ပြည်ပကုန်သွယ်မှုသတင်းများ

အိန္ဒိယနိုင်ငံတွင် ပဲစင်းငုံနှင့် မတ်ပဲ လက်ဝယ်သိုလှောင်ထားရှိမှုကို ထုတ်ဖော်ကြေညာရန် ညွှန်ကြားချက်ထုတ်ပြန်ခဲ့ပြီးနောက် အစိုးရ၏အချက်အလက်စင်္ကြန်စနစ်၌ လုပ်ငန်းရှင်များ၏ ကုန်လက်ကျန်ထုတ်ဖော်တင်ပြမှုအခြေအနေအပေါ် သုံးသပ် ဆွေးနွေးသည့် အစည်းအဝေးတစ်ရပ်ကို ၁၂-၄-၂၀၂၃ နေ့တွင် ကျင်းပရာ အိန္ဒိယစားသုံးသူရေးရာဦးစီးဌာနမှ အတွင်းဝန် Mr. Rohit Kumar Singh နှင့် ပဲမျိုးစုံ အဓိကစိုက်ပျိုးထုတ်လုပ်မှုနှင့် စားသုံးမှုရှိသည့် ပြည်နယ်များဖြစ်သော အန္တရာပရာဒေ့ရှ်၊ ဒေလီ၊ ဂူဂျရတ်၊ ကာနာတကာ၊ မဒ္ဒရာပရာ‌ဒေ့ရှ်၊ မဟာရဋ္ဌ၊ ရာဂျပ်စတန်၊ တမီနာဒူနှင့် ဥတာပရာ‌ဒေ့ရှ်တို့မှ အဆင့်မြင့်အရာရှိများ တက်ရောက်ခဲ့ကြကြောင်း သိရှိရသည်။

အဆိုပါအစည်းအဝေးတွင် အိန္ဒိယစားသုံးသူရေးရာဦးစီးဌာန၏ ကုန်လက်ကျန်အချက်အလက်စင်္ကြန်သို့ ဝင်ရောက်မှတ်ပုံတင်ပြီးသည့် လုပ်ငန်းရှင်အရေအတွက်နှင့် ၎င်းတို့ထုတ်ဖော်ကြေညာထားသည့် ပဲစင်းငုံနှင့်မတ်ပဲကုန်ချိန်ပမာဏတို့ကို ပြည်နယ်အလိုက် ပြန်လည်သုံးသပ်ခြင်း၊ ကုန်လက်ကျန်စာရင်း ထုတ်ဖော်တင်ပြမှုရှိစေရေး အထူးအလေးပေး ကြပ်မတ်ဆောင်ရွက်ရမည့် နယ်မြေဧရိယာများ ဖော်ထုတ်ခြင်းတို့ကို ဆောင်ရွက်ခဲ့ကြောင်း၊ ပြည်နယ်အချို့တွင် အမှန်တကယ် မှတ်ပုံ တင်ရမည့် လုပ်ငန်းအရေအတွက်မှာ ပိုမိုများပြားဖွယ်ရှိသည်ဟု တွေ့ရှိရကြောင်း၊ အချို့သောပြည်နယ်များ၌ ထုတ်ဖော်ကြေညာထားသည့် ပဲစင်းငုံ သိုလှောင်ရုံလက်ကျန် ပမာဏသည် ၎င်းဒေသတွင်း ထုတ်လုပ်မှုနှင့် စားသုံးမှုပမာဏများနှင့် နှိုင်းယှဉ်ပါက လွန်စွာနည်းပါးလျက် ရှိသည်ကို တွေ့ရှိရကြောင်း၊ သို့ဖြစ်၍ ဈေးကွက်အတွင်း ပါဝင်မှုရှိသူများအားလုံးကို လွှမ်းခြုံမှုရှိစေရန်အတွက် စားသောက်ကုန် FSSAI လိုင်စင်၊ လယ်ယာထွက်ကုန်ရောင်းဝယ်မှု APMC မှတ်ပုံတင် လက်မှတ်၊ ကုန်စည်နှင့်ဝန်ဆောင်မှုအခွန် GST မှတ်ပုံတင်လက်မှတ်နှင့် သိုလှောင်ရုံလုပ်ငန်းများ၏ အချက်အလက်များကို ကြည့်ရှုစစ်ဆေးရန် ပြည်နယ်အစိုးရအဖွဲ့များသို့ လမ်းညွှန်ခဲ့ကြောင်း၊ ထို့ အပြင် ပဲစင်းငုံနှင့် မတ်ပဲ သိုလှောင်ထားကြောင်း တင်ပြသည့် ပမာဏအား တိုက်ဆိုင်စစ်ဆေးမှုပြု ရန်နှင့် အစိုးရ၏ အချက်အလက်စင်္ကြန်သို့ ဖော်ပြခြင်းမရှိသော ကုန်စည်ပမာဏအတွက် ၁၉၅၅ ခုနှစ် အရေးကြီးကုန်စည်အက်ဥပဒေ သို့မဟုတ် ၁၉၈၀ ပြည့်နှစ် မှောင်ခိုတားဆီးရေးနှင့် အရေး ကြီးကုန်စည် ထောက်ပံ့ထိန်းသိမ်းမှု အက်ဥပဒေအရ သင့်လျော်သည့် အရေးယူမှုများ ဆောင်ရွက် ရန် ညွှန်ကြားခဲ့ကြောင်းဖြင့် အိန္ဒိယ စားသုံးသူရေးရာ၊ စားနပ်ရိက္ခာနှင့် ပြည်သူ့ဖြန့်ဖြူးမှုရေးရာ ဝန်ကြီးဌာန၏ ၁၂-၄-၂၀၂၃ နေ့ သတင်းထုတ်ပြန်ချက်တွင် ဖော်ပြထားပါသည်။

