ပြည်တွင်းကုန်သွယ်မှုသတင်း

           စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်း/ခရိုင်ဦးစီးမှူးတို့၏ လမ်းညွှန်ချက်ဖြင့် ပခုက္ကူခရိုင်ဦးစီးမှူးရုံးမှ ပေါက်မြို့နယ် တာဝန်ခံ  ဒု-ဦးစီးမှူး ဦးကျော်စိုးသည် (၁၄.၃.၂၀၂၂)ရက်နေ့၊ နံနက်(၉:၀၀)နာရီ အချိန်တွင် ပြည်တွင်းကုန်သွယ်မှုဖွံ့ဖြိုးတိုးတတ်စေရေးအတွက် ပေါက်မြို့နယ်၊ မြောက်ဘက်ကျေးရွာရှိ ဆောင်းသီးနှံအာလူးစိုက် တောင်သူဦးကျော်ဆန်းညွန့်နှင့်တွေ့ဆုံ၍  အာလူးစိုက်ပျိုးထွက်ရှိမှု အခြေအနေများအား ကွင်းဆင်းလေ့လာမေးမြန်းခဲ့ပါသည်။

          ပေါက်မြို့နယ်အနေဖြင့် စိုက်ပျိုးရေးကို အဓိကထားလုပ်ကိုင်ရာ နှစ်စဉ်ဆောင်းသီးနှံအာလူးကိုလည်း စိုက်ပျိုးကြကြောင်း၊ ၂၀၂၀-၂၀၂၁ ဘဏ္ဍာနှစ်တွင် အာလူးစိုက်ဧက(၂၀၀၀)ဝန်းကျင်ခန့် စိုက်ပျိုးခဲ့ပြီး ယခု၂၀၂၁-၂၀၂၂ဘဏ္ဍာနှစ်တွင် အားလူးစိုက်ပျိုးရန်အတွက်  ရင်းနှီးမတည်ငွေများပြား သည့်အတွက် အာလူးစိုက်တောင်သူများအနေဖြင့် ယခင်နှစ်စိုက်ဧကထက် လျော့နည်းစိုက်ပျိုးခဲ့ရာ ၂၀%ခန့်အထိလျော့နည်းသွားကြောင်း၊ အာလူးကို ပေါက်မြို့နယ်  ကျောချောင်းနံဘေးရှိသဲမြေများတွင် အများဆုံးစိုက်ပျိုးကြကြောင်း၊ ယခင်နှစ်များတွင် စိုက်ပျိုးရန်အတွက်  စိုက်ပျိုးမြေနေရာ ကိုငွေကြေးဖြင့် ဝယ်ယူရပြီး (၁)ဧကလျှင် (၁၀)ပေပတ်လည်ကျင်း(၂၀၀)ခန့်ပါရှိကြောင်း၊ (၁)ကျင်းလျှင်(၁)သောင်းကျပ်၊ (၁)ဧကလျှင်(၂)သိန်းကျပ်ခန့် ပေးဝယ်ခဲ့ရကြောင်း၊  သို့သော် ယခုနှစ်တွင် စိုက်ပျိုးတောင်သူဦးရေနည်းပါးခြင်းကြောင့် မြေများဝယ်ယူရန်မလိုဘဲ စိုက်ပျိုးရကြောင်း သိရှိရပါ သည်။

          မြောက်ဘက်ကျေးရွာတွင် အိမ်ခြေ(၇၀၀)ခန့်ရှိပြီး အာလူးစိုက်တောင်သူဦးရေ (၅၀)ခန့်ရှိ၍ ဧက(၁၀၀)ခန့် စိုက်ပျိုးထားရှိကြောင်း၊ ယခုနှစ်တွင် တောင်သူ ဦးကျော်ဆန်းညွန့်မှာ (၁)ဧကခန့် စိုက်ပျိုးထားရှိပြီး မျိုးအနေဖြင့် ဘဲဥပုံအာလူး(လုံးကြီး) ရှမ်းပြည်အောင်ပန်းမျိုးကို ဝယ်ယူစိုက်ပျိုး ကြောင်း၊ မျိုး(၁)ပိဿာလျှင်(၂၀၀၀)ကျပ် ဈေးနှုန်းရှိပြီး (၁၀)ပေပတ်လည် (၁)ကျင်းလျှင် အာလူး (၃၅)ကျပ်သားစိုက်ပျိုးရကြောင်း၊ (၁)ဧကကျင်း(၂၀၀)အတွက် ပိဿာ(၇၀၀)ခန့် ဝယ်ယူသုံးစွဲရသည့်အတွက် မျိုးဝယ်ယူခမှာ(၁)ဧကကို (၁၄)သိန်းကျပ်ခန့် ကုန်ကျကြောင်း သိရှိရပါသည်။

