ပြည်တွင်းကုန်သွယ်မှုသတင်း

      ကုက္ကိုလ်ပင်သည် အပူပိုင်းဒေသတွင် ပေါက်ရောက်သော အပင်တစ်မျိုးဖြစ်ပါသည်။ အမြဲစိမ်းပင်တစ်မျိုးလည်းဖြစ်ပြီး အပင်ကြီးမျိုးဖြစ်၍ နွေရာသီတွင်အရိပ်ကောင်းကောင်းပေးနိုင်သော အရိပ်ရပင်လည်း ဖြစ်ပါသည်။ ကုက္ကိုလ်ပင်သည် အာဖရိက၊ အာရှ၊ မက်ဒါဂါစကာ၊ အမေရိကနှင့် ဩစတေးလျတို့တွင် ပေါက်ရောက်သည့် မျိုးရင်းပင်တစ်မျိုးလည်းဖြစ်ပါသည်။ အပင်သည် အရွက်စိမ်းစိမ်းစိုစို၊ အညိုရင့်ရင့်အသီးရှည်ရှည်လေးများသီးပြီး ပန်းရောင်နှင့် အဖြူရောင်စပ် ပန်းပွင့်လေးများ ပွင့်ပါသည်။

      ကုက္ကိုလ်ပင်သည် အရိပ်ရရုံသာမက အရွက်သည်လည်း လူသားများအတွက် အကျိုးဖြစ်စေပါသည်။ အရွက်သည် ကိုယ်တွင်းဟော်မုန်းတွေကို ထိန်းညှိပေးနိုင်တာကြောင့် စိတ်ဓါတ်ကျဆင်းခြင်းကို သက်သာစေပါသည်။ အာရုံကြောနှင့် စိတ်ခံစားမှုတွေကို တည်ငြိမ်အေးချမ်းစေသောကြောင့် ညဘက်အိပ်ပျော်စေရန် အထောက်အပံ့ရရှိပါသည်။ ဓါတ်မတည့်မှုကို သက်သာစေနိုင်ခြင်း၊ ဓါတ်တိုးဆန့်ကျင်အာနိသင်ရှိခြင်း၊ အရေပြားကျန်းမာစေနိုင်ခြင်း၊ အစာကြေစေနိုင်ခြင်း၊ သွေးတွင်းကိုလက်စထရော ကျဆင်းစေနိုင်ခြင်းနှင့် အရိုးအဆစ်ရောင်ရမ်းခြင်းကို သက်သာစေနိုင်ကြောင်း လေ့လာသိရှိရပါသည်။

   ထို့ပြင် အင်းဆက်ကိုက်ခံရခြင်းကို သက်သာစေနိုင်ခြင်း၊ သွေးတိတ်စေခြင်း၊ လည်ချောင်းနာခြင်းကို သက်သာစေနိုင်ခြင်း၊ အသီးများမှည့်စေခြင်း၊ အရေပြားပြဿနာကင်းစေနိုင်ခြင်းနှင့် စိတ်ခံစားမှုကို ကောင်းစေနိုင်ကြောင်းလည်း သိရှိရပါသည်။

    ထိုကဲ့သို့ အကျိုးအာနိသင်များစွာရှိသော ကုက္ကိုလ်ပင်အသီးမှ အစေ့များကို လှော်၍ ပြည် Online ဈေးကွက်တွင်  တစ်ပြည်လျှင် ၅၀၀၀ ကျပ်၊ နို့ဆီဘူး တစ်ဘူးလျှင် ၇၀၀ ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA(ပဲခူး)

