ပြည်တွင်းကုန်သွယ်မှုသတင်း

        ကွမ်းသီးနှင့် သီဟိုစေ့များသည် မြန်မာနိုင်ငံတောင်ပိုင်း တနင်္သာရီတိုင်းဒေသကြီးနှင့် မွန်ပြည်နယ်တို့တွင် အများဆုံးစိုက်ပျိုးလျက်ရှိပါသည်။ ကွမ်းသီးတွင် ကွမ်းသီးအလုံးစျေးနှင့် ကွမ်းသီးခွဲခြမ်း စျေးဟူ၍ စျေးနှုန်း (၂)မျိုးရှိပြီး သီဟိုစေ့တွင် အခွံမချွတ်ရသေးသောအပင်မှ ဆွတ်ခူးသော အသီးအကြမ်းစျေးနှင့် အခြောက်လှန်းသန့်စင်ပြီး အချောစျေးဟူ၍ စျေးနှုန်း (၂)မျိုးရှိကြောင်းသိရှိရပြီး ယခု နိုဝင်ဘာလ ၂၉ ရက်တွင် ကွမ်းသီးစျေးမှာ ကွမ်းသီးအလုံး(အခွံမပါ) တစ်ပိဿာလျှင် (၆၅၀ဝိ/-)နှုန်း နှင့် ကွမ်းသီးခွဲခြမ်း တစ်ပိဿာလျှင် (၅၀၀ဝိ/-) နှုန်းစျေးပေါက် နေကြောင်းသိရှိရပါသည်။ သီဟိုစေ့စျေးနှုန်းမှာ သီဟိုစေ့အကြမ်း တစ်ပိဿာလျှင် ၄၅၀၀ ကျပ်ရှိပြီး ယခုအပတ်တွင် သီဟိုစေ့အချော တစ်ပိဿာလျှင် ၃၅၀၀၀ ကျပ်ဖြစ်ကြောင်း စုံစမ်းသိရှိ ရပါသည်။

       ကွမ်းသီးစျေးနှုန်းမှာ အနည်းငယ်ကျဆင်းလျက်ရှိပြီး သီဟိုစေ့စျေးနှုန်းမှာပြောင်းလဲမှုမရှိကြောင်း ကုန်သည်တစ်ဦးထံမှ သိရှိရပါသည်။

DOCA(တနင်္သာရီ)

