သတင်းနှင့် လှုပ်ရှားမှုများ

     စစ်ကိုင်းတိုင်းဒေသကြီးအတွင်းရှိ ကလေးခရိုင်၊ ကလေးမြို့၊ ပင်လုံရပ်ကွက်အတွင်းရှိ အလှကုန်ဆိုင် ( ၃ ) ဆိုင်အား ၁၃-၃-၂၀၂၃ ရက်နေ့က စားသုံးသူရေးရာဦးစီးဌာန၊ ကလေးခရိုင်ဦးစီးမှူးမှဦးဆောင်၍ ဝန်ထမ်း ( ၃ )ဦးတို့သည် ဈေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

     ထိုသို့ဈေးကွက်စောင့်ကြည့်စစ်ဆေးရာတွင် စားသုံးသူပြည်သူများအသုံးပြုနေသည့် အလှကုန်ပစ္စည်းများအား ဘေးအန္တရာယ်ကင်းရှင်းစွာဖြင့် လုံခြုံစိတ်ချမှုရှိသောကုန်စည်များာကိုး အသုံးပြုနိုင်ရန်၊ အစားအသောက်နှင့်ဆေးဝါးကွပ်ကဲရေးဦးစီးဌာနက သုံးစွဲရန်မသင့်ကြေငြာထားသော အလှကုန်ပစ္စည်းများ ရောင်းချခြင်းရှိ/မရှိနှင့် သက်တမ်းလွန်နေသည့်အလှကုန်ပစ္စည်းများ ရောင်းချခြင်း ရှိ/မရှိတို့ကို သွားရောက်စစ်ဆေးရခြင်းဖြစ်ပါသည်။

  ကလေးခရိုင်ဦးစီးမှူးက အလှကုန်ဆိုင်ပိုင်ရှင်များအား မိမိတို့ရောင်းချနေသော အလှကုန်ပစ္စည်းများအား ကုန်အညွှန်းအမှတ်အသားများပြည့်စုံသည့် အလှကုန်များကိုသာရောင်းချရန်နှင့် အစားအသောက်နှင့်ဆေးဝါးကွပ်ကဲရေးဦးစီးဌာနက သုံးစွဲရန်မသင့်ကြေညာထားသော အလှကုန်များအား ရောင်းချခြင်းမပြုရန်ဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်အနေဖြင့် ထုတ်ကုန်များလုံခြုံစိတ်ချရမှုရှိစေရေးနှင့် စားသုံးသူပြည်သူများ ဘေးအန္တရာယ်ကင်းရှင်းရေးအတွက် ဈေးကွက်စောင့်ကြည့်စစ်ဆေးခြင်းလုပ်ငန်းများကို ဆောင်ရွက်လျက်ရှိရာ ၂၀၂၃ခုနှစ်၊ မတ်လ(၁၃)ရက်နေ့၊ နေ့လယ်(၁၃:၀၀)နာရီအချိန်တွင် ရွှေဘိုမြို့၊ အမှတ်(၈)ရပ်ကွက်၊ ဝန်တော်အိမ်ရပ်ရှိ ဆေးနှင့်ဆေးပစ္စည်းအရောင်းဆိုင်နှင့် အမှတ်(၁၀)ရပ်ကွက်၊ သူဇာရပ်ရှိ ဆေးနှင့်ဆေးပစ္စည်းအရောင်းဆိုင်တို့အား စားသုံးသူရေးရာဦးစီးဌာနမှ ခရိုင်ဦးစီးမှူး၊ ရွှေဘိုမြို့နယ်တာဝန်ခံနှင့်  ရွှေဘိုခရိုင်ပြည်သူ့ကျန်းမာရေးဦးစီးဌာနတို့ပူးပေါင်း၍ စားသုံးသူများကို များစွာနစ်နာနိုင်သည့် အစားအသောက်နှင့်ဆေးဝါးကွပ်ကဲရေးဦးစီးဌာန၏ အသိအမှတ်ပြု DRC No. မပါရှိသည့်  Parbisure အမည်ဖြင့် အကြောအားဆေးများ ရောင်းချမှုရှိ/မရှိအား ဈေးကွက် စောင့်ကြည့်စစ်ဆေးခဲ့ပါသည်။