ပဲစင်းငုံ သိုလှောင်ထားရှိမှု မြေပြင်အခြေအနေကို သိရှိနိုင်ရန်အတွက် အဓိကစိုက်ပျိုး ထုတ် လုပ်သည့် နယ်မြေများ၊ ကုန်သွယ်ရောင်းဝယ်သည့် ဒေသများသို့ ကွင်းဆင်းစစ်ဆေးရန် အဆင့်မြင့် အရာရှိ ၁၂ ဦးအား အိန္ဒိယစားသုံးသူရေးရာဦးစီးဌာနက တာဝန်ပေးအပ်ခဲ့ကြောင်း သိရှိရသည်။

Source: Press Information Bureau of India, 12 Apr 2023 (လယ်ယာထွက်ကုန်များနှင့် အဓိကသွင်းကုန်များ၏ ဈေးကွက်စောင့်ကြည့်လေ့လာရေးအဖွဲ့)

ဗီယက်နမ်နိုင်ငံ၏ ပုစွန်တင်ပို့မှုမှာ ယခုနှစ်တွင် စိန်ခေါ်မှုများဖြင့် ရင်ဆိုင်နေရပြီး အထူးသဖြင့် ဈေးနှုန်းကျဆင်းမှုဖြစ်ကြောင်း ဗီယက်နမ်နိုင်ငံ ပင်လယ်စာတင်ပို့ထုတ်လုပ်သူများအသင်း၏ အထွေထွေအတွင်းရေးမှူးဖြစ်သူ Mr. Trương Đình Hòe က ပြောကြားခဲ့ပါသည်။