         အာလူးမျိုးများဝယ်ယူပြီး မိမိတို့နေအိမ်အတွင်း သဲပြင်ပေါ်တွင် တစ်ပုံတည်းစုပုံပြီး စောင်ဖြင့်အုပ်ထားရကြောင်း၊ (၅)ရက်ခန့်အကြာတွင် အာလူးမျက်နှာပြင်တွင် မျက်ကွက်အပေါက်များပေါ်လာပြီး အညှောင့်ပေါက်လေးများထွက်လာချိန်တွင် အပုတ်အပဲ့အာလူးများအား ရွေးချယ်ဖယ်ရှားပြီးလျှင်  ကျန်အာလူးများပေါ်တွင် ထွက်ရှိလာသော မျက်ကွက်အညှောင့်ပေါက်လေးများကို ဓားဖြင့် လှီးထုတ်၍ စိုက်ပျိုးရာ အလုပ်သမား (၁၀)ဦးခန့် ငှားရမ်းအသုံးပြုရကြောင်း သိရှိရပါသည်။

           ဆောင်းသီးနှံအာလူးကို ဒီဇင်ဘာလဆန်းပိုင်းတွင် စတင်စိုက်ပျိုးပြီး အာလူး(၁)လုံးလျှင် အပင်ပေါက်မျက်ကွက်များ အပေါ်မူတည်ပြီး (၂/၄)စိပ်ခန့် စိုက်ပျိုးရကြောင်း၊ စိုက်ပျိုးချိန်မှ စတင်ပြီး တူးဖော်ချိန်အထိ (၃)လခန့် ကြာမြင့်ကြောင်း၊  ကျောချောင်းနံဘေးတွင်  စိုက်ပျိုးရသောကြောင့်ရေအစိုဓါတ် အနည်းအများပေါ်မူတည်၍ ရေသွင်းပေးရကြောင်း၊ ယခုနှစ်တွင် ရေ(၁)ကြိမ်သာ ပေးသွင်းရကြောင်း၊ ရေမသွင်းမှီ သွင်းအားစုမြေဆီအာမို(၃)အိတ်ခန့်ကို (၁)ဧကအတွက်သုံးစွဲကြောင်း၊  စိုက်ပျိုးပင်သက်တမ်း(၃) လခန့်အကြာ ဖေဖော်ဝါရီလကုန်တွင် အာလူးများ စတင်တူးဖော်ကြောင်း၊ အထွက်နှုန်းအနေဖြင့် သွင်းအားစုအမျိုးမျိုးသုံးစွဲပုံ မတူညီခြင်း၊ မျိုးဝယ်ယူမှုအနေအထားကွာခြားခြင်း၊ စိုက်ပျိုးရာသီမတူညီခြင်းတို့ကြောင့် အထွက်နှုန်းများ အမျိုးမျိုးကွဲပြား၍ (၁)ဧကလျှင် ပိဿာ(၃၀၀၀)မှ(၆၀၀၀)အထိ ကွဲပြားထွက်ရှိကြောင်း၊ ယခုနှစ်တွင် ရှမ်းပြည်တောင်ပိုင်းမှ ဘဲဥပုံ အလုံးကြီး အာလူးမျိုးကောင်းမျိုးသန့်များကို ဝယ်ယူစိုက်ပျိုးခဲ့၍ (၁)ဧကလျှင် ပိဿာ (၆၀၀၀)ခန့်ထွက်ရှိပြီး ယခုနှစ်အထွက်နှုန်းမှာ ယခင်နှစ် ထက်ကောင်းမွန်ကြောင်း၊ ဈေးနှုန်း ဈေးကွက်အနေဖြင့် ယခုအာလူးဖော်စအချိန်တွင် လက်လီ(၁) ပိဿာ(၂၀၀၀)၊ လက်ကား (၁)ပိဿာ(၁၅၀၀)ကျပ် ဈေးနှုန်းရှိကြောင်း၊ ယခင်နှစ် လက်လီ(၁) ပိဿာ (၁၄၀၀)၊ လက်ကား (၁)ပိဿာ(၁၀၀၀)ကျပ် ဈေးနှုန်းများရှိခဲ့ကြောင်း၊ မျိုးကောင်းမျိုးသန့် ဝယ်ယူစိုက်ပျိုးခြင်းကြောင့် ထွက်ရှိသော အာလူးများမှာ အလုံးသေးများ နည်းပါးပြီး ဘဲဥပုံအာလူး အလုံးကြီးများ အများဆုံး ထွက်ရှိ၍  အထွက်ကောင်းပြီး ဈေးကောင်းရရှိကြောင်း၊ မြောက်ဘက်ကျေးရွာမှ ထွက်ရှိသော အာလူးများကို ပေါက်မြို့ပေါ်ရှိ ဈေးကြီးအတွင်းသို့ တင်ပို့ရောင်းချကြောင်း သိရှိရပါသည်။

