ပြည်တွင်းကုန်သွယ်မှုသတင်း

      ပြည်ပဲဈေးကွက်အတွင်း ပဲအားလုံးလိုလို ယခုနှစ်မှာ ဈေးကောင်းရလျက်ရှိပြီး ပဲတစ်တင်း (၉၀၀၀၀) ကျပ်အထက် ရောင်းဝယ်မှုဖြစ်ခဲ့ကြသော်လည်း ဘိုကိတ်နှင့် ပဲလွန်းဖြူသီးနှံကတော့ အဆိုပါပဲများကဲ့သို့ ဈေးကောင်းမရဘဲ တစ်တင်းကျပ်(၅၀၀၀၀)ကျော် (၆၀၀၀၀)ကျပ်ခန့်သာ ရောင်းဝယ်မှုဖြစ်ကြကြောင်း သိရပါသည်။ ဒေသတွင်း ရောင်းဝယ်မှုအဖြစ်များပြီး ယခုအခါ ပဲလက်ကျန်များအား လက်လီသမားများဖြင့်သာ ရောင်းဝယ်ခဲ့ကြပါသည်။ အဆိုပါပဲများသည် ပဲထွက်ပေါ်ချိန် အထွက်လှိုင်ချိန်များတွင်သာ လက်လီ/လက်ကား ရောင်းအားတက်သော ပဲဖြစ်ကြ ပါသည်။ ပဲလွန်းဖြူနှင့် ဘိုကိတ်ပဲသီးနှံများ၏ ယခင်နှစ်က ကာလတူအချိန် တစ်တင်းလျှင် ကျပ်(၄၀၀၀၀) အောက်သာ ရောင်းဝယ်ခဲ့ကြရသည့်အတွက် ယခုနှစ်မှာတော့ အခြားပဲများနှင့်ယှဉ်လျှင် ဈေးအေးနေသောပဲများဖြစ်သည်ဟု ဆိုသော်လည်း ပဲလွန်းဖြူတစ်တင်း (၅၈၀၀၀)ကျပ်၊ ဘိုကိတ်ပဲတစ်တင်း (၆၀၀၀၀)ကျပ်ဖြင့် ရောင်းချရကာ ယခင်နှစ်က ရရှိခဲ့သော ဈေးနှုန်းထက် ဈေးပိုရနေခဲ့ကြောင်း သိရပါသည်။

DOCA(ပဲခူး)

    ပဲခူးတိုင်း‌ဒေသကြီး၊ သာယာဝတီခရိုင်၊ ကြို့ပင်ကောက်မြို့နယ်၊ သဲကုန်းရပ်ကွက်၊ အောင်မင်္ဂလာလမ်းတွင် လုပ်ကိုင်ဆောင်ရွက်လျက်ရှိသော မိသားစုတစ်နိုင်တစ်ပိုင် မုန့်ဟင်းခါးဖတ်လုပ်ငန်းသို့ မြို့နယ်တာဝန်ခံနှင့်ဝန်ထမ်းများသည် (၂၈-၇-၂၀၂၃) ရက်နေ့တွင် သွားရောက်လေ့လာခဲ့ကြောင်းသိရှိရပါသည်။

    အဆိုပါ မုန့်ဟင်းခါးဖတ်လုပ်ငန်းကိုလုပ်ကိုင်ခဲ့သည်မှာ (၅) နှစ်ခန့်ရှိပြီဖြစ်ပြီး မိသားစု (၄) ဦးဖြင့် တစ်နိုင်တစ်ပိုင်လုပ်ကိုင်ဆောင်ရွက်လျက်ရှိကြောင်းသိရှိရပါသည်။ ပိုင်ရှင်ကိုယ်တိုင်သည် လယ်သမားတစ်ဦးဖြစ်သည့်အတွက် ကိုယ်တိုင်စိုက်ပျိုးထွက်ရှိလာသည့်စပါးများမှ ကြိတ်ခွဲရရှိလာသောဆန်များကို မုန့်ဖတ်ပြုလုပ်၍ရောင်းချခြင်းဖြစ်ကြောင်း သိရှိရပါသည်။

