သတင်းနှင့် လှုပ်ရှားမှုများ

    ၂၀၂၃ခုနှစ်၊ ဇူလိုင်လ ၂၇ရက်နေ့၊ နံနက် (၁၀း၀၀) နာရီအချိန်တွင် စားသုံးသူရေးရာဦးစီးဌာန၊ တနင်္သာရီတိုင်းဒေသကြီး၊ ထားဝယ်မြို့မှ စစ်ဆေးရေးအရာရှိနှင့်ဝန်ထမ်းများသည် အထွေထွေအုပ်ချုပ်ရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ ပြည်သူ့ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့်ပူးပေါင်း၍ ထားဝယ်မြို့ပေါ်ရှိ စားသောက်ကုန်အမျိုးမျိုးအရောင်းဆိုင်များအား စျေးကွက်စောင့်ကြည့်စစ်ဆေးခြင်းဆောင်ရွက်ခဲ့ပါသည်။

   ထိုသို့စစ်ဆေးရာတွင် အစားအသောက်နှင့်ဆေးဝါးကွပ်ကဲရေးဦးစီးဌာနတွင် မှတ်ပုံတင်ထားရှိပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသားပြဋ္ဌာန်းချက်များနှင့်အညီ ထုတ်လုပ်ဖြန့်ဖြူးရောင်းချလျက်ရှိသည့် Coca-Cola Pinya Beverages Myanmar (CCPBM) ကုမ္ပဏီ၏ ပြည်တွင်း၌   Sprite အမှတ်တံဆိပ်အချိုရည်နှင့်ပုံစံတူသော/ FDA မှတ်ပုံတင်ထားခြင်းမရှိသော/ ထိုင်းဘာသာဖြင့် ကုန်အညွှန်းအမှတ်အသားဖော်ပြထားသော Sprite အချိုရည်အတုများ စျေးကွက်အတွင်းရောင်းချခြင်းရှိ/မရှိစစ်ဆေးကာ စားသုံးသူကာကွယ်ရေးဥပဒေပါပြဋ္ဌာန်းချက်များနှင့်အညီ ကုန်အညွှန်းအမှတ်အသားအပြည့်အစုံဖော်ပြထားရှိသော ကုန်ပစ္စည်းများရောင်းချနိုင်ရေး အသိပညာပေးခဲ့ကြောင်းနှင့် အသိပညာပေးလက်ကမ်းစာစောင်များဖြန့်ဝေခဲ့ကြောင်းသိရှိရပါသည်။

DOCA(တနင်္သာရီ) 

  အွန်လိုင်းစနစ်ဖြင့် ရောင်းချခြင်းလုပ်ငန်းအတွက် မှတ်ပုံတင်ခြင်းဆိုင်ရာအမိန့်ကြော်ငြာစာနှင့်ပတ်သက်၍ လုပ်ငန်းမှတ်ပုံတင်လျှောက်ထားရမည့်အချက်များကို Online Sales Bussiness  လုပ်ငန်းဆောင်ရွက်လျက်ရှိသည့်လုပ်ငန်းရှင်က စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးသို့လာရောက်ဆွေးနွေးခဲ့ကြောင်းသိရပါသည်။

