ပြည်တွင်းကုန်သွယ်မှုသတင်း

     မကြာခင်အချိန်တွင် ဝါလကင်းလွတ် သီတင်းကျွတ် အချိန်အခါကာလသို့ ရောက်ရှိတော့မည်ဖြစ်သဖြင့် အရောင်းရအသွက်ဆုံး ကုန်ပစ္စည်းများထဲတွင် ဖယောင်းတိုင်နှင့် ဆီမီးခွက်လည်းအပါအဝင်ဖြစ်ပါသည်။  ပြည်ဈေးကွက်တွင် အရောင်းရအသွက်ဆုံးဖယောင်းတိုင်များမှာ ဓါတု၊ ဘိုးဘိုးအောင်၊ စွမ်းအားရှင်၊ ကရဝိတ်၊ မြင်းကျား နှင့်ထွန်းလပြည့် စသည့်တံဆိပ်များမှာ အရောင်းရ အသွက်ဆုံးတံဆိပ်များဖြစ်ပါသည်။ ဖယောင်းတိုင်များမှာ အရွယ်အစား အလိုက်ဈေး အမျိုးမျိုးဖြင့်ရောင်းချလျက်ရှိရာ အသေးတစ်ထုတ်လျှင် ၃၅၀ကျပ်၊ အလတ်တစ်ထုတ်လျှင် ၇၀၀ ကျပ်၊ အကြီးတစ်ထုတ်လျှင် ၉၀၀ကျပ်ဖြင့် အသီးသီးရောင်းချလျက်ရှိပါသည်။ ဆီမီးခွက်ဈေးများမှာ ရိုးရိုးဆီမီးခွက်တစ်ခွက်လျှင် ၂၅-၃၀ကျပ်၊ အလှဆီမီးခွက် တစ်ခွက်လျှင် ၅၀-၆၀ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA(ပဲခူး)

     ပြည်ဈေးကွက်သို့ ကျောက်ဆည်၊ ဟင်္သာတနှင့် မင်းတုန်းမြို့တို့မှ နေ့စဉ်ပုံမှန်ဝင်ရောက်လျက်ရှိနေပြီး ဝယ်လိုအားကောင်းလာသဖြင့် ဈေးအနည်းငယ်မြင့်တက်လာကြောင်း တွေ့ရှိရပါသည်။ အောက်တိုဘာလဆန်းပိုင်းတွင် နနွင်းဈေးမှာ အတက်ကြီးတစ်ပိဿာလျှင် ၅၅၀၀ကျပ်၊ အတက်အသေး တစ်ပိဿာလျှင် ၄၅၀၀ကျပ်ဖြင့် ယခင် စက်တင်ဘာလ တတိယပတ်ထက်စာလျှင် တစ်ပိဿာလျှင် ၅၀၀ကျပ်ခန့် ဈေးမြင့်လာသည်ကို တွေ့ရှိရပါသည်။ ဈေးအနည်းငယ်မြင့်တက်လာရခြင်းမှာ ပွင်းလင်းရာသီရောက်ရှိလာပြီဖြစ်သည့်အတွက် နနွင်းတက်များ အဝယ်လိုက်လာခြင်းဖြစ်ကြောင်း သိရှိရပါသည်။

DOCA(ပဲခူး)

     ပြည်ဈေးကွက်အတွင်း ယခုအပတ်တွင်  မတ်ပဲသီးနှံဈေးနှုန်းများ ပြန်လည်ကျဆင်းခဲ့သောကြောင့် ပိဿာ(၂၀)တစ်တင်းလျှင် (၆)သောင်းကျပ်အောက်အထိ ဈေးလျော့သွားခဲ့ပါသည်။ အဝင်နည်းသော်လည်း လက်ကျန်ပဲများရှိခဲ့၍ ရန်ကုန်ဝယ်လက်အပေါ်မူတည်၍ တစ်ရက်အိတ် ၂၀၀/ ၃၀၀ကျော် အရောင်းအဝယ်ဖြစ်ခဲ့ပါသည်။ ယခင်လက မတ်ပဲသီးနှံဈေးနှုန်းများ တစ်တင်းလျှင် ကျပ် (၇)သောင်းနီးပါးအထိ မြင့်တက်ခဲ့သော်လည်း လှောင်ပဲသမားအချို့က ထုတ်ရောင်းချမှုမရှိဘဲ ဈေးဆက်လက် မြင့်တက်မလားမျှော်လင့်ကာ ဆက်လက်သိုလှောင်ထားခဲ့ကြသည် ကိုတွေ့ရှိရပါသည်။ ယခင်နှစ်ကလည်း အောက်တိုဘာလဆန်းရက်တွင် ပိဿာချိန် ၂၀တစ်တင်းလျှင် ကျပ် (၆)သောင်းမှ လလယ်မှစ၍ ပဲဈေးနှုန်းတစ်ဖြည်းဖြည်းလျော့လာသောကြောင့် တစ်တင်းကျပ် (၅)သောင်းအောက်အထိ လျော့နည်းသွားခဲ့ပါသည် ။  ဒါကြောင့် ယခုနှစ်ပဲဈေးနှုန်း လျော့ကျသွားသည် ဆိုသော်လည်း ယခင်နှစ်က မတ်ပဲသီးနှံဈေးထက်တော့ ဈေးပိုရလျက်ရှိခဲ့ပါသည်။ ယခုနှစ် ပဲဈေးနှုန်းသည် ငွေလဲလှယ်ဈေးနှုန်းအတက်အကျပေါ်မူတည်၍ ဈေးပြောင်းလဲကြောင်း သိရှိရပါ သည်။

