ပြည်တွင်းကုန်သွယ်မှုသတင်း

          ကတွတ်ပင်သည် သဘာဝပေါက်ပင်တစ်မျိုးဖြစ်ပြီး မြန်မာနိုင်ငံအနှံ သစ်တောတိုင်းလိုလိုမှာ ပေါက်ရောက်တက်ပါသည်။ အထူးသဖြင့် မြန်မာနိုင်ငံအောက်ပိုင်းဒေသများတွင် ပိုမိုတွေ့ရတက်ပြီး ပဲခူးတိုင်းဒေသကြီး (အနောက်ပိုင်း) ပြည်မြို့နယ်အတွင်းအနောက်ရွာသစ်ကျေးရွာနှင့် ပျဉ်းပင်ကိုင်း ကျေးရွာအနီး သစ်တောကြိုးဝိုင်းများတွင် အလေ့ကျပေါက်ရောက်နေကြောင်း သိရှိရပါသည်။

          ကတွတ်ပင်သည်နှစ်ရှည်ပင်ဖြစ်ပြီး ညောင်ပင်မျိုးတွင်ပါဝင်၍ အမြဲစိမ်းလန်းသော အပင်မျိုး ဖြစ်ပါသည်။ အသီးမှာအဝါရောင်ရှိပြီး အညိုရောင်အမွှေးနုများ ဖုံးအုပ်ထားပါသည်။ ကတွတ်သီးမှာ အချိုသီးနှင့်အချဉ်သီးဟူ၍ နှစ်မျိုးရှိတက်ပါသည်။

          ကတွတ်သီးကို ရှေးနှစ်ပေါင်း ၅၀၀၀ကျော်ကတည်းက လူတို့စတင်စားသုံးခဲ့ကြပြီး လူ့ခန္ဓာ ကိုယ်အတွက် လိုအပ်သော အာဟာရဓါတ်များ ဖြည့်ဆီးပေးသလို ကျန်းမာရေးအတွက် များစွာ အကျိုးပြုသော အသီးတစ်မျိုးဖြစ်ကြောင်း လေ့လာတွေ့ရှိချက်များအရ သိရှိရပါသည်။

          ကတွတ်သီးတွင် အမျှင်ဓါတ်များ ကြွယ်ဝစွာပါဝင်၍ အစာချေစနစ်ကို ကောင်းမွန်စေသည့် အတွက် ဝမ်းချုပ်ခြင်းကိုကာကွယ်ပေးနိုင်ကြောင်းသိရှိရပါသည်။ ဖျားနာမှုကို တိုက်ဖျက်ပေးနိုင် သည့် Bioactive ကွန်ပေါင်း ကင်ဆာဆဲများကိုသေစေနိုင်သလို အမျှင်ဓါတ်ကလည်း ကင်ဆာ ဖြစ်ပွားမှုကို ကာကွယ်ပေးနိုင်ခြင်း၊ ဆီးချိုရောဂါကို ထိန်းချုပ်ပေးနိုင်ခြင်း၊ ပိုတက်ဆီယမ်ဓါတ် မြင့်မားစွာပါဝင်သည့်အတွက် သွေးတိုးသမားများ စားသုံးသင့်သလို ကိုယ်ခံအားစနစ်ကို ကောင်း မွန်စေသည့်အတွက် အအေးမိဖျားနာ အလွယ်တကူမဖြစ်နိုင်စေနိုင်ကြောင်း သိရပါသည်။

          သို့သော်လည်း အစားအစာစားသုံးရာတွင် "တန်ဆေးလွန်ဘေး" ဆိုရိုးအတိုင်း ကတွက်သီး ကို အလွန်အကျွံစားသုံးမိပါက အစာအိမ်နာကျင်သည့်ဝေဒနာခံစားနိုင်သလို အစေ့ကလည်း အသည်းကိုထိခိုက်စေနိုင်ပါသည်။ ပိုတက်ဆီယမ်ဓါတ်များ၍ သွေးတိုးဆီးချိုသမားများအတွက် သင့်လျှော်သော်လည်း သွေးအတွင်းသကြားဓါတ်နည်းသူများနှင့် အရေပြားဓါတ်မတည့်သူများအနေ ဖြင့် ချင့်ချိန်စားသုံးသင့်ကြောင်း လေ့လာသိရှိိရပါသည်။