          ဆောင်းသီးနှံအာလူး(၁)ဧကကုန်ကျစရိတ်မှာ (၃၅)သိန်းကျပ်ခန့်  ကုန်ကျပြီး ဝင်ငွေအနေဖြင့် ကျပ် သိန်း(၉၀)ခန့် ရရှိ၍ (၁)ဧကအကျိုးအမြတ်မှာ ငွေကျပ်သိန်း(၅၀)ခန့် ရရှိကြောင်း၊ အာလူးစိုက် တောင်သူဦးကျော်ဆန်းညွန့်၏ ပြောကြားချက်အရ သိရှိရပါသည်။    

          ဆောင်းသီးနှံအာလူးမှာ အရသာထူးကဲလှပြီး ကောင်းမွန်၍ စားသုံးသူများပြားကြောင်း၊ ကျန်းမာရေးအနေဖြင့်လည်း ဆေးဘက်ဝင်ပစ္စည်းအဖြစ် အသုံးပြုရသော သီးနှံတစ်မျိုးဖြစ်ပြီး ပြည်တွင်းသုံးစွဲမှုအနေဖြင့်လည်း များပြားကြောင်း၊ ပရိုတိန်းဓါတ်ပါဝင်မှုများသည့်အတွက် မိသားစုများအခြေခံစားကုန်အဖြစ်သုံးစွဲခြင်း၊ မုန့်မျိုးစုံပြုလုပ်ခြင်း၊ လုပ်ငန်းရှင်များအနေဖြင့်လည်း အာလူးခြောက်၊ အာလူးကြော်မျိုးစုံ ထုတ်လုပ်ရောင်းချခြင်းများရှိ၍ ပြည်တွင်းရှိ အလုပ်သမားများ အလုပ်အကိုင်အခွင့် အလမ်းများစွာရရှိပြီးယခုနှစ်အထွက်နှုန်းကောင်းမွန်ပြီး ဈေးကောင်းရရှိသောကြောင့် စိုက်တောင်သူများအတွက် တွက်ချေကိုက်၍ ဆောင်းသီးနှံအာလူးကို ချောင်းရိုးတစ်လျှောက် နှစ်စဉ်မပျက် တိုးချဲ့ စိုက်ပျိုးသင့်ပါကြောင်း သုံးသပ်တင်ပြလိုက်ရပါသည်။

DOCA(မကွေး)

စားသုံးဆီတင်သွင်း သိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီ၏ အပတ်စဉ် ရည်ညွှန်းဈေးနှုန်း(၂၁.၃.၂၀၂၂ ရက်နေ့မှ  ၂၇.၃.၂၀၂၂) ရက်နေ့အထိ) အား အောက်ပါ .pdf file တွင် ဝင်ရောက်ကြည့်ရှုနိုင်ပါသည်-

