သတင်းနှင့် လှုပ်ရှားမှုများ

          ကယားပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှ တာဝန်ရှိသူများသည် မြို့နယ်စည်ပင်သာယာရေးအဖွဲ့နှင့် ပူးပေါင်း၍ ၂၀၂၂ ခုနှစ်၊ မေ လ (၁၀)ရက်နေ့၊ နံနက် (၁၀:၀၀)နာရီအချိန်တွင် လွိုင်ကော်မြို့ပေါ်ရှိ ရွှေတောင်ရပ်ကွက်နှင့် မင်္ဂလာရပ်ကွက်ရှိ စက်ဆီ၊ ချောဆီဆိုင်များ၌ စက်ဆီ/ ချောဆီများ တရားမဝင် တင်သွင်းရောင်းချနေမှုများကို လျော့နည်းပပျောက်စေရန် ဈေးကွက်အတွင်းရောင်းချမှု ရှိ/မရှိကို စက်ဆီ၊ ချောဆီ အရောင်းဆိုင်များအား ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ကြပါသည်။

         ထိုသို့ ဆောင်ရွက်ရာတွင် လွိုင်ကော်မြို့ပေါ်ရှိ ရွှေတောင်ရပ်ကွက်နှင့် မင်္ဂလာရပ်ကွက်ရှိ စက်ဆီ၊ ချောဆီဆိုင်များ၌ စက်ဆီ/ ချောဆီနှင့် ရေနံထွက်ပစ္စည်းများ ဝယ်ယူသုံးစွဲရာတွင် အရည်အသွေးပြည့်မီမှန်ကန်သည့် ပစ္စည်းများ သုံးစွဲခွင့်ရရှိစေရေးအတွက် ဈေးကွက်စောင့်ကြည့် စစ်ဆေး ရာ သတ်မှတ်ချက်များနှင့် ကိုက်ညီမှုမရှိသော စက်ဆီ၊ ချောဆီများမရှိကြောင်း စိစစ်တွေ့ရှိရပြီး၊ ဆက်စပ်ရေနံထွက်ပစ္စည်းဘူးများပေါ်တွင် ခွင့်ပြုချက်ပေးထားသည့် Code အမှတ်အသား၊ လုပ်ငန်းရှင်၏အမည်၊ လုပ်ငန်းဌာန၊ ဖုန်းနံပါတ်နှင့် မိမိတို့ တင်သွင်းဖြန့်ဖြူးရောင်းချသည့် ကုန်ပစ္စည်း၏ အရည်အသွေးကောင်းမွန်မှု၊ ထုတ်ပိုးမှုပုံစံတို့ကို ရေနံထွက်ပစ္စည်းကြီးကြပ်ရေး ဦးစီးဌာန(PPRD) မှ တရားဝင်ခွင့်ပြုထားသော ကုန်ပစ္စည်းများကိုသာ တင်သွင်းခြင်း၊ ဖြန့်ဖြူးခြင်းများပြုလုပ်ရန်နှင့် သတ်မှတ်ချက်များနှင့် မညီသော စက်ဆီ၊ ချောဆီများ ဈေးကွက်အတွင်း တွေ့ရှိပါက ရေနံနှင့်ရေနံ ထွက်ပစ္စည်းဆိုင်ရာ ဥပဒေအရသော်လည်းကောင်း၊ စားသုံးသူကာကွယ်ရေးဥပဒေအရသော်လည်းကောင်း အရေးယူခံရနိုင်ကြောင်းကို ကွင်းဆင်းအသိပေး ဆောင်ရွက်ခဲ့ကြောင်း သတင်းရရှိပါသည်။

DOCA(ကယား)

             ဧရာဝတီတိုင်းဒေသကြီး၊စားသုံးသူရေးရာဦးစီးဌာန၊ ဟင်္သာတခရိုင်၊ ဟင်္သာတမြို့နယ်တွင် စားသုံးသူစွမ်းဆောင်နိုင်မှု အညွှန်းကိန်းစစ်တမ်းများ ကောက်ယူခြင်းကို ဆောင်ရွက်လျက်ရှိပါသည်။ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူ ပြည်သူများ၏ စားသုံးသူကာကွယ်ရေးနှင့် စပ်လျဉ်း၍ အသိပညာ ဗဟုသုတနှင့် စွမ်းဆောင်ရည် မည်မျှရှိသည်ကို သိရှိနိုင်ရန်အတွက် စားသုံးသူစွမ်းဆောင်နိုင်မှု အညွှန်းကိန်း စစ်တမ်းအား ကောက်ယူခြင်း ဖြစ်ပါ သည်။