         မန္တလေးတိုင်းဒေသကြီး၊ ကျောက်ဆည်ခရိုင်အတွင်းရှိ ယာမြေများ၌ စက်တင်ဘာလတွင် ရွာသွန်းသောမိုးရေကြောင့် အောက်တိုဘာလဆန်းတွင် ယာမြေများ၌ ကုလားပဲကို မိုးရေအစိုဓါတ်ဖြင့် စတင်စိုက်ပျိုးပါသည်။ အချို့မှာ မိုးရေအစိုဓါတ်အပြင်ရေစက်များဖြင့် ရေတင်၍ စိုက်ပျိုးကြကြောင်း၊ ရေဖြင့်ထပ်မံတင်၍ စိုက်ပျိုးသောယာမြေများသည် မိုးရေဖြင့်စိုက်ပျိုးသော ယာမြေများထက် ပို၍ကောင်းမွန်ပြီး အထွက်နှုန်းပိုမိုကောင်းမွန်ကြောင်း တောင်သူများထံမှသိရှိရပါသည် ။ တောင်သူများသည် ကုလားပဲမျိုးကို မိမိ၏အိမ်တွင်သေချာစွာ သိမ်းဆည်းထားပြီး မျိုးအဖြစ်အသုံးပြုကြသလို အချို့‌တောင်သူများသည် ဝယ်ယူ၍စိုက်ပျိုးကြကြောင်း၊ ကုန်ကျစရိတ်အနေဖြင့် တစ်ဧကလျှင် (၂၀၀၀၀၀) ကျပ်ဝန်းကျင်ကုန်ကျကြောင်း ၊ ကုလားပဲသည် ကုန်ကျစရိတ်သက်သာပြီး အချိန်ကုန်သက်သာခြင်းကြောင့် ဝင်ငွေတိုးပြီး နွေရာသီသုံးငွေအဖြစ် ရရှိခြင်းကြောင့် တောင်သူအများစုမှာ အများဆုံးစိုက်ပျိုးကြကြောင်း၊ ယာမြေများတွင် ကုလားပဲ (၁) ဧကလျှင် (၁) တင်းနှုန်းပတ်ကြဲရပြီး လယ်မြေများတွင် (၁) ဧကလျှင် (၁) တင်းခွဲနှုန်း ပိုမို၍စိုက်ပျိုးရကြောင်း၊ အကြောင်းရင်းမှာ ယာမြေများသည် လယ်မြေများထက် မြေသန်ခြင်းကြောင့်ဖြစ်ကြောင်း ယခုအခါ ကုလားပဲအပင်ပေါက်များ အောင်မြင်စွာဖြစ်ထွန်းနေပြီး ကုလားပဲရွက်များခူး၍ ဈေးထဲတွင်ရောင်းချလျက်ရှိကြောင်း၊ ကုလားပဲရွက်(၁) ပိသာလျှင် ဖောက်သည်ဈေးအနေဖြင့် (၅၀၀၀) ကျပ်ရှိပြီး လက်လီဈေးအနေဖြင့် ကုလားပဲရွက် (၁၀) ကျပ်သားလျှင် ၆၀၀ ကျပ်နှင့် ရောင်းချလျက်ဖြစ်ကြောင်း  ကုလားပဲကိုကြိတ်ခွဲလျှင် ကုလားပဲဆံကိုရရှိပြီး ကုလားပဲဆံကို အလှူပွဲများတွင် မပါမဖြစ် ပဲနှပ်အဖြစ် ချက်ပြုတ်ကျွေးမွေးကြကြောင်း၊ ကုလားပဲဆံဖြင့် မုန့်အမျိုးမျိုးပြုလုပ်၍လည်း ရောင်းချလျက်ရှိကြောင်း၊ ဈေးနှုန်းအနေဖြင့် ယခုအချိန်တွင် ကုလားပဲများထွက်ရှိခြင်းမရှိသေးသော်လည်း ဈေးကွက်အတွင်းတွင် ယခင်နှစ်ကထွက်ရှိသော ကုလားပဲဈေးနှုန်းများမှာ ကုလားပဲ (ရိုးရိုး) တစ်တင်းလျှင် (၅၄၀၀၀) ကျပ် ၊ ကုလားပဲ (V2) တစ်တင်းလျှင် (၆၄၀၀၀ )ကျပ်နှင့်ကုလားပဲဆံတစ်ပိဿာလျှင် (၄၂၀၀) ကျပ်ဖြင့်ရောင်းချလျက်ရှိကြောင်း သိရှိရပါသည်။

DOCA(မန္တလေး)

       ရှမ်းပြည်နယ်(အရှေ့ပိုင်း)၊ ကျိုင်းတုံမြို့ ဈေးကွက်တွင် နိုဝင်ဘာလ စတုတ္ထပတ်၌ ဓာတ်မြေဩဇာ ဈေးနှုန်းများမှာ ပုလဲ(MEP) (50)kg တစ်အိတ်လျှင်(၉၇၀၀၀)ကျပ်၊ တီဆူပါ(လေဆာ) (50)kg တစ်အိတ်လျှင်(၁၉၀၀၀)ကျပ်၊ ယူရီယား(မြင်းပျံ) (50)kg တစ်အိတ်လျှင် (၈၇၀၀၀)ကျပ်၊ တီဆူပါ (may) (50)kg တစ်အိတ်လျှင် (၁၉၀၀၀)ကျပ်၊ ချာန(သုံးမျိုးစပ်) (50)kg တစ်အိတ်လျှင် (၁၄၂၀၀၀)ကျပ် ဖြစ်ပါသည်။ တာချီလိတ်မြို့အတွင်းရှိ ဓာတ်မြေဩဇာ ဈေးနှုန်း များမှာ ပုလဲ(၄၆%) (50)kg တစ်အိတ်လျှင် (၁၃၂၅၀၀)ကျပ်၊ ကွန်ပေါင်း(၁၅ပတ်လည်) တစ်အိတ်လျှင် (၁၂၄၄၀၀)ကျပ်၊ ကွန်ပေါင်း (50)kg တစ်အိတ်လျှင် (၁၂၄၄၀၀)ကျပ် ဖြစ်ပါသည်။