 ကရင်ပြည်နယ်၊ ဘားအံမြို့၊ အမှတ်(၁)၊ စံပြရေပေါ်ဈေးတွင်ရောင်းချနေသည့်  ၂၀၂၃ခုနှစ်၊ ဇူလိုင်လ၊ ပထမအပတ်၌ အခြေခံစားကုန်ဈေးနှုန်းများမှာ ဧည့်မထ(ဆန်)တစ်ပြည်လျှင် (၂၇၀၀) ကျပ်၊ တစ်အိတ်လျှင် (၆၄၅၀၀) ကျပ်၊ ပေါ်ဆန်း(ဆန်)တစ်ပြည်လျှင် (၄၀၀၀) ကျပ်၊ တစ်အိတ်လျှင် (၉၁၀၀၀) ကျပ်၊ ဆန်ကွဲတစ်ပြည်လျှင် (၂၀၀၀) ကျပ်နှင့် တစ်အိတ်လျှင် (၄၇၅၀၀) ကျပ်တို့ဖြစ်ပြီး ဆန်ဈေးနှုန်းများမှ ယခင်လထက် ဈေးနှုန်းအနည်းငယ်မြင့်တက်လျက်ရှိသည်။

   စားအုန်းဆီတစ်ပိဿာလျှင် (၇၃၀၀) ကျပ်၊ ပဲဆီ(ရိုးရိုး)တစ်ပိဿာလျှင် (၁၂၀၀၀) ကျပ်၊ ပဲဆီ(ရှယ်)တစ်ပိဿာလျှင် (၁၆၀၀၀) ကျပ်၊ ကြက်သွန်နီတစ်ပိဿာလျှင် (၂၅၀၀) ကျပ်၊ တစ်အိတ်လျှင် (၆၉၀၀၀) ကျပ်၊ ကြက်သွန်ဖြူ (ကြူကုတ်)  တစ်ပိဿာလျှင် (၈၀၀၀) ကျပ်၊ ကြက်သွန်ဖြူ(ရှမ်းစ)တစ်ပိဿာလျှင် (၉၀၀၀) ကျပ်၊ ရိုးရိုးဆားတစ်ပိဿာလျှင် (၇၀၀) ကျပ်၊ အာလူးတစ်ပိဿာလျှင် (၃၀၀၀) ကျပ်၊ မန်ကျည်းမှည့်တစ်ပိဿာလျှင် (၃၀၀၀) ကျပ်၊ ငရုတ်သီးခြောက်ရှည်တစ်ပိဿာလျှင် (၁၆၀၀၀) ကျပ်၊ ချင်းတစ်ပိဿာလျှင် (၇၀၀၀) ကျပ်၊ ပဲနီလေးတစ်ပိဿာလျှင် (၆၅၀၀) ကျပ်၊ ကုလားပဲခြမ်းတစ်ပိဿာလျှင် (၆၅၀၀) ကျပ်၊ မြေပဲဆံတစ်ပိဿာလျှင် (၉၅၀၀) ကျပ်၊ နနွင်းတက်တစ်ပိဿာလျှင် (၅၅၀၀) ကျပ်နှင့် သကြားတစ်ပိဿာလျှင် (၃၅၀၀) ကျပ်တို့ဖြင့်ရောင်းချနေပြီး ဈေးနှုန်းအနည်းငယ် မြင့်တက်လာကြောင်း သိရပါသည်။

  အသားငါးဈေးများမှာ မွေးမြူရေးကြက်တစ်ပိဿာလျှင် (၁၀၅၀၀) ကျပ်၊ ဝက်သားတစ်ပိဿာလျှင် (၁၆၀၀၀) ကျပ်၊ ဆိတ်သားတစ်ပိဿာလျှင် (၂၃၀၀၀) ကျပ်၊ အမဲသားတစ်ပိဿာလျှင် (၂၀၀၀၀) ကျပ်၊ ပုစွန်(ဘော့ချိတ်)တစ်ပိဿာလျှင် (၂၀၀၀၀) ကျပ်၊  ငါးကြင်းတစ်ပိဿာလျှင် (၁၈၀၀၀) ကျပ်၊ ငါးမြစ်ချင်းတစ်ပိဿာလျှင် (၈၀၀၀) ကျပ်၊ ငါးခူ(မွေးမြူရေး)တစ်ပိဿာလျှင် (၇၀၀၀) ကျပ်၊ ကြက်ဥတစ်လုံးလျှင် (၂၆၀) ကျပ်နှင့် ဘဲဥတစ်လုံးလျှင် (၃၄၀) ကျပ်တို့ဖြင့် ရောင်းချလျက်ရှိသည်။

