ပြည်ပကုန်သွယ်မှုသတင်းများ

    ဗီယက်နမ်စီးပွားရေးလုပ်ငန်း ၁၅ ခုမှ ပရိဘောဂထုတ်ကုန်များအား UK ၏ ဘာမင်ဂမ်မြို့ တွင် စက်တင်ဘာလ ၁၀ ရက်နေ့မှ ၁၂ ရက်နေ့အထိ ကျင်းပပြုလုပ်ခဲ့သော Source Garden Fair တွင် မိတ်ဆက်ပြသခဲ့သည်ဟု သိရပါသည်။ ယခုအကြိမ်သည် UK ၏ အကြီးမားဆုံး ဥယျာဉ်နှင့် အပြင်ပန်းအလှဆင်ပရိဘောဂကုန်စည်ပြပွဲတွင် ဗီယက်နမ်၏ ပထမဆုံးပါဝင်ဆင်နွှဲမှုဖြစ်ပြီး လက်ကား‌ရောင်းချသူများ၊ လက်လီရောင်းချသူများနှင့် သုံးစွဲသူများ၏ စိတ်ဝင်စားမှုရရှိခဲ့ကြောင်း သိရပါသည်။  ပွဲတော်တွင် ဥယျာဉ်အလှဆင်ပရိဘောဂ၊ လက်မှုပညာထုတ်ကုန်များနှင့် အလှဆင်နည်းပညာများကို ပြသသည့် ကုမ္ပဏီပေါင်း ၇၀၀ မှ ၈၀၀ ကြား ပါဝင်ပြသခဲ့ပြီး UK နှင့်ဥရောပမှ ဝယ်ယူသူ ၇၀၀၀ ခန့်ကို ဆွဲဆောင်နိုင်ခဲ့ကြောင်း သိရပါသည်။ အပြင်ပန်းအလှဆင်သစ်ပရိဘောဂ များနှင့် လက်မှုပစ္စည်းများ ခင်းကျင်းပြသသည့် ဗီယက်နမ်၏ပြခန်းသည် နိုင်ငံတကာစံနှုန်း သတ်မှတ်ချက်ရှိသည့် ပစ္စည်းအရင်းအမြစ်များနှင့် ပြုလုပ်ထားကြောင်း သိရပါသည်။ ဗီယက်နမ် ကုမ္ပဏီများ ပါဝင်ဆင်နွှဲမှုကို UK နိုင်ငံဆိုင်ရာ ဗီယက်နမ်ကုန်သွယ်ရေးရုံးနှင့် ဗီယက်နမ်သစ် ထုတ်ကုန်များကို Online Platforms မှတစ်ဆင့် ချိတ်ဆက်ဝယ်ယူလျက်ရှိသည့် UK ကုမ္ပဏီ K & P Global Ltd က ပံ့ပိုးပေးခဲ့ကြောင်း သိရပါသည်။ ဗီယက်နမ်ကုန်သွယ်‌ရေးရုံး၏ အတွင်းရေးမှူး (၁)ဖြစ်သူ Hoang Le Hang က ပွဲ၏ပထမနေ့တွင် ဗီယက်နမ်ထုတ်ကုန်များကို သိသာသည့် စိတ်ဝင်စားမှုများရှိခဲ့ကြောင်းနှင့် ယခုပွဲတော်သည် ဗီယက်နမ်စီးပွားရေးလုပ်ငန်းများ၏ အမှတ် တံဆိပ်ပိုမိုအားကောင်းစေရန်၊ UK နှင့်ဥရောပရှိ အဓိကလက်လီရောင်းချသူများနှင့် ချိတ်ဆက်ရန် အတွက် အကောင်းမွန်ဆုံးစင်္ကြန်တစ်ခုအဖြစ် ပံ့ပိုးပေးနိုင်မည်ဟု ပြောကြားခဲ့ပါသည်။ Source Garden ၏ ပွဲတော်ညွှန်ကြားရေးမှူး Suzanne Ellingham က  UK ဈေးကွက်တွင် ဗီယက်နမ်၏ ပါဝင်မှုကို ပိုမိုတိုးမြှင့်ရန်တိုက်တွန်းခဲ့ပြီး ဗီယက်နမ်သည် UK သို့ အရည်အသွေးမြင့်မားသော အတွင်းနှင့်အပြင်ပန်းအလှဆင်ပရိဘောဂများအား အဓိကပံ့ပိုးပေးရန် အလားအလာရှိသူဖြစ်ကြောင်း ပြောကြားခဲ့ပါသည်။ K & P Global Ltd ၏ စီးပွားရေးဖွံ့ဖြိုးတိုးတက်မှုမန်နေဂျာ Raymond Tenent က Brexit သည် ဗီယက်နမ်ထုတ်ကုန်များအတွက် အလားအလာရှိသော အခွင့်အလမ်းကို ဖန်တီးပေးကြောင်း၊ အဘယ်ကြောင့်ဆိုသော် UK သည် ဥရောပပြင်ပမှတင်သွင်းရန် ရှာဖွေနေသောကြောင့်ဖြစ်ကြောင်းနှင့် ဗီယက်နမ်ကုန်ထုတ်လုပ်သူများသည်လည်း အခြား အာရှမှပြိုင်ဘက်များနှင့် ယှဉ်ပြိုင်နိုင်စွမ်းကို ဆက်လက်ထိန်းသိမ်းရန် ဈေးကွက်ဦးတည်ရာကို ဂရု တစိုက်လေ့လာသင့်ကြောင်း ပြောကြားခဲ့ပါသည်။ ၂၀၂၃ ခုနှစ်တွင် ဗီယက်နမ်သည် တရုတ်၊ အီတလီ၊ ပိုလန်နှင့် ဂျာမနီတို့နောက်တွင် UK ၏ (၅) နိုင်ငံမြောက်အကြီးမားဆုံးသစ်ပရိဘောဂ တင်သွင်းသူဖြစ်ကြောင်း သိရပါသည်။ ၂၀၂၄ ခုနှစ်၏ ပထမ(၇)လတွင် ဗီယက်နမ်သစ်ထုတ်ကုန်များ UK သို့တင်ပို့မှုမှာ အမေရိကန်ဒေါ်လာ ၁၂၄.၈ သန်းရှိခဲ့ပြီး လွန်ခဲ့သည့်နှစ်တူညီသည့်ကာလ ထက် ၁၇.၈ ရာခိုင်နှုန်းမြင့်တက်ခဲ့ကြောင်း သိရပါသည်။

