တစ်ပင်နှင့်တစ်ပင် ၁ပေ အကွာတွင် စိုက်ပျိုးပြီး မြောင်း(၁၀)မြောင်းတူး၍ မြောင်း(၁၀)မြောင်းကို မျိုးစေ့ ၁ထုပ် ဖြင့်စိုက်ပျိုးရပါသည်။ ပင်ဆိုင်ပင်များ တစ်လလုံးအတွက် အစာကို ၂ပြည် အနည်းဆုံးကျွေးရပြီး ပင်ဆိုင်အပင်မှာ အားကောင်းလျှင် အပင် ရေ(၅၀၀၀)ထွက်ရှိပါသည်။ ပင်ဆိုင်ပင်များကို နှုတ်ယူရောင်းချချိန်တွင် တစ်နေ့လျှင် အပင်ရေ၁၀၀ပင်မှ အပင်ရေ ၁၅၀ အထိနုတ်လို့ရရှိကြောင်း သိရပါသည်။ ပင်ဆိုင်ပင်များကို ဒိုင်များမှ အပင်အကြီးအသေးကို တစ်ပင်လျှင် ၁၅၀ ကျပ် နှုန်းဖြင့် လာရောက်ဝယ်ယူကြောင်း သိရှိရပါသည်။ ကုန်စိမ်းဒိုင်များမှတစ်ဆင့် လက်လီပြန်လည်ရောင်းဈေးမှာ ပင်ဆိုင် တစ်ပင်ကို ၂၀၀-၃၀၀ ကျပ်ဖြင့် ရောင်းချကြပါသည်။ ပင်ဆိုင်မျိုးစေ့ တစ်ထုပ်စိုက်ပျိုးခြင်း၏ ကုန်ကျစရိတ်မှာ ၅၀၀၀၀ ကျပ်ခန့်ကုန်ကျပြီး တစ်နေ့ကို အနည်း ဆုံးအပင်ရေ (၁၀၀)ထွက်ပါက တစ်နေ့ဝင်ငွေမှာ ၂၀၀၀၀ ကျပ်ရရှိသောကြောင့် တစ်လကြာစိုက်ပျိုး ရသော အပင်ဖြစ်ပြီး အကျိုးအမြတ်များများရရှိကြောင်း သိရှိရပါသည်။

DOCA(ပဲခူး)

        ခဝဲပင်သည် နေရာမရွေး၊ ဒေသမရွေး စိုက်ပျိုးနိုင်သော အပင်တစ်မျိုးဖြစ်သည်။ ခဝဲပင်သည် အပင်ရှည်နွယ်တစ်မျိုးဖြစ်ပြီး မိုးဒဏ်ခံနိုင်အောင် စင်တင်စနစ်၊ ဝါးတန်းထိုးစနစ်ဖြင့် စိုက်ပျိုးကြသည်။ ယခုအခါတွင် ခဝဲပင်များကို ရာသီမရွေးစိုက်ပျိုးကြပြီး ဈေးကွက်အတွင်း ရောင်းချလျက်ရှိသည်။ ခဝဲသီးကို စားသုံးခြင်းအားဖြင့် သွေးအားနည်းခြင်းကိုကာကွယ်ပေးခြင်း၊ နှလုံးကျန်းမာစေခြင်း၊ ကိုယ်အလေးချိန်ထိန်းသိမ်းပေးခြင်းနှင့် ကင်ဆာဖြစ်နှုန်းကိုလျှော့ချပေးခြင်း စသည့် ကောင်း ကျိုးများစွာကိုပေးစွမ်းနိုင်ပါသည်။ မြန်မာတို့သည် ခဝဲသီးကို ဟင်းချက်၍သော်လည်းကောင်း၊ ခဝဲသီးကိုပြုတ်ပြီး အတို့အမြှုပ်အဖြစ်ပြုလုပ်၍ ငါးပိရည်နှင့်တွဲဖက်၍ စားသုံးကြပါသည်။ နိုဝင်ဘာလ တတိယပတ်တွင် ကန့်ဘလူမြို့၊ မြို့မဈေးအတွင်း ဖြစ်ပေါ်နေသော ခဝဲသီးဈေးနှုန်းမှာ (၂၅)ကျပ်သားလျှင် (၁၀၀၀)ကျပ်၊ တစ်ပိဿာလျှင် (၄၀၀၀)ကျပ်၊ တချို့မှာ အတောင့်သေးတစ်တောင့်လျှင် (၅၀၀)ကျပ်နှင့် အတောင့်ကြီးတစ်တောင့်လျှင် (၁၀၀၀)ကျပ်ဖြင့်အရောင်းအဝယ်ဖြစ်လျက်ရှိကြောင်း ဈေးအတွင်း ဟင်းသီးဟင်းရွက်ရောင်းချနေသူများထံမှ သတင်းရရှိပါသည်။

DOCA(စစ်ကိုင်း)