HighLight News

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဉီးစီးဌာန၊ ကလေးဝမြို့နယ်တာဝန်ခံ ဦးကျော်ကျော်မိုးသည်  ၂၀၂၃ခုနှစ်၊ ဇူလိုင်လ (၂၄) ရက်နေ့၊ နံနက် (၁၀:၀၀) နာရီအချိန်၌  ကလေးဝမြို့ရှိ အထွေထွေအုပ်ချုပ်ရေးခန်းမတွင် အသိပညာပေးဟောပြောပွဲ ကျင်းပပြုလုပ်ခဲ့ရာ  ဝန်ထမ်း (၄၀) ဦးတက်ရောက်ခဲ့ကြပါသည်။

     အဆိုပါဟောပြောပွဲတွင်  မြို့နယ်တာဝန်ခံ ဉီးကျော်ကျော်မိုး (ဒု-ကြီးကြပ်ရေးမှူး) က စားသုံးသူကာကွယ်ရေးဥပဒေ အခန်း (၅) တွင်ပါရှိသည့် ဉီးစီးဌာန၏လုပ်ပိုင်ခွင့်နှင့် လုပ်ငန်းတာဝန်များကို အသေးစိတ်အသိပညာပေးခဲ့ပါသည်။ ဆက်လက်၍ စားသုံးသူ၏အခွင့်အရေးနှင့်စပ်လျဉ်း၍ အကောင်အထည်ဖော်ဆောင်ရွက်ခြင်း၊ စားသုံးသူကာကွယ်ရေးလုပ်ငန်းနှင့်စပ်လျဉ်း၍ အသိပညာပေးခြင်းနှင့် သတင်းအချက်အလက်များ ဖြန့်ဝေပေးခြင်း၊ တိုင်ကြားလာမှုနှင့်စပ်လျဉ်း၍ စုံစမ်းစစ်ဆေးရန် (သို့မဟုတ်) ဘေးအန္တရာယ်ရှိသောကုန်စည် (သို့မဟုတ်) ဝန်ဆောင်မှုများကို စောင့်ကြည့်စစ်ဆေးနိုင်ရန်နှင့် ဈေးကွက်အတွင်းမှ ပပျောက်စေရန်အလို့ငှာ ဒုတိယဉီးစီးမှူးအောက်မနိမ့်သူကို စစ်ဆေးရေးမှူးအဖြစ်တာဝန်ပေးအပ်ခြင်း၊ ကုန်စည် (သို့မဟုတ်) ဝန်ဆောင်မှုများဘေးအန္တရာယ်ကင်းရှင်းစေရေးအလို့ငှာ စစ်ဆေးရန်လိုအပ်သည့်နေရာများသို့ဝင်ရောက်စစ်ဆေးခြင်း၊ အချက်အလက်များရယူစုဆောင်းခြင်း၊ နမူနာပစ္စည်းရယူခြင်းများကို စစ်ဆေးရေးအရာရှိအား တာဝန်ပေးအပ်ခြင်း စသည်တို့ကိုလုပ်ဆောင်လျက်ရှိပါကြောင်း အသိပညာပေးခဲ့မှုကိုသတင်းရရှိရပါသည်။

DOCA(စစ်ကိုင်း)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဉီးစီးဌာန၊ ကလေးခရိုင်ဦးစီးမှူးရုံးမှ  ဒု-ဉီးစီးမှူး ဒေါ်စန္ဒာမွန်နှင့် ဝန်ထမ်းများသည် ကလေးမြို့နယ်၊ ညောင်ပင်သာရပ်ကွက်ရှိ “ဝင်း” မုန့်မျိုးစုံရောင်းဝယ်ရေးလုပ်ငန်းရှင် ဒေါ်ခိုင်ဇင်ဉီး၏နေအိမ်သို့ ၂၀၂၃ခုနှစ်၊ ဇူလိုင်လ ( ၁၉ ) ရက်နေ့၊ နံနက် (၁၀:၃၀) နာရီအချိန်တွင် သွားရောက်၍ တွေ့ဆုံဆွေးနွေးခဲ့ပါသည်။