Source: Vietnam Plus

DOCA(ရန်ကုန်)

      ထိုင်းနိုင်ငံ၊ စီးပွားကူးသန်းဝန်ကြီးအသစ်ဖြစ်သူ Pichai Naripthaphan  က လူနေမှုကုန်ကျ စရိတ်မြင့်မားမှုကို ရင်ဆိုင်ဖြေရှင်းရန်အတွက် အ‌ရေး‌ပေါ်စီမံချက်များချမှတ်ရန်၊ လွတ်လပ်သော ကုန်သွယ်ရေးသဘောတူညီချက်(FTA)ဆွေးနွေးမှုများကို အရှိန်မြှင့်တင်ရန်နှင့် တရုတ်ထံမှသွင်း ကုန်များ ဖုံးလွှမ်းလာမှုကို တင်းကြပ်စွာထိန်းချုပ်ရန် ကတိပြုခဲ့ကြောင်း သိရပါသည်။ ၎င်း၏ ပထမဆုံးလုပ်ငန်းတာဝန်ယူသည့်နေ့တွင် Mr.Pichai က ၎င်းသည် စီးပွားကူးသန်းဒုတိယဝန်ကြီး (၂)ဦးနှင့်အတူ ဘေးကြပ်နံကြပ်ကာလရောက်နေသည့် ထိုင်းနိုင်ငံ၏စီးပွားရေးကို မောင်းနှင်ရန် အရေးပါသောလုပ်ငန်းတာဝန်များကို ဆောင်ရွက်ရန်အတွက် အဆင်သင့်ဖြစ်နေကြောင်း ပြော ကြားခဲ့ပါသည်။  Mr.Pichai က လူနေမှုကုန်ကျစရိတ်များကိုလျှော့ချခြင်း၊ ပိုမိုကောင်းမွန်သည့် ထုတ်ကုန်ဈေးနှုန်းများအတွက် အာမခံခြင်း၊ SME လုပ်ငန်းမျာအား ပံ့ပိုးပေးခြင်း၊ FTA များအား အကျိုးရှိရှိအသုံးချနိုင်ရန်ကြိုးပမ်းခြင်းနှင့် ဈေးပေါပြီးအရည်အသွေးနိမ့်သော သွင်းကုန်များဖုံးလွှမ်း လာမှုကို ဟန့်တားခြင်း စသည်တို့ပါဝင်သည့် စီးပွားကူးသန်းဝန်ကြီးဌာန၏  မူဝါဒများကို အစိုးရ၏ မူဝါဒများ ပါလီမန်သို့ရှင်းလင်းတင်ပြပြီးပါက  ကြေညာမည်ဟု ပြောကြားခဲ့ပါသည်။ ဝန်ကြီးဌာန၏ ကြီးကြပ်မှုအောက်တွင် သက်ဆိုင်ရာအေဂျင်စီများကို လုပ်ငန်းတာဝန်ပေးအပ်ရန်အတွက် ဌာန၏ အလုပ်အမှုဆောင်များနှင့်အစည်းအဝေးကို ၁၆-၉-၂၀၂၄ ရက်နေ့တွင် ကျင်းပရန် စီစဉ်ထားသည် ဟု သိရပါသည်။ ဝန်ကြီးက ၎င်း၏ပထမဦးစားပေးသည် ကုန်ဈေးနှုန်းများကို ပြန်လည်ဆန်းစစ်ရန်  