သတင်းနှင့် လှုပ်ရှားမှုများ

       စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ ဒေါ်ဆန္ဒမွန်(ဒု-ဦးစီးမှူး)နှင့်ဝန်ထမ်းများသည် 25.10.2022 ရက်နေ့ နံနက် 10:00 နာရီအချိန်၌ ဗန်းမော်မြို့၊ ဟန်းတဲရပ်ကွက်၊ ဖိုးဒေဝ အခြေခံပညာအထက်တန်းကျောင်း(ခွဲ)တွင် စားသုံးသူကာကွယ်ရေး အသိပညာပေးဟောပြောပွဲ ပြုလုပ်ခဲ့ပါသည်။

  အဆိုပါဟောပြောပွဲတွင် ဒေါ်ဆန္ဒမွန်(ဒု-ဦးစီးမှူး)မှ စားသုံးသူကာကွယ်ရေးဥပဒေ၏ အဓိပ္ပာယ် ဖော်ပြချက်များမှ စားသုံးသူကာကွယ်ရေးဆိုသည်မှာ ကုန်စည်သို့မဟုတ်ဝန်ဆောင်မှုနှင့်စပ်လျဉ်း၍ စားသုံးသူ၏အခွင့်အရေးနှင့် အကျိုးစီးပွားကိုကာကွယ်ပေးခြင်း၊ စားသုံးသူနှင့်စီးပွား‌ရေးလုပ်ငန်းရှင်တို့အကြား ကော်မရှင်နှင့်ကော်မတီအဆင့်ဆင့်တို့မှ သတ်မှတ်ဆောင်ရွက်ပေးသည့် မျှတမှုရှိသော လုပ်ငန်းစဉ်ဆိုလိုကြောင်း၊ စားသုံးသူဆိုသည်မှာ ကုန်စည် သို့မဟုတ် ဝန်ဆောင်မှုကို ကုန်သွယ်ရောင်းဝယ်မှုပြုရန် သို့မဟုတ် အသက်မွေးဝမ်းကျောင်းပြုရန်မဟုတ်ဘဲ ကိုယ်တိုင်သုံးစွဲမှုအတွက် သော်လည်းကောင်း၊ အခြားသူများအတွက်သော်လည်းကောင်း ရည်ရွယ်၍ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည်ချေးငှားခြင်းပြုလုပ်သူများ သိုမဟုတ် ပေးကမ်းထောက်ပံ့ခြင်းခံရသူများကို ဆိုလိုကြောင်း၊ ကျောင်းသူ/ကျောင်းသားများအား အသင့်စားမုန့်အမျိုးမျိုးတို့ကို ဝယ်ယူသုံးစွဲရာတွင် အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်း၊ ဓာတ်မတည့်ကြောင်းဖော်ပြချက်၊ ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲများကို အဓိကဖတ်ရှုရမည်ဖြစ်ကြောင်း နမူနာပစ္စည်းများဖြင့်ပြသကာ ရှင်းလင်း‌‌ဟောပြောခဲ့ပါသည်။ ထို့နောက် စာသင်ကျောင်းမုန့်ဆိုင်များအား ဘေးအန္တရာယ်ရှိသောအစားအစာများ‌ရောင်းချခြင်း ရှိ/မရှိ စစ်ဆေးခဲ့ပြီး စားသုံးသူကာကွယ်ရေးဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။ ဟောပြောပွဲသို့ ဆရာ/ ဆရာမ(၈)ဦး၊ ကျောင်းသူ/ကျောင်းသား(220)ဦး၊ စုစုပေါင်း(228)ဦးတက်ရောက်ခဲ့ပါသည်။

DOCA(ကချင်)

