သတင်းနှင့် လှုပ်ရှားမှုများ

          ၂၀၂၆ ခုနှစ်၊ စက်တင်ဘာလ ၂၁  ရက်နေ့၊ နံနက် ၀၉း၃၀ နာရီအချိန်တွင် စားသုံးသူရေးရာ ဦးစီးဌာန၊ မြိတ်ခရိုင်ဦးစီးမှူးရုံးမှ ဒုခရိုင်ဦးစီးမှူးနှင့်ဝန်ထမ်းများသည် မြိတ်မြို့၊ မြစ်ငယ်ရပ်၊ အမှတ်(၃) အခြေခံပညာအထက်တန်း‌ကျောင်း၌ ဌာန၏ဆောင်ပုဒ်ဖြစ်သော “စားသုံးသူအခွင့်အရေး ဦးစားပေး” ဆောင်ပုဒ်နှင့်အညီ စားသုံးသူကာကွယ်ရေးဥပဒေအကြောင်းသိကောင်းစရာများ အသိ ပညာပေး ဟောပြောဆွေးနွေးခဲ့ကြောင်း သိရှိရပါသည်။

          အဆိုပါအသိပညာပေးဟောပြောပွဲတွင် မြိတ်ခရိုင်ဦးစီးမှူးရုံးမှ၊ ဒုခရိုင်ဦးစီးမှူးမှ စားသုံးသူ‌ ရေးရာဦးစီးဌာန၏ ဆောင်ပုဒ်၊ မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေးဥပဒေပါ စားသုံးသူအခွင့်အရေး(၈)ချက်ဖြစ်သော အခြေခံလိုအပ်ချက်များအပေါ်စိတ်ကျေနပ်မှုရရှိခွင့်၊ ဘေး အန္တရာယ်ကင်းရှင်းစွာအသုံးပြုခွင့်၊ လိုအပ်သောသတင်းအချက်အလက်များ ပြည့်စုံမှန်ကန်စွာသိရှိခွင့် နှင့်ပြေစာ သို့မဟုတ် အထောက်အထားရယူခွင့်၊ စားသုံးသူ စိတ်ကြိုက်ရွေးချယ်ဝယ်ယူနိုင်ခွင့်၊ ရှင်း လင်း တင်ပြခွင့်နှင့် တိုင်ကြားခွင့်၊ နစ်နာဆုံးရှုံးမှု များနှင့်စပ်လျဉ်း၍ ကုစားခွင့်၊ အသိပညာဗဟုသုတ များ၊ အခွင့်အရေးများနှင့် လိုအပ်သော အချက်အလက်များကို သိရှိလေ့လာနိုင်ခွင့်၊ ပစ္စုပ္ပန်တွင်သာ မက အနာဂတ်မျိုးဆက်များအတွက်ပါ ကောင်းမွန်သာယာသော လူနေမှုအဆင့်အတန်းနှင့် ပတ်ဝန်း ကျင်တွင် နေထိုင်နိုင်ခွင့် စသည့်စားသုံးသူအခွင့်အရေးများ၊ စားသုံးသူ၏တာဝန်များ၊ ကုန်စည်များ၏ ကုန်အညွှန်းအမှတ် အသားဖော်ပြခြင်းဆိုင်ရာများအကြောင်း၊ အွန်လိုင်းရောင်းချမှုများနှင့် ပတ်သက် ၍ သိကောင်းစရာများအကြောင်းနှင့် စားသုံးသူအခွင့်အရေးများ နစ်နာဆုံးရှုံးမှုများရှိလာပါက တိုင် ကြားနိုင်သည့်နည်းလမ်းများ၊ အွန်လိုင်းမှရောင်းချသည့်ကုန်စည်/ဝန်ဆောင်မှုများအား ရယူသုံးစွဲရာ တွင် သိရှိလိုက်နာသင့်သည့်အချက်များ၊ အွန်လိုင်းမှတ်ပုံတင်စနစ်များနှင့်ပတ်သက်၍ သိရှိသင့်သည် များ စသည့်သိကောင်းစရာများအကြောင်း အသိပညာပေးဟောပြောဆွေးနွေးခဲ့ကာ အင်အား ၄၀၀ ခန့်တက်ရောက်ခဲ့ကြောင်း သိရှိရပါသည်။