နှင့် ဈေးနှုန်းများကိုလျှော့ချရန်အတွက် စီးပွားရေးလုပ်ငန်းများနှင့်အတူ အလုပ်လုပ်ရန်၊ လူထု၏ ဝန်ထုပ်ဝန်ပိုးကိုလျော့ပါးစေရန်ဖြစ်သည်ဟု ပြောကြားခဲ့ကြောင်း သိရပါသည်။ တရုတ်ထံမှ သွင်းကုန်များနှင့်ပတ်သက်၍ ဝန်ကြီးသည် စိန်ခေါ်မှုများရှိနိုင်မှုကို ဝန်ခံခဲ့ပြီး လက်ရှိတည်ရှိနေ သော စီမံချက်များကို ပြန်လည်သုံးသပ်ရမည်ဖြစ်ကြောင်းနှင့် အကယ်၍ လက်ရှိစည်းမျဉ်းများက ထိရောက်မှုမရှိပါက ထပ်တိုးစီမံချက်များချမှတ်ရမည်ဟု ပြောကြားခဲ့ပါသည်။ သို့သော် ဝန်ကြီး သည် တရုတ်ကုန်ပစ္စည်းများကို အသားပေးပြောကြားမှုကို ရှောင်ရှားခဲ့ကြောင်း သိရပါသည်။ ထို့ပြင် Mr.Pichai က ထိုင်းနိုင်ငံတွင် နိုင်ငံခြားရင်းနှီးမြှုပ်နှံမှုများ တိုးမြှင့်ရရှိလာနိုင်သောကြောင့် အခြားနိုင်ငံများနှင့် FTA ဆွေးနွေးမှုများကို အမြန်ပြီးမြောက်စေရန် အရေးကြီးကြောင်း ပြောကြားခဲ့သည်ဟု သိရပါသည်။

Source: Bangkok Post

DOCA(ရန်ကုန်)

     ဖိလစ်ပိုင်နိုင်ငံ၏ ဆန်တင်သွင်းမှုသည် ဇန်နဝါရီလမှ သြဂုတ်လအထိ စုစုပေါင်း တန်ချိန် ၂.၈ သန်း ရှိပြီး ၂၀၂၃ ခုနှစ် အလားတူကာလ၌ တင်သွင်းခဲ့သော ဆန်တန် ၂.၃ သန်းထက် ၁၉ ရာခိုင်နှုန်း ပိုမိုခဲ့ကြောင်း ဖိလစ်ပိုင် လယ်ယာစိုက်ပျိုးရေးဦးစီးဌာန (DA) ၏ အချက်အလက်များ အရ သိရသည်။

    အဆိုပါဌာနရှိ စိုက်ပျိုးရေးဗျူရိုမှ နောက်ဆုံးထုတ်ပြန်သော အစီရင်ခံစာတွင် ပြည်ပမှဆန် ဝင်ရောက်မှုသည် သြဂုတ်လ တစ်လတည်း၌ပင် ၂၉၆၃၅၀ တန်ရှိပြီး ဇူလိုင်လတွင် ဝင်ရောက် သည့် ဆန် ၁၆၇၄၀၃.၈ တန်ထက် ပိုမိုလာခဲ့သည်။ သို့သော် ၎င်းပမာဏသည် အစောပိုင်းလများ တွင် ပျမ်းမျှလစဉ်ဝင်ရောက်ခဲ့သည့် ဆန်တန်ချိန် ၄၀၀၀၀၀ အောက် လျော့နည်းနေဆဲဖြစ်ကြောင်း သိရသည်။

