သတင်းနှင့် လှုပ်ရှားမှုများ

    စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ ဦးဝင်းသိန်းဦး(ရုံးအုပ်)သည် ၁၇.၃.၂၀၂၃ ရက်နေ့တွင် မိုးညှင်းမြို့၊ အုပ်ကျင်းရပ်ကွက်မှ ဆိုင်ကယ်ဝပ်ရှော့လုပ်ငန်းရှင်များနှင့် တွေ့ဆုံဆွေးနွေးခဲ့ ပါသည်။

  ထိုသို့ဆွေးနွေးရာတွင် စားသုံးသူကာကွယ်ရေးဥပဒေ(၂၀၁၉)ပြဋ္ဌာန်းချက်အရ စီးပွားရေးလုပ်ငန်းရှင် ဆိုသည်မှာ “ကုန်စည်ကိုထုတ်လုပ်ခြင်း၊ ဖြန့်ဖြူးခြင်း၊ သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့တင်သွင်းခြင်း၊ ပြန်လည် ‌ရောင်းချခြင်းကိုဖြစ်စေ၊ ထောက်ပံ့ခြင်းကိုဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာလုပ်ငန်း လုပ်ကိုင်ခြင်းကိုဖြစ်စေ၊ တစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူ”ကို ဆိုလိုကြောင်း၊ စီးပွားရေးလုပ်ငန်းရှင်၏တာဝန်များဖြစ်သော ကုန်စည် (သို့) ဝန်ဆောင်မှု၏အာမခံချက်၊ သတ်မှတ်ချက်များနှင့်စပ်လျဉ်း၍ ရိုးရှင်းမှန်ကန်သောသတင်းအချက် အလက်များပေးခြင်း၊ စားသုံးသူကိုခွဲခြားမှုမရှိဘဲ ဖြောင့်မတ်မှန်ကန်စွာ ဆက်ဆံခြင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ ထပ်မံပေးချေရမည့်တန်ဖိုးကို စားသုံးသူကဝယ်ယူအသုံးမပြုမီ သိရှိစေရန်အတိအလင်းဖော်ပြပေးခြင်း၊ ဝန်ဆောင်မှုဆိုသည်မှာ လုပ်ငန်း သို့မဟုတ် လုပ်ဆောင်မှု အသွင်ဖြင့် စားသုံးသူ၏လိုအပ်ချက်ကို တန်းဖိုးဖြင့်ဖြစ်စေ၊ တန်ဖိုးမပါဘဲဖြစ်စေ ဖြည့်ဆည်းပေးသည့် ဆောင်ရွက်မှုကိုဆိုလိုကြောင်း၊ ဝန်ဆောင်မှုပေးခြင်းနှင့် စပ်လျဉ်းသည့်‌ဖော်ပြရမည့် အာမခံချက်များဖြစ်သော စားသုံးသူ၏ လိုအပ်ချက်နှင့်ကိုက်ညီမှုရှိခြင်း၊ စားသုံးသူနှင့်သဘောတူညီထားသည့် ဝန်ဆောင်မှုတန်ဖိုးအတိုင်း ပေးအပ်စေခြင်း စသည့်အချက်များ ရှင်းလင်းဆွေးနွေးခဲ့ပါသည်။

DOCA(ကချင်)

       မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ကံမမြို့နယ်အတွင်း ဈေးကွက်များတွင် ရောင်းချဖြန့်ဖြူးလျက်ရှိသော ကုန်စည်များဘေးကင်းလုံခြုံစိတ်ချရမှု ရှိစေရေးအတွက် အလေးထားဆောင်ရွက်လျက်ရှိရာ (၁၃.၃.၂၀၂၃)ရက်နေ့၊ နံနက်(၁၀:၀၀)နာရီ အချိန်တွင် သရက်ခရိုင်ဦးစီးမှူးရုံးမှ ဝန်ထမ်းများနှင့်ကံမမြို့နယ်တာဝန်ခံသည် အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့နှင့်ပြန်ကြားရေးနှင့်ပြည့်သူ ဆက်ဆံရေးဦးစီးဌာနပါဝင်သော ဌာနဆိုင်ရာအဖွဲ့စုံဖြင့်ပူးပေါင်း၍ ကံမမြို့ပေါ်ရှိအမှတ်(၂)၊(၃)၊(၄)ရပ်ကွက် များ၌ ရောင်းချနေသော ကုန်စုံဆိုင်များတွင် သုံးစွဲရန်မသင့် ထုတ်ပြန်ထားသည့် အလှကုန်ပစ္စည်းများ  ရောင်းချမှုရှိ/ မရှိနှင့် ဌာန၏ ကုန်အညွှန်းအမှတ်အသားဖော်ပြချက် ပြည့်စုံမှုူ ရှိ/ မရှိတို့အား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