          ကတွက်သီးမှာနှစ်ပတ်လည်သီးသော အသီးမျိုးဖြစ်သော်လည်း ကဆုန်လနှင့် နယုန်လများ တွင် ပထမအကြိမ်အသီးအများဆုံးသီးပြီး ဝါဆို၊ ဝါခေါင်လများတွင် ဒုတိယအကြိမ် အများဆုံးသီး ကြောင်းနှင့် ကျန်လများတွင် အနည်းငယ်သာသီးသလို အရည်အသွေးလည်းမကောင်းကြောင်း သိရှိရပါသည်။

          ကတွက်သီးကို တစ်ချို့က အလုံးလိုက်စားကြသလို တစ်ချို့ကလည်း ထန်းလျှက်၊ ကြံသကာ၊ သကြားတို့ဖြင့် ယိုထိုး၍ ရိုးရာအစားအစာဖြင့်စားသုံးကြကြောင်းသိရပါသည်။ တစ်ချို့ကလည်း ယိုမျိုးစုံလုပ်ငန်းလုပ်ကိုင်၍ ဘုရားဖူးခရီးသွားများအတွက် ဒေသထွက်ကုန် ရိုးရာအစားအစာအဖြစ် စီးပွားဖြစ်ထုတ်လုပ်ရောင်းချနေကြကြောင်း သိရှိိရပါသည်။

          ပဲခူးတိုင်းဒေသကြီး(အနောက်) ပြည်မြို့နယ်အတွင်း ယိုလုပ်ငန်းထုတ်လုပ်ရောင်းချသည့် စီးပွားရေးလုပ်ငန်းရှင် ၁၃ ဦးခန့်ရှိကြောင်းသိရပါသည်။ စာရေးသူမှ ကတွက်ယိုလုပ်ငန်း လုပ်ကိုင်သူ တစ်ဦးနှင့်တွေ့ဆုံ၍ ပြည်တွင်းကုန်သွယ်မှုဖွံ့ဖြိုးတိုးတက်ရေး ကျေးရွာတစ်ရွာထုတ်ကုန်တစ်မျိုး တိုးတက်စေရေးအတွက် ကတွက်ယိုထုတ်လုပ်သည့် လုပ်ငန်းအခြေအနေ၊ ဈေးနှုန်းဈေးကွက် အခြေအနေများအား စုံစမ်းမေးမြန်းခဲ့ရာ ကတွက်ယိုသည် နှစ်ပေါက်အောင်နှပ်ထား၍ရသည့် ဓါတုဗေဒကင်းလွတ်စားဖွယ်ရာဖြစ်သဖြင့် အသီးရသမျှ ယိုလုပ်ငန်းမပျက်လုပ်ကိုင်နေရကြောင်း သိရှိရပါသည်။

          ကတွတ်ယိုထိုးရာတွင် ရရှိလာသော အသီးများကို ရေစင်အောင်ဆေးပြီး အသီး၏ အောက်ခြေပိုင်းနှင့် ထိပ်ပိုင်းကိုဓါးဖြင့်လှီး၍ လေးစိတ်စိတ်ပြီး တစ်ဒယ်စာအတွက် အလုံးကြီးလျှင် ၁၁၀၀ ဝန်းကျင်၊ အလုံးသေးလျှင် ၁၅၀၀ ဝန်းကျင်၊ သကြား(၈)ပိဿာခန့်နှင့် ဆားအနည်းငယ် ထည့်၍ ယိုထိုးရမှာဖြစ်ပြီး တစ်ဒယ်လျှင် ကတွက်ယိုအချိန် ၁၀ပိဿာခန့် ရရှိကြောင်း သိရပါသည်။

          ကတွတ်ယိုတစ်ဒယ်စာကုန်ကျမှုအနေဖြင့် ကတွတ်သီး၊ သကြား၊ ပလပ်စတစ်ဘူးနှင့် လုပ်သားခအတွက် ၃၀၀၀၀ကျပ်ဝန်းကျင် ကုန်ကျပြီး အကျိုးအမြတ်အနေနဲ့ တစ်ဒယ်အပေါ် ၃၅၀၀ကျပ် ဝန်းကျင်ရရှိကြောင်း သိရပါသည်။ ထုတ်လုပ်မှုအနေနဲ့ ယခင်က တစ်နှစ်လျှင် ကုန်ချိန် ၁၅၀၀-၂၀၀၀ ပိဿာကျော် ထုတ်လုပ်နိုင်သော်လည်း ယခုကိုဗစ်-၁၉ ကာလအတွင်း ပိဿာချိန် ၅၀၀ခန့်သာထုတ်လုပ်ရောင်းချနိုင်ကြောင်းသိရပါသည်။