 အဆိုပါဆေးနှင့်ဆေးပစ္စည်းအရောင်းဆိုင်(၂)ဆိုင်တွင် ဖော်ပြပါဆေးဝါးများ ရောင်းချမှုမရှိကြောင်း စစ်ဆေးတွေ့ရှိရသည့်အတွက် ရွှေဘိုခရိုင်စားသုံးသူရေးရာဦးစီးဌာနမှ ခရိုင်ဦးစီးမှူးနှင့် တာဝန်ရှိသူများက စားသုံးသူရေးရာဦးစီးဌာနမှ ဆောင်ရွက်နေသည့် စားသုံးသူကာကွယ်ရေးလုပ်ငန်းများ၊ စားသုံးသူကာကွယ်ရေးဥပဒေ(၂၀၁၉)ပါ စားသုံးသူ၏အခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များ၊ စားသုံးသူအခွင့်အရေးနှင့် အကျိုးစီးပွားနစ်နာဆုံးရှုံးမှုများရှိပါက တိုင်ကြားနိုင်သည့် နည်းလမ်းများ၊ တိုင်းကြားနိုင်သည့်နေရာများနှင့် စိစစ်ညှိနှိုင်းဖြေရှင်းပေးမှုအခြေအနေများကို  ရှင်းလင်း ဆွေးနွေးခဲ့ကြကြောင်း၊  ရွှေဘိုခရိုင်ပြည်သူ့ကျန်းမာရေးဦးစီးဌာနမှလည်း စံမညီဆေးဝါးများ၊ တားမြစ် ဆေးဝါးများ၊ သက်တမ်းလွန်ဆေးဝါးများ၊ FDA၏ ထောက်ခံချက်မပါရှိသောဆေးဝါးများကို ရောင်းချခြင်း မပြုကြရန် အသိပညာပေးဆွေးနွေးခဲ့ကြကြောင်း၊   ဈေးကွက်စောင့်ကြည့်စစ်ဆေးသည့် ဆေးနှင့်ဆေးပစ္စည်း အရောင်းဆိုင်များသည် အသစ်ဖွင့်လှစ်ရောင်းချသည့် ဆေးဆိုင်များဖြစ်သဖြင့် လိုင်စင်အသစ်လျှောက်ထားရာတွင် လိုက်နာဆောင်ရွက်ရမည့်အချက်များကို စစ်ဆေးခဲ့ပြီး လိုအပ်ချက်များကို အကြံပြုဆွေးနွေးခြင်းများဆောင်ရွက်ခဲ့ကြကြောင်းနှင့်  စားသုံးသူကာကွယ်ရေးအသိပညာပေးလက်ကမ်းစာစောင်များကို ဖြန့်ဝေခဲ့ကြကြောင်း သတင်းရရှိပါသည်။

ရွှေဘို (DOCA)

           စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံ ဦးမျိုးဝင်းသန်းသည် ၂၀၂၃ ခုနှစ်၊ မတ်လ ၁၃ ရက်နေ့၊ နံနက် (၀၉:၄၅)နာရီတွင် ကန့်ဘလူမြို့၊ အမှတ်(၃)ရပ်ကွက်ရှိ “ယောနသန်”သောက်ရေသန့်လုပ်ငန်းရှင်အား တွေ့ဆုံ၍ ကုန်အညွှန်းအမှတ်အသားများ ပြည့်စုံမှန်ကန်စွာ ထည့်သွင်းဖော်ပြနိုင်ရေးနှင့် စီးပွားရေးလုပ်ငန်းရှင်၏ တာဝန်များ သိရှိလိုက်နာစေရေးတို့အား ဆွေးနွေး ဆောင်ရွက်ခဲ့ကြောင်း သိရှိရပါသည်။

          ကုန်အညွှန်အမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက်အမှတ် (၂/၂၀၁၉)ပါအတိုင်း အမျိုးအမည်၊ အရွယ်အစား၊ အရေအတွက်၊ အသားတင်ပမာဏနှင့် ထားသိုသိမ်းဆည်းမှုအညွှန်းတို့ကို မြန်မာဘာသာဖြင့်ဖြစ်စေ၊ မြန်မာဘာသာ နှင့်အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ဖော်ပြရမည်ဖြစ်ကြောင်း ရှင်းလင်းဆွေးနွေးခဲ့ပြီး လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

