စားသုံးသူရေးရာဦးစီးဌာန၊မန္တလေးတိုင်းဒေသကြီးဦးစီးမှူးရုံးအနေဖြင့် စားသုံးသူကာကွယ်ရေး ဥပဒေ(၂၀၁၉)ပါ စားသုံးသူအခွင့်အရေးများသိရှိ၍ နစ်နာဆုံးရှုံးမှုများရှိပါက အရေးဆိုတိုင်ကြားနိုင် ရန်နှင့် စီးပွားရေးလုပ်ငန်းရှင်များအနေဖြင့်လည်း စားသုံးသူကာကွယ်ရေးဥပဒေပါတာဝန်နှင့်တားမြစ် ချက်များကိုသိရှိ၍ စီးပွားရေးကျင့်ဝတ်နှင့်အညီ လုပ်ကိုင်ဆောင်ရွက်နိုင်ရန်ရည်ရွယ်၍ စားသုံးသူကာကွယ်ရေးအသိပညာပေးခြင်းများအား နည်းလမ်းမျိုးစုံဖြင့် ဆောင်ရွက်လျက်ရှိရာ ပြည်သူလူထုထံအရောက် အသိပညာပေးရန် အခက်အခဲရှိချိန်တွင် Media မှတဆင့် အသိပညာပေးခြင်းများကို ဆောင်ရွက်လျှက်ရှိပါသည်။
ထိုသို့ဆောင်ရွက်လျက်ရှိရာ ၂၀၂၂ ခုနှစ် မေလ ၃၀ ရက်နေ့ နံနက် ၁၀:၀၀နာရီအချိန်တွင် ချမ်းအေးသာစံမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံး၌ စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံးနှင့် ချမ်းအေးသာစံမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ ပူးပေါင်း၍ စားသုံးသူကာကွယ်ရေးအသိပညာပေး Talk Show ကျင်းပပြုလုပ်ခဲ့ပါသည်။
စားသုံးသူကာကွယ်ရေးအသိပညာပေးဆွေးနွေးရာတွင် ဥပဒေပြဌာန်းရခြင်း၏ ရည်ရွယ်ချက်များ စားသုံးသူရေးရာဦးစီးဌာန၏ မျှော်မှန်းချက်နှင့် ရည်မှန်းချက်များ၊ စားသုံးသူအကာအကွယ်ပေးရေး ဥပဒေ(၂၀၁၄)နှင့်နှိုင်းယှဉ်ပါက စားသုံးသူကာကွယ်ရေးဥပဒေ(၂၀၁၉)၏ အားသာချက်များ ပြည်သူလူထုများပိုမိုသိရှိသင့်သည့် အခန်းကဏ္ဍများ၊ ဈေးကွက်စောင့်ကြည့်စစ်ဆေးမှုအခြေအနေများ၊ နစ်နာဆုံးရှုံးမှုများရှိပါက တိုင်ကြားနိုင်သည့်နည်းလမ်းများ၊ စားသုံးသူကာကွယ်ရေးလုပ်ငန်းများ ဆောင်ရွက်ခြင်းဖြင့် ပြည်သူလူထုအကျိုးရှိမှုများ စားသုံးသူနစ်နာဆုံးရှုံးမှုများရှိ၍ တိုင်ကြားမှုအပေါ် ဖြေရှင်းဆောင်ရွက်ပေးမှုအခြေအနေများ၊ ကုန်စည်၊ဝန်ဆောင်မှုများ၏ တိုင်ကြားမှုဖြစ်စဉ်နမူနာများနှင့် ဥပဒေပါအခြားသိသင့်သိထိုက်သော အချက်အလက်များအား အကျယ်တဝင့်ဆွေးနွေးခဲ့ကြပြီး နံနက် (၁၀:၃၀) နာရီတွင် ရုတ်သိမ်းခဲ့ပါသည်။ ယခုကဲ့သို့ Media မှတစ်ဆင့် အသိပညာပေးဆောင်ရွက်ခြင်းဖြင့် စားသုံးသူကာကွယ်ရေးဥပဒေပါ အချက်အလက်များကိုသိရှိ၍ စားသုံးသူအခွင့်အရေးများ ချိုးဖောက်ခံရ၍ နစ်နာဆုံးရှုံးမှုများရှိပါက အရေးဆို တိုင်ကြားနိုင်ခြင်းနှင့် ဘေးအန္တရာယ်ရှိသော ကုန်စည်၊ဝန်ဆောင်မှုများမှ ရှောင်ရှားနိုင်ပြီး၊ စီးပွားရေးလုပ်ငန်းရှင်များအနေဖြင့်လည်း ဥပဒေနှင့်အညီ ဆောင်ရွက်ခြင်းဖြင့် စားသုံးသူများကို ကာကွယ်ပေးနိုင်မည့်အပြင် ၎င်းတို့၏စီးပွားရေးလုပ်ငန်းများလည်း မှန်ကန်သည့်လမ်းကြောင်းမှတဆင့် ပိုမိုလုပ်ဆောင်လာနိုင်လိမ့်မည်ဟု မျှော်လင့်မိပါသည်။
DOCA(မန္တလေး)