     မုန့်ဟင်းခါးဖတ်ပြုလုပ်ရာတွင် ဆန်ဟောင်းကိုသာအသုံးပြုရပါသည်။ ဆန်များကို တွင်းရေဖြင့် တစ်ညရေစိမ်ရပြီး တွင်းရေသည် ရေချိုဖြစ်ရမည်ဖြစ်ကြောင်းသိရှိရပါသည်။ ရေစိမ်ထားသောဆန်ကို ရေဖြင့် ၄/၅ခါလောက် အနံ့ပျောက်အောင်ဆေးပေးရပါသည်။ ပြီးလျှင် ကြိတ်ဆုံဖြင့်ကြိတ်ရပြီး ကြိတ်၍ရသောမုန့်ရေကို ပိတ်ပါးစဖြင့်ထုပ်ကာ စဉ့်အိုးပေါ်တင်၍ နှစ်နာရီအကြာစစ်ထားရပါသည်။ ရေစစ်ထားသောမုန့်များကို မုန့်စစ်ကန်ထဲသို့ ပိတ်ပါးစခံ၍ မုန့်ကိုဖြန့်ထည့်ပြီး ရေပြန်စစ်ရကြောင်းသိရှိရပါသည်။ အပေါ်ယံရေများထွက်လာပါက ထိုရေများကိုခပ်ထုတ်ရပါသည်။ မုန့်နှစ်များခဲသွားပါက မုန့်နှစ်နုလေးများကို ခြင်းတောင်းထဲသို့ထည့်ပြီး မုန့်လုံးကိုလုံးပါ။ လုံးပြီး တစ်နာရီကြာအောင် မုန့်နှဲရပါမည်။ နှဲ၍ရလာသောမုန့်ကို ဖွဲခွံမီးဖိုကိုအသုံးပြု၍ ပြုတ်ဒယ်အိုး (၂) လုံးထဲသို့ထည့်ကာ ပြုတ်ရကြောင်းသိရှိရပါသည်။ ပြုတ်ရာမှ ထွက်လာသောမုန့်လုံးများကို ပုံစံခွက်ထဲသို့ထည့်ပြီး ရေဆူဆူတွင်ညှစ်ချရပါသည်။ ထိုမှသာ မုန့်ဟင်းခါးဖတ်များရရှိမည်ဖြစ်ပါသည်။

      မုန့်ဟင်းခါးဖတ်ပြုလုပ်ရာတွင် ဆန်တစ်တင်းခွဲဝင် အိတ် (၂) အိတ်ကိုကြိတ်လျှင် မုန့်ဟင်းခါးဖတ် အချိန် (၁၀၀) ခန့်ရရှိကြောင်းသိရပါသည်။ မုန့်ဟင်းခါးဖတ်တစ်ပိဿာလျှင် လက်လီရောင်းဈေးအနေဖြင့် ၁၈၀၀ကျပ်ခန့်ရှိပြီး ပိဿာချိန် ၁၀ပိဿာဝယ်ယူပါက ၁၅၀၀ကျပ်ဈေးပေးချေရကြောင်းသိရှိရပါသည်။ ထုတ်ပိုးမှုအနေဖြင့် အင်ဖတ်များဖြင့်ထုပ်ပိုး၍ ရောင်းချကြောင်းသိရှိရပါသည်။

      ဈေးကွက်အနေဖြင့် အလှူ၊ မင်္ဂလာဆောင်၊ သာရေး၊ နာရေး၊ အော်ဒါရှိသလို မြို့တွင်းဈေးကွက်အတွင်းမှ ဖောက်သည်များလည်း လာရောက်ဝယ်ယူရောင်းချကြောင်းသိရှိရပါသည်။

DOCA(ပဲခူး)

    ပဲခူးတိုင်းဒေသကြီး၊ ကျောက်တံခါးမြို့နယ်၊  ဇီးကုန်းကျေးရွာတွင် ခြင်း၊ တောင်း၊ စကောနှင့် စကာများရက်လုပ်လျက်ရှိပါသည်။ ရွာနေပြည်သူများသည် ခြင်း၊ တောင်း၊ စကောနှင့်စကာများကိုရက်လုပ်ပြီး အသက်ဝမ်းကြောင်းပြုနေသော ရွာတစ်ရွာလည်းဖြစ်ပါသည်။ ထိုအရာများကိုယက်လုပ်ရာတွင် ဝါးကို ကုန်ကြမ်းအဖြစ်အသုံးပြုကြပါသည်။

     ကြက်သောင်းဝါး၊ တင်းဝါးနှင့်ဝါးလတ်ဟူသော ဝါးသုံးမျိုးဖြင့်ရက်လုပ်ရပါသည်။ ထိုးဝါးများကို မြို့ချောင်းမှ ကျောက်တံခါးမြို့နယ်ရှိ ဝါးဆိုင်များသို့တင်သွင်းပြီး ထိုမှတစ်ဆင့် ဝယ်ယူရပါသည်။ ခြင်းကိုပြုလုပ်ရာတွင် ကြက်သောင်းဝါးနှင့် ဝါးလတ်တို့ဖြင့်ရက်လုပ်ရပါသည်။ခြင်းကိုရက်လုပ်ရာတွင် ဝါးကိုနှီးဖြစ်အောင်ဖျာပြီး အစိုရက်၍ အပြားသေးအောင်လုပ်ပြီး တဇောင်းထိုးရပါသည်။ ဝါးအကြီး ၅လုံးလျှင် ခြင်းအလုံး ၂၀လုံးထွက်ပါသည်။

