ပြည်တွင်းကုန်သွယ်မှုသတင်း

       မန္တလေးတိုင်းဒေသကြီး ၊ ကျောက်ဆည်ခရိုင်အတွင်းတွင် ငှက်ပျောစိုက်ဧကမှာ ၂၀၂၂-၂၀၂၃ ဘဏ္ဍာနှစ်တွင် စုစုပေါင်းစိုက်ဧက(၂၅၃၉)ဧက စိုက်ပျိုးထားရှိပြီး ယခုလက်ရှိအချိန်ထိ ငှက်ပျော စိုက်ဧက(၄၉၄)ဧကခန့် ရိတ်သိမ်းပြီးစီးပြီဖြစ်ရာ အထွက်နှုန်းစုစုပေါင်း(၃၈၆၂၆၈)ခိုင်ထွက်ရှိကြောင်း၊ ၂၀၂၁-၂၀၂၂ ဘဏ္ဍာနှစ်တွင် ငှက်ပျောတစ်ဧက ကုန်ကျစရိတ်မှာ(၉၀၀၀၀၀/-)ကျပ်ဝန်းကျင်ခန့် ကုန်ကျပြီး ယခုနှစ် ၂၀၂၂-၂၀၂၃ဘဏ္ဍာနှစ်တွင် ငှက်ပျောတစ်ဧက ကုန်ကျစရိတ်မှာ(၁၅၀၀၀၀၀/-) ကျပ်ဝန်းကျင်ခန့်ကုန်ကျကြောင်း ၊ ယခင်နှစ် ငှက်ပျောစျေးနှုန်းများအနေဖြင့် အခိုင်(၄၀)ပါ လှည်းတစ်စီးလျှင်(၁၄၀၀၀၀/-)ကျပ်စျေးရရှိပြီး ယခုနှစ်အနေဖြင့် အခိုင်(၄၀)ပါ လှည်းတစ်စီးလျှင် (၂၄၀၀၀၀/-)ကျပ်အထိစျေးနှုန်းများရရှိလျှက်ရှိရာ ယခင်နှစ်ထက်စျေးကောင်းရရှိသဖြင့် တောင်သူ များတွက်ခြေကိုက်လျှက်ရှိကြောင်း ငှက်ပျောသီးစားသုံးသောပြည်သူများအနေဖြင့် ငှက်ပျောသီး ဖီးကြမ်းလက်ရင်းတစ်ဖီးလျှင်(၇၀၀/-)ကျပ်မှ(၈၀၀/-)ကျပ်အထိဝယ်ယူရကြောင်း၊ လက်ဖျားတစ်ဖီး လျှင်(၄၀၀/-)ကျပ်မှ(၅၀၀/-)ကျပ်အထိဝယ်ယူရကြောင်း ၊ ယခင်နှစ်ထက်စျေးကောင်းရနေသော ဖီးကြမ်းငှက်ပျောသီးများအပြင်သီးမွှေးငှက်ပျောတစ်ဖီးလျှင်(၅၅၀/-)ကျပ်၊ရွှေနီငှက်ပျောတစ်ဖီးလျှင် (၃၅၀၀/-)ကျပ်၊ရခိုင်ငှက်ပျောတစ်ဖီးလျှင်(၄၀၀/-)ကျပ်နှင့်ဘရာဇီးငှက်ပျောတစ်ဖီးလျှင်(၁၅၀၀/-) ကျပ်တို့ဖြင့် စျေးကွက်အတွင်းအရောင်းအဝယ်ဖြစ်လျှက်ရှိကြောင်း သိရှိရပါသည်။

DOCA(မန္တလေး)