  ဟင်းသီးဟင်းရွက်ဈေးနှုန်းများမှာ ကန်စွန်းရွက်တစ်စည်းလျှင် (၂၀၀) ကျပ်၊ ဂေါ်ဖီထုပ်တစ်ထုပ်လျှင် (၁၅၀၀) ကျပ်၊ ခရမ်းချဉ်သီးတစ်ပိဿာလျှင် (၂၂၀၀) ကျပ်၊ ပဲတောင့်ရှည်သီးတစ်စည်းလျှင် (၅၀၀) ကျပ်တို့ဖြင့် ပုံမှန်အရောင်းအဝယ်ဖြစ်နေကြောင်း ဒေသခံရောင်းဝယ်ဖောက်ကားနေသည့် အရောင်းဆိုင်မှသိရှိရပါသည်။

DOCA(ကရင်)

     ပြည်ခရိုင်တွင် မိုးစိုက်ပြောင်းနှင့် ဆောင်းစိုက်ပြောင်းဟူ၍ စိုက်ပျိုးကြပါသည်။ မိုးစိုက်ပြောင်းဖူးကို မိုးရာသီဖြစ်သော မေလနှင့် ဇွန်လတို့တွင် စိုက်ပျိုးကြပြီး စိုက်ဧကမှာ (၁၂၈၀)ဧက ရှိပါသည်။ ပန်းတောင်းမြို့နယ်တွင် အများဆုံးစိုက်ပျိုးပြီး စိုက်ဧကမှာ (၈၆၇)ဧက စိုက်ပျိုးကြောင်း သိရှိရပါသည်။ မိုးစိုက်ပြောင်းဖူးကို စိုက်ပျိုးပြီး (၃)လအကြာတွင် ပြောင်းဖူးများ ခူးယူပြီး ရောင်းချနိုင်ပါသည်။ တစ်ဧကလျှင် ပြောင်းဖူးအပင်ရေ (၂၉၀၄၀)ဝင်ဆံ့ပြီး တစ်ပင်လျှင် တစ်ဖူးသာ ထွက်ရှိ၍ မြေကောင်းလျှင် (၂)ဖူးထွက်ရှိသည်ဟု သိရပါသည်။ ပြည်မြို့နယ်တွင် ပြောင်းစေးများကို အများဆုံး စိုက်ပျိုးပြီး ပြောင်းဝါကို အနည်းငယ်သာ စိုက်ပျိုးကြောင်းသိရပါသည်။ ယခုအချိန် မိုးရာသီကာလတွင် ဆင်မြီးဆွဲဒေသမှထွက်ရှိသော ဆင်မြီးဆွဲပြောင်းများကို ရန်ကုန်-ပြည်အနှေးရထား စိုက်ချိန်တွင် ပြည်မြို့သို့ ပြောင်းဖူးပြုတ်များကို အရွက်သည်များဖြင့် လမ်းလျှောက်၍ တစ်လမ်းဝင် တစ်လမ်းထွက် ရောင်းချကြသလို အထိုင်ချ၍လည်း ရောင်းချကြပါသည်။ ဆင်မြီးဆွဲပြောင်းမှာ ပြောင်းစေးအမျိုးအစားဖြစ်ပြီး တစ်ဖူးလျှင် (၃၀၀)ကျပ်ဖြင့် လှည့်လည် ရောင်းချကြောင်း သိရပါ သည်။ ဆင်မြီးဆွဲဘက်မှ လာရောက်ရောင်းချသော ပြောင်းဖူးပြုတ် သည်များတွင် ကောက်ညှင်းထုပ်များ၊ မုန့်ကြာခွက်များဖြင့် ပြည်မြို့သို့ လာရောက်ရောင်းချကြ၍ ဈေးသည်များအနေဖြင့်လည်း တွက်ခြေကိုက်သလို ဝယ်ယူစားသုံးသူများအနေဖြင့်လည်း သက်သာစွာ စားသုံးနိုင်ကြပါသည်။

