ပြည်တွင်းကုန်သွယ်မှုသတင်း

Powered by Drupal

ပန်းတောင်းမြို့နယ်တွင် မိုးစပါးများစတင်ရိတ်သိမ်း

       ပြည်ခရိုင်၊ ပန်းတောင်းမြို့နယ်ရှိ သရက်လိန်အုပ်စု၊ ခတ္တိယကျေးရွာတွင် မိုးစပါးများ စတင်ရိတ်သိမ်းလျက်ရှိသဖြင့်  စားသုံးသူရေးရာဦးစီးဌာန၊ ပန်းတောင်းမြို့နယ်တာဝန်ခံနှင့် ဝန်ထမ်းများသည် မိုးစပါးစိုက်ပျိုးထုတ်လုပ်မှု ဈေးနှုန်းဈေးကွက်အခြေအနေများအား သိရှိနိုင်ရန် ကွင်းဆင်း လေ့လာခဲ့ပါသည်။

      စားသုံးသူရေးရာဦးစီးဌာန၊ ပန်းတောင်းမြို့နယ်တာဝန်ခံ ဒေါ်သန်းသန်းအေးနှင့် ဝန်ထမ်းများသည် သရက်လိန်အုပ်စု ခတ္တိယကျေးရွာရှိ မိုးစပါး စိုက်ပျိုး ထုတ်လုပ်သူ ဒေါ်ခင်မာဌေးနှင့် တွေ့ဆုံပြီး မိုးစပါးစိုက်ပျိုးထုတ်လုပ်မှု ဈေးနှုန်းဈေးကွက် အခြေအနေများကိုတွေ့ဆုံမေးမြန်းရာ ၎င်းမှ မိုးစပါး (၇)ဧက စိုက်ပျိုးထားရှိပြီး ယခုအချိန်ထိ (၂)ဧက ရိတ်သိမ်းပြီးဖြစ်ပါသည်။ စိုက်ပျိုးသည့် စပါးမျိုးမှာ ရတနာတိုးစပါးမျိုးဖြစ်ပြီး တစ်ဧကလျှင် တင်း(၆၀)ခန့် ထွက်ရှိသည်ဟု သိရှိရပါသည်။ ယခုလက်ရှိတွင် စပါးပေါက်ဈေးနှုန်းမှာ တင်း(၁၀၀) လျှင် (၉)သိန်းကျပ်ခန့် ရရှိသည်ဟုသိရှိရပါသည်။ မိုးစပါး အထွက်နှုန်းမှာ နွေစပါးအထွက်နှုန်း ထက်စာလျှင် နည်းလာကြောင်း တွေ့ရှိရပါသည်။ ပန်းတောင်း မြို့နယ် အနေဖြင့် ၂၀၂၀ ခုနှစ်တွင် တစ်ဧကလျှင် (၈၅)တင်းခန့်ထွက်ရှိပြီး ၂၀၂၁ ခုနှစ်တွင် အထွက်နှုန်း များကျဆင်းလာပြီး ယခုနှစ်တွင် မိုးနည်းပါးလာသဖြင့် မိုးစပါးအထွက်နှုန်းနည်းလာခြင်းဖြစ်သည်ဟု သိရှိရပါသည်။

         မိုးစပါးစိုက်ပျိုးသူ တောင်သူများအနေဖြင့် စိုက်ပျိုးချိန်တွင် မိုးနည်းပြီး စပါးများထွက် ပေါ်ချိန်တွင် မိုးများကောင်းလာသဖြင့် ယခုနှစ်တွင် တစ်ဧကအထွက်နှုန်း များကျဆင်းလာသော်လည်း ဈေးများကောင်းသဖြင့် သင့်တင့်သည့် အကျိုးအမြတ်များရရှိမည်ဖြစ်ကြောင်း သိရှိရပါသည်။

DOCA(ပဲခူး)

ရွှေတောင်မြို့နယ်ရှိ ပဲစောင်းလျားသီးဈေးနှုန်းဈေးကွက်

        ပြည်ခရိုင်၊ ရွှေတောင်မြို့နယ်၊ မီးလောင်အုပ်စု၊ အင်္ဂလှိုင်ဂန် ကျေးရွာတွင် ဟင်းသီးဟင်းရွက် အုပ်စုဝင်ဖြစ်သော ပဲစောင်းလျားသီးများ စိုက်ပျိုးလျက်ရှိပါသည်။

