ပြည်ပကုန်သွယ်မှုသတင်းများ

        ဗီယက်နမ်နှင့် တရုတ်နိုင်ငံတို့အကြား သွင်းကုန်/ပို့ကုန်တန်ဖိုးသည် ယခုနှစ် ပထမရှစ်လအတွင်း အမေရိကန်ဒေါ်လာ ၁၃၀.၈ဘီလီယံနီးပါးရောက်ရှိခဲ့ကြောင်း အကောက်ခွန်ဦးစီးဌာန ၏ နောက်ဆုံးရစာရင်းများအရသိရသည်။ ၎င်းတို့အနက် ဗီယက်နမ်၏ပို့ကုန်တန်ဖိုးမှာ အမေရိကန်ဒေါ်လာ ၃၈.၂၈ဘီလီယံရှိပြီး တစ်နှစ်ထက်တစ်နှစ် ၃.၉% မြင့်တက်လာခဲ့သည်။ ဗီယက်နမ်တင်ပို့မှုတွင် ကုန်ပစ္စည်းတစ်ခုလျှင် ၁ဘီလီယံကျော်တန်ဖိုးရှိသော ကုန်ပစ္စည်း ၁၀မျိုးပါဝင်ပြီး ၎င်းတို့မှာ ဖုန်းများနှင့် ကင်မရာအစိတ်အပိုင်းများ၊ ဟင်းသီးဟင်းရွက်နှင့် အသီးအနှံများ၊ စက်ပစ္စည်းများ၊ ပစ္စည်းကိရိယာများ၊ စက်ပြုပြင်ရေးကိရိယာများနှင့် အပိုပစ္စည်းများပါဝင်သည်။

         တစ်ချိန်တည်းတွင် ဗီယက်နမ်နိုင်ငံသည် တရုတ်နိုင်ငံမှ ဒေါ်လာ ၉၂.၅ဘီလီယံတန်ဖိုးရှိသော ကုန်ပစ္စည်းများကိုတင်သွင်းခဲ့ပြီး ယမန်နှစ်အလားတူကာလနှင့်နှိုင်းယှဉ်ပါက ၃၄.၂၅ %  တိုးတက်ခဲ့ကြောင်းသိရသည်။ ရလဒ်အနေဖြင့်ဗီယက်နမ်သည် ပြန်လည်သုံးသပ်ကာလတွင် တရုတ်နှင့် ကုန်သွယ်မှုလိုငွေ ကန်ဒေါ်လာ ၅၄.၂၂ဘီလီယံရှိပြီး ၂၀၂၃ ကိန်းဂဏန်းထက် ဒေါ်လာ ၅ဘီလီယံကျော်လွန်ခဲ့သည်။

         တရုတ်ဈေးကွက်မှ ဗီယက်နမ်သို့တင်သွင်းသော ကုန်ပစ္စည်များမှာ စက်ယန္တရားများ၊ စက်ကိရိယာများ၊ ဓာတုဗေဒပစ္စည်းများနှင့် ဓာတုဗေဒထုတ်ကုန်ပစ္စည်းများ၊ ပလတ်စတစ်အမျိုးအစားအားလုံးနှင့် ပလတ်စတစ်ထုတ်ကုန်ပစ္စည်းများ၊ အထည်လိပ်ပစ္စည်းများ၊ လဲသာနှင့်ဖိနပ်၊ သံနှင့်သံမဏိ၊ ဆောက်လုပ်ရေးပစ္စည်းများကဲ့သို့သော အဓိကထုတ်ကုန်များနှင့် ကုန်ကြမ်းပစ္စည်းများဖြစ်သည်။

         မကြာသေးမီနှစ်များအတွင်း ကမ္ဘာ့ကုန်သွယ်ရေးနှေးကွေးနေသော်လည်း တရုတ်နှင့် ဗီယက်နမ်၏ ပို့ကုန်သွင်းကုန်တိုးတက်မှုသည် တောက်ပသောအစက်အပြောက်တစ်ခုအဖြစ် ဆက်လက်တည်ရှိနေခဲ့သည်။ လက်ရှိတွင် တရုတ်နိုင်ငံသည် ဇန်နဝါရီလမှ ဩဂုတ်လအတွင်း အမေရိကန်ဒေါ်လာ ၁၀၀ဘီလီယံကျော် ဗီယက်နမ်နှင့်နှစ်လမ်းကုန်သွယ်မှုရှိသော ပထမဆုံးဈေးကွက်ဖြစ်သည်။ နှစ်နိုင်ငံအကြားကုန်သွယ်မှုသည် ပျမ်းမျှတစ်လလျှင် ဒေါ်လာ ၁၆ဘီလီယံခန့်ရှိသည်။ ၂၀၂၄ခုနှစ်၊ ပထမနှစ်ဝက်အတွင်း ကုန်သွယ်မှုအားကောင်းလာသည်နှင့်အမျှ ဗီယက်နမ်နှင့်တရုတ်ကုန်သွယ်မှုသည် ဒေါ်လာ ၂၀၀ဘီလီယံအထိရှိလာလိမ့်မည်ဟု ခန့်မှန်းထားကြကြောင်းသိရသည်။