    ထိုသို့တွေ့ဆုံဆွေးနွေးရာတွင် စားသုံးသူရေးရာဉီးစီးဌာန၊ ကလေးခရိုင်ဦးစီးမှူးရုံးမှ ဒေါ်စန္ဒာမွန် (ဒု-ဉီးစီးမှူး) က မုန့်များပြုလုပ်တွင်  လက်အိတ်များကိုအသုံးပြု၍ ထုပ်ပိုးမှုများပြုလုပ်ရန်၊  မုန့်ဖုတ်သည့်မုန့်ဖိုများအတွင်း သန့်ရှင်းသပ်ရပ်စွာကိုင်တွယ်အသုံးပြုလုပ်ကိုင်ရန်နှင့် ဓာတုဆေးဝါးများအသုံးပြုခြင်းကို လျော့ပါးအောင်ပြုလုပ်ခြင်းဖြင့် ပြည်သူများ၏ကျန်းမာရေးအတွက် အထောက်အကူပြုနိုင်သည့်နည်းလမ်းများကိုအသုံးပြု၍ ပြုလုပ်ရောင်းချရန်တို့ကိုဆွေးနွေးပြောကြားခဲ့ပြီး စားသုံးသူကာကွယ်ရေးဥပဒေ (၂၀၁၉) အခန်း (၁၈) တွင်ပြဋ္ဌာန်းထားသည့် ကုန်အညွှန်းအမှတ်အသားတွင်ပါဝင်သော ကုန်စည်၏အမှတ်တံဆိပ်၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ်သည့်ရက်စွဲ၊ သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ တင်သွင်းသူ၏အမည်နှင့်လိပ်စာ၊ လုပ်ငန်းအမည်နှင့်လိပ်စာ၊ ထုတ်လုပ်သည့်နေရာ၊ ပြန်လည်ထုပ်ပိုးသည့်နေရာ၊ ပါဝင်ပစ္စည်း၊ ဘေးထွက်ဆိုးကျိုး၊ ဓာတ်မတည့်ကြောင်းဖော်ပြချက်၊ ကြိုတင်သတိပေးချက်၊ အစိုးရဌာနများကသတ်မှတ်ထားသောအချက်အလက်များကို အသေးစိတ်ရှင်းလင်းပြောကြားခဲ့ပြီးနောက် “ဝင်း” မုန့်မျိုးစုံရောင်းဝယ်ရေးလုပ်ငန်းရှင် ဒေါ်ခိုင်ဇင်ဉီးကလည်း ကုန်ကြမ်းပစ္စည်းများဈေးနှုန်းကြီးမြင့်ခြင်း၊ လျှပ်စစ်မီးများမရရှိသောကြောင့် စက်သုံးဆီအသုံးပြု၍ လုပ်ကိုင်ဆောင်ရွက်ရသည့်အတွက် ကုန်ကျစရိတ်ကြီးမြင့်၍ အမြတ်အစွန်းအနည်းငယ်သာရရှိပါကြောင်းနှင့် စားသုံးသူရေးရာဦးစီးဌာနမှ ရှင်းလင်းဆွေးနွေးချက်များကိုလည်း လိုက်နာဆောင်ရွက်သွားမည်ဖြစ်ကြောင်း ပြောကြားခဲ့မှုကို သိရှိရပါသည်။

DOCA(စစ်ကိုင်း)

    စားသုံးသူပြည်သူများ ဘေးကင်းလုံခြုံစိတ်ချရမှုရှိသောကုန်စည်/ဝန်ဆောင်မှုများကိုဝယ်ယူသုံးစွဲနိုင်ရေးအတွက် ဈေးကွက်အတွင်းရှိ ကုန်စည်/ဝန်ဆောင်မှုအား ကုန်အညွှန်းအမှတ်အသားပြည့်စုံစွာဖော်ပြခြင်းရှိ/မရှိနှင့် ဈေးကွက်အတွင်း သက်ဆိုင်ရာဌာန၏ထောက်ခံချက်မရှိသော စားသုံးဆီများဖြန့်ဖြူးရောင်းချခြင်းရှိ/မရှိတို့ကို ဌာနဆိုင်ရာအဖွဲ့အစည်းများနှင့်ပူးပေါင်း၍ စစ်ဆေးဆောင်ရွက်သွားရန်  ညွှန်ကြားချက်အရ စစ်ကိုင်းခရိုင်အနေဖြင့် စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး၊ ဒု-ခရိုင်ဦးစီးမှူးနှင့် ဝန်ထမ်း (၃) ဦး၊ ခရိုင်ပြည်သူ့ကျန်းမာရေးဦးစီးဌာနနှင့် မြို့နယ်စည်ပင်သာယာရေးအဖွဲ့တို့က တာဝန်ရှိသူများနှင့်အတူပူးပေါင်း၍ ၂၀၂၃ခုနှစ်၊ ဇူလိုင်လ (၇) ရက်နေ့နှင့် (၁၂) ရက်နေ့များတွင် စစ်ကိုင်းမြို့ပေါ်နှင့် စစ်ကိုင်းမြို့မဈေးရှိ စားသုံးဆီအမျိုးမျိုးအရောင်းဆိုင်များသို့သွားရောက်၍ ကွင်းဆင်းစစ်ဆေးခဲ့ပါသည်။

