သတင်းနှင့် လှုပ်ရှားမှုများ

       စားသုံးသူရေးရာဦးစီးဌာန ပြည်နယ်ဦးစီးမှူးရုံးမှ စားသုံးသူရေးရာဌာနခွဲ တာဝန်ခံဦးဆောင်သော ဝန်ထမ်းနှင့်အဖွဲ့သည် ပြည်နယ် အစားအသောက်နှင့်ဆေးဝါးကွပ်ကဲရေးဦးစီးဌာနရှိ ဝန်ထမ်းများနှင့်ပူးပေါင်း၍ စားသုံးသူကာကွယ်ရေး အသိပညာပေးဟောပြောပွဲကို မော်လမြိုင်မြို့နယ်၊ အခြေခံပညာအထက်တန်းကျောင်း အ - ထ - က(၉)၌ (၁၆-၁-၂၀၂၃)ရက်နေ့ နေ့လယ် ၁၃:၃၀ အချိန်တွင် ကျင်းပပြုလုပ်ခဲ့ပါသည်။ ရှေးဦးစွာ စားသုံးသူရေးရာဦးစီးဌာနမှ ဒေါ်ဝါဝါမြိုင် ဦးစီးအရာရှိက စားသုံးသူကာကွယ်ရေးဆိုင်ရာ ဥပဒေ၊ နည်းဥပဒေများကို ရှင်းလင်းဆွေးနွေးခြင်း၊ တိုင်ကြားနိုင်သည့်နည်းလမ်းများကို ဟောပြောဆွေးနွေးပြီး ဦးနိုင်လင်းထက် အကြီးတန်းစာရေးမှ စားသုံးသူများရရှိနိုင်သည့် အခွင့်အရေး(၈)ချက်နှင့် စားသုံးသူများလိုက်နာရမည့် တာဝန်(၄)ချက်၊ လုံခြုံစိတ်ချရမှုရှိသော ကုန်စည်နှင့်ဝန်ဆောင်မှုများအား မှန်ကန်စွာရွေးချယ်ဝယ်ယူအသုံးပြုတတ်စေရန်၊ စားသုံးသူများနစ်နာဆုံးရှုံးမှုများရှိပါက ပြန်လည်ကုစားခွင့်နှင့် တိုင်ကြားနိုင်မည့်နည်းလမ်းများ၊ ကုန်အညွှန်းအမှတ်အသားဆိုင်ရာပြဋ္ဌာန်းချက်များ ဟောပြောဆွေးနွေးခြင်း၊ FDA ဌာနမှလည်း စားသုံးသူများအနေဖြင့် သက်တမ်းလွန်သည့် အစားအသောက်များကို မစားသုံးကြရန်နှင့် အစားအသောက်များတွင်ပါဝင်သည့် ဓာတုဆိုးဆေးများ၏ ဘေးထွက်ဆိုးကျိုးများအကြောင်းတို့ကို ထည့်သွင်းဟောပြောဆွေးနွေးခဲ့ပါသည်။ ဆွေးနွေးပွဲသို့ ကျောင်းအုပ်ဆရာမကြီးနှင့် ဆရာ/ဆရာမ(၇)ဦး ကျောင်းသား/ကျောင်းသူ(၂၈၀)ဦးတက်ရောက်၍ တက်ရောက်လာသူများအား စားသုံးသူရေးရာဦးစီးဌာနက စားသုံးသူအသိပညာပေးလက်ကမ်းစာစောင်များ ပေးအပ်ခဲ့ပါကြောင်း သိရှိရပါသည်။

DOCA(မွန်)