၂ဝ၂၃ ခုနှစ် ပထမသုံးလပတ်ကာလတွင် ဗီယက်နမ်နိုင်ငံ၏ ပုစွန်တင်ပို့မှုမှာ ၄ဝ% ကျဆင်းလျက် ဒေါ်လာ ၅၇၇ သန်းသို့ ရောက်ရှိခဲ့သည်။ ၂ဝ၂၂ ခုနှစ်အကုန်ပိုင်းမှ စတင်၍ ကမ္ဘာ့ဈေးကွက်တွင် ပုစွန်ဈေးနှုန်းများမှာ တဖြည်းဖြည်းကျဆင်းလာပြီး ၂ဝ၂၃ ခုနှစ် ဖေဖော်ဝါရီလအကုန်ပိုင်း၌ အိန္ဒိယပုစွန်ဈေးနှုန်းမှာ တစ်ကီလိုလျှင် ဗီယက်နမ်ဒေါင်ငွေ ၁၁ဝဝဝဝ (၄.၅၃ အမေရိကန်ဒေါ်လာ) သို့ ရောက်ရှိခဲ့ပါသည်။ ကမ္ဘာ့ပုစွန်ရောင်းလိုအား တန်ချိန် ၆ သန်းခန့် ရှိလာသည့်အချိန်တွင် ပုစွန် ဈေးနှုန်းများမှာ ဆက်လက်ကျဆင်းမည်ဟု ခန့်မှန်းရပါသည်။

ဗီယက်နမ်နိုင်ငံ၏ ပြည်တွင်းဈေးကွက်တွင် ပုစွန်ကုန်ကြမ်းဈေးနှုန်းမှာမြင့်တက်လာသဖြင့် ပြည်ပပို့ကုန်ပြုပြင်ထုတ်လုပ်သောလုပ်ငန်းများအတွက် အခက်အခဲဖြစ်ပေါ်စေခဲ့ပါသည်။ မဲခေါင်မြစ်ဝှမ်းဒေသတွင် ပုစွန်ဈေးနှုန်းမှာ တစ်ကီလိုလျှင် ဗီယက်နမ်ဒေါင် ၁၇ဝဝဝဝ နီးပါးသို့ ရောက်ရှိခဲ့ပါသည်။ ပုစွန်အစာဈေးနှုန်းမှာ မွေးမြူရေးစရိတ်တွင် ၆၅% ကျော်ပါဝင်နေခြင်းကြောင့် ပုစွန်မွေးမြူထုတ်လုပ်မှုစရိတ်မှာ မြင့်မားလျက်ရှိကြောင်း၊ ထို့အပြင် မျိုးပုစွန်အများစုမှာလည်း ပြည်ပမှ တင်သွင်းနေရသဖြင့် ပုစွန်သားပေါက်မျိုးဈေးနှုန်း မြင့်မားနေကြောင်းနှင့် ထုတ်လုပ်သူများအနေဖြင့် ပုစွန်မွေးမြူရေးကန်များ၏ ရေထုညစ်ညမ်းမှုအတွက်လည်း စရိတ်ပိုမိုကျခံနေရကြောင်းဖြင့် ကျွမ်းကျင်သူများက ပြောဆိုပါသည်။

လတ်တလောနှစ်ကာလများတွင် ပုစွန်သားပေါက်ထုတ်လုပ်ရေးစီမံကွပ်ကဲမှုမှာ အရည်အသွေးအကဲဖြတ်မှုစံချိန်စံညွှန်းများနှင့် စံသတ်မှတ်ချက်များလျော့ရဲနေပြီး ပုစွန်ထုတ်လုပ်မှုကိုစစ်ဆေးထိန်းသိမ်းနိုင်မှုမရှိကြောင်း၊ ထို့အပြင် အရည်အသွေး ပြည့်မီသည့် ပုစွန်သားပေါက်များ လုံလောက်မှုမရှိသဖြင့် ပုစွန်အရည်အသွေး မြှင့်တင်နိုင်မှုမရှိပဲ နိမ့်ကျလျက်ရှိကြောင်း၊  အီကွေဒေါနှင့် အိန္ဒိယတို့ကဲ့သို့သော ပြိုင်ဖက်နိုင်ငံများနှင့် ဈေးကွက်ယှဉ်ပြိုင် လုပ်ကိုင်ရာတွင် ဗီယက်နမ် ပုစွန်လုပ်ငန်း အနေဖြင့် ဤသို့သောအခက်အခဲများစွာကို ရင်ဆိုင်နေရကြောင်းဖြင့် Mr. Hòe က ပြောကြားပါသည်။