          ကတွတ်ယိုလုပ်ငန်းသည် အလေ့ကျပေါက်ပင်မှ ရရှိသောအသီးကို တန်ဖိုးမြှင့်ထုတ်ကုန် အဖြစ် စီးပွားဖြစ်လုပ်ကိုင်၍ ရသော လုပ်ငန်းဖြစ်သဖြင့် အသီးခူးရောင်းချသူများအနေဖြင့် စိုက်စရိတ်၊ အရင်းအနှီးမလိုဘဲ မိသားစုအပိုဝင်ငွေရသလို စီးပွားရေးလုပ်ငန်းရှင်ဘက်ကလည်း အရင်းအနှီးနည်းနည်းဖြင့် အကျိုးအမြတ်ရရှိစေသော လုပ်ငန်းဖြစ်သည့်အပြင် အနီးပတ်ဝန်းကျင်ရှိ လူများကိုလည်း အလုပ်အကိုင်အခွင့်အလမ်းများ ဖန်တီးပေးနိုင်သော လုပ်ငန်းတစ်ခုဖြစ်ပါကြောင်း လေ့လာတင်ပြပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)

         ရခိုင်ပြည်နယ်၊ ကျောက်ဖြူခရိုင်တွင် (၂၀၂၁-၂၀၂၂)ခုနှစ် မိုးစပါး(၁၆၂၁၉၄)ဧက စိုက်ပျိုးပြီး ရိတ်ဧက (၁၆၁၄၉၅)ဧကရှိရာ အထွက်နှုန်းအားဖြင့် တစ်ဧကလျှင် (၅၇.၉၅) အထက်ရှိသဖြင့် စုစုပေါင်း (၉၃၅၈၀၀၀)တင်း ရှိပါသည်။ လူဦးရေး (၄၈၀၀၀၀) ကျော်ရှိပြီး မျိုးဝမ်းစာ အလေအလွှင့် (၆၄)သိန်းကျော်တင်းရှိပြီး ပိုလျှံစပါးတင်း (၂၉)သိန်းခန့်တင်းရှိမှာ ဖြစ်ပါသည်။

           ဖေဖော်ဝါရီလနောက်ဆုံးအပတ်တွင် စပါးဈေးနှုန်းများမှာ (၄၆)ပေါင်ကိုက်တင်း  ဧည့်မထ (၁၀၀)လျှင် ကျပ်(၅၆၀၀၀၀) ၊ ငစိန် (၁၀၀)လျှင် ကျပ်(၅၅၀၀၀၀) ၊ မြီးဒုံး (၁၀၀)လျှင် (၅၇၀၀၀၀)ကျပ်၊ ဈေးနှုန်းများဖြစ်ပေါ်နေပြီး ဆန်ဈေးနှုန်းမှာ တစ်အိတ်လျှင် ဧည့်မထကျပ်(၂၆၀၀၀) ၊ ငစိန်တစ်အိတ်လျှင် ကျပ် (၂၅၀၀၀) ၊ မြီးဒုံး တစ်အိတ်လျှင် ကျပ် (၂၇၀၀၀) ဖြစ်ပေါ်လျှက်ရှိပြီး ဈေးနှုန်းတည်ငြိမ်နေပါသည်။

           မြို့ပေါ်နေလူများမှာ အများအားဖြင့် ဆန်ချောများဖြစ်သည့် ပေါ်ဆန်းမွှေးဆန်ကိုသာ စားသုံးသည်ကို တွေ့ရှိရပါသည်။ ပေါ်ဆန်မွှေးများကို ကျောက်တော်၊ မြောက်ဦး မြို့နယ်များတွင် ရွှေဘိုမျိုးကို မိုးတော်ရေတော်ကွင်းမှာ စိုက်ပျိုးပြီး ရခိုင်ရွှေဘို ပေါ်ဆန်းမွေးစပါးများအား ခေတ်မီစက်ကြီးများဖြင့် ကြိတ်ခွဲပြီး ရခိုင်ပြည်နယ်နှင့် ပြည်မသို့ တင်ပို့ရောင်းချပါသည်။ တချို့ကလည်း ဧရာဝတီမှ ပုသိမ်ပေါ်ဆန်းမွေးများကို မှာယူတင်သွင်းရောင်းချကြပါသည်။ ရခိုင်ရွှေဘိုပေါ်ဆန်းမွေး တစ်အိတ်လျှင် ကျပ်(၄၂၀၀၀) ၊ ပုသိမ်ပေါ်ဆန်းမွေး တစ်အိတ်လျှင် ကျပ်(၄၃၀၀၀)ဖြင့် ရောင်းချနေသည်ကို တွေ့ရှိရပါသည်။

DOCA(ရခိုင်)