DOCA(တနင်္သာရီ)

   ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ရေတာရှည်မြို့နယ်တာဝန်ခံ၊ ဒေါ်ပပလင်း သည် တောင်ငူခရိုင်၊ ရေတာရှည်မြို့နယ် အမှတ်(၂)ရပ်ကွက်တွင် ရွှေတောင်ငူ ထမင်းခြောက်ကြော် လုပ်ငန်း လုပ်ကိုင်သူလုပ်ငန်းရှင် ဒေါ်မိုးသူဇာဝင်း နှင့် စက်တင်ဘာလ ၇ ရက်နေ့တွင် တွေ့ဆုံခဲ့ ပါသည်။

          ပိုင်ရှင်အနေဖြင့် အဆိုပါထမင်းခြောက်ကြော်လုပ်ငန်းကိုလုပ်ကိုင်ခဲ့သည်မှာ ၂နှစ်ခန့်ရှိခဲ့ပြီ ဖြစ်ပါသည်။ ထမင်းခြောက်ထဲတွင်ပါဝင်ပစ္စည်းများအနေဖြင့် ရွှေဘိုပေါ်ဆန်းဆန်၊ ဆား၊ ဆီ၊ မြေပဲဆံ၊ ကြက်သွန်ဖြူ၊ ငရုတ်သီးခြောက်  တို့ပါဝင်ပါသည်။ ရွှေဘိုပေါ်ဆန်းဆန်ကိုသုံးလျှင် အဆ ရှည်၍ ကြော်ပုံလှပသောကြောင့် အသုံးပြုခြင်းဖြစ်ပါသည်။ ကုန်ကြမ်းစတင်ရန်အတွက် ဆန်ကို ရိုးရိုးထမင်းချက်သည့်အတိုင်း ပုံမှန်ချက်ပြုတ်ရပါသည်။ ထမင်းများကျက်သွားလျှင် သန့်စင်ထားသော ဖျာကြမ်းများပေါ်တွင် ဖြန့်၍ နေ(၃) ရက်နီးပါးလှန်းရပါသည်။ဆန်များကိုအခြောက်ခံသည့် အခါနွေရာသီတွင်သာ အများဆုံးလှန်းကြပါသည်။ ထမင်းခြောက်ကုန်ကြမ်းများအား နွေရာသီတွင် သာလှန်း၍ သိုလှောင်ထားကြပါသည်။

       ထမင်းခြောက်များလှန်းပြီးခြောက်သွားလျှင်ဆာလာအိတ်ကြီးများဖြင့်ထည့်၍သိုလှောင်ထားပြီးအော်ဒါရှိလျှင် ရှိသလိုလိုသလောက်ကြော်ပြီး အော်ဒါပို့ရပါသည်။ ဈေးကွက်အတွင်း ဖြန့်ဖြူးရန် အတွက်လည်းကြော်ရပါသည်။ ထမင်းခြောက်ကြော်အထုပ်လေးတစ်ထုတ်တွင် ထမင်းခြောက် ကြော်၊ မြေပဲဆံ ၊ကြက်သွန်ဖြူတို့ဖြင့်စားချင်စဖွယ် ပြင်ဆင်ထုပ်ပိုးထားခြင်း ဖြစ်ပါသည်။ ထမင်း ခြောက် တစ်ခါကြော်လျှင် ဆန်(၇)ပြည်သုံးရပြီး ဆီ(၇)ပိဿာခန့်ကုန်ကျပါသည်။ ထမင်းခြောက် ကြော် (၂၅) ကျပ်သား တစ်ထုပ် လျှင်(၂၅၀၀)၊(၅)ကျပ်သား တစ်ထုပ်လျှင်(၁၀၀၀) ဖြင့် လက်ကား ဖြန့်ဖြူးရောင်းချပေးပါသည်။ ထမင်း ခြောက်ကြော်လုပ်ငန်းအား အလုပ်သမား (၄)ဦးသာခန့်ထားပြီး တစ်ပိုင်တစ်နိုင် မိသားစု လုပ်ကိုင်ခြင်းဖြစ်သည်ဟု ထမင်းခြောက်ကြော်လုပ်ငန်းလုပ်ကိုင်သူ လုပ်ငန်းရှင်နှင့်တွေ့ဆုံပြီးသိရှိခဲ့ရပါသည်။