ဗီယက်နမ်လုပ်ငန်းရှင်များအနေဖြင့် ပုစွန်မွေးမြူထုတ်လုပ်မှုစရိတ်ကို လျော့နည်းစေရန်နှင့် အရည်အသွေးကောင်းမွန်ပြီး ဈေးကွက်ဝင်ဆံ့ကာ ဈေးကောင်းရရှိနိုင်သော ပုစွန်များကို ထုတ်လုပ်နိုင်ရန် စီမံကွပ်ကဲခြင်း၊ ရောဂါကင်းစင်ပြီး ပတ်ဝန်းကျင်နှင့်လိုက်လျောညီထွေရှိမည့် အရည်အသွေးကောင်းမွန်သော ပုစွန်သားပေါက်များကို ထုတ်လုပ်ခြင်းနှင့် ရှေးရိုးစဉ်လာဈေးကွက်ကို ဆက်လက်ထိန်းသိမ်းပြီး ထိုးဖောက်ရလွယ်ကူသည့်ဈေးကွက်များသို့ ချဲ့ထွင်တင်ပို့ခြင်းတို့ကို လုပ် ဆောင်သွားရန် လိုအပ်ကြောင်း၊ ထိုသို့ဆောင်ရွက်ခြင်းဖြင့်  ယခုနှစ်အတွင်း ဗီယက်နမ်နိုင်ငံ၏ ပုစွန်လုပ်ငန်းကဏ္ဍ၌ စိန်ခေါ်မှုများကို ကျော်လွှားသွားနိုင်မည်ဖြစ်ပြီး လျာထားသည့် မွေးမြူရေးဧရိယာဟက်တာ ၇၅ဝဝဝဝ မှ ပုစွန်တန်ချိန် ၁.ဝ၈ သန်း ထုတ်လုပ်တင်ပို့လျက် ပို့ကုန်ရငွေ ဒေါ်လာ ၄.၃ ဘီလီယံ ရရှိနိုင်မည်ဖြစ်ကြောင်းဖြင့် ဗီယက်နမ် ငါးပုစွန်မွေးမြူရေး  ပညာရှင်များက ပြောဆိုလျက်ရှိကြပါသည်။

ဗီယက်နမ်နိုင်ငံသည် ဥရောပ၊ အမေရိကန်၊ ဂျပန်၊ တရုတ်နှင့် တောင်ကိုးရီးယားနိုင်ငံများ အပါအဝင် နိုင်ငံပေါင်း ၁ဝဝ ကျော်သို့ ပုစွန်တင်ပို့လျက်ရှိကြောင်း၊ လွန်ခဲ့သောဆယ်စုနှစ် ၂ ခု အတွင်း ပုစွန်လုပ်ငန်းကဏ္ဍသည် နှစ်အလိုက် ပျမ်းမျှအားဖြင့် ဗီယက်နမ်နိုင်ငံ ပင်လယ်စာတင်ပို့မှု စုစုပေါင်းတန်ဖိုး၏ ၄ဝ%-၄၅% ခန့် ရှိခဲ့ကြောင်းနှင့် ဗီယက်နမ်၏ပုစွန်တင်ပို့မှုသည် ကမ္ဘာ့ပုစွန် ဈေးကွက်တွင် တန်ဖိုးစုစုပေါင်း၏ ၁၃%-၁၄% ရှိကြောင်း သိရှိရပါသည်။

Source: Vietnam News, 17 Apr 2023 (လယ်ယာထွက်ကုန်များနှင့် အဓိကသွင်းကုန်များ၏ ဈေးကွက်စောင့်ကြည့်လေ့လာရေးအဖွဲ့)