        ယခုကာလအတွင်း ကြက်သွန်နီဈေးပြန်လည်မြင့်တက်လာကြောင်း စက်တင်ဘာလဆန်း ပိုင်းတွင် ကြက်သွန်နီ(၁)ပိဿာ ကျပ်(၃၂၀၀)မှ ကျပ်(၃၅၀၀)ထိဈေးမြင့်တက်လာခဲ့ပြီး လကုန်ပိုင်းတွင် ကျပ်(၂၇၀၀)မှ (၃၀၀၀)အထိ ဈေးပြန်ကျခဲ့ပြီး သီတင်းကျွတ်လပြည့်နောက်ပိုင်း မြဝတီဘက်မှ အဆွဲများလာသည့်အတွက် ကျပ်(၃၂၀၀)မှ ကျပ်(၃၇၀၀)အထိဈေးပြန်လည်မြင့်တက်ခဲ့ကြောင်း ဆိပ်ဖြူကုန်စည်ဒိုင်မှ လှောင်လက်သမားတစ်ဦး၏ ပြောကြားချက်အရ သိရှိရပါသည်။

      ၎င်းအနေဖြင့် ကြက်သွန်နီများကို ဧပြီလ(သင်္ကြန်)ပြီးမှစ၍ ကုန်ချိန်သုံးသိန်းခန့် သိုလှောင် ထားခဲ့ကြောင်း ဇူလိုင်လမှစ၍ ပြန်ထုတ်ရောင်းခဲ့ရာ ဩဂုတ်၊ စက်တင်ဘာလများတွင် ကြိုက်ဈေး ရသည့်အတွက် အများဆုံးထုတ်ရောင်းခဲ့ရာ ကုန်ချိန်သုံးသောင်းခန့်သာကျန်ရှိတော့ကြောင်း  ကြက်သွန်နီမှာ ပုံမှန်နှစ်များတွင် အချိန်(၁၀၀)လျှင် တစ်လ(၅)ပိဿာခန့် လျော့နည်းသော်လည်း ယခုနှစ် ကြက်သွန်နီရိတ်သိမ်းချိန်တွင် မိုးရွာသွန်းမှုရှိသည့်အတွက် (၇)ပိဿာမှ (၈)ပိဿာအထိ လျော့နည်း ကြောင်း လှောင်လက်သမားအနေဖြင့် ဝယ်ဈေးထက် နှစ်ဆခွဲ သုံးဆလျော့လျှင်တွက်ခြေကိုက် ကြောင်း၊ ယခုနှစ်အဖို ကြက်သွန်လှောင်သည့်အချိန်(၄)လ၊ (၅)လနှင့် ဝယ်ဈေးထက်လေးဆမှ ငါးဆ အထိရ၍ ယခင်နှစ်များထက်ပို၍တွက်ခြေကိုက်ကြောင်း၊ ကြက်သွန်လှောင်လက်သမားများအဖို့အရဲ စွန့်၍လုပ်ကိုင်ရကြောင်း၊ အချို့နှစ်များတွင် ကျပ်သိန်းသုံး၊ လေးရာအထိရှုံးခဲ့ရသည့်နှစ်များလည်း ရှိကြောင်း သိရှိရပါသည်။

       မြဝတီသို့တင်ပို့ခြင်းအတွက် (၂၅)ပိဿာတစ်အိတ်လျှင် ကားခကျပ်(၃၄၀၀)ခန့်ပေးရကြောင်း လုပ်သားခမှာ တစ်အိတ်လျှင် ကျပ်(၂၀၀)ပေးရပြီး ကြက်သွန်ရွေးရန်အတွက် အမျိုးသမီးလုပ်သား (၁၀)ဦးခန့်ကို ကြက်သွန်စတင်သိုလှောင်ချိန်မှ တစ်နေ့လျှင်ကျပ်(၅၀၀၀)နှုန်းပေး၍ ငှားရကြောင်း သို့ဖြစ်၍ ကြက်သွန်လှောင်သမားများအဖို့ လောင်းကစားသမားကဲ့သို့ အမြဲစိုးရိမ်နေရကြောင်း ယခုနှစ်ကဲ့သို့ ကြက်သွန်ဈေးကောင်းသည့်အတွက် လာမည့်နှစ်တွင် ကြက်သွန်စိုက်ဧကပိုများ နိုင်မည်ဟုခန့်မှန်းကြောင်း ကုန်သည်ဦးမှတ်ကျော်၏ ပြောကြားချက်အရသိရှိရပါသည်။

