HighLight News

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးမှ ဝန်ထမ်းများနှင့် ချောင်းဆုံမြို့နယ်တာဝန်ခံတို့သည် (၁၃-၇-၂၀၂၃) ရက်နေ့တွင် ချောင်းဆုံမြို့နယ်၊ အ-ထ-က (ကွမ်သဲ) ကျောင်း၌ စားသုံးသူကာကွယ်ရေးအသိပညာပေးဟောပြောပွဲကျင်းပခဲ့ပါသည်။

    အဆိုပါဟောပြောပွဲတွင် ကျောင်းအုပ်ဆရာမကြီး ဒေါ်ညိုညိုဦးက အဖွင့်အမှာစကားပြောကြားခဲ့ပြီးနောက် စားသုံးသူရေးရာဦးစီးဌာနမှ ဦးစီးအရာရှိ ဒေါ်ဝါဝါမြိုင်က စားသုံးသူရေးရာဦးစီးဌာန၏မျှော်မှန်းချက်၊ ရည်မှန်းချက်များကိုရှင်းလင်းပြောကြားခြင်း၊ စားသုံးသူကာကွယ်ရေးဥပဒေ ၂၀၁၉ပါ စားသုံးသူ၏အခွင့်အရေးနှင့်တာဝန်များ၊ ကုန်အညွှန်းအမှတ်အသားဆိုင်ရာများ၊ စားသုံးသူများနစ်နာဆုံးရှုံးမှုဖြစ်လာလျှင် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) သို့လည်းကောင်း၊ Consumer Call Center No. (1535) သို့လည်းကောင်း ဆက်သွယ်တိုင်ကြားနိုင်ကြောင်း၊ www. doca. gov. mm တွင်လည်းဝင်ရောက်တိုင်ကြားနိုင်ကြောင်းတို့ကိုဟောပြောဆွေးနွေးခဲ့ပြီး ဌာန၏လက်ကမ်းစာစောင်များဖြန့်ဝေပေးအပ်ခဲ့ကြောင်း သိရှိရပါသည်။ အဆိုပါဟောပြောဆွေးနွေးပွဲသို့ ဆရာ/ဆရာမ၊ ကျောင်းသား/ကျောင်းသူစုစုပေါင်း (၂၁၈) ဦးတက်ရောက်ခဲ့ကြပါသည်။

   ထို့နောက် ကျောင်းဝင်းအတွင်း တားမြစ်ထားသည့်စာသောက်ကုန်များရောင်းချခြင်းရှိ/မရှိ၊ ထုတ်ကုန်လုံခြုံစိတ်ချရမှုရှိ/မရှိ၊ ကုန်အညွှန်းအမှတ်အသားဖော်ပြခြင်းရှိ/မရှိတို့ကိုစစ်ဆေးခဲ့ပြီး ဆိုင်ရှင်များအား တားမြစ်ထားသောအစားအသောက်များကိုရောင်းချခြင်းမပြုရန်၊ ကျန်းမာရေးနှင့်ညီညွတ်မျှတသည့်အစားအသောက်များ၊ ကုန်အညွှန်းအမှတ်အသားပြည့်စုံစွာဖော်ပြပါရှိသော အစားအသောက်များကိုသာရောင်းချကြရန် အသိပညာပေးခဲ့ကြောင်း သတင်းရရှိပါသည်။

DOCA(မွန်)

    ဒေသတွင်းဝမ်းစာဖြစ်သော ဆန်/စပါးများဖူလုံပိုလျှံပြီး ပြည်တွင်းကုန်သွယ်မှုနှင့် ပြည်ပကုန်သွယ်မှုများကို အထောက်အကူဖြစ်စေရန်နှင့် ကရင်ပြည်နယ်အတွင်းရှိ ဆန်စက်လုပ်ငန်းများဖွံ့ဖြိုးတိုးတက်စေရေးတို့အတွက် ဆောင်ရွက်လျက်ရှိရာ စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ပြည်နယ်ဦးစီးမှူး ဦးသန်းဦးနှင့် ဘားအံခရိုင်ဦးစီးမှူး ဦးမျိုးဝင်းနိုင်တို့သည် (၁၆-၇-၂၀၂၃) ရက်နေ့၊ (၁၀:၀၀) နာရီအချိန်တွင် ကရင်ပြည်နယ်၊ ဘားအံမြို့၊ ဆင်ကျုံးကျေးရွာသို့သွားရောက်၍ စပါး/ပဲအခြောက်ခံစက်အား ကွင်းဆင်းလေ့လာခဲ့ကြောင်းသိရပါသည်။