          ပဲခူးတိုင်းဒေသကြီးသည် စိုက်ပျိုးရေးကို အဓိကထားသော တိုင်းတစ်တိုင်းဖြစ်သည်နှင့်အမျှ မြစ်ချောင်း အင်းအိုင်ပေါများသောကြောင့် ရေထွက်ပစ္စည်းများဖြစ်သော ငါးပိ၊ ငါးချဉ်၊ ငါးခြောက်များ လည်းထွက်သည့်အနက် ပဲခူး ဒေသထွက် ငါးရံ့ခြောက်သည် နာမည်ကြီးလှပေသည်။ ပဲခူးဒေသထွက် ငါးရံ့ခြောက်သည် ဆားပေါ့၍ အပေါ့ခြောက် ဖြစ်သည့်အတွက် လူကြီး၊ လူငယ်၊ ကလေး၊ သွေးတိုး၊ ဆီးချိုသမားပါမကျန် စားသုံးနိုင်သောကြောင့် လူကြီးများအား လက်ဆောင်ပေးခြင်းအတွက်သော် လည်းကောင်း၊ ကိုယ်တိုင်စားသုံးရန်အတွက်သော်လည်းကောင်း၊ ဝယ်ယူလျက်ရှိကြပါသည်။

        ငါးရံ့ခြောက်ပြုလုပ်ရာတွင် ငါးရံများကို ပဲခူးမြို့နယ်၊ ဒိုက်ဦးမြို့နယ်၊ ဝေါမြို့နယ်၊ သနပ်ပင် မြို့နယ်များရှိ ရေချိုအင်းအိုင်များမှ အများဆုံးရရှိလျက်ရှိပြီး ရရှိလာသော ငါးရံ့များကို အကြေးထိုး၊ ခေါင်းဖြတ်၊ ဗိုက်ခွဲ အူထုတ်ပြီး ခွဲသည့်အခါ ပုံကျအောင် စနစ်တကျခွဲရသည်။  ခွဲပြီးသော ငါးရံ့များကို ငါးရံ့အစိမ်း အချိန် (၁၀၀)လျှင် ဆား ၃ ပိဿာ ၅၀ နှုန်းဖြင့် နှပ်ပြီး တစ်ညစိမ်ရကာ မနက် ရောက်လျင် ရေစင်အောင် လေးထပ်လောက်ဆေးပြီး နေလှမ်းရပါသည်။ နေလှမ်းသည့်အခါတွင် နွေတွင်း ဆိုလျှင် နှစ်ရက်လောက်ဖြင့် ခြောက်ပြီး ဆောင်တွင်းနှင့် မိုးတွင်းဆိုလျှင် မီးအပူဖြင့် ကျတ်တင်၍ ခြောက်အောင် လှမ်းရပါသည်။

        ငါးရံ့ခြောက်ပြုလုပ်ရာတွင် ငါးရံအစို တစ်ပိဿာကို ၁၆၀၀၀ ကျပ်မှ  ၁၈၀၀၀ ကျပ်အထိ အကောင်၊ အကြီး၊ အသေးပေါ်မူတည်၍ ဝယ်ယူရပြီး အဆိုပါ ငါးအစိုတစ်ပိဿာကို ခွဲခြမ်းပြီး နေလှန်း ရာတွင် ငါးခြောက်အဖြစ် ၂၅ ကျပ်သားမှ ၃၀ ကျပ်သားခန့် ထွက်ရှိပါသည်။  ငါးရံ့ခြောက် ထုတ်လုပ်သူများအနေဖြင့် ငါးရံ့အစိုတစ်ပိဿာကို အခြောက်ပြုလုပ်ရာတွင် ခန့်မှန်းကျပ်ကျငွေ ၃၀၀၀၀ ကျပ်ဖြစ်ပြီး ငါးရံ့ခြောက်တစ်ပိဿာကို ၅၅၀၀၀ ကျပ်မှ ၆၀၀၀၀ ကျပ်ဈေးအထိ ရောင်းချလျက်ရှိပါ သည်။ ပဲခူးဒေသထွက် ငါးရံ့ခြောက်များကို နယ်ဘက်များအပြင် ရန်ကုန်၊ မန္တလေး၊ နေပြည်တော် ၊ လွိုင်ကော် စသည့် ဒေသများအထိ ဖြန့်ဖြူးရောင်းချလျက်ရှိကြောင်း သိရှိရပါသည်။

DOCA(ပဲခူး)