        အစေ့ထုတ်ပြောင်းသည် ကယားပြည်နယ်၏ အဓိကဝင်ငွေရ စိုက်ပျိုးသီးနှံတစ်ခုဖြစ်ပြီး နှစ်စဉ် အခြားဒေသသို့ ပြောင်းတင်ပို့မှုများရှိခဲ့သဖြင့် ၂၀၂၂ ခုနှစ်၊ ဇန်နဝါရီလနှင့် ဖေဖော်ဝါရီလများတွင် လမ်းပန်းဆက်သွယ်ရေး အခက်အခဲများကြောင့် ပြောင်းတင်ပို့မှု အနည်းငယ်သာရှိခဲ့၍ ယခုမတ်လ တတိယပတ်အတွင်း ပြောင်းတင်ပို့မှုများမှာ (၆၉၃၀)အိတ်၊ (၃၃၉)တန် တင်ပို့ခဲ့ပြီး ယခင်မတ်လ ဒုတိယပတ်အတွင်း ပြောင်းတင်ပို့မှုမှာ (၃၁၂၀)အိတ်၊ (၁၅၂)တန် တင်ပို့နိုင်ခဲ့ကြောင်း၊ ယခင်အပတ်နှင့် ယခုအပတ် ပြောင်းတင်ပို့မှုကို နှိုင်းယှဉ်ကြည့်လျှင် (၃၈၁၀)အိတ်၊ (၁၈၆)တန် ပိုမိုတင်ပို့နိုင်ခဲ့ကြောင်း၊ ပြောင်းသည် မြဝတီမြို့သို့ အများဆုံးတင်ပို့ခဲ့ကြောင်း မြို့ဦးဂိတ်စာရင်းများအရ သိရှိရပါတယ်။

စားသုံးသူရေးရာဦးစီးဌာန ကယားပြည်နယ်

          ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ သာယာဝတီခရိုင်ဦးစီးမှူးနှင့် ဌာနခွဲတာဝန်ခံများသည် သကြားမုန်လာဉလုပ်ငန်းရှင်များနှင့်အတူ ၂၀၂၂ ခုနှစ် ဖေဖော်ဝါရီလ နောက်ဆုံးအပတ်တွင် သာယာဝတီခရိုင်၊ ဇီးကုန်းမြို့နယ် ကန္တလီကျေးရွာတွင် သကြားမုန်လာဉစိုက်ပျိုးနေသည့် ဦးဇော်လင်းနှင့် သွားရောက်တွေ့ဆုံ၍ သကြား မုန်လာစိုက်ပျိုးထွက်ရှိမှု ၊ တွက်ခြေကိုက်မှု အခြေအနေများအား လေ့လာခဲ့ပါသည်။