DOCA(မကွေး)

           မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၊ ခရိုင်ဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ဝန်ထမ်းများသည် ၂၀၂၂ ခုနှစ်၊အောက်တိုဘာလ(၁၈) ရက်နေ့၊ နံနက်(၉:၃၀)အချိန်တွင် ပခုက္ကူမြို့၊ အ.လ.က(၃)ကျောင်း၌ စားသုံးသူကာကွယ်ရေးအသိပညာပေးဟောပြောပွဲ ကျင်းပပြုလုပ်ခဲ့ပါသည်။

          ဒုတိယဦးစီးမှူး ဒေါ်မြင့်မြင့်သန်းမှ ဆွေးနွေးရာတွင် ဌာန၏သမိုင်းကြောင်းနှင့်  လုပ်ငန်းဆောင်ရွက်ချက်များ၊ ဌာန၏မျှော်မှန်းချက်၊ ရည်မှန်းချက်များ  စားသုံးသူကာကွယ်ရေးဥပဒေပါ အကြောင်းအရာများ၊ စားသုံးသူပြည်သူများအတွက် ကုန်စည်(သို့မဟုတ်) ဝန်ဆောင်မှုနှင့် စပ်လျဉ်း၍ ဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချမှုရှိစေရေးတို့ကို ဆောင်ရွက်နေရုံ သာမက စားသုံးသူနစ်နာဆုံးရှုံးမှုများအတွက် စားသုံးသူသတင်း ပြန်ကြားရေးနှင့် တိုင်ကြားမှု လက်ခံဆောင်ရွက်ရေး စင်တာ(CICC) ဖွင့်လှစ်ထားရှိမှုအား Power Point ဖြင့် အသေးစိတ် ရှင်းလင်းဆွေးနွေးခဲ့ပြီး စားသုံးသူထိခိုက်နစ်နာမှုနှင့် စပ်လျဉ်း၍ တိုင်ကြားခြင်းနှင့် ကုစားပေးခဲ့မှုများအကြောင်း၊ တိုင်ကြားနိုင်သည့်နေရာများနှင့် နည်းလမ်းများအကြောင်း၊ စားသုံးသူရေးရာကိစ္စများ စုံစမ်းမေးမြန်းရန်အတွက် Consumer Call Center (၁၅၃၅) အား ဖွင့်လှစ်ထားကြောင်း အကျယ်တဝင့်ဆွေးနွေးခဲ့ပါသည်။

          စားသုံးသူရေးရာဌာနခွဲတာဝန်ခံ ဒေါ်နွယ်နွယ်အေးမှ ဆွေးနွေးရာတွင် စားသုံးသူများတွင် အခွင့်အရေးများရှိ၍ သိရှိရန်လိုအပ်ကြောင်း၊ အခွင့်အရေးကို ရယူနိုင်မှသာလျှင် နစ်နာဆုံးရှုံးမှုများ မရှိဘဲ နောင်အနာဂတ်၌ ပတ်ဝန်းကျင်ကောင်းတွင် နေထိုင်နိုင်မည်ဖြစ်ကြောင်း၊ စားသုံးသူ၏ တာဝန်များလည်းရှိ၍ တိကျစွာလိုက်နာရန်လိုအပ်ကြောင်း၊ ကုန်စည်များဝယ်ယူ သုံးစွဲရာတွင် သတင်းအချက် အလက်များပြည့်စုံစွာရယူ၍  ဘေးအန္တရာယ်ကင်းရှင်းစွာအသုံးပြုနိုင်ပြီး စိတ်ကျေ နပ်မှုများရရှိစေလိုကြောင်း၊ အမှန်တကယ်နစ်နာဆုံးရှုံးမှုများဖြစ်ပေါ်ပါက မှန်ကန်ပြည့်စုံသော အထောက်အထားများနှင့်အတူ မိမိတို့ဌာနသို့ တိုင်ကြားစေခြင်းဖြင့် ကုစားခွင့်များရရှိမှာဖြစ်ကြောင်း ကျယ်ကျယ်ပြန့်ပြန့်ဆွေးနွေးခဲ့ပါသည်။

