ဒစ်ဂျစ်တယ်ငွေပေးချေမှုစနစ်များ ကျယ်ပြန့်စွာ အသုံးပြုလာ

            ဧရာဝတီတိုင်းဒေသကြီး၊ ပုသိမ်မြို့တွင် KBZ Pay၊ Wave Money၊ CB Pay , AYA Pay အစရှိသော ဒစ်ဂျစ်တယ်ငွေပေးချေမှုစနစ်များအား နေ့စဉ်ဘဝတွင် ကျယ်ကျယ်ပြန့်ပြန့် အသုံးပြုလာကြပြီး ငွေသားမလိုဘဲ လွယ်ကူမြန်ဆန်စွာ ငွေလွှဲနိုင်မှုက ဒေသခံများ၏ လုပ်ငန်းဆောင်ရွက်မှုများကို ပိုမိုအားကောင်းစေပါသည်။

             အထူးသဖြင့် ဈေးရောင်းဝယ်ရေး၊ အိမ်ခြံမြေအရောင်းအဝယ်၊ ရွှေထည်၊ စိန်ထည်ပစ္စည်းများဝယ်ယူခြင်းနှင့် အွန်လိုင်းစီးပွားရေးလုပ်ငန်းများတွင် ဒစ်ဂျစ်တယ်ငွေပေးချေမှုစနစ်များ ပိုမိုတွင်ကျယ်လာကာ ငွေသားများကိုသယ်ဆောင်ရန် မလိုအပ်တော့သည့်အတွက် လုံခြုံမှုရှိပြီး အချိန်ကုန်သက်သာစေသည်ဟု သုံးစွဲသူများက ဆိုသည်။ "အရင်ကဆို ငွေသားနဲ့ပဲ ဈေးဝယ်ရတာ၊ ငွေလွှဲရတာ အချိန်ကုန်တယ်။ အခုဆိုရင် ဖုန်းလေးနဲ့တစ်ချက်နှိပ်ရုံပဲ၊ အိမ်မှာနေရင်း ငွေတွေကို လွှဲလို့ရတယ်" ဟု ပုသိမ်မြို့နေ ဒီဂျစ်တယ်ငွေပေးချေမှုစနစ် သုံးစွဲသူတစ်ဦးမှ ပြောကြားခဲ့ကြောင်း သိရသည်။

            မြို့နယ်အတွင်းရှိ ငွေကြေးဆိုင်ရာ ဒစ်ဂျစ်တယ်ပြောင်းလဲမှုများ မြန်ဆန်စွာဖြစ်ပေါ်လာခြင်းသည် အစိုးရ၏ ဒစ်ဂျစ်တယ်စီးပွားရေး မြှင့်တင်ရေးမူဝါဒများနှင့် ဘဏ်များ၊ ငွေလွှဲဝန်ဆောင်မှုလုပ်ငန်းများ၏ ပူးပေါင်းဆောင်ရွက်မှုတို့ကြောင့် ဖြစ်သည်။ အနာဂတ်ကာလများတွင် ပုသိမ်မြို့နယ်သည် ဒစ်ဂျစ်တယ်ငွေပေးချေမှုစနစ်များ ပိုမိုတိုးတက်ပြီး ကျေးလက်ဒေသများ အထိ ပိုမိုလွှမ်းခြုံလာနိုင်မည်ဟု မျှော်မှန်းရကြောင်း ရေးသားတင်ပြလိုက်ရပါသည်။

DOCA(ဧရာဝတီ)