     ထို့သို့လာရောက်တွေ့ဆုံဆွေးနွေးရာတွင် လုပ်ငန်းရှင်က Online Sales Bussiness  အမိန့်ကြော်ငြာစာနှင့်ပတ်သက်၍ လုပ်ငန်းရှင်များက မှတ်ပုံတင်ဆောင်ရွက်ရမည့်အချက်များကိုမေးမြန်းဆွေးနွေးခဲ့ပြီးနောက် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ စားသုံးသူရေးရာဌာနခွဲတာဝန်ခံ ဦးမျိုးဝင်းနိုင် (ဦးစီးအရာရှိ) က အွန်လိုင်းစနစ်ဖြင့်ရောင်းချခြင်းလုပ်ငန်းကို အရေးကြီးကုန်စည်နှင့် ဝန်ဆောင်မှုလုပ်ငန်းအဖြစ် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် (၂၁-၇-၂၀၂၃) ရက်နေ့တွင် အမိန့်ကြော်ငြာစာ အမှတ် (၅၀/၂၀၂၃) ဖြင့်ထုတ်ပြန်ကြေညာခဲ့ပါကြောင်း၊ မည်သူမဆို အွန်လိုင်းရောင်းချခြင်းလုပ်ငန်းကိုမှတ်ပုံတင်လျှောက်ထားရရှိပြီးမှသာ လုပ်ကိုင်ဆောင်ရွက်ရမည်ဖြစ်ပါကြောင်း၊ အမိန့်ကြော်ငြာစာထုတ်ပြန်ပြီး ခြောက်လပြည့်မြောက်သည့်နေ့ရက်မှစတင်၍ မှတ်ပုံတင်မရှိဘဲ အွန်လိုင်းစနစ်ဖြင့်ရောင်းချခြင်း လုပ်ငန်းကိုလုပ်ကိုင်ဆောင်ရွက်ကြောင်းတွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေပုဒ်မ ၅အရ အရေးယူခံရမည်ဖြစ်ပါကြောင်း၊ လုပ်ငန်းရှင်များအနေဖြင့် ပြင်ဆင်ချိန် ၆လရရှိပါကြောင်း၊ ကုန်စည်ကိုဖြစ်စေ၊ ဝန်ဆောင်မှုများကိုဖြစ်စေ အွန်လိုင်းစနစ်မှတစ်ဆင့်ဝန်ဆောင်မှုပေး၍ ရောင်းချသောလုပ်ငန်းများအားလုံးအကျုံးဝင်ပါကြောင်း၊ အွန်လိုင်းစနစ်ဖြင့်ရောင်းချခြင်းလုပ်ငန်းကို အရေးကြီးကုန်စည်နှင့်ဝန်ဆောင်မှုလုပ်ငန်းအဖြစ်သတ်မှတ်ပြီး အွန်လိုင်းစနစ်မှတစ်ဆင့် ဝန်ဆောင်မှုပေးသောလုပ်ငန်းရှင်များသည် အွန်လိုင်းစနစ်တွင် မှတ်ပုံတင်လတ်မှတ်ပါအမည်ဖြင့် ရောင်းချခွင့်ရှိမည်ဖြစ်ပါကြောင်း၊ မှတ်ပုံတင်ခြင်းလုပ်ငန်းကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနက အွန်လိုင်းစနစ်ဖြင့် ဆောင်ရွက်သွားမည်ဖြစ်ပြီး အွန်လိုင်းမှတ်ပုံတင်ခြင်းနှင့်ပတ်သက်၍ ပြင်ပတွင် သတင်းပျံ့နှံ့နေသောအွန်လိုင်းဝန်ဆောင်ခ ၁၂သိန်းကျပ်ဆိုသည်မှာ မဟုတ်ပါကြောင်း၊ မှတ်ပုံတင်ကြေးနှင့် အွန်လိုင်းဝန်ဆောင်ခတို့ကို ဦးစီးဌာနက တရားဝင်ထုတ်ပြန်ပေးသွားမည်ဖြစ်ပါကြောင်း ပြန်လည်ရှင်းလင်းဆွေးနွေးခဲ့ပါသည်။

   အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးဝန်ဆောင်မှုအဖြစ် ပြည်ထောင်စုအစိုးရအဖွဲ့က (၄-၇-၂၀၂၃) ရက်နေ့တွင် အမိန့်ကြော်ငြာစာအမှတ် (၅/၂၀၂၃) ဖြင့်ထုတ်ပြန်ကြေငြာခဲ့ပြီး ယင်းဝန်ဆောင်မှုနှင့်သက်ဆိုင်သည့်ကိစ္စရပ်များနှင့်စပ်လျဉ်း၍ တားမြစ်မိန့်၊ စည်းမျဉ်းသတ်မှတ်မိန့်၊ ကြီးကြပ်မိန့်၊ ကာကွယ်မိန့်နှင့် လိုအပ်သလိုဆောင်ရွက်စေသည့်အမိန့်ထုတ်ပြန်ခွင့်ကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာနသို့ အခွင့်အာဏာအပ်နှင်းခဲ့ပါသည်၊၊

