ပြည်တွင်းကုန်သွယ်မှုသတင်း

       ၂၀၂၂ ခုနှစ်၊ ဒီဇင်ဘာလ(၂၅)ရက်နေ့မှ (၃၁)ရက်နေ့အထိ ပြည်ထောင်စုနယ်မြေ၊ နေပြည်တော်၊ ဒက္ခိဏသီရိမြို့နယ်၊ NAYPYITAW WHOLESALE ၌ ပြည်ထောင်စုနယ်မြေ၊ နေပြည်တော်ရှိ ပြည်သူများ ဒေသထွက်ကုန်နှင့်လူသုံးကုန်ပစ္စည်းများကို တစ်နေရာတည်းတွင် အချိန်ကုန်သက်သာစွာဖြင့် ဝယ်ယူနိုင်ရေးအတွက်ရည်ရွယ်၍  MSME လုပ်ငန်းရှင်များအသင်းမှ ကြီးကြပ်စီစဥ်ပေးသော မြန်မာနိုင်ငံအတွင်း အငယ်စား၊ အသေးစားနှင့် အလတ်စားလုပ်ငန်းရှင်းများ၏ ပြည်တွင်းဒေသထွက်ကုန်နှင့် လူသုံးကုန်ပစ္စည်းများကို သင့်တင့်မျှတသောဈေးနှုန်းများဖြင့် ရောင်းချပေးနိုင်ရေးအတွက် “ခရစ်စမတ်နှင့် နှစ်သစ်ကူးအကြို ဈေးရောင်းပွဲတော်”အား (၇)ရက်တိုင်တိုင် စည်ကားသိုက်မြိုက်စွာ ကျင်းပဆောင်ရွက်ပေးမည်ဖြစ်ကြောင်း နေပြည်တော် MSME ဥက္ကဋ္ဌထံမှ သိရှိရပါသည်။

      နိုင်ငံတော်အကြီးအကဲမှလည်း တိုင်းဒေသကြီး/ပြည်နယ်အသီးသီးရှိ MSME လုပ်ငန်းများ ဖွံ့ဖြိုးတိုးတက်ရေးအတွက် နည်းပညာများ၊ ငွေကြေးများ ထောက်ပံ့ပေးပြီး တွန်းအားပေးဆောင်ရွက်လျက်ရှိသည့်အတွက် အနာဂါတ်တွင် ပြည်သူများ ပြည်တွင်းထုတ်ကုန်များကို အသုံးပြုလာခြင်းဖြင့် အလုပ်အကိုင်အခွင့်အလမ်းများရရှိပြီး ပြည်တွင်းထုတ်ကုန်များကိုသာ သုံးစွဲလိုသော အလေ့အကျင့်ကောင်းများ ရရှိလာမည်ဖြစ်ပါသည်။

       ထိုဈေးရောင်းပွဲတော်တွင် ရောင်းချမည့်ထုတ်ကုန်များသည် သတ်မှတ်ချက်များနှင့်ကိုက်ညီပြီး အရည်အသွေးမြင့်မားသောကုန်ပစ္စည်းများဖြစ်ကြောင်း သိရှိရသည်။ စီးပွား‌ရေးလုပ်ငန်းရှင်များအနေဖြင့် မိမိတို့၏ထုတ်ကုန်များကို အများနှင့်တစ်နေရာတည်း ရောင်းချနိုင်သည့် ဈေးကွက်အခွင့်အလမ်းကောင်းများရရှိနိုင်ခြင်း၊ စားသုံးသူပြည်သူများအနေဖြင့် တစ်နေရာတည်းတွင် မိမိတို့ကြိုက်နှစ်သက်သောပစ္စည်းများကို စိတ်ကြိုက်ရွေးချယ်ဝယ်ယူသုံးစွဲနိုင်သည့်အခွင့်အရေးများရရှိစေခြင်း စသည့်အကျိုးကျေးဇူးများ ရရှိမည်ဖြစ်ပါသည်။ ထို့အပြင် စားသုံးသူပြည်သူများအတွက် အဆင့်မြင့်ဒေသထွက်ကုန်များ ပေါ်ပေါက်လာမည့်အပြင် နိုင်ငံ၏ဒေသထွက်ကုန်များကို တိုးမြှင့်ဝယ်ယူ စားသောက်နိုင်ပြီး ပြည်ပမှတင်သွင်းလာသည့်ကုန်ပစ္စည်းများအား ဝယ်ယူအသုံးပြုမှု လျှော့ချစေနိုင်မည်ဖြစ်ပါကြောင်း သုံးသပ်မိပါသည်။