SOURCE: vnexpress

DOCA(ရန်ကုန်)

       အင်ဒိုနီးရှားနှင့် ဘရာဇီးနိုင်ငံအခြေစိုက် ကုမ္ပဏီတို့သည် အပူပိုင်းဒေသ နို့စားကျွဲ၊ နွားမွေးမြူရေးကဏ္ဍတိုးတက်စေရန် အမေရိကန်ဒေါ်လာ ၂၉၁.၉သန်းပမာဏာရှိ ရင်းနှီးမြှုပ်နှံမှုတွင်ပူးပေါင်းဆောင်ရွက်သွားမည်ဖြစ်ကြောင်း အင်ဒိုနီးရှားနိုင်ငံ စိုက်ပျိုးမွေးမြူရေးဝန်ကြီး Amran Sulaiman က ပြောကြားခဲ့ပါသည်။ ဝန်ကြီးက ဘရာဇီးရင်းနှီးမြှုပ်နှံမှုရရှိခြင်းသည် အသားနှင့်နို့ထွက်ပစ္စည်းလုံလောက်မှုရှိစေရေးကို လက်တွေ့အကောင်အထည်ဖော်ရာတွင် ပံ့ပိုးနိုင်မည်ဟု ၁၂-၉-၂၀၂၄ ရက်နေ့တွင် ပြောကြားခဲ့ပါသည်။ မွေးမြူရေးထုတ်ကုန်ဖွံ့ဖြိုးတိုးတက်ရန် ကျယ်ပြန့်စွာပူးပေါင်းဆောင်ရွက်မှုအရ အင်ဒိုနီးရှားနိုင်ငံ၏ လိုအပ်သည့်အသားနှင့် နို့ထွက်ပစ္စည်းတို့ကို တင်သွင်းရန်မလိုဘဲ ပြည့်မီနိုင်ပြီး များစွာသောမွေးမြူရေးကဏ္ဍတွင် အလုပ်အကိုင်သစ်များဖန်တီးနိုင်မည်ဟုသိရပါသည်။ ဘရာဇီးနိုင်ငံစိုက်ပျိုးရေးနှင့်မွေးမြူရေးဝန်ကြီး Carlos Favara နှင့် အစည်းအဝေးအပြီးတွင် Sulaiman က များစွာသော ဘရာဇီးစီးပွားရေးလုပ်ငန်းရှင်များသည် အင်ဒိုနီးရှား၏ မွေးမြူရေးကဏ္ဍတွင် စိတ်ဝင်စားမှုကိုပြသခဲ့ကြောင်းနှင့် နှစ်နိုင်ငံစလုံးသည် မွေးမြူရေးကဏ္ဍဖွံ့ဖြိုးတိုးတက်ရေးအတွက် နောက်ဆက်တွဲသဘောတူညီမှုများပြုလုပ်ရန် မျှော်လင့်ကြောင်းပြောကြားခဲ့ပါသည်။ အဆိုပါ အင်ဒိုနီးရှား- ဘရာဇီးနှစ်ဦးနှစ်ဖက်အစည်းအဝေးကို ဘရာဇီးနိုင်ငံတွင်ကျင်းပသည့် ကမ္ဘာ့စီးပွားရေးအင်အားကြီး G-20 စိုက်ပျိုးမွေးမြူရေးဝန်ကြီးအဆင့် အစည်းအဝေးအပြီးတွင် ကျင်းပခဲ့ခြင်းဖြစ်ကြောင်းသိရပါသည်။ ဝန်ကြီး Sulaiman က အင်ဒိုနီးရှားအစိုးရသည် စိုက်ပျိုးမွေးမြူရေးနှင့် အစားအသောက်စနစ်ကို ခြုံငုံသုံးသပ်သောနည်းလမ်းများဖြင့် ပြောင်းလဲခြင်းကို ဆက်လက်လုပ်သွားမည်ဟုအာမခံကြောင်း အခိုင်အမာပြောကြားခဲ့ပါသည်။ ၂၀၁၇ခုနှစ်၊ ၂၀၁၉ခုနှစ်၊ ၂၀၂၀ခုနှစ်နှင့် ၂၀၂၁ခုနှစ်တို့တွင် ပြည်တွင်းဆန်ထုတ်လုပ်မှုဖူလုံမှုရှိခဲ့ပြီး လတ်တလောနှစ်များတွင် ပြောင်း၊ ကြက်သွန်နီအသေး (shallot)၊ စားအုန်းဆီ၊ ဆီ၊ ကြက်နှင့်ဥတို့မှာ အင်ဒိုနီးရှားနိုင်ငံသား ၂၈၁သန်း၏လိုအပ်ချက်ထက် ပိုလျှံခဲ့ကြောင်းသိရပါသည်။ ဝန်ကြီးက ၂၀၃၀ခုနှစ်တွင် ကမ္ဘာ့လူဦးရေ ၈.၆ဘီလီယံရောက်ရှိရန်ခန့်မှန်းရသဖြင့် စိုက်ပျိုးမွေးမြူရေးကဏ္ဍတွင် မဟာဗျူဟာမြောက်ခြေလှမ်းများကိုချက်ချင်းအကောင်အထည်ဖော်ရန်လိုအပ်ကြောင်းပြောကြားခဲ့ပါသည်။