               ပြည်ခရိုင်၊ ပြည်မြို့ရှိ ပြည်ကုန်စည်ဒိုင်အနေဖြင့် နှစ်စဉ်မတ်ပဲ၊ ပဲတီစိမ်း၊ ပဲစင်းငုံ၊ ကုလားပဲ သီးနှံများမှာ အများဆုံးအရောင်းအဝယ်ဖြစ်လျှက်ရှိပြီး ယခင်လနှင့် ယခုလ အရောင်းအဝယ်ဖြစ်မှု နှင့် ဈေးနှုန်းအခြေအနေများအား အောက်ပါအတိုင်းလေ့လာသိရှိရပါသည်။

မတ်ပဲ

          ပြည်မြို့ရှိကုန်စည်ဒိုင်တွင် ယခင်လဇန်နဝါရီလ ပထမပတ်တွင် ပဲတစ်တင်းကို ၄၁၅၀၀ကျပ်၊ ဒုတိယပတ်တွင် ၄၃၈၀၀ - ၄၄၅၀၀ကျပ်ဖြင့် တစ်နေ့လျှင်အိတ် ၂၀၀/၂၅၀ခန့် အရောင်း အဝယ် ဖြစ်ခဲ့ပါသည်။ တတိယပတ်တွင် ၄၅၀၀၀-၄၅၅၀၀ကျပ်ထိ ဈေးမြင့်ခဲ့ပြီး စတုတ္တပတ်တွင် ၄၂၅၀၀-၄၃၅၀၀ကျပ်ဖြင့် တစ်နေ့လျှင်အိတ် ၂၀၀/၂၅၀ခန့် ရန်ကုန်ဝယ်လက်ရှိခဲ့ပါသည်။ ဖေဖော်ဝါရီ ပထမပတ်တွင် ဈေးကျလာပြီး ပဲတစ်တင်းလျှင် ၄၀၀၀၀-၄၁၀၀၀ကျပ်ဖြင့် အရောင်းအဝယ်ဖြစ်ခဲ့ ပါသည်။ ဒုတိယပတ်တွင် ပဲတစ်တင်းလျှင် ၃၈၀၀၀-၃၉၀၀၀-၃၉၅၀၀ကျပ်ထိ ဈေးကျခဲ့ပြီး တစ်နေ့လျှင် အိတ် ၁၅၀/၂၀၀ခန့် ရန်ကုန်အဝယ်ရသည့်အတွက် တတိယပတ်တွင် ၄၀၃၀၀-၄၁၈၀၀ ကျပ်ထိ ဈေးပြန်တက်လာခဲ့ပါသည်။ နောက်ဆုံးပတ်တွင် ၄၁၅၀၀-၄၁၇၀၀ကျပ် ဈေးဖြင့် အရောင်း အဝယ် ဖြစ်ပြီး တစ်နေ့လျှင် အိတ် ၂၀၀/၂၅၀ခန့် ရန်ကုန်သို့တင်ပို့မှုရှိခဲ့ပါသည်။

ပဲတီစိမ်း

          ယခင်လ ဇန်နဝါရီလတွင် ပုံမှန်ဈေးပဲတစ်တင်းကို ၃၈၀၀၀-၃၉၀၀၀-၄၀၀၀၀ကျပ်၊ ထိပ်စ ဈေး ၄၁၀၀၀- ၄၂၀၀၀ကျပ်ခန့်ဖြင့် အရောင်းအဝယ်ရှိပြီး တစ်နေ့လျှင် အိတ် ၁၅၀/၂၀၀ခန့်၊ မန္တလေး အဝယ်ရှိခဲ့ပါသည်။ ဒုတိယပတ် ပုံမှန်တစ်တင်းကို ၃၉၀၀၀ကျပ်ဈေးဖြင့် ဈေးအေးနေခဲ့ပြီး တတိယ ပတ်တွင်    ထိပ်စတစ်တင်းကို    ၄၂၀၀၀ကျပ်ဈေးဖြင့်    အရောင်း  အဝယ်ရှိခဲ့ပါသည်။ ဖေဖော်ဝါရီ လပထမပတ်တွင် ပုံမှန်တစ်တင်းကို  ၃၈၀၀၀-၃၉၀၀၀ကျပ်၊ ထိပ်စ ၄၂၀၀၀ ကျပ်ဖြင့် ဖေဖော်ဝါရီလ ဈေးငြိမ်နေခဲ့ပြီး လက်ကျန်လည်းနည်းနေပြီဖြစ်ပါသည်။ ရန်ကုန် မန္တလေး အဝယ်ရှိပြီး တစ်နေ့လျှင် အိတ် ၁၅၀/၂၀၀ခန့်သာရှိ၍ အရောင်းအဝယ်လည်းနည်းနေပြီ ဖြစ်ပါသည်။