          ဒု-ဦးစီးမှူးဒေါ်ပပရွှေမှ ဆွေးနွေးရာတွင် စားသုံးသူများအနေဖြင့် ကုန်စည်များဝယ်ယူသုံးစွဲရာတွင် ရွေးချယ်ဝယ်ယူစားသောက်တတ်စေရန် ကုန်အညွှန်း အမှတ်အသားများနှင့် စပ်လျဉ်းသည့် သိရှိလိုက်နာရမည့်သတင်းအချက်အလက်များ၊  ထုတ်ကုန်လုံခြုံစိတ်ချရမှုရှိသောကုန်စည်များအား အသိတရား၊ သတိထား၍ ဝယ်ယူသုံးစွဲစေလိုကြောင်း၊ တချို့ကုန်စည်များတွင် ထုပ်ပိုးမှုသာလှပပြီး စားသုံးရန်မသင့်အစားအစာများကို သတိလက်လွတ် ဝယ်ယူသုံးစွဲမှုမပြုစေရန်နှင့် သေချာစွာစိစစ် ရွေးချယ်ပြီးမှသာ သုံးစွဲစေလိုကြောင်း အသေးစိတ်ရှင်းလင်း ဆွေးနွေးခဲ့ပြီး စားသုံးသူကာကွယ်ရေး အသိပညာပေးဟောပြောခဲ့ခြင်းနှင့် ပတ်သက်၍ မေးမြန်းခြင်းအပေါ် ဖြေဆိုနိုင်သော ကျောင်း သား/သူများအား ဆုချီးမြှင့်ခဲ့ပြီး စားသုံးသူကာကွယ်ရေးဥပဒေစာအုပ်နှင့် လက်ကမ်းစာစောင်များ ဖြန့်ဝေပေးခဲ့ပါသည်။

DOCA(မကွေး)

       ကချင်ပြည်နယ်၊စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှဦးဘောမ်ဇုန်း(ရုံးအုပ်)သည် ၁၈.၁၀.၂၀၂၂ ရက်နေ့တွင် ဝိုင်းမော်မြို့နယ်ရှိ အစေ့ထုတ်ပြောင်းစိုက်ပျိုးထုတ်လုပ်တင်ပို့‌ရောင်းချသူ လုပ်ငန်းရှင်များ နှင့် တွေ့ဆုံဆွေးနွေးခဲ့ပါသည်။

    ထိုသို့တွေ့ဆုံဆွေးနွေးရာတွင် ဦးဘောမ်ဇုန်း(ရုံးအုပ်)မှ ပြည်တွင်းကုန်သွယ်မှုဖွံ့ဖြိုးတိုးတက်စေရေးတို့အတွက် ပြည်တွင်း/ပြည်ပသို့ ကုန်သွယ်မှုအဆင့်ဆင့် လုပ်ကိုင်ဆောင်ရွက်မှုအခြေအနေများ အား ရုံးချုပ်၊ ပြည်တွင်းကုန်သွယ်မှုဖွံ့ဖြိုးရေးနှင့် သုတေသနဌာနခွဲသို့ တင်ပြလျက်ရှိကြောင်း ဆွေးနွေး ခဲ့ပြီး အစေ့ထုတ်ပြောင်းလုပ်ငန်းရှင်များမှ ယခုလက်ရှိဒေသတွင်း တောင်သူများရောင်းချနေသော အစေ့ထုတ်ပြောင်းတစ်ပိဿာ‌ဈေးနှုန်းမှာ၇၈၀ ကျပ်ရှိပြီး 30.75 ပိဿာ(50kg)ဝင် အစေ့ထုတ်ပြောင်း တစ်အိတ်လျှင်(၂၄၀၀) ကျပ်နှုန်း ပေါက်ဈေးရှိနေပါသည်။ တစ်အိတ်လျှင် ချိန်၊ ချုပ်၊ စီထပ်၊ တင်ခ/ချခ အလုပ်သမားခမှာ (၄၀၀)ကျပ် ကုန်ကျပြီး ဝိုင်းမော်မှမန္တလေးသို့ သယ်ယူပို့ဆောင်သည့် ကားခမှာ တစ်အိတ်လျှင် (၂၅၀၀)ကျပ်ရှိသဖြင့် တစ်အိတ်လျှင် စုစုပေါင်းကုန်ကျစရိတ် (၂၆၉၀၀)ကျပ်ရှိပါသည်။ ယခုလက်ရှိ မန္တလေးဈေးကွက်တွင် အစေ့ထုတ်ပြောင်းတစ်ပိဿာလျှင် (၉၈၀) ကျပ်ရှိ၍ တစ်အိတ် ဈေးနှုန်းမှာ (၃၀၁၃၅)ကျပ် ရရှိပြီး အကျိုးအမြတ်အနေဖြင့် တစ်အိတ်လျှင် (၃၂၃၅)ကျပ်နှင့် တစ်ပိဿာ လျှင် (၁၀၅)ကျပ်ခန့် ရရှိမှုအား ပြန်လည်ဆွေးနွေးခဲ့ကြောင်း သတင်းရရှိပါသည်။