     စားသုံးသူရေးရာဦးစီးဌာန၊ ရွှေတောင်မြို့နယ်တာဝန်ခံ ဦးအောင်နိုင်ဦးနှင့် ဝန်ထမ်းများသည် မီးလောင်အုပ်စု၊ အင်္ဂလှိုင်ဂန်ကျေးရွာသို့ သွားရောက်၍ ပဲစောင်းလျားသီးစိုက်ပျိုးသူ ဒေါ်သဇင်အေးနှင့် တွေ့ဆုံ၍မေးမြန်းရာ ပဲစောင်းလျားသီးကို အတို့အမြုပ်ပြုလုပ်၍လည်းကောင်း၊ သုပ်စား၍ လည်းကောင်း စားသုံးကြပါသည်။ ပဲစောင်းလျားမြစ်ကိုလည်း ပဲမြစ်အဖြစ် စားသုံးမှုများကြပါသည်။ ပဲစောင်း လျားပင်ကို နယုန်လတွင် စတင်စိုက်ပျိုးပြီး ဝါခေါင်လတွင် စတင်ခူးဆွတ်ရပါသည်။ မိုးဦးကာလတွင် စိုက်ပျိုးသောသီးနှံဖြစ်၍ ရက်(၉၀)ခန့် အကြာတွင် ခူးဆွတ်ရပါသည်။ စိုက်ပျိုးသည့်မျိုးများမှာ ကင်းခြေများမျိုးဖြစ်ပြီး ဧကဝက်စိုက်ပျိုးကြောင်း သိရှိရပါသည်။ ထိုစိုက်ပျိုးသောဧကဝက်တွင် ပဲစောင်းလျားအပင်ရေ (၁၀၀၀)ကျော်ခန့် စိုက်ပျိုးကြောင်းသိရှိရပါသည်။ ပဲစောင်းလျားပင် စိုက်ပျိုးရာတွင် ဘောင်များပြုလုပ်၍ တစ်ဘောင်နှင့် တစ်ဘောင် အလျားလိုက်မြောင်းဆွဲပြီး ကျင်းများ တူးကာ မျိုးစေ့များထည့်၍ စိုက်ပျိုးရပါသည်။ တစ်ပင်နှင့်တစ်ပင် တတောင်ခန့်ခြား၍ စိုက်ပျိုးရပါသည်။ ပဲစောင်းလျားသီး စတင်ထွက်ပေါ်ချိန်မှစ၍ တစ်ရက်ခြားတစ်ခါ ခူးဆွတ်ရပြီး တစ်ခါခူးဆွတ်လျှင် အတောင့်(၃၀၀၀) ကျော်ခန့် ခူးဆွတ်ရကြောင်း သိရှိရပါသည်။ ထွက်ရှိလာသော ပဲစောင်းလျားသီးများကို ရွှေတောင်ဒေသရှိ ကုန်စိမ်းဒိုင်များမှတစ်ဆင့် ရန်ကုန်မြို့ရှိ ဈေးကွက်နှင့် ပြည်မြို့ရှိ ကုန်စိမ်း ဈေးကွက်သို့ ရောင်းချကြောင်းသိရပါသည်။ ပဲစောင်းလျားသီးဈေးကွက်အနေဖြင့် လက်ကားဈေး တစ်တောင့်လျင် (၄)ကျပ်နှုန်းဖြင့်ရောင်းချသလို လက်လီဈေးတစ်တောင့်လျှင် (၅)ကျပ်နှုန်းဖြင့် ရောင်းချကြောင်း သိရှိရပါသည်။

         ပဲစောင်းလျားသီးစိုက်ပျိုးသူအနေဖြင့် တစ်ရက်ခြားတစ်ခါ ဝင်ငွေ ၁၂၀၀၀ကျပ်ခန့်ရရှိသဖြင့် သုံးစွဲရန်အပိုဝင်ငွေရရှိသလို ဧကများလည်းတိုးချဲ့စိုက်ပျိုးပါက မိသားစုဝင်ငွေလည်းရရှိပြီး အကျိုးအမြတ်ပိုမိုဖြစ်ထွန်းမည်ဖြစ်ကြောင်း လေ့လာသုံးသပ်တင်ပြအပ်ပါသည်။

DOCA(ပဲခူး)

 

                                                         

ရွှေတောင်မြို့ ဒေသထွက်ဂန္ဓမာရွှေစိမ်း

      ပြည်ခရိုင်၊ ရွှေတောင်မြို့နယ်၊ ကသစ်ကိုင်းအုပ်စု၊ တောင်ညိုကျေးရွာတွင် ဂန္ဓမာရွှေစိမ်းများ စိုက်ပျိုးလျက်ရှိပါသည်။