ပဲစင်းငုံ

          ပြည်ကုန်စည်ဒိုင်ရှိ ပဲစင်းငုံသီးနှံမှာ ယခင်လဇန်နဝါရီလပထမပတ်တွင် ပဲသစ်များလည်း ဝင်စပြုနေပြီး ပန်းတောင်း၊ ကံမ၊ မင်းတုန်းဘက်မှ အဝင်ရှိသည့်အတွက် ပဲတစ်တင်းကို ၃၆၅၀၀ကျပ်ဈေးဖြင့် ဈေးစဖွင့်ခဲ့ပါသည်။ တစ်နေ့လျှင်အိတ် ၂၀၀/၃၀၀ခန့် အဝင်ရှိပြီး ဝင်သလောက် အရောင်းအဝယ်ဖြစ်ခဲ့၍ တစ်နေ့လျှင် အိတ် ၂၀၀/၃၀၀ခန့် ရန်ကုန်အဝယ်ရှိခဲ့ပါသည်။ ဒုတိယပတ်တွင် ပဲဈေးတက်ခဲ့ပြီး ပဲတစ်တင်းကို ၄၂၀၀၀-၄၃၀၀၀ကျပ်ထိ ဈေးမြင့်ခဲ့ပြီး တတိယ ပတ်တွင် ၄၂၀၀၀ကျပ်ဖြင့် အရောင်းအဝယ် ဖြစ်ခဲ့ပါသည်။ စတုတ္ထပတ်တွင် ပဲတစ်တင်းကို ၄၂၀၀၀-၄၂၂၀၀ကျပ်ဖြင့် ဈေးငြိမ်နေခဲ့ပြီး တစ်နေ့လျှင်အိတ် ၃၀၀/၄၀၀ခန့် ရန်ကုန်ဝယ်လက်နှင့် လှောင်လက်သမားများ အဝယ်ရှိခဲ့ပါသည်။ ယခုလ ဖေဖော်ဝါရီလ ပထမတ်တွင် ပဲစင်းငုံသီးနှံတစ်တင်းကို ၄၃၀၀၀ကျပ် ဒုတိယပတ်တွင်  ၄၁၀၀၀ ကျပ်ဈေးဖြင့် ဈေးကျခဲ့ပါသည်။ တတိယပတ်တွင် ၄၂၀၀၀ကျပ်ဈေးဖြင့် ဈေးပြန်တက်ခဲ့ပြီး ရန်ကုန်ဝယ်လက်အဝယ်ရှိ၍ တစ်ရက်ကိုအိတ် ၃၀၀/၄၀၀ခန့် အရောင်းအဝယ်ဖြစ်ခဲ့ပါသည်။ စတုတ္ထပတ်တွင် ပဲတစ်တင်းကို ၄၃၀၀၀ကျပ်ထိ ဈေးမြင့်လာခဲ့ပြီး အရောင်းအဝယ်မှာ အိတ် ၃၀၀/၄၀၀ခန့်သာ ရန်ကုန်တင်ပို့မှုရှိခဲ့ပါသည်။

ကုလားပဲ

          ယခင်လ ဇန်နဝါရီလ ပထမပတ်တွင် ကုလားပဲဈေးမြင့်ခဲ့ပြီး ပဲတစ်တင်းကို  ၄၆၅၀၀ကျပ်၊ ဒုတိယပတ်တွင် ၄၆၀၀၀ကျပ်ဖြင့် အရောင်းအဝယ်ဖြစ်ခဲ့ပြီး တစ်ရက်ကိုအိတ် ၂၀၀/၃၀၀ခန့် ခွဲစက်သမားနှင့် ရန်ကုန်ဝယ်လက်အဝယ်ရှိခဲ့ပါသည်။ တတိယပတ်တွင် ပဲတစ်တင်းလျှင် ၄၆၀၀၀ကျပ်၊ စတုတ္ထပတ်တွင် ၄၆၀၀၀ကျပ်ဈေးဖြင့် ဈေးငြိမ်နေခဲ့ပါသည်။ နောက်ဆုံးပတ်တွင် ကုလားပဲသစ်များ စတင်ဝင်စပြုနေပြီး မင်းတုန်း၊ ကံမနှင့် ပန်းတောင်းဘက်မှ အဝင်ရှိပြီး ပဲသစ်အဖွင့်ဈေးမှာ တစ်တင်းကို ၄၆၀၀၀ကျပ်ဖြင့် ဈေးဖွင့်ခဲ့ပါသည်။ ဖေဖော်ဝါရီ ပထမပတ်တွင် ဈေးအနည်းငယ်ကျခဲ့ပြီး တစ်တင်းကို ၄၄၅၀၀-၄၃၀၀၀ကျပ်ထိ ဈေးကျလာခဲ့ပါသည်။ ဒုတိယပတ်တွင်ပဲတစ်တင်းကို ၄၀၀၀၀ကျပ်ထိ ဈေးကျလာခဲ့ပြီး တတိယပတ်တွင် ၄၁၀၀၀ကျပ်ဖြင့် ဈေးပြန်တက်ခဲ့၍ ဝယ်လက်မှာ ခွဲစက်သမားများ၊ ရန်ကုန်ဝယ်လက်များ တစ်ရက်ကို အိတ် ၃၀၀/၄၀၀ခန့် အဝယ်ရှိပါသည်။ ပဲခွဲခြမ်းများကို နယ်စုံအဝယ်ရှိခဲ့ကြောင်း သိရှိရပါသည်။

