သတင်းနှင့် လှုပ်ရှားမှုများ

             ၂၀၂၂ခုနှစ်၊ ဇူလိုင်လ(၇) ရက်နေ့၊ နံနက်(၁၀:၀၀) နာရီအချိန်တွင် မကွေးတိုင်းဒေသကြီး အတွင်းရှိ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ပခုက္ကူခရိုင်ဦးစီးမှူးရုံး၌ “အခမ်းအနားမှူး သင်တန်း”ဖွင့်လှစ်ခဲ့ရာ အခမ်းအနားတွင် ခရိုင်ဦးစီးမှူး ဦးဇော်ဌေးအောင်မှ အဖွင့်အမှာစကားပြောကြား ခဲ့ပါသည်။

         ဆက်လက်၍ သင်တန်းမှူးဦးစီးအရာရှိ ဒေါ်ချိုချိုမာမှ သင်တန်းဖွင့်လှစ်ရခြင်း ရည်ရွယ်ချက်များကို ပြောကြားခဲ့ရာ မိမိတို့ဌာနရည်ရွယ်ချက်ဖြစ်သည့် ပြန်ကြားပေးရန်၊ ဖျော်ဖြေပေးရန်၊ ပညာပေးရန် ရည်ရွယ်၍ သင်တန်းကို ဖွင့်လှစ်ရခြင်းဖြစ်ကြောင်း အခမ်းအနားများကျင်းပရာတွင် အစီအစဉ်ကျစေရန် ဖွင့်လှစ်ရခြင်းဖြစ်ပြီး အခမ်းအနားမှူးများတွင်ရှိရမည့် အဓိကအရည်အချင်းများ၊ ဆောင်ရန်၊ ရှောင်ရန်များကို သိရှိလိုက်နာဆောင်ရွက်တက်စေရန်နှင့် အခမ်းအနားမှူးကောင်း တစ်ယောက်မှာ “သ” သုံးလုံးကျေရမည်ဖြစ်ကြောင်းများကို သိရှိစေရန် ဖွင့်လှစ်ရခြင်းဖြစ်ကြောင်း‌ ပြောကြားခဲ့ပါသည်။ သင်တန်းကို သင်ကြားပေးရာတွင် သင်တန်းသူများအား ဂရုစိုက်နိုင်စေရေးအတွက် သင်တန်းသူ(၁၁)ဦး ကိုသာ လက်ခံခဲ့ကြောင်း စာတွေ့နှင့်လက်တွေ့ဆောင်ရွက်နိုင်ရန်အတွက် သင်တန်းကာလမှာ(၂)ရက် ဖွင့်လှစ်မည်ဖြစ်ပြီး နံနက်(၁၀:၀၀)နာရီမှ (၁၂:၀၀)နာရီထိနှင့်နေ့လယ်(၁၃:၀၀)နာရီမှ (၁၄:၀၀)နာရီထိ သင်ကြားပေးသွားမည်ဖြစ်ပါသည်။ အဆိုပါသင်တန်းသို့ စားသုံးသူရေးရာဦးစီးဌာန၊ ကျေးလက်ဖွံ့ဖြိုးရေးဦးစီးဌာန၊ လူမှုဝန်ထမ်းဦးစီးဌာန၊ စည်ပင်သာယာရေးအဖွဲ့၊ အိမ်တွင်းမှုအသက်မွေးဝမ်းကျောင်းမှ သင်တန်းသူများ တက်ရောက်ခဲ့ကြောင်း သတင်းရရှိပါသည်။

DOCA(မကွေး)

        ကချင်ပြည်နယ်၊ စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ ဒေါ်နှောင်းနှောင်းဝင်း (စစ်ဆေးရေးမှူး)သည် ၁၄.၇.၂၀၂၂ ရက်နေ့တွင် ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာန၊ စည်ပင်သာယာရေးအဖွဲ့တို့နှင့်ပူးပေါင်း၍ ဗန်းမော်မြို့အတွင်းရှိ လက်လီ၊ လက်ကားရောင်းချနေသော အလှကုန်ပစ္စည်းဆိုင်၊ စတိုးဆိုင်များသို့ ဈေးကွက်စောင့်ကြည့် စစ်ဆေးခဲ့ပါသည်။

          ထိုသို့ ဈေးကွက်စောင့်ကြည့်စစ်ဆေးရာတွင် လက်လီ/လက်ကား ရောင်းချဖြန့်ဖြူးနေသော အလှကုန်ပစ္စည်းဆိုင်များတွင် ကုန်အမှတ်တံဆိပ်များ၊ အလှကုန်ပစ္စည်းများကိုတုပ၍ တရားမဝင် ဖြန့်ဖြူးရောင်းချနေခြင်း ရှိ မရှိ၊ အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက် ပါရှိခြင်း ရှိ မရှိနှင့် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ သတင်းအချက်အလက် ပြည့်စုံ မှန်ကန်စွာဖော်ပြထားမှု ရှိ မရှိတို့ကို ဈေးကွက်စောင့်ကြည့်စစ်ဆေးခြင်းအား ဆောင်ရွက်ခဲ့ပါသည်။

