ပြည်တွင်းကုန်သွယ်မှုသတင်း

မအူပင်မြို့နယ်၌ တစ်ပိုင်တစ်နိုင် သံပုရာပင်သီးနှံ စိုက်ပျိုးကြသူများ အောင်မြင်ဖြစ်ထွန်းပြီး မိသားစု နေ့စဉ်ဝင်ငွေ ရရှိ

ဧရာဝတီတိုင်းဒေသကြီး၊ မအူပင်မြို့နယ်တွင် မြေအောက်ရေကို အမှီပြုပြီး တစ်ပိုင်တစ်နိုင် သံပုရာပင်သီးနှံ စိုက်ပျိုးကြသူများရှိပြီး ဈေးကွက်အတွင်း ဆွတ်ခူးရောင်းချရ၍ မိသားစုအပိုဝင်ငွေရရှိကာ လုပ်ငန်း အဆင်ပြေလျက်ရှိကြောင်း သံပုရာပင်သီးနှံ စိုက်ပျိုးတောင်သူများထံမှ သိရသည်။

မအူပင်မြို့နယ် ဒေသခံပြည်သူများသည် စိုက်ပျိုးရေ အဆင်ပြေမှုကြောင့် တစ်နှစ်ပတ်လုံး စိုက်ပျိုးရေးလုပ်ငန်းကို စီးပွားဖြစ် အားထားလုပ်ကိုင်ကြပြီး ဒေသခံတောင်သူအများစုက မိသားစုစားဝတ်နေရေးအတွက် သီးနှံအပိုဝင်ငွေ ရရှိစေရန် မိမိတို့၏ အိမ်ခြံဝန်း၊ မြေကွက်လပ်များနှင့် ဥယျာဉ်ခြံမြေများ ပြုလုပ်ကာ မြေအောက်ရေဖြင့် စားဖိုဆောင်သီးနှံမျိုးစုံကို တစ်ပိုင်တစ်နိုင် စိုက်ပျိုးလုပ်ကိုင်ကြရာ အဆိုပါ စားဖိုဆောင်သီးနှံများတွင် သံပုရာပင်သီးနှံ စိုက်ပျိုးရေးလုပ်ငန်းမှာ အောင်မြင်ဖြစ်ထွန်းလျက်ရှိကြောင်းနှင့် ဈေးကွက်အတွင်း ဧပြီလမှစ၍ နေ့စဉ် သံပုရာသီးများ လှိုင်လှိုင်ဆွတ်ခူး ရောင်းချနေရသဖြင့် လုပ်ငန်းအဆင်ပြေနေကြကြောင်း သိရသည်။

“ စိုက်ပျိုးမှု အနေဖြင့် ဥယာဉ်ခြံမြေ ပေ ၈၀ ပတ်လည်တွင် သံပုရာပင်သီးနှံ အပင် ၁၅၀ကို စိုက်ပျိုးထားပြီး စိုက်ပျိုးရေးလုပ်ငန်းက အစေ့ချစနစ်နဲ့ စိုက်ပျိုးလို့ရသလို မျိုးဆက်ပွားကိုင်းကူး တဲ့စနစ်နဲ့လည်း စိုက်ပျိုးကြောင်း၊ အစေ့ချစနစ်နဲ့ စိုက်ပျိုးမယ်ဆိုရင် တစ်ပေခွဲပတ်လည် မြေကျင်းတူးပြီး နွားချေး၊ မြေဆွေး၊ ဖွဲပြာတို့ကို ထည့်ပြီး ရေအစိုဓာတ်ရအောင် ပြုလုပ်ပေးပြီး စိုက်ပျိုးရကြောင်း ပင်ခြားတန်းခြားကို အနည်းဆုံး ၉ ပေ၊ ၁၀ ပေခန့်ထားပြီး စိုက်ပျိုးနိုင်ပါတယ်။ စိုက်ပျိုးပြီး (၂)နှစ်ကြာရင် အသီးအပွင့်များ စတင်ထွက်ရှိကြောင်း၊ စိုက်ပျိုးထားတဲ့ သံပုရာပင်တွေဟာ အသီးများလှိုင်လှိုင် ဆွတ်ခူးရောင်းချနေရပြီ ဖြစ်သည်။

