စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ၂၀၂၂ ခုနှစ်၊ ဇွန်လ (၃) ရက်နေ့၊ နံနက် (၀၉ : ၃၀) နာရီအချိန်တွင် လွိုင်ကော်မြို့ ၊ မြေနီကုန်းရပ်ကွက်ရှိ ပြည်အောင်ရတနာ ဆီဆိုင်၊ တော်ဝင်(၁)ဆီဆိုင်၊ တော်ဝင်(၂)ဆီဆိုင်နှင့် ထေးသမရပ်ကွက်ရှိ ရွှေသဇင်မိုးဆီဆိုင်တို့၌ ဈေးကွက်အတွင်းရောင်းချနေသော ဓာတ်ဆီ၊ ဒီဇယ်များ ဈေးနှုန်းမြင့်တင်ရောင်းချမှုရှိ/မရှိ၊ အချိန်အတွယ် လီတာ၊ ဂါလံများ ပြည့်မီမှုရှိ/မရှိကို မိတ်ဖက်ဌာနများဖြစ်သော ရေနံထွက်ပစ္စည်း ကြီးကြပ်စစ်ဆေးရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန၊ ပြည်နယ်ရဲတပ်ဖွဲ့၊ မြို့နယ်စည်ပင်သာယာရေးအဖွဲ့နှင့် ပူးပေါင်း၍ ဈေးကွက်စောင့်ကြည့်ကွင်းဆင်းစစ်ဆေး ဆောင်ရွက်ခဲ့ပါသည်။
ထိုသို့ကွင်းဆင်းစစ်ဆေးရာတွင် အဆိုပါဆီဆိုင်များ၌ စက်သုံးဆီတင်သွင်းသိုလှောင်ဖြန့်ဖြူး ခြင်းလုပ်ငန်းကြီးကြပ်ရေးကော်မတီမှ သတ်မှတ်ထားသော နှုန်းထားများအတိုင်းသာ ရောင်းချမှုရှိပြီး အချိန်အတွယ် ဂါလံ၊ လီတာများကိုလည်း ရေနံထွက်ပစ္စည်းကြီးကြပ်စစ်ဆေးရေးဦးစီးဌာန၏ (၂၀) လီတာ စံခွက်ဖြင့် တိုက်ဆိုင်စစ်ဆေးခဲ့ရာ ပြည့်မီမှုရှိကြောင်း စစ်ဆေးတွေ့ရှိရပြီး၊ စီးပွားရေးလုပ်ငန်းရှင်များအနေဖြင့် ကုန်စည်နှင့်စပ်လျဉ်း၍ အာမခံချက်ပေးရာတွင် ကုန်စည်၏အရည်အသွေး၊ အချိန် အတွယ်ပမာဏနှင့် အလေးချိန် မှန်ကန်မှုရှိရမည်ဖြစ်ကြောင်း၊ အရည်အသွေးပြည့်မီ မှန်ကန်သည့် ပစ္စည်းများဈေးကွက်အတွင်း တင်သွင်း၊ ဖြန့်ဖြူးရောင်းချရန်လိုကြောင်း၊ သတ်မှတ်ချက်နှင့် မကိုက်ညီသော စက်ဆီ၊ချောဆီများ ဈေးကွက်အတွင်းတွေ့ရှိပါက ရေနံထွက်ပစ္စည်းဆိုင်ရာ ဥပဒေအရသော်လည်းကောင်း၊ စားသုံးသူကာကွယ်ရေးဥပဒေအရသော်လည်းကောင်း အရေးယူခံရနိုင်ကြောင်း အသိပညာပေး ဆောင်ရွက်ခဲ့ကြောင်း သတင်းရရှိပါသည်။
DOCA(ကယား)