    ပုံမှန်စက်ကြိတ်အဆင့်ဆန်နှင့် ကောင်းမွန်သောစက်ကြိတ်အဆင့်ဆန် နှစ်မျိုးလုံးအတွက်  ဈေးနှုန်းများသည် တစ်ကီလိုဂရမ်လျှင် ပီဆို ၄၅ ဝန်းကျင်နှင့် အချို့ဒေသများတွင် ပီဆို ၄၂ အထိ ကျဆင်းလာကြောင်း စိုက်ပျိုးရေး လက်ထောက်အတွင်းဝန်နှင့် ပြောရေးဆိုခွင့်ရှိသူ Arnel de Mesa က စက်တင်ဘာ ၅ ရက်နေ့တွင် ပြောကြားခဲ့သည်။

    လယ်ယာစိုက်ပျိုးရေးဦးစီးဌာနသည် ယခုနှစ်တွင် စပါးမက်ထရစ်တန်ချိန် ၂၀.၄ သန်း သို့မဟုတ် ဆန်တန်ချိန် ၁၃.၇ သန်း ထုတ်လုပ်နိုင်ရန် ရည်မှန်းထားသည်။ စိုက်ပျိုးရေး အတွင်းဝန် Francisco Tiu Laurel Jr. က ဥပဒေကဲ့သို့ အာဏာတည်သောအမိန့် Executive Order 62 ၏ အကျိုးသက်ရောက်မှုများကို အောက်တိုဘာလတွင် စတင်ခံစားနိုင်မည် ဖြစ်ကြောင်း ပြောကြားခဲ့ သည်။ လွန်ခဲ့သည့် ဇွန်လအတွင်း အမျိုးသားစီးပွားရေးနှင့် ဖွံ့ဖြိုးတိုးတက်ရေး အာဏာပိုင်အဖွဲ့က တင်သွင်းသည့် ဆန်များအပေါ် အခွန်ကောက်ခံမှုအား ယခင် ၃၅ ရာခိုင်နှုန်းမှ ၁၅ ရာခိုင်နှုန်းသို့ လျှော့ချခဲ့ခြင်းကြောင့် နိုင်ငံတွင်း လက်လီဈေးနှုန်းများကို ကျဆင်းစေခဲ့သည်ဟု သိရပါသည်။

   ယခုနောက်ဆုံးတင်သွင်းခဲ့သော ဆန်ပမာဏသည် သွင်းကုန်များအား ဆိပ်ကမ်းရှင်းလင်းရန်အတွက် အသိအမှတ်ပြုထားသောကုန်သည်များထံသို့ စိုက်ပျိုးရေးဗျူရိုမှ ထုတ်ပေးခဲ့သော တိရစ္ဆာန်နှင့်အပင်များ ကျန်းမာရေးနှင့်ရောဂါကင်းရှင်းရေးဆိုင်ရာ သက်သေခံလက်မှတ်စောင်ရေ ၃၈၃၀ စောင်နှင့် ကိုက်ညီမှုရှိပါသည်။

     စိုက်ပျိုးရေးဗျူရို၏ အစီရင်ခံစာတွင် ဗီယက်နမ်သည် ဖိလစ်ပိုင်နိုင်ငံ၏ အဓိက ဆန်အရင်း အမြစ်အဖြစ် ဆက်လက်တည်ရှိနေခဲ့ပြီး စုစုပေါင်းတင်သွင်းမှု၏ ၇၇ ရာခိုင်နှုန်းခန့်ရှိသော ဆန်တန်ချိန် ၂.၁၇ သန်းကျော်ကို တင်သွင်းခဲ့ခြင်းဖြစ်ကြောင်း၊ ၎င်း၏နောက်တွင် ထိုင်းမှ ၃၇၁၃၉၀ တန်၊ ပါကစ္စတန်မှ ၁၅၆၁၂၁ တန်နှင့် မြန်မာနိုင်ငံမှ ၆၆၉၁၀ တန်တို့ဖြစ်ပြီး ကျန်ပမာဏများမှာ အိန္ဒိယ၊ တရုတ်၊ ဂျပန်၊ ကမ္ဘောဒီးယား၊ အီတလီနှင့် စပိန်တို့မှဖြစ်ကြောင်း ဖော်ပြထားသည်။

