ပြည်တွင်းကုန်သွယ်မှုသတင်း

          သင်္ဘောကျွန်းကျေးရွာသည် မကွေးတိုင်းဒေသကြီး၊ မင်းဘူးမြို့နှင့် (၄)မိုင်ခန့်အကွာ ဧရာဝတီမြစ်ကမ်းနံဘေးတွင် တည်ရှိပြီး လယ်ယာစိုက်ပျိုးရေးကိုအခြေခံ၍ အသက်မွေးဝမ်းကျောင်းပြု နေထိုင်သည့် ကျေးရွာတစ်ရွာလည်း ဖြစ်သည်။  ဧရာဝတီမြစ်ရေကျချိန် ဆောင်းရာသီမြေနုကျွန်းများ ပေါ်ချိန်တွင် ပဲထောပတ်၊ ပဲလွန်း၊ ပဲကြီး၊ ကုလားပဲသီးနှံများ စိုက်ပျိုးကြောင်း သိရှိရပါသည်။

         သင်္ဘောကျွန်းကျေးရွာတွင် အိမ်ခြေစုစုပေါင်း(၁၆၀)ခန့်ရှိပြီး စိုက်ဧက (၃၀၀)ကျော်ရှိကြောင်း သိရှိရပါသည်။ မြေနုကျွန်းပေါ်တွင် ပဲထောပတ်၊ ပဲလွန်း၊ ပဲကြီး၊ ကုလားပဲသီးနှံများကို အဓိကထား၍ နှစ်စဉ် အောက်တိုဘာလနှင့် နိုဝင်ဘာလများတွင် စတင်ထွန်ယက်စိုက်ပျိုးကြပါသည်။ ထိုသို့စိုက်ပျိုးရာတွင် ကုလားပဲကို ပက်ကျဲ၍လည်းကောင်း၊ ပဲလွန်း၊ ပဲကြီးတို့ကို ကြောင်းဆွဲစိုက်ပျိုးကြောင်း သိရှိရပါသည်။

          ပဲမျိုးစုံသီးနှံများကို အောက်တိုဘာလနှင့် နိုဝင်ဘာလများတွင် စတင်ထွန်ယက်စိုက်ပျိုးပြီး ဒီဇင်ဘာလတွင် ပန်းပွင့်ကာ ဖေဖော်ဝါရီလတွင် အသီးများစတင်သီးပြီး မတ်လဝက်လောက်တွင် အသီးများကို ခူးစွတ်ရကြောင်း၊ ခူးစွတ်ပြီးအသီးများကို အခြောက်လှမ်းကာ ခွဲစက်ဖြင့် ကြိတ်ခွဲပြီး မကွေးမြို့ရှိ ပွဲရုံများသို့ တင်ပို့ရောင်းချကြောင်း သိရှိရပါသည်။ ယခင်နှစ်က ပဲထောပတ်တစ်တင်းလျှင် ၁၅၀၀ဝိ/- မှ ၂၀၀၀ဝိ/-၊ ပဲလွန်းတစ်တင်းလျှင် ၃၀၀၀ဝိ/- ခန့်၊ ကုလားပဲတစ်တင်းလျှင် ၂၀၀၀ဝိ/-ခန့်ဈေးရရှိခဲ့ပြီး စိုက်ပျိုးဧက (၃)ဧကအတွက် စိုက်ပျိုးခ၊ ပေါင်းနုတ်ခ၊ ပိုးသတ်ဆေးဖြန်းခြင်း ကုန်ကျစရိတ်များ (၁၅)သိန်းခန့် ကုန်ကျပြီး စိုက်ဧက(၃)ဧကလျှင် ပဲမျိုးစုံတင်း (၇၀)ခန့် ထွက်ရှိ၍ (၁)သိန်းခန့်သာ အကျိုးအမြတ်ရရှိပြီး မိသားစုလုပ်အားနုတ်ပါက အရှုံးပေါ်ခဲ့ကြောင်း သိရှိရပါသည်။

        သီးနှံဈေးနှုန်း အတက်အကျပေါ်မူတည်၍ မြေနုကျွန်းစိုက်တောင်သူများမှာ အရှုံးပေါ်သည့် နှစ်များရှိခဲ့သော်လည်း ဧရာဝတီမြစ်ရေကျချိန် မြေနုကျွန်းများပေါ်ချိန်၌ မိမိတို့၏ မိရိုးဖလာလုပ်ငန်း ဖြစ်သည့် မြေနုကျွန်းစိုက်ပျိုးခြင်းကိုသာ နှစ်စဉ်အားထား လုပ်ကိုင်ကြကြောင်း လေ့လာသိရှိရပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