DOCA(ကချင်)

              ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဖျာပုံခရိုင် ကျိုက်လတ်မြို့နယ်မှမြို့နယ် တာဝန်ခံ ဦးတင်စိန်နှင့်ဝန်ထမ်းတို့သည် ဇူလိုင်လ (၁၁)ရက်‌နေ့၊ နံနက်(၁၀:၀၀)နာရီတွင် အုန်းဆံကြိုး လုပ်ငန်းသို့ကွင်းဆင်း၍ အုန်းဆံကြိုးထုတ်လုပ်မှုအခြေအနေနှင့် ဈေးနှုန်းဈေးကွက်အခြေအနေများအား လုပ်ငန်းရှင်ဦးနိုင်လင်းနှင့် တွေ့ဆုံဆွေးနွေးခဲ့ကြောင်း သိရသည်။ အဆိုပါလုပ်ငန်းတွင် ထုတ်လုပ်နေမှုအခြေအနေများအား မေးမြန်းရာ အုန်းဆံကြိုးပြုလုပ်ရာတွင် အုန်းခွံလှေတစ်စီးကိုယခင်က (၁၅၀၀၀/)ကျပ် ပေးဝယ်ရပြီး၊ ယခုအချိန်တွင် အုန်းခွံလှေတစ်စီးကို (၂၅၀၀၀)ကျပ်  ပေးဝယ်ရကြောင်း၊ အလုပ်သမားအနေဖြင့် ယခင်ကအလုပ်သမားတစ်ဦးကို တစ့်လျှင် အလုပ်သမားခ(၃၀၀၀)ကျပ်ပေးရပြီး၊ ယခုအခါတွင်(၅၀၀၀)ကျပ်ပေးရပါသည်။ အုန်းဆံကြိုး လုပ်ငန်းမှ ထွက်ရှိသော အုန်းဆံကြိုးခွေများ၊ ခြေသုတ်ခုံများပြုလုပ်ပြီးသည့်အထိ ယခင်နှစ်နှင့်မတူ ယခုနှစ်တွင်ကုန်ကြမ်းဝယ်ယူရာ၌ ဈေးပိုပေးရသောကြောင့် အမြတ်ငွေနည်းနည်းသာကျန်ရှိပါကြောင်း၊ အုန်းဆံ ကြိုးခွေများကို ယခင်က မြို့ကြီးများတွင် တိုက်တာအဆောက်အဦများ ဆောက်လုပ်ရာတွင် အသုံးပြုများခဲ့ပြီး။ ယခုအခါ အဆောက်အဦဆောက်လုပ်ရာတွင် အုန်းဆံကြိုးများကိုအသုံးပြုမှုနည်း ပါးလာသဖြင့်၊ အုန်းဆံကြိုးဈေးကွက်အနေဖြင့် မရှိသလောက်ဖြစ်ပြီး လုပ်ကိုင်သူများအနေဖြင့်လည်း နည်းပါးလာပါကြောင်း လုပ်ငန်းရှင်ဦးနိုင်လင်းထံမှ သိရသည်။

DOCA(ဧရာဝတီ)

           ပဲခူးတိုင်းဒေသကြီး စားသုံးသူရေးရာဦးစီးဌာန ၊ သာယာဝတီခရိုင် ၊ လက်ပံတန်းမြို့နယ်တာဝန်ခံနှင့် လက်ပံတန်းမြို့နယ် ၊ ပြန်ကြားရေးနှင့် ပြည်သူ့ဆက်ဆံရေး ဦးစီးဌာနတို့ ပူးပေါင်း၍ (၈.၇.၂၀၂၂ )ရက်နေ့ ၊ နံနက် (၁၀: ၀၀) နာရီအချိန်တွင် ပြန်/ဆက်ဦးစီးဌာန၊ Community Center တွင် စားသုံးသူကာကွယ်ရေး အသိပညာပေး Talk Show အစီအစဉ် ကျင်းပပြုလုပ်ခဲ့ပါသည်။

