သတင်းနှင့် လှုပ်ရှားမှုများ

    ၈.၈.၂၀၂၅ ရက်နေ့ နံနက်ပိုင်းတွင် စားသုံးသူရေးရာဦးစီးဌာန၊ မွန်ပြည်နယ်၊ ‌မော်လမြိုင် ခရိုင်၊ ခရိုင်ဦးစီးမှူး ‌ဒေါ်ဝါဝါမြိုင်၊ သတင်းအချက်အလက်နည်းပညာနှင့်အရည်အသွေးစီမံခန့်ခွဲ ရေးဌာနခွဲတာဝန်ခံ ‌ဒေါ်မိုးမိုးနှင့် ချောင်းဆုံမြို့နယ်တာဝန်ခံ ဒေါ်ထက်ထက်နွေဦးတို့သည် ဆန်စက်များနှင့် ဆန်၊ စပါးသိုလှောင်ရုံများအား MyRo တွင် မှတ်ပုံတင်သက်တမ်းတိုးရန် ကွင်းဆင်းဆောင်ရွက်ခဲ့ကြောင်း သိရသည်။

          ထို့သို့ ကွင်းဆင်းဆောင်ရွက်ရာတွင် ချောင်းဆုံမြို့နယ်၊ ရွာလွတ်ကျေးရွာရှိ “ဒိုင်းမွန်း စတား” ဆန်စက်အားကွင်းဆင်းခဲ့ရာ MyRo တွင် မှတ်ပုံတင်သက်တမ်းတိုး ဆောင်ရွက်ရန်၊ ဆန်၊ စပါး ဝင်/ထွက် လက်ကျန် စာရင်းအား လစဥ်ပုံမှန်ဖြည့်သွင်းရန်၊ ဆန်စပါး သိုလှောင်ထားရှိမှု အခြေအနေ၊ ဆန်ကြိတ်ခွဲနိုင်စွမ်းအား၊ စျေးကွက်/စျေးနှုန်း အခြေအနေ၊ ဆန်စပါးရောင်းဝယ် ဖောက်ကားမှုအခြေအနေများအား ကွင်းဆင်းစစ်ဆေး ဆောင်ရွက်ခဲ့ ကြောင်း သိရှိရပါသည်။

DOCA (မွန်)

    စားသုံးသူရေးရာဦးစီးဌာန၊ မွန်ပြည်နယ်၊ ပြည်နယ်ဦးစီးမှူးရုံးမှ၊ ထုတ်ကုန်လုံခြုံ စိတ်ချရမှုဌာနခွဲတာဝန်ခံ ဦးစီးမှူး ဒေါ်စောကြည်သည် ၈.၈.၂၀၂၅ ရက်နေ့တွင် Sevan Bakery မုန့်တိုက်လုပ်ငန်းရှင်နှင့်တွေ့ဆုံ၍ ကုန်အညွှန်းအမှတ်အသားဆိုင်ရာများနှင့် ပတ်သက်၍ ဆွေးနွေးခဲ့ပါသည်။

          အဆိုပါ ကုန်အညွှန်းအမှတ်အသားပြုလုပ်ရာတွင် လိုအပ်သည်များကို ထုတ်ကုန်လုံခြုံ စိတ်ချရမှုဌာနခွဲတာဝန်ခံက လုပ်ငန်းရှင်အား ၎င်းတို့၏ ထုတ်ကုန်ပစ္စည်းများပေါ်တွင် စားသုံးသူကာကွယ်ရေးဥပဒေ ၂၀၁၉ အခန်း (၁၈)တွင် ဖော်ပြထားသောပြဌာန်းချက်အတိုင်း ကုန်အညွှန်းအမှတ်အသားကို ပြည့်စုံစွာဖော်ပြရန်၊ ကုန်စည်အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်းတို့ကို မြန်မာဘာသာဖြင့် ဖြစ်စေ၊ မြန်မာဘာသာ (သို့မဟုတ်) အခြားဘာသာတစ်ခုဖြင့်ဖြစ်စေ ဖော်ပြရန် အသိပညာပေး ဆွေးနွေးခဲ့ပြီး ကုန်အညွှန်းအမှတ်အသား ဖော်ပြချက်၊ မူပိုင်ခွင့်လျှောက်ထားခြင်းနှင့် ပတ်သက်၍ အသိပညာပေး ဆွေးနွေးခဲ့ကြောင်း သိရှိရပါသည်။

