ပြည်ပကုန်သွယ်မှုသတင်းများ
တရုတ်နိုင်ငံ၏ ဝယ်လိုအားကျဆင်းမှုမှ ဆုံးရှုံးမှုဖြစ်ပေါ်ခြင်းမှာ နည်းပါးမှုရှိခဲ့သော်လည်း အိန္ဒိယ၏ စားသုံးဆီတင်သွင်းမှု နိမ့်ကျခြင်းနှင့်အတူ မလေးရှားနိုင်ငံ၌ သိုလှောင်မှုများပြားခြင်းကြောင့် မလေးရှားစားအုန်းဆီ ကြိုပွိုင့်ဈေးနှုန်းသည် ၃-၁၁-၂၀၂၃ ရက်၊ သောကြာနေ့တွင် အနိမ့်ဈေးဖြင့် ပိတ်သိမ်းခဲ့ကြောင်း Hellenic Shipping News က ဖော်ပြပါသည်။
![](http://www.doca.gov.mm/sites/default/files/styles/trade_image_560x280_/public/စားအုန်းဆီ_6.jpg?itok=_4jOS3N8)
မလေးရှားနိုင်ငံ၌ စားအုန်းဆီကဏ္ဍတွင် မမျှော်လင့်ပဲရရှိသော အမြတ်အစွန်းများအပေါ် ကောက်ခံသည့်အခွန် (windfall profit levy) စည်းကြပ်ခြင်းကို အစိုးရအနေဖြင့် ပြန်လည် သုံးသပ်ပေးရန် စားအုန်းဆီအသင်းအဖွဲ့များက ၆-၁၁-၂၀၂၃ ရက်၊ တနင်္လာနေ့တွင် တောင်းဆိုခဲ့ကြသည်။
![](http://www.doca.gov.mm/sites/default/files/styles/trade_image_560x280_/public/10_10.jpg?itok=KVp2uR_C)
၂၀၂၃-၂၀၂၄ ခုနှစ် ကြံရာသီအတွင်း တရုတ်-လာအို နှစ်နိုင်ငံအကြား ကြံသီးနှံကို နယ်စပ်ဖြတ်ကျော်သယ်ယူမှု စတင်သည့်အနေဖြင့် ယူနန်ပြည်နယ်၊ Xishuangbanna Dai ကိုယ်ပိုင်အုပ်ချုပ်ခွင့်ရစီရင်စုရှိ Mengman ကုန်းတွင်းဆိပ်ကမ်းမှတစ်ဆင့် ကြံကုန်တင်ယာဉ်များ တရုတ် နိုင်ငံသို့ ဝင်ရောက်ခဲ့ကြောင်း China Daily သတင်းစာတွင် ဖော်ပြထားသည်။
![](http://www.doca.gov.mm/sites/default/files/styles/trade_image_560x280_/public/ကြံ_0.jpg?itok=UQhIuZro)
တရုတ်၊ အမေရိကန်၊ ဩစတြေးလျနှင့် အိန္ဒိယတို့တွင် ဝါဂွမ်းအထွက်ပမာဏ ကျဆင်းခဲ့ ခြင်းကြောင့် ၂ဝ၂၃ ခုနှစ်အောက်တိုဘာလမှ ၂ဝ၂၄ ခုနှစ် စက်တင်ဘာလအထိ ရာသီကာလ အတွင်း ကမ္ဘာ့ဝါဂွမ်းထုတ်လုပ်မှုမှာ ဘေထုပ်ရေ ၅ သန်း (၂၁၇.၇ ကီလိုဂရမ်ဝင်) လျော့နည်းနိုင် ကြောင်း သိရှိရပါသည်။ ဝါဂွမ်းဈေးနှုန်းမှာ လက်ရှိ သုံးလပတ်ကာလတွင် ကျဆင်းဖွယ်ရှိသော် လည်း ၂ဝ၂၄ ခုနှစ် ဒုတိယသုံးလပတ်မှ စတင်၍ ဈေးနှုန်းများ ပြန်လည်မြင့်တက်လာနိုင်ကြောင်း ကျွမ်းကျင်သူများက သုံးသပ်ပြောဆိုကြသည်။