   ထိုသို့လေ့လာရာတွင် စပါး/ပဲအခြောက်ခံစက်နှင့်ပတ်သက်၍ တစ်နေ့လျှင် အခြောက်ခံသိုလှောင်နိုင်မှုပမာဏ၊ ကုန်ကြမ်းရရှိမှု၊ ဝန်ဆောင်ခနှင့် အခြောက်ခံစက်တပ်ဆင်မှုအပေါ် ဒေသလွှမ်းခြုံဆောင်ရွက်နိုင်မှုနှင့် အခြောက်ခံစက်ပြုလုပ်တပ်ဆင်မှုကုန်ကျစရိတ်များကို မေးမြန်းခဲ့ကြောင်းသိရသည်။

   စပါး/ပြောင်းအခြောက်ခံစက်နှင့်ပတ်သက်၍ ကရင်ပြည်နယ်းတွင် ဆန်စက် ၂၉လုံးရှိသည့်အနက် ဆန်စက် ၄လုံးတွင်သာ အခြောက်ခံစက် ၄လုံးတပ်ဆင်အသုံးပြုနိုင်သေးပြီး ၂လုံးမှာ ကုမ္ပဏီများမှတိုက်ရိုက်မှာယူသော အခြောက်ခံစက်များဖြစ်ကြောင်းနှင့် ယခုအခြောက်ခံစက်နှင့် ခနိမ်းဒိုကျေးရွာရှိ အခြောက်ခံစက်မှာ ဒေသတွင်းပညာရှင်၏ ပြုလုပ်တပ်ဆင်သော အခြောက်ခံစက်ဖြစ်ကြောင်းနှင့် ဒေသတွင်းပညာရှင်အနေဖြင့် နည်းပညာကို ထိုင်းနိုင်ငံမှရရှိကာ ကရင်ပြည်နယ်နှင့်ကိုက်ညီသော အခြောက်ခံစက်အား ပြန်လည်တီထွင်ဖန်တီးပြုလုပ်ခြင်းဖြစ်ကြောင်းနှင့် ဈေးနှုန်းအနေဖြင့် ပြင်ပကုမ္ပဏီစက်များနှင့်နှိုင်းယှဉ်ပါက ထက်ဝက်ခန့်သက်သာကြောင်းနှင့် ဆင်ကျုံးကျေးရွာနှင့် ခနိမ်းဒိုကျေးရွာတို့တွင်ရှိသော ယခုတပ်ဆင်သောအခြောက်ခံစက်များမှာ တစ်နေ့လျှင် စပါး/ပဲသီးနှံ တင်း ၃၅၀ခန့်အခြောက်ခံနိုင်ကြောင်းနှင့် အစိုဓာတ် ၃၀ရာခိုင်နှုန်းရှိသောသီးနှံများမှာ ၈နာရီခန့်သာအခြောက်ခံရကြောင်း သတင်းရရှိသည်။

DOCA(ကရင်)

     ၂၀၂၃ခုနှစ်၊ ဇူလိုင်လ (၁၉) ရက်နေ့၊ နံနက် (၁၀:၀၀) နာရီအချိန်တွင် စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ ဝန်ထမ်းများသည် မြို့ပေါ်ရပ်ကွက်ရှိ စားသုံးဆီအရောင်းဆိုင်များတွင် သက်ဆိုင်ရာဌာန၏ထောက်ခံမှုမရှိသောစားသုံးဆီများရောင်းချနေမှုမရှိစေရန်အတွက် ထုတ်ကုန်လုံခြုံစိတ်ချရမှုရှိ/မရှိကို ကွင်းဆင်းစစ်ဆေးဆောင်ရွက်ခဲ့ကြောင်းသိရှိရပါသည်။

    ထို့တူ ကျောက်မဲ၊ မူဆယ်ခရိုင်များနှင့် မြို့နယ်အသီးသီးတွင်လည်း ဈေးကွက်အတွင်း ထုတ်လုပ်ဖြန့်ဖြူးရောင်းချလျက်ရှိသော စားသုံးဆီများအား သက်ဆိုင်ရာဌာနများနှင့်ပူးပေါင်း၍ ဈေးကွက်စောင့်ကြည့်စစ်ဆေးခြင်းများပြုလုပ်ခဲ့ကြောင်း သိရှိရပါသည်။

DOCA(ရှမ်း)

     မြင်းခြံမြို့၊ အခြေခံပညာအထက်တန်းကျောင်း အ-ထ-က (၁) ၌ ၂၀၂၃ခုနှစ်၊ ဇူလိုင်လ (၇) ရက်နေ့၊ နံနက် (၁၀:၀၀) နာရီအချိန်တွင် မြင်းခြံခရိုင်၊ စားသုံးသုံးသူရေးရာဦးစီးဌာန၊ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ပူးပေါင်း၍ အသိပညာပေး ဟောပြောဆွေးနွေးမှုများဆောင်ရွက်ခဲ့ပါသည်။