Source : Antara News

DOCA(ရန်ကုန်)

       ကမ္ဘောဒီးယားနိုင်ငံသည် ယခုနှစ် ဇန်နဝါရီလမှ ဩဂုတ်လကာလအတွင်း ရော်ဘာ ၂၀၉၇၃၃တန်တင်ပို့ခဲ့ပြီး ဝင်ငွေအမေရိကန်ဒေါ်လာ ၃၂၈သန်းရရှိခဲ့ကာ လွန်ခဲ့သည့်နှစ်၏ တူညီသည့်ကာလထက် ၁၅.၅ရာခိုင်နှုန်းမြင့်တက်ခဲ့ကြောင်း  ရာဘာအထွေထွေညွှန်ကြားရေးဦးစီးဌာန၏ ၁၇-၉-၂၀၂၄ ရက်နေ့တွင် ထုတ်ပြန်သည့် အစီရင်ခံစာအရသိရပါသည်။ စိုက်ပျိုးမွေးမြူရေး၊ သစ်တောနှင့်ငါးလုပ်ငန်းဝန်ကြီးဌာန (MAFF) အောက်ရှိ ရော်ဘာအထွေထွေညွှန်ကြားရေးဦးစီးဌာန၏ ညွှန်ကြားရေးမှူးချုပ်ဖြစ်သူ Khun Kakada က ကမ္ဘောဒီးယား၏ ယခုနှစ်ပထမ(၈)လ တင်ပို့မှုသည် လွန်ခဲ့သည့်နှစ်၏ တူညီသည့်ကာလထက် ၄၅၆၅တန်မြင့်တက်ခဲ့ကြောင်းနှင့် ရော်ဘာစေးတစ်တန်တန်ဖိုးမှာ ၁၅၆၅အမေရိကန်ဒေါ်လာရှိပြီး လွန်ခဲ့သည့်နှစ်၏ တူညီသည့်ကာလထက် ၁၈၀အမေရိကန်ဒေါ်လာမြင့်တက်ခဲ့သည်ဟုပြောကြားခဲ့ပါသည်။ ဩဂုတ်လတစ်လတည်းတွင် ရော်ဘာတန်ချိန် ၃၅၈၁၈တန်တင်ပို့ခဲ့ပြီး ဇူလိုင်လထက် ၇.၆၈ရာခိုင်နှုန်းမြင့်တက်ခဲ့ကြောင်းသိရပါသည်။ ကမ္ဘောဒီးယားရော်ဘာ အဓိကတင်ပို့သည့်နိုင်ငံများမှာ မလေးရှား၊ ဗီယက်နမ်၊ စင်္ကာပူနှင့် တရုတ်တို့ဖြစ်ကြောင်းသိရပါသည်။  ကမ္ဘောဒီးယားစိုက်ပျိုးမွေးမြူရေးဝန်ကြီးဌာနသည်  Tboung Khmum ပြည်နယ် Chob ကျေးရွာရှိ သက်တမ်းအရင့်ဆုံးရော်ဘာခြံ၏ ဗီဒီယိုကို ၁၆-၉-၂၀၂၄ ရက်နေ့တွင် ထုတ်ပြန်ခဲ့ကြောင်းသိရပါသည်။ ထိုသမိုင်းဝင်နေရာသည် Chob ရော်ဘာခြံဟုလူသိများပြီး Kakada  က ဦးစီးဌာနရော်ဘာအစီအစဉ်တစ်စိတ်တစ်ပိုင်း၏ ပထမခြေလှမ်းသည် ထိုဒေသကို သင့်လျော်သော အခြေခံအဆောက်အအုံအဖြစ် ပြင်ဆင်ရန်ဖြစ်ကြောင်းသိရပါသည်။ စိုက်ပျိုးမွေးမြူရေးဝန်ကြီး Dith Tina ၏ အကြံပြုချက်အရ Chob ကျေးရွာကို ရော်ဘာစိုက်ခင်းအဖြစ်အသွင်ကူးပြောင်းပြီး ကမ္ဘာလှည့်ခရီးသွားများအား ထိုနေရာနှင့်ပတ်သက်၍ လေ့လာစရာနေရာအဖြစ် ဆွဲဆောင်မည်ဟုသိရပါသည်။

