ပြည်တွင်းကုန်သွယ်မှုသတင်း

"အသီးမှာ သရက်၊ အသားမှာ ဝက်၊ အရွက်မှာ လက်ဖက်" ဟူ၍အဆိုရှိသကဲ့သို့ ငါးတွင်လည်း "မယားမှာ ဆံတောက်၊ ငါးမှာ ငါးသလောက်" ဟူ၍ စာချိုးရှိကြပါသည်။ ငါးသလောက်ငါးမှာ ရေပေါ် ရေလွှာနေ ငါးများဖြစ်ကြသည်။ ရေချို၊ ရေငန်နှစ်မျိုးစလုံးတွင် နေထိုင်ကြပြီး ငါးသလောက်မျိုးစိတ်အားလုံးသည် ရာသီဥတုအလိုက် နေရာဒေသပြောင်းရွှေ့ကျက်စားသော သဘာဝရှိပြီး နေရာမရွေး၊ အချိန်မရွေး သားပေါက်ဖွားလေ့ရှိပါသည်။ မိုးတွင်းအခါ၌ ဥဥရန် ပင်လယ်မှ မြစ်ထဲသို့ ဆန်တက်လာလေ့ရှိသည်။ ဥပြီးသော ငါးသလောက်သည် ကြုံလှီသွားကာ အရသာပျက်သွားတတ်ပါသည်။ ငါးသလောက်၏ ကိုယ်သည် ပြား၍ ဗြက်အနည်းငယ်ကျယ်သည်။ ကျောဆူးတောင်အထက်နားသည် အလယ်၌ ခွက်နေသည်။ အမြီးခွသည် စောက်နက်၍ အဖျားနှစ်ခုသည် ဘေးသို့ ကားထွက်နေသည်။ အကြေးများသည် ခေါင်းမှအမြီးတိုင်အောင် ညီညီညာညာရှိကြသည်။ အရောင်မှာ ရွှေရောင်သန်းလျက်ရှိ၍ တစ်ခါတစ်ရံ ကန့်လန့်အမည်းစင်းများထင်နေတတ်သည်။ အထူးသဖြင့် ငါးသလောက်ငယ်များတွင် ကျောပိုင်း၌ ကန့်လန့်အမည်းစင်းများပါလေ့ရှိသည်။ ကိုယ်ရှည် ၁ပေမှ ၁ပေအထိရှိတတ်သည်။ ငါးသလောက်သက်တမ်းမှာ (၁-၃) နှစ်ဖြစ်ပါသည်။ ငါးသလောက်အမမှာ ဥပေါင်း (၃) သိန်းမှ (၁) သန်းထိဥဥနိုင်ကြပါသည်။ မျှောပိုက်ဖြင့် အဓိကဖမ်းဆီးကြပါသည်။ ပြည်ပပို့ကုန်အဖြစ် နာမည်ကြီးပြီး တန်ဖိုးမြင့်ငါးဖြစ်ပါသည်။ ငါးသလောက်များမှာ ကမ်းရိုးတန်းတစ်လျှောက်တွင် အုပ်စုဖွဲ့ကာနေထိုင်ကျက်စားသကဲ့သို့ မြစ်အထက်ပိုင်းသို့လည်း ဆန်တက်နိုင်ကြသည်။ အသားမှာနူးညံ့ပြီး အနံ့အရသာမှာ ထူးခြားကောင်းမွန်လှပါသည်။ ငါးသလောက်ငါးကို အရိုးနူးပေါင်းစားခြင်း၊ ငါးသလောက်ကင်၊ ငါးသလောက်ကြော်၊ ငါးသလောက်အစပ်ဟင်း၊ ငါးသလောက်သုပ် စသည်ဖြင့် ပြုလုပ်၍စားသုံးကြသည်။ ပြည်မြို့မ စည်ပင်သာယာဈေးကြီးနှင့် အခြားဈေးများတွင် ငါးသလောက်အကောင်လိုက်၍ အကောင်လုံးလိုက် ဈေးနှုန်းသတ်မှတ်ကြပြီး ၁ပိဿာအကောင်လောက်ရှိသော ငါးသလောက်ဈေးမှာ ကျပ်၅ဝဝဝဝိ၊ ၅၀ကျပ်သားခန့်ရှိသော ငါးသလောက်ဈေးမှာ ကျပ်၄၅ဝဝဝ၊ ၂၅ကျပ်သားခန့်ရှိသော ငါးသလောက်ဈေးမှာ ကျပ်၃၅ဝဝဝမှ ကျပ်၃ဝဝဝအထိရှိပြီး ဈေးကောင်းရကာ အရောင်းအဝယ်ကောင်းကြောင်းသိရှိရပါသည်။
DOCA(ပဲခူး)

ကျွဲကောသီးများသည် ယခုအောက်တိုဘာလအတွင်း အရောင်းအဝယ်ဖြစ်၍ ဈေးကောင်းရရှိနေပါသည်။ ဈေးကောင်းရရှိသည့်အကြောင်းမှာ သီတင်းကျွတ်ကာလတွင် လူကြီးသူမများအား လက်ဆောင်ပေးခြင်း၊ ဘုရားများတွင် ဆွမ်းတော်ကြီးကပ်လှူခြင်းများပြုလုပ်ကြသည့်အတွက်ကြောင့်ပင် ဈေးကွက်အတွင်း ကျွဲကောသီးများ အရောင်းအဝယ်ဖြစ်နေပါသည်။ ခြံသမားများက ကျွဲကောသီးများကို တစ်နိုင်တစ်ပိုင်စီးပွားရေးအဖြစ်သာစိုက်ပျိုးကြပါသည်။ အောက်တိုဘာလတွင် ကျွဲကောသီး အများဆုံးထွက်ရှိပါသည်။ အောက်တိုဘာလတွင် ရောင်းချသောကျွဲကောသီးဈေးနှုန်းများမှာ ပန်းရောင်သီးအလုံးကြီးတစ်လုံးလျှင် (၂၅၀၀)ကျပ်၊ အဝါရောင်အလုံးကြီးတစ်လုံးလျှင် (၂၀၀၀) ကျပ်နှုန်းရရှိပါသည်။ ကျွဲကောသီးများကို နေရာဒေသအလိုက် အများအပြားစိုက်ပျိုးကြပြီး ရွှေတောင်မြို့နယ်အတွင်းရှိ ဒေသများဖြစ်သော တောင်လုံးညိုရွာတွင်လည်းစိုက်ပျိုးကြပါသည်။ ကျွဲကောသီးများကို ရန်ကုန်မြို့သို့ ကုန်စည်ဒိုင်များမှတစ်ဆင့် တင်ပို့လျက်ရှိကြောင်းသိရပါသည်။
DOCA(ပဲခူး)

နနွင်းမှုန့်ကို ဟင်းခတ်မှုန့်အဖြစ် လူအများသိကြသည်။ မြန်မာ့ရိုးရာဟင်းလျာများတွင် နနွင်းမှုန့်သည် မပါမဖြစ်သော ဟင်းခတ်မှုန့်ဖြစ်သည်။ နနွင်းပင်မှ နနွင်းဥ (အရပ်အခေါ် နနွင်းတက်) ကို ရေစင်အောင်ဆေး၍ ခြောက်သွေ့အောင်နေလှန်းပြီး အမှုန့်ကြိတ်ရပါသည်။ နနွင်းသည် ဆေးဖက်ဝင်သည့်အပင်ဖြစ်ပါသည်။