            ပြည်ထောင်စုနယ်မြေ၊ နေပြည်တော်အတွင်း  ၂၀၂၂ခုနှစ် ၊ဖေဖော်ဝါရီလ (ပထမပတ်)တွင် ဖြစ်ပေါ်နေသည့် စားသုံးဆီဈေးနှုန်းများကို နှိုင်းယှဉ်ကြည့်မည်ဆိုပါလျှင် စားအုန်းဆီ(ကန်ဆီ) ၁ ပိဿာ (၅၄၀ဝိ/-) ဝန်းကျင်၊ ဟင်းသီးဟင်းရွက်ဆီ ၁ ပိဿာ (၆၄၀ဝိ/- မှ ၆၆၀ဝိ/-)ဝန်းကျင်နှင့် မြေပဲဆီ ၁ ပိဿာ (၆၅၀ဝိ/- မှ ၈၀၀ဝိ/-)ဝန်းကျင်ခန့် ဖြစ်ပေါ်လျှက် ရှိပါသည်။

          ယခုလက်ရှိ နေပြည်တော်အတွင်းရှိ အငှားကြိတ်ဆီစက်များတွင် မြေပဲဆီကြိတ်ခွဲမည်ဆိုပါက မြေပဲဆံ ၁ ပိဿာ (၂၉၅ဝိ/-)နှုန်းဖြင့် မြေပဲဆံ (၂၅ ပိဿာ)ကြိတ်ခွဲမည်ဆိုပါလျှင် မြေပဲဆီ(၁၀-၄၀)ပိဿာ နှင့် ပဲဖတ်(၁၃)ပိဿာ ထွက်ရှိမည် ဖြစ်ပါသည်။ မြေပဲဆံ(၂၅ ပိဿာ)ကုန်ကျစရိတ်မှာ (၇၃၇၅ဝိ/-)ကုန်ကျမည် ဖြစ်ပြီး မြေပဲဆီ (၁ ပိဿာ)ကုန်ကျစရိတ်မှာ (၇၀၉၁/-)ခန့် ကုန်ကျမည် ဖြစ်ပါသည်။ မည်သို့ဆိုစေကာမူ ပဲဖတ်(၁၃ ပိဿာ)ထွက်ရှိသဖြင့် ပဲဖတ်( ၁ ပိဿာ) (၁၀၀ဝိ/-)နှုန်းဖြင့် တွက်ချက်ပါက (၁၃၀၀ဝိ/-) ရရှိမည် ဖြစ်ပြီး စက်ကြိတ်ခ(၈၀၀ဝိ/-) နှုတ်လျှင် ဆီကြိတ်တောင်သူများအနေဖြင့် ပဲဖတ်ဖိုး အသားတင်(၅၀၀ဝိ/-) ကျန်ရှိမည် ဖြစ်ပါသည်။ ယခုလက်ရှိ ပဲဖတ်တန်ဖိုးသည် ကြိတ်ခွဲခထက်ပိုမိုသဖြင့် ပဲဖတ်ဈေးနှုန်း မြင့်တက် လာမှုသည် ပဲဆီဈေးနှုန်း ကုန်ကျစရိတ်ကို ပိုမိုသက်သာသည့်အနေအထား ဖြစ်နေပါသည်။ ပဲဖတ်ဈေးနှုန်း (၁၀၀၀)ကျပ်နှင့်ပင် စက်မှ ပြန်လည်ပေးချေငွေ (၅၀၀ဝိ/-)ရရှိပြီး မြေပဲဆီ(၁) ပိဿာကုန်စရိတ်တွင်(၄၈ဝိ/-) သက်သာလာမည်ဖြစ်ရာ (၁ ပိဿာ)ကုန်ကျစရိတ်မှာ (၆၆၁၁/-)ကျပ်နှုန်းသာ ကုန်ကျတော့မည် ဖြစ်ပါသည်။ လက်ရှိကာလတွင် ပဲဖတ်ဈေးနှုန်းသည် (၁၂၀ဝိ/-) ဈေးနှုန်းရရှိနေသဖြင့် ဆီကြိတ်တောင်သူများလည်း ပိုမိုတွက်ချေကိုက်နေပါသည်။