ကန့်ဘလူ(DOCA)

          ကရင်ပြည်နယ်၊ ဘားအံမြို့တွင် “ကမ္ဘာ့စားသုံးသူအခွင့်အရေးများနေ့”ကို ကရင်ပြည်နယ်အစိုးရ အဖွဲ့မှ ကြီးမှူး၍ ကရင်ပြည်နယ်စားသုံးသူရေးရာကော်မတီမှ ဦးဆောင်ကျင်းပ၍ ၂၀၂၃ခုနှစ်၊ မတ်လ ၁၅ ရက်၊ နံနက် (၀၉:၀၀) အချိန်တွင် ဘားအံမြို့၊ ဇွဲကပင်ခန်းမ၌ ကျင်းပခဲ့ရာ ကရင်ပြည်နယ်ဝန်ကြီး ချုပ်၊ ပြည်နယ်တရားလွှတ်တော်တရားသူကြီးချုပ်၊ အစိုးရအဖွဲ့ဝင် ဝန်ကြီးများ၊ ပြည်နယ်အဆင့် ဌာန ဆိုင်ရာများ၊ အသင်းအဖွဲ့များ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြောင်း သတင်းရရှိသည်။

       ရှေးဦးစွာ ကရင်ပြည်နယ်အစိုးရအဖွဲ့၊ ပြည်နယ်ဝန်ကြီးချုပ် သီရိပျံချီ ဦးစောမြင့်ဦးက “ကမ္ဘာ့ စားသုံးသူအခွင့်အရေးများနေ့” အခမ်းအနား အဖွင့်အမှာစကား ပြောကြားခဲ့ပြီး ကရင်ပြည်နယ် စားသုံးသူရေးရာကော်မတီ ဥက္ကဋ္ဌ၊ ကရင်ပြည်နယ်အစိုးရအဖွဲ့၊ စီးပွားရေးရာဝန်ကြီး ဦးစောခင်မောင်မြင့်က “ကမ္ဘာ့စားသုံးသူအခွင့်အရေးများနေ့” ဖြစ်ပေါ်လာပုံ သမိုင်းကြောင်းကို လည်းကောင်း၊ ဆက်လက်၍ ကရင်ပြည်နယ်စားသုံးသူရေးရာကော်မတီ အတွင်းရေးမှူး၊ စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးသန်းဦးက စားသုံးသူရေးရာဦးစီးဌာန ဖြစ်ပေါ်လာပုံသမိုင်းအကြောင်းနှင့် စားသုံးသူကာကွယ်ရေး ဥပဒေပါ စားသုံးသူအခွင့်အရေးနှင့်တာဝန်များအကြောင်းကိုလည်းကောင်း၊ ဌာနမှ တာဝန်ယူ ဆောင်ရွက် လျက်ရှိသည့် စားသုံးသူကာကွယ်ရေးဆိုင်ရာလုပ်ငန်းစဉ်များ အကြောင်းကိုလည်းကောင်း ရှင်းလင်း ပြော ကြားခြင်းနှင့် ကျေးဇူးတင်စကားပြောကြားခဲ့ပြီး “ကမ္ဘာ့စားသုံးသူအခွင့်အရေးများနေ့” အထိမ်းအမှတ် အခမ်းအနားအနေဖြင့်  Video Clip များ ပြသခဲ့ပြီး အမှတ်တရမှတ်တမ်း ဓာတ်ပုံရိုက်ကူးခဲ့သည်။