            ထိုသို့ စစ်တမ်းကောက်ယူ ခြင်းကို (၂.၅.၂၀၂၂) နေ့၊ နံက် (၁၀:၀၀) တွင် ဟင်္သာတမြို့နယ်၊ နတ်မော်ကျေးရွာ အုပ်ချုပ်ရေးမှူး ရုံးတွင်  ပြည်သူ (၂၂) ဦးကို စားသုံးသူရေးရာဦးစီးဌာန၊ ဟင်္သာတခရိုင်၊ ဒု-ခရိုင်မှူး ဦးဆောင်သောအဖွဲ့မှလည်းကောင်း၊ (၄.၅.၂၀၂၂) နေ့၊ နံက် (၈:၀၀)တွင် ၊ ဟင်္သာတမြို့နယ်၊ အင်းဓဝယ်ကျေးရွာအုပ်စု၊ တောင်သူဦးတင်ရီ၏ သီးနှံသိုလှောင်ရုံတွင် ပြည်သူ (၁၄)ဦးကို စားသုံးသူရေးရာဦးစီးဌာန၊ ဟင်္သာတခရိုင်၊ ခရိုင်ဦးစီးမှူးဦးဆောင်သောအဖွဲ့မှလည်းကောင်း၊ (၅.၅.၂၀၂၂) နေ့ ၊ နံက် (၈:၀၀) တွင် ဟင်္သာတမြို့၊ တာကလေးရပ်ကွက် အုပ်ချုပ်ရေးမှူးရုံးတွင် ပြည်သူ (၁၅)ဦးကိုလည်းကောင်း၊ စားသုံးသူရေးရာဦးစီးဌာန၊ ဟင်္သာတခရိုင်၊ ဒု-ခရိုင်မှူး ဦးဆောင်သောအဖွဲ့မှလည်းကောင်း၊ စစ်တမ်းများကောက်ယူခဲ့ကြောင်း သိရှိရပါသည်။

            စစ်တမ်းဖြေဆိုသူ ပြည်သူများမှလည်း တက်ကြွစွာ ပါဝင်ဖြေဆိုခဲ့ကြပြီး စားသုံးသူအခွင့်အရေးနှင့် ပတ်သက်သည့်သိလိုသည်များကို မေးမြန်းဆွေးနွေးခဲ့ကြကြောင်း သိရှိရပါသည်။

DOCA(ဧရာဝတီ)

             စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ၂၀၂၂ခုနှစ်၊ မေလ (၁၁) ရက်နေ့၊ နံနက် (၁၀:၀၀) အချိန်တွင် လွိုင်ကော်မြို့ သီရိမင်္ဂလာဈေး၌ ဈေးကွက်အတွင်း ပြည်ပမှ တင်သွင်းလာသည့် စားအုန်းဆီများ ဖြန့်ဖြူးသယ်ဆောင်ရာတွင် လုပ်ငန်းရှင်များ လိုက်နာရမည့်အချက်များနှင့် ဟင်းသီးဟင်းရွက်ဆီနှင့်စပ်လျဉ်း၍ ကုန်အညွှန်းအမှတ်အသား ဖော်ပြရာ လုပ်ငန်းရှင်များလိုက်နာ ဆောင်ရွက်နိုင်ရေး မြို့နယ်စည်ပင်သာယာရေးအဖွဲ့နှင့် ပူးပေါင်း၍ ဈေးကွက်စောင့်ကြည့် စစ်ဆေးဆောင်ရွက် ခဲ့ပါသည်။

             ထိုသို့ ဈေးကွက်စောင့်ကြည့်စစ်ဆေးရာတွင် သီရိမင်္ဂလာဈေးအတွင်း စားအုန်းဆီ လက်ကားဖြန့်ဖြူးရောင်းချသော ဆိုင်များအား ရန်ကုန် ဆီသိုလှောင်ကန်များမှ ဆီများ ထုတ်ယူသော စားသုံးဆီများအား Food Grade အဆင့်ရှိ  အဝါရောင် ပေပါအသစ် (သို့) သန့်စင်ပြီး ပေပါအဟောင်း၊ စားသုံးဆီ သီးသန့်သယ်ဆောင်သော ဘောက်ဆာယာဉ်များနှင့် သန့်စင်ပြီး  Food Grade Tank များသို့ သာ ဆီဖြည့်သွင်းပေးမည်ဖြစ်ပြီး သတ်မှတ်ချက်နှင့် ကိုက်ညီမှု့မရှိသည့် ပေပါများ ၊ ဘောက်ဆာ ယာဉ်များအတွင်းသို့ ဆီဖြည့်သွင်းပေးမည် မဟုတ်ကြောင်း၊ စားသုံးဆီ ရောင်းချသောဆိုင်များတွင် ဟင်းသီးဟင်းရွက်ဆီ (Vegetable Oil, Cooking Oil) နှင့်စပ်လျဉ်း၍လည်း ကုန်အညွှန်းအမှတ်အသား ဖော်ပြရာတွင် လုပ်ငန်းရှင်များ လိုက်နာဆောင်ရွက်ရန် ညွှန်ကြားချက် အမှတ် ၁/ ၂၀၂၁ နှင့် စပ်လျဉ်း၍ အသိပေးဆောင်ရွက်ခဲ့ကြောင်း သိရပါသည်။