     တောင်းကိုရက်လုပ်ရာတွင် ဝါးကိုနှီးအတည့်ဖျာပြီး နေလှန်း၍ခြောက်လျှင် ရက်လုပ်၍ရပါသည်။ ဝါးအကြီး ၅လုံးလျှင် တောင်းဝိုင်းအလုံး ၂၀လုံးထွက်ပါသည်။ စကောရက်လုပ်ရာတွင် ဝါးကိုနှီးဖြစ်အောင်ဖျာပြီး နေလှန်း၍ ခြောက်လျှင် ရက်လုပ်ရပြီး ဝါးအကြီး ၂လုံးလျှင် စကော ၁၅ချပ်ရပါသည်။ ဇကာကိုရက်လုပ်ရာတွင် ဝါးကိုနှီးဖြစ်အောင်ဖျာပြီး အစိုရက်၍ ဝါးကြီး ၂လုံးလျှင် ဇကာ ၁၅ချပ်ရပါသည်။ တစ်ရက်လျှင် ခြင်း ၁၀လုံး၊ တောင်း ၁၀လုံး၊ စကော ၁၀ချပ်နှင့် စကာ ၂၀ချပ်တို့ကိုရက်လုပ်နိုင်ပါသည်။

     ရောင်းချရာတွင် ခြင်းနှင့်တောင်းတို့ကို အရွယ်အစားအလိုက် (၁) လုံးလျှင် ၁၆၀၀ကျပ်မှ ၂၅၀၀ကျပ်အထိရောင်းချနေပြီး စကော (၁) ချပ်လျှင် ၁၂၀၀ကျပ်ဖြင့်ရောင်းချလျက်ရှိပါသည်။ ရွာမှထွက်သော ခြင်း၊ တောင်း၊ စကောနှင့် စကာတို့ကို ဒေသအတွင်းကျေးရွာမှ မှာယူပြီး ကျောက်တံခါးမြို့နယ်အတွင်း နီးစပ်ရာဒေသများ၊  ဖြူးမြို့နယ်နှင့် ညောင်းလေးပင်မြို့နယ်များတွင်လည်းရောင်းချလျက်ရှိပါသည်။ ခြင်း၊ တောင်း၊  စကောနှင့်စကာများမှာ လက်ရာများသေသပ်ပြီး နှုတ်ခမ်းသားများမှာလည်း ဝါးကိုပါးပါးလေးခွဲ၍ ကွပ်ထားသည့်အတွက် သုံးလေးနှစ်အသုံးခံ၍ ဝယ်ယူသူများမှာ အထူးနှစ်သက်ကြကြောင်းသိရှိရပါသည်။

DOCA(ပဲခူး)

     ပဲခူးတိုင်းဒေသကြီး၊  နတ်တလင်းခရိုင်၊ သဲကုန်းမြို့နယ်၊ ပုတီးကုန်းနယ်မြေပတ်ဝန်းကျင်ရှိ ဒေသများတွင် မိုးဦးကာလ၌ စိုက်ပျိုးကြသောရွှေဖရုံသီးများလှိုင်လှိုင်ထွက်ရှိနေပါသည်။ ပုတီးကုန်းနယ်မြေအတွင်း ကျေးရွာအုပ်စု (၆) အုပ်စု၊ ကျေးရွာပေါင်း (၂၀) တို့၏ အားထားစိုက်ပျိုးသောသီးနှံဖြစ်ပါသည်။ ရာသီချိန်သီးနှံဖြစ်သောကြောင့် ဒေသတွင်းစားသုံးမှုသာမက အခြားဒေသများသို့လည်းတင်ပို့ရောင်းချလျက်ရှိရာ ရွှေဖရုံသီးအကြီးတစ်လုံးလျှင် (၃၅၀၀) ကျပ်၊ အလတ်တစ်လုံးလျှင် (၂၇၀၀) ကျပ်၊ အသေးတစ်လုံးလျှင် (၁၃၀၀) ကျပ် ဈေးနှုန်းတို့ဖြင့်ရောင်းချလျက်ရှိပါသည်။

     ရွှေဖရုံသီးများအား စံတော်ဦးကားများဖြင့် နေ့စဉ် ဒညင်းကုန်းဈေးနှင့် သီရိမင်္ဂလာဈေးများသို့ သယ်ယူပို့ဆောင်ကာ အရောင်းအဝယ်ဖြစ်နေကြကြောင်းနှင့် ရွှေဖရုံစိုက်ပျိုးသောတောင်သူများနှင့် ကုန်စိမ်းဒိုင်များမှာ အကျိုးအမြတ်များရရှိကြောင်းသိရှိရပါသည်။

DOCA(ပဲခူး)

(၇-၈-၂၀၂၃) ရက်နေ့တွင် တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်းနှင့် ပဲစဉ်းငုံ တစ်တန်ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ပြုစုထားမှုကို လေ့လာရှုနိုင်ပါသည် -