ဘိုကိတ်ပဲ

          ယခင်လ ဇန်နဝါရီလတွင် ဘိုကိတ်တစ်တင်းကို ၃၇၅၀၀ကျပ်၊ ယခုလ ဖေဖော်ဝါရီတွင် ပဲတစ်တင်းကို ၃၁၅၀၀ကျပ်ဖြင့် လက်လီ/လက်ကားပါ အရောင်းအဝယ်ရှိခဲ့ပါသည်။ ယခုလ အရောင်းအဝယ်ဖြစ်မှုမှာ ယခင်လထက် ပိုကောင်းခဲ့ကြောင်း သိရှိရပါသည်။

DOCA(ပဲခူး)

          စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံးမှ မြို့နယ်တာဝန်ခံ ဦးအောင်ဇော်ဦးနှင့် ဝန်ထမ်းများသည် (၇.၃.၂၀၂၂)နေ့နံနက် (၁၀:၃၀)အချိန်တွင် တပင်ရွှေထီးဆန်စပါးနှင့် ပဲမျိုးစုံရောင်းဝယ်ရေး လက္ကားပွဲရုံသို့ သွားရောက်၍ မတ်ပဲဈေးနှုန်း မတ်ပဲထွက်ရှိမှု တင်ပို့မှုနှင့် ဈေးကွက် အခြေအနေများကို ကွင်းဆင်းလေ့လာဆောင်ရွက်ခဲ့ပါသည်။

        အဆိုပါ ကွင်းဆင်းဆောင်ရွက်မှုတွင် တပင်ရွှေထီး ဆန်စပါးနှင့်ပဲမျိုးစုံရောင်းဝယ်ရေး လက္ကားပွဲရုံမှတာဝန်ရှိသူနှင့် တွေ့ဆုံမေးမြန်းရာတွင် လက်ရှိမတ်ပဲတစ်တင်းကို (၄၄၅၀၀)ကျပ်ဖြင့် အရောင်းအဝယ်ဖြစ်နေပြီး နေ့စဉ်မတ်ပဲတင်း(၁၀၀၀)ခန့် လာရောက်ရောင်းချလျှက်ရှိကြောင်း သိရှိရပြီး လာရောက်ရောင်းချသည့် ညောင်ပင်ဂရက်ကျေးရွာမှ ဦးသိန်းသန်းစိုးနှင့် ဆက်လက်တွေ့ဆုံ ဆွေးနွေးရာ မိမိမိုးစပါးရိတ်သိမ်းပြီးချိန်တွင် မတ်ပဲများစိုက်ပျိုးခဲ့ပြီး သွင်းအားစုအနည်းငယ်သာ အသုံးပြု၍ တစ်ဧကလျှင် (၁၀)တင်းနှုန်းခန့်ထွက်ရှိပြီး ယခုဈေးနှင့် ရောင်းရသည့်အတွက် တွက်ခြေကိုက်မှုရှိကြောင်း ပြောကြားခဲ့ပါသည်။

         ထို့အပြင် စစ်ချောင်းကျေးရွာမှတောင်သူဒေါ်သန်းဌေးနှင့်တွေ့ဆုံရာ ညောင်ပင်ဂရက်ကျေးရွာသည် အနိမ့်ကွင်းဖြစ်ပြီး ကုန်းတန်းဖြစ်သော စစ်ချောင်း၊ နတ်စဉ်၊ ကျွဲဒုံး ကျေးရွာများတွင် တစ်ဧက လျှင်မတ်ပဲ(၁၈)တင်းခန့် ထွက်နိုင်ကြောင်း ပြောကြားခဲ့ပါသည်။