        စားသုံးသူများအနေဖြင့်လည်း ယခုလက်ရှိဖြစ်ပေါ်နေသည့် စားအုန်းဆီ(ကန်ဆီ)ဈေးနှုန်း၊ ဟင်းသီး ဟင်းရွက်ဈေးနှုန်းများနှင့် မြေပဲဆီဈေးနှုန်းများအား နှိုင်းယှဉ်ကြည့်ပါက အနည်းငယ်သာကွာခြားမှုရှိနေပြီဖြစ်ရာ ကျန်းမာရေးနှင့်ညီညွတ်ပြီး ဈေးနှုန်းသင့်လျော်သည့် မြေပဲဆီများအား ပြည်တွင်းထုတ်ကုန်များကို အားပေးသည့်အနေဖြင့်  ပြောင်းလဲစားသုံးသင့်ပါကြောင်း  စေတနာရှေ့ထား၍ မျှဝေမှုပြုလိုက်ပါသည်။

စားသုံးသူရေးရာဦးစီးဌာန

ပြည်ထောင်စုနယ်မြေ

          ရှမ်းပြည်နယ်(အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ တာဝန်ရှိသူများသည် (၇.၂.၂၀၂၂) ရက်နေ့ (၁၂:၀၀) အချိန်တွင် ကျိုင်းတုံမြို့နယ်၊ ကတ်ထိုက်အုပ်စု၊ နောင်ရှဲန်ကျေးရွာရှိ အာလူးစိုက်ပျိုးသော တောင်သူဦးစိုင်းနွန်၏ စိုက်ခင်းသို့ အာလူးစိုက်ပျိုးနေမှု အခြေအနေအား ကွင်းဆင်းလေ့လာမေးမြန်းခဲ့ပါသည်။ အာလူးကိုနှစ်စဉ် ဒီဇင်ဘာ၊ ဇန်နဝါရီလတွင် စိုက်ပျိုးလေ့ရှိပြီး၊ ကျိုင်းတုံမြို့နယ်တွင် မိုးစပါးရိတ်သိမ်းပြီး ယခုလိုဆောင်းရာသီအချိန်တွင်သာ အာလူးကိုစိုက်ပျိုးလေ့ရှိကြောင်း သိရှိရပါသည်။

          အာလူးစိုက်မည်ဆိုပါက တစ်ဧကလျှင် မျိုးဥပိဿာ (၃၀၀-၃၅၀) ခန့် စိုက်ပျိုးရကြောင်း၊ စိုက်ပျိုးပြီး ရက် (၂၀) ခန့်တွင် အပင်ပေါက်လေ့ရှိကြောင်း၊ အပင်ပေါက်ပြီး(၇)ရက်မှ (၁၅)ရက် အတွင်း မြေဩဇာနှစ်ကြိမ်ကျွေးရကြောင်းနှင့် (၁၀) ရက်ခန့်တွင် ပိုးသတ်ဆေးဖျန်းပေးရကြောင်း၊ တစ်ခါတစ်ရံ ရာသီဥတုဆိုးဝါးသောနှစ်မျိုးတွင် ပိုးသတ်ဆေးနှင့် မြေဩဇာများလိုအပ်သလို ထပ်မံသုံးပေးရကြောင်း၊ ပိုးကျနေချိန်တွင် အချိန်မှန်ပိုးသတ်ဆေးများမဖျန်းပေးပါက အပင်များကြီးထွားမှုမရှိတော့ပဲ အာလူးဥအသေးများသာရရှိပြီး အထွက်နှုန်းကောင်းမွန်မှုမရှိကြောင်း သိရှိရပါသည်။