      ဖိလစ်ပိုင်နိုင်ငံ၌ မြင့်တက်လျက်ရှိသော ငွေကြေးဖောင်းပွမှုဖိအားများအား ကန့်သတ်ရန်နှင့် အဓိကစားသုံးသော ကောက်ပဲသီးနှံများ၏ ကုန်ကျစရိတ်ကို ထိန်းသိမ်းရန်တို့အတွက် အစိုးရက  နည်းလမ်းများ ရှာဖွေလျက်ရှိရာ အရန်စားနပ်ရိက္ခာ လျော့ပါးနိုင်ချေရှိမှုကို ဖြည့်ဆည်းနိုင်ရေးနှင့်စပ်လျဉ်း၍ ပြည်ပမှ ဆန်တန်ချိန် ၃၃၀၀၀၀ အား တင်သွင်းရန် ဖိလစ်ပိုင်အမျိုးသားစားနပ်ရိက္ခာအာဏာပိုင်အဖွဲ့ (NFA) က အဆိုပြုထားကြောင်း သိရှိရသည်။

        ဖိလစ်ပိုင်အစိုးရက ၁၄-၄-၂၀၂၃ နေ့ သတင်းထုတ်ပြန်ရာတွင် အရေးပေါ်အခြေအနေ၌ ထောက်ပံ့ပေးနိုင်ရန်အတွက် အမျိုးသားစားနပ်ရိက္ခာအေဂျင်စီအနေဖြင့် အရန်ရိက္ခာဆန်ကို ဖြည့်ဆည်းရန် လိုအပ်လျက်ရှိကြောင်း၊ သို့သော် ဒေသခံ လယ်သမားများထံမှ ဝယ်ယူစုဆောင်းပါက ပြည်တွင်းဆန်ဈေးနှုန်းများကို ပိုမိုမြင့်တက်အောင် တွန်းအားပေးမှုဖြစ်ပေါ်စေနိုင်ကြောင်း၊ ယခုနှစ်ကုန်ပိုင်း၌ ကျန်ရှိနိုင်မည့် ဖိလစ်ပိုင်နိုင်ငံ၏ ဆန်လက်ကျန်ခန့်မှန်းချက်မှာ တန်ချိန် ၁.၆၉ သန်း ခန့်ရှိပြီး ၄၅ ရက်တာအတွက် အရန်ရိက္ခာပမာဏနှင့်ညီမျှကြောင်း၊ ဈေးနှုန်းများ တည်ငြိမ်မှုရှိစေရေး စံသတ်မှတ်ထားရှိသည့် ရက် ၉၀ အတွက် ရိက္ခာဆန်ပမာဏ၏ တစ်ဝက်မျှသာဖြစ်ကြောင်း ဖော်ပြခဲ့သည်။

       အစိုးရ၏ ကိန်းဂဏန်းအချက်အလက်များအရ ဖိလစ်ပိုင်ပြည်တွင်း၌ ဆန်ဈေးနှုန်းများမှာ တဖြည်းဖြည်းမြင့်တက်လျက်ရှိပြီး ဈေးအသက်သာဆုံး ဆန်အတန်းအစားသည်ပင်လျှင် ယခုနှစ်စပိုင်း၌ ၁ ကီလိုဂရမ်လျှင် ပီဆိုငွေ ၃၅ မှ ၃၈ အကြားရှိရာမှ ယခုအခါ ၃၆ ပီဆိုမှ ၄၄ ပီဆို ဈေးနှုန်း (ဒေါ်လာ ၀.၆၅ မှ ၀.၈၀ အထိ) ဖြင့် ရောင်းချလျက်ရှိကြောင်း တွေ့ရှိရသည်။ ငွေကြေး ဖောင်းပွမှုမှာ မတ်လတွင် ၇.၆% သို့ ကျဆင်းခဲ့သော်လည်း တရားဝင်လျာထားချက်ဖြစ်သည့် ၂% မှ ၄% အတွင်း တည်ရှိရန်မှာ အလှမ်းကွာဝေးဆဲဖြစ်သည်။ သို့ဖြစ်ရာ ဖိလစ်ပိုင်ဗဟိုဘဏ်က အတိုးနှုန်းများ မြှင့်တင်မှုကို ရပ်ဆိုင်းထားမည်ဖြစ်ကြောင်း ပြောကြားချိန်၌ ဈေးနှုန်းဖိအားများကို ကိုင်တွယ်ဖြေရှင်းရန်အတွက် အစိုးရသည် ငွေကြေးထိန်းချုပ်မှု မဟုတ်သော စီမံဆောင်ရွက်မှုနည်းလမ်းများကို ရှာဖွေလျက်ရှိသည်။