        ထိုသို့ ဈေးကွက်စောင့်ကြည့် စစ်ဆေးရာတွင် ကုန်စုံဆိုင်ပိုင်ရှင်များအား သုံးစွဲရန်မသင့်ဟု ထုတ်ပြန်ထားသည့် အလှကုန်ပစ္စည်းများအား ဈေးကွက်အတွင်းရောင်းချမှုမရှိစေရေး၊ ကံမမြို့နယ် တာဝန်ခံဒေါ်နွဲ့ယဉ်ဝင်းမှ စားသုံးသူကာကွယ်ရေးဥပဒေ အခန်း(၁၈) ကုန်အညွှန်းအမှတ်အသား‌ ဖော်ပြခြင်းနှင့် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ ဖော်ပြထားသော ကုန်စည်ကိုသာ ရောင်းချဖြန့်ဖြူးရန် အသိပညာပေးဆွေးနွေးခဲ့ပါသည်။ ဆက်လက်၍ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၌ နေ့လည်(၁၃:၀၀)နာရီအချိန်တွင် ကျောင်းသား/ကျောင်းသူများနှင့် ဝန်ထမ်းများ စုစုပေါင်း (၂၀)ဦး တို့အား အသိပညာပေးဟောပြော ပွဲပြုလုပ်ရာတွင် ကံမမြို့နယ်တာဝန်ခံ ဒေါ်နွဲ့ယဉ်ဝင်းက စားသုံးသူအခွင့်အရေးများနှင့် Happy Water အကြောင်း သိကောင်းစရာများကိုဆွေးနွေးပြောကြားခြင်း၊ ဒု-ကြီးကြပ်ရေးမှူး ဦးကျော်ရွှေမှ စားသုံးသူပြည်သူများ ကုန်ပစ္စည်းဝယ်ယူအသုံးပြုရာတွင် အဓိကပါဝင်ရမည့် အချက်(၇)ချက်ကို အသေးစိတ်ရှင်း လင်းပြောကြားခြင်း၊ ကုန်ပစ္စည်းများဝယ်ယူသုံးစွဲရာတွင် ထုတ်လုပ်ရက်စွဲနှင့်သက်တမ်းလွန်ရက်စွဲများ  ကိုသေချာစွာ ကြည့်ရှုဝယ်ယူစားသုံးကြပါရန် ဟောပြောဆွေးနွေးခြင်းများဆောင်ရွက်ပြီး မြန်မာနိုင်ငံ စားသုံးသူကာကွယ်ရေး ကော်မရှင်မှထုတ်ပြန်ထားသည့် ညွှန်ကြားချက်အမှတ်(၂/၂၀၁၉) လက်ကမ်း စာစောင်များဖြန့်ဝေပေးခဲ့ပါသည်။

DOCA(မကွေး)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဉီးစီးဌာန၊ ကလေးခရိုင်၊ တမူးမြို့နယ်တာဝန်ခံ၊ ဦးစွမ်းရည်သည် ၂၀၂၃ခုနှစ်၊ မတ်လ(၁၃)ရက်နေ့၊ နံနက်(၁၀:၃၀)နာရီအချိန်တွင်  စော်ဘွား-၈ရပ်ကွက်ရှိ ဆီကြိတ်ခွဲရောင်းချသော လုပ်ငန်းရှင် ဒေါ်ခင်မျိုးနွယ်ထံသို့ သွားရောက်၍ ဆီကြိတ်ခွဲမှုအခြေအနေများကို ဆွေးနွေးမေးမြန်းခဲ့ပါသည်။