     ၂၀၂၃ ခုနှစ်တွင် ပြည်တွင်းသို့ ဆန်တင်သွင်းမှု စုစုပေါင်းတန်ချိန် ၃.၆ သန်းရှိပြီး စံချိန်တင် မြင့်မားခဲ့သည့် ၂၀၂၂ ခုနှစ်၌ တင်သွင်းမှု တန်ချိန် ၃.၈၂ သန်းအောက် ၅.၉ ရာခိုင်နှုန်း ကျဆင်းခဲ့ပါသည်။ လယ်ယာစိုက်ပျိုးရေးဦးစီးဌာနသည် ၂၀၂၄ ခုနှစ်အတွက် ဆန်တင်သွင်းမှုကို ယခင်နှစ် ပမာဏထက် မကျော်လွန်စေရန် စီမံထားကြောင်း၊ လာမည့်လများအတွင်း ဆန်ဈေးနှုန်းများ ဆက် လက်ကျဆင်းမည်ဟု မျှော်မှန်းထားကြောင်း သိရပါသည်။

    ဆန်ဈေးနှုန်းဖောင်းပွမှုသည် ဇူလိုင်လ၌ ၂၀.၉ ရာခိုင်နှုန်းရှိရာမှ သြဂုတ်လတွင် ၁၄.၇ ရာခိုင်နှုန်းသို့ ကျဆင်းခဲ့ကြောင်း ဖိလစ်ပိုင် စာရင်းအင်းအာဏာပိုင်အဖွဲ့၏ အစီရင်ခံစာ၌ ဖော်ပြ ထားသည်။ စားသောက်ကုန် ဈေးနှုန်းဖောင်းပွမှုသည်လည်း ၆.၇ ရာခိုင်နှုန်းမှ ၄.၂ ရာခိုင်နှုန်းသို့ ကျဆင်းခဲ့ပြီး ရလဒ်အနေဖြင့် စုစုပေါင်း ငွေကြေးဖောင်းပွမှုနှုန်းသည် ပြီးခဲ့သည့်လတွင် ၃.၀ ရာခိုင် နှုန်းသို့ ကျဆင်းခဲ့သည်။

    စိုက်ပျိုးရေးလက်ထောက်အတွင်းဝန် de Mesa က ဆန်ဈေးနှုန်းများ သိသာစွာကျဆင်း ခဲ့သဖြင့် ကျေနပ်အားရကြောင်းနှင့် လာမည့်လများတွင်လည်း ထပ်မံကျဆင်းရန် မျှော်လင့်ထား ကြောင်း၊ လက်ရှိ ရာသီဥတု၏ အနှောင့်အယှက်သည် ကြီးမားသော ထိခိုက်မှုမရှိနိုင်ကြောင်းနှင့် နှစ်စဉ်ဆုံးရှုံးမှုများသည် စီမံခန့်ခွဲနိုင်သော ကန့်သတ်ချက်များအတွင်းသာရှိကြောင်း ပြောကြားခဲ့ ပါသည်။   

Source: Manila Times, September 6, 2024(လယ်ယာထွက်ကုန်များ နှင့် အဓိကသွင်းကုန်များ၏ နိုင်ငံတကာဈေးကွက် စောင့်ကြည့် လေ့လာရေးအဖွဲ့)

     အဓမ္မအလုပ်ခိုင်းစေမှု သို့မဟုတ် ကလေးလုပ်သား အသုံးပြု၍ ထုတ်လုပ်သည်ဟု သံသယရှိသောပို့ကုန်စာရင်းမှ ထိုင်းနိုင်ငံ၏ ပုစွန်ထွက်ကုန်များအား အမေရိကန်အစိုးရမှ ဖယ်ရှားလိုက်သည်ဟု ထိုင်းအလုပ်သမားဝန်ကြီး Phiphat Ratchakitprakarn က ပြောကြားခဲ့သည်။

    အဆိုပါ ဆုံးဖြတ်ချက်သည် ပုစွန်ထုတ်လုပ်မှုကဏ္ဍအတွက်သာမက ငါးဖမ်းလုပ်ငန်းနှင့် လုပ်သားအင်အား အခြေပြုလုပ်ငန်းများအတွက်ပါ အရေးပါသော ခြေလှမ်းတစ်ရပ်ဖြစ်ကြောင်း၊ အမေရိကန်ဈေးကွက်ရှိ ထိုင်းစီးပွားရေးလုပ်ငန်းများအတွက် ကုန်သွယ်မှုနှင့် ပို့ကုန်အခွင့်အလမ်းများ တိုးတက်ကောင်းမွန်လာရန် မျှော်လင့်ကြောင်း ၎င်းက ဆက်လက်ပြောကြားခဲ့သည်။

