စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဦးစီးအရာရှိ ဦးမျိုးဝင်းနိုင်နှင့် ဝန်ထမ်းများသည် ၂၁-၆-၂၀၂၂ ရက် (အင်္ဂါနေ့) ၊ နံနက် ၁၀:၀၀နာရီအချိန်တွင် ကရင်ပြည်နယ် ဘားအံမြို့ရှိ အမှတ်(၂)ရပ်ကွက်၊ အခြေခံမူလတန်းကျောင်းတွင် မြို့နယ်ကျောင်းကျန်းမာရေးကော်မတီအဖွဲ့ဝင်များနှင့်ပူးပေါင်း၍ အသိပညာပေးဟောပြောပွဲကျင်းပခဲ့ကြောင်း သိရှိရပါသည်။
အဆိုပါဟောပြောပွဲတွင် အစားအသောက်နှင့်ဆေးဝါးကွပ်ကဲရေးဦးစီးဌာနမှ ဦးစီးအရာရှိ ဒေါ်မေသူနွယ်က တားမြစ်ဆိုးဆေးနှင့် သုံးစွဲရန်မသင့်သည့် အစားအသောက်များအကြောင်းကိုလည်းကောင်း၊ မြို့နယ်တိုင်းရင်းဆေးကုဌာနမှ တိုင်းရင်းဆေးမှူး ဒေါ်ဌေးဌေးနွယ်က မိုးရာသီအချိန်အခါတွင် သွေးလွန်တုပ်ကွေးရောဂါအကြောင်းနှင့်ပတ်သက်၍လည်းကောင်း၊ စားသုံးသူရေးရာဦးစီးဌာနမှ ဦးစီးအရာရှိ ဦးမျိုးဝင်းနိုင်က သတ္တမတန်းသင်ရိုးသစ်ပါ ဘဝတွက်တာကျွမ်းကျင်စရာစာအုပ်တွင်ပါရှိသော စားသုံးသူအခွင့်အရေးများ၊ တာဝန်များအကြောင်းနှင့် ကုန်အညွှန်းအမှတ်အသားအကြောင်းကို ကျောင်းသူ၊ ကျောင်းသားများ ပိုမိုနားလည်အောင် လက်တွေ့သရုပ်ပြမှုဖြင့် ရှင်းလင်းပြောကြားခဲ့ပါသည်။ ထို့နောက် ကျောင်းသူ၊ ကျောင်းသာများမှ သိရှိလိုသည်များကိုမေမြန်းပြီး သက်ဆိုင်ရာဌာနတာဝန်ရှိသူများက ရှင်လင်းဖြေကြားခဲ့ပါသည်။ ဟောပြောပွဲတွင် ကျောင်းအုပ်ဆရာမကြီး (၁)ဦး၊ ဆရာ/ဆရာမ (၁၃)ဦးနှင့် ကျောင်းသား၊ကျောင်းသူ စုစုပေါင်း ဦးရေ (၁၀၀)ဦး တက်ရောက်ပြီး ကမ်းစာစောင်များနှင့် Leafletsများ ဖြန့်ဝေခဲ့ပြီး၊ ကျောင်းအုပ်ဆရာမကြီးကို စားသုံးသူကာကွယ်ရေးဥပဒေစာအုပ်အား ပေးအပ်ခဲ့ပါသည်။ ထို့နောက် စားသုံးသူရေးရာဦးစီးဌာန၊ မြို့နယ်ကျောင်းကျန်းမာရေးကော်မတီအဖွဲ့ဝင်များနှင့်ပူးပေါင်း၍ ကျောင်းဝန်းအတွင်းရှိ ကျောင်းမုန့်ဈေးတန်းတွင် အစားအသောက်များ ဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချမှုရှိစေရေးတို့ကို စစ်ဆေးခဲ့ကြသည်။
စားသုံးသူရေးရာဦးစီးဌာနအပါအဝင် ကျောင်းကျန်းမာရေးကော်မတီအဖွဲ့ဝင်သည် ၂၀၂၂-၂၀၂၃ ကျောင်းဖွင့်ရာသီကာလအတွင်း ဘားအံမြို့ပေါ်ရှိ ကျောင်းများကို စားသုံးသူကာကွယ်ရေးနှင့်ကျောင်းကျန်းမာရေးဆိုင်ရာ အသိပညာပေးဟောပြောခြင်းများ၊ စစ်ဆေးခြင်းများ ဆောင်ရွက်နိုင်ရေးအတွက် ရက်အလိုက်လျာထားချက်များ ချမှတ်စီစဉ်ဆောင်ရွက်လျက်ရှိကြောင်း သိရသည်။
DOCA(ကရင်)