DOCA(ပဲခူး)

        မြန်မာနိုင်ငံသည် ဆေးနှင့်ဆေးပစ္စည်းများအား ပြည်တွင်း၌ထုတ်လုပ်ဖြန့်ဖြူးသကဲ့သို့ ပြည်ပ မှတင်သွင်းရောင်းချခြင်းများလည်း ဆောင်ရွက်လျှက်ရှိပါသည်။ ဈေးကွက်အတွင်း ဈေးနှုန်း မြှင့်တင် ရောင်းချမှုမရှိစေရေးအတွက် သက်ဆိုင်ရာဌာနပူးပေါင်းအဖွဲ့ဖြင့် ကွင်းဆင်းကြပ်မတ် စစ်ဆေးလျှက် ရှိပါသည်။

          ၈.၉.၂၀၂၆ ရက်နေ့တွင် တောင်ခရိုင်ဦးစီးမှူး ဦးမျိုးအောင်ဦးဆောင်၍ ဒု-ခရိုင်ဦးစီးမှူး ဦးမင်းဇော်၊ တောင်ငူမြို့နယ်တာဝန်ခံဦးမြင့်သူနှင့်အဖွဲ့တို့သည်အစားအသောက်နှင့်ဆေးဝါးကြီးကြပ်ရေးဦးစီးဌာန၊မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍တောင်ငူမြို့ပေါ်ရှိ ထိပ်တန်း၊ မေတ္တာရှင်၊ တက်နေဆန်း၊ အေးမြချမ်းသာ၊ မုဒိတာ၊ မြသီရိ၊ မေတ္တာမွန်၊ ဖိုးမင်း၊ နေလ ဟိန်း၊ ကိုမျိုးဆေးဆိုင်များတွင် Hepalucky ၊ Air X၊ Cetrine၊ Nifedipine ၊Ferrovit ဆေးဝါးများ အနေဖြင့် ပစ္စည်းပြတ်လပ်မှုရှိ/မရှိ၊ ဈေးနှုန်းမြှင့်တင် ရောင်းချမှုရှိ/မရှိကွင်းဆင်းစစ်ဆေးခဲ့ပြီး Hepalucky နှလုံးဆေးအနေဖြင့် ကုမ္ပဏီများ မှဖြန့်ဖြူးခြင်းမရှိသည့်အတွက် ဈေးကွက်အတွင်း ပစ္စည်းပြတ်လပ်နေပြီး၊ Air X၊ Cetrine၊ Ferrovit ဆေးဝါးများမှာ ပုံမှန်ဈေးနှုန်းများဖြင့် ရောင်းချလျှက် ရှိသည်ကို စိစစ်တွေ့ရှိရကြောင်း၊ Nifedipine သွေးကျဆေးမှာ ထုတ်လုပ်သည့်ကုမ္ပဏီအလိုက် ဈေးနှုန်းအနည်းငယ် ကွာခြားမှုရှိသည်ကို စိစစ်တွေ့ရှိရကြောင်း သိရှိရပါသည်။

DOCA(ပဲခူး)   

              စီးပွားရေးနှင့် ကူးသန်းရောင်းဝယ်ရေးဝန်ကြီးဌာနသည် ပို့ကုန်/သွင်းကုန်လုပ်ငန်းရှင်မှတ်ပုံ တင်လျှောက်ထားလာမှုများအပေါ် မြေပြင်ကွင်းဆင်းစစ်ဆေး၍ ပို့ကုန်/သွင်းကုန်လုပ်ငန်းရှင် မှတ်ပုံတင်များ ထုတ်ပေးလျှက်ရှိပါသည်။