         သာယာဝတီခရိုင် ၊ ကြို့ပင်ကောက်မြို့နယ် ၊ ဖုန်းဆိုးစုအုပ်စု ၊ ဒန့်ဒလွန်ကွင်းကျေးရွာသို့ ၁၁.၁၀.၂၀၂၂ ရက်နေ့ ၊ နေ့လယ် ၁ : ၀၀ နာရီအချိန်တွင် စားသုံးသူရေးရာဦးစီးဌာန ၊ မြို့နယ်တာဝန်ခံ ဒေါ်ရီရီရှိန်နှင့် ဝန်ထမ်းများသည် မိုးစပါး ကောက်စောစပါးများ ရိတ်သိမ်း ခြွေလှေ့နေသော တောင်သူ ဦးကျော်ဝင်းပါ (၃)ဦး၏ လယ်ကွင်းသို့ သွားရောက်မေးမြန်းခဲ့ပါသည်။

       ထို့သို့မေးမြန်းရာ လယ်သမားတစ်ဦးလျင် ၃ ဧက ၊ ၅ဧကစီ စိုက်ပျိုးထားကြောင်းနှင့် ရိတ်သိမ်း နေသော စပါးများမှာ မှော်ဘီ ၃ ၊ ရတနာတိုး စပါးအမျိုးအစားများကို ရိတ်သိမ်းကြောင်း ၊ တစ်ဧကလျှင် စပါးတင်း (၈၀)ခန့် ထွက်ရှိပါသည်။ အစိုဓာတ် ၂၆% ရှိပြီး ကွင်းအ‌ရောက်ပေါက်ဈေး ၅၀ပေါင်တင်း ၁၀၀လျှင် ၈၈၀၀၀ဝိ-/ ကျပ် ၊ ၄၆ပေါင် တင်း၁၀၀လျှင် ၈၀၉၆၀ဝိ/ကျပ်ဈေး ရရှိပါသည်။ ရိတ်ခြွေစက်ငှားခ တစ်ဧကလျှင် ၈၀၀၀ဝိ-/ကျပ်နှင့် လုပ်သားခ စပါးတင်း ၄၀ တစ်ခေါက်လျှင် လုပ်သားခ ၄၀၀ဝိ-/ကျပ်မှ ၅၀၀ဝိ-/ ကျပ် ပေးရပါသည်။ ရိတ်ခြွေစက်၏ ဆီဂါလံကုန်ကျမှုမှာ တစ်နာရီလျှင် ဆီနှစ်ဂါလံခွဲနှင့် စက်မောင်းပြီး ရိတ်ခြွေရကြောင်း သိရှိရပါသည်။          

       ကြို့ပင်ကောက်မြို့ပေါ်တွင် ယခင်အပတ် စက်အရောက်ပေါက်ဈေး စပါးအစို ၂၅ % နှင့် ပေါင် ၅၀ တင်း၁၀၀လျှင် ဆယ်သိန်းနှင့် ဝယ်ယူပြီး ယခုအပတ်တွင် စပါးတင်း ပေါင် ၅၀ တင်း၁၀၀လျှင် ကိုးသိန်းခွဲ ဈေးဖြင့်သာ ဝယ်ယူလျက်ရှိကြောင်း သိရှိရပါသည်။

DOCA(ပဲခူး)

       သြဂုတ်လ ပထမပတ်တွင် ဒိုက်ဦးမြို့နယ်ရှိ အခြေခံစားသောက်ကုန်များဖြစ်သော  ကြက်သွန်နီ ၊ ချင်း ၊ နနွင်းဈေးများ အနည်းငယ်ကျင်းဆင်းသွားကြောင်း သိရှိရပါသည်။

       စက်တင်ဘာလစတုတ္ထပတ်တွင် ကြက်သွန်နီ တစ်ပိဿာလျှင် ၃၈၀၀ ကျပ်ဖြင့် အ‌ရောင်းအဝယ် ဖြစ်ခဲ့ပြီး ယခု အောက်တိုဘာလ ပထမပတ်တွင် ကြက်သွန်နီ တစ်ပိဿာလျှင် ၃၅၀၀ ကျပ်ဖြင့် ယခင် အပတ်ကထက် ၃၀၀ကျဆင်းသွားကြောင်း သိရှိရပါသည်။