          လုပ်ငန်းရှင်မှ မျိူးစေ့ထုတ်ပေးခြင်း၊ ထွက်ရှိပစ္စည်းများအား ဈေးကွက်ချိတ်ဆက်ပေးခြင်း၊ စိုက်ပျိုးပင်များအတွက် လိုအပ်သော ဆေးများအား လမ်းညွှန်ဆောင်ရွက်ပေးမှုများ ပြုလုပ်ခဲ့ပြီး တောင်သူတစ်ဦးလျှင် ယခင်နှစ်တွင် (၂) ကျိုးစိုက် ပါက အကျိုးအမြတ် သိန်း ၅၀ ခန့်ရရှိကြောင်း သိရှိရပါသည်။ သကြားမုန်လာစိုက်ပျိုးရန် မျိုးစေ့အား ပျိုးခုံပြုလုပ်၍ ပျိုးပင်ရက် (၂၀၅) ရက်ခန့်တွင် စိုက်ပျိုးပြီး ဘောင်အကျယ် (၃) တောင်ခန့်အကွာတွင် ပင်ခြားတစ်ထွာခန့် စိုက်ပျိုး၍ မိုးအကုန် ဆောင်းဦးပေါက် အောက်တိုဘာ၊ နိုဝင်ဘာလောက်တွင် စိုက်ပျိုးကြပြီး ဉများ ရောင်းတန်းဝင် သက်တမ်း ကာလ (၃-၄) လခန့်သာ ကြာမြင့်ပါသည်။ ပေါင်းလိုက်၊ မြေဘောင်အတွက် (၃) ကြိမ်ခန့်သာ ပြုလုပ်ရသည်။ သကြားမုန်လာဉ လေ့လာတွေ့ရှိချက်များ အရပါဝင်ပစ္စည်းများမှာ သံဓာတ်၊ ဘီသိန်းခေါ် (Antioxidant) ဓာတ်များပါဝင်နေပြီး ဘီသိန်းဓာတ်မှာ ဆဲလ်များဖြစ်တည်မှုကို အားကောင်းစေပြီး အဆိပ်အတောက်များကို ဖယ်ရှားရာတွင် အဓိကကျသော အသည်းအတွင်းရှိ ဆဲလ်များကို ပြန်လည်သန်စွမ်းလာစေပါသည်။ သကြားမုန်လာဉအား အခွံမခွာဘဲ ပေါင်းပြီး၊ ပြုတ်ပြီးစားသုံးခြင်း၊ တခါတရံ အစိမ်းစားသုံးခြင်းများ ရှိပါသည်။ ကိုယ်ခံအားကို တိုးပွားစေပြီး သွေးတိုးမှုနှုန်းကို လျော့ချစေပါသည်။ ဈေးနှုန်းအရ ယခုနှစ်တွင် တစ်ကီလိုလျှင် (၂၀၀၀) ကျပ် အရည်အသွေးပေါ်မူတည်၍ ဈေးရရှိပြီး တစ်ကီလိုတွင် ပျမ်းမျှ (၃) လုံးခန့်ရှိသည်။ ဈေးကွက်လိုအပ်မှု အရသာလိုသလောက် စိုက်ခင်းသို့ ချိတ်ဆက်ဝယ်ယူဖြန့်ဖြူးလျက်ရှိကြောင်း သိရှိရပြီး ဒေသခံ စိုက်ပျိုးထုတ်လုပ်သူ တောင်သူများမှ အကျိုးအမြတ်ရှိ၍ စိုက်ပျိုးရန် ဆန္ဒရှိသော်လည်း ဈေးကွက် အနေအထားအရ လက်ရှိစိုက်ပျိုးသူမှ လမ်းညွှန်မှု  အားနည်းနေသဖြင့် မြို့နယ် အနေအထား အရ ဒေသခံ စိုက်ပျိုးသူ တောင်သူ (၂) ဦးသာရှိသည်။ သကြားမုန်လာဉ၏ အသုံးဝင်ပုံများကို စိုက်ပျိုးထုတ်လုပ်သူ များနှင့် ကုန်ချောထုတ်သူများ ကျယ်ကျယ်ပြန့်ပြန့် ဖြန့်ဖြူးရောင်းဝယ်မှု ချိတ်ဆက်နိုင်လျှင် အကျိုးအမြတ်များ ရရှိနိုင်ကြောင်း သိရှိရပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)

           မြန်မာနိုင်ငံတွင်မှီတင်းနေထိုင်ကြသော တိုင်းရင်းသားလူမျိုးများစွာ ရှိကြသည်။ ထိုတိုင်းရင်းသားလူမျိုးများတွင် မိဘဘိုးဘွားများလက်ထက်ကတည်းက လက်ဆင့်ကမ်းသယ်ဆောင်လာသော ရိုးရာလက်မှုပညာများစွာရှိခဲ့ကြသည်။ ထိုသို့လက်ဆင့်ကမ်းသယ်ဆောင်လာသော ရိုးရာလက်မှု ပညာများထဲတွင် သင်ဖြူးဖျာယက်လုပ်သော ပညာသည်လည်း တစ်ခုအပါအဝင်ဖြစ်သည်။

            ရှေ့ဘိုးဘွားများလက်ထက်ကတည်းက မိမိအိမ်သို့ဧည့်ကောင်းဆောင်ကောင်းများ လာရောက်သည့်အခါ သင်ဖြူးဖျာကိုခင်း၍ ရေပူ၊ ရေအေးနှင့် ဧည်ခံစကားပြောကြသည်။ သင်ဖြူးဖျာသည် အပူအအေးမျှတ၍ ကျန်းမာရေးနှင့်ညီညွှတ်သောကြောင့် ခင်းထိုင်၊ ခင်းအိပ်ရာ၌ အလွန်အသုံး ဝင်လှသည်။ ပူအိုက်သော မြန်မာနိုင်ငံအလယ်ပိုင်းဒေသများတွင်သာမက အေးမြသော ရှမ်းပြည်နယ်တွင်လည်း သင်ဖြူးဖျာကို မက်မက်မောမော အသုံးပြုခဲ့ကြသည်။ ထိုကြောင့် ရှေ့ယခင်က သင်ဖြူးဖျာကို အိမ်တိုင်းလိုလိုပင် မရှိမဖြစ်ပစ္စည်းတစ်ခုအဖြစ် ဆောင်ထားကြသည်။