DOCA (မွန်)

  မကွေးတိုင်းဒေသကြီး၊ ချောက်ခရိုင်၊ ‌ရေနံချောင်းမြို့နယ်တာဝန်ခံသည် (၅.၈.၂၀၂၅)  ရက်နေ့၊ နေ့လယ်(၁၃း၃၀)အချိန်တွင် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ ကျောင်းသား၊ ကျောင်းသူများ စာပေလေ့လာဖတ်ရှုရေးအတွက်  ရည်ရွယ်၍ ရေနံချောင်း မြို့၊ အမှတ်(၁)အခြေခံပညာအထက်တန်းကျောင်း၌ အသိပညာပေးဟောပြောပွဲ ကျင်းပပြုလုပ်ခဲ့ ကြောင်း သိရသည်။  

    ပထမဦးစွာ ကျောင်းအုပ်ဆရာမကြီး ဒေါ်မြတ်မြတ်ညွန့်မှ အမှာစကားပြောကြားပြီး မြို့နယ် စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်ချိုဝေလွင်မှ အစားအစာများ စားသုံးရာ၌ ရွေးချယ် ဝယ်ယူစားသုံးရမည့် အချက်များအကြောင်းအားလည်းကောင်း၊ မြို့နယ်ပြန်ကြားရေးနှင့် ပြည်သူ့ ဆက်ဆံရေးဦးစီးဌာန၊ ဦးစီးအရာရှိဒေါ်ချိုမီအောင်က စာဖတ်ခြင်းကြောင့် ရရှိမည့်အကျိုးကျေးဇူး များအကြောင်းအားလည်းကောင်း အသီးသီးဟောပြောခဲ့ကြပြီး အသိပညာပေးလက်ကမ်းစာစောင် များ ဖြန့်ဝေပေးခဲ့ကြောင်း၊ အဆိုပါဟောပြောပွဲသို့ ဆရာ၊ ဆရာမ(၁၃)ဦးနှင့် ကျောင်းသား၊ ကျောင်းသူ(၂၁၇)ဦး တက်ရောက်ခဲ့ကြောင်း သိရှိရပါသည်။

DOCA(မကွေး)

   မွန်ပြည်နယ်၊ မုဒုံမြို့နယ်တွင် ၂၀၂၅ - ၂၀၂၆ ဘဏ္ဍာနှစ် မိုးစပါးစိုက်ပျိုးရာသီ မိုးစပါး စီမံကိန်း ဆောင်ရွက်လျက်ရှိသည့် ထုံးမံကျေးရွာ၌ စိုက်ပျိုးမှု အခြေအနေကို ၈.၈.၂၀၂၅ ရက်နေ့ နံနက်ပိုင်းက မုဒုံမြို့နယ်တာဝန်ခံ ဦးညီလွင်အေးသည် တာဝန်ရှိသူများနှင့်အတူ  ကွင်းဆင်း စစ်ဆေး‌ဆောင်ရွက်ခဲ့ကြောင်း သိရသည်။

   ထိုသို့ ကွင်းဆင်းစစ်ဆေးရာတွင် မုဒုံမြို့နယ် သမဝါယမဦးစီးဌာနမှ မြို့နယ်ဦးစီးအရာရှိ ဦးဆန်းမင်းထွန်းနှင့် ဝန်ထမ်းများ၊ တာဝန်ရှိသူများက ထုံမံ စိုက်/ထွေ သမဝါယမ အသင်းနှင့် ထုံမံ လယ်/ထွေ အသင်းသား တောင်သူများ စိုက်ပျိုးထားသည့် မိုးစပါးများ ပန်းတိုင်အထွက်နှုန်း ရရှိစေရေးအတွက် ကြိုးပမ်းဆောင်ရွက်ကြရန်၊ မြေသြဇာများ အချိန်ကိုက်/အချိုးကျ ထည့်သွင်း နိုင်ရေး၊ ပိုးမွှားရောဂါကျရောက်မှု မရှိစေရေး ဂရုပြုဆောင်ရွက်ကြရန် ရှင်းလင်းပြောကြားခဲ့ သည်။ ထို့နောက် အသင်းသား တောင်သူများက မိုးစပါးစိုက်ပျိုးမှု အောင်မြင်ဖြစ်ထွန်းစေရေး အတွက် လိုအပ်ချက်များကိုတင်ပြရာ တာဝန်ရှိသူများက ပေါင်းစပ်ညှိနှိုင်း ဆောင်ရွက်ပေးခဲ့ ကြောင်း သိရှိရပါသည်။