ထိုသို့တွေ့ဆုံဆွေးနွေးရာတွင် ဆီစက်လုပ်ငန်းရှင် ဒေါ်ခင်မျိုးနွယ်က မိမိတို့ဆီစက်အနေဖြင့် မုန့်ညှင်းဆီကိုသာ အဓိကကြိတ်ခွဲရပြီး မုန့်ညှင်းဆံ (၁၆) ပြည် တစ်တင်း လျှင် (၆၀၀၀၀)ကျပ်ပေး၍ ဝယ်ယူရကြောင်း၊ မုန့်ညှင်းဆံ(၁) တင်းကြိတ်ခွဲလျှင် ဆီ(၅) ပိဿာထွက်ရှိပါကြောင်း၊ တစ်ရက်လျှင် တင်း (၄၀)ခန့် ကြိတ်ခွဲရ၍ ဆီထွက်ရှိမှုအနေဖြင့် ပိဿာ ချိန်(၂၀၀)ခန့်ထွက်ရှိကြောင်း၊ ဆီ(၁၀)ပိဿာဝင် တစ်ပုံးလျှင် (၁၃၀၀၀၀)ကျပ်ဖြင့် ရောင်းချရလျက်ရှိပြီး မုန့်ညှင်းဆီများကို  မြို့နယ်တွင်းသာ ရောင်းချရပါကြောင်းနှင့် ယခုနှစ်တွင် မုန့်ညှင်းဆံများ ဝယ်ယူရာ၌ ဈေးနှုန်းကြီးမြင့်သည့်အတွက် ဆီ‌ဈေးနှုန်းများလည်း ကြီးမြင့်ရခြင်း ဖြစ်ပါကြောင်း ဆီစက်လုပ်ငန်းရှင် ဒေါ်ခင်မျိုးနွယ်ထံမှ သိရှိရပါသည်။                                              

ဇင်မိုးဝါ(ကလေး)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကလေးခရိုင်၊ တမူးမြို့နယ်တွင် ၂၀၂၃ ခုနှစ်၊ မတ်လ (၁၃) ရက်နေ့၊ နံနက်(၁၁:၃၀)နာရီအချိန်၌  တမူးမြို့တာဝန်ခံ၊ ဦးစွမ်းရည်(ဦးစီးမှူး)က ကုန်တင်/ကုန်ချရုံးသို့ သွားရောက်၍ အသိပညာပေးဟောပြောပွဲ ကျင်းပပြုလုပ်ခဲ့ရာ ပြည်သူ ( ၇၀ ) ဦး တက်ရောက်ခဲ့ကြောင်း သိရှိရပါသည်။

အဆိုပါဟောပြောပွဲတွင်  စားသုံးသူရေးရာဦးစီးဌာန၊ တမူးမြို့နယ်တာဝန်ခံက ပထမဦးစွာ စားသုံးသူများရရှိနိုင်သည့်အခွင့်အရေးများနှင့် လိုက်နာရမည့်တာဝန်များကိုလည်းကောင်း၊  စားသုံးသူများအနေဖြင့် ကုန်စည်၊ဝန်ဆောင်မှုများနှင့်ပတ်သက်၍ နစ်နာဆုံးရှုံးမှုများနှင့်ကြုံတွေ့ရပါက စားသုံးသူရေးရာဦးစီးဌာနသို့ တိုင်ကြားနိုင်သည့်နည်းလမ်းများကို လည်းကောင်း အသိပညာပေးဆွေးနွေး ပြောကြားခဲ့ကြောင်း သတင်းရရှိပါသည်။

ဇင်မိုးဝါ (ကလေး)

      စီးပွားရေးနှင့်ကူးသန်းရောင်းဝယ်‌ရေးဝန်ကြီးဌာန၊ စားသုံးသူရေးရာဦးစီးဌာန၊ ရခိုင်ပြည်နယ်၊ စစ်တွေခရိုင်ဦးစီးမှူးရုံး၊ ခရိုင်ဦးစီးမှူး ဦးမောင်လှဝင်းနှင့်ဝန်ထမ်းများသည် (၁၇-၃-၂၀၂၃)ရက်နေ့ နေ့လည်(၁:၀၀)နာရီ မှ (၂:၃၀)နာရီထိ စစ်တွေခရိုင်၊ မီးသတ်ဦးစီးမှူးရုံး၌ မီးသတ်တပ်ဖွဲ့ဝင်များနှင့် မိသားစုဝင်များကို စားသုံးသူကာကွယ်ရေးအသိပညာပေး ဟောပြောဆွေးနွေးပွဲအား ကျင်းပပြု လုပ်ခဲ့ပါသည်။