      ကျိုင်းတုံမြို့အတွင်းရှိ နိုဝင်ဘာလ စတုတ္ထအပတ်  ဘိလပ်မြေဈေးနှုန်းများအနေဖြင့် ကျား တံဆိပ် (40)kg တစ်အိတ်လျှင် (၁၅၉၀၀)ကျပ်၊ ဆင်တံဆိပ် (50)kg တစ်အိတ်လျှင် (၁၆၉၀၀)ကျပ်၊ စိန်တံဆိပ် (50)kg တစ်အိတ်လျှင် (၁၆၉၀၀)ကျပ် ဖြစ်ပါသည်။ တာချီလိတ်မြို့အတွင်းရှိ ဘိလပ်မြေ ဈေးနှုန်းများမှာ ကျားတံဆိပ် (40)kg တစ်အိတ်လျှင် (၁၃၆၀၀)ကျပ်၊ ဆင်တံဆိပ် (50)kg တစ်အိတ် လျှင် (၁၄၄၀၀)ကျပ်၊ စိန်တံဆိပ် (50)kg တစ်အိတ်လျှင် (၁၄၄၀၀)ကျပ် ဖြစ်ပါသည်။

       ရှမ်းပြည်နယ်(အရှေ့ပိုင်း)တွင် ဓာတ်မြေဩဇာဈေးနှုန်းများမှာ ယခင်အောက်တိုဘာလ စတုတ္ထပတ်ထက် အနည်းငယ် ကျဆင်းပြီး၊ ပုလဲ(၁၅ပတ်လည်) တစ်မျိုးသာလျှင် ဈေးနှုန်း အနည်းငယ်မြင့်တက်လျက်ရှိပါသည်။ ဘိလပ်မြေဈေးနှုန်းများမှာလည်း ယခင်လစတုတ္ထပတ်ထက် အနည်းငယ် မြင့်တက်လျက်ရှိသည်ကို သိရှိရပါသည်။

DOCA (ရှမ်း)

          ၂၀၂၂-ခုနှစ် နိုဝင်ဘာလနောက်ဆုံးပတ် ကသာမြို့နယ်၊ သီရိခေမာဈေးအတွင်း ရောင်းချလျက် ရှိသော အခြေခံစားသောက်ကုန်ပစ္စည်းများမှာ ဧရာမင်းဆန်တစ်ပြည်(၂၂၀၀)ကျပ်၊ မှော်ဘီဆန် တစ်ပြည် (၁၉၀၀)ကျပ်နှင့် ချင်း-၃ဆန်တစ်ပြည် (၁၇၀၀)ကျပ်ဖြင့် ရောင်းချလျက်ရှိပြီး စားသုံးဆီ ဈေးနှုန်းမှာ မြေပဲ ဆီတစ်ပိဿာ (၁၂၀၀၀)ကျပ်နှင့် စားအုန်းဆီတစ်ပိဿာ(၇၇၀၀)ကျပ်  ရှိကြောင်းသိရသည်။

         စားဖိုဆောင်သီးနှံ လက်လီဈေးနှုန်းများမှာ ကြက်သွန်နီ(ကြီး) တစ်ပိဿာ (၄၅၀၀)ကျပ်၊ (လတ်) (၄၀၀၀)ကျပ်နှင့် (သေး)တစ်ပိဿာ(၃၇၀၀)ကျပ်၊ ကြက်သွန်ဖြူ(ရှမ်း) (ကြီး/လတ်)တစ်ပိဿာ (၆၀၀၀ မှ ၄၅၀၀)ကျပ်၊ အာလူး တစ်ပိဿာ(၂၈၀၀)ကျပ်၊ ခရမ်းချဉ်သီးတစ်ပိဿာ(၃၀၀၀)ကျပ်၊ ကုလားပဲ တစ်ပိဿာ (၅၂၀၀)ကျပ်၊ ပဲနီလေးတစ်ပိဿာ(၇၀၀၀)ကျပ်၊ စားတော်ပဲ တစ်ပိဿာ(၅၈၀၀)ကျပ်ဖြင့် ရောင်းချလျက်ရှိသည်။

            အသား /ငါး ဈေးနှုန်းများမှာ ကြက်သား(CP) တစ်ပိဿာ (၁၂၀၀၀)ကျပ်၊ ဝက်သားတစ်ပိသာ (၁၆၀၀၀) ကျပ်၊ အမဲသားတစ်ပိဿာ(၁၅၀၀၀)ကျပ်၊ ဆိတ်သားတစ်ပိဿာ (၂၄၀၀၀)ကျပ်နှင့် ငါးကြင်းတစ်ပိဿာ(၈၀၀၀)ကျပ်ရှိပြီး နိုဝင်ဘာလတတိယပတ်နှင့် ဈေးနှုန်းနှိုင်းယှဉ်ကြည့်ပါက ခရမ်းချဉ်သီး ဈေးနှုန်းမှာ ကျပ်(၆၀၀)ခန့်နှင့် စားတော်ပဲဈေးနှုန်းမှာ ကျပ်(၂၀၀)ခန့် ဈေးကျလျက်ရှိသည်ကို တွေ့ရှိ ရပြီးကျန်စားသောက်ကုန်များမှာ ဈေးနှုန်းတည်ငြိမ်လျက်ရှိကြောင်း သိရသည်။