          တပင်ရွှေထီးဆန်စပါးနှင့် ပဲမျိုးစုံရောင်းဝယ်ရေး လက္ကားပွဲရုံအနေဖြင့် နေ့စဉ်ဝယ်ယူရရှိသော မတ်ပဲများကို ရန်ကုန်ဘုရင့်နောင်ပွဲရုံနှင့် ရွှေပြည်သာစက်မှုဇုန်သို့ အဆက်မပြတ်ပေးပို့လျှက်ရှိကြောင်း သတင်းရရှိပါသည်။

DOCA(ဧရာဝတီ)

            မန္တလေးတိုင်းဒေသကြီး၊ ညောင်ဦးခရိုင်၊ ကျောက်ပန်းတောင်းမြို့နယ်သည် တိုင်းဒေသကြီးအတွင်းရှိ မြို့နယ်များတွင် ထန်းပင်အများဆုံး စိုက်ပျိုးထွက်ရှိရာ မြို့နယ်တစ်ခုဖြစ်ပါသည်။ထန်းပင် စိုက်ပျိုးမှုအနေဖြင့်(၄၁၇၂)ဧကရှိ ‌ကြောင်းသိရှိရပြီး ယခင်နှစ်များက ထန်းလှီးတောင်သူ နည်းပါး ခြင်း၊ မိုးနည်းခြင်းတို့ကြောင့် ထန်းလျက်ထွက်ရှိမှုနည်းခဲ့ပါသည်။ယခုနှစ်တွင် ထန်းလှီးတောင်သူများ တိုးလာပြီး မိုးကောင်းမွန်ခဲ့သောကြောင့် ယခင်နှစ်ထက် အထွက်နှုန်း သုံးဆခန့် ပိုမိုထွက်ရှိမည်ဟု ခန့်မှန်းကြောင်း ထန်းတောင်သူတစ်ဦးထံမှ သိရပါသည်။ကျောက်ပန်းတောင်းမြို့နယ်အတွင်းရှိ နှစ်ကျပ်ခွဲ၊ တောင်ဇင်၊ လက်ပံပင်၊တောင်ခြေ၊ ကျွန်းခင်းကြီး၊ ဂွေးပင်၊ ကြောင်ရှာတော၊ စမ်းစု စသည့်ကျေးရွာများမှ ထန်းလျက်များ စတင်ထွက်ရှိနေပြီး ကျောက်ပန်းတောင်းမြို့နယ်အနေဖြင့် ဖေဖော်ဝါရီလမှ စတင်၍ထန်းဖိုထန်းလျက်ကို ဈေးကွက်အတွင်းအရောင်းအဝယ် ပြုလုပ်ကြပါ သည်။

            ၂၀၂၀ ခုနှစ်တွင် ကျောက်ပန်းတောင်းမြို့နယ်အနေဖြင့် ထန်းလျက်အထွက်ပိဿာပေါင်း (၁၅၀၀၀၀၀)ခန့်ထွက်ရှိခဲ့ကြောင်းသိရှိရပြီး ထန်းလျက်များစတင်ထွက်ပေါ်ချိန်ဖြစ်သည့် ဖေဖော်ဝါရီလတွင် ထန်းလျက်လုံးသေးတစ်ပိဿာလျှင် (၁၉၀၀)ကျပ်၊လုံးလတ်တစ်ပိဿာလျှင် (၁၈၀၀)ကျပ်၊ လုံးကြီးတစ်ပိဿာလျှင်(၁၇၀၀)ကျပ်တို့ဖြင့် စတင်အရောင်းအဝယ်ဖြစ်ပေါ်ခဲ့ကြောင်း သိရှိရပါသည်။ နှစ်ကုန် ဒီဇင်ဘာလ၌ လုံးသေးတစ်ပိဿာလျှင်(၂၀၅၀)ကျပ်၊လုံးလတ်(၂၀၀၀)ကျပ်၊လုံးကြီး(၁၉၀၀) ကျပ်တို့ဖြင့် ဈေးပိတ်ခဲ့ပါသည်။