    ရှေးဦးစွာ မြင်းခြံခရိုင်စားသုံးသူရေးရာဦးစီးဌာန၊ ခရိုင်ဦးစီးမှူး ဦးမောင်ထူးက အဖွင့်အမှာစကားပြောကြားခဲ့ပြီးနောက် စားသုံးသူရေးရာဦးစီးဌာန၊ မြင်းခြံမြို့နယ်တာဝန်ခံ ဦးတင်ဇော်ထွေး (ဦးစီးမှူး) က စားသုံးသူကာကွယ်ရေးနှင့်ပတ်သက်၍ စားသုံးသူများ၏အခွင့်အရေးများ၊ စားသုံးသူများလိုက်နာရမည့်တာဝန်များအကြောင်း၊ စီးပွားရေးလုပ်ငန်းရှင်များ၏တာဝန်များအကြောင်း၊ တားမြစ်ချက်များအကြောင်းနှင့် စားသုံးသူများအနေဖြင့် ကုန်စည်များဝယ်ယူသုံးစွဲရာတွင် ကုန်အညွှန်းအမှတ်အသားများပြည့်စုံစွာ မြန်မာဘာသာဖြင့်ထည့်သွင်းဖော်ပြထားသော ကုန်ပစ္စည်းများကိုသာ ရွေးချယ်ဝယ်ယူသုံးစွဲကြရန်ဖြစ်ပါကြောင်း၊ ကုန်အညွှန်းအမှတ်အသားများကို မြန်မာဘာသာဖြင့်ဖော်ပြထားခြင်းမရှိသောကုန်ပစ္စည်းများမှာ တရားမဝင်သော၊ လုံခြုံစိတ်ချရမှုမရှိသော ကုန်ပစ္စည်းများဖြစ်သည့်အတွက် သတိပြုရှောင်ရှားကြရန်လိုအပ်ပါကြောင်း၊ စားသုံးသူများနစ်နာဆုံးရှုံးမှုများရှိလာပါက တိုင်းဒေသကြီး/ပြည်နယ်နှင့် ခရိုင်ရုံးများတွင်ဖွင့်လှစ်ထားသော စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) ရုံးများတွင် တိုင်ကြားနိုင်ပါကြောင်း၊ Online မှလည်းတိုင်ကြားနိုင်ပါကြောင်း၊ Consumer Call Center နံပါတ် (၁၅၃၅) သို့လည်း ရုံးချိန်အတွင်း ဆက်သွယ်မေးမြန်းဆောင်ရွက်နိုင်ပါကြောင်း၊ မိမိတို့စားသုံးသူရေးရာဦးစီးဌာန၏ Website မှလည်းတိုင်ကြားနိုင်ပါကြောင်းနှင့် ဦးစီးဌာနအကြောင်း၊ ဌာန၏လုပ်ငန်းဆောင်ရွက်ချက်များအကြောင်း၊ ကုန်သွယ်မှုသတင်းများအကြောင်း၊ ကွင်းဆင်းဆောင်ရွက်မှုသတင်းများနှင့် ဥပဒေအကြောင်းအရာများကိုလည်းဝင်ရောက်ကြည့်ရှုလေ့လာနိုင်ပါကြောင်း၊ ဌာန၏ Website မှာ www. doca. gov. mm ဖြစ်ပါကြောင်း၊ စားသုံးသူကာကွယ်ရေးလုပ်ငန်းများဆောင်ရွက်ရာတွင်  သက်ဆိုင်ရာဌာနများ၊ အသင်းအဖွဲ့များအပြင် စားသုံးသူများကိုယ်တိုင်ပါဝင်မှသာ ပို၍ထိရောက်အောင်မြင်နိုင်မည်ဖြစ်ပါကြောင်း၊ သို့ဖြစ်ပါ၍ စားသုံးသူများအနေဖြင့် အားလုံးအကျိုးအတွက် ပူးပေါင်းပါဝင်ပေးကြပါရန် ဆန္ဒပြုပါကြောင်း စသည်ဖြင့် အကျယ်တဝင့်ဟောပြောဆွေးနွေးခဲ့ပါသည်။ ဆက်လက်၍  ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဒေါ်အေးအေးနွဲ့ (လက်ထောက်ညွှန်ကြားရေးမှူး) က စာဖတ်ခြင်း၏အကျိုးကျေးဇူးများအကြောင်းကို ဟောပြောဆွေးနွေးခဲ့ပြီး အခြေခံပညာအထက်တန်းကျောင်း အ-ထ-က (၁) ၏ ကျောင်းအုပ်ဆရာမကြီး ဒေါ်တင်တင်ဝင်းက ယခုကဲ့သို့အသိပညာများလာရောက်ဟောပြောပေးပါသော သက်ဆိုင်ရာဌာနများမှ တာဝန်ရှိသူများအား ကျေးဇူးတင်ရှိပါကြောင်း ပြောကြားခဲ့ပါသည်။ အဆိုပါဟောပြောပွဲသို့ ကျောင်းအုပ်ဆရာမကြီးနှင့် ဆရာ/ဆရာမများ၊ ကျောင်းသား/ကျောင်းသူ (၂၁၀) ဦး၊ ဌာနဆိုင်ရာ (၅) ဦး၊ စုစုပေါင်း (၂၁၅) ဦးတက်ရောက်ခဲ့ကြကြောင်း သိရှိရပါသည်။