    ပြည်မြို့နယ်၊ ဆင်မြီးဆွဲဘက်မှလာသော ဆင်မြီးဆွဲပြောင်းသည် နာမည်လည်းရ၊ အရသာလည်း ကောင်းမွန်သဖြင့် ဝယ်ယူစားသုံးကြကာ ပြောင်းစိုက်တောင်သူများအနေဖြင့်လည်း ဝင်ငွေရပြီး အမြတ်အစွန်းများ ရရှိနိုင်မှာဖြစ်ပါသည်။ ပြောင်းဖူးကို ရေလောင်း၍ စိုက်ပျိုးနိုင်ပါက နှစ်လုံး ပေါက် ပြောင်းဖူးများထွက်ရှိပြီး နှစ်ပတ်လည် ဝင်ငွေများရရှိနိုင်မှာဖြစ်ပါသည်။

DOCA(ပဲခူး)

   ကုန်ဈေးနှုန်းတည်ငြိမ်ကျဆင်းရေးကို ရည်ရွယ်၍ ပဲခူးတိုင်းဒေသကြီးအစိုးရအဖွဲ့၏ အစီအစဉ်ဖြင့် အခြေခံစားသောက်ကုန်များဖြစ်သော ဆန်၊ ကြက်ဥ၊ ဘဲဥ ၊သားငါးများနှင့် ဟင်းသီးဟင်း ရွက်များကို ကိုယ်တိုင်စိုက်ပျိုးမွေးမြူထုတ်လုပ်သူများက ၂၀၂၃ခုနှစ်၊ဇွန်လ ၂၁ ရက်နေ့မှစ၍ ဖြူးမြို့၊ မြို့မဈေးကြီးအနီးရှိ စားသုံးသူရေးရာဦးစီးဌာန ရုံးရှေ့တွင် ဆိုင်ခန်းများဖွင့်လှစ်၍ တိုက်ရိုက် ရောင်းချပေးလျက်ရှိပါသည်။

      ဖြူးမြို့နယ် ဆန်ကုန်သည်များနှင့် ဆန်စက်လုပ်ငန်းရှင်များက ဝန်ကြီးဧရာဆန် တစ်ပြည်လျှင် ၂၆၀၀ ကျပ်၊ နှံကောက်ဆန် တစ်ပြည်လျှင် ၂၄၀၀ ကျပ်၊ မွေးမြူရေးလုပ်ငန်းရှင်များက အမဲသား တစ်ဆယ်ကျပ်သားလျှင် ၁၀၀၀ ကျပ်၊ ဆိတ်သား ၁၀ ကျပ်သားလျှင် ၁၅၀၀ ကျပ်၊ ဝက်သား ၁၀ ကျပ်သားလျှင် ၁၃၀၀ ကျပ်၊ ငါးအကောင်အကြီးအသေးပေါ်မူတည်၍ ၁၀ ကျပ်သား လျှင် ၅၀၀ ကျပ်၊ ၆၀၀ ကျပ်၊ ကြက်ဥ အလုံး အသေး၊ အကြီးပေါ်မူတည်၍ ၁၀ လုံးလျှင် ၂၄၀ ကျပ်၊ ၂၅၀ ကျပ် ဖြင့်ရောင်းချပေးလျက်ရှိရာ မည်သူမဆို လွတ်လပ်စွာ ဝယ်ယူနိုင်ပါသည်။

 ပဲခူးတိုင်းဒေသကြီးအစိုးရအဖွဲ့၏ အစီအစဉ်ဖြင့် အခြေခံစားကုန်များအား သက်သာသောနှုန်းထားဖြင့် ရောင်းချရာသို့ မြို့နယ်စီမံအုပ်ချုပ်ရေးအဖွဲ့နှင့် သက်ဆိုင်ရာဌာနဆိုင်ရာများက ကြီးကြပ်၍ ကူညီဆောင်ရွက်ပေးကြောင်းနှင့် စဉ်ဆက်မပြတ်ရောင်းချနိုင်ရေး စီစဉ်ဆောင်ရွက်လျက်ရှိကြောင်း သိရပါသည်။

DOCA(ပဲခူး)                                       