                (၄.၉.၂၀၂၆) ရက်နေ့နံနက်ပိုင်းတွင် ဒု-ခရိုင်ဦးစီးမှူး ဦးမင်းဇော်၊ တောင်ငူမြို့နယ်တာဝန်ခံ ဦးမြင့် သူနှင့် ဦးနေစိုးထက်၊ ဒုဦးစီးမှူးတို့သည် တောင်ငူခရိုင်၊ အုတ်တွင်းမြို့နယ်အတွင်းရှိ ပို့ကုန်/ သွင်းကုန် လုပ်ငန်းရှင်မှတ်ပုံတင် လျှောက်ထားသော Won Tar Co.,Ltd သို့သွားရောက်၍ ကုမ္ပဏီ အမည်မှန်ကန်မှု ရှိကြောင်းတွေ့ရှိရပြီး ကုမ္ပဏီရုံးခန်းလိပ်စာမှန်ကန်မှုရှိကြောင်း တွေ့ရှိရပါသည်။ ဒါရိုက်တာအဖွဲ့ဝင်များ၏ မှတ်ပုံတင်နှင့်လိပ်စာများစစ်ဆေးရာတွင် မှန်ကန်မှုရှိ သည်ကိုစစ်ဆေး တွေ့ရှိရပါသည်။  ကုမ္ပဏီ ရုံးခန်း လိပ်စာတွင် အမှန်တကယ်ဖွင့်လှစ်ထားသည်ကို တွေ့ရှိရပြီး ဒါရိုက်တာအဖွဲ့ဝင်များသည် နေရပ်လိပ်စာများတွင် အမှန်တကယ်နေထိုင်မှုရှိကြောင်း စစ်ဆေးတွေ့ရှိ ရပါသည်။ ဒါရိုက်တာ အဖွဲ့ဝင်များ၏ နေထိုင်သည့် အဆောက်အဦအမျိုးအစားမှာ RC နှစ်ထပ်တိုက် ဖြစ်ပြီး ဒါရိုက်တာအဖွဲ့ဝင် များ၏ပိုင်ဆိုင်မှုအခြေအနေမှာ ချမ်းသာကြောင်းတွေ့ ရှိရပါသည်။ ဒါရိုက်တာအဖွဲ့ဝင်များအနေဖြင့် ယခင်က ကုမ္ပဏီတည်ထောင်ခဲ့ခြင်း မရှိကြောင်းတွေ့ရှိရပါသည်။ ကုမ္ပဏီမှလျှောက် ထားမှုလုပ်ငန်းနှင့် လက်ရှိမြေပြင်တွင် ဆောင်ရွက်နေ သည့်လုပ်ငန်းမှာ စက်မှုလက်မှုလုပ်ငန်းဖြစ်ပြီး ရင်းနှီးမြုပ်နှံမှုပမာဏ ကျပ်သိန်း(၉၀၀)ဖြင့် လုပ်ငန်းလည် ပတ်လျှက်ရှိကြောင်း သိရှိရပါသည်။

DOCA(ပဲခူး)   

              စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနသည် စားသုံးသူများ အနေဖြင့် ကုန်စည်နှင့်ဝန်ဆောင်မှုများအား Online စနစ်ဖြင့် ဝယ်ယူသုံးစွဲရာတွင် စားသုံးသူထိခိုက် နစ်နာမှုမရှိစေရေးအတွက် Online စနစ်အသုံးပြု၍ ရောင်းဝယ်မှုလုပ်ငန်းများအား စနစ်တကျ ထိန်း ကျောင်းနိုင်မည့် e-Commerce Registration System (e-ConReg System) အားရေးဆွဲ၍ ၂၀၂၃ ခုနှစ်၊ အောက်တိုဘာလ ၂ ရက်နေ့မှစ၍ အွန်လိုင်းစနစ်ဖြင့်ရောင်းချခြင်း (Online Sales) မှတ်ပုံတင် လက်မှတ် ခွင့်ပြုထုတ်ပေးခြင်းလုပ်ငန်းများဆောင်ရွက်ရှိပြီး လျှောက်ထားလာသည့် Online Sales မှတ်ပုံတင် လက်မှတ်များအား စစ်ဆေးပြီးသည့်အခါ စားသုံးသူရေးရာဦးစီးဌာန၊ သက်ဆိုင်ရာဦးစီးမှူး ရုံးများရှိ စစ်ဆေးရေးအရာရှိများမှ မြေပြင်ကွင်းဆင်းစစ်ဆေးလျှက်ရှိပါသည်။