DOCA(နေပြည်တော်)

       မြို့သစ်မြို့နယ်ရှိ တလင်းကုန်း၊ စည်သာ၊ မကျီးကုန်းကြီးကျေးရွာ အစရှိသည့် ပတ်ဝန်းကျင်ကျေးရွာများမှ ထွက်ရှိသောဆီးသီးအစို/အခြောက်များမှာ ဒီဇင်ဘာလပထမပတ်မှစတင်၍ ဈေးကွက်အတွင်း အရောင်းအဝယ်ဖြစ်လျက်ရှိပါသည်။ သဘာဝအလျောက် ပေါက်ရောက်နေသောဆီးပင်များမှ အချဉ်ဓါတ်ရှိသောဆီးသီးကို ဆီးယိုအဖြစ်လည်းကောင်း၊ ဆီးချိုပင်များဖြင့်ကာရံ၍ ဆီးခြံများအဖြစ် စိုက်ပျိုးလျက်ရှိပါသည်။

     ယခင်နှစ်ကဆီးချဉ်ကို မြို့ပေါ်ပွဲရုံရှိ ဆီးခွဲစက်များမှဆီးဆံကိုထုတ်ယူပြီး မန္တလေးပွဲရုံများသို့ ဆီးဆံတစ်ပိဿာလျှင် ကျပ်(၅၀၀၀၀)ဝန်းကျင်ဖြင့် ရောင်းချခဲ့ကြပြီး ဆီးသီးအစို/ အခြောက်ပေါ်မူတည်၍ ဆီးသီး(၁)တင်းလျှင် ကျပ်(၂၅၀၀)မှ ကျပ်(၃၀၀၀)ဖြင့်ရောင်းချခဲ့ရပါသည်။ ယခုနှစ် ဒီဇင်ဘာလပထမပတ် ဆီးသီးစပေါ်ချိန်တွင် ဆီးသီးအစို/ အခြောက်ပေါ်မူတည်၍ ဆီးသီး(၁)တင်းလျှင် ကျပ်(၇၀၀၀)ဖြင့် ဝယ်ယူလျက်ရှိပါသည်။ ထို့အပြင် ဆီးခွဲစက်များမှဆီးသီးများအား ကြိတ်ခွဲပြီးထွက်ရှိလာသော အလေအလွင့်ဆီးခွဲခြမ်းနှင့် ဆီးဖက်များကိုလယ်ယာမြေထဲတွင် မြေဩဇာအဖြစ်ပြန်လည်အသုံးပြုခြင်းနှင့် ဇီးခွဲခြမ်းများအား လောင်စာအဖြစ်ရောင်းချရကြောင်း ဆီးကြိတ်ခွဲစက်ပိုင်ရှင် ဦးမောင်ဌေးထံမှ သိရှိ ရပါသည်။

DOCA(မကွေး)

          မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်တွင် ဩဂုတ်လရွာသွန်းမိုးဖြင့် စက်တင်ဘာလတွင် စိုက်ပျိုးသော (မိုးစိုက်)(ဥစိုက်)ကြက်သွန်နီများာကိုး ဒီဇင်ဘာလဆန်းတွင် တူးဖော်၍ (၁)ရက်လျှင် ကုန်ချိန်(၃၀၀၀ မှ ၁၀၀၀၀) အထိ ကြက်သွန်နီပွဲရုံများနှင့် ဈေးတန်းများတွင် နေ့စဉ်ဝင်ရောက်၍ အရောင်းအဝယ်ဖြစ်နေကြောင်း၊ မိုးကြက်သွန်နီ(အသစ်)ပေါ်စရာသီဖြစ်၍ ဈေးကွက်အတွင်းသို့ ကုန်ချိန်အဝင်နည်းနေသေးသော်လည်း ဇန်နဝါရီလတွင် (ဥစိုက်)ကြက်သွန်နီများ လှိုင်လှိုင်တူးဖော်ရမည်ဖြစ်၍ ကုန်ချိန်အဝင်များလာမည်ဖြစ်ကြောင်း သိရှိရသည်။

          ကြက်သွန်နီဈေးကွက်အတွင်း ကြက်သွန်နီ(အသစ်)များအဝင်နည်းပြီး အမြင့်ဈေးဖြင့် အရောင်းအဝယ်ဖြစ်လျက်ရှိပါသည်။ ယခင်နှစ် (မိုး)ကြက်သွန်နီ(အသစ်)ပေါ်ချိန်တွင် (၁)ပိဿာလျှင် အနိမ့်ဈေး(၅၀၀)ကျပ်မှ အမြင့်ဈေး(၇၀၀)ကျပ်အထိဈေးနှုန်းဖြင့် အရောင်းအဝယ်ဖြစ်ခဲ့ပြီး ယခုသီးနှံပေါ်ချိန် ဒေသတွင်းဈေးကွက်တွင် ထိပ်စ (၁)ပိဿာလျှင်  ကျပ်(၂၉၅၀ မှ ၂၇၀၀)အထိ၊ အလတ်စ(၁)ပိဿာလျှင် ကျပ်(၂၅၀၀ မှ၂၃၀၀)အထိ၊ အသေးစ(၁)ပိဿာလျှင် ကျပ်(၁၅၀၀ မှ ၁၀၀၀)ခန့်အထိတို့ဖြင့် အရောင်းအဝယ်ဖြစ်လျက်ရှိသည်။ ယခုနှစ် ကြက်သွန်နီဈေးနှုန်းမြင့်တက်ပြီး အရောင်းအဝယ်ဖြစ်လျက်ရှိသော်လည်း ဈေးကောင်းစေရန်အတွက် တောင်သူများမှာ စောစောစိုက်ပျိုးကြပြီး မိုးအကြိမ်ကြိမ်ရွာသွန်းခြင်းကြောင့် အပင်ပေါက်မစုံလင်သည့်အပြင် အပင်ဖြစ်သန်မှုနည်းခြင်းကြောင့် ကြက်သွန်နီပိဿာချိန်အထွက်နှုန်း လျော့နည်းသွားခြင်းကြောင့် သီးနှံပေါ်စကုန်ချိန်အဝင်နည်းကြောင်း ကြက်သွန်နီစိုက်တောင်သူ ကုန်သည်ပွဲစားများထံမှ တဆင့်သိရှိရသည်။

       ကုန်စည်စီးဆင်းမှုအနေဖြင့် ဆိပ်ဖြူမြို့မှထွက်သော (မိုး)ကြက်သွန်နီ(အသစ်)များကို ဈေးကွက်အတွင်းသို့ ဒီဇင်ဘာလ(၁)ရက်မှ (၁၄)ရက်အတွင်း ရန်ကုန်ဘုရင့်နောင်ပွဲရုံသို့ ကုန်ချိန်ပိဿာ (၇၀၀၀၀)၊ အိတ်(၁၈၀၀)ခန့်ကို (၁၆)ဘီးမော်တော်ယာဉ်ဖြင့် တင်ပို့လျက်ရှိပြီး ပြည်ပပို့ကုန်အဖြစ် မြဝတီမြို့သို့ တင်ပို့မှုမရှိသေးကြောင်း၊ ဒေသတွင်းကြက်သွန်နီစိုက်တောင်သူများမှာ ဇန်နဝါရီလမှ ဖေဖော်ဝါရီလအတွင်း (မိုးစိုက်)ကြက်သွန်နီ(အသစ်)များ လှိုင်လှိုင်တူးဖော်ချိန်တွင် ကြက်သွန်နီဈေးနှုန်းမြင့်တက်ပြီး အရောင်းအဝယ်ဖြစ်ရန် မျှော်လင့်လျက်ရှိကြောင်း သိရှိရပါသည်။