          အာလူးမျိုးဥများကို အောင်ပန်းဒေသမှ မှာယူစိုက်ပျိုး၍ မျိုးဥတစ်ပိဿာလျှင် (၂၅၀၀) ကျပ် ပေးရကြောင်း၊ အပင်ပေါက်ပြီးချိန်တွင်ဂရုစိုက်၍ ပိုးသတ်ဆေး၊ မြေဩဇာများကျွေးရပြီး တစ်ဧကလျှင် ပိုးသတ်ဆေးဖိုး (၅)သောင်းကျပ်ခန့်နှင့် မြေဩဇာဖိုး (၃)သိန်းခွဲခန့် ကုန်ကျပါကြောင်း စိုက်ပျိုးပြီး (၃) လခန့်အကြာတွင် အာလူးများစတင်တူးဖော်ရပါကြောင်း တစ်ဧကလျှင် လူ(၄) ဦးဖြင့် (၅) ရက်ခန့်တူးဖော်ရပြီး တစ်ဦးလျှင်လုပ်သားခနှင့် အာလူးတူးခ (၂)သိန်းခွဲခန့် ကုန်ကျပါကြောင်း၊ အာလူးတစ်ဧကလျှင် အထွက်ကောင်းပါက ပိဿာ (၂၄၀၀) ခန့်ထွက်ရှိကြောင်း သိရှိရပါသည်။

          ယခုနှစ်အစောပိုင်းတွင် အာလူးစိုက်ပျိုးသူများဈေးကောင်းရရှိပြီး တစ်ပိဿာလျှင် (၂၀၀၀) ကျပ်ခန့်ရရှိသောကြောင့် တောင်သူများဝင်ငွေကောင်း၍ အဆင်ပြေလျက်ရှိပါသောကြောင့် ကိုဗစ်-၁၉ ရောဂါကြောင့် စီးပွားရေးခက်ခဲနေချိန်တွင် တဖက်တလမ်းမှ စီးပွားရေးကုစားနိုင်မည်ဟု မျှော်လင့်ရကြောင်း သုံးသပ်တင်ပြအပ်ပါသည်။

စားသုံးသူရေးရာဦးစီးဌာန

ရှမ်းပြည်နယ်

          ရှမ်းပြည်နယ်(အရှေ့ပိုင်း)၊ ကျိုင်းတုံမြို့သည် ဆန်စပါးကို အဓိကထားစိုက်ပျိုးကြသော်လည်း စပါးရိတ်သိမ်းပြီးချိန်တွင် လယ်ကွက်များအား ထွန်ယက်ပြီး မီးဖိုချောင်သုံးအသီးအနှံများဖြစ်သည့် ကြက်သွန်၊ ဖရုံ၊ သခွား၊ နံနံ၊ မုန်ညှင်း၊ ပဲသီးအမျိုးမျိုး စသည့်ရာသီပေါ်သီးနှံမျိုးစုံကို အလေ့ကျ စိုက်ပျိုးကြပါသည်။ (၇.၂.၂၀၂၂) ရက်နေ့ (၁၀:၀၀) နာရီအချိန်တွင် စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ တာဝန်ရှိသူများက ကျိုင်းတုံမြို့၊ လွယ်လုံအုပ်စု၊ တုံဆီရွာရှိ တောင်သူတစ်ဦးအား တွေ့ဆုံ၍ ဘိုစားပဲသီးစိုက်ပျိုးမှုနှင့်ပတ်သက်၍ ကွင်းဆင်းလေ့လာမေးမြန်းခဲ့ပါသည်။

          ဘိုစားပဲစိုက်ပျိုးရာတွင် ဘိုစားပဲမျိုးစေ့ (၁) ပြည်လျှင် (၁) ကွက်နှုန်းစိုက်ပျိုးလေ့ရှိပြီး (၄) ကွက် လျှင် (၁) ဧကခန့်ရှိကြောင်း၊ စိုက်ပျိုးပြီး (၁) ပတ်ခန့်တွင် အပင်ပေါက်လေ့ရှိကြောင်း၊ အပင်ပေါက်ပြီး (၁) ပတ် (၁) ကြိမ် ပိုးသတ်ဆေး၊ အရွက်ဖျန်းဆေးများ ဖျန်းပေးရကြောင်း၊ (၁၀) ရက်ခန့်အတွင်း မြေသြဇာကျွေးရပြီး အနည်းဆုံး (၅) ကြိမ်ခန့်ကျွေးရကြောင်း၊ (၁၅) ရက်ခန့်တွင် ဝါးတိုင်ထောင်ပေးရပြီး (၁) ကွက်လျှင် ဝါးတိုင် (၁၀၀၀) ခန့် ထောင်ပေးရကြောင်း သိရှိရပါသည်။