ဈေးနှုန်းနှင့် ထွက်ရှိမှု အနေဖြင့် သံပုရာသီး တစ်လုံးကို ငွေကျပ် ၅၀ဖြင့် လက်ကားပေးနေပြီး ဈေးကွက်အတွင်း ၁၀၀/-ကျပ်ဖြင့် ရောင်းချရပါသည်။ သံပုရာပင်သီးနှံဟာ တစ်နှစ်(၃)ကြိမ် သီးတာဖြစ်လို့ တစ်ပင်ဆိုရင် သံပုရာသီး အလုံးရေ ပျမ်းမျှ ၅၀၀ခန့် ဆွတ်ခူးရပါတယ်။ စိုက်ပျိုးမှု ကုန်ကျစရိတ်အနေဖြင့် ငွေကျပ် သိန်း ၁၀ကျပ်သာကုန်ကျခဲ့ပြီး ၂၀၁၈ခုနှစ်တည်းက စိုက်ပျိုးထားခြင်းဖြစ်ကြောင်း သိရသည်။ အထွက်နှုန်းအနေဖြင့် ဧပြီလမှ ဇွန်လအထိ ၃လတာ ကာလ ထွက်ရှိပြီး အလုံးရေ ၃၀၀၀၀ခန့်ထွက်ရှိကြောင်း စိုက်ပျိုးသူထံမှ သိရသည်။ အကျိုးအမြတ်အနေဖြင့် ငွေကျပ် ၅၀၀၀၀၀/-ကျန်ရှိကြောင်း အပင်စိုက်ပျိုးပြုစုနိုင်ပါက တစ်နှစ်တာကာလတွင် ၃ကြိမ်သီးသဖြင့် တစ်နှစ်အတွင်း သံပုရာပင်မှ ဈေးနှုန်း အတက်အကျပေါ်မူတည်၍ ၁၅သိန်းမှ သိန်း၂၀ အတွင်းရရှိ၍ တစ်ပိုင်တစ်နိုင် စိုက်ပျိုးလုပ်ငန်း လုပ်ကိုင်သည့် ဒေသခံတစ်ဦးက ပြောပြ၍သိရသည်။

DOCA(ဧရာဝတီ)

စားအုန်းဆီအခြေခံလက်ကား ရည်ညွှန်းဈေးနှုန်း တစ်ပိဿာကျပ် ၆,၆၂၀ ကျပ်ဖြစ်ကြောင်း ထုတ်ပြန်ကြေညာဈေးနှုန်းများဆက်တိုက်ကျဆင်းလျက်ရှိ

ပြည်တွင်းကုန်သွယ်မှုသတင်း

စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ် ကင်းရှင်းသော စားသုံးဆီများကို သင့်တင့်သောဈေးနှုန်းဖြင့် ဝယ်ယူစားသုံးနိုင်စေရန်နှင့် ပြည်တွင်းလိုအပ် ချက်များကိုဖြည့်ဆည်းပေးနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီက ဆောင်ရွက်ပေးလျက်ရှိ ကြောင်းသိရပါသည်။ ပြည်တွင်းလိုအပ်ချက်ကို ဖြည့်ဆည်းပေးနိုင်ရေး စားအုန်းဆီကို ပြည်ပမှ ဝယ်ယူတင်သွင်းရာတွင် စားအုန်းဆီတင်ပို့သည့်နိုင်ငံများ၏ စျေးနှုန်းအတက်အကျပေါ်မူတည် ၍ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေးကို ထိန်းကျောင်းဆောင် ရွက်လျက်ရှိသည်။

ပြည်ပမှစားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက် နှင့် ဈေးနှုန်း ဖြစ်ပေါ်မှုများအရ ၂၀၂၅ ခုနှစ်၊မေလ ၁၂ ရက်နေ့မှ ၁၈ ရက်နေ့အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ကျပ် ၆,၆၂၀ ဖြစ်ကြောင်း စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီကအသိပေးထုတ်ပြန်ကြေညာထားကြောင်းသိရှိရပါသည်။

ပြည်တွင်းဈေးကွက်အတွင်း အဆိုပါထုတ်ပြန်ကြေညာထားသည့် စျေးနှုန်းထက် ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းအပါအဝင် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ကြောင်းသိရှိရသည်။

စားအုန်းဆီ အခြေခံလက်ကားရည်ညွှန်းဈေးနှုန်းကို အပတ်စဉ်တနင်္လာနေ့တိုင်းထုတ် ပြန်ကြေညာလျက်ရှိပြီး စားသုံးသူပြည်သူများအနေဖြင့် စားသုံးသူရေးရာဦးစီးဌာန၏ Website: www.doca.gov.mm၊ Facebook Page နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တို့တွင်ဝင်ရောက် ကြည့်ရှုလေ့လာနိုင်ကြောင်းသိရှိရပါသည်။ စားအုန်းဆီ အဓိကထုတ်လုပ်တင်ပို့သည့် အင်ဒိုနီးရှားနှင့် မလေးရှားနိုင်ငံတို့မှ မြန်မာ နိုင်ငံသို့ CIF စနစ်အရ တင်သွင်းနေသည့် စားအုန်းဆီ တစ်တန်ဈေးနှုန်းမှာ ၂၀၂၅ ခုနှစ်၊ ဇန်နဝါရီလမှဆက်တိုက်ကျဆင်းလာခဲ့ရာ ပြည်တွင်းတစ်ပိဿာလက်ကားရည်ညွှန်းဈေးနှုန်းမှာ လည်း အဆိုပါ ၄ လတာကာလအတွင်း ၆၆၀ကျပ် ကျဆင်းလာကြောင်း သိရှိရပါသည်။

“မန်းကုန်စည်ဒိုင် ဆီထွက်သီးနှံဈေးနှုန်း ဈေးကွက်”