      စိုက်ပျိုးရေးအတွင်းဝန် တာဝန်များကို ပူးတွဲဆောင်ရွက်လျက်ရှိသည့် သမ္မတ ဖာဒီနန်မာကို့စ်ဂျူနီယာက အစိုးရအနေဖြင့် ဆန်ဈေးနှုန်းများကြီးမြင့်မှုကို ထိန်းသိမ်းနိုင်ရန် နည်းလမ်းများအားလုံးကို ရှာဖွေလုပ်ဆောင်လျက်ရှိကြောင်း၊ လက်ရှိကာလ၌ လွန်စွာနည်းပါးလျက်ရှိသော NFA ၏ အရန်ဆန်ထားရှိမှုကို မြှင့်တင်နိုင်ရေးအတွက် ပြည်ပမှတင်သွင်းရန် လိုအပ်ပါက အစီအမံများ ချမှတ်လုပ်ကိုင်မည်ဖြစ်ကြောင်း ပြောဆိုပါသည်။

        ဖိလစ်ပိုင်နိုင်ငံ၌ ပြည်ပမှဆန်တင်သွင်းခြင်းကို ပုဂ္ဂလိကကုန်သည်များသို့သာ ခွင့်ပြုထားကြောင်း၊ အရေးပေါ်စားနပ်ရိက္ခာ ဝယ်ယူစုဆောင်းရန်အတွက်သာ လုပ်ပိုင်ခွင့်ကန့်သတ်ခံထားရသည့် အမျိုးသားစားနပ်ရိက္ခာအာဏာပိုင်အဖွဲ့ (NFA) သည် အစိုးရချင်းညှိနှိုင်းစီစဉ်မှု (G to G) စနစ်ဖြင့် အရန်ဆန် ဝယ်ယူတင်သွင်းရန် မျှော်လင့်လျက်ရှိကြောင်း၊ ဥပဒေအရ နိုင်ငံတော်သမ္မတရုံး သို့မဟုတ် ၎င်း၏ အခွင့်အာဏာအပ်နှင်းခြင်းခံရသော အေဂျင်စီတစ်ရပ်ရပ်သည် NFA ၏ အရန် ရိက္ခာဆန် စုဆောင်းမှုအတွက် ဆုံးဖြတ်ချက် ချမှတ်ပေးနိုင်ကြောင်း သိရှိရသည်။

Source: Bangkok Post, 14 Apr 2023 (လယ်ယာထွက်ကုန်များနှင့် အဓိကသွင်းကုန်များ၏ ဈေးကွက်စောင့်ကြည့်လေ့လာရေးအဖွဲ့ )

        လက်ရှိသကြားရောင်းဝယ်လျက်ရှိသည့်  (၂၀၂၂ ခုနှစ်၊ စက်တင်ဘာလ ၁ ရက်နေ့မှ ၂၀၂၃ ခုနှစ်၊ မတ်လ ၂၈ ရက်နေ့အထိ) ယူကရိန်းနိုင်ငံမှ သကြားတင်ပို့မှုမှာ ယခင်နှစ်က တင်ပို့ခဲ့သော တန်ချိန် ၂၆၅၀၀၀ ထက် ၄.၈ ဆ တိုးမြှင့်၍ တင်ပို့မည်ဖြစ်ကြောင်း သိရှိရပါသည်။