     စစ်ကိုင်းမြို့ပေါ်နှင့် စစ်ကိုင်းမြို့မဈေးရှိ မေတ္တာရှင်၊ တော်ဝင်၊ သစ္စာ၊ ဒေါ်မမကြီး၊ ဗိုလ်ဗိုလ်၊ လင်းလင်း စသည့်ဆီမျိုးစုံရောင်းဝယ်ရေးဆိုင်စုစုပေါင်း (၆) ဆိုင်တို့အား ဈေးကွက်စောင့်ကြည့်စစ်‌ဆေးရာတွင် အမှတ်တံဆိပ်မပါဘဲ အလွတ်ရောင်းချသည့်ရောဆီ (ပဲဆီ+စားအုန်းဆီ) များကို စည်ပိုင်ဖြတ် (သို့မဟုတ်) ဒန်အိုးကြီးများတွင်ထည့်၍ ခွက်ချင်ဖြင့် ရောင်းချခြင်းနှင့်အတူ Goody၊ Meizan၊ Duck၊ Good Choice၊ ရွှေပျားအမှတ်တံဆိပ်များကိုရောင်းချလျက်ရှိကြောင်း စစ်ဆေးတွေ့ရှိရပါသည်။ Meizan၊ Duck၊ ရွှေပျားဟင်းသီးဟင်းရွက်ဆီ (မြေပဲဆီ+နေကြာဆီ+အဆင့်မြင့်စားအုန်းဆီ) အမှတ်တံဆိပ်များတွင် အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်များပါရှိကြောင်း စစ်ဆေးတွေ့ရှိရသော်လည်း Good Choice၊ Goody အမှတ်တံဆိပ်တွင် အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်များမပါရှိကြောင်း စစ်ဆေးတွေ့ရှိမှုအရသိရှိရပါသည်။

DOCA(စစ်ကိုင်း)

    ပုသိမ်မြို့၊ မြို့တော်ခန်းမ၌ ပုသိမ်ခရိုင် MSMEs ကုန်စည်ပြပွဲနှင့် ဈေးရောင်းပြပွဲကို (၁၂-၇-၂၀၂၃) ရက်နေ့၊ မွန်းလွဲ (၁၄:၀၀) နာရီအချိန်တွင် ကျင်းပပြုလုပ်ခဲ့ရာ ဧရာဝတီတိုင်းဒေသကြီးအစိုးရအဖွဲ့၏ ဝန်ကြီးချုပ် ဦးတင်မောင်ဝင်း၊ စီးပွားရေးရာဝန်ကြီး ဦးတင်အေးနှင့် ပုသိမ်ခရိုင်၊ အထွေထွေအုပ်ချုပ်ရေးဦးစီးဌာန၊ အုပ်ချုပ်ရေးမှူး ဦးလင်းကိုကိုတို့က ဖဲကြိုးဖြတ်ဖွင့်လှစ်ပေးခဲ့ကြပါသည်၊၊

    ပြပွဲတွင် ခရိုင်အတွင်းကုမ္ပဏီနှင့်စီးပွားရေးလုပ်ငန်းရှင်များက ခင်းကျင်းပြသထားသော လယ်ယာသုံးပစ္စည်းရောင်းဝယ်ရေးလုပ်ငန်း၊ ဆန်စပါးလုပ်ငန်း၊ ဆားလုပ်ငန်း၊ စားသောက်ကုန်လုပ်ငန်း၊ လက်မှုလုပ်ငန်း၊ ရေထွက်ပစ္စည်းလုပ်ငန်း၊ စပါးခွံလောင်စာတောင့် လုပ်ငန်း၊ ရွှေမြင်းပျံဟာလဝါလုပ်ငန်း၊ ငွေကျားဆီစက်လုပ်ငန်း၊ ကြီးမြင့်ကိတ်မုန့်လုပ်ငန်း၊ နုထွေးချင်းသုပ်လုပ်ငန်း၊ ဒေါ်စာမဝက်အူချောင်းလုပ်ငန်း၊ ရေချိုငါးပိလုပ်ငန်း၊ သီဟဆန်စက်လုပ်ငန်း၊ တီတီမေဝက်အူချောင်း၊ ကြက်အူချောင်းလုပ်ငန်း၊ ကြိမ်၊ ဝါး၊ ဗေဒါလက်မှုလုပ်ငန်း၊ ရေကြည်ပေါ်ဆန်ဘေးကြားလုပ်ငန်း၊ KSO သီဟိုဠ်စေ့လုပ်ငန်း၊ ဖိုးထူးအင်း၏ မျှင်ငါးပိလုပ်ငန်းအပါအဝင် စုစု‌ပေါင်းပြခန်း (၄၀) ကျော်ပါဝင်ပြသခဲ့ကြောင်းသိရပါသည်၊၊