ပြည်တွင်းကုန်သွယ်မှုသတင်း

မန္တလေးမြို့တွင်းသို့ မကွေးတိုင်းအတွင်းရှိ အောင်လံ၊အောင်တွင်း၊နတ်မောက်၊မကွေး၊ရေ နံချောင်းနယ်များမှ ဆီထွက်သီးနှံ နှမ်းနှင့်မြေပဲများ ဝင်ရောက်မှုရှိသကဲ့သို့ စစ်ကိုင်း၊မင်းကွန်းနှင့် မန္တလေးတိုင်းအတွင်း ကျောက်ဆည်၊မြစ်သား၊ကျောက်ပန်းတောင်းနယ်များမှ မန်းကုန်စည်ဒိုင် အတွင်းသို့ ဆီထွက်သီးနှံ နှမ်းနှင့်မြေပဲများဝင်ရောက်အရောင်းဝယ်လျက်ရှိပြီး အဆိုပါဆီထွက်သီးနှံ ကုန်ပစ္စည်းများကို မန္တလေးမြို့တွင်းရှိ ဆီစက်လုပ်ငန်းရှင်များနှင့် အစားအသောက်ကုန်ထုတ် ရောင်းချသည့်လုပ်ငန်းရှင်များမှ ဝယ်ယူမှုရှိကြောင်းသိရှိရပါသည်။ ၂၀၂၅ခုနှစ်၊ဧပြီလ‌နောက်ဆုံးပတ် တွင် မန်းကုန်စည်ဒိုင်ဆီထွက်သီးနှံ နှမ်းနှင့်မြေပဲ ဈေးကွက်အနေနှင့် နှမ်းနက်(၃)တင်းတစ်အိတ် လျှင် ၇၃၀၀၀၀ကျပ်၊ဆောင်းနှမ်း(၃)တင်းတစ်အိတ်လျှင် ၅၅၀၀၀၀ကျပ်၊ မြေပဲS₁လုံးဆံ (၁)ပိဿာ လျှင်၉၇၀၀ကျပ်၊S₁ဆီဆံ(၁)ပိဿာလျှင်၈၇၀၀ကျပ်၊Mတွဲဝန်းဆံ(၁)ပိဿာလျှင်၉၁၀၀ကျပ်၊ Mတွဲ ဆီဆံ(၁)ပိဿာလျှင် ၈၆၀၀ကျပ်၊အနီဆီဆံ (၁)ပိဿာလျှင် ၈၂၀၀ကျပ်၊ပြန့်ဆီဆံ (၁)ပိဿာလျှင် ၈၇၀၀ကျပ်တို့နှင့် အရောင်းအဝယ်ဖြစ်လျက်ရှိကြောင်းသိရှိရပါသည်။

DOCA (မန္တလေး)

မိတ္ထီလာကုန်စည်ဒိုင်၌ ဖြစ်ပေါ်နေသောသီးနှံဈေးနှုန်းဈေးကွက်အခြေအနေ

ပြည်တွင်းကုန်သွယ်မှုသတင်း

မန္တလေးတိုင်းဒေသကြီး၊ မိတ္ထီလာမြို့၊ မိတ္ထီလာကုန်စည်ဒိုင်တွင် ဆီထွက်သီးနှံများ၊ ပဲမျိုးစုံ သီးနှံများ၊ ဝါသီးနှံများ၊ စားဖိုဆောင်သီးနှံများ အရောင်းအဝယ်ဖြစ်လျက်ရှိကြောင်း၊ မိတ္ထီလာကုန်စည် ဒိုင်၌ ယခုဧပြီလအတွင်းဖြစ်ပေါ်နေသော ဆီထွက်သီးနှံဈေးနှုန်းများမှာ နှမ်း (ညို) တစ်တင်း လျှင် (၉၇၅၀၀) ကျပ်၊ နှမ်းဖြူတစ်တင်းလျှင် (၁၀၅၀၀၀) ကျပ်၊ နေကြာစေ့ တစ်ပိဿာလျှင် (၆၀၀၀) ကျပ်၊ နှမ်းဆီတစ်ပိဿာလျှင် (၁၆၀၀၀) ကျပ်၊ မြေပဲဆီ တစ်ပိဿာလျှင် (၁၅၀၀၀-၁၆၀၀၀) ကျပ်၊နေကြာဆီတစ်ပိဿာလျှင်(၁၆၀၀၀) ကျပ်၊ နှမ်းဖတ် တစ်ပိဿာလျှင် (၄၀၀၀) ကျပ်၊ ပဲဖတ်တစ် ပိဿာလျှင် (၄၈၀၀-၅၀၀၀) ကျပ်၊ နေကြာဖတ်တစ်ပိဿာလျှင် (၂၈၀၀-၃၀၀၀)ကျပ်၊ ယခင် ဖေဖော်ဝါရီလ အတွင်းဖြစ်ပေါ်နေသော ဆီထွက်သီးနှံဈေးနှုန်းများမှာ နှမ်း (ညို) တစ်တင်းလျှင် (၉၆၀၀၀-၉၇၀၀၀) ကျပ်၊ နှမ်းဖြူတစ်တင်းလျှင် (၁၁၀၀၀၀) ကျပ်၊ နေကြာစေ့ တစ်ပိဿာလျှင် (၆၀၀၀) ကျပ်၊ နှမ်းဆီတစ်ပိဿာလျှင် (၁၆၀၀၀) ကျပ်၊ မြေပဲဆီ တစ်ပိဿာလျှင် (၁၅၀၀၀-၁၆၀၀၀) ကျပ်၊နေကြာဆီတစ်ပိဿာလျှင်(၁၆၀၀၀) ကျပ်၊ နှမ်းဖတ် တစ်ပိဿာလျှင် (၄၅၀၀) ကျပ်၊ ပဲဖတ်တစ် ပိဿာလျှင် (၅၇၀၀) ကျပ်၊ နေကြာဖတ်တစ်ပိဿာလျှင် (၃၆၀၀)ကျပ်ဖြင့် ရောင်းဝယ်ဖြစ်လျက်ရှိပြီး ယခင်လနှင့်ယခုလကာလတူ နှိုင်းယှဉ်လျှင် ဆီထွက်သီးနှံများဖြစ်သည့် နှမ်း၊ နေကြာတို့မှာ သီးနှံပေါ်သည့် ရာသီမဟုတ်ဘဲ ဒေသတွင်း ဆီကြိတ်ခွဲမှုသာရှိသဖြင့် အရောင်းအဝယ်အေးကာ ဈေးအတက်အကျ အနည်းငယ်စီရှိပါသည်။ ပဲဖက်/နှမ်းဖက်ဈေးတို့မှာ ဈေးကွက်အတွင်း အဝယ်လိုက်သော်လည်း ပစ္စည်းအရည်သွေးပေါ်မူတည်၍ ဈေးနှုန်းကျဆင်းခြင်းဖြစ်ကြောင်း၊ ပဲဆီ။ နှမ်းဆီ၊ နေကြာဆီတို့မှာ ယခင်လဈေးနည်းတူ ဈေးငြိမ်နေကြောင်း သိရသည်။