    နိုင်ငံအများအပြားတွင် ကလေးလုပ်သား သို့မဟုတ် အဓမ္မအလုပ်ခိုင်းစေမှုမှတစ်ဆင့် ထုတ်လုပ်သည့် ကုန်ပစ္စည်းများနှင့်ပတ်သက်သည့် နောက်ဆုံးအခြေအနေများကို စက်တင်ဘာ ပထမ ပတ် အစောပိုင်းတွင် အမေရိကန်နိုင်ငံ အလုပ်သမားဦးစီးဌာနက ထုတ်ပြန်ခဲ့ကြောင်း၊ ကလေးလုပ်သားအား အဓမ္မစေခိုင်း၍ ထုတ်လုပ်ထားသည့် ကုန်စည်များကို ခြေရာခံထားသော ၂၀၂၄ ခုနှစ် အတွက် ကလေးလုပ်သား သို့မဟုတ် အဓမ္မအလုပ်ခိုင်းစေမှုမှတစ်ဆင့် ထုတ်လုပ်သည့် ကုန်ပစ္စည်းများစာရင်းနှင့် အုပ်ချုပ်ရေးဆိုင်ရာ အမိန့်များစာရင်းမှ ထိုင်းနိုင်ငံ၏ ပုစွန်အား ဖယ်ရှားခဲ့ကြောင်း သိရှိရသည်။

    အမေရိကန် အလုပ်သမားဦးစီးဌာနသည် ထိုင်းနိုင်ငံမှ ပုစွန်များကို ၎င်း၏ အုပ်ချုပ်ရေးဆိုင် ရာ အမိန့်များစာရင်းတွင် ၂၀၀၉ ခုနှစ်မှ စတင်ထည့်သွင်းခဲ့ကြောင်း၊ အဆိုပါစာရင်းသည် အတင်း အဓမ္မစေခိုင်းခံရသော ကလေးလုပ်သားများ၏ လုပ်အားကို အသုံးပြုထုတ်လုပ်ထားသည့် ကုန်ပစ္စည်းများအား အမေရိကန်ပြည်ထောင်စု အေဂျင်စီများမှ ၀ယ်ယူခြင်းမပြုရေး အာမခံချက်ပေးရန် ရည်ရွယ်ကြောင်း သိရှိရသည်။

    အမေရိကန်၏ ဝယ်ယူရေးစည်းမျဉ်းများအောက်တွင် ထုတ်ကုန်များကို ထောက်ပံ့ပေးသွင်း သည့် စာရင်း၌ပါရှိသော ပြည်ထောင်စုကန်ထရိုက်တာများအနေဖြင့် ယင်းကုန်စည်များ ထုတ်လုပ် ရာတွင် အတင်းအဓမ္မ စေခိုင်းခံရသော ကလေးလုပ်သားများအား အသုံးပြုခြင်းရှိ/မရှိကို  စစ်ဆေးဆုံးဖြတ်ရန် ကောင်းစွာကြိုးပမ်းအားထုတ်ခဲ့သည်မှာ မှန်ကန်ကြောင်း တရားဝင်ဖော်ပြရမည်ဖြစ် သည်။

ထိုင်းအလုပ်သမား အသုံးပြုမှုဆိုင်ရာ အလေ့အထများနှင့် စပ်လျဉ်း၍ အမေရိကန်နိုင်ငံ၏ အကဲဖြတ်ချက်အသစ်တွင် ပုစွန်လုပ်ငန်းတွင် အဓမ္မအလုပ်ခိုင်းစေမှု သို့မဟုတ် ကလေးလုပ်သား အသုံးပြုမှုနှင့် ပတ်သက်သော စိုးရိမ်ပူပန်မှုများကို ဖြေရှင်းရန် အစိုးရနှင့် ပုဂ္ဂလိကကဏ္ဍနှစ်ခုလုံးမှ ကြိုးပမ်းအား ထုတ်ခဲ့သည်ကို တွေ့ရှိခဲ့သည်ဟု Mr Phiphat က ပြောကြားခဲ့သည်။