DOCA(စစ်ကိုင်း)

မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ် လက်ကားကုန်စည်ဒိုင်တွင် ကြက်သွန်နီ စိုက်ပျိုးရာဒေသ နေရာအနှံ့အပြားနှင့် ဆင်ဖြူကျွန်း၊ စလင်း၊ ပေါက်ဒေသများမှ ဆောင်းစိုက်၊ ပင်စိုက်များ နေ့စဉ်အရောင်းအဝယ်ဖြစ်နေပါသည်။ နိုဝင်ဘာလ(တတိယ)ပတ်အတွင်း ကြက်သွန်နီ လက်ကားကုန်စည်ဒိုင်ပြတ်ဈေးမှာ အမြင့်ဆုံးဈေး(၁)ပိဿာ ထိပ်စ ကျပ်(၃၆၅၀)၊ အလတ်စ ကျပ် (၃၄၀၀)၊ အနိမ့်စကျပ်(၃၀၀၀)ဈေးနှုန်းဖြင့် အရောင်းအဝယ်ဖြစ်ပြီး ယခင်တစ်ပတ်နှင့် နှိုင်းယှဉ်ပါက ယခုတစ်ပတ်တွင် ကြက်သွန်နီ(၁)ပိဿာ ပျမ်းမျှကျပ်(၁၀၀)ခန့် ဈေးနှုန်းကျဆင်းပြီး အရောင်းအဝယ် ဖြစ်ကြောင်း ဒေသတွင်းကြက်သွန်နီများကို ပြည်ပပို့ကုန် မြဝတီမြို့သို့ တင်ပို့မှုနည်းပြီး ရန်ကုန်တိုင်းဒေသကြီး ဘုရင့်နောင်ပွဲရုံသို့ အများဆုံးတင်ပို့လျက်ရှိပါသည်။
ဆိပ်ဖြူမြို့ ပတ္တမြားဈေးနှင့်ကုန်စုံဆိုင်ကြီးများတွင် ကြက်သွန်နီ လက်လီရောင်းချသည့် ဈေး နှုန်းမှာ ကြက်သွန်နီ(ဥ)အကြီး၊ အသေး၊ အလတ်၊ အရွယ်အစား၊ အရည်အသွေးလိုက်၍ ထိပ်စ(၁) ပိဿာလျှင် ကျပ်(၄၀၀၀)၊ အလတ်စ ကျပ်(၃၇၀၀)၊ အသေးစ ကျပ်(၃၃၀၀)ဖြင့် ရောင်းချနေကြောင်း ဝယ်ယူသုံးစွဲသူ စားသုံးသူများထံမှ သိရှိရသည်။ နိုဝင်ဘာ(တတိယ)ပတ်အတွင်း တင်ပို့မှုအနေဖြင့် ရန်ကုန်၊ ဘုရင့်နောင်ပွဲရုံ၊ ပြည်၊ ပုသိမ်မြို့၊ မြဝတီ၊ စစ်တွေ၊ မော်လမြိုင်မြို့များသို့ နေ့စဉ် တင်ပို့ အရောင်းအဝယ်ဖြစ်ပြီး တစ်ပတ်အတွင်း ကုန်ချိန်(၃)သိန်း၊ ၃၀ ပိဿာဝင်ဆန့် အိတ်(၁၀၆၂၃)၊ တန်ချိန်(၂)သောင်းခန့် ကုန်စည်စီးဆင်းလျက်ရှိကြောင်း ကုန်စည်ဒိုင်အသင်းဝင် တစ်ဦးထံမှ သိရှိရပါသည်။
ယခုအချိန်တွင် ဆောင်းစိုက်(ပင်စိုက်)ကြက်သွန်နီများ ရာသီကုန်ဆုံးချိန်ရောက်ပြီဖြစ်သဖြင့် ဆိပ်ဖြူမြို့ရှိ တောင်သူများနှင့် ကုန်သည်ပွဲစားလှောင်လက်များထံတွင် ကြက်သွန်နီလက်ကျန် ကုန်ချိန်နည်းသွားပြီဖြစ်၍ ယခု(၁)ပတ်အတွင်း ကြက်သွန်နီကုန်ချိန်စီးဆင်းမှု နည်းသွားကြောင်း ကုန်စည်ဒိုင်အသင်းဝင် ကုန်သည်ပွဲစားများထံမှ သိရှိရသည်။
DOCA (မကွေး)