ယခု ယခင် ဧပြီလအတွင်း ပဲမျိုးစုံစျေးကွက်တွင် ကုလားပဲ (V2) တစ်တင်းလျှင် (၇၈၀၀၀) ကျပ်၊ ထိုင်ဝမ် (၇၀၀၀၀) ကျပ်၊ ယခင် ဖေဖော်ဝါလအတွင်း ပဲမျိုးစုံစျေးကွက်တွင် ကုလားပဲ (V2) တစ်တင်းလျှင် (၇၄၀၀၀) ကျပ်၊ ထိုင်ဝမ် (၇၃၀၀၀) ကျပ်၊ စျေးရှိခဲ့ရာ ယခင်လနှင့် ယခုလကာလတူနှိုင်းယှဉ်လျှင် ကုလားပဲ (V2)စျေးမှာ တစ်တင်းလျှင် (၄၀၀၀) ကျပ်ဈေးမြင့်လာပြီး ထိုင်ဝမ်တစ်တင်းလျှင် (၃၀၀၀) ကျပ်ဝန်းကျင် ဈေးနှုန်းကျဆင်းလာကြောင်း သိရှိရပါသည်။

ယခု ယခင် ဧပြီလအတွင်း စက်မှုကုန်ကြမ်းသီးနှံဈေးကွက်တွင် ဝါတစ်ပိဿာလျှင် (၃၆၀၀) ကျပ်၊ စားဖိုဆောင်သီးနှံဈေးကွက်တွင် ငရုတ်သစ် တစ်ပိဿာလျှင်(၉၀၀၀-၁၀၀၀၀)ကျပ်၊ ကြက်သွန်နီ တစ်ပိဿာလျှင် (၁၁၀၀-၁၂၀၀) ကျပ် ၊ ယခင် ဖေဖော်ဝါရီလအတွင်း စက်မှုကုန်ကြမ်းသီးနှံဈေးကွက်တွင် ဝါတစ်ပိဿာလျှင် (၄၀၀၀) ကျပ်၊ စားဖိုဆောင်သီးနှံဈေးကွက်တွင် ငရုတ်သစ် တစ်ပိဿာလျှင်(၉၀၀၀-၁၀၀၀၀)ကျပ်၊ ကြက်သွန်နီ တစ်ပိဿာလျှင် (၂၀၀၀) ကျပ် ၊ ရှိပြီး ယခင်လနှင့်ယခုလ နှိုင်းယှဉ်လျှင် စက်မှုကုန်ကြမ်းသီးနှံဈေးကွက်တွင်ဝါတစ်ပိဿာလျှင် (၄၀၀) ကျပ် ၊ စားဖိုဆောင်သီးနှံ ဖြစ်သော ကြက်သွန်နီတစ်ပိဿာလျှင် (၈၀၀) ကျပ် ဈေးနှုန်းကျဆင်းလာကြောင်း သိရှိရပါသည်။ စက်မှုကုန်ကြမ်းသီးနှံဝါမှာ သီးနှံပေါ်သည့်ရာသီကုန်ပြီး အရည်အသွေးညံ့သည့်အတွက် ကြောင့်လည်းကောင်း၊ ကြက်သွန်နီမှာ သီးနှံထွက်ရှိမှုလှိုင်ချိန်ဖြစ်၍လည်းကောင်း ဈေးနှုန်းကျဆင်း ခြင်းဖြစ်ကြောင်း သိရပါသည်။