 ထိုင်းအလုပ်သမားကာကွယ်ရေးနှင့် လူမှုဖူလုံရေးဌာန၏ အကြီးအကဲ Sopha Kiatniracha ကလည်း ပုစွန်ထုတ်လုပ်မှုကဏ္ဍတွင် အဓမ္မအလုပ်ခိုင်းစေမှုနှင့် ကလေးလုပ်သားအသုံးပြုမှုတို့ ပပျောက်ရေးအတွက် ဌာနအနေဖြင့် ဥပဒေများကို လိုက်နာမှုရှိစေရေး တင်းကျပ်စွာ လုပ်ဆောင်လျက်ရှိခဲ့ကြောင်း၊ စံပြုလုပ်သားခိုင်းစေမှု အလေ့အထများကို ကျင့်သုံးစေရန်အတွက် ပုစွန်ထုတ် လုပ်သည့်လုပ်ငန်းနှင့် ၎င်း၏ထုတ်ကုန်ကွင်းဆက်တို့၌ ကြိုတင်ကာကွယ်လုပ်ဆောင်မှုနှင့်အတူ တွန်းအားပေးဆောင်ရွက်ခဲ့ကြောင်း၊ ရွှေ့ပြောင်းအလုပ်သမားများနှင့် ပတ်သက်၍ အလွဲသုံးစားပြုမှု တားဆီးရေးအတွက်လည်း အစိုးရမဟုတ်သောအဖွဲ့အစည်း ၁၂ ခုနှင့် ပူးပေါင်းဆောင်ရွက်ခဲ့ကြောင်း ပြောကြားခဲ့သည်။

Source: Bangkok Post, 6 September, 2024(လယ်ယာထွက်ကုန်များ နှင့် အဓိကသွင်းကုန်များ၏ နိုင်ငံတကာဈေးကွက် စောင့်ကြည့် လေ့လာရေးအဖွဲ့)

     ဗီယက်နမ်နိုင်ငံတွင် သရက်၊ လုံငန်းသီး (သို့မဟုတ်) တောကြက်မောက်သီး၊ လိုင်ချီးနှင့် နဂါးမောက်သီးတို့ပြီးလျှင် ပင်မှည့်သီးသည် ဩစတြေးလျနိုင်ငံသို့် ပဥ္စမမြောက်တရားဝင်တင်ပို့ သည့် သီးနှံတစ်ခုဖြစ်လာကြောင်း သိရှိရပါသည်။

     ဗီယက်နမ် စိုက်ပျိုးရေးနှင့် ကျေးလက်ဖွံ့ဖြိုးမှုဝန်ကြီးဌာန အောက်ရှိ အပင်ကာကွယ်ရေး ဦးစီးဌာနနှင့် ဗီယက်နမ်ရှိ ဩစတြေးလျသံရုံးတို့ ပူးပေါင်းလျက် ဗီယက်နမ်ပင်မှည့်သီးများကို ဩစတြေးလျသို့တင်ပို့မှုနှင့် ဩစတြေးလျဆီးသီးများကို ဗီယက်နမ်သို့ တင်သွင်းမှု စတင်ကြောင်း ကြေညာသည့် အခမ်းအနားကို စက်တင်ဘာလ ၉ ရက်နေ့၌ ကျင်းပခဲ့ကြောင်း သိရှိရပါသည်။

    ဗီယက်နမ်အပင်ကာကွယ်ရေးဦးစီးဌာနမှ ညွှန်ကြားရေးမှူး Huynh Tan Dat က ဗီယက်နမ် နိုင်ငံအနေဖြင့် အပူပိုင်းဒေသ သစ်သီးများအား စိုက်ပျိုးဖြစ်ထွန်းမှု အလားအလာကောင်းများကို ပိုင်ဆိုင်ထားကြောင်း ပြောကြားခဲ့သည်။ လက်ရှိကာလ၌  ဗီယက်နမ်သစ်သီးများကို နိုင်ငံပေါင်း ၆၀ ကျော်သို့ တင်ပို့လျက်ရှိပြီး အထူးသဖြင့်ပင်မှည့်သီးများကို နိုင်ငံပေါင်း ၂၀ သို့ လတ်ဆတ် သစ်သီး၊ အေးခဲသစ်သီးနှင့် အချိုရည် စသည့်ပုံစံများဖြင့် တင်ပို့လျက်ရှိပါသည်။