DOCA(မကွေး)

     သကြားကို ရိုးရာမုန့်လုပ်ငန်းများနှင့် အခြားမုန့်ပဲသရေစာလုပ်ငန်းများတွင် မပါမဖြစ် အသုံးပြုကြပါသည်။ သကြားကိုတောင်ကြီး၊ ရန်ကုန်မြို့ကြီးများမှတင်သွင်းပြီး လက်လီ၊လက်ကားဖြန့်ဖြူးရောင်းချလျက်ရှိပါသည်။ ယခုဒီဇင်ဘာလ ဈေးကွက်အတွင်း ဖြစ်ပေါ်နေသော သကြားဈေးနှုန်းမှာ သကြားအညိုတစ်ပိဿာလျှင်(၂၈၀၀)ကျပ်ခန့်ရှိပြီး ယခင်နိုဝင်ဘာလအတွင်း သကြားအညိုတစ်ပိဿာဈေးနှုန်းမှာ(၃၀၀၀)ကျပ်ခန့်ရှိခဲ့၍ ယခင်လနှင့် ယခုလ ဈေးနှုန်းနှိုင်းယှဉ်ကြည့်လျှင် သကြားညိုတစ်ပိဿာလျှင်(၂၀၀)ကျပ်ခန့် ဈေးနှုန်းအနည်းငယ် ကျဆင်းလာကြောင်း သီရီမဂႅလာဈေးအတွင်း သကြားရောင်းချသူတစ်ဦးထံမှ သိရပါသည်။

DOCA(ကယား)

         စားဖိုဆောင်သီးနှံတစ်မျိုးဖြစ်သည့် ငရုတ်သီးကို လွိုင်ကော်မြို့နယ် မှုံပြာကျေးရွာ၊ လင်ဖုံလေးကျေးရွာနှင့်ရေနီကန်ကျေးရွာများတွင် အများဆုံးစိုက်ပျိုးကြပြီးထွက်ရှိသော ငရုတ်သီးစိမ်း ကိုဒေသ၌ ဈေးကွက်တွင်ဖြန့်ဖြူးရောင်းချကြကြောင်း၊ ဒေသခံလူမျိုးများမှာလည်း ဒေသရိုးရာ အစားအသောက်များ ဟင်းလျာများတွင် မရှိမဖြစ်နှစ်ခြိုက်စွာ အသုံးပြုကြသည်။ ယခုလက်ရှိ ဒီဇင်ဘာလတတိယပတ်တွင် ငရုတ်သီးစိမ်းတစ်ပိဿာလျှင်(၅၀၀၀)ကျပ်ဖြင့် ရောင်းချလျက်ရှိပြီး ဒီဇင်ဘာလဒုတိယအပတ်တွင် ငရုတ်သီးစိမ်းတစ်ပိဿာလျှင်(၅၅၀၀)ကျပ်ခန့်ရှိခဲ့ပြီး ယခင်အပတ်နှင့် ယခုအပတ်နှိုင်းယှဉ်လျှင် ငရုတ်သီးစိမ်းတစ်ပိဿာလျှင်(၅၀၀)ကျပ်ခန့် အနည်းငယ်ကျဆင်းလာကြောင်း ငရုတ်သီးစိမ်းရောင်းချသူတစ်ဦးထံမှ သိရှိရပါသည်။

DOCA(ကယား)