        Ukrtsukor အဖွဲ့ဥက္ကဋ္ဌ Nazar Mykhailovyn ၏ ပြောကြားချက်အရ ရုရှား-ယူကရိန်း စစ်ပွဲအစတွင် သကြားတင်ပို့မှုကို တားမြစ်ထားပြီး အစိုးရအဖွဲ့က ၂၀၂၂ ခုနှစ်၊ ဇွန်လ ၅ ရက်နေ့မှ စတင်၍ တင်ပို့ခွင့်ပြုခဲ့ကြောင်း၊ ၂၀၂၁-၂၀၂၂ ခုနှစ်တွင် သကြားတန်ချိန် ၅၅ဝဝဝ ကို တင်ပို့ခဲ့ပြီး ၂၀၂၂ ခုနှစ်၊ စက်တင်ဘာလ ၁ ရက်နေ့မှ ၂၀၂၃ ခုနှစ်၊ မတ်လ ၂၈ ရက်နေ့အထိ တင်ပို့မှုတင်ချိန်မှာ ၂၆၅၀၀၀ အထိ တိုးမြင့်လာခဲ့ကြောင်း၊ ယခုအခါ ယူကရိန်းနိုင်ငံအနေဖြင့် ဥရောပသမဂ္ဂ၏ ဆုံးဖြတ်ချက်အရ သကြားတင်ပို့ရာတွင် အကောက်အခွန်များ ကင်းလွတ်ခွင့်ရရှိမည်ဖြစ်ပြီး လွန်ခဲ့သည့်နှစ်က ဖြစ်ပွားခဲ့သည့် မိုးခေါင်ရေရှား ကပ်ဆိုက်မှုကြောင့် ဥရောပသမဂ္ဂနိုင်ငံများ၏ သကြားအထွက်နှုန်းသည် ယူကရိန်းနိုင်ငံထက် အထွက်နှုန်းလွန်စွာကျဆင်းခဲ့သည့်အတွက်  သကြားဈေးနှုန်းများ မြင့်တက်ခဲ့ကြောင်း၊ ယူကရိန်းနိုင်ငံအနေဖြင့် တိုက်ပွဲများဖြစ်ပွားခြင်းနှင့် ဆိပ်ကမ်းမြို့များ မရှိခြင်းတို့ကြောင့် ယခုအခါ ဥရောပဈေးကွက်တွင် သကြားများရောင်းချရန် စီစဉ်လျက်ရှိကြောင်း၊ အစိုးရ၏အကူအညီဖြင့် ရထားလမ်းမှတစ်ဆင့် တင်ပို့သွားမည်ဖြစ် ကြောင်းနှင့် ၂၀၂၂ ခုနှစ်တွင် ယူကရိန်းနိုင်ငံအနေဖြင့် သကြားတန်ချိန် ၁.၃၃ သန်းအထိ ထုတ်လုပ်နိုင်ခဲ့၍ ၂၀၂၁ ခုနှစ်ထက် တန်ချိန် ၁၂၀၀၀၀ လျော့နည်းခဲ့ကြောင်း သိရှိရပါသည်။

Source : Chinimandi , 5 April 2023(လယ်ယာထွက်ကုန်များနှင့် အဓိကသွင်းကုန်များ၏ ဈေးကွက်စောင့်ကြည့်လေ့လာရေးအဖွဲ့)

      ဘင်္ဂလားဒေ့ရှ်နိုင်ငံ၌ တောင်သူများစွာသည် နေကြာကို ဝင်ငွေရအကောင်းဆုံးသီးနှံအဖြစ်လည်းကောင်း၊ စားအုန်းဆီ သို့မဟုတ် ပဲပုတ်ဆီတို့၏ နေရာ၌ နေကြာဆီကို အစားထိုးအသုံးပြုနိုင်ကြောင်း သိမြင်မှုများ တိုးပွားလာ၍လည်းကောင်း  နိုင်ငံအနှံ့အပြားတွင် နေကြာသီးနှံကို စိုက်ပျိုးလာကြကြောင်း သိရပါသည်။