  မကွေးတိုင်းဒေသကြီးသည် မြန်မာနိုင်ငံ၏ ဆီအိုးကြီးဟု တင်စားရလောက်အောင် ဆီထွက်သီးနှံများဖြစ်သော နှမ်းနှင့်မြေပဲသီးနှံတို့အား အဓိကစိုက်ပျိုးကြသော်လည်း ဆန်မှာ ဒေသဝမ်းစာဖူလုံမှုမရှိ၍ ဧရာဝတီတိုင်း၊ ပဲခူးတိုင်းတို့မှ ဝယ်ယူစားသုံးနေရပါသည်။ နိုင်ငံတော်ဝန်ကြီးချုပ်၏ “နိုင်ငံ့စီးပွားရေးအခြေအနေကောင်းများဖန်တီးနိုင်မှသာလျှင် နိုင်ငံတော်ဖွံဖြိုးတိုးတက်အောင် ဆောင်ရွက်နိုင်မည်” ဟူသော လမ်းညွှန်မှာကြားချက်နှင့်အညီ မကွေးတိုင်းဒေသကြီးအတွင်း နိုင်ငံ့စီးပွားမြှင့်တင်ရေးရန်ပုံငွေဖြင့် (၂၀၂၂-၂၀၂၃) ဘဏ္ဍာနှစ်တွင် နွေစပါး ဧက (၅၀၀၀၀) စိုက်ပျိုးရန်လျာထားခဲ့ရာ ယခုအချိန်နွေစပါးများလည်း စတင်ရိတ်သိမ်းနေပြီဖြစ်ပါသည်။

     ၂၀၂၃ခုနှစ်၊ ဇွန်လအတွင်း စပါးအဓိကစိုက်ပျိုးထွက်ရှိသည့် ဧရာဝတီတိုင်းမှ ဆန် (၃၃၅၅၃) အိတ် စစ်ကိုင်းတိုင်းမှ (၃၇၀) အိတ်၊ ရန်ကုန်တိုင်းမှ (၁၈၀၀) အိတ်၊ ပဲခူးတိုင်းမှ (၂၃၅၅) အိတ်နှင့် မန္တလေးတိုင်းမှ (၉၁၀) အိတ်၊ စုစုပေါင်း (၃၈၉၈၈) အိတ်ဖြင့် (၁၉၄၉.၄) တန်ဝင်ရောက်ခဲ့ပြီး ဒေသတွင်း အရောင်းအဝယ်ဖြစ်နေသော ဆန်စျေးနှုန်းများမှာ ဧရာပဒေသာ (ပွင့်ဖြူ) ၂၄-ပြည်ပါ တစ်အိတ်လျှင် ကျပ် (၉၀၀၀၀-၉၇၀၀၀)၊ ဧရာပဒေသာ (မြောင်းမြ) ၂၄-ပြည်ပါ တစ်အိတ်လျှင် ကျပ် (၈၀၀၀၀-၈၇၀၀၀)၊ ပေါ်ဆန်းမွှေး (ရွှေဘို) ၂၄-ပြည်ပါ တစ်အိတ်လျှင် ကျပ် (၉၅၀၀၀-၁၁၀၀၀၀)၊ ပေါ်ဆန်းမွှေး (မြောင်းမြ) ၂၄-ပြည်ပါ တစ်အိတ်လျှင် ကျပ် (၉၀၀၀၀-၉၃၀၀၀)၊ မနောသုခ (မြောင်းမြ) ၂၄-ပြည်ပါ တစ်အိတ်လျှင် ကျပ် (၇၅၀၀၀-၈၀၀၀၀)၊ ဖန်သီး ၂၄-ပြည်ပါ တစ်အိတ်လျှင် ကျပ် (၇၅၀၀၀-၈၀၀၀၀)၊ သီးထပ် ၂၄ပြည်ပါ တစ်အိတ်လျှင် ကျပ် (၆၅၀၀၀-၆၉၀၀၀)၊ ရတနာတိုး ၂၄ပြည်ပါ တစ်အိတ်လျှင် ကျပ် (၅၈၀၀၀-၆၃၀၀၀) နှင့် ရက် (၉၀) မျိုး ၂၄ပြည်ပါ တစ်အိတ်လျှင် ကျပ် (၆၈၀၀၀-၇၅၀၀၀) တို့ဖြင့် အရောင်းအဝယ်ဖြစ်နေကြောင်းသိရှိရပါသည်။

DOCA(မကွေး)