DOCA(ပဲခူး)

       ပြည်ပဲဈေးကွက်၏ လက်လီပဲဈေးကွက်တွင်  ပဲသီးနှံအားလုံးလိုလိုဈေးကောင်းရနေခဲ့ပြီး ပဲနီပြားသီးနှံမှာလည်း တစ်တင်း ၅၀၀၀၀ကျပ်ဖြင့် လက်လီသာအရောင်းအဝယ်ဖြစ်လျက်ရှိပါသည် ။ တစ်ရက် အိတ် ၂၀/၃၀ ကျော် ဒေသတွင်း လက်လီသမားများဖြင့် အရောင်းအဝယ်ဖြစ်ခဲ့ကြပါသည်။ ယခုနှစ် ပဲဈေးတစ်တင်းလျှင် ၅၀၀၀၀ကျပ်ဖြင့် ဈေးကောင်းရနေသည်ဆိုသော်လည်း ယခင်နှစ်က ပဲဈေးနှုန်းထက် ဈေးလျော့နေခဲ့ကြောင်း တွေ့ရှိရပါသည်။ ယခင်နှစ်က ပဲနီပြားသီးနှံ ကာလတူ အချိန် ဈေးနှုန်းမှာ တစ်တင်း ၆၀၀၀၀ ကျပ်ဖြင့် ဈေးရခဲ့ပြီး ပဲဈေးကွက်တွင်  အခြားလက်လီပဲများ နည်းတူ ဈေးကောင်းရခဲ့သော သီးနှံဖြစ်ခဲ့ပါသည်။

DOCA(ပဲခူး)

            ပြည်ကုန်စည်ဒိုင်တွင် ပဲအမျိုးအစားအလိုက် ဈေးနှုန်းများမှာ ယခင်နှစ်ဈေးထက် ယခုလ ပဲဈေးနှုန်းမှာ ပိုကောင်းလျက်ရှိနေကြောင်း သိရှိရပါသည်။

မတ်ပဲ

          ပြည်ကုန်စည်ဒိုင်တွင် ယခင်နှစ် အောက်တိုဘာလအစတွင် ပဲတစ်တင်းလျင် (၅၀၀၀၀)ကျပ် ဖြစ်ခဲ့ပြီး ယခုနှစ်အောက်တိုဘာ ပထမပတ်တွင်  ပဲတစ်တင်းလျင် ၆၀၀၀၀-၆၀၅၀၀ကျပ်ဖြင့် အရောင်းအဝယ်ဖြစ်ခဲ့ရာ  တစ်တင်းလျင် ကျပ် (၁)သောင်းခန့်ပိုခဲ့ပါသည်။ တစ်ရက်ကို ရန်ကုန် အဝယ် ၂၀၀/၂၅၀ခန့်သာရှိပြီး အရောင်းအဝယ်အေးနေကြောင်း သိရှိရပါသည်။

ပဲစင်းငုံ

          ယခင်နှစ် အောက်တိုဘာလအစတွင် ပဲစင်းငုံဈေးတစ်တင်းလျင် ၄၃၀၀၀ကျပ်ဖြင့် တစ်ရက်ကို အိတ် ၁၅၀/၂၀၀ခန့်သာ အရောင်းအဝယ်ရှိခဲ့ပြီး ယခုနှစ် အောက်တိုဘာလအစတွင်  ပဲစင်းငုံ တစ်တင်းကို ၆၁၀၀၀ ကျပ်ရှိခဲ့ပါသည်။ ယခင်နှစ်ထက် ပဲတစ်တင်းကို ၁၈၀၀၀ကျပ်ခန့် ပိုခဲ့ပြီး အရောင်းအဝယ်ဖြစ်မှုမှာ တစ်ရက်ကိုအိတ် ၂၀၀/၃၀၀ခန့် အဝယ်ရှိခဲ့ပါသည်။