         စားသုံးသူရေးရာဦးစီးဌာန ပြည်နယ်ဦးစီးမှူးရုံးမှ စားသုံးသူရေးရာဌာနခွဲ တာဝန်ခံဦးဆောင်သော ဝန်ထမ်းနှင့်အဖွဲ့သည် ပြည်နယ် အစားအသောက်နှင့်ဆေးဝါးကွပ်ကဲရေးဦးစီးဌာနမှ ဝန်ထမ်းများနှင့်ပူးပေါင်း၍ (၁၆-၁-၂၀၂၃)ရက်နေ့ နံနက် ၁၀:၃၀ အချိန်တွင် မော်လမြိုင်မြို့နယ်၊ အခြေခံပညာအထက်တန်းကျောင်း အ - ထ - က(၃)၌ စားသုံးသူကာကွယ်ရေး အသိပညာပေးဟောပြောပွဲကျင်းပပြုလုပ်ခဲ့ရာ စားသုံးသူရေးရာဦးစီးဌာနမှ ဒေါ်ဝါဝါမြိုင် ဦးစီးအရာရှိက ဌာန၏မျှော်မှန်းချက်၊ ရည်မှန်းချက်များ၊ စားသုံးသူများ အသိပညာရရှိစေမည့် ကုန်အညွှန်းအမှတ်အသားဆိုင်ရာပြဋ္ဌာန်းချက်များ၊ တိုင်ကြားနိုင်သည့်နည်းလမ်းများအား ဟောပြောဆွေးနွေးပြီး ဒေါ်အိအိစမ်း အကြီးတန်းစာရေးက စားသုံးသူအခွင့်အရေးနှင့်တာဝန်များ၊ လုံခြုံစိတ်ချရမှုရှိသော ကုန်စည်နှင့်ဝန်ဆောင်မှုများအား ရွေးချယ်ဝယ်ယူအသုံးပြုတတ်စေရန်၊ စားသုံးသူများ နစ်နာဆုံးရှုံးမှုများရှိပါက ပြန်လည်ကုစားခွင့်နှင့် တိုင်ကြားနိုင်မည့်နည်းလမ်းများကို ဟောပြောဆွေးနွေးခြင်း၊ FDA ဌာနမှလည်း စားသုံးသူများ ဘေးအန္တရာယ်ဖြစ်စေနိုင်သော ဓာတုဆိုးဆေးများအကြောင်းတို့ကို ထည့်သွင်းဟောပြောဆွေးနွေးခဲ့ပါသည်။ ဆွေးနွေးပွဲသို့ ကျောင်းအုပ်ဆရာမကြီးနှင့် ဆရာ၊ ဆရာမ(၂၀)ဦး ကျောင်းသား/သူ (၁၇၈)ဦးတက်ရောက်၍ တက်ရောက်လာသူများအား စားသုံးသူရေးရာဦးစီးဌာနနှင့် အစားအသောက်နှင့်ဆေးဝါးကွပ်ကဲရေးဦးစီးဌာနတို့က လက်ကမ်းစာစောင်များကိုလည်း ဖြန့်ဝေပေးခဲ့ကြောင်းသိရှိရပါသည်။

DOCA(မွန်)

      စားသုံးသူရေးရာဦးစီးဌာန၊ ပြည်ထောင်စုနယ်မြေ၊ နေပြည်တော်ခရိုင်ဦးစီးမှူးရုံးမှ ဝန်ထမ်းများသည်အနေဖြင့် (၁၂-၁-၂၀၂၃)ရက်နေ့တွင် စားသုံးသူကာကွယ်ရေးအသိပညာပေးဟောပြောပွဲကို ပုဗ္ဗသီရိမြို့နယ်၊ (ဖြုတ်ခွဲကျေးရွာ) အခြေခံပညာအထက်တန်းကျောင်း၌ ကျင်းပပြုလုပ်ခဲ့ပါသည်။ ရှေးဦးစွာ ကျောင်းအုပ်ကြီးမှ အဖွင့်အမှာစကားပြောကြားခဲ့ပြီး နေပြည်တော်ခရိုင်ဦးစီးမှူးရုံးမှ ဦးဝင်းသွင်၊ ရုံးအုပ်က စားသုံးသူကာကွယ်ရေး ဥပဒေပေါ်ပေါက်လာပုံ၊ ဥပဒေတွင်ပါဝင်သော စားသုံးသူအဓိပ္ပာယ်နှင့် စားသုံးသူအခွင့်အရေး၊ တာဝန်များအကြောင်းတို့ကို အသိပေးပြောကြားခဲ့ပြီး ဦးမြင့်နိုင်၊ ဦးစီးမှူးက စားသုံးသူများ နစ်နာဆုံးရှုံးမှုများနှင့်ပတ်သက်၍ စားသုံးသူရေးရာဦးစီးဌာနတွင် တိုင်ကြားနိုင်သော ဖုန်းနံပါတ်များ၊ Call Center ဖုန်းနံပါတ်နှင့် Website လိပ်စာတို့ကို ရှင်းလင်းပြောကြားခဲ့ပါသည်။ ဟောပြောပွဲသို့ ကျောင်းသား/သူ၊ ဆရာ/ဆရာမ စုစုပေါင်း(၇၈)ခန့် တက်ရောက်ခဲ့ပြီး နေ့လယ် (၁၄း၀၀)နာရီအချိန်တွင် ရုတ်သိမ်းကြောင်း သတင်းရရှိပါသည်။

DOCA(ပြည်ထောင်စုနယ်မြေ) 

       စားသုံးသူရေးရာဦးဌာန၊ မွန်ပြည်နယ်မှ ပြည်နယ်ဦးစီးမှူးသည် ၁၆-၁-၂၀၂၃ ရက်နေ့တွင် ပြည်နယ်ဦးစီးမှူးရုံးခန်း၌ မွန်ပြည်နယ်ဆားလုပ်ငန်းရှင်အသင်းဥက္ကဋ္ဌနှင့်တွေ့ဆုံ၍ ဆားထုတ်လုပ်မှုအခြေအနေ၊ ဈေးကွက်၊ ဈေးနှုန်းအခြေအနေ၊ ကြုံတွေ့ရသည့်အခက်အခဲများနှင့်ပတ်သက်၍ တွေ့ဆုံဆွေးနွေးခဲ့ပါသည်။