DOCA(ကရင်)

    ပဲခူးတိုင်းဒေသကြီးအတွင်းရှိ တောင်သူလယ်သမားများကို နိုင်ငံတော်ပိုင် စက်ရုံများဖြစ်သည့် မကွေးတိုင်းဒေသကြီး၊ အောင်လံမြို့နယ် ကျော်စွာ အမှတ်(၃) ဓါတ်မြေဩဇာစက်ရုံ၊ ရန်ကုန်တိုင်းဒေသကြီး မှော်ဘီမြို့နယ်၊ မြောင်းတကာ အမှတ်(၄) ဓါတ်မြေဩဇာစက်ရုံနှင့် ဧရာဝတီတိုင်းဒေသကြီး ကန်ကြီးထောင့်မြို့နယ် အမှတ်(၅) ဓါတ်မြေဩဇာစက်ရုံတို့မှ ထုတ်လုပ်သည့် အရည်အသွေးကောင်းမွန်သော ဓါတ်မြေဩဇာများကို တစ်အိတ်လျှင် ကျပ်သုံးသောင်းနှုန်းဖြင့် ဖြန့်ဖြူးရောင်းချသွားမည်ဖြစ်ကြောင်း သိရှိရပါသည်။

    ၂၀၂၃-၂၀၂၄ မိုးစပါး ရာသီအမှီ ဖြန့်ဖြူးရောင်းချပေးနိုင်ရေး စီစဉ်ဆောင်ရွက်လျက်ရှိပြီး မိုးစပါး စိုက်ပျိုးသည့် (၆၄၃၄၈) ဧက အတွက် မြေဩဇာ (၄၉၇၆၀) အိတ်ကို ရောင်းချဖြန့်ဖြူးပေးရန် စီစဉ်ဆောင်ရွက်လျက်ရှိပြီး ဆီထွက်သီးနှံများဖြစ်သည့် နေကြာ၊ နှမ်းနှင့် မြေပဲ အပါအဝင် ဝါသီးနှံစိုက် တောင်သူများကိုလည်း စိုက်ပျိုးရာသီအမီ ရောင်းချဖြန့်ဖြူးပေးမည်ဖြစ်ကြောင်း သိရှိရပါသည်။

    ၂၀၂၃ခုနှစ်က ပဲခူးတိုင်းဒေသကြီးအတွင်း စိုက်ပျိုးခဲ့သည့် မိုးစပါး၊ နွေစပါး၊ နေကြာနှင့် ချည်မျှင်ရှည် ဝါစိုက်ဧက (၄၉၅၅၅၅) ဧကအတွက် ဓါတ်မြေဩဇာ (၂၃၄၇၈၀) အိတ် ဖြန့်ဖြူးရောင်းချပေးခဲ့ကြောင်း သိရှိရပါသည်။

DOCA(ပဲခူး)