DOCA(မန္တလေး)

မအူပင်ဒေသထွက် တစ်ပိုင်တနိုင် ဆူးပုတ်ရွက် ဈေးကောင်း

ပြည်တွင်းကုန်သွယ်မှုသတင်း

ဧပြီနှင့် မေလကဲ့သို့ ပူပြင်းသော နွေရာသီတွင် တစ်ပိုင်တနိုင် စိုက်ပျိုးထားသော ခြံစီးရိုးနားတွင် ခြံခတ်သလို စိုက်ပျိုးထားသော ဆူးပူတ်ရွက်အပင်များ ကို ရေသွင်းစိုက်ပျိုးသည့်နည်းဖြင့် စိုက်ပျိုးကြောင်း မအူပင်မြို့ အခွန်လွတ်ဈေးတွင် ဟင်းသီးဟင်းရွက် ရောင်းချသူထံမှ သိရသည်။ မအူပင်မြို့ ရွှေတောင်ပေါ် ရေလဲ ကျေးရွာများတွင် ကျေးရွာနေ ပြည်သူများက ခြံစီးရိုးများတွင် ဆူးပုတ်ပင်ကို အများအပြားစိုက်ပျိုးထားကြကြောင်း သိရသည်။ ရေလဲ ကျေးရွာတွင် ဆူးပုတ်ပင်အရေအတွက် စုစုပေါင်း ၃၀၀ခန့် ရှိပြီး တစ်ပိုင်တစ်နိုင်ဝင်ငွေ ရရှိ၍ မအူပင်မြို့ အခွန်လွတ်ဈေးတွင် ဒေသထွက် ဆူးပုတ်ကို ရောင်းချကြောင်း သိရသည်။

ဆူးပုတ်ဝယ်ယူရောင်းချမှုအနေဖြင့် တစ်ရက်လျှင် (၅)ပင် တစ်စည်းပါအစည်းရေ (၁၅၀-၂၀၀)ခန့် ထွက်ရှိနေသည်။ ဆူးပုတ် ထွက်ရှိမှု ယခုချိန်နည်းသော်လည်း အဝင်ရှိသလောက် အရောင်းအဝယ်သွက်လျက်ရှိပြီး ဈေးနှုန်းအနေဖြင့်လည်း (၅)ပင်ပါတစ်စည်းလျှင် (၃၀၀)ကျပ် နှုန်းတို့ဖြင့် ရောင်းဝယ်လျက်ရှိသည်။ ယခင်တစ်စည်းလျှင် (၁၀၀)ကျပ်နှုန်းသာရှိခဲ့၍ ယခုကာလတွင် ဈေးမြင့်ကာ အရောင်းအဝယ်သွက်လျက်ရှိနေကြောင်း သိရှိရပါသည်။

DOCA(ဧရာဝတီ)

မအူပင်မြို့ဒေသထွက် ပဲမုန့်အမျိုးမျိုး ဈေးနှုန်း ဈေးကွက်

ပြည်တွင်းကုန်သွယ်မှုသတင်း

မအူပင်ဒေသထွက် ပဲမုန့်အမျိုးမျိုးရှိသည် မအူပင်မြို့နယ်တွင် ဒေသထွက် ပဲမုန့်များသည် အများသူငါများကို လက်ဆောင်အဖြစ်လည်းကောင်း၊ ကန်တော့ရာတွင်လည်းကောင်း လက်ဆောင်ပေးရန် သင့်တော်သော မုန့်တစ်မျိုး ဖြစ်သည်။ ထွက်ရှိ ထုတ်လုပ်သော ပဲမုန်အမှတ်တံဆိပ် အမည်များမှ ကျားပဲမုန့်၊ ကျားအငံမုန့်၊ ဓနဟိန်း ပဲမုန့်၊ ဘဲဥမုန့်၊ ကျားသစ်ပဲမုန့် ၊ MKK ပဲမုန့်၊ အစရှိသည့် မုန့်များဖြစ်ကြသည်။