Source: Khmer Times

DOCA(ရန်ကုန်)

         ဗီယက်နမ်နိုင်ငံ ဒုတိယဝန်ကြီးချုပ်နှင့် နိုင်ငံခြားရေးဝန်ကြီးဖြစ်သူ Bui Thanh Son သည် အီဂျစ်နိုင်ငံခြား‌ရေးရာနှင့် လူဝင်မှုကြီးကြပ်ရေးဝန်ကြီး Badr Abdelatty နှင့် စက်တင်ဘာလ ၁၇ရက်နေ့တွင် ဖုန်းဖြင့်ပြောဆိုဆွေးနွေးခဲ့ကြောင်းသိရပါသည်။ Abdelatty က တိုက်ဖွန်းမုန်တိုင်း Yagi ကြောင့် ထိခိုက်ခဲ့ရသည့် ဗီယက်နမ်နိုင်ငံအတွက် နက်ရှိုင်းစွာဝမ်းနည်းကြောင်းပြောကြားခဲ့သည်ဟုသိရပါသည်။ ထို့ပြင် ၎င်းက ဗီယက်နမ်သည် အီဂျစ်၏ အရေးပါသောမိတ်ဖက်ဖြစ်ပြီး နှစ်နိုင်ငံအကြားစီးပွား‌ရေး၊ ရင်းနှီးမြှုပ်နှံမှုတို့တွင် ပူးပေါင်းဆောင်ရွက်မှုအရှိန်မြှင့်တင်ရန် အခန်းကဏ္ဍများစွာရှိကြောင်းနှင့် အီဂျစ်သည် ဗီယက်နမ်စီးပွားရေးလုပ်ငန်းများနှင့် ရင်းနှီးမြှုပ်နှံသူများအတွက် ကောင်းမွန်သင့်လျော်သော အခြေအနေများကိုဖန်တီးပေးရန် အဆင်သင့်ဖြစ်နေကြောင်းပြောကြားခဲ့ပါသည်။ ထို့ပြင် အီဂျစ်သည် Southern Common Market(MERCOSUR)၊ အာရပ်နှင့် အာဖရိကတို့နှင့် လွတ်လပ်စွာကုန်သွယ်‌ရေးသဘောတူညီချက်များ (FTAs) တွင် လက်မှတ်ရေးထိုးထားသောကြောင့်ဗီယက်နမ်လုပ်ငန်းများသည် ထို FTA များ၏ အကျိုးကျေးဇူးကိုရယူကာ စုစုပေါင်းလူဦးရေ ၂ဘီလီယံရှိသော ထိုအားကောင်းသည့်ဈေးကွက်သို့ တင်ပို့မှုမြင့်တက်ရန် FTA များ၏အကျိုးကျေးဇူးကို ရယူနိုင်ကြောင်းပြောကြားခဲ့ပါသည်။ Son ကလည်း Abdelatty အား Yagi မုန်တိုင်းနှင့်ပတ်သက်၍ ၎င်း၏ဂရုဏာစကားအတွက် ကျေးဇူးတင်စကားပြောကြားခဲ့ကြောင်းသိရပါသည်။ နှစ်နိုင်ငံအကြား အလုံးစုံပူးပေါင်းဆောင်ရွက်မှုမြှင့်တင်ရန်အလို့ငှာ Son က နှစ်ဖက်စလုံးသည် အစည်းအဝေးများပြုလုပ်ခြင်း၊ ကိုယ်စားလှယ်အဖွဲ့များ အပြန်အလှန်စေလွှတ်ခြင်းနှင့် ကုလသမဂ္ဂကဲ့သို့သော ဘက်ပေါင်းစုံပါဝင်သောဖိုရမ်များတွင် အချင်းချင်းပံ့ပိုးရန်နှင့် ညှိနှိုင်းကြရန် အကြံပြုခဲ့ကြောင်းသိရပါသည်။ Son က ArabLeague နှင့် ASEAN ကဲ့သို့သော ၎င်းတို့နှစ်နိုင်ငံတွင် တစ်နိုင်ငံက အဖွဲ့ဝင်ဖြစ်နေသည့် ဒေသတွင်းအဖွဲ့အစည်းတို့တွင် တစ်ဖက်နှင့်တစ်ဖက် ပူးပေါင်းဆောင်ရွက်မှုမြှင့်တင်ရန် အနီးကပ်အတူ တကွလုပ်ဆောင်သွားရန် အဆိုပြုကမ်းလှမ်းခဲ့ပါသည်။ ဝန်ကြီးနှစ်ဦးစလုံးသည် နှစ်နိုင်ငံ၏ နိုင်ငံခြားရေးဝန်ကြီးဌာနများအကြား အနီးကပ်ပူးပေါင်းဆောင်ရွက်မှုအားကောင်းရန်၊ ရိုးရာခင်မင်မှုကိုဆက်လက်မြှင့်တင်ရန်၊ ဗီယက်နမ်နှင့်အီဂျစ်အကြား ဘက်ပေါင်းစုံပူးပေါင်းဆောင်ရွက်ရန် ကတိပြုခဲ့ကြကြောင်းသိရပါသည်။