          စိုက်ပျိုးပြီး (၄၅) ရက်တွင် ပဲသီးစတင်ခူးဆွတ်ရကြောင်း၊ (၂) ရက်ခြား (၁) ကြိမ် ခူးဆွတ်ရပြီး (၁) ကြိမ်ခူးလျှင် အစီးရေ (၆၀၀) မှ (၈၀၀) အထိ ရရှိကြောင်း၊ (၅) စီးလျှင် (၁) ပိဿာခန့်ရှိပြီး (၁) စီး လျှင် (၁၅၀) ကျပ်ရရှိကြောင်း၊ တစ်ဆင့်ပြန်လည်ရောင်းချသူများမှ လာရောက်ဝယ်ယူပြီး ရံဖန်ရံခါ တာချီလိတ်မြို့မှ မှာယူသူများထံသို့လည်း ရောင်းချလျက်ရှိကြောင်းနှင့် (၁) ကြိမ်စိုက်ပျိုးလျှင် (၈) ကြိမ်မှ (၁၀) ကြိမ်အထိ ခူးဆွတ်ရကြောင်း သိရှိရပါသည်။

         ဘိုစားပဲစိုက်ပျိုးမှု (၁) ကွက်လျှင် ပိုးသတ်ဆေး၊ အရွက်ဖျန်းဆေး၊ မြေသြဇာနှင့် ဝါးတိုင်တို့အတွက် စုစုပေါင်းကုန်ကျစရိတ် (၂) သိန်းကျပ်ခန့်ကုန်ကျပြီး ပြန်လည်ရရှိငွေအဖြစ် (၈) သိန်းကျပ် ခန့်ရရှိကြောင်း၊ အကျိုးအမြတ်များသောကြောင့် တွင်တွင်ကျယ်ကျယ်စိုက်ပျိုးလိုသော်လည်း တာရှည်ခံထားနိုင်သော သီးနှံမျိုးမဟုတ်သဖြင့် တစ်ပိုင်တစ်နိုင်သာစိုက်ပျိုးလေ့ရှိကြောင်း သိရှိရပါသည်။

         သို့ဖြစ်ပါ၍ ဘိုစားပဲသီးသည် အာလူး၊ ကြက်သွန်ကဲ့သို့သော တာရှည်ခံစားဖိုချောင်သီးနှံမျိုး မဟုတ်သော်လည်း ဒေသနေပြည်သူများအတွက် ရာသီစာသီးနှံအနေဖြင့် စားသုံးရန်ဖူလုံမှုရှိပြီး ရာသီအလိုက် တစ်ပိုင်တစ်နိုင်စိုက်ပျိုးခြင်းဖြင့် တောင်သူများအတွက် အကျိုးအမြတ်ရှိသော သီးနှံတစ်မျိုးဖြစ်ကြောင်း ရေးသားလိုက်ရပါသည်။

စားသုံးသူရေးရာဦးစီးဌာန

ရှမ်းပြည်နယ်

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် “စားသုံး သူများလုံခြုံစိတ်ချမှုရှိစေရေး” မျှော်မှန်းချက်နှင့်အညီ စားသုံးသူကာကွယ်ရေးအသိပညာပေးခြင်းများ၊ စီးပွားရေးလုပ်ငန်းရှင်များ၊ ဒေသတွင်း တစ်နိုင်တစ်ပိုင်စီးပွားရေးလုပ်ငန်းရှင်များ စိုက်ပျိုးရေး/  မွေးမြူရေးလုပ်ကိုင်သည့် တောင်သူ/လုပ်ငန်းရှင်များနှင့် တွေ့ဆုံဆွေးနွေးအသိပညာပေးခြင်း၊ ဈေးကွက် မရောက်မီ/ဈေးကွက်ရောက်ပြီး ကုန်စည်များနှင့်ပတ်သက်၍ ဈေးကွက်စောင့်ကြည့်စစ်ဆေးခြင်း လုပ်ငန်းများ၊ သတင်းအချက်အလက်ဖြန့်ဝေခြင်းလုပ်ငန်းများကို စဉ်ဆက်မပြတ်ဆောင်ရွက်လျက် ရှိပါသည်။