          ထို့နောက် တက်ရောက်လာကြပါသော ကရင်ပြည်နယ်အစိုးရအဖွဲ့၊ ပြည်နယ်ဝန်ကြီးချုပ်၊ ပြည်နယ်တရားလွှတ်တော်တရားသူကြီးချုပ်၊ အစိုးရအဖွဲ့ဝင် ဝန်ကြီးများ၊ ပြည်နယ်အဆင့် ဌာနဆိုင်ရာ များ၊ အသင်းအဖွဲ့များ၊ ဖိတ်ကြားထားသော ဧည့်သည်တော်များက ခင်းကျင်းပြသထားသော စားသုံးသူ ကာကွယ်ရေးဥပဒေနှင့် နည်းဥပဒေများ၊ စားသုံးသူကာကွယ်ရေးဆိုင်ရာ အသိပညာပေး လက်ကမ်း စာစောင်များ၊ ကျန်းမာရေးနှင့်ညီညွတ်သည့် စားသုံးရန်သင့်သောအစားအစာများ၊ သောက်သုံးရန် မသင့်သော ဆေးဝါးများ၊ သုံးစွဲရန် မသင့်သော အလှကုန်ပစ္စည်းများနှင့် ကုန်သွယ်မှုဖွံ့ဖြိုးရေး အထောက်အကူပြု ပြည်တွင်းထုတ်ကုန်များကို လှည့်လည်ကြည့်ရှု့အားပေးခဲ့ပြီး “ကမ္ဘာ့စားသုံးသူ အခွင့် အရေး များနေ့” အခမ်းအနားကို နေ့လယ် (၁၁:၃၀) အချိန်တွင် ရုတ်သိမ်းခဲ့ကြောင်းနှင့် အခမ်းအနားတွင်  (၁၅၀) ဦး တက်ရောက်ခဲ့ကြောင်း သတင်းရရှိပါသည်။  

DOCA(ကရင်)

ဘားအံ မတ်လ ၁၄

          စားသုံးသူရေးရာဦးစီးဌာန၊ ကရင်ပြည်နယ် ဦးစီးမှူးရုံးမှ ပြည်နယ်ဦးစီးမှူးဦးသန်းဦး၊ ဘားအံခရိုင်ဦးစီးမှူး ဦးမျိုးဝင်းနိုင်၊ ဌာနခွဲတာဝန်ခံများသည် ၁၄-၃-၂၀၂၃ ရက်နေ့ ၁၃၀၀ နာရီအချိန်တွင် ဘားအံမြို့အမှတ် ၄ ရပ်ကွက် ၊ ကမ်နားလမ်းရှိ စူပါတော့ ပေါင်မုန့်၊ ကိတ်မုန့် လုပ်ငန်းအား ထုတ်ကုန်များလုံခြုံစိတ်ချရမှုရှိစေရေး ကွင်းဆင်းစစ်ဆေးခဲ့ကြောင်း သိရသည်။

          ထို့သို့ကွင်းဆင်းစစ်ဆေး ဆောင်ရွက်ရာတွင် ပြည်နယ်ဦးစီးမှူး ဦးသန်းဦးက စားသုံးသူကာကွယ်ရေး ဥပဒေအရ ကုန်အညွှန်းမှတ်အသား ဖော်ပြခြင်းနှင့် စပ်လျဉ်း၍ မြန်မာလို ဖော်ပြရမည့် အချက်များကို အသေးစိတ်ရှင်းလင်းဆွေးနွေးခဲ့ပြီး ထုတ်ကုန်များလုံခြုံစိတ်ချရမှု ရှိစေရေးအတွက် ဆောင်ရွက်ရမည့်အချက်များနှင့် စာသုံးသူများဘေးဥပဒ်အန္တရာယ်ကင်းရှင်းစေရေးအတွက် ဆောင်ရန်ရှောင်ရန်အချက်များကို ဆွေးနွေးခဲ့ပြီး လုပ်ငန်းဆောင်ရွက်နေမှု အခြေအနေ များကို လှည့်လည်ကြည့်ရှု့ စစ်ဆေးခဲ့ကြသည်။

          စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ စီးပွားရေးလုပ်ငန်းရှင်များ လိုက်နာရန် ထုတ်ပြန်ထားသည့် ညွှန်ကြားချက်များအား လိုက်နာဆောင်ရွက်စေရေးအတွက် အသိပညာပေး ခြင်းလုပ်ငန်းများကို အရှိန်အဟုန်မြှင့် ဆောင်ရွက်လျက်ရှိကြောင်းသိရသည်။

DOCA(KAYIN)