        ထိုသို့ဆွေးနွေးရာတွင် မွန်ပြည်နယ် ဆားလုပ်ငန်းရှင်အသင်းဥက္ကဋ္ဌက မွန်ပြည်နယ်တွင် ဆားကွင်းဧက(၄၅၀၀)ဧကရှိပြီး တစ်ဧကလျှင် ဆားထွက်ရှိမှု (၁၀-၁၅)တန်ထွက်ရှိပြီး စုစုပေါင်းအထွက်နှုန်းမှာ (၄၅၀၀၀-၅၀၀၀၀)တန်ထွက်ရှိကြောင်း၊ ဈေးနှုန်းအနေဖြင့် ဆားကြမ်းတစ်ပိဿာလျှင် (၁၈၀-၂၀၀)ကျပ်၊ ဆားချော (၄၀၀-၅၀၀)ကျပ်ရှိပြီး၊ ကရင်ပြည်နယ်နှင့် တနင်္သာရီတိုင်းများသို့ တင်ပို့ရကြောင်းသိရှိရပါသည်။ ၎င်းအနေဖြင့် မွန်ပြည်နယ် သံဖြူဇရပ်မြို့နယ်၊ ပငကျေးရွာတွင် အဆင့်မြင့်အိုင်အိုဒင်းဆားချောစက်ရုံတည်ဆောက်နိုင်ရေးကြိုးပမ်းလျက်ရှိပြီး မတည်ရင်းနှီးငွေ၊ ဈေးကွက်ရရှိရေးနှင့်ပတ်သက်၍ဆွေးခဲ့ရာ ပြည်နယ်ဦးစီးမှူးက မွန်ပြည်နယ်၌ အဆင့်မြင့်အိုင်အိုဒင်း ဆားချောစက်ရုံတည်ဆောက်ခြင်းအား ကြိုဆိုပါကြောင်း၊ ပြည်တွင်း/ပြည်ပဈေးကွက်ကဏ္ဍနှင့်ပတ်သက်၍ မိမိတို့ဘက်က  လိုအပ်သည့်အကူအညီများကို ကူညီပေးသွားမည်ဖြစ်ကြောင်းတို့အား ဆွေးနွေးခဲ့ကြောင်းသိရှိရပါသည်။

DOCA(မွန်)

         ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြန်အောင်ခရိုင်၊ ကြံခင်းမြို့နယ်တာဝန်ခံသည်(၁၆.၁.၂၀၂၃)ရက်နေ့ နေ့လည်(၁၃:၃၀)နာရီအချိန်တွင်  မြို့မအုပ်စု၊ တာကြီးတန်းရပ်ကွက်၊ မြို့မစာကြည့်တိုက်၌ စားသုံးသူပြည်သူ (၂၀) ဦးအား စားသုံးသူကာကွယ်ရေး အသိပညာပေးဟောပြောခြင်းကို ဆောင်ရွက်ခဲ့ပါသည်။

       ဟောပြောပွဲတွင် စားသုံးသူ‌‌‌ရေးရာဦးစီးဌာန၊ မြို့နယ်တာဝန်ခံ ဦးကျော်နိုင်ဝင်းက  စားသုံးကာ ကွယ်ရေးဥပဒေ ၂၀၁၉ ပါပြဌာန်းချက်မှ  စားသုံးသူအခွင့်အရေးနှင့်တာဝန်များအကြောင်း၊ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ အချက်အလက်ပြည့်စုံစွာပါရှိရမည်ဖြစ်ကြောင်း၊ စီးပွားရေးလုပ်ငန်းရှင်၏ တာဝန်များအကြောင်း၊ ကုန်စည် (သို့မဟုတ်) ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့် နစ်နာဆုံးရှုံးမှု များနှင့် စပ်လျဉ်း၍ ကုစားခွင့်ရရှိခြင်းများအကြောင်း၊ ပြစ်မှုနှင့်ပြစ်ဒဏ်များအကြောင်း၊ စားသုံးသူ မိဘပြည်သူများအနေဖြင့်လည်း စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း သိရှိလိုပါက www.doca.gov.mm  Website တွင် ဝင်ရောက်လေ့လာနိုင်ကြောင်း၊ စသည့်တို့ကို အသိပညာပေးဟောပြောခဲ့ပြီး တက်ရောက်လာသူများမှလည်း သိလိုသည်များကို မေးမြန်း၍ စားသုံးသူကာကွယ်ရေး ဥပဒေစာအုပ်နှင့် လက်ကမ်းစာစောင်များကို ဖြန့်ဝေပေးခဲ့ကြကြောင်းသိရှိရပါသည်။

DOCA(ဧရာဝတီ)