              မြန်မာနိုင်ငံတွင် သင်ဖြူးဖျာယက်လုပ်သော လုပ်ငန်းများစွာရှိသည့်အနက် ရှမ်းပြည်နယ် (အရှေ့ပိုင်း)၊ မိုင်းဆတ်မြို့နယ်၊ မယ်နင်ကျေးရွာ၊ မယ်ဆတ်ကျေးရွာနှင့် မိုင်းယောင်းမြို့၊ အမှတ်(၂) ရပ်ကွက်၊ လွယ်ရွာတို့တွင်ယက်လုပ်သော သင်ဖြူးဖျာများသည် ဘိုးဘွားများလက်ထက်မှ လက်ဆင့်ကမ်းသယ်ဆောင်လာသော ရှမ်းရိုးရာလက်မှုပညာတစ်ခုဖြစ်ပါသည်။ သင်ဖြူးဖျာယက်လုပ်ရန် အဓိကလိုအပ်သောကုန်ကြမ်းပစ္စည်းမှာ တောင်စင်ဖက်(ရှမ်းဘာသာဖြစ်-ကန်သောင်ကျင်ဟုခေါ် သည်) ပင်စည်းအရိုးဖြစ်သည်။ ၎င်းအပင်ကို သစ်တောများအတွင်းရှိ လျှိုမြောင်စိမ့်စမ်းများတွင် ရာသီမရွေး ရှာဖွေခုတ်ယူနိုင်သည်။ တောင်စင်ဖက်ကို ဟိုယခင်ပလပ်စတစ်အိတ်၊ ကြွပ်ကြွပ် အိတ်များ မသုံးစွဲမီအချိန်က ကောက်ညှင်းပေါင်းထုတ်များ၊ ဟင်းထုတ်များထုတ်ရာတွင်ဖြစ်စေ၊ ပစ္စည်းများထုတ်ပိုးရာတွင်ဖြစ်စေ တွင်တွင်ကျယ်ကျယ် အသုံးပြုခဲ့ကြပါသည်။

          သင်ဖြူးဖျာယက်လုပ်ရန် သစ်တောများမှခုတ်ယူလာသော လုံးပတ်လက်မဝက်၊ အရှည်၅ပေ ခန့်ရှိသည့် တောင်စင်ဖက်အပင်ကို နှစ်ခြမ်းခွဲ၍ ခြောက်အောင်နေလှန်းရသည်။ နေလှန်းထားသော ခွဲခြမ်းများကို ရေတွင် ခုနှစ်ရက်ခန့်စိမ်ပြီး(အချို့သူများက၄၅မိနစ်ခန့်ပြုတ်ပြီး) အကြောများခွာကာ အခွေလေးများပြုလုပ်၍ တစ်ရက်ခန့် နေပြန်လှန်းရပါသည်။ မစိုမခြောက်အနေတော် နေလှန်းထားသော တောင်စင်ဖက်ပင်အကြောများသည် သင်ဖြူးဖျာယက်လုပ်ရန်အတွက် အသင့်အနေအထားသို့ ရရှိပါသည်။ သင်ဖြူးဖျာများကို မိသားစုစီးပွားရေးလုပ်ငန်းအဖြစ် ယက်လုပ်သူများရှိသကဲ့သို့ လယ်ယာလုပ်ငန်းခွင် ပြီးဆုံးချိန်များတွင် မိသားစုအပိုဝင်ငွေရရှိရန် ယက်လုပ်သူများလည်းရှိကြပါသည်။

