သတင်းနှင့် လှုပ်ရှားမှုများ

     မွန်ပြည်နယ်၊ စားသုံးသူရေးရာဦးစီးဌာန၊ သထုံမြို့နယ်တာဝန်ခံနှင့်ဝန်ထမ်းများသည် ၁၉.၁၀.၂၀၂၂ ရက်နေ့တွင် သထုံမြို့နယ်၊ အမက(လွန်)ရွာဦးကျောင်း၌ စားသုံးသူကာကွယ်ရေးအသိပညာပေး ဟောပြောဆွေးနွေးခြင်း ကျင်းပပြုလုပ်ခဲ့ပါသည်။

     အဆိုပါဟောပြောဆွေးနွေးပွဲတွင် အမက(လွန်)ရွာဦးကျောင်းမှ ကျောင်းအုပ်ဆရာမကြီး ဒေါ်သူဇာဝင်းမှ အဖွင့်အမှာစကားပြောကြားခဲ့ပြီး စားသုံးသူရေးရာဦးစီးဌာန၊ ဦးစီးအရာရှိ ဦးအောင်ကျော်မင်းက စားသုံးသူအခွင့်အရေးနှင့်တာဝန်များ၊ ကုန်စည်များဝယ်ယူရာတွင် ကုန်အညွှန်း အမှတ်အသားကို အဓိကထား ဖတ်ရှု့သင့်ကြောင်း၊ ကုန်စည်/ဝန်ဆောင်မှုများရွေးချယ်ဝယ်ယူရာတွင် သတင်းအချက်အလက်များကို သေချာစွာစုံစမ်းရန်၊ ကုန်စည်/ဝန်ဆောင်မှုများကိုဝယ်ယူ သုံးစွဲခြင်းကြောင့် စားသုံးသူထိခိုက်နစ်နာမှုပေါ်လာပါက စားသုံးသူရေးရာဦးစီးဌာနသို့ တိုင်ကြားနိုင်သည့်အကြောင်းအရာများ၊ Consumer Call Center သို့ဖုန်းခေါ်ဆို၍လည်း တိုင်ကြားနိုင်ကြောင်း ဟောပြောဆွေးနွေးခဲ့ပါသည်။

     အဆိုပါ ဟောပြောဆွေးနွေးပွဲသို့ ဆရာ/ဆရာမ၊ ကျောင်းသား/ကျောင်းသူ စုစုပေါင်း (၁၁၀) ဦး တက်ရောက်ခဲ့ကြောင်း သိရှိရပါသည်။

DOCA(မွန်)

    မွန်ပြည်နယ်၊ စားသုံးသူရေးရာဦးစီးဌာန၊ ပေါင်မြို့နယ်တာဝန်ခံသည် ၂၀၂၂ ခုနှစ်၊ အောက်တိုဘာလ ၁၉ ရက် နံနက် (၁၀:၀၀) ချိန်တွင် မြို့နယ်စည်ပင်သာယာရေးအဖွဲ့၊ အထွေထွေအုပ်ချုပ်ရေးဦးစီးဌာန၊ ရပ်ကွက်အုပ်ချုပ်ရေးမှူး၊ ဈေးတာဝန်ခံတို့ပါဝင်သော ပူးပေါင်းအဖွဲ့ဖြင့် ဇင်းကျိုက်မြို့၊ ဗိုလ်ချုပ်ဈေး၌ စားသောက်ကုန်နှင့် အလှကုန်ပစ္စည်းများအား ဈေးကွက်စောင့်ကြည့်စစ်ဆေးခဲ့ကြပါသည်။