DOCA(မန္တလေး)

    စားသုံးသူရေးရာဦးစီးဌာန၊ မကွေးတိုင်းဒေသကြီး၊ ဂန့်ဂေါခရိုင်ဦးစီးမှူးရုံးမှ ဒု-ဦးစီးမှူး ဒေါ်ဇာဇာချိုဦးနှင့် အဖွဲ့သည် တိုင်းဒေသကြီးဦးစီးမှူး၏လမ်းညွှန်မှုနှင့် ပခုက္ကူခရိုင်ဦးစီးမှူး၏ကြီးကြပ်ကွပ်ကဲမှုတို့ဖြင့် စားသုံးသူပြည်သူများဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေးတို့အတွက် (၁၂-၇-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် ဂန့်ဂေါမြို့၊ မြို့မဈေးအတွင်းရှိ ကုန်စုံဆိုင် (၄) ဆိုင်တွင် သက်တမ်းလွန်ကုန်ပစ္စည်းများရောင်းချနေမှုရှိ/မရှိ၊ ကုန်အညွှန်းအမှတ်အသားနှင့်စပ်လျဉ်း၍ မြန်မာဘာသာဖြင့်ဖော်ပြထားခြင်းရှိ/မရှိနှင့် ကုန်အညွှန်းအမှတ်အသားများပြည့်စုံစွာဖော်ပြထားခြင်းရှိ/မရှိတို့ကို ဈေးကွက်စောင့်ကြည့်စစ်ဆေးခဲ့ပါသည်။        

      ဒေါ်ဇာဇာချိုဦးနှင့် အဖွဲ့သည် ဈေးကော်မတီ၊ စည်ပင်သာယာရေးအဖွဲ့များနှင့်ပူးပေါင်း၍ ဈေးကွက်စောင့်ကြည့်စစ်ဆေးခဲ့ကြရာ ကုန်မျိုးစုံရောင်းချနေသောဆိုင်ရှင်များအား ထိုင်းဘာသာဖြင့် ကုန်အညွှန်းအမှတ်အသားဖော်ပြထားသောအချိုရည်များကို ဈေးကွက်အတွင်း ရောင်းချခြင်းရှိ/မရှိနှင့်  စားသုံးသူကာကွယ်ရေးဥပဒေ ၂၀၁၉ အခန်း (၁၈)၊ ပုဒ်မ (၄၁) အရ ကုန်စည်များတွင် ကုန်အညွှန်းအမှတ်အသားပြည့်စုံစွာဖော်ပြထားသည့် ကုန်စည်များကိုသာရောင်းချရန်၊ မြန်မာနိုင်ငံစားသုံးသူကာကွယ်ရေးကော်မရှင်ကထုတ်ပြန်ထားသည့် ညွှန်ကြားချက်အမှတ် (၂/၂၀၁၉) နှင့်အညီ ပြည့်စုံစွာဖော်ပြလာစေရေးနှင့် မြန်မာဘာသာဖြင့်ဖော်ပြရမည့် ကုန်ပစ္စည်းအမျိုးအမည်၊ အရွယ်အစား၊ အရေအတွက် (သို့မဟုတ်) အသားတင်ပမာဏ၊ ထားသိုသိမ်းဆည်းမှုအညွှန်း၊ ဓာတ်မတည့်ကြောင်းဖော်ပြချက်တို့ကို မဖြစ်မနေထည့်သွင်းဖော်ပြရမည်ဖြစ်ပြီး ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲများကိုလည်း ထည့်သွင်းဖော်ပြရမည်ဖြစ်ကြောင်း၊ ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသော ကုန်စည်များရောင်းချသည်ကိုစစ်ဆေးတွေ့ရှိ ရပါက စားသုံးသူကာကွယ်ရေးဥပဒေအရ အရေးယူဆောင်ရွက်သွားမည်ဖြစ်ကြောင်းနှင့် စားသုံးသူကာကွယ်ရေးဥပဒေအခန်း (၁၀) ပါ စီးပွားရေးလုပ်ငန်းရှင်၏တာဝန်များနှင့်  တားမြစ်ချက်များ၊ ပြစ်မှုပြစ်ဒဏ်များအကြောင်းတို့ကို အသိပေးပြောကြားခဲ့ပြီး စားသုံးသူအသိပညာပေးလက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။

DOCA(မကွေး)