    လက်ရှိအချိန်တွင် ဗီယက်နမ်နိုင်ငံ၌ ပင်မှည့်သီး စိုက်ပျိုးမှုဧရိယာ ဟက်တာ ၁၂၀၀၀ ကျော်ရှိပြီး မြောက်ပိုင်းတောင်တန်းဒေသများတွင် တိုးချဲ့စိုက်ပျိုးလျက်ရှိကြောင်း၊ အလယ်ပိုင်းကုန်းမြင့်ဒေသများရှိ ခရိုင်အများအပြားတွင်လည်း ပင်မှည့်သီးစိုက်ဧကကို တိုးချဲ့လျက်ရှိကြောင်း သိရှိရပါသည်။

   မကြာသေးမီနှစ်များအတွင်း ဗီယက်နမ်နိုင်ငံသည် ပင်မှည့်သီးအဝါနှင့် ပင်မှည့်သီးခရမ်း အရောင်မျိုးကွဲနှစ်မျိုးလုံးအား အဓိကထား၍ ထုတ်ကုန်ဆိုင်ရာ နောက်ကြောင်းပြန်ခြေရာခံခြင်းနှင့် ထုတ်လုပ်မှုကွင်းဆက်မြှင့်တင်ခြင်းတို့ဖြင့် ပင်မှည့်သီးများ၏ အရည်အသွေး တိုးတက်ကောင်း မွန်စေရေး အလေးထားဆောင်ရွက်ခဲ့သည်။ ပင်မှည့်သီးထုတ်ကုန်များမှ အကျိုးအမြတ်ပိုမိုရရှိရန်နှင့် တင်သွင်းမည့်နိုင်ငံများ၏ စည်းမျဉ်းစည်းကမ်းများအားလိုက်နာ၍ ပင်မှည့်သီးထုတ်လုပ်မှုကို တိုးမြှင့်သွားရန်အတွက် အပင်ကာကွယ်ရေးဦးစီးဌာန အနေဖြင့် လယ်သမားများနှင့် ဒေသခံ ပြည်သူများအား ညွှန်ကြားပြသပေးသွားမည်ဖြစ်ကြောင်း သိရှိရပါသည်။

     ဗီယက်နမ်နှင့် ဩစတြေးလျ နှစ်နိုင်ငံအနေဖြင့် သစ်သီးဝလံအပါအဝင် လယ်ယာထုတ်ကုန် များအား ကုန်သွယ်မှုပြုရာတွင်  နှစ်နိုင်ငံလုံးအတွက် အကျိုးရှိသည့် မိတ်ဖက်ဆက်ဆံရေးကို ရရှိ ခံစားရလျက်ရှိကြောင်း၊ နှစ်ဦးနှစ်ဘက် အပြန်အလှန်ယုံကြည်မှုနှင့် ပူးပေါင်းအားထုတ်မှုတို့၏ အကျိုးရလဒ်အဖြစ် တစ်နိုင်ငံမှ အရည်အသွေးမြင့်မားသည့် သစ်သီးဝလံများသည်  အခြားတစ်နိုင်ငံ ဈေးကွက်သို့ ဝင်ရောက်လာကြောင်း၊ ဗီယက်နမ် ပင်မှည့်သီးကို အကဲဖြတ်ပေးရလျှင် အလွန်အရသာရှိသော သစ်သီးဖြစ်ကြောင်း၊ နှစ်နိုင်ငံလုံးအနေဖြင့် ဗီယက်နမ်မှ ရှောက်ချိုသီးနှင့် ဩစတြေးလျ ဘလူးဘယ်ရီသီးများကို အပြန်အလှန်ဈေးကွက်တင်ပို့နိုင်ရေး ရှေ့လာမည့် ကာလ တွင် ဆက်လက်အပြီးသတ် ဆွေးနွေးဆောင်ရွက်သွားမည်ဖြစ်ကြောင်း စသည်ဖြင့် ဗီယက်နမ်နိုင်ငံဆိုင်ရာ ဩစတြေးလျသံအမတ်ကြီး Andrew Goledzinowski က ပြောကြားခဲ့ပါသည်။

Source : Vietnam Plus, 10 Sept 2024(လယ်ယာထွက်ကုန်များ နှင့် အဓိကသွင်းကုန်များ၏ နိုင်ငံတကာဈေးကွက် စောင့်ကြည့် လေ့လာရေးအဖွဲ့)