DOCA(ကချင်)

     ဧရာ၀တီတိုင်းဒေသကြီး စားသုံးသူရေးရာဦးစီးဌာနမှ ဒုတိုင်းဦးစီးမှူး ဦးထွန်းထွန်းနှင့် အဖွဲ့သည် အစားအသောက်နှင့် ဆေးဝါးကွပ်ကဲရေးဦးစီးဌာန (FDA) မြို့နယ်စည်ပင်သာယာရေး အဖွဲ့များနှင့် ပူးပေါင်း၍ အောက်တိုဘာလ (၁၈)ရက်နေ့ နံနက်ပိုင်းတွင် ပဲပြား၊ ပဲသွေးနှင့် မုန့်ဟင်းခါးဖတ်များ ရောင်းချလျှက်ရှိသော ပုသိမ်မြို့ပေါ် မြို့မစျေးအတွင်းရှိ ဆိုင် (၇)ဆိုင်နှင့် အောင်ဧရာစျေးအတွင်းရှိ ဆိုင်(၃)ဆိုင်သို့ သွားရောက်ပြီး ပြည်သူများ ၀ယ်ယူစားသုံးလျှက်ရှိ သော ကုန်စည်များတွင် တာရှည်ခံ ဓာတုဆေးဝါးများ ဖော်မလင်သုံးစွဲထားခြင်းရှိမရှိ ကွင်းဆင်း၍ စျေးကွက်နမူနာ ကောက်ယူခဲ့ပါသည်။

      စျေးကွက်အတွင်းမှ ကောက်ယူလာသော နမူနာများကို စားသုံးသူရေးရာဦးစီးဌာန တိုင်းဦးစီးမှူးရုံးတွင် ပူးပေါင်းအဖွဲ့မှ Tesk Kit ဖြင့် စစ်ဆေးခဲ့ရာ Red Liquid မတွေ့ရကြောင်း လု်ပငန်းရှင်များမှ စီးပွားရေး ကျင့်၀တ်များလိုက်နာမှု ရှိစေရန်နှင့် စားသုံးသူယဉ်ကျေးမှု အလေ့ အထများ ထွန်းကားလာစေရန်သာမက စားသုံးသူပြည်သူများ ကျန်းမာရေးနှင့် ညီညွတ်ပြီး ဘေးအန္တရာယ်ကင်းရှင်းသော ကုန်စည်များ ၀ယ်ယူစားသုံးနိုင်ရန် ရည်ရွယ်၍ ယခုလို စျေးကွက်အတွင်း ရောင်းချနေသော ကုန်စည်များအား စျေးကွက်စောင့်ကြည့်စစ်ဆေးခြင်းဖြစ် ကြောင်း ဒုတိုင်းဦးစီးမှူး ဦးထွန်းထွန်းက ဆိုင်ပိုင်ရှင်များအား စားသုံးသူ အသိပညာပေး ပြောကြားခဲ့ပါသည်။

DOCA(ဧရာဝတီ)