ပဲမုန့်ဈေးနှုန်းအနေဖြင့် ၆-၅-၂၀၂၅ ရက်နေ့ ရောင်းချမှုဈေးနှုန်းမှာ ကျားပဲမုန့် ၁ထုတ် ၂၅၀၀ကျပ်၊ ကျားပဲမုန့်ဘူးသေး ၆ထုတ်ပါ ၁၅၀၀၀ကျပ်၊ ကျားပဲမုန့် ဘူးကြီး ၁၀ထုတ်ပါ ၂၅၀၀၀ကျပ်၊ ကျားအငံမုန့် ၁ထုတ် ၂၇၀၀ကျပ်၊ ကျားအငံဘူးသေး ၆ထုတ်ပါ ၁၆၂၀၀ကျပ်၊ ကျားအငံဘူးကြီး ၁၀ထုတ်ပါ ၂၇၀၀၀ကျပ်၊ ကျားဘဲဥမုန့် ၁ထုတ် ၂၄၀၀ကျပ်၊ ကျားဘဲဥမုန့် ဘူးသေး ၅ထုတ်ပါ ၁၂၀၀၀ကျပ်၊ ကျားဘဲဥမုန့် ဘူးကြီး ၁၀ထုတ်ပါ ၂၄၀၀၀ကျပ်၊ ကျားကိတ်မုန့် ၁ထုတ် ၄၉၀၀ကျပ်၊ ကျားကိတ်မုန့် ၁ဘူး ၃ထုတ်ပါ ၁၄၇၀၀ကျပ်၊ ကျားဖရုံယို ၁ထုတ် ၂၆၀၀ကျပ်၊ ကျားဖရုံယို ၁ဘူး ၅ထုတ်ပါ ၁၃၀၀၀ကျပ်ဖြင့် အရောင်းအဝယ်ဖြစ်နေကြောင်း သိရှိရပြီး ယခင် ဖေဖော်ဝါရီလ ဈေးနှုန်းဖြင့် နှိုင်း ယှည်ပါက မုန့်အမျိုးအစားအလိုက် တစ်ခုကို ၅၀၀ကျပ် ဈေးမြင့်လာတက်ကြောင်း သိရသည်။

DOCA(ဧရာဝတီ)

မအူပင်ဒေသထွက် ငါးချဉ် ဈေးနှုန်းဈေးကွက်

ပြည်တွင်းကုန်သွယ်မှုသတင်း

မအူပင်မြို့တွင် ငါးချဉ်ရောင်းချသူများ ရှိပြီး နေ့စဉ် တစ်နှစ်ပတ်လည်လုံး ငါးချဉ် ထွက်ရှိ၍ ရောင်းချနေကြောင်း သိရသည်။ ငါးချဉ်မှာ ငါးခုံးမချဉ်၊ ငါးဖယ်ချဉ်၊ ပုစွန်ချဉ် များကို ဒေသထွက် ငါး၊ ပုစွန် များဖြင့်သာ ပြုလုပ်ကြောင်း သိရသည်။ မြစ်ချောင်း၊ အင်းအိုင်များမှ ရရှိပြီး ဒေသတွင်း ထုတ်လုပ်သူ ငါးဖယ်ချဉ်၊ ပုစွန်ချဉ် တံဆိပ် အမျိုးမျိူးဖြင့် ဒေသတွင်းနှင့် အခြားမြို့နယ်နှင့် ရန်ကုန်သို့လည်း တင်ပို့ရောင်းချကြသည်။

၂၀၂၅ခုနှစ် မေလအတွင်း ငါးခုံးမချဉ် ၁၀သား ဈေးနှုန်း ၁၅၀၀ ကျပ်ဖြင့်လည်းကောင်း၊ ပုစွန်ချဉ် ၁၀ဆယ်သား ၁ထုတ်လျှင် ငွေကျပ် ၆၀၀၀/-ဖြင့်လည်းကောင်း ၊ ငါးဖယ်ချဉ် ၁၀သားထုတ် တစ်ထုတ်လျှင် ၅၀၀၀/-ဖြင့် အရောင်းအဝယ်ဖြစ်လျှက်ရှိသည်။ ငါးချဉ်လုပ်ငန်းများကို တစ်နိုင်တစ်ပိုင် လုပ်ကိုင်လျက်ရှိပြီး ငါးချဉ်များကို အချဉ်သိပ်ရန် ၂ရက်မှ ၅ရက်အတွင်း အချဉ်သိပ်၍ ဈေးကွက်အတွင်းရောင်းချပြီး ဆိုးဆေးမပါပဲ သဘာဝအတိုင်း ငါး၊ ပုစွန်ဖြင့်သာ ထုတ်လုပ်ကြောင်း မအူပင်မြို့အခြေပြု ထုတ်လုပ်ရောင်းချလျက်ရှိသော ပုဇွန်ချဉ် အမှတ်တံဆိပ်များတွင် (ဒေါ်နီ)ပုဇွန်ချဉ်၊ ကစ်ကစ် ပုဇွန်ချဉ်လုပ်ငန်း၊ မလွင် ပုဇွန်ချဉ် နှင့် ကျုံမငေး ကျေးရွာများမှ ငါးချဉ်လုပ်ငန်းများ လုပ်ကိုင်လျက်ရှိကြောင်း သိရသည်။

DOCA(ဧရာဝတီ)