DOCA (မွန်)

    မွန်ပြည်နယ်၊ မော်လမြိုင်မြို့ရှိ ဆံတော်ရှင်ကျိုက်သလ္လံ စေတီတော်မြတ်ကြီးတွင် ဝါခေါင်လပြည့် မေတ္တာအခါတော်နေ့ အနုဂါမိက(ရွှေအိုး) မြှုပ်နှံလှူဒါန်းခြင်း မင်္ဂလာ အခမ်းအနားကို ၈.၈.၂၀၂၅ ရက်နေ့ နံနက်ပိုင်းက ဆံတော်ရှင် ကျိုက်သလ္လံစေတီတော်မြတ်ကြီး သီရိမင်္ဂလာပဋ္ဌာန်းဓမ္မာရုံ၌ ကျင်းပပြုလုပ်ခဲ့ရာ အဆိုပါအခမ်းအနားသို့ အရှေ့တောင်တိုင်း စစ်ဌာနချုပ် တိုင်းမှူးနှင့် တာဝန်ရှိသူများ၊ ပြည်နယ်ဝန်ကြီးချုပ်နှင့် အစိုးရအဖွဲ့ဝင်ဝန်ကြီးများ၊ ဌာနဆိုင်ရာတာဝန်ရှိပုဂ္ဂိုလ်များ၊ဖိတ်ကြားထားသည့်ဧည့်သည်တော်များ တက်ရောက်ခဲ့ကြသည်။

   ဝါခေါင်လပြည့် မေတ္တာအခါတော်နေ့ အနုဂါမိက (ရွှေအိုး) မြှုပ်နှံလှူဒါန်းခြင်း မင်္ဂလာအခမ်းအနား၌ ပြည်နယ်ဝန်ကြီးချုပ်နှင့် ဇနီး၊ တိုင်းမှူးနှင့် ဇနီး၊ ပြည်နယ်ဝန်ကြီးများ၊ ပြည်နယ်အဆင့်ဌာနဆိုင်ရာများ၊ အရှေ့တောင်တိုင်းစစ်ဌာနချုပ်မှ တပ်ရင်းတပ်ဖွဲ့များမှ အရာရှိစစ်သည်များနှင့် အလှူရှင်များက အနုဂါမိက(ရွှေအိုး) မြှုပ်နှံလှူဒါန်းခဲ့ကြသည်။

   အဆိုပါ အနုဂါမိက(ရွှေအိုး)မြှုပ်နှံလှူဒါန်းခြင်းကို မော်လမြိုင်မြို့၊ ပေါင်မြို့နယ်နှင့် ချောင်းဆုံမြို့နယ်များရှိ ဘုန်းတော်ကြီးကျောင်းနှင့် သီလရှင်ကျောင်း (၂၅၅) ကျောင်းအတွက် လှူဒါန်းငွေ ကျပ်သိန်း (၇၈၀) ကျပ်ကို စာရေးတံမဲနှိုက်၍ အလှူရှင်များက စုပေါင်းလှူဒါန်းခြင်း ဖြစ်ကြောင်း၊ ရှေးအစဉ်အလာ မွန်ဘိုးဘွားများ နှစ်စဉ်ကျင်းပလှူဒါန်းခဲ့သော အနုဂါမိက (ရွှေအိုး)မြှုပ်နှံ လှူဒါန်းခြင်းကို သမိုင်းဝင်ဆံတော်ရှင် ကျိုက်သလ္လံစေတီတော်မြတ်ကြီးတွင် ကျင်းပခဲ့သည်မှာ (၁၃၄) ကြိမ်မြောက်ရှိပြီးဖြစ်ကြောင်း သိရှိရသည်။

DOCA (မွန်)