DOCA(ကယား)

               ကချင်ပြည်နယ်၊ စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ ဒု-ခရိုင်ဦးစီးမှူးနှင့်ဝန်ထမ်းများသည် ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာန၊ စည်ပင်သာယာရေးအဖွဲ့နှင့်ပူးပေါင်း၍ ၁၂.၅.၂၀၂၂ ရက်နေ့ နံနက် ၁၀:၃၀ နာရီအချိန်တွင် ဗန်းမော်မြို့တွင်းရှိ ဆေးနှင့်ဆေးပစ္စည်း အရောင်းဆိုင်များ၊ စတိုးဆိုင်များအား ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

              ဈေးကွက်စောင့်ကြည့်စစ်ဆေးရာတွင် ကုန်စည်များထည့်သွင်းရောင်းချသည့် ဘူးများ၊ အထုပ်များ၊ အိတ်များ၏အပေါ်တွင် ကုန်အညွှန်းအမှတ်အသားကို စားသုံးသူကာကွယ်ရေးဥပဒေပါ ပြဋ္ဌာန်းချက်များနှင့်ဖော်ပြထားခြင်းရှိ၊ မရှိနှင့် ကုန်အညွှန်းအမှတ်အသားဖော်ပြချက်များနှင့် ရောင်းချ သည့်ကုန်စည်အခြေအနေ ကိုက်ညီမှု ရှိမရှိစစ်ဆေးဆောင်ရွက်ခြင်းနှင့် စီးပွားရေးလုပ်ငန်းရှင်များ၏ လိုက်နာရမည့်တာဝန်များအား ရှင်းလင်းဆွေးနွေးခဲ့ပြီး ကုန်စည်အုပ်စုအလိုက် ကုန်အညွှန်းအမှတ်အသားဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

            စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ် တာဝန်ခံနှင့်အဖွဲ့သည် (၉.၅.၂၀၂၂) ရက်နေ့ နံနက်(၉:၀၀) တွင် စောပြာအုပ်စု၊ လှော်ကထားကျေးရွာ ဦးဂျမား၏နေအိမ်၌ မွေးမြူရေးလုပ်ငန်းရှင် (၁၂)ဦးနှင့် တွေ့ဆုံ၍ စားသုံးသူကာကွယ်ရေးအသိပညာပေးဟောပြောဆောင်ရွက်ခဲ့ပါသည်။

        ဟောပြောပွဲတွင် မြို့နယ်တာဝန်ခံ ဦးအောင်သန်းဌေးမှ မြန်မာနိုင်ငံ စားသုံးသူကာကွယ်ရေး ကော်မရှင်၏ ညွှန်ကြားချက်အမှတ်(၂/၂၀၁၉) အကြောင်း၊ ဥပဒေတွင်ပါရှိသော အခန်း(၉)ပါ စားသုံးသူအခွင့်အရေးနှင့်တာဝန်များ၊ အခန်း(၁၀)ပါ စီးပွားရေးလုပ်ငန်းရှင်၏ တာဝန်များ အကြောင်း၊  အခန်း(၂၃)ပါ တားမြစ်ချက်များတို့ကို ရှင်းလင်းဟောပြောခဲ့ပြီး တက်ရောက်သူများမှလည်း သိလိုသည်များကို မေးမြန်း၍ စားသုံးသူကာကွယ်ရေး ဥပဒေစာအုပ်နှင့် စားသုံးသူအသိပညာပေးလက်ကမ်းစာစောင်များ ဖြန့်ဝေခဲ့ကြကြောင်းသိရှိရပါသည်။

DOCA(ဧရာဝတီ)