ပုသိမ်မြို့နယ်တွင် မင်းဂွတ်သီး ဈေးကွက်အခြေအနေ

ပြည်တွင်းကုန်သွယ်မှုသတင်း

ဧရာဝတီတိုင်းဒေသကြီး၊ ပုသိမ်မြို့နယ်အတွင်း ရာသီစာသီးနှံဖြစ်သည့် မင်းဂွတ်သီးများ ဈေးကွက်သို့ အလုံးအရင်းဝင်ရောက်လျက်ရှိပြီး ဒေသခံများနှင့် အနယ်နယ်အရပ်ရပ်မှ ကုန်သည်များ အကြား အရောင်းအဝယ်စည်ကားလျက်ရှိသည်။ မင်းဂွတ်သီးဆိုတာ အရှေ့တောင်အာရှဒေသတွေမှာ ပေါက်ရောက်တွေ့ရှိရပြီး အပူပိုင်းဒေသရဲ့ ဘုရင်မလို့တောင် တင်စားရတဲ့ အသီးဖြစ်ပြီး အာဟာရ ပြည့်ဝစွာ ပါဝင်နေကာ အရသာကတော့ ချိုချိုချဉ်ချဉ်နဲ့ ရင်အေးစေတဲ့ အရသာမျိုးဖြစ်ပါတယ်။ အရသာကို ခံစားမိအောင် ပြောပြရရင် သစ်တော်သီးနဲ့ လိမ္မော်သီးတို့ ကြားထဲက အရသာမျိုး ဖြစ်ပါတယ်။ အထူးသဖြင့် ရှမ်းပြည်နယ်နှင့် မကွေးတိုင်းဒေသကြီးများမှ သယ်ယူရောင်းချကြပြီး ပုသိမ်မြို့နယ်ရှိ ဈေးများတွင် နေ့စဉ်ရောင်းချမှုများ ရှိနေသည်။

ပုသိမ်မြို့နယ်အတွင်း ရောင်းချနေသည့် မင်းဂွတ်သီးများကို အရွယ်အစားနှင့် အရည်အသွေး အလိုက် ဈေးနှုန်းသတ်မှတ်ထားပြီး တစ်လုံးလျှင် (ကြီး/လတ်/သေး) (၁၀၀၀/၇၀၀/၅၀၀) ကျပ်နှုန်း ဖြင့် ရောင်းချနေကြောင်း သိရသည်။ မင်းဂွတ်သီးကို အဓိကအားဖြင့် ဒေသခံများ၊ သစ်သီးဆိုင်များနှင့် အချိုပွဲလုပ်ငန်းရှင်များက ဝယ်ယူကြပြီး ပြည်တွင်းဈေးကွက်အပြင် နိုင်ငံခြားသို့တင်ပို့မှုများလည်း အနည်းငယ်ရှိသည်။ မင်းဂွတ်သီး၏ ကျန်းမာရေးအကျိုးကျေးဇူးများနှင့် စားသုံးမှုပုံစံမျိုးစုံကြောင့် နွေရာသီတွင် ဝယ်လိုအားပိုမိုမြင့်တက်လာသည်ဟု ဒေသခံကုန်သည်များက ဆိုသည်။ ထို့အပြင် ဒေသအလိုက် စိုက်ပျိုးထုတ်လုပ်မှုနှင့် သယ်ယူပို့ဆောင်ရေးကုန်ကျစရိတ်တို့အပေါ် မူတည်၍ ဈေးနှုန်း အနည်းငယ် ကွာခြားမှုများရှိနိုင်ကြောင်း သိရသည်။

DOCA(ဧရာဝတီ)

ပုသိမ်ခရိုင်တွင် မန်ကျည်းသီးမှည့် ဈေးကွက်အခြေအနေ

ပြည်တွင်းကုန်သွယ်မှုသတင်း

ဧရာဝတီတိုင်းဒေသကြီး၊ ပုသိမ်ခရိုင်အတွင်း မန်ကျည်းပင်များ သဘာဝအလျောက် ပေါက်ရောက် မှုများရှိပြီး ကျေးရွာနှင့် မြို့ပေါ်ရပ်ကွက်များမှ စုဆောင်းရောင်းချလျက်ရှိကြောင်း သိရသည်။ မန်ကျည်းသီးမှည့်ကို အစေ့ပါနှင့် အစေ့လွတ်ဟူ၍ နှစ်မျိုးခွဲခြားထားရာ အစေ့လွတ်မန်ကျည်းမှည့်များက ဈေးကွက်တွင် ပိုမိုဝယ်လိုအားရှိကြောင်း၊ အကြောင်းမှာ အစေ့ထုတ်ပြီး အဆင်သင့်သုံးစွဲနိုင်ခြင်း၊ အကြောသင်ခြင်း၊ ချက်ပြုတ်ရာတွင် အဆင်ပြေခြင်းတို့ကြောင့် ဖြစ်သည်။

ပုသိမ်ခရိုင်အတွင်း မန်ကျည်းသီးမှည့်ကို အဓိကအားဖြင့် ဒေသခံအကြော်ဆိုင်များ၊ အဖျော် ယမကာဆိုင်များ၊ စားသောက်ဆိုင်များနှင့် အိမ်တွင်းအသုံးပြုသူများက ဝယ်ယူလျက်ရှိသည်။ ဧပြီလ ဒုတိယပတ်အတွင်း အစေ့လွတ်မန်ကျည်းသီးမှည့်ကို တစ်ပိဿာလျှင် ကျပ် ၁၀,၀၀၀၊ (၅၀)ကျပ်သားလျှင် ကျပ် ၅,၀၀၀၊ အစေ့ပါမန်ကျည်းသီးမှည့်မှာ တစ်ပိဿာလျှင် ကျပ် ၆,၀၀၀ မှ ၅,၀၀၀ အထိ ရောင်းချနေကြောင်း ဒေသခံရောင်းချသူများထံမှ သိရသည်။