      စားသုံးသူရေးရာဦးစီးဌာန ရွှေတောင်မြို့နယ်တာဝန်ခံနှင့် ဝန်ထမ်းများသည် ဂန္ဓမာရွှေစိမ်း စိုက်ပျိုးသော တောင်သူ ဒေါ်အေးဝင်းကို နှင့်တွေ့ဆုံ၍ မေးမြန်းရာ ဂန္ဓမာပျိုးပင်ကို ပြင်ဦးလွင်မြို့မှ မှာယူ၍ စိုက်ပျိုးရပြီး ပျိုးပင်တစ်ပင်လျှင် ၁၂-၁၅ ကျပ်အထိပေး၍ ဝယ်ယူစိုက်ပျိုးကြောင်း သိရှိိ ရပါသည်။ စိုက်ပျိုးသောမျိုးမှာ ဂန္ဓမာရွှေစိမ်းမျိုးဖြစ်ပြီး ဧကဝက်ခန့် စိုက်ပျိုးထားကြောင်း သိရှိ ရပါသည်။ ဧကဝက်စိုက်ပျိုးရာတွင် အပင်ပေါင်း ၂သောင်းခွဲခန့် စိုက်ပျိုးနိုင်ပြီး စိုက်ပျိုးပြီး (၄)လ အကြာတွင် ပန်းများပွင့်၍ စတင်ခူးဆွတ်ရပါသည်။ ထွက်ရှိလာသောပန်းများကို အခိုင်ကြီးလျှင် တစ်ခိုင်၊ အခိုင်သေးလျှင် နှစ်ခိုင်လောက်ကို နှီးဖြင့်စည်း၍ တစ်စည်းလျှင် လက်ကားဈေး ၂၀၀ကျပ်ဖြစ်ပြီး လက်လီဈေးတစ်စည်းလျှင် ၂၅၀-၃၀၀ကျပ် အထိရောင်းချကြောင်းသိရှိရပါသည်။

       ရွှေတောင်မြို့နယ်မှထွက်ရှိသော ဂန္ဓမာရွှေစိမ်းများကို ရန်ကုန်မြို့သို့ တင်ပို့သလို ပြည်မြို့သို့ လည်းတင်ပို့ရောင်းချကြောင်း သိရှိရပါသည်။ ဂန္ဓမာပန်းများမှာ ဘုရားတင်၊ နတ်တင်ရန်ဝယ်ယူမှုရှိသဖြင့် လူအများစုအသုံးများသဖြင့် ပိုမိုတိုးချဲ့စိုက်ပျိုးလျှင် အကျိုးအမြတ်များ ပိုမိုရရှိနိုင်မည်ဖြစ်ကြောင်း သုံးသပ်တင်ပြအပ်ပါသည်။

DOCA(ပဲခူး)

ပေါက်ခေါင်းဒေသထွက် တန်ဆောင်မုန်းပဲ

        သဖန်းချိုကျေးရွာတွင် တန်ဆောင်မုန်းပဲများ ထွက်ပေါ်လာတော့မည်ဖြစ်သဖြင့် တန်ဆောင်မုန်း ပဲစိုက်ပျိုးမှုဈေးနှုန်းဈေးကွက်နှင့် အကျိုးအမြတ်ကို သိရှိစေရန်အတွက်  လေ့လာတင်ပြလိုက်ရပါသည်။ တန်ဆောင်မုန်း ပဲဆိုသည်မှာ ဒေသအခေါ်အဝေါ်ဖြစ်ပြီး တိုင်ထောင်ပဲနှင့် ဆင်တူပါသည်။ တန်ဆောင် မုန်းပဲကို ဝါခေါင်လမှစတင် စိုက်ပျိုးပြီး (၄) လအကြာ တန်ဆောင်မုန်းလတွင် စတင်အသီးများ ခူးဆွတ် ရပါသည်။