ကမ္ဘောဒီးယားနိုင်ငံ၌ လုပ်ကွက်ငယ် တောင်သူပေါင်း ၁၀၀၀၀ ကျော်သည် အော်ဂဲနစ်ဆန် ထုတ်လုပ်တင်ပို့မှု အကြီးဆုံးကုမ္ပဏီတစ်ခုဖြစ်သည့် Armu Rice ကုမ္ပဏီနှင့် ကန်ထရိုက် လယ်ယာစနစ် လုပ်ကိုင်ဆောင်ရွက်ခြင်းမှ အကျိုးဖြစ်ထွန်းလျက်ရှိကြောင်း Khmer Times သတင်းဌာန၏ ဖော်ပြချက်အရ သိရှိရပါသည်။
![](http://www.doca.gov.mm/sites/default/files/styles/trade_image_560x280_/public/ဆန် 3.jpg?itok=f57033ee)
ပထမအကြိမ် တရုတ်-အာဆီယံ အရည်အသွေးမြင့် အင်ဒီကာဆန်မျိုးကွဲများ (Indica Rice Variety) ၏ အရည်အသွေး အရသာ အကဲဖြတ်ခြင်းပြိုင်ပွဲတွင် ကမ္ဘောဒီးယားနိုင်ငံ၏ စုပေါင်း ကုန်အမှတ်တံဆိပ် (Collective Trademark) ရရှိထားသော Sen Kra Ob (SKO) ဆန်သည် ရွှေတံဆိပ်ဆုရရှိခဲ့ကြောင်း သိရှိရပါသည်။
ကမ္ဘောဒီးယားနိုင်ငံမှ အင်ဒိုနီးရှားနိုင်ငံသို့ ပထမဆုံးအကြိမ် တင်ပို့ခဲ့သော ဆန်များတင်ဆောင်လာသည့် သင်္ဘောသည် အင်ဒိုနီးရှားနိုင်ငံ အလယ်ပိုင်း ဂျာဗားပြည်နယ်ရှိ ဆီမာရမ်မြို့သို့ ၂-၁၁-၂၀၂၃ နေ့တွင် ဆိုက်ရောက်ခဲ့ပြီဖြစ်ကြောင်း ကမ္ဘောဒီးယားဝန်ကြီးချုပ် ဟွန်မနက်က ပြောကြားခဲ့ပါသည်။
![](http://www.doca.gov.mm/sites/default/files/styles/trade_image_560x280_/public/ဆန် 1.jpg?itok=xWG8GvX7)
မလေးရှားနိုင်ငံ၌ အစိုးရ၏ နှစ်ကာလကြာရှည်စွာ ဈေးနှုန်းထိန်းချုပ်သည့် အစီအမံများက အကျိုးအမြတ်ရရှိမှုကို တစ်စတစ်စ လျော့ပါးလာစေခဲ့ရာ လယ်သမားများနှင့် ကုန်ထုတ်လုပ်သူများအတွက် လုပ်ငန်းချဲ့ထွင်ရန်အဟန့်အတားဖြစ်ပေါ်ပြီး ဆန်စပါးစိုက်ပျိုးထုတ်လုပ်မှုကို နည်းပါး စေသည်ဟု ဆန်စပါးလုပ်ငန်းရှင်များက ပြောဆိုလျက်ရှိကြောင်း သိရှိရသည်။
![](http://www.doca.gov.mm/sites/default/files/styles/trade_image_560x280_/public/နွေစပါး_10.jpg?itok=h8FaOpPQ)