ဈေးနှုန်းကွာခြားရခြင်းမှာ အစေ့လွတ်မန်ကျည်းမှည့်အား လူကြိုက်များပြီး လုပ်အားပိုမို လိုအပ်သောကြောင့် ဖြစ်သည်။ ထို့အပြင် မန်ကျည်းသီးမှည့်ကို ဒေသအတွင်း စားသောက်ကုန်လုပ်ငန်းများတွင် အများဆုံးအသုံးပြုကြပြီး ပြည်ပသို့တင်ပို့မှုအနည်းငယ်ရှိကြောင်း ကုန်သည်များက ဖြည့်စွက် ပြောကြားသည်။

DOCA(ဧရာဝတီ)

ဧရာဝတီတိုင်းဒေသကြီး ပုသိမ်ခရိုင်တွင် နေကြာသီးနှံဈေးနှုန်း ပြောင်းလဲမှုများရှိ

ပြည်တွင်းကုန်သွယ်မှုသတင်း

ဧရာဝတီတိုင်းဒေသကြီးအတွင်း ဆီထွက်သီးနှံဖြစ်သည့် နေကြာသီးများ စိုက်ပျိုးရောင်းချမှုများ ရှိနေပြီး၊ မိုးစိုက်နှင့် ဆောင်းစိုက်ဟူ၍ ရာသီအလိုက် စိုက်ပျိုးကြကြောင်း သိရသည်။ ဆောင်းရာသီတွင် အောက်တိုဘာလမှ စတင်၍ စိုက်ပျိုးကာ ဖေဖော်ဝါရီလတွင် ရိတ်သိမ်းလေ့ရှိပြီး၊ ဒေသအတွင်း ပုသိမ်၊ ဟင်္သာတ၊ မြောင်းမြစသည့် မြို့များရှိ ကုန်စည်ပွဲရုံများမှတစ်ဆင့် ရန်ကုန်၊ မန္တလေးနှင့် အခြားမြို့ကြီးများသို့ တင်ပို့ရောင်းချလျက်ရှိသည်။

နေကြာစိုက်ပျိုးရာတွင် ဒေသအလိုက် မျိုးစေ့ရွေးချယ်မှုနှင့် စိုက်ပျိုးနည်းစနစ်ကွဲပြားမှုကြောင့် အထွက်နှုန်းလည်း ကွာခြားကြောင်း သိရသည်။ ဈေးနှုန်းအရ ဧပြီလစတုတ္ထပတ်အတွင်း နေကြာ (၁) တင်းလျှင် ကျပ် ၅၇,ဝဝဝ ဖြင့် ရောင်းချခဲ့ရာမှ မေလပထပတ်တွင် ကျပ် ၅၅,ဝဝဝ အထိ ကျဆင်း သွားကာ တစ်တင်းချင်းလျှင် ကျပ် ၁,ဝဝဝ ခန့် လျော့နည်းလာကြောင်း ဒေသခံ ကုန်သည်များက ပြောကြားသည်။

ထိုသို့ ဈေးနှုန်းအတက်အကျရှိရာတွင် ပြည်တွင်းဝယ်လိုအား၊ သယ်ယူပို့ဆောင်ရေး ကုန်ကျ စရိတ်နှင့် ရာသီဥတုအခြေအနေတို့က အဓိကလွှမ်းမိုးနေသည်ဟု ဆိုသည်။ နေကြာဆီနှင့် စားသုံးကုန် လုပ်ငန်းများအတွက် ဒေသအတွင်း ဝယ်လိုအားမြင့်မားမှုကြောင့် စိုက်ပျိုးသူများ အနေဖြင့် ဈေးကွက် အခြေအနေကို စောင့်ကြည့်လျက်ရှိကြောင်း သိရသည်။

DOCA(ဧရာဝတီ)

Languages

Main menu

ပြည်တွင်းကုန်သွယ်မှုသတင်း

“မန်းကုန်စည်ဒိုင် ဆီထွက်သီးနှံဈေးနှုန်း ဈေးကွက်”

မိတ္ထီလာကုန်စည်ဒိုင်၌ ဖြစ်ပေါ်နေသောသီးနှံဈေးနှုန်းဈေးကွက်အခြေအနေ

မအူပင်ဒေသထွက် တစ်ပိုင်တနိုင် ဆူးပုတ်ရွက် ဈေးကောင်း

မအူပင်မြို့ဒေသထွက် ပဲမုန့်အမျိုးမျိုး ဈေးနှုန်း ဈေးကွက်

မအူပင်ဒေသထွက် ငါးချဉ် ဈေးနှုန်းဈေးကွက်

ပုသိမ်မြို့နယ်တွင် မင်းဂွတ်သီး ဈေးကွက်အခြေအနေ

ပုသိမ်ခရိုင်တွင် မန်ကျည်းသီးမှည့် ဈေးကွက်အခြေအနေ

ဧရာဝတီတိုင်းဒေသကြီး ပုသိမ်ခရိုင်တွင် နေကြာသီးနှံဈေးနှုန်း ပြောင်းလဲမှုများရှိ

Pages

You are here

ပြည်တွင်းကုန်သွယ်မှုသတင်း

Pages