         တန်ဆောင်မုန်းပဲစိုက်ပျိုးဧကမှာ နှစ်ယောက်စိုက်ဖြစ်ပြီး၊ စိုက်ပျိုးသောမျိုးမှာ ဒေသမျိုး ဖြစ်ပါ သည်။ တန်ဆောင်မုန်းပဲ နှစ်ယောက်စိုက်လျင် မျိုးအနေဖြင့် နို့ဆီဗူး (၁)ခန့်ကုန်ကျပြီး တစ်ဘူးလျှင် (၁၀၀၀၀) ကျပ်ဖြင့် ဝယ်ယူစိုက်ပျိုးကြောင်း သိရှိရပါသည်။ နှစ်ယောက်စိုက်ကုန်ကျစရိတ်မှာ (၁၅၀၀၀၀) ကျပ်ခန့်ကုန်ကျပြီး ထွက်ရှိလာသော ပဲသီးများကို ပြည်ဈေးကွက်သို့ ပို့သလို၊ ပြည်မြို့မှတစ်ဆင့် ရန်ကုန်မြို့သို့ တင်ပို့ရောင်းချလျက်ရှိကြောင်း သိရှိရပါသည်။ တန်ဆောင်မုန်းပဲသီး ဈေးနှုန်းများမှာ တစ်တောင့်လျှင် (၅ - ၁၀) ကျပ်ဈေးဖြင့် ရောင်းချလျက်ရှိပါသည်။ တန်ဆောင်မုန်း ပဲသီး နှစ်ယောက် စိုက်လျှင် အကျိုးအမြတ်အနေဖြင့် (၉၀၀၀၀၀) ကျပ်ခန့်ရရှိသဖြင့် ပိုမိုတိုးချဲ့စိုက်ပျိုးသင့်သည့် သီးနှံ ဖြစ်ပါကြောင်း တင်ပြလိုက်ရပါသည်။

DOCA(ပဲခူး)

ဝဥစိုက်ပျိုးဝင်ငွေတိုး

           ပြည်ခရိုင်၊ ရွှေတောင်မြို့နယ်ရှိ ကသစ်ကိုင်းအုပ်စု၊ ကသစ်ကိုင်းကျေးရွာတွင် ‘ဝ’ ဥများ  စမ်းသပ် စိုက်ပျိုးလျက်ရှိပါသည်။

       စားသုံးသူရေးရာဦးစီးဌာန၊ မြို့နယ်တာဝန်ခံ ဦးအောင်နိုင်ဦးနှင့်ဝန်ထမ်းများသည် ကသစ်ကိုင်း အုပ်စု၊ ကသစ်ကိုင်းကျေးရွာ ၊  ဝဥတစ်ဧကစမ်းသပ်စိုက်ပျိုးသော စိုက်ကွင်းသို့ ကွင်းဆင်းမေးမြန်းခဲ့ရာ ‘ဝ’ ဥစိုက်ပျိုးသူ ဦးမောင်နိုင်မှ ဝဥကို အဓိကစိုက်ပျိုးသောဒေသများမှာ ချင်းပြည်နယ်၊ ရှမ်းပြည်နယ်၊ ကရင်ပြည်နယ်နှင့် မွန်ပြည်နယ်တို့ဖြစ်ပြီး ယခုပြည်ခရိုင် ရွှေတောင်မြို့နယ်တွင် စမ်းသပ်စိုက်ပျိုးလျက်ရှိ ပါသည်။ ဝဥကို ဧပြီလကုန်တွင် စတင်စိုက်ပျိုးရာ  စက်တင်ဘာလကုန်တွင် အပင်များကျပြီး ဝဥများတူး ယူရသဖြင့် သက်တမ်းမှာ (၅) လသာရှိသော သီးနှံဖြစ်ပါသည်။ ဝဥသည် အေးသောဒေသများ တွင်ဖြစ်ထွန်း၍ ရွှေတောင်မြို့နယ်အနေဖြင့် အပူချိန်မြင့်တက်သည့် အတွက် အမိုးအစိမ်းများမိုး၍ စမ်းသပ်စိုက်ပျိုးကြောင်း သိရှိရပါသည်။ စိုက်ပျိုးသော မျိုးများမှာ ချင်းမျိုး (ပန်းရောင်) ဖြစ်ပြီး ရာသီဥတုဒဏ်ခံနိုင်ရန်အတွက် မျိုးရွေးချယ်၍ စိုက်ပျိုးကြောင်းသိရပါသည်။ ဝဥ တစ်ဧကတွင် မျိုးဥ (၁၄၀၀၀) လုံးနှင့် မျိုးသီး (၂၅၀၀၀) လုံး စိုက်ပျိုးရပြီး စုစုပေါင်း စိုက်ပျိုးထုတ်လုပ်ကုန်ကျစရိတ်မှာ (၁၆၅၄၀၇၀၀) ကျပ် ကုန်ကျသည်ဟု သိရှိရပါသည်။ ဝဥစိုက်ပျိုး ထွက်ရှိမှုအနေဖြင့် မျိုးဥစိုက်ပျိုးခြင်းမှ ဝဥ (၁၅၀၀၀) ပိဿာနှင့် ရွက်သီးရရှိမှုမှာ အလုံး (၄) သောင်း ခန့်ရရှိပြီး မျိုးသီးစိုက်ပျိုးခြင်းမှ မျိုးသီး (၂) သောင်းလုံးနှင့် ရွက်သီး (၂) သောင်းလုံးခန့်ရရှိသည်ဟု သိရပါသည်။ ဝဥဈေးနှုန်းအနေဖြင့် ဝဥ တစ်ပိဿာလျင် ၁၅၀၀ ကျပ်ဖြင့် (၁၅၀၀၀) ပိဿာလျင် (၂၂၅၀၀၀၀၀) ကျပ်၊ မျိုးသီးတစ်လုံးလျင် (၅၀၀) ကျပ်ဖြင့် မျိုးသီးလုံး (၂၀၀၀၀) လျင် (၁၀၀၀၀၀၀၀) ကျပ်၊ ရွက်သီးတစ်လုံးလျင် (၁၀၀) ကျပ်ဖြင့် ရွက်သီး (၆၀၀၀၀) အတွက် (၆၀၀၀၀၀၀) ကျပ် ရရှိသည့်အတွက် တစ်ဧကလျင် ဝင်ငွေအနေဖြင့် (၃၈၅) သိန်းခန့်ရရှိပါသည်။ တစ်ဧကအကျိုးအမြတ်အနေဖြင့် သိန်း (၂၂၀) ခန့်ရရှိကြောင်း သိရှိရပါသည်။ ဈေးကွက်အနေဖြင့် ဝဥများကို မန္တလေးမြို့နှင့် မွန်ပြည်နယ်တို့မှ ဝယ်ယူမှုရှိပြီး မျိုးသီးနှင့် ရွက်သီးများကို ဝဥကို စိုက်ပျိုးသူများက ဝယ်ယူလျက်ရှိကြောင်း သိရှိရပါသည်။