ပြည်ပမှ ဆန်တင်သွင်းမှုသည် ပြည်တွင်းရှိ ရောင်းလိုအားနှင့် ဝယ်လိုအားအပေါ် မူတည်နေသော်လည်း အင်ဒိုနီးရှားနိုင်ငံအနေဖြင့် ယခုနှစ်၌ ဆန်တင်သွင်းခွင့်ပြုခဲ့သည့် တန်ချိန် ၃.၈ သန်း အောက်သို့ လျှော့ချပြီး ၂၀၂၄ ခုနှစ်တွင် ဆန်တန်ချိန် ၂ သန်းကို တင်သွင်းရန် စီစဉ်ဆောင်ရွက် လျက်ရှိကြောင်း နိုင်ငံပိုင်ကော်ပိုရေးရှင်းဖြစ်သော Bulog အဖွဲ့မှ အတွင်းရေးမှူး Awaludin Iqbal က ၆-၁၁-၂၀၂၃ နေ့ ၌ ထုတ်ဖော်ပြောကြားခဲ့သည်။
![](http://www.doca.gov.mm/sites/default/files/styles/trade_image_560x280_/public/ဆန်_11.jpg?itok=Y4Mu_EVD)
အင်ဒိုနီးရှားနိုင်ငံ၌ ဝင်ငွေနည်းပါးသည့် အိမ်ထောင်စုပေါင်း ၂၂ သန်းအား ဈေးနှုန်းများ မြင့် တက်မှုမှ အကာအကွယ်ပေးရန်အတွက် အိမ်ထောင်စု ၁ စုလျှင် ဆန် ၁၀ ကီလိုဂရမ်နှုန်းဖြင့် လစဉ် ထောက်ပံ့သည့်အစီအစဉ်ကို မူလက ၂၀၂၃ ခုနှစ် နိုဝင်ဘာလအထိ သတ်မှတ်ထားရာမှ ယခု ၂၀၂၄ ခုနှစ် ဇွန်လအထိ ဆောင်ရွက်မည်ဖြစ်ကြောင်း အင်ဒိုနီးရှား ကုန်သွယ်ရေးဝန်ကြီး Zulkifli Hasan က ၆-၁၁-၂၀၂၃ နေ့တွင် ပြောကြားခဲ့ပါသည်။
အိန္ဒိယနိုင်ငံ၌ ဘာစမာတီဆန်တင်ပို့မှုအပေါ် အနိမ့်ဆုံးပို့ကုန်ဈေးနှုန်း ၁ တန်လျှင် ဒေါ်လာ ၁၂၀၀ သတ်မှတ်ထားရာမှ အောက်တိုဘာလ စတုတ္ထပတ်၌ ဒေါ်လာ ၉၅၀ နှုန်းသို့ အစိုးရက ပြန်လည်လျှော့ချပေးခဲ့အပြီး တူရကီနိုင်ငံမှ ဝယ်လက်အများအပြား၏ ဝယ်လိုအားမှာ မြင့်တက်လာခဲ့ရာ ပို့ကုန်ဈေးကွက်အတွင်း ဘာစမာတီဆန် ၁ တန်လျှင် ဒေါ်လာ ၉၇၅ မှ ၁၀၀၀ အကြားသို့ ဈေးနှုန်းများ မြင့်တက်ခဲ့ကြောင်း သိရှိရသည်။
![](http://www.doca.gov.mm/sites/default/files/styles/trade_image_560x280_/public/ဘာစမာတီဆန်.jpg?itok=MSyfHHBt)
ဗီယက်နမ်ဆန်များအား တရုတ်နိုင်ငံသို့ တိုးမြှင့်တင်ပို့နိုင်ရေးအတွက် ဗီယက်နမ် စက်မှုနှင့်ကုန်သွယ်ရေးဝန်ကြီးဌာန၊ ပြည်ပကုန်သွယ်မှုအေဂျင်စီမှ ဒုတိယညွှန်ကြားရေးမှူးချုပ် Tran Quoc Toan ဦးဆောင်လျက် ဆန်တင်ပို့သည့် ဗီယက်နမ်ကုမ္ပဏီ ၁၉ ခုမှ ကိုယ်စားလှယ်များ ပါဝင်သော အဖွဲ့သည် တရုတ်နိုင်ငံ၊ ပေကျင်းမြို့သို့ သွားရောက်ခဲ့ကြောင်း သိရှိရပါသည်။
![](http://www.doca.gov.mm/sites/default/files/styles/trade_image_560x280_/public/နွေစပါး_9.jpg?itok=gNGQ-o_D)