          သင်ဖြူးဖျာများကို အကြမ်း၊ အချောဟူ၍နှစ်မျိုး ယက်လုပ်ကြသည်။ အချောကို ၆ပေ×၃ပေ (အကြီး)၊ ၅ပေ×၂.၅ပေ(အလတ်)နှင့် ၄ပေ×၂ပေ(အသေး)ဟူ၍ သုံးမျိုးယက်လုပ်ကြသည်။   အများအားဖြင့် အကြမ်း၅ပေ×၂.၅ပေ(အလတ်)ဆိုဒ်ကိုသာအများဆုံး ယက်လုပ်ကြသကဲ့သို့ မှာယူသူ၏ စိတ်ကြိုက် ယက်လုပ်ပေးရသည်လည်းရှိသည်။ ကျွမ်းကျင်သော သင်ဖြူးဖျာယက်လုပ်သူတစ်ဦးသည်  တစ်ရက်လျှင်သင်ဖြူးဖျာအချော ၆ပေ×၃ပေ(အကြီး)ဆိုဒ်တစ်ချပ်(သို့မဟုတ်) အကြမ်း ၅×၂.၅ (အလတ်)ဆိုဒ်နှစ်ချပ်သာ ယက်လုပ်နိုင်သည်။ သင်ဖြူဖျာအချောအကြီးတစ်ချပ် (၁၅၀၀၀)ကျပ်၊ အလတ်တစ်ချပ် (၁၀၀၀၀)ကျပ်နှင့် အသေးတစ်ချပ်(၈၀၀၀)ကျပ်ဖြင့် ရောင်းချရသည်။ သင်ဖြူးဖျာ အကြမ်းတစ်ချပ်လျှင် (၅၀၀၀)ကျပ်ဖြင့် ရောင်းချရသည်။ ယက်လုပ်ရရှိသော သင်ဖြူးဖျာအချောများကို  ရှမ်းပြည်နယ်အတွင်းရှိ အခြားဒေသများနှင့် ထိုင်းနိုင်ငံသို့လည်ကောင်း သင်ဖြူးဖျာအကြမ်းများကို ထိုင်းနိုင်ငံသို့လည်ကောင်း တစ်ပိုင်တနိုင်အနေနှင့် ပို့ဆောင်ရောင်းချကြသည်။

         ရှမ်းရိုးရာယက်လုပ်သောသင်ဖြူးဖျာများကို နှစ်ဖက်လှ၊ နှစ်ထပ်ပုံစံ ယက်လုပ်ထားပါသည်။ ခိုင်ခန့်လှပပြီးအေးမြသော ရှမ်းပြည်နယ်(အရှေ့ပိုင်း)ဒေသထွက် သင်ဖြူးဖျာများသည် အခြားဒေသမှထွက်ရှိသော သင်ဖြူးဖျာများနှင့်ပုံစံမတူဘဲ တစ်မူထူခြားလှပါသည်။ ဟိုယခင်အချိန်ဘိုးဘွားမိဘများလက်ထက်ကသင်ဖြူးဖျာများကို တွင်ကျယ်စွာ အသုံးပြုခဲ့ကြသော်လည်း ယနေ့အချိန်တွင် ဈေးနှုန်းသက်သာသော ပလတ်စတစ်ဖျာများကို အလွယ်တကူဝယ်ယူ အသုံးပြုလာကြပါသည်။

        သို့ဖြစ်ပါ၍ ရှမ်းပြည်နယ်(အရှေ့ပိုင်း)ဒေသများဖြစ်သော မိုင်းဆတ်မြို့နှင့်မိုင်းယောင်းမြို့တို့ရှိကျေးရွာများတွင် ရိုးရာသင်ဖြူးဖျာယက်လုပ်ခြင်းကြောင့် မိသားစုစားဝတ်နေရေး ပြေလည်ပြီး ဝင်ငွေရရှိနေသော်လည်း သင်ဖြူးဖျာယက်လုပ်သူများ နည်းပါးလာခြင်းနှင့် သင်ဖြူးဖျာအသုံးပြုမှု များနည်းပါးလာခြင်းတို့ကြောင့် ရှမ်းရိုးရာလက်မှုပညာဖြင့် ယက်လုပ်သော သင်ဖြူးဖျာလုပ်ငန်းများ တိမ်ကောသွားမည်ကို စိုးရိမ်ရပါသည်။ ထို့ကြောင့် ဈေးနှုန်းသက်သာသော ပလပ်စတစ်ဖျာများအစား ကျန်းမာရေးနှင့်ညီညွှတ်ပြီး သဘာဝပတ်ဝန်းကျင်ကို ထိခိုက်မှုမရှိသော ပြည်တွင်းဖြစ် သင်ဖြူးဖျာများကိုသာ ဝယ်ယူသုံးစွဲသင့်ပါကြောင်းနှင့် ရှမ်းရိုးရာလက်မှုပညာသင်ဖြူးဖျာယက်လုပ်သူများသည် မိသားစုအပိုဝင်ငွေရရှိ၍ အဆင်ပြေနေပါကြောင်း ရေးသားလိုက်ရပါသည်။

DOCA(ရှမ်း)