          ရွှေတောင်မြို့နယ်ရှိ ဝဥကိုစိုက်ပျိုးထုတ်လုပ်သူအနေဖြင့် စမ်းသပ်စိုက်ပျိုးရာတွင် အောင်မြင်မှုရှိလာပြီး ဈေးကွက်များရရှိလာနိုင်၍ အခြားသူများလည်း ဝဥကိုစိုက်ပျိုးထုတ်လုပ်လာလျင် အကျိုးအမြတ်များ ပိုမိုရရှိပြီး ပြည်တွင်းကုန်သွယ်မှုများ ဖွံ့ဖြိုးတိုးတက်လာနိုင်မှာဖြစ်ကြောင်း လေ့လာတင်ပြအပ်ပါသည်။

DOCA(ပဲခူး)

ဖြူးမြို့မှ ဒေသတွင်း လူကြိုက်များသည့် စာကလေးခွေ(ခေါ်) ပဲချောင်းခွေလုပ်ငန်း

            တောင်ငူခရိုင်၊ ဖြူးမြို့နယ်တွင် ဆီကြော်မုန့်လုပ်ငန်းများနှင့် ပဲကြော် လုပ်ငန်းများ လုပ်ကိုင် လျက်ရှိပါသည်။ ထိုလုပ်ငန်းများထဲတွင်  စာကလေးခွေကြော် (ခေါ်)ပဲချောင်းခွေကြော် လုပ်ငန်းလည်း တစ်ခုအပါအဝင်ဖြစ်ပါသည်။ စာလေးခွေဆီကြော်မုန့် ပြုလုပ်ရန်အတွက် လိုအပ်သော ကုန်ကြမ်း ပစ္စည်းများမှာ ကုလားပဲမှုန့်၊ ကော်မှုန့်၊ စားအုံးဆီနှင့် ဆားအနည်းငယ်တို့ဖြစ်ပါသည်။

              စာကလေးခွေဆီကြော်မုန့်ပြုလုပ်ပုံမှာ ကုလားပဲမှုန့်၊ ကော်မှုန့်နှင့် ဆားတို့အား အချိုးကျ သမစွာပေါင်းစပ်၍ အခွေပုံစံလေးရအောင် ပုံစံခွက်ထဲတွင်ထည့်၍ ဆီနှင့် ကြော်ပြီးသောအခါတွင် အခွေ ပုံစံ စာကလေးခွေ ကြော်လေးများရရှိပါသည်။