    ထိုသို့စစ်ဆေးရာတွင် အဆိုပါပစ္စည်းများမှာ ထုတ်ကုန်လုံခြုံစိတ်ချရမှုရှိ/မရှိ၊ မြန်မာနိုင်ငံ စားသုံးသူရေးရာကော်မရှင်၏ ညွှန်ကြားချက်အမှတ် (၂/၂၀၁၉) ပါ ကုန်အညွှန်းအမှတ်အသား ဖော်ပြရမည့်အချက်များနှင့် ကိုက်ညီမှုရှိ/မရှိ စစ်ဆေးခဲ့ပြီး စားသောက်ကုန်နှင့် အလှကုန်ရောင်းချသော ဆိုင်ခန်း (၉)ခန်း ဆိုင်ရှင်များအား ကုန်အညွှန်းအမှတ်အသားဖော်ပြချက်နှင့် ကိုက်ညီမှုမရှိသော ကုန်စည်များအား ရောင်းချခြင်းမပြုရန် အသိပညာပေးခဲ့ပြီး မြန်မာနိုင်ငံစားသုံးသူရေးရာ ကော်မရှင်၏ ညွှန်ကြားချက်အမှတ် (၂/၂၀၁၉) လက်ကမ်းစာစောင်များအား ဖြန့်ဝေပေးခဲ့ကြောင်း သတင်းရရှိပါသည်။

DOCA(မွန်)

    မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်မြို့နယ်တာဝန်ခံသည် ၂၀.၁၀.၂၀၂၂ ရက်နေ့တွင် ပြည်နယ် အစားအသောက်နှင့်ဆေးဝါးကွပ်ကဲရေးဦးစီးဌာန၊ အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ မြို့နယ် ကျန်းမာရေးဦးစီးဌာနတို့ပါဝင်သော ပူးပေါင်းအဖွဲ့ဖြင့် မော်လမြိုင်မြို့၊ K-Market၊ Ocean Super Center ၊ ဝံဈေးတို့တွင် အစားအသောက်နှင့်ဆေးဝါးကွပ်ကဲရေးဦးစီးဌာနက စားသုံးရန်မသင့်ကြောင်း ကြော်ငြာထားသည့် အင်ဒိုနီးရှားနိုင်ငံထုတ် ခေါက်ဆွဲခြောက် Sedaap အမှတ်တံဆိပ် Expire Date (27/March/2023), (24/April/2023), (21/May/2023) ပစ္စည်း (၃) မျိုးအား ဈေးကွက်စောင့်ကြည့်စစ်ဆေးခဲ့ပါသည်။

      ထိုသို့ စစ်ဆေးရာတွင် အဆိုပါ ပစ္စည်းများမှာ ရောင်းချခြင်းမရှိကြောင်း စစ်ဆေးတွေ့ရှိရပြီး တာဝန်ခံများအား မြန်မာနိုင်ငံစားသုံးသူရေးရာ ကော်မရှင်၏ ညွှန်ကြားချက်အမှတ် (၂/၂၀၁၉) လက်ကမ်းစာစောင်များအား ဖြန့်ဝေပေးခဲ့ကြောင်း သိရှိရပါသည်။

DOCA(မွန်)

        မန္တလေးတိုင်းဒေသကြီး စားသုံးသူရေးရာဦးစီးဌာန ၊ညောင်ဦးခရိုင် ၊ ကျောက်ပန်းတောင်းမြို့နယ် တာဝန်ခံသည် အထွေထွေအုပ်ချုပ်ရေး ဦးစီးဌာန၊ အစည်းအဝေးခန်းမ၌ (၁၉-၁၀-၂၀၂၂) ရက်နေ့၊ နံနက် ၁၀:၀၀ နာရီအချိန်တွင် စားသုံးသူကာကွယ်ရေး အသိပညာပေးဟောပြောဆွေးနွေးပွဲပြုလုပ်ခဲ့ပါသည်။

          အဆိုပါဆွေးနွေးပွဲကို မြို့နယ်အထွေထွေအုပ်ချုပ်ရေးဦးစီးဌာန ၊ မြို့နယ်အခြေခံပညာဦးစီးဌာန ၊ မြန်မာနိုင်ငံရဲတပ်ဖွဲ့ ၊ မြို့နယ်ကျန်းမာရေးဦးစီးဌာန စသည့်ဌာနများမှ စုစုပေါင်းဝန်ထမ်း(၃၅)ဦး တက်ရောက်ခဲ့ပါသည်။