          (၁.၉.၂၀၂၆) ရက်နေ့တွင် တောင်ငူခရိုင်ဦးစီးမှူးရုံးရှိ စားသုံး/ထုတ်လုံဌာနခွဲတာဝန်ခံ ဒု-ခရိုင် ဦးစီးမှူး ဦးမင်းဇော်၊ တောင်ငူမြို့နယ်တာဝန်ခံ ဦးမြင့်သူနှင့်အဖွဲ့တို့သည် တောင်ငူမြို့ပေါ်ရှိ Online Shop Registration မှတ်ပုံတင်လျှောက်ထားသည့် Wisdom Supermarket Taungoo သို့သွားရောက်၍ မှတ်ပုံတင်မည့်လုပ်ငန်းအမည် မှန်ကန်မှုရှိ/မရှိ၊ လုပ်ငန်းတည်ရှိရာ လိပ်စာမှန် ကန်မှု ရှိ/မရှိ၊ လုပ်ငန်းသို့ ဆက်သွယ်ရန် ဖုန်းနံပါတ်မှန်ကန်မှုရှိ/မရှိ၊ လုပ်ငန်း၏ Logo မှန်ကန်မှုရှိ /မရှိ၊ ကုမ္ပဏီ မှတ်ပုံတင်ရှိ/မရှိ၊ SME မှတ်ပုံတင်ရှိ/မရှိ၊ လုပ်ငန်းရှင်၏ အမည်၊ လိပ်စာ၊ မှတ်ပုံတင်နှင့် နိုင်ငံသား/ နိုင်ငံခြားသား မှန်ကန်မှုရှိ/ မရှိတို့အပြင် အကျင့်စာရိတ္တကောင်းမွန်ကြောင်းနှင့် အမည် ပျက်စာရင်းတွင် ပါဝင်ခြင်း မရှိကြောင်း ထောက် ခံချက်ရှိ/မရှိ၊ ရောင်းချသည့်ကုန်စည်/ ဝန်ဆောင်မှု အုပ်စု ကိုက်ညီမှုရှိ/မရှိ၊ ဥပဒေတစ်ရပ်ရပ် အရ တားမြစ်/ကန့်သတ်ထားသော ကုန်စည်ဟုတ်/မဟုတ်၊ ဥပဒေတစ်ရပ်ရပ်နှင့် ငြိစွန်းခြင်းရှိ/မရှိ၊ ရောင်းချ နေသောကုန်စည်သည် ကိုယ်ပိုင်ထုတ်ကုန်ဟုတ်/ မဟုတ်၊ ကုန်စည်အလိုက် သက်ဆိုင်ရာဌာနများ၏ ထောက်ခံချက်/ ညွှန်ကြားချက်များနှင့် ကိုက်ညီမှု ရှိ/ မရှိ၊ ရောင်းချနေသော ကုန်စည်တွင် ပြင်တွင်း၌ ထုတ်လုပ်/တင်သွင်းဖြန့်ဖြူးသည့် ကုမ္ပဏီလိပ်စာ ပါဝင်ခြင်း ရှိ/မရှိ စစ်ဆေးခဲ့ရာ Wisdom Supermarket Taungoo အနေဖြင့် ကလေးအသုံး အဆောင်ပစ္စည်းများ၊ စာအုပ်စာတမ်းများနှင့်စာရေးကိရိယာများ၊ ဖန်စီ ပစ္စည်းများ၊ အလှကုန်များနှင့် စားသောက်ကုန်များ၊ အိမ်သုံးပစ္စည်းများ၊ ကျန်းမာရေး အထောက်အကူ ပစ္စည်းများ ရောင်းချနေ သည်ကိုတွေ့ရှိရသဖြင့် မြေပြင်ကွင်းဆင်းစစ်ဆေးချက်များနှင့် လျှောက်ထားစဉ်က အချက်အလက်များ ကိုက်ညီမှုရှိကြောင်း သိရှိရပါသည်။

DOCA(ပဲခူး)