နနွင်းကို လူအများသိသော်လည်း နနွင်းဖူးကိုမူ သိသူနည်းပါသည်။ ယခုအချိန်သည် နနွင်းပွင့်သည့်အချိန်ဖြစ်ပါသည်။ နနွင်းဖူးပြီးမှသာ နနွင်းပင်ခြောက်ပြီး နနွင်းဥကိုတူးဖော်ရပါသည်။ နနွင်းဖူးသည် အဖြူရောင်ဖြစ်ပြီး စားလို့ရသည့် အပွင့်တစ်မျိုးဖြစ်ပါသည်။ နနွင်းစိုက်သည့် အရပ်ဒေသများတွင် နနွင်းဖူးကိုကြိုက်နှစ်သက်ကြပါသည်။
တောင်ငူမြို့ အနီးဝန်းကျင်ကျေးရွာများရှိ တစ်နိုင်တစ်ပိုင် နနွင်းစိုက်ခင်းများမှ နနွင်းဖူးများကို ညောင်ပင်ဈေးတွင် လာရောက်ရောင်းချလျက်ရှိရာ အဖူး(၃)ဖူးပါ တစ်စည်းလျှင် ၂၅၀ကျပ်၊ ၁၀စည်းယူလျှင် ၂၂၀၀ကျပ်ဖြင့်ရောင်းချလျက်ရှိကြောင်း ညောင်ပင်ဈေးရှိ ဟင်းသီးဟင်းရွက်အရောင်းဆိုင်များမှသိရပါသည်။
DOCA(ပဲခူး)

               မန္တလေးမြို့အတွင်းသို့ မြေပဲထွက်ရှိရာဒေသများဖြစ်သည့် ကျောက်ဆည်မြို့နယ်၊ စဉ့်ကိုင်မြို့နယ်နှင့် မြစ်သားမြို့နယ်မှ ရာသီပေါ်မြေပဲများ ဝင်ရောက်လျက်ရှိပါသည်။ (၆)ဘီးကား (၂)စီးမှ (၃)စီးခန့် ပွဲရုံများသို့ နေ့စဉ်ဝင်ရောက်လျက်ရှိပြီး မြေပဲများကိုပွဲရုံများမှတဆင့် လက်လီဆိုင်များသို့ ပြန်လည်ဖြန့်ဖြူးရောင်းချကြကြောင်း သိရှိရသည်။ မြေပဲများကို အမျိုးမျိုးအသုံးပြု၍ရပြီး မြေပဲတောင့်ကို ပြုတ်စား၍သော်လည်းကောင်း၊ မြေပဲလှော်အဖြစ်လည်းကောင်း၊ မြေပဲအဆံကို ဆီကြိတ်၍သော်လည်းကောင်း၊ ကြော်စား၍သော်လည်းကောင်း၊ မြေပဲယိုအဖြစ်လည်းကောင်း၊ မြေပဲကြိတ်ဖက်ကို တိရိစ္ဆာန်အစားအစာအဖြစ်လည်းကောင်း အသုံးပြုလျှက်ရှိကြသည်။ ယခင်နှစ် မြေပဲဈေးနှုန်း အနေဖြင့် မြေပဲအတောင့်တစ်ပြည်လျှင် (၁၆၀၀)ကျပ်၊ တစ်တင်းလျှင် (၂၅၀၀၀)ကျပ်၊ မြေပဲအဆံ တစ်ပိဿာလျှင်(၅၈၀၀-၆၀၀၀)ကျပ်၊ မြေပဲဆီတစ်ပိဿာလျှင်(၁၁၀၀၀-၁၂၀၀၀)ကျပ်၊ ယခုနှစ် မြေပဲ ဈေးနှုန်းအနေဖြင့် မြေပဲအတောင့်တစ်ပြည်လျှင် (၃၅၀၀)ကျပ်၊ တစ်တင်းလျှင် (၅၆၀၀၀)ကျပ်၊ မြေပဲအဆံတစ်ပိဿာလျှင်(၈၀၀၀)ကျပ်၊ မြေပဲဆီတစ်ပိဿာလျှင်(၁၈၀၀၀)ကျပ်ဖြင့် အရောင်းဝယ်ဖြစ် လျှက်ရှိကြောင်းသိရသည်။ ယခုနှစ်သည် ယခင်နှစ်ကထက် ဈေးနှုန်းပိုရရှိကြောင်း မြေပဲအဆံများကို ပွဲရုံများမှတဆင့် အခြားမြို့များသို့လည်း တင်ပို့ရောင်းချသည့်အပြင် ပြည်ပနိုင်ငံများသို့လည်း တင်ပို့ရောင်းချကြောင်း မြေပဲစိုက်ပျိုးရောင်းချသူများထံမှ သိရှိရပါသည်။

DOCA(မန္တေလေး)

မန္တလေးမြို့အတွင်းသို့ အောက်တိုဘာလအတွင်း ပြောင်းဖူးထွက်ရှိရာဒေသများဖြစ်ကြသည့် ပြင်ဦးလွင်မြို့နယ်၊ ကျောက်ဆည်မြို့နယ်တွင် စဉ့်ကိုင်မြို့နယ်၊ မြစ်သားမြို့နယ်နှင့် မုံရွာဘက်မှ ပြောင်းဖူးများသည် မန္တလေးမြို့အတွင်းသို့ ဝင်ရောက်လျက်ရှိကြောင်းသိရသည်။ ပြောင်းဖူးများကို (၆)ဘီးကားများဖြင့် တစ်နေ့လျှင် (၃)စီးမှ (၅)စီးအထိ ပွဲရုံများသို့ ဝင်ရောက်လျက်ရှိပါသည်။ ပွဲရုံများမှတစ်ဆင့် ဈေးများသို့ လက်လီရောင်းချကြောင်းသိရသည်။ လူကြိုက်များသော သကြားပြောင်းနှင့် ရှမ်းပြောင်းတို့မှာ ပို၍ရောင်းအားကောင်းကြောင်း ပွဲရုံများမှသိရှိရသည်။ ပြုတ်၍ရောင်းချသည့် ပြောင်းဖူးသည်များမှာ ပြောင်းဖူးများကို အိတ်လိုက်ဝယ်ယူ၍ ရောင်းချကြပြီး တချို့မှာ ပြောင်းဖူးစိမ်းကိုမူ အကြော်စုံများနှင့် အိမ်များတွင် ဟင်းလျာအဖြစ် ချက်ပြုတ်စားသောက်ကြကြောင်း သိရသည်။ ပိုလျှံလာသည့်ပြောင်းဖူးများကို အစေ့ထုတ်၍ ပြောင်းဖူးပေါက်ပေါက်နှင့် ပြောင်းဖူးအစေ့ပြုတ်တို့ကို သားရေစာအဖြစ် ရောင်းချကြကြောင်းသိရသည်။ တစ်ဆင့်ရောင်းချသူများသည် တစ်ဖူးလျှင် (၇၀၀) ကျပ်မှ (၃)ဖူးလျှင် (၂၀၀၀)ကျပ်ဖြင့်ရောင်းချကြပြီး ပြောင်းဖူး အဖူး(၁၀၀)လျှင် အရွယ်အစားအလိုက် ၅၀၀၀၀ကျပ်မှ ၆၀၀၀၀ကျပ်အထိရောင်းချကြကြောင်းသိရသည်။ ယခုနှစ်သည် ယခင်နှစ်ထက် ဈေးပိုရရှိကြောင်းသိရပြီး ပြောင်းဖူးစေ့များကိုမူ ပြည်ပသို့တင်ပို့ရောင်းချပြီး တချို့ကို တိရိစ္ဆာန်အစားအစာများအဖြစ်ရောင်းချကြောင်း စိုက်ပျိုးရောင်းချသူထံမှသိရှိရပါသည်။
DOCA(မန္တလေး)