         ရှေးဦးစွာ စစ်တွေခရိုင်၊ မီးသတ်ဦးစီးဌာန၊ ခရိုင်ဦးစီးမှူး ဦးစံထွန်းက  အဖွင့်အမှာစကားပြောကြားခဲ့ပြီး စားသုံးသူရေးရာဦးစီးဌာန စစ်တွေခရိုင်ဦးစီးမှူး ဦးမောင်လှဝင်း(ဦးစီးအရာရှိ)က စားသုံးသူကာကွယ်ရေးနှင့်ပတ်သက်၍ စားသုံးသူရေးရာဦးစီးဌာန၏ ဆောင်ပုဒ်(Motto)” ဖြစ်သော စားသုံးသူအခွင့်အရေး ဦးစားပေး” ၏ အဓိပ္ပါယ်အား ရှင်းလင်းပြောကြားခဲ့ပြီး စားသုံးသူများအနေဖြင့် မိမိတို့၏ အခွင့်အရေးများဆုံးရှုံးမှုမရှိစေရေးနှင့် ဘေးအန္တရာယ်ကင်းရှင်းစေရေးအတွက် ကုန်စည်(သို့မဟုတ်)ဝန်ဆောင်မှုကို ဝယ်ယူအသုံးပြုရာတွင် ဆုံးရှုံးနစ်နာမှုများဖြစ်ပေါ်လာပါက တိုင်ကြားနိုင်သည့် နည်းလမ်းများအားလည်းကောင်း၊ စားသုံးသူကာကွယ်ရေးဥပဒေ (၂၀၁၉)၊  အခန်း(၁၈) ၊ ပုဒ်မ(၄၁) ပြဌာန်းချက် ကုန်အညွှန်းအမှတ် အသားများ ပြည့်စုံစွာဖော်ပြပါရှိသော  ကုန်စည်များကို ဝယ်ယူသုံးစွဲကြရန်နှင့် ကုန်စည်(သို့မဟုတ်) ဝန်ဆောင်မှုကို ဝယ်ယူအသုံးပြုရာတွင် သိရှိလိုသည့်သတင်းအချက်အလက်များနှင့် စီးပွားရေး လုပ်ငန်းရှင်များမှ ကုန်စည်(သို့မဟုတ်) ဝန်ဆောင်မှုနှင့်ပတ်သက်၍ တာဝန်ယူမှု၊ တာဝန်ခံမှု ကိစ္စရပ် များအား ကြိုတင်မေးမြန်းပြီး နှစ်ဦးနှစ်ဖက် ကတိကဝတ်ပြု သဘောတူပြီးမှသာ ဝယ်ယူအသုံးပြု စေရေးနှင့် ဆုံးရှုံးနစ်နာမှုများဖြစ်ပေါ်လာပါက မည်ကဲ့သို့ တာဝန်ယူဆောင်ရွက်ပေးနိုင်မှုများအား လေ့လာမေးမြန်းပြီး စနစ်တကျ ဝယ်ယူတတ်စေ‌ရေးအား  ချပြဆွေးနွေးခဲ့ပါသည်။ဆက်လက်၍  စားသုံးသူရေးရာဦးစီးဌာန၊ ဒုတိယဦးစီးမှူး ဦးဇော်မင်းဦးက စားသုံးသူကာကွယ်ရေးဥပဒေ အခန်း(၉) ပါ စားသုံးသူ၏ အခွင့်အရေးနှင့် တာဝန်များအား ချပြဆွေးနွေးခြင်း၊ စားသုံးသူအခွင့်အရေးဆုံးရှုံးမှုများ ဖြစ်ပေါ်လာပါက စားသုံးသူရေးရာဦးစီးဌာန၊ စစ်တွေခရိုင်ဦးစီး မှူးရုံး၌ ဖွင့်လှစ်ထားရှိသည့် (CICC- Consumer Information and Complaint Center) စားသုံးသူသတင်းပြန်ကြားရေး နှင့် တိုင်ကြားမှုလက်ခံ ဆောင်ရွက်ရေးစင်တာ ဖွင့်လှစ်ထားရှိခြင်း နှင့် တိုင်ကြားမှုများပြုလုပ်နိုင်ပါကြောင်း ချပြဆွေးနွေးပြီး မြို့နယ်တာဝန်ခံ ဦးသိန်းအောင်(ဦးစီးမှူး)က လိုအပ်သည်များကို ဖြည့်စွက်ဆွေးနွေးပြီး တက်ရောက်လာသူများက သိလိုရှိသည်များကို မေးမြန်းရာခရိုင်ဦးစီးမှူး ဦးမောင်လှဝင်းမှ မေးမြန်းချက်များအပေါ် ပြန်လည်ဖြေကြားခဲ့ပြီး စားသုံးသူကာကွယ်ရေးအသိပညာပေးဟောပြောဆွေးနွေးခဲ့ကြောင်း သိရှိရပါသည်။

DOCA(ရခိုင်)