          လက်ပံတန်းမြို့နယ်တာဝန်ခံ ဦးချစ်ကိုကိုမှ ဌာန၏ မျှော်မှန်းချက်နှင့် ရည်မှန်းချက်များ ၊ စားသုံးသူကာကွယ်ရေးဥပဒေ အခန်း (၉)ပါ စားသုံးသူ၏ အခွင့်အရေးနှင့် တာဝန်များ အကြောင်း ၊ စားသုံးသူကာကွယ်ရေး ဥပဒေ အခန်း (၁၈)ပါ ကုန်စည်များအပေါ်တွင် ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့် အညီ ထုတ်လုပ် ရောင်းချရန် ၊ ဥပဒေ အခန်း (၁၀)ပါ စီးပွားရေးလုပ်ငန်းရှင်၏ တာဝန်များနှင့် အခန်း (၁၁)ပါ ကုန်စည်နှင့် စပ်လျဉ်း၍ အာမခံချက်ပေးရန်နှင့် စီးပွားရေးလုပ်ငန်းရှင်များ လိုက်နာရမည့် အချက်များ ၊ ဆောင်ရန်ရှောင်ရန်များကို ဟောပြောခဲ့ကြောင်း သတင်းရရှိပါသည်။

DOCA(ပဲခူး)

          ပဲခူးတိုင်းဒေသကြီးအတွင်း ဆီစက်လုပ်ငန်းများ ဖွံ့ဖြိုးတိုးတက်လာစေရေး၊ ဆီထွက်သီးနှံ စိုက်ပျိုးထုတ်လုပ်မှုပိုမိုတိုးတက်လာစေရေး၊ ပြည်ပမှ စားသုံးဆီတင်သွင်းမှုများ လျှော့ချ၍ ပြည်တွင်း၌ စားသုံးဆီများတိုးတက်ထုတ်လုပ်နိုင်ခြင်းအားဖြင့် နိုင်ငံခြားငွေ သုံးစွဲမှု လျှော့ချနိုင်ရန်နှင့် ဆီထွက်သီးနှံ စိုက်ပျိုးသူ တောင်သူများ အကျိုးစီးပွားဖြစ်ထွန်းစေရေး ၊ စားသုံးဆီကဏ္ဍဖွံ့ဖြိုး တိုးတက်လာစေရန် ရည်ရွယ်၍ ပဲခူးတိုင်းဒေသကြီး အစိုးရအဖွဲ့ ၊ တော်ဝင်ဟံသာ အစည်းအဝေးခန်းမ၌ ဇူလိုင်လ (၈)ရက်နေ့ နံနက်ပိုင်းက ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်းနှင့် ပဲခူးတိုင်းဒေသကြီးအတွင်းရှိ ဆီစက်လုပ်ငန်းရှင်များ တွေ့ဆုံ ဆွေးနွေးပွဲ အခမ်းအနား ကျင်းပ ပြုလုပ်ခဲ့ပါသည်။

          အဆိုပါ တွေ့ဆုံဆွေးနွေးပွဲတွင် ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်းက ပြီးခဲ့သည့် နှစ်အတွင်း ဆီထွက်သီးနှံ နေကြာကို ဧက(၈)ထောင်ခန့် စမ်းသပ်စိုက်ပျိုးခဲ့ရာ အောင်မြင်မှုများ ရရှိခဲ့ပါကြောင်း၊ ပြည်တွင်း ထုတ်လုပ်မှုအနေဖြင့်လည်း ခေတ်စနစ်ဖြင့် ကိုက်ညီသော ထုတ်လုပ်မှု စနစ်များ ဖြစ်ပေါ်လာစေရေး စီစဉ်ဆောင်ရွက်သွားရန် လိုအပ်ပါကြောင်း ၊ နိုင်ငံတော်အနေဖြင့် ပြည်တွင်း၌ စားသုံးဆီဖူလုံမှု ရှိစေရေးအတွက် ဆီထွက်သီးနှံများ ပိုမိုတိုးချဲ့ စိုက်ပျိုး ထုတ်လုပ်နိုင်ရန် ဦးစားပေး ဆောင်ရွက်လျက်ရှိပါကြောင်း၊ ပြည်တွင်း၌ စားသုံးဆီ ပိုမိုထုတ်လုပ်နိုင်ရေး၊ ထုတ်လုပ်သည့် စားသုံးဆီများ ဈေးကွက်ဝေစု ပိုမိုရရှိရေး၊  ပြည်တွင်း ဆီစက်လုပ်ငန်းများ ပိုမိုဖွံ့ဖြိုး တိုးတက်လာစေရေး၊   အလုပ်အကိုင် အခွင့်အလမ်းများ ပိုမိုဖွံ့ဖြိုးတိုးတက်လာစေရေးနှင့် ဆီထွက် သီးနှံကဏ္ဍ (Supply Chain) ဖွံ့ဖြိုး တိုးတက်လာစေရေးနှင့် နိုင်ငံခြားငွေ အသုံးပြုမှု လျော့နည်း သက်သာစေရေး စသည့် ရည်မှန်းချက်များ ထားရှိကာ အစီအမံများ ချမှတ်ဆောင်ရွက်လျက်ရှိကြောင်း ၊ အခြေခံစားနပ်ရိက္ခာဖူလုံမှုရှိစေရေးအတွက် မိမိတို့တိုင်းဒေသကြိးအတွင်း ဆီထွက်သီးနှံဖြစ်သည့် မြေပဲ ၊ နှမ်း ၊ နေကြာများအား တိုးချဲ့စိုက်ပျိုးရန် စီစဉ်ထားပြီးဖြစ်ပါကြောင်း ၊ မိမိတို့တိုင်းဒေသကြီးအတွင်းထွက်ရှိသည့် ဆီထွက်သီးနှံများကို ကြိတ်ခွဲထုတ်လုပ်နိုင်ရေးအတွက် ဆီစက်လုပ်ငန်းရှင်များအနေဖြင့် မိမိတို့၏ဆီစက်များအား စက်စွမ်းအားပြည့်ကြိတ်ခွဲနိုင်ရန်အတွက် ကြိုတင်စီစဉ်ဆောင်ရွက်ထားရန်နှင့် အခက်အခဲများအား ပွင့်ပွင့်လင်းလင်းတင်ပြရန် ပြောကြားခဲ့ပါသည်။

