မွန်ပြည်နယ်၊ ကျိုက်မရောမြို့နယ်၊ စားသုံးသူရေးရာဦးစီးဌာနနှင့် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ပူးပေါင်း၍ ၂၀၂၂ ခုနှစ်၊ ဖေဖော်ဝါရီလ ၁၀ ရက်နေ့၊ နံနက် ၁၀ နာရီတွင် မွန်ပြည်နယ်၊ ကျိုက်မရောမြို့နယ်ရှိ အမှတ် (၁) အခြေခံပညာမူလွန်ကျောင်း၌ စားသုံးသူကာကွယ်ရေးအသိပညာပေးဟောပြောဆွေးနွေးခြင်း ဆောင်ရွက်ခဲ့ကြောင်း သိရှိရပါသည်။
အဆိုပါ ဟောပြောဆွေးနွေးပွဲတွင် အခြေခံပညာမူလွန်ကျောင်းမှ ကျောင်းအုပ်ဆရာမကြီး ဒေါ်ချိုချိုလွင် က အသိပညာပေးရေးနှင့်ပတ်သက်၍ အဖွင့်အမှာစကားပြောကြားခြင်း၊ ကျိုက်မရောမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဒေါ်ချိုမြတ်မြတ်ထွေး၊ ဦးစီးအရာရှိက (၇၅) နှစ်မြောက် ပြည်ထောင်စုနေ့အကြောင်းသိကောင်းစရာနှင့် စာဖတ်သည့် အကျိုးကျေးဇူးများအကြောင်း ပညာပေးဆွေးနွေးခြင်းနှင့် စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှ ဒေါ်ခင်ကြည်၊ ဒုတိယဦးစီးမှူးက စားသုံးသူကာကွယ်ရေး အသိပညာပေးခေါင်းစဉ်ဖြင့် စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များ၊ စားသုံးသူ အခွင့်အရေးနှင့် တာဝန်များ၊ စားသုံးသူနစ်နာမှုရှိလျှင် တိုင်ကြားခွင့်ရယူနိုင်မည့်အကြောင်းများနှင့် စိတ်ချလုံခြုံမှုရှိသည့် ကုန်စည်နှင့် ဝန်ဆောင်မှုများ မှန်ကန်စွာ ရွေးချယ်ဝယ်ယူသုံးစွဲရန် စသည့် အကြောင်းအရာတို့အား ဟောပြောဆွေးနွေးခဲ့ပြီး စားသုံးသူရေးရာဦးစီးဌာန၊ ကျိုက်မရောမြို့နယ် တာဝန်ခံ ဦးအောင်ညီညီခန့်က ကျောင်းအုပ်ဆရာမကြီးအား စားသုံးသူကာကွယ်ရေးဆိုင်ရာ သိကောင်းစရာ လက်ကမ်းစာစောင်များ ပေးအပ်ခြင်း၊ ကျောင်းအုပ်ဆရာမကြီး ဒေါ်ချိုချိုလွင်က ဌာနမှ အသိပညာပေးဆောင်ရွက်မှုအား ကျေးဇူးတင်ရှိပါကြောင်းနှင့် ဟောပြောပွဲသို့ ကျောင်းအုပ် ဆရာမကြီးနှင့်အတူ ဆရာ၊ ဆရာမများ၊ ကျောင်းသားကျောင်းသူများ (၉၀) ဦးတက်ရောက်ခဲ့ကြောင်း သိရှိရပါသည်။
DOCA(မွန်)