ကုလားပဲ

          ပြည်ကုန်စည်ဒိုင်တွင် ယခင်နှစ် အောက်တိုဘာလ ကုလားပဲသီးနှံဈေးနှင့် ယခုနှစ် ကုလားပဲ သီးနှံဈေးနှုန်းနှိုင်းယှဉ်ကြည့်လျင် တစ်တင်းကို ၁၅၀၀၀ကျပ်ခန့် ဈေးပိုခဲ့ကြောင်း သိရှိရပါသည်။ ယခင်နှစ်အောက်တိုဘာလတွင် ကုလားပဲ(HL)တစ်တင်းကို ၄၅၀၀၀ကျပ်ဖြစ်ခဲ့ပြီး၊ ယခုနှစ် အောက်တိုဘာလတွင် ကုလားပဲ(HL) တစ်တင်းကို ၆၀၀၀၀ကျပ်ဖြင့် အောက်တိုဘာလ အစတွင် တစ်ရက်ကို အိတ် ၂၀၀/၃၀၀ခန့် ခွဲစက်သမားများနှင့် မြို့တွင်းအဝယ်ရှိခဲ့ပါသည်။

ပဲကြီး

          ပဲကြီးသီးနှံသည် ယခင်နှစ်အောက်တိုဘာလအစတွင် ပဲကြီး(ကမ်းနား) တစ်တင်းကို ၄၂၀၀၀ ကျပ်ဖြစ်ပြီး ယခုအောက်တိုဘာအစတွင် ပဲကြီး(ကမ်းနား) တစ်တင်းကို ၇၇၀၀၀ကျပ်ဖြင့် မြို့တွင်း ပဲကြော်သမားများ အဝယ်ရှိပြီး တစ်ရက်ကိုအိတ် ၃၀၀/၄၀၀ခန့် အဝယ်ရှိခဲ့ပါသည်။ ယခင်နှစ် နှင့် နှိုင်းယှဉ်လျင် ယခုနှစ်တွင် ပဲကြီး(ကမ်းနား)တစ်တင်းကို ၃၅၀၀၀ကျပ်ခန့် ဈေးပိုရခဲ့ကြောင်း သိရပါသည်။

စားတော်ပဲ

          ယခင်နှစ် အောက်တိုဘာလအစတွင် စားတော်ပဲ(ကျွန်း)တစ်တင်းကို ၆၀၀၀၀ကျပ် ဖြင့် မြို့တွင်းအဝယ်တစ်ရက်ကို အိတ်(၁၀၀)ခန့်သာ အဝယ်ရှိပါသည်။ ယခုနှစ်အောက်တိုဘာလအစတွင် စားတော်ပဲ(ကျွန်း)တစ်တင်းကို ၁၃၀၀၀၀ ကျပ်ဖြင့် မြို့တွင်းအဝယ်ရှိခဲ့ပါသည်။ ယခင်နှစ် အောက်တို ဘာလအစနှင့် ယခုနှစ်တွင် တစ်တင်းကို ၇၀၀၀၀ကျပ်ခန့် ပိုကောင်းခဲ့ပါသည်။

ဘိုကိတ်

          ဘိုကိတ်ပဲဈေးမှာ ယခင်နှစ်အောက်တိုဘာလတွင် ပဲတစ်တင်းကို ၃၆၀၀၀ကျပ်ဖြင့် မြို့တွင်း အဝယ်ရှိခဲ့ပြီး တစ်ရက်ကိုအိတ် ၁၀၀ခန့် အရောင်းအဝယ်ဖြစ်ခဲ့ပါသည်။ ယခုနှစ်အောက်တိုဘာလ ပထမပတ်တွင် ဘိုကိတ်ပဲတစ်တင်းကို ၄၂၀၀၀ကျပ်ဖြင့် မြို့တွင်းအဝယ်နှင့် ရန်ကုန် အဝယ်ရှိခဲ့ ပါသည်။

          ပြည်ကုန်စည်ဒိုင်၏ ယခုနှစ်အရောင်းအဝယ်ဖြစ်မှုမှာ ယခင်နှစ်ကထက်ပိုကောင်းခဲ့ကြောင်း သိရှိရပါသည်။

DOCA(ပဲခူး)