         ၂၀၂၁ ခုနှစ်တွင် ကျောက်ပန်းတောင်းမြို့နယ်အနေဖြင့် ထန်းလျက်အထွက် ပိဿာပေါင်း (၁၀၀၀၀၀၀) ခန့် ထွက်ရှိခဲ့ကြောင်း သိရှိရပြီး စတင်ပေါ်ချိန်တွင် လုံးသေးတစ်ပိဿာလျှင်(၁၃၀၀) ကျပ်၊လုံးလတ်မှာ(၁၂၀၀)ကျပ်နှင့် လုံးကြီး(၁၀၅၀)ကျပ်တို့ဖြင့် စတင်အရောင်းအဝယ်ဖြစ်ခဲ့ပါသည်။ ဒီဇင်ဘာလဈေးပိတ်ချိန်တွင် လုံးသေးတစ်ပိဿာလျှင်(၂၄၀၀)ကျပ်၊ လုံးလတ်(၂၃၀၀)ကျပ်နှင့် လုံး ကြီးမှာ(၂၁၅၀) ကျပ် တို့ဖြင့်ဈေးပိတ်ခဲ့ပြီး လက်ကျန်မရှိကြောင်း သိရပါသည်။

           ၂၀၂၂ ခုနှစ်၊ဖေဖော်ဝါရီလမှစတင်၍ ထန်းလျက်များ ဈေးကွက်အတွင်းသို့ ဝင်ရောက်လျက်ရှိရာ လုံးသေးတစ်ပိဿာလျှင်(၂၄၀၀)ကျပ်၊ လုံးလတ်တစ်ပိဿာလျှင်(၂၃၀၀)ကျပ်၊ လုံးကြီးမှာ ထွက်ပေါ်မှု မရှိသေးကြောင်းနှင့်တစ်ရက်လျှင် အဝင်ပိဿာပေါင်း(၁၂၀၀၀)ပိဿာခန့် ဝင်ရောက်နေပြီး အရောင်းအဝယ်ဖြစ်လျက်ရှိကြောင်း သိရပါသည်။ထန်းလျက်ကို ပြည်ပတင်ပို့မှုအနေဖြင့် မရှိသေးကြောင်းနှင့် ပြည်တွင်းဈေးကွက်များဖြစ်သည့် ရန်ကုန်၊မန္တလေး၊နေပြည်တော်၊ တောင်ကြီး၊ မိထ္တီလာ၊နတ်မောက်၊ပြည်၊အောင်လံ၊တောင်တွင်းကြီး၊မကွေး၊ဆင်ဖြူကျွန်း စသည့်မြို့ကြီးများသို့  အဓိက တင်ပို့ရောင်းချလျက်ရှိကြောင်း သိရပါသည်။ထန်းလျက်အား တန်ဖိုးမြှင့်ထုတ်ကုန်(Value Added)အနေဖြင့် ကျောက်ပန်းတောင်းမြို့၊သာယာအေးရပ်ကွက်ရှိ Toddy Palm Village Food Distribution မှ ထန်းလျက်အမှုန့်၊ထန်းသကြားမှုန့်၊ချင်းထန်းလျက်မှုန့်တို့ကို မြန်မာ့ရိုးရာစားသောက်ကုန်တစ်မျိုးဖြစ်တဲ့ ထန်းလျက်ဈေးကွက် ပြန်ပြီးအားကောင်းလာစေရန်၊ထန်းလျက်ကို အသွင်တစ်မျိုးဖြင့် မြန်မာ့လက်ဆောင်တစ်ခုအနေနှင့် နိုင်ငံခြားတိုင်းပြည်များသို့ ထိုးဖောက်နိုင်ရန်၊ထန်းပင်ကို အခြေပြုထားသည့် အခြားသောထုတ်ကုန်များကို ဈေးကွက်ထိုးဖောက်နိုင်ပြီး ထန်းတောင်သူများ၏ ဘဝကိုတစ်ဖက်တစ်လမ်းမှ အထောက်အကူဖြစ်စေဖို့ ရည်ရွယ်၍ထုတ်လုပ်ရောင်းချလျက်ရှိရာ ထန်းလျက်အမှုန့် တစ်ပိဿာလျှင်(၆၀၀၀)ကျပ်၊ထန်းသကြားမှုန့်(၃၀၀)ဂရမ် တစ်ထုပ်လျှင်(၂၀၀၀) ကျပ်၊ ချင်းထန်းလျက်မှုန့်(၁၅)ဂရမ် အထုပ်သေး(၂၀)ထုပ်ပါ တစ်ပါကင်ကို (၃၀၀၀)ကျပ်ဖြင့် ထုပ်လုပ်ရောင်းချလျက်ရှိကြောင်း ထုတ်လုပ်သူလုပ်ငန်းရှင်တစ်ဦးထံမှ သိရှိရပါသည်။

DOCA(မန္တလေး)