              စာကလေးခွေ ထုပ်ပိုးမှုပုံစံအား ပုံစံ(၂)မျိုးဖြင့် ထုပ်ပိုးထားသည်ဟု သိရှိိရပါသည်။ ရရှိလာ သော စာကလေးခွေများအား ပလတ်စတစ်အိတ်ဖြင့် ပါကင်ထုပ်၍တစ်မျိုး၊ ဘူးတွင်ပါကင်ပိတ်၍ တစ်မျိုး ထုတ်လုပ်ထားကြောင်း သိရှိရပါသည်။

              ဈေးနှုန်းဈေးကွက်အနေဖြင့် ပလတ်စတစ်ဖြင့်ထုပ်ပိုးထားသော စာကလေးခွေ တစ်အိတ် လျင် (၅၀၀) ကျပ်နှုန်းဖြင့် ရောင်းချပြီး ပါကင်ဘူးဖြင့် ထုပ်ပိုးထားသော စာကလေးခွေ တစ်ဘူးလျင် (၁၄၀၀) ကျပ်နှုန်းဖြင့် ရောင်းချပါသည်။

             ဈေးကွက်အနေဖြင့် ဖြူးမြို့အနီးတဝိုက်ရှိ မြို့များဖြစ်သော ညောင်ပင်သာ၊ ကညွတ်ကွင်း နှင့်ဇေယျဝတီမြို့များသို့ ဖြန့်ဖြူးရောင်းချသည့် အပြင် (၁၁၅) မိုင် ယာဉ်ရပ်နားစခန်းရှိ စားသောက် ဆိုင်များသို့ပါ ရောင်းချလျက်ရှိပြီး တစ်နေ့လျင် စာကလေးခွေ အထုပ် (၁၅၀) မှ (၂၀၀) ဝန်းကျင်ထိ ထုတ်လုပ်နိုင်ကြောင်း အေးအေးခိုင် နှစ်ပြန်ကြော်လုပ်ငန်းပိုင်ရှင် ဒေါ်အေးအေးခိုင်၏ ပြောကြား ချက်အား တင်ပြလိုက်ရပါတယ်။

DOCA(ပဲခူး)

 

တောင်ငူမြို့ရှိ အခြေခံစားကုန်ဖြစ်သော အာလူး၊ ကြက်သွန်ဖြူ၊ ကြက်သွန်နီဈေးကွက်

     တောင်ငူမြို့ရှိ ကုန်စုံဆိုင်များတွင် ယခုအပတ်တွင် အာလူး ဂေါ်လီစ တစ်ပိဿာလျှင် ၁၈၀၀ ကျပ်မှ ၁၉၀၀ ကျပ်၊ အသေးတစ်ပိဿာလျှင်၂၀၀၀ ကျပ်မှ ၂၂၀၀ ကျပ်၊ အလတ်တစ်ပိဿာလျှင် ၂၄၀၀ ကျပ်မှ ၂၅၀၀ ကျပ်နှင့် အကြီး တစ်ပိဿာလျှင် ၂၆၀၀ ကျပ်မှ ၂၈၀၀ ကျပ်အထိ ဈေးနှုန်းအနည်းငယ် မြင့်တက်လာပါသည်။

     ကြက်သွန်နီမှာ အသေး တစ်ပိဿာလျှင် ၃၂၀၀ ကျပ်မှ ၃၄၀၀ ကျပ်၊ အလတ် တစ်ပိဿာ လျှင် ၃၆၀၀ ကျပ်မှ ၃၈၀၀ ကျပ်နှင့် အကြီးတစ်ပိဿာလျှင် ၄၃၀၀ ကျပ်မှ ၄၅၀၀ ကျပ်အထိ ဈေးနှုန်း အနည်းငယ်မြင့်တက်လာပါသည်။

     ကြက်သွန်ဖြူမှာလည်း အသေး တစ်ပိဿာလျှင် ၃၂၀၀ ကျပ်မှ ၃၄၀၀ ကျပ်၊ အလတ် တစ်ပိဿာလျှင် ၃၈၀၀ ကျပ်မှ ၄၀၀၀ ကျပ်နှင့် အကြီး တစ်ပိဿာလျှင် ၄၁၀၀ ကျပ်မှ ၄၅၀၀ ကျပ် အထိ ဈေးနှုန်းအနည်းငယ်မြင့်တက်လာကြောင်းနှင့် ၃ ပိဿာနှင့်အထက်ဝယ်ယူပါက ဈေးနှုန်းအနည်းငယ် လျှော့ပေးမည်ဖြစ်ကြောင်း ပွဲရုံများနှင့် ကုန်စုံဆိုင်များထံမှ သိရှိရပါသည်။

DOCA(ပဲခူး)