      အခြေခံစားသောက်ကုန်များအနေဖြင့် သြဂုတ်လ ပထမပတ်တွင် ပဲ( ကုလားပဲခြမ်း) တစ်ပိဿာ လျှင် ၅၀၀၀ကျပ် ၊ ငြုပ်သီးခြောက် တစ်ပိဿာလျှင် ၅၀၀၀ကျပ် ၊ ချင်းတစ်ပိဿာလျှင် ၄၀၀၀ကျပ် ၊ နနွင်းတစ်ပိဿာလျှင် ၈၀၀၀ကျပ် ၊ မန်ကျည်းမှည့် တစ်ပိဿာလျှင် ၅၀၀၀ကျပ် ၊ လက်ဖက် ခြောက်တစ်ပိဿာလျှင် ၈၀၀၀ကျပ် တို့ဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

      စားသုံးဆီအနေဖြင့် မြေပဲဆီ တစ်ပိဿာလျှင် ၁၈၀၀၀ကျပ် ၊ နှမ်းဆီတစ်ပိဿာလျှင် ၁၃၀၀၀ ကျပ် ၊ စားအုန်းဆီ တစ်ပိဿာလျှင် ၇၀၀၀ကျပ်တို့ဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ပဲခူး)

        ပြည်ခရိုင်၊ ရွှေတောင်မြို့နယ်၊ မီးလောင်အုပ်စု၊ ကျောက်အိုးရွာတွင် ဘူးသီးများစိုက်ပျိုးထား ရှိပါသည်။

      မြန်မာလူမျိုးများသည် ဘူးသီး၊ ဘူးရွက်၊ ဘူးညွှန့်တို့ကို ချက်ပြုတ်စားသောက်ကြသလို ဘူးသီးကို ဆန်မှုန့်များဖြင့် ဘူးသီးကြော်၍ စားသုံးကြပါသည်။ ရွှေတောင်မြို့နယ်၊ မီးလောင်အုပ်စု၊ ကျောက်အိုးရွာတွင် ခြံဝင်းများ၊ အိမ်ယာများတွင် စင်ထိုး၍စိုက်ပျိုးကြပါသည်။ ဘူးပင်ကို မိုးရာသီ တွင် စိုက်ပျိုးကြသလို ဆောင်းရာသီတွင်လည်း ရေသွင်း၍ စိုက်ပျိုးပါသည်။ ဘူးသီးကိုစိုက်ပျိုးပြီး နောက် (၄၅) ရက်အကြာတွင် စတင်ဆွတ်ခူးနိုင်ပါသည်။ ရွှေတောင်မြို့နယ်တွင် စိုက်ပျိုးသော ဘူးသီးအမျိုးအစားမှာ မက်တိုဘူးသီးမျိုးဖြစ်ပြီး ဘူးစင်တစ်စင်လျင် အများဆုံးအလုံး(၁၀၀) ခန့် ထွက်ရှိပြီး အနည်းဆုံးအလုံး(၆၀)ထိ သီးကြောင်းသိရှိရပါသည်။ မက်တိုဘူးသီးမျိုးမှာ အခေါင်းပွ မရှိဘဲ အလေးချိန်စီးသောကြောင့် စိုက်ပျိုးသူများကြောင်း သိရှိရပါသည်။ ထွက်ရှိလာသော ဘူးသီး များကို ကျောက်အိုးကျေးရွာရှိ ကုန်စိမ်းဒိုင်သို့ သွားရောက်၍ ရောင်းချကြောင်း သိရှိရပါသည်။ ဘူးသီးဈေးနှုန်းများမှာ လက်ကား တစ်လုံးလျင် (၅၀၀) ကျပ်ရရှိပြီး လက်လီတစ်လုံးကျပ် (၆၀၀) ကျပ်ခန့် ရရှိသည်ဟု သိရှိရပါသည်။

      ရွှေတောင်ဒေသထွက် စိုက်ပျိုးသော မက်တိုဘူးသီးမျိုးမှာ အခေါင်းမပွဘဲ စားသုံးသူများ လည်း ကြိုက်နှစ်သက်၍ စိုက်ပျိုးသူများသလို ဈေးနှုန်းလည်းကောင်းသဖြင့် တိုးချဲ့စိုက်ပျိုးသင့်ကြောင်း လေ့လာတင်ပြအပ်ပါသည်။

DOCA(ပဲခူး)