        ဘင်္ဂလားဒေ့ရှ်နိုင်ငံ၊ အနောက်တောင်ပိုင်းရှိ Bagerhat ခရိုင်၊ Fakirhat စီရင်စုတွင် မြေလပ် ဧရိယာ ၁၅၀ ဟက်တာအထိ နေကြာသီးနှံ စိုက်ပျိုးမှုရှိလာသဖြင့် Upazila ခေါ် စီရင်စုနယ်မြေ ဒေသများ၌ အလုပ်အကိုင်များ ဖန်တီးနိုင်ကြောင်း၊ တောင်သူများအနေဖြင့် အထွက်နှုန်းမြင့်မားမှုနှင့် အကျိုးအမြတ်များစွာရရှိမှုအပေါ် မူတည်၍ နေကြာသီးနှံအား ပိုမိုရွေးချယ် စိုက်ပျိုးလာခြင်း ဖြစ်သည်ဟု အဆိုပါခရိုင်ရှိ စိုက်ပျိုးရေးပညာပေးဌာနက ပြောဆိုကြောင်း၊ ထို့အပြင် တောင်သူ ၁၀၃၀ ဦးသည် အစိုးရ၏ ဆွဲဆောင်မက်လုံးပေးမှုများကြောင့် မြေဧရိယာ ၁၃၇ ဟက်တာတွင် နေကြာသီးနှံကို စိုက်ပျိုးကြခြင်းဖြစ်ပြီး ယခုနှစ်တွင် အထွက်နှုန်း တိုးတက်ရရှိခဲ့သည်ဟု  စီရင်စုနယ်မြေစိုက်ပျိုးရေးရုံးမှ အရာရှိများ ပြောကြားကြောင်းဖြင့် Dhaka Tribune သတင်းဌာနက ဖော်ပြပါသည်။

          တောင်သူများ၏ ပြောကြားချက်အနေဖြင့် နေကြာစိုက်ပျိုးထားသည့် စိမ်းဝါရောင်လယ်ကွင်းကြီး၏ သဘာဝအလှအပများကို ကြည့်ရှုခံစားရန် လာရောက်လည်ပတ်သူများရှိကြောင်း၊ ရာသီဥတုကောင်းမွန်မည်ဆိုပါက လာမည့်နှစ် နေကြာကြိတ်ခွဲရာသီတွင် အထွက်နှုန်းများပြား လာမည်ဖြစ်ကြောင်း၊ ဆက်လက်အသုံးပြုခြင်းမရှိတော့သည့် မြေလပ်များတွင် နေကြာစိုက်ပျိုးမှု အောင်မြင်ကြောင်း၊ ကျန်းမာရေးနှင့် ဈေးနှုန်းအရ အသင့်တော်ဆုံးဖြစ်သည့် စားသုံးဆီဖြစ်သောကြောင့် နေကြာကို တိုးချဲ့စိုက်ပျိုးရန် စီစဉ်လျက်ရှိကြကြောင်း သိရှိရပါသည်။

         ဘင်္ဂလားဒေ့ရှ်အစိုးရအနေဖြင့် ပြည်ပမှတင်သွင်းသည့် စားသုံးဆီများအပေါ် မှီခိုရမှုအား လျှော့ချနိုင်ရန် ရည်ရွယ်၍ တောင်သူများသို့ အမျိုးမျိုးသော ဆွဲဆောင်မက်လုံးပေးမှုများဖြင့် နေကြာစိုက်ပျိုးမှု တိုးတက်များပြားလာစေရန် စီမံဆောင်ရွက်လျက်ရှိကြောင်း၊ ၎င်းအစီအစဉ်၏ တစ်စိတ်တစ်ပိုင်းအဖြစ် မျိုးစေ့များနှင့်မြေဩဇာများ ဖြန့်ဝေပေးခြင်း၊ နေကြာစိုက်ပျိုးမှု နည်း ပညာသင်တန်းများ ဖွင့်လှစ်ပေးခြင်းတို့ကို ဆောင်ရွက်လျက်ရှိကြောင်း စသည်ဖြင့် Khulna ဒေသရှိ စိုက်ပျိုးရေးပညာပေးဌာန၏ တွဲဖက်ညွှန်ကြားရေးမှူး Mr. Mohon Kumar Ghosh က ပြောဆိုပါသည်။ 

Source: Dhaka Tribune, April 1, 2023(လယ်ယာထွက်ကုန်များနှင့် အဓိကသွင်းကုန်များ၏ ဈေးကွက်စောင့်ကြည့်လေ့လာရေးအဖွဲ့)