   ယခုကဲ့သို့ အသေးစား၊ အငယ်စားနှင့် အလတ်စားစီးပွားရေးထုတ်ကုန်ပြပွဲနှင့် ဈေးရောင်းပွဲတော်များကိုပြုလုပ်ပေးခြင်းဖြင့် စီးပွားရေးလုပ်ငန်းရှင်များအတွက် ဈေးကွက်အခွင့်အလမ်းကောင်းများရရှိနိုင်သကဲ့သို့ ဝယ်ယူသူများအတွက် တစ်နေရာတည်း၌ ဒေသထွက်ကုန်များကို စိတ်ကြိုက်ရွေးချယ်ဝယ်ယူနိုင်သည့်အတွက် လုပ်ငန်းရှင်နှင့်ပြည်သူများမှာ အကျိုးကျေးဇူးများရရှိမည်ဖြစ်ကြောင်းနှင့် ဈေးရောင်းပွဲတော်ကို ဇူလိုင်လ ၁၂ရက်နေ့မှ ၁၅ရက်နေ့အထိ (၄) ရက်အကြာပြုလုပ်သွားမည်ဖြစ်ကြောင်း သိရှိရပါသည်၊၊

DOCA(ဧရာဝတီ)

    မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှ ဝန်ထမ်းများသည် (၁၃-၇-၂၀၂၃) ရက်နေ့တွင် ချောင်းဆုံမြို့နယ်၊ အ-ထ-က (မုရစ်ကလေး) ကျောင်း၌ စားသုံးသူကာကွယ်ရေးအသိပညာပေးဟောပြောပွဲကျင်းပခဲ့ပါသည်။

   အဆိုပါဟောပြောပွဲတွင် ကျောင်းအုပ်ဆရာမကြီး ဒေါ်သီတာမွန်က အဖွင့်အမှာစကားပြောကြားခဲ့ပြီးနောက် စားသုံးသူရေးရာဦးစီးဌာနမှ  ဒေါ်ခင်လေးနွယ်၊ အငယ်တန်းစာရေးက စားသုံးသူအခွင့်အရေးနှင့်တာဝန်များ၊ ဒေါ်ဝါဝါမြိုင်၊ ဦးစီးအရာရှိက စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေးဥပဒေ၊ ကုန်အညွှန်းအမှတ်အသားနှင့်ပတ်သက်၍ သိကောင်းစရာများ၊ စားသုံးသူများသည် ကုန်စည်နှင့်ဝန်ဆောင်မှုများကိုအသုံးပြုခြင်းကြောင့် ထိခိုက်နစ်နာဆုံးရှုံးမှုဖြစ်လာလျှင် တိုင်ကြားနိုင်သည့်နေရာ၊ Consumer Call Center No. (1535) သို့ဖုန်းခေါ်ဆို၍လည်းတိုင်ကြားနိုင်ကြောင်း၊ www. doca. gov. mm တွင်လည်းဝင်ရောက်တိုင်ကြားနိုင်ကြောင်း ဟောပြောဆွေးနွေးခဲ့ပါသည်။

    အဆိုပါဟောပြောဆွေးနွေးပွဲသို့ ဆရာ/ဆရာမ၊ ကျောင်းသား/ကျောင်းသူစုစုပေါင်း (၃၆၃) ဦးတက်ရောက်ခဲ့ကြပြီး ကျောင်းအုပ်ဆရာမကြီးထံသို့ စားသုံးသူကာကွယ်ရေးအသိပညာပေးလက်ကမ်းစာစောင်များပေးအပ်ခဲ့ကြောင်း သိရှိရပါသည်။

DOCA(မွန်)