         ဆွေးနွေးပွဲသို့တက်ရောက်လာသူများအား မြန်မာနိုင်ငံရဲတပ်ဖွဲ့၊မြို့နယ်ရဲမှူးမှ လူကုန်ကူးမှုတိုက် ဖျက်ဖို့ နည်းပညာအခန်းကဏ္ဍမြှင့်တင်လုပ်ဆောင်စို့ အကြောင်းအရာနှင့်ပတ်သက်၍ လည်းကောင်း၊ မြို့နယ်ကျန်းမာရေးဦးစီးဌာနမှ ကိုဗစ် -၁၉ ရောဂါသတိပြုစေလိုသည့်အချက်များ၊ အဟာရနှင့်ပတ် သက်သည်များကို ဟောပြောဆွေးနွေးခဲ့ကြပြီး ၊ စားသုံးသူရေးရာဦးစီးဌာန ၊ မြို့နယ်တာဝန်ခံ ဒေါ်မြသန္တာထွန်းမှ စာသုံးသူများ၏ အခွင့်အရေးနှင့်တာဝန်များ ၊ စီးပွားရေးလုပ်ငန်းရှင်များ၏ တာဝန်နှင့်တားမြစ်ချက်များ ၊ စားသုံးသူများနစ်နာဆုံးရှုံးမှုများ ရှိလာပါက တိုင်းဒေသကြီး ၊ ပြည်နယ်၊ ခရိုင်ရုံးများတွင် ဖွင့်လှစ်ထားသော စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) ရုံးများတွင် အရေးဆိုတိုင်ကြားနိုင်ပါကြောင်း ၊ ထို့အပြင် Call Center ဝန်ဆောင်မှုအားလည်း ဖွင့်လှစ်ထားရှိပြီးဖြစ်ရာ Consumer Call Center နံပါတ် 1535 သို့လည်း ရုံးချိန်အတွင်း ဆက်သွယ်မေးမြန်းတိုင်ကြားနိုင်ပြီဖြစ်ပါကြောင်း ၊ စားသုံးသူကာကွယ်ရေးဥပဒေ အခန်း (၁၈)၊ပုဒ်မ (၄၁)ပါ အချက်များ စသည်ဖြင့်အသိပညာပေးရှင်းလင်းခြင်းနှင့် စားသုံးဆီနှင့် စက်သုံးဆီ များ ချွေတာသုံးစွဲ ကြမယ်ဆိုရင် ရရှိနိုင်သောအကျိုးကျေးဇူးများအား အကျယ်တဝင့်ဟောပြော ဆွေးနွေးခဲ့ပြီး အဆိုပါ ဟောပြောဆွေးနွေးပွဲကို (၁၁:၃၀) နာရီအချိန်တွင် ပြီးစီးခဲ့ကြောင်းသိရပါသည်။

DOCA(မန္တလေး)

    မွန်ပြည်နယ်၊ စားသုံးသူရေးရာဦးစီးဌာန၊ ဘီလင်း မြို့နယ်တာဝန်ခံနှင့် ဝန်ထမ်းများသည်   ဘိုးလှကြီးရပ်ကွက် (အ.မ.က) မြို့သစ်ကျောင်း၌  ၂၀.၁၀.၂၀၂၂ ရက်နေ့၊ (၁၀:၀၀) နာရီအချိန်တွင် စားသုံးသူကာကွယ်ရေးအသိပညာပေး ဟောပြောဆွေးနွေးပွဲအား ကျင်းပခဲ့ရာ ဒုဦးစီးမှူး ဦးစည်သူက စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက် လုပ်ငန်းဆောင်ရွက်မှုအခြေအနေအား ရှင်းလင်းပြောကြားပြီး ကျောင်းသူ၊ ကျောင်းသားများအား ဘေးအန္တရာယ်ကင်းသော အစားအသောက်များကို ရွေးချယ်ဝယ်ယူစားသုံးတတ်စေရန် ရှင်းလင်းဟောပြော ဆွေးနွေးခဲ့ပါသည်။

      ဆွေးနွေးပွဲသို့ ကျောင်းအုပ်ဆရာမကြီးနှင့် ဆရာ၊ ဆရာမ (၈) ဦး ကျောင်းသား၊ ကျောင်းသူ (၁၇၉) ဦးတက်ရောက်ခဲ့ပါသည်။ ဆွေးနွေးပွဲအပြီးတွင် ဌာန၏လက်ကမ်းစာစောင်များ ဝေငှခဲ့ကြောင်း သိရှိရသည်။

DOCA(မွန်)