           ထို့နောက် စားသုံးသူရေးရာဦးစီးဌာန ၊ ပဲခူးတိုင်းဒေသကြီးဦးစီးမှူးက ဆီထွက်သီးနှံ စိုက်ပျိုးထုတ်လုပ်မှု ၊ တိုင်းဒေသကြီးအတွင်း ထွက်ရှိလာမည့် နေကြာသီးနှံများ ဈေးကွက်ရရှိရေးနှင့် ကြိတ်ခွဲ ထုတ်လုပ်နိုင်မည့် အခြေအနေများကိုလည်းကောင်း၊ ထွက်ရှိလာမည့် ဆီထွက်သီးနှံများမှ ဆီကြိတ်ခွဲထုတ်လုပ်ရာတွင် လိုအပ်လာနိုင်သည့် အဆင့်မြင့် စက်ကိရိယာများ၏ ဈေးကွက်/ ဈေးနှုန်း အခြေအနေများကို လည်းကောင်း ၊ ပဲခူးတိုင်းဒေသကြီးအတွင်း သက်ဆိုင်ရာ ခရိုင်/ မြို့နယ်အလိုက် သက်သာသော ဈေးနှုန်းဖြင့် စားအုန်းဆီများ ရောင်းချ ပေးနိုင်ခဲ့မှု အခြေအနေ များကို power point ဖြင့်အကျယ်တဝင့် ရှင်းလင်းတင်ပြခဲ့ရာ တိုင်းဒေသကြီးအစိုးရအဖွဲ့ ၊ စီးပွား‌ရေးရာဝန်ကြီးမှ ဖြည့်စွက်ရှင်းလင်းခဲ့ပါသည်။

          ပြီးနောက် ဆီစက်လုပ်ငန်းရှင်များမှ  မိမိတို့ အနေဖြင့် စက်များ အရည်အသွေးပြည့်မီစေရေး ၊ တောင်သူများအား ချေးငွေများ ထုတ်ချေးပေးမှုအပြင် မျိုးကောင်းမျိုးသန့်များ ဖြန့်ဝေပေးနိုင်စေရေး ၊ စိုက်ပျိုးသူ တောင်သူများ ဆီထွက်သီးနှံအလေအလွင့်လျှော့နည်းစေရန် ရိတ်သိမ်းချိန်လွန် နည်းပညာများနှင့်  သက်ဆိုင်ရာ စိုက်ပျိုးရေးဦးစီးဌာနများ၌ အခြောက်ခံစက်များ ထားရှိပေးနိုင်ရေးတို့ကို အသီးသီးတင်ပြခဲ့ရာ သက်ဆိုင်ရာဌာနဆိုင်ရာများမှ ပြန်လည်ရှင်းလင်းဆွေးနွေးခဲ့ကြောင်း သိရှိရပါသည်။

          ယင်းတွေ့ဆုံဆွေးနွေးပွဲသို့ သက်ဆိုင်ရာ ဌာနဆိုင်ရာများမှ တာဝန်ရှိသူများ (၁၀)ဦး  ၊ ပဲခူးတိုင်းဒေသကြီးအတွင်းရှိ ဆီစက်လုပ်ငန်းရှင်း (၃၀)ဦး ၊ စုစုပေါင်း (၄၀)ဦးတက်ရောက်ကြောင်း သိရှိရပါသည်။

DOCA(ပဲခူး)