         ရခိုင်ပြည်နယ်၊ စားသုံးသူရေးရာဦးစီးဌာန၊ မြေပုံမြို့နယ်တာဝန်ခံ ဦးစံညွန့်သည် မြောက်ဦးခရိုင် မြေပုံမြို့နယ်အလယ်ပိုင်းရပ်ကွက်ရှိ ဦးအောင်လှတင်+ဒေါ်သန်းသန်းတို့၏ မိသားစု တစ်နိုင်တစ်ပိုင်စီးပွားဖြစ်လုပ်ကိုင်နေသည့်  “ငါးဆုပ်သန့်” လုပ်ငန်းသို့ (၆-၂-၂၀၂၂)ရက်နေ့တွင် ကွင်းဆင်းလေ့လာ၍ သတင်းရယူခြင်းနှင့် စားသုံးသူကာကွယ်ရေးအသိပညာပေးခြင်း ဆောင်ရွက်ခဲ့ ပါသည်။

      “ငါးဆုပ်သန့်” လုပ်ငန်းရှင်နှင့်တွေ့ဆုံမေးမြန်းရာတွင် လွန်ခဲ့သောနှစ်ပေါင်း ဆယ်နှစ် ကျော်ခန့်မှ စတင်ကာ ငါးဆုပ်ပြုလုပ်၍ ရနိုင်သောဒေသထွက်ငါးများကို ဝယ်ယူပြီး ရောနှောကာ ပြုလုပ်ရောင်းချလာခဲ့ရာမှာ ယခုအချိန်တွင် ခေတ်နှင့်အညီ စားသုံးသူများ၏ ဝယ်ယူမှုပုံစံများ ပြောင်းလဲလာသည့်အတွက် စားသုံးသူများ၏ လိုအပ်ချက်အရ ကုန်ကြမ်းဖြစ်သော ငါးကွင်းရှပ် (ရခိုင်အခေါ်-ငညို့)၊ ကကတစ် (ရခိုင်အခေါ်-ငါးသတစ်) ငါးများကို သီးသန့်ဝယ်ယူပြီး ငါးဆုပ် ပြုလုပ်ရောင်းချခဲ့ရာ စားသုံးသူများ ပိုမိုများပြားလာပါကြောင်း၊ ငါးကွင်းရှပ် တစ်ပိဿာ လျှင် ကျပ်-၁၁,၀၀၀၊ ကကတစ် တစ်ပိဿာ-ကျပ်-၁၂၀၀၀ ဈေးနှုန်းများဖြင့် ဝယ်ယူလုပ်ကိုင်လျက်ရှိပြီး ငါးဆုပ်ကြော်ရာတွင် ဆီသန့်ကိုရွေးချယ်ကာ အသုံးပြုထားပါသဖြင့်  အရသာကောင်းမွန်သည့် “ငါးဆုပ်သန့်” ရရှိပါကြောင်း၊ တစ်နေ့လျှင် ငါး အချိန် (၆-၇) ပိဿာခန့်ပြုလုပ်ရကြောင်းနှင့် ငါးဆုပ်အရေအတွက်အားဖြင့် (၇၀၀)ခန့်ရရှိကာ မြေပုံမြို့တွင်း၊ မင်းပြားမြို့၊ မြောက်ဦးမြို့နှင့် အလှူပွဲများတွင် ဝယ်ယူသုံးစွဲကြကြောင်း၊ (၂၅)ဆုပ် တစ်ဗူးလျှင် ကျပ်-၄၁၀၀၊ လက်လီတစ်ဆုပ်လျှင် ကျပ်-၂၀၀ ဈေးနှုန်းဖြင့် ဖြန့်ဖြူးရောင်းချနေကြောင်း၊ တစ်နေ့လျှင် အကျိုးအမြတ်အားဖြင့် ကျပ်-၂၀၀၀၀ ခန့် ဝင်ငွေရရှိပါကြောင်းသိရှိခဲ့ရပါသည်။ ဆက်လက်၍ စားသုံးသူရေးရာဦးစီးဌာနမှ လုပ်ငန်းရှင်အား ငါးဆုပ်သန့်ထုတ်လုပ်မှု အဆင့်ဆင့်တွင်လည်း သန့်ရှင်းစွာထုတ်လုပ်စေရေး၊ တာရှည်ခံဓါတု ဆေးဝါးများ သုံးစွဲမှုမပြုလုပ်စေရေးနှင့် ဘေးအန္တရာယ်ကင်းရှင်းစွာ စားသုံးနိုင်ရေးအတွက် အသိပညာပေးဆွေးနွေးဆောင်ရွက်မှုများ ပြုလုပ်ခဲ့ကြောင်း သတင်းရရှိပါသည်။

DOCA(ရခိုင်)