တောင်ငူမြို့မှ နဂါးမောက်သီးနှင့် ဖရဲသီးဈေးကွက်

          တောင်ငူမြို့ရှိ ဈေးများတွင် တောင်ငူမြို့နှင့်အနီးတဝိုက်မှ ရာသီပေါ်သီးနှံများ တင်ပို့ရောင်းချလျက်ရှိရာ ဒေသထွက်နဂါးမောက်သီးများမှာ အကြီးတစ်လုံးလျှင် ၆၀၀ ကျပ်မှ ၇၀၀ ကျပ်၊ အလတ်တစ်လုံးလျှင် ၄၀၀ ကျပ်မှ ၅၀၀ ကျပ်၊ အသေးတစ်လုံးလျှင် ၃၅၀ ကျပ်ရှိပြီး အသေးသုံးလုံး ဝယ်ပါက ၁၀၀၀ ကျပ်ဖြင့် ရောင်းချကြောင်း သိရှိရပါသည်။

            တောင်ငူမြို့ရှိ ဈေးများသို့ ဒုံးကျည်သီးဟုခေါ်ကြသော ဖရဲသီးအလုံးသေးများ ဝင်ရောက်လျက်ရှိရာ အကြီးတစ်လုံးလျှင် ၁၈၀၀ ကျပ်မှ ၂၀၀၀ ကျပ်၊ အလတ်တစ်လုံးလျှင် ၁၅၀၀ ကျပ်မှ ၁၇၀၀ ကျပ်နှင့် အသေးတစ်လုံးလျှင် ၁၂၀၀ ကျပ်မှ ၁၃၀၀ ကျပ်အထိရှိကြောင်း ညောင်ပင်ဈေးရှိ သစ်သီးအရောင်းဆိုင်ပိုင်ရှင်တစ်ဦးထံမှ သိရှိရပါသည်။

DOCA(ပဲခူး)

 

စားအုန်းဆီ အခြေခံလက်ကားရည်ညွှန်းဈေးနှုန်း တစ်ပိဿာ ကျပ် ၄၃၅၀ ဖြစ်ကြောင်း ထုတ်ပြန်ကြေညာ

နေပြည်တော် နိုဝင်ဘာလ ၁၃

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေး ကော်မတီအနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံ နှင့်အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ် စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကား ရည်ညွှန်းဈေးနှုန်းကို ထုတ်ပြန်ပေးလျက်ရှိပါသည်။

     ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများအရ ၂၀၂၂ ခုနှစ်၊ နိုဝင်ဘာလ ၁၄ ရက်နေ့မှ နိုဝင်ဘာလ ၂၀ ရက်နေ့ အထိ ရန်ကုန်အထိုင်ဈေး အခြေခံလက်ကား ရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၄၃၅၀ ကျပ် ဖြစ်ကြောင်း ထုတ်ပြန်ကြေညာထားပါသည်။

    ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။

     အဆိုပါ အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန ၏ Website: www.doca.gov.mm၊  Facebook Page  နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။                                                                               

အောင်လံကုန်စည်ဒိုင်၏ သီးနှံရောင်းဝယ်ဖြစ်မှု အခြေအနေ

 ‌      အောင်လံကုန်စည်ဒိုင်တွင် နှမ်းဈေးကွက်အနေဖြင့် ယခင်အပတ်(၃.၁၁.၂၀၂၂)ရက်နေ့မှ ယခုအပတ် (၉.၁၁.၂၀၂၂)ရက်နေ့အတွင်း (၄၅)ပိဿာဝင်(၁)အိတ်လျှင် နှမ်းနက်(စမုံ)  ကျပ်(၂၆၅၀၀၀)၊ နှမ်းဖြူ ကျပ်(၂၅၀၀၀၀)၊ နှမ်းနီ ကျပ်(၂၃၀၀၀၀)တို့ဖြင့် ဈေးနှုန်းပြောင်းလဲမှုမရှိဘဲ  နှမ်းပြာမှာယခင်အပတ် ကျပ်(၂၃၀၀၀၀) ယခု အပတ်ကျပ်(၂၂၅၀၀၀)ဖြစ်၍ ကျပ်(၅၀၀၀)ဈေးနိမ့်ပြီး အရောင်းအဝယ်ပမဏ အနေဖြင့်  နှမ်းနက် (စမုံ) (၁၂၀၀)အိတ်၊ နှမ်းပြာ(၃၈၀)အိတ်၊ နှမ်းဖြူ(၉၀)အိတ်၊ နှမ်းနီ (၁၇၀)အိတ်တို့ အရောင်းအဝယ်ရှိ ခဲ့ကြောင်း ကုန်သည်များထံမှသိရပါသည်။