  ပဲခူးခရိုင်တွင် ကုန်စည်ဒိုင်တစ်ခု ဖွံ့ဖြိုးတိုးတက်အောင်မြင်နိုင်ရန်အတွက် တိုင်းဒေသကြီး အစိုးရ အဖွဲ့၏ စီစဉ်လမ်းညွှန်မှုအရ ၊ ပဲခူးခရိုင်အတွင်းရှိ ဆန်စက်လုပ်ငန်းရှင် ၊ ပဲနှမ်းရောင်းဝယ်ရေး လုပ်ငန်းရှင်၊ လက်လီအရောင်းဆိုင်လုပ်ငန်းရှင်၊ ဆီလုပ်ငန်းရှင်များပါဝင်ပြီး (၃.၇.၂၀၂၃ ) ရက်နေ့ တွင် စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံးတွင် အကြိုညှိနှိုင်း ဆွေးနွေး ဆောင်ရွက်ခဲ့ပြီး၊ (၁၀.၇.၂၀၂၃) ရက်နေ့တွင် တိုင်းဒေသကြီးအစိုးရအဖွဲ့ဝင် စီးပွားရေးဝန်ကြီး ဦးတင်ဦးမှ ဦးဆောင်၍ စည်ပင်သာယာရေးအဖွဲ့၊ စိုက်ပျိုးရေးဦးစီးဌာန၊ သမဝါယမဦးစီးဌာန နှင့်စားသုံးသူရေးရာ ဦးစီးဌာနတို့မှ တိုင်း‌ဒေသကြီးဦးစီးမှူးများနှင့်အတူ ပဲခူးခရိုင်အတွင်းရှိ ကုန်သည်လုပ်ငန်းရှင်များနှင့် တွေ့ဆုံ၍  လုပ်ငန်းရှင်(၂၅)ဦး ပါဝင်သော ပဲခူးကုန်စည်ဒိုင်အား အသင်းအဖွဲ့စည်းမျဉ်း၊ စည်းကမ်းနှင့်အညီ အတည်ပြုဖွဲ့စည်းနိုင်ရေး တွေ့ဆုံဆွေးနွေး ဆောင်ရွက်ခဲ့ကြောင်း သိရှိရပါသည်။

   အဆိုပါ ဆွေးနွေးပွဲတွင် စီးပွားရေးဝန်ကြီးက ယခင်ကဖွဲ့စည်းပြီးဖြစ်သော်လည်း  အကြောင်း အမျိုးမျိုးကြောင့် သက်ဝင်လှုပ်ရှားမှု မရှိခဲ့၍ ယခုအခါ လုပ်ငန်းရှင်များအနေဖြင့် မိမိတို့၏ ကုန်ပစ္စည်းများကို တစ်နေရာတည်းတွင် ကုန်စည်ဒိုင်အင်္ဂါရပ်များဖြစ်သော အရည်အသွေးမှန်၊ ပစ္စည်းမှန်၊ ဈေးနှုန်းမှန်၊အလေးချိန်မှန် မှန်လေးမှန်ဖြင့် ရောင်းဝယ်ဆောင်ရွက်နိုင်ရေးနှင့် ကုန်စည်ဒိုင် ရေရှည် တည်တံ့ အကောင်အထည်ဖော်ဆောင်ရွက်နိုင်‌ရေး ကြိုးပမ်းအားထုတ်ကြရန် တိုက်တွန်းပြောကြားခဲ့ကြောင်း သိရှိရပါသည်။

DOCA(ပဲခူး)

    စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ သာယာဝတီခရိုင်ဦးစီးမှူးရုံး၌ (၂၀-၇-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် စားသုံး/ထုတ်လုံတာဝန်ခံ ဒေါ်ခိုင်ခိုင်ရီသည် မုန့်မျိုးစုံထုတ်လုပ်ဖြန့်ဖြူးရောင်းချနေသော လုပ်ငန်းရှင်ဦးဇော်မျိုးဝင်းနှင့်တွေ့ဆုံ၍ စားသုံးသူကာကွယ်ရေးဥပဒေ အခန်း (၁၈) ပါ ကုန်စည်များအပေါ်တွင် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ထုတ်လုပ်ထားသောကုန်စည်များကိုသာရောင်းချရန်၊ ဥပဒေအခန်း (၁၀) ပါ စီးပွားရေးလုပ်ငန်းရှင်၏တာဝန်များနှင့် အခန်း (၁၁) ပါ  အန္တရာယ်ကင်းသောစားသောက်ကုန်ဖြစ်စေရေး အထူးအလေးပေးဆောင်ရွက်ရန်ကိစ္စရပ်များကိုဆွေးနွေးပြောကြားခဲ့ပြီးနောက် အသိပညာပေးလက်ကမ်းစာစောင်များဖြန့်ဝေခဲ့ကြောင်း သိရှိရပါသည်။

DOCA(ပဲခူး)