Source: Vietnam Plus

DOCA(ရန်ကုန်)

       ဗီယက်နမ် ရွှေဈေးနှုန်းများသည် ဇွန်လ ၁ရက်နေ့မှအစပြု၍ စက်တင်ဘာလ ၁၆ရက်နေ့အထိ ၁ tael (ရွှေ ၁ tael သည် တရုတ်နှင့် ဂျပန်တို့တွင် ငွေကြေးအဖြစ် အသုံးပြုခဲ့သည့် ရှေးဟောင်းအလေးချိန်ယူနစ်ဖြစ်ပြီး ၃၇.၅ဂရမ် (သို့မဟုတ်) (၁.၂ ထရွိင်အောင်စယူနစ်နှင့်ညီမျှသည်။) လျှင် VND ၈၂သန်း (အမေရိကန်ဒေါ်လာ၃၃၃၅.၃၇ ) သို့ ၁.၈၆ % သို့ ခုန်တက်သွားခဲ့ပြီး ကမ္ဘာ့နှုန်းထားများ၏ အထွတ်အထိပ်သို့ ရောက်ရှိကြောင်းသိရသည်။ ရွှေဂွင်းဈေးနှုန်းများမှာ ၁ tael လျှင် VND ၇၉.၂ သန်းဖြင့် တည်ငြိမ်လျက်ရှိသည်။

.    အားနည်းသောဒေါ်လာဈေးနှုန်းနှင့် Fed ၏ ကြီးမားသောအတိုးနှုန်းလျှော့ချရေးအလားလာတို့ကြောင့် တနင်္လာနေ့တွင် ရွှေဈေးနှုန်းများသည် တစ်အောင်စလျှင် အမေရိကန်ဒေါ်လာ၂၅၈၉.၆သို့မြင့်တက်လာခဲ့ကြောင်း Reufers သတင်းတွင် ဖော်ပြထားသည်။

          Goldman Sachs သည် ယခုသီတင်းပတ်အတွင်း ၎င်း၏ မူဝါဒအစည်းအဝေးတွင် ဗဟိုဘဏ်၏ ဝယ်လိုအားနှင့် US Federal Reserve မှ အတိုးနှုန်းလျော့ချခြင်းကိုကိုးကား၍ တနင်္လာနေ့က ၎င်း၏ရွှေဈေးနှုန်းအပေါ် အကောင်းမြင်သောအမြင်ဖြင့် ထမ်လောင်းပြောကြားခဲ့သည်။

          Saigon Jawelry Company (SJC) မှ ရွှေ ၁ tael လျှင် ရောင်းသူများအတွက်  VND သန်း၈၀နှင့် ဝယ်သူများအတွက် VND ၈၂သန်းရှိကြောင်း စာရင်းပြုစုခဲ့သည်။ ဈေးနှုန်းများသည် လွန်ခဲ့သောရက်များနှင့်နှိုင်းယှဉ်ပါက VND ၁.၅ သန်း(၆၁ဒေါ်လာ) သို့ တက်လာခဲ့ကြောင်းသိရပါသည်။

Source : vnexpress

DOCA(ရန်ကုန်)