          ပဲမျိုးစုံဈေးကွက်အနေဖြင့် (၂၀)ပိဿာဝင် (၁)တင်းလျှင် ပဲတီစိမ်းမှာ ယခင်အပတ် ကျပ်(၄၈၀၀၀) ယခုအပတ် ကျပ်(၄၉၅၀၀)ဖြစ်၍ ကျပ်(၁၅၀၀)ဈေးမြင့်၊ မတ်ပဲ ယခင်အပတ် ကျပ်(၅၆၀၀၀) ယခုအပတ်ကျပ်(၆၀၀၀၀)ဖြစ်၍ ကျပ်(၄၀၀၀)ဈေးမြင့်၊ ဘိုကိတ်ပြာ ယခင်အပတ်ကျပ် (၃၈၀၀၀)၊ ယခုအပတ် ကျပ်(၃၉၀၀၀)ဖြစ်၍ ကျပ်(၁၀၀၀)ဈေးမြင့်ပြီး ပဲစဉ်းငုံ(နီ) ယခင်အပတ်ကျပ်(၅၉၅၀၀) ယခုအပတ် ကျပ်(၅၈၅၀၀)ဖြစ်၍ ကျပ်(၁၀၀၀) ဈေးနိမ့်၊ ပဲကြီး ယခင်အပတ်ကျပ် (၇၈၀၀၀) ယခုအပတ် ကျပ်(၇၅၀၀၀)ဖြစ်၍ ကျပ်(၃၀၀၀)ဈေးနိမ့်ကာ ကုလားပဲ (HL)နှင့် ကုလားပဲ(မြကြေး)မှာ ယခင်အပတ်ကျပ် (၆၃၀၀၀) ယခုအပတ်ကျပ် (၆၃၀၀၀)ဖြင့်ဈေးနှုန်း တည်ငြိမ်လျက်ရှိပြီး အရောင်း အဝယ်အနေဖြင့် ပဲတီစိမ်းမှာ (၃၀)ပိဿာဝင် (၄၈၀၀)အိတ်၊ ပဲစဉ်းငုံ(နီ) (၆၅၀)အိတ်၊ မတ်ပဲ(၁၂၅) အိတ်၊ ကုလားပဲ(HL)(၇၅၀)အိတ်၊ ကုလားပဲ(မြကြေး) (၆၀၀)အိတ်၊ ဘိုကိတ်ပြာ(၁၇၀)အိတ်၊ ပဲကြီး (၄၅၀)အိတ်တို့အရောင်းအဝယ်ရှိခဲ့ကြောင်း မြေပဲလုံးဆံ(ဖြူ) တစ်ပိဿာလျှင် ယခင်အပတ် ကျပ် (၅၄၀၀) ယခုအပတ် ကျပ်(၅၃၅၀)ဖြစ်၍ ကျပ်(၅၀) ဈေးနိမ့်ပြီး မြေပဲလုံးဆံ(နီ) တစ်ပိဿာလျှင် ကျပ် (၅၃၅၀)၊ မြေပဲတောင့်အစို တစ်တင်းလျှင် ကျပ်(၂၂၀၀၀)ဖြစ်၍ မြေပဲလုံးဆံ(နီ)နှင့် မြေပဲတောင့် အစိုတို့မှာ ဈေးနှုန်းပြောင်းလဲခြင်းမရှိဘဲ မြေပဲလုံးဆံ(နီ) အိတ်(၁၁၅၀)၊ မြေပဲလုံးဆံ(ဖြူ) အိတ် (၉၅၀)၊မြေပဲတောင့်အစို တင်း(၅၃၀၀)ခန့် အရောင်းအဝယ်ရှိခဲ့ကြောင်း သိရပါသည်။

          ဝါသီးနှံအနေဖြင့်လည်း ယခင်အပတ် တစ်ပိဿာလျှင် ကျပ်(၂၃၀၀)ယခုအပတ် ကျပ်(၂၄၅၀) ဖြစ်၍ ကျပ်(၁၅၀)ဈေးမြင့်ကာ ဝါပိဿာချိန် (၃၅၀၀၀)ခန့် အရောင်းအဝယ်ရှိခဲ့ကြောင်း အောင်လံကုန်စည်ဒိုင် မှ သိရှိရပါသည်။

DOCA(မကွေး)

Pages

Subscribe